1.á chur i bhfáth gur gá cur chuige cuimsitheach AE chun dul i ngleic le dúshaothrú saothair, lena n-áirítear obair neamhdhleathach agus coireacht eagraithe atá nasctha leis, chomh maith le cineálacha maslacha cleachtas gnó, go háirithe an fhochonraitheoireacht mhaslach agus idirghabháil saothair; á iarraidh, mar sin, go mbeadh straitéis AE ann chun na fadhbanna sin a chomhrac, a bhféadfadh tionchar éagsúil a bheith aici ar fud na mBallstát agus na n-earnálacha; á chur i bhfáth ní hamháin gur sárú ar chearta oibrithe agus ar chearta an duine é an dúshaothrú saothair, ach go mbaineann sé an bonn d’iomaíocht chóir do ghnóthaí chomh maith; á chur in iúl gur geal léi, sa chomhthéacs sin, tiomantas an Choimisiúin chun pacáiste cóir soghluaisteachta a thíolacadh in 2026; á mheabhrú nár cheart go leanfadh leibhéal níos ísle cosanta d’oibrithe as na cuspóirí foriomlána chun iomaíochas cuideachtaí Eorpacha a neartú, simpliú agus ualaí riaracháin neamhriachtanacha a laghdú; á chur i bhfáth gur gá na dlíthe saothair reatha a fhorfheidhmiú ar shlí níos láidre chun cosaint éifeachtach chearta na n-oibrithe agus cothrom iomaíochta sa mhargadh aonair a áirithiú;

2.ag meabhrú na ndúshlán atá os comhair roinnt Ballstát, toisc léirmhínithe éagsúla ar rialacha an mhargaidh aonair, an fhochonraitheoireacht a rialáil ar an leibhéal náisiúnta, mar shampla, trí fhad slabhraí fochonraitheoireachta a theorannú, comhdhliteanas leithleach agus ceanglais chun fostaíochta dírí; á iarraidh ar an gCoimisiún na seansanna a shoiléiriú do na Ballstáit reachtaíocht a ghlacadh atá comhréireach chun aghaidh a thabhairt ar na rioscaí agus ar na fadhbanna a eascraíonn as slabhraí fochonraitheoireachta fada agus casta; á iarraidh ar an gCoimisiún géarú ar na hiarrachtaí chun dúshaothrú saothair a chomhrac;

3.á athdhearbhú a hiarrata ar an gCoimisiún, chun an fhochonraitheoireacht mhaslach a stad agus cearta oibrithe a chosaint, agus chun trédhearcacht agus cuntasacht a neartú ar fud an tslabhra soláthair Rún ó Pharlaimint na hEorpa an 9 Meán Fómhair 2025 ar an soláthar poiblí.;

4.á chur i bhfáth gur cheart dea-chleachtais na mBallstát a chur i gcuntas in aon tionscnamh ar leibhéal an Aontais ina bhféachtar le dul i ngleic le dúshaothrú saothair agus slabhraí casta fochonraitheoireachta, gur cheart é a fhorbairt i ndlúthchomhar leis na comhpháirtithe sóisialta, lena n-áirítear na coistí Eorpacha um idirphlé sóisialta earnála (CDSS), agus gur cheart é a chur in oiriúint do réaltachtaí sonracha earnála; á mheabhrú nach mór d’aon bhearta agus tionscnaimh earnáilsonracha, lena n-áirítear dliteanas comhpháirteach agus leithleach in earnálacha ardriosca, a bheith i gcomhréir le dlí an Aontais agus gan bacainní nach gá ar ghníomhaíochtaí gnó trasteorann a chruthú; á chur i bhfios go láidir go bhféadfaidh bearta agus tionscnaimh earnáilsonracha foráil do cheanglais rialála níos ísle do chuideachtaí in earnálacha ísealriosca chomh maith;

5.á chur i bhfios gur slí é prionsabal an chomhdhliteanais leithligh chun a áirithiú go mbeidh freagracht fhoriomlán ar an bpríomhchonraitheoir as na seirbhísí a sholáthraítear laistigh de shlabhra an fhochonraitheora ina iomláine; á mheas gur féidir le prionsabal den sórt sin a chinntiú go ráthófar cáilíocht, feidhmíocht agus comhlíonadh caighdeán saothair, sóisialta agus sábháilteachta go conarthach ar gach leibhéal den slabhra fochonraitheoireachta; ag tabhairt dá haire gur chinn roinnt Ballstát rialacha dliteanais níos déine a ghlacadh i slabhraí fochonraitheoireachta ná an t-íosmhéid a leagtar amach in Airteagal 12 de Threoir 2014/67/AE;

6.á iarraidh ar an gCoimisiún agus ar na Ballstáit aghaidh a thabhairt ar chleachtais trína ligeann an príomhchonraitheoir gach obair ar fochonradh gan aon obair a dhéanamh é féin, ar a dtugtar ‘fochonraitheoireacht airgeadais’ chomh maith; á chur i bhfios go láidir gur cheart do phríomhchonraitheoirí cuid shainmhínithe de chonradh a dhéanamh iad féin; á athdhearbhú, sa chomhthéacs sin, a hiarrata ar an gCoimisiún measúnú a dhéanamh ar thionchar na gconarthaí poiblí atá á ndéanamh go príomha ag oibrithe díreacha an tairgeora rathúil agus á mholadh go spreagfadh rialacha soláthair phoiblí cuideachtaí chun foireann inmheánach leordhóthanach a bheith acu chun na tionscadail a ndéantar conarthaí poiblí a dhámhachtain dóibh ina leith a chur chun feidhme Rún ó Pharlaimint na hEorpa an 9 Meán Fómhair 2025 ar an soláthar poiblí.;

7.á iarraidh ar an gCoimisiún agus ar na Ballstáit aghaidh a thabhairt ar chleachtais neamhdhleathacha i slabhraí fochonraitheoireachta chun iomaíochas gnó agus dálaí oibre cothroma agus sábháilte a chinntiú; ag spreagadh, sa chomhthéacs sin, caidrimh fostaíochta dhíreacha in earnálacha ardriosca, i gcás ina bhfuil sé indéanta, bailí, comhréireach agus bunaithe ar chúiseanna thar cuimse leas an phobail, amhail oibrithe agus a gcearta a chosaint;

8.á iarraidh ar an gCoimisiún agus ar na Ballstáit a mholadh go n-áireofaí forálacha tairbhe pobail sa soláthar poiblí agus i dtionscadail arna gcistiú ag an Aontas, amhail ceangal a chur ar chonraitheoirí agus ar fhochonraitheoirí cur le forbairt scileanna áitiúla nó le tionscnaimh cuimsithe shóisialta, agus sa tslí sin éifeachtaí iarmharta dearfa ó infheistíochtaí poiblí a chruthú;

9.ag cur béim ar an bhfíoras gur minic a thionscain comhpháirtithe sóisialta, lena n-áirítear ionadaithe FBManna, tionscnaimh náisiúnta agus réigiúnacha chun leibhéil na fochonraitheoireachta a theorannú; á chur i bhfáth gur cheart na tionscnaimh sin a urramú, agus nach mór teorainneacha ar fhochonraitheoireacht a bheith comhréireach;

10.ag tabhairt dá haire gur dúshlán suaithinseach do chigireachtaí saothair iad fad agus castacht na slabhraí fochonraitheoireachta le linn freagracht dhlíthiúil a bhunú as sáruithe ar dhlí an tsaothair, ar gá dul i ngleic leo;

11.á chur i bhfáth a thábhachtaí atá forálacha atá íogair ó thaobh inscne de a áireamh in aon chreat nua;

12.á chur i bhfios go láidir, chun ilroinnt an mhargaidh aonair a theorannú, gur cheart don Choimisiún earnálacha ardriosca a shainmhíniú i ndlúthchomhar leis na Ballstáit agus leis na comhpháirtithe sóisialta, lena n-áirítear CDSS; á chur i bhfáth go bhféadfaidh na Ballstáit a iarraidh ar an gCoimisiún lamháil dóibh comhliosta na n-earnálacha ardriosca a choigeartú dá staid náisiúnta shonrach, i gcás inar gá, chun an cur chuige is fearr is féidir a áirithiú chun dul i ngleic leis an bhfochonraitheoireacht mhaslach, dúshaothrú saothair agus coireacht a bhaineann leis an obair; á chur i bhfios go láidir gur cheart go mbunófaí aon sainaithint agus coigeartú ar earnálacha ardriosca ar shonraí cruinne agus cothrom le dáta;

13.ag tabhairt dá haire go bhféadfadh ionaid oibre ilroinnte agus neamhshábháilte, trédhearcacht agus cuntasacht laghdaithe, agus oibrithe a nochtadh níos mó d’uaireanta an chloig níos faide, pá níos ísle agus sáruithe eile ar dhlí an tsaothair, chomh maith le héiginnteacht post, a bheith mar thoradh ar phríomhghníomhaíochtaí gnó a ligean ar fochonradh Staidéar ó Pharlaimint na hEorpa, 2016, Precarious Employment in Europe: Volume 1: Patterns, Trends and Policy Strategies [Fostaíocht fhorbhásach san Eoraip: Imleabhar 1: Patrúin, Treochtaí agus Straitéisí Beartais]; Eurofound, 2010, Key elements of fair employment and decent work [‘Príomheilimintí na fostaíochta córa agus na hoibre cuibhiúla’]; An Coimisiún Eorpach, an tAirmheán Comhpháirteach Taighde, Outsourcing, working conditions and inequality [Seachfhoinsiú, dálaí oibre agus neamhionannas], 2025.; á chur i bhfáth, i gcomhréir le Treoir 2002/14/CE Treoir 2002/14/CE ó Pharlaimint na hEorpa agus ón gComhairle an 11 Márta 2002 lena mbunaítear creat ginearálta chun fostaithe sa Chomhphobal Eorpach a chur ar an eolas agus chun dul i gcomhairle leo — Dearbhú Comhpháirteach ó Pharlaimint na hEorpa, ón gComhairle agus ón gCoimisiún maidir le hionadaíocht fostaithe (IO L 80, 23.3.2002, lch. 29, ELI:  http://data.europa.eu/eli/dir/2002/14/oj)., nach mór ionadaithe na bhfostaithe a chur ar an eolas agus dul i gcomhairle leo i dtaobh cinntí ar dócha go mbeidh athruithe suaithinseacha ar eagrú na hoibre nó ar chaidreamh conarthach mar thoradh orthu; á iarraidh ar an gCoimisiún agus ar na Ballstáit prionsabal na córa comhionainne a chinntiú, chomh maith le dálaí oibre cuibhiúla do gach oibrí;

14.á chur in iúl gur cúis bhuartha di an easpa soiléireachta dlíthiúla maidir leis an idirdhealú idir fíorphostú agus postú calaoiseach náisiúnach nach ón Aontas iad, chomh maith le mí-úsáid dhlí AE ar sholáthar seirbhíse chun rialacha imirce agus an dlí saothair náisiúnta a shárú; á chur i bhfáth go gcreimeann postuithe calaoiseacha creatlach shóisialta an mhargaidh aonair agus go dtagann siad i dtír ar na ndaoine is leochailí; á iarraidh ar an gCoimisiún, i gcomhréir le tuarascáil Letta, athbhreithniú ar dhúshláin forfheidhmiúcháin, go háirithe sa chomhar trasteorann, agus bearta iomchuí a dhéanamh chun deireadh a chur le postú gan aon fhíornasc idir na hoibrithe agus an Ballstát seolta; ag meabhrú chonclúid fhoriomlán thuarascálacha Letta agus Draghi ar an ngá atá le hiomaíochas an mhargaidh aonair a fheabhsú;

15.ag tabhairt dá haire, agus é ina ábhar imní di, na rioscaí a bhaineann le postú agus é á chomhcheangal le cineálacha maslacha fochonraitheoireachta agus idirghabhála saothair; á iarraidh ar an Údarás Eorpach Saothair féachaint ar úsáid idirghabhálaithe saothair i bpostuithe, lena n-áirítear an baol go n-úsáidfí na socruithe sin chun dliteanais a sheachaint, oibleagáidí slándála sóisialta a shárú agus caighdeáin sláinte agus sábháilteachta a chreimeadh; á iarraidh ar an gCoimisiún aghaidh a thabhairt ar aon mhí-úsáid indéanta as an Treoir maidir le hObair Ghníomhaireachta Shealadach Treoir 2008/104/CE ó Pharlaimint na hEorpa agus ón gComhairle an 19 Samhain 2008 maidir le hobair ghníomhaireachta shealadach (IO L 327, 5.12.2008, lch. 9, ELI: http://data.europa.eu/eli/dir/2008/104/oj). i gcomhthéacs oibrithe a phostú;

16.á chur i bhfáth nach mór cóiríocht a chuireann fostóir nó idirghabhálaí saothair ar fáil d’oibrí cloí leis na caighdeáin cháilíochta, sláinteachais agus sábháilteachta is infheidhme; á chur i bhfios go láidir nach mór cíos na cóiríochta sin a bheith comhréireach agus neamh-idirdhealaitheach; á iarraidh go ndéanfaí cigireachtaí na cóiríochta a chomhtháthú i gcigireachtaí saothair in earnálacha ardriosca chun cosc a chur ar fhostóirí nó ar idirghabhálaithe cóiríocht tháireach, neamhshábháilte nó róphlódaithe a chur ar fáil d’oibrithe; á chur i bhfáth nár cheart go leanfadh tithíocht dhainséarach as forálacha conarthacha ina rialaítear cóiríocht d’oibrí má fhoirceanntar an caidreamh fostaíochta;

17.á iarraidh ar an gCoimisiún dul i dteagmháil leis na Ballstáit chun cur chun feidhme agus forfheidhmiú éifeachtúil na reachtaíochta reatha i dtaobh oibrithe a phostú a áirithiú; á mheabhrú go bhfuil roinnt ionstraimí dlíthiúla glactha ag an Aontas chun dúshaothrú saothair agus obair neamhdhleathach a chomhrac, ar gá a bhforfheidhmiú ar an leibhéal náisiúnta a fheabhsú; á iarraidh ar an gCoimisiún cuntas a dhéanamh den staid, cur chun feidhme agus forfheidhmiú éifeachtúil agus éifeachtach na n-ionstraimí dlí ábhartha ag na Ballstáit a áirithiú agus nósanna imeachta um shárú a sheoladh, i gcás inar gá, i gcoinne Ballstáit nach gcomhallann dlí an Aontais is infheidhme;

18.á thabhairt chun suntais breisluach na gclár poiblí idir-inoibritheach d’idirghabhálaithe saothair ceadúnaithe; á chur i bhfios go láidir gur cheart go mbeadh aon cheadúnú nó clárú faoi réir íoschritéir ionracais; á iarraidh ar an gCoimisiún cuntas a dhéanamh de chleachtais agus de reachtaíocht náisiúnta i dtaobh idirghabhálaithe saothair agus a áirithiú nach ngearrfaidh idirghabhálaithe saothair atá ag feidhmiú san Aontas aon táillí ná nach gcuirfidh siad aon chostais ar oibrithe, go díreach nó go hindíreach, go hiomlán nó go páirteach; á chur i bhfios go láidir gur cheart go ngearrfaí smachtbhannaí athchomhairleacha ar idirghabhálaithe saothair a sháraíonn an dlí is infheidhme nó na comhaontuithe comhchoiteanna, amhail iad a bhaint de chláir phoiblí agus a eisiamh ó chonarthaí poiblí;

19.á iarraidh go n-áiritheofar sna critéir eisiaimh go dtabharfaidh an t-athbhreithniú atá le teacht ar threoracha maidir le soláthar poiblí aghaidh níos fearr ar rioscaí earnálacha sonracha a bhaineann le calaois, éilliú agus insíothlú coiriúil; á chur i bhfáth go n-éilíonn earnálacha éagsúla critéir eisiaimh shaincheaptha ar leithligh, lena léirítear a leochaileachtaí sonracha; á chur i bhfáth go láidir gur cheart cumhacht a thabhairt do na húdaráis chonarthacha chun nósanna imeachta soláthair a oiriúnú chun gníomhaíochtaí coiriúla a chomhrac agus aghaidh a thabhairt orthu; á thabhairt chun suntais, chun éifeachtúlacht agus simpliú níos mó a chur chun cinn, gur cheart na forálacha a bhaineann le forais eisiaimh a chuíchóiriú; á chur i bhfios go láidir gur cheart aon oibreoir eacnamaíoch a sháraíonn a oibleagáidí faoi na dlíthe saothair agus comhshaoil is infheidhme de bhun Airteagal 18(2) de Threoir 2014/24/AE a eisiamh go héifeachtach ón bpróiseas soláthair phoiblí atá i gceist;

20.á chur i bhfios go láidir an luach a bhaineann le cláir ghnó náisiúnta agus le Córas Idirnasctha na gClár Gnó Eorpach d’fhiontair atá ag lorg faisnéise faoi fhochonraitheoirí, do cheardchumainn atá ag iarraidh dul i mbun cómhargála agus do na húdaráis forfheidhmithe; á chur in iúl gur oth léi go bhfuil éagsúlacht mhór ann sa leibhéal faisnéise atá inrochtana i gcláir ghnó náisiúnta; á iarraidh ar an gCoimisiún athbhreithniú a dhéanamh ar conas is féidir leibhéal na faisnéise atá ar fáil go poiblí a fheabhsú, agus leas á bhaint as na dea-chleachtais sna Ballstáit;

21.á chur in iúl gur cúis bhuartha di go bhfuil rioscaí díréireacha sábháilteachta agus sláinte ceirde (OSH) roimh oibrithe ar postú agus oibrithe i slabhraí fochonraitheoireachta toisc slabhraí ilroinnte freagrachta agus comhordú doiléir, go háirithe in earnáil na tógála; á chur i bhfáth, sa chomhthéacs sin, a thábhachtaí atá faisnéis agus comhairliúchán d’oibrithe ar postú agus d’oibrithe i slabhraí fochonraitheoireachta, chomh maith le forfheidhmiú éifeachtach na bhforálacha sláinte agus sábháilteachta mar a leagtar síos i gCoinbhinsiún EIS Uimh. 167; á mheas go bhfuil sé tábhachtach, sa chomhthéacs sin, ról na gcomhpháirtithe sóisialta a neartú le linn uirlisí agus oiliúint a fhorbairt d’oibrithe agus dálaí oibre sláintiúla a chur chun cinn tuilleadh sa chéad chreat straitéiseach eile de chuid an Aontais i dtaobh sláinte agus sábháilteacht ag an obair; á iarraidh ar an gCoimisiún a mheasúnú an gcumhdaítear go leormhaith leis an reachtaíocht reatha OSH cur chun feidhme na n-íoscheanglas sábháilteachta agus sláinte i slabhraí fochonraitheoireachta;

22.á mheabhrú a thábhachtaí atá comhar trasteorann, forfheidhmiú éifeachtúil agus trédhearcacht chun dul i ngleic le líonraí coiriúla a bhaineann leis an obair; ag tacú le comhar neartaithe idir an tÚdarás Eorpach Saothair, Europol, na húdaráis náisiúnta agus comhpháirtithe sóisialta maidir leis sin; á chur i bhfáth gur gá córais forfheidhmiúcháin atá éifeachtúil agus a bhfuil acmhainní maithe acu chun dúshaothrú saothair a chomhrac agus iomaíocht chóir a chur chun cinn sa mhargadh aonair; á chur i bhfáth gur gá dul i ngleic leis an bhfochonraitheoireacht mhaslach a úsáideann socruithe saorga amhail cuideachtaí caocha agus obair ghníomhaireachta shealadach bhréagach; á mheabhrú go gceanglaítear le Treoir 2009/52/CE ar na Ballstáit cigireachtaí éifeachtacha agus leormhaithe a áirithiú chun fostaíocht náisiúnach tríú tír a stopann go neamhdhleathach a rialú agus á iarraidh ar an gCoimisiún agus ar na Ballstáit forfheidhmiú cuí a áirithiú;

23.á chur in iúl gur geal léi an tuarascáil mheastóireachta ón gCoimisiún ar an Údarás Eorpach Saothair agus á iarraidh an athuair Rún ó Pharlaimint na hEorpa an 18 Eanáir 2024 ar an athbhreithniú ar shainordú an Údaráis Eorpaigh Saothair. ar an gCoimisiún sainordú an Údaráis Eorpaigh Saothair a neartú go suaithinseach trí lamháil dó imscrúdú a dhéanamh ar sháruithe líomhnaithe ar dhlí saothair AE agus cigireachtaí a thionscnamh agus a dhéanamh ar chásanna trasteorann ar a thionscnamh féin, trí raon feidhme shainordú na gníomhaireachta a leathnú chun soghluaisteacht saothair náisiúnach tríú tír a chumhdach, trína acmhainneacht anailíse riosca oibríochtúil a fheabhsú, chomh maith le go leor acmhainní a chur ar fáil dó chun a chúraimí a chur i gcrích; á chur i bhfáth gur gá ailíniú breise agus simpliú a dhéanamh ar rialacháin soghluaisteachta saothair agus ar nósanna imeachta rialaithe, lena n-áirítear caighdeáin rialaithe aonfhoirmeacha agus malartú faisnéise níos fearr, faoi stiúir an Údaráis Eorpaigh Saothair; á mholadh go mbunófaí aonaid forfheidhmiúcháin earnáilsonracha san Údarás Eorpach Saothair, go háirithe don fhoirgníocht, don iompar agus don talmhaíocht, agus go bhfeabhsófaí an comhar le comhpháirtithe sóisialta sna hearnálacha faoi seach;

24.á thabhairt chun suntais go bhfuil ról ríthábhachtach ag cigireachtaí saothair i ndúshaothrú saothair a bhrath agus a chosc agus i gcomhlíonadh foriomlán na ndlíthe saothair; ag spreagadh na mBallstát líon a gcigirí saothair agus a dtacaíocht do chigireachtaí saothair a mhéadú; á mheabhrú go leagtar síos cheana le Treoir 2006/22/CE Treoir 2006/22/CE ó Pharlaimint na hEorpa agus ón gComhairle an 15 Márta 2006 maidir le coinníollacha íosta le haghaidh chur chun feidhme Rialachán (CEE) Uimh. 3820/85 ón gComhairle agus Rialachán (CEE) Uimh. 3821/85 ón gComhairle maidir le reachtaíocht shóisialta a bhaineann le gníomhaíochtaí iompair de bhóthar agus lena n-aisghairtear Treoir 88/599/CEE ón gComhairle (IO L 102, 11.4.2006, lch. 35), ELI: http://data.europa.eu/eli/dir/2006/22/oj). íosrialacha chun comhall na reachtaíochta sóisialta in iompar de bhóthar a sheiceáil agus á iarraidh ar an gCoimisiún agus na Ballstáit chun feabhas a chur ar cháilíocht agus ar mhinicíocht cigireachtaí saothair agus chun acmhainn íosta leordhóthanach cigireachta saothair a áirithiú, i gcomhréir le tagarmharc EIS do chigire saothair amháin ar a laghad in aghaidh gach 10 000 oibrí; á chur i bhfáth, d’ainneoin a thábhachtaí atá siad chun cigireachtaí spriocdhírithe a thionscnamh, go bhfuil sásraí gearáin fós tearcúsáidte agus doshroichte, go háirithe d’oibrithe taistil agus d’oibrithe ó thíortha nach bhfuil san Aontas; á mheabhrú, i gcomhréir le Treoir 2009/52/CE, nach mór do na Ballstáit a áirithiú go bhfuil sásraí éifeachtacha ann trínar féidir le náisiúnaigh nach ón Aontas atá i bhfostaíocht neamhdhleathach gearáin a thaisceadh i gcoinne a bhfostóirí;

25.á chur i bhfios go láidir a thábhachtaí atá sonraí cruinne agus cothrom le dáta; ag tabhairt dá haire go bhfuil an leibhéal faisnéise faoi chomhdhéanamh slabhraí na fochonraitheoireachta agus na coireachta a bhaineann leis an obair éagsúil ar fud na hEorpa agus gur dúshlán é sin d’fhorfheidhmiú agus do cheapadh beartas araon; á iarraidh ar an gCoimisiún bailiú sonraí a fheabhsú maidir leis sin agus á thabhairt chun suntais ról an Údaráis Eorpaigh Saothair le linn faisnéis iontaofa a sholáthar faoi threochtaí ginearálta agus iompar maslach i gcásanna trasteorann;

26.á thabhairt chun suntais gur éirigh go maith le tionscnaimh chun láithreáin oibre a shainaithint ar an leibhéal náisiúnta agus earnála, amhail cártaí aitheantais sóisialta; á chur in iúl gur geal léi, sa chomhthéacs sin, go n-áirítear an pas Eorpach slándála sóisialta i gclár oibre 2026 an Choimisiúin; á iarraidh an athuair Rún ó Pharlaimint na hEorpa an 25 Samhain 2021 ar phas slándála sóisialta Eorpach a thabhairt isteach chun forfheidhmiú digiteach na gceart slándála sóisialta agus na soghluaisteachta cothroime a fheabhsú. go ndéanfaí córas an Phas Eorpaigh Slándála Sóisialta a chur i bhfeidhm go pras agus go bhfeabhsófaí cosaint agus forfheidhmiú digiteach na gceart slándála sóisialta agus na soghluaisteachta cothroime, lena n-áirítear fíorú fíor-ama agus malartú faisnéise idir údaráis forfheidhmiúcháin; á iarraidh go ndéanfaí an pas Eorpach slándála sóisialta a chomhtháthú le córais cártaí saothair náisiúnta agus earnála chun idir-inoibritheacht a áirithiú agus cur isteach a sheachaint; á chur i bhfios go láidir gur cheart don phas Eorpach slándála sóisialta ualaí riaracháin nach gá a laghdú, comhall a shimpliú do ghnóthaí agus íoschostais chomhall do FBManna, agus tacú leis an Údarás Eorpach Saothair agus leis na húdaráis náisiúnta le linn mí-úsáid agus gníomhaíochtaí coiriúla a chomhrac; á chur i bhfáth a thábhachtaí atá slándáil agus cosaint láidir sonraí don phas Eorpach slándála sóisialta agus rannpháirtíocht na gcomhpháirtithe sóisialta i ndearadh agus i gcur i bhfeidhm an chórais; á thabhairt dá haire, thairis sin, an tsíorobair ar thionscnaimh eile an Aontais, amhail Tiachóg Céannachta Digití an Aontais, a d’fhéadfadh cumas na n-údarás a fheabhsú chun dul i ngleic le hiompar coiriúil, gan ualach a chur ar FBManna nó costais a mhéadú do thomhaltóirí;

27.á thabhairt dá haire, agus é ina ábhar imní di, gur féidir le daoine aonair atá faoi réir toirmisc trádála i mBallstát amháin na srianta náisiúnta a sheachaint trí ghnó a chlárú agus a oibriú i mBallstát eile, rud a bhaineann an bonn den chomhrac i gcoinne dúshaothrú saothair ar fud an mhargaidh aonair; á iarraidh ar an gCoimisiún malartú faisnéise agus comhar níos éifeachtaí idir na Ballstáit a áirithiú, chomh maith le haitheantas frithpháirteach do thoirmisc trádála agus do smachtbhannaí coiriúla, i gcomhréir leis na Conarthaí, chun sárú na srianta a chosc; á chur i bhfios go láidir a thábhachtaí atá an smacht reachta agus coimircí na trialach córa sa chomhthéacs seo a chomhall; á mholadh go n-úsáidfí Córas Faisnéise an Mhargaidh Inmheánaigh (IMI) chun faisnéis ábhartha a mhalartú go slán tráthúil idir na Ballstáit;

28.á thabhairt dá haire na neamhréireachtaí maidir le córais pionós agus smachtbhannaí ar fud réimsí beartais an Aontais; á chur i bhfáth nach mór pionóis agus smachtbhannaí i leith coireanna a bhaineann leis an obair agus sáruithe ar chearta oibrithe a bheith éifeachtach, athchomhairleach agus comhréireach le cineál, tromchúis agus fad shárú an ghnóthais agus le líon na n-oibrithe dá ndéantar difear; á iarraidh ar an gCoimisiún smachtbhannaí a nascadh le méid nó láimhdeachas cuideachta a scrúdú, chun comhréireacht, díspreagadh agus cothrom na Féinne a áirithiú; á chur i bhfios go láidir gur gá sásra chun pá gan íoc, ranníocaíochtaí slándála sóisialta, fíneálacha agus damáistí a aisghabháil i gcásanna trasteorann;

29.á thabhairt chun suntais fadhb na ngníomhaithe calaoiseacha agus coiriúla i margadh an tsaothair a úsáideann féimheachtaí straitéiseacha agus imeacht gnó chun freagracht as íocaíochtaí gan íoc agus smachtbhannaí a sheachaint; á iarraidh ar an gCoimisiún agus ar na Ballstáit na saincheisteanna a bhaineann le féimheachtaí straitéiseacha agus cuideachtaí a imíonn as a anailísiú, go háirithe i gcásanna trasteorann, agus na tionscnaimh is gá a dhéanamh chun a leitheadúlacht a laghdú;

30.á mheabhrú go bhfuil nascadh an chaiteachais phoiblí le hurraim do chearta oibrithe agus do dhálaí oibre cuibhiúla ar cheann de na modhanna atá ar fáil chun dul i ngleic leis an bhfochonraitheoireacht mhaslach agus leis an gcoireacht a bhaineann leis an obair;

31.á threorú dá hUachtarán an rún seo a chur ar aghaidh chun na Comhairle agus chun an Choimisiúin.