1.Jaqbel mal-Kummissjoni li l-kundizzjonijiet stabbiliti fl-Artikolu 4(2)(a) tar-Regolament dwar il-FEG huma ssodisfati u li l-Belġju huwa intitolat għal kontribuzzjoni finanzjarja ta’ EUR 7 527 625 skont dak ir-Regolament, somma li tirrappreżenta 85 % tal-kost totali ta’ EUR 8 856 030, liema kost jinkludi n-nefqa għal servizzi personalizzati ta’ EUR 8 738 968 u n-nefqa għall-attivitajiet ta’ tħejjija, ġestjoni, informazzjoni u riklamar, kontroll u rapportar ta’ EUR 117 062;

2.Jinnota li l-awtoritajiet Belġjani ressqu l-applikazzjoni fit-18 ta’ Settembru 2025, u li, wara li l-Kummissjoni rċeviet informazzjoni addizzjonali mingħand il-Belġju, hija ffinalizzat il-valutazzjoni tagħha fid-9 ta’ Jannar 2026 u nnotifikatha lill-Parlament fl-istess jum; jenfasizza l-importanza li jitqassar iż-żmien bejn it-tressiq ta’ applikazzjoni għal assistenza mill-FEG u d-deċiżjoni ta’ finanzjament, filwaqt li jiġu ssalvagwardjati bis-sħiħ id-drittijiet tal-Parlament bħala waħda mill-friegħi tal-awtorità baġitarja;

3.Jinnota li l-applikazzjoni hija relatata ma’ ħaddiema li l-attività tagħhom waqfet f’Audi u f’ħames fornituri u produtturi downstream u li kollha se jkunu benefiċjarji fil-mira;

4.Jieħu nota li ż-żieda fil-fallimenti matul dawn l-aħħar sentejn żiedet b’mod konsiderevoli r-rata tal-qgħad f’xi reġjuni fil-Belġju, b’mod partikolari fi Brussell u f’Hainaut (Wallonia); jenfasizza li r-riskju tal-qgħad huwa korrelatat mal-livell tal-edukazzjoni u li wieħed minn kull żewġ individwi b’livell baxx ta’ edukazzjoni u wieħed minn kull tlieta b’livell medju ta’ edukazzjoni jiffaċċjaw riskju ogħla ta’ qgħad, u li dawk il-gruppi jinkludu 83 % tal-ħaddiema ssensjati; jiddispjaċih li dawk is-sensji se jkomplu jaggravaw is-sitwazzjoni; jistieden lill-awtoritajiet Belġjani jieħdu miżuri biex inaqqsu l-fallimenti u jindirizzaw id-deklin strutturali u reġjonali, filwaqt li jindirizzaw id-disparitajiet soċjali li jwasslu għall-esklużjoni tal-forza tax-xogħol, bħall-inugwaljanzi bejn il-ġeneri u l-livell baxx ta’ edukazzjoni;

5.Jinnota li s-suq globali għall-produzzjoni u l-bejgħ tal-karozzi, b’mod partikolari l-karozzi elettriċi, huwa kkaratterizzat minn kompetizzjoni globali dejjem aktar aggressiva; jenfasizza l-isfidi dejjem akbar li qed jiffaċċjaw il-manifatturi tal-karozzi Ewropej biex iwasslu mudelli innovattivi u affordabbli fis-suq f’segmenti orjentati lejn il-futur bħall-vetturi elettriċi bil-batterija; jiddispjaċih li Audi waqqfet l-attivitajiet fil-Belġju minkejja li xorta kienet qed tagħmel profitt, u li l-produzzjoni se tiġi ttrasferita lejn iċ-Ċina u l-Messiku, u li dan wassal għall-issensjar ta’ 3 414-il ħaddiem; jinnota bi tħassib li l-kundizzjonijiet diffiċli ta’ produzzjoni, li jinkludu nuqqas ta’ aċċess għal sorsi ta’ enerġija orħos u n-nuqqas ta’ implimentazzjoni tagħhom, ikkontribwew għar-rilokazzjoni tal-faċilitajiet ta’ Audi barra mill-Unjoni;

6.Jenfasizza li l-għeluq tal-impjant wara aktar minn 70 sena ta’ operat, minkejja l-produzzjoni tiegħu ta’ vetturi elettriċi, juri li l-isfidi li qed tiffaċċja l-industrija Ewropea huma ta’ natura strutturali, pjuttost milli biss teknoloġiċi;

7.Jisħaq fuq l-importanza li tinstab soluzzjoni sostenibbli għall-għoti ta’ skop ġdid lill-fabbrika magħluqa biex jinħolqu impjiegi ta’ kwalità għolja fir-reġjun; iħeġġeġ lill-awtoritajiet Belġjani jieħdu l-passi meħtieġa biex jiffaċilitaw il-ftuħ ta’ sit tal-manifattura ġdid f’dik li qabel kienet il-fabbrika ta’ Audi;

8.Jenfasizza li l-kwalifiki u l-ħiliet tal-ħaddiema li ngħataw is-sensja jibqgħu kruċjali għal ekonomija Ewropea li tibqa’ valida fil-futur u li twettaq it-tranżizzjoni ekoloġika filwaqt li żżomm bażi industrijali b’saħħitha; iqis għalhekk li l-mobilizzazzjoni tal-FEG jeħtieġ li tiġi inkorporata f’rispons ta’ politika akbar fil-livelli politiċi kollha biex jiġi żgurat li l-ħaddiema affettwati jsibu opportunitajiet adegwati f’konformità mal-kwalifiki u l-ħiliet tagħhom;

9.Ifakkar li, bi qbil mat-trade unions u s-sħab soċjali, is-servizzi personalizzati li jridu jiġu pprovduti lill-ħaddiema jikkonsistu fil-miżuri li ġejjin: servizzi ta’ konsulenza, ta’ informazzjoni u ta’ kollokament; taħriġ, inklużi l-ħiliet fl-IT; jum l-impjiegi; kontribuzzjoni għall-bidu ta’ negozju; inċentivi għall-parteċipazzjoni f’attivitajiet ta’ tfittix ta’ impjieg; enfasi fuq l-importanza li jitrawmu impjiegi ta’ kwalità għolja u orjentati lejn il-futur biex tiġi żgurata reżiljenza ekonomika u soċjali fit-tul;

10.Jenfasizza li l-awtoritajiet Belġjani għandhom jiżguraw il-viżibbiltà tal-finanzjament tal-Unjoni u jirrilevaw il-valur miżjud tiegħu billi jipprovdu informazzjoni effettiva u mmirata lill-benefiċjarji, lill-awtoritajiet reġjonali u lokali, lis-sħab soċjali, u lill-pubbliku ġenerali;

11.Jappella għal evalwazzjonijiet finali bir-reqqa tal-miżuri implimentati, inkluża informazzjoni ċara dwar kif intużaw il-fondi u jekk fil-fatt laħqux l-objettivi li għalihom inħoloq il-FEG, inklużi data u skedi ta’ żmien dwar l-għadd ta’ ħaddiema li ġew integrati mill-ġdid b’suċċess fl-impjiegi u l-impjiegi li aċċedew għalihom, kif ukoll dwar dawk li lestew miżuri ta’ taħriġ u titjib tal-ħiliet kif ukoll l-iskedi ta’ żmien rilevanti;

12.Jinnota li l-Belġju beda joffri servizzi personalizzati lill-benefiċjarji fil-mira fis-17 ta’ Frar 2025 u li, għalhekk, il-perjodu ta’ eleġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni ta’ finanzjament;

13.Jinnota li l-Belġju beda jġarrab nefqa amministrattiva biex jimplimenta l-FEG fid-9 ta’ Lulju 2024 u li, għalhekk, tali nefqa għandha tkun eleġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni ta’ finanzjament;

14.Jinnota li l-awtoritajiet Belġjani ggarantew li l-prinċipji ta’ trattament ugwali u ta’ nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

15.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-kumpaniji, bis-saħħa tal-leġiżlazzjoni nazzjonali jew ta’ ftehimiet kollettivi;

16.Ifakkar li l-FEG huwa strument ta’ solidarjetà u tranżizzjoni ġusta u filwaqt li jipprovdi appoġġ wara li jintilfu l-impjiegi, ma jistax jissostitwixxi politika industrijali tal-Unjoni proattiva, koerenti u kkoordinata sabiex jiġu ssalvagwardjati l-bażi tal-impjiegi industrijali u s-sigurtà soċjali tal-Ewropa u r-reżiljenza ekonomika u soċjali fit-tul u biex jiġi evitat tnaqqis strutturali reġjonali; jenfasizza li l-kompitu primarju tal-Unjoni jrid ikun li l-ewwel nett tipprevjeni tali għeluq billi toħloq il-kundizzjonijiet għal enerġija affordabbli, nadifa u affidabbli biex il-produzzjoni industrijali tinżamm kompetittiva, filwaqt li fl-istess ħin tinvesti fil-ħiliet kemm għall-ħaddiema bi kwalifiki għoljin kif ukoll għall-ħaddiema industrijali; jisħaq, barra minn hekk, fuq il-ħtieġa urġenti ta’ sforzi ta’ kompetittività koerenti u kkoordinati tal-Unjoni, żviluppati fi sħubija mill-qrib mal-Istati Membri, sabiex jiġu ssalvagwardjati l-bażi tal-impjiegi industrijali u s-sigurtà soċjali tal-Ewropa u jissottolinja li ekonomija Ewropea robusta u reżiljenti biss tista’ tipprevjeni b’mod effettiv is-sensji fuq skala kbira, u b’hekk tnaqqas il-ħtieġa ta’ intervent tal-FEG;

17.Japprova d-deċiżjoni annessa ma’ din ir-riżoluzzjoni;

18.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

19.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.