1.ag moladh go ndéanfaidh an Chomhairle an méid seo a leanas:(a)tiomantas láidir an Aontais don chomhionannas inscne a athdhearbhú agus cur chun feidhme iomlán chearta na mban agus na gcailíní a ráthú i ngach gné de ghníomhaíocht sheachtrach an Aontais, lena n-áirítear forbairt, trádáil agus beartas eachtrach, trí chur chuige atá maoinithe go leordhóthanach, cuimsitheach agus trasnach lena dtugtar dúshlán ar steiréitíopaí inscne agus atá bunaithe ar phrionsabal an neamh-idirdhealaithe, chun comhionannas inscne a chur chun cinn go pras;(b)rannpháirtíocht iomlán na Parlaiminte agus a Coiste um Chearta na mBan agus um Chomhionannas Inscne a áirithiú sa phróiseas cinnteoireachta maidir le seasamh an Aontais ag an 70ú seisiún de Choimisiún na Náisiún Aontaithe um Stádas na mBan; a áirithiú go mbeidh faisnéis agus rochtain leordhóthanach ag an bParlaimint faoi dhoiciméad seasaimh an Aontais roimh na caibidlíochtaí; tuilleadh feabhais a chur ar an gcomhar idirinstitiúideach, lena n-áirítear le linn na gcaibidlíochtaí, ionas go ndéanfar tosaíochtaí na Parlaiminte a ionchorprú i gceart; a chur i bhfáth go bhfuil rannpháirtíocht agus ceannaireacht na mban i róil chinnteoireachta fós gann, lena n-áirítear sa bheartas eachtrach agus i gcothú na síochána; a aithint go bhfuil sé léirithe i staidéir go bhfuil seans níos fearr ag comhaontuithe síochána ar thángthas orthu le rannpháirtíocht ghníomhach na mban a bheith inbhuanaithe agus éifeachtach Staidéar – Women’s role in peace processes [Ról na mBan i bpróisis síochána] Parlaimint na hEorpa, an Ard-Stiúrthóireacht um Beartais Inmheánacha an Aontais, an Roinn Beartais um Chearta na Saoránach agus um Ghnóthaí Bunreachtúla, Bealtaine 2019.; a chur in iúl go gcuirtear i bhfios go láidir sna measúnuithe domhanda a rinneadh le déanaí, in ainneoin na ngealltanas atá ann faoi láthair, go bhfuil an dul chun cinn maidir le rannpháirtíocht agus ceannaireacht iomlán, chomhionann agus fhóinteach na mban i bpróisis síochána agus slándála fós teoranta;(c)tiomantas an Aontais don chomhionannas inscne mar thosaíocht chothrománach a athdhearbhú; tacú le luachanna na héagsúlachta, an chomhionannais agus an chuimsithe agus iad a chur chun cinn; béim a leagan ar an ngá atá le huirlis chuimsitheach a fhorbairt chun faireachán a dhéanamh ar chúlú daonlathach agus ar chúlú ar chearta na mban, atá nasctha go dlúth, agus chun cur ina gcoinne; a bheith ar thús cadhnaíochta sa chomhrac domhanda in aghaidh na frithfhreagartha i gcoinne an chomhionannais inscne, agus cáineadh láidir a dhéanamh ar na hionsaithe a rinne gluaiseachtaí frithinscne agus frithchearta, a scaipeann bréaga, a bhaineann an bonn den daonlathas agus a dhíríonn ar chearta na mban agus ar chearta LADTIA+;(e)a áirithiú go mbeidh ionstraimí an Aontais agus ionstraimí idirnáisiúnta comhlántach agus uaillmhianach, agus go mbeidh forálacha láidre substainteacha iontu chun mná agus cailíní a chumhachtú agus chun rochtain ar cheartas a ráthú; a chur i bhfáth go bhfuil an ceart chun cúnaimh dhlíthiúil agus abhcóideachta dlíthiúla bunriachtanach chun rochtain uilíoch agus chomhionann ar cheartas a ráthú do chách agus chun rannpháirtíocht éifeachtach in imeachtaí ábhartha a ráthú; a chur i bhfáth, thairis sin, go bhfuil bacainní struchtúracha agus praiticiúla roimh dhaoine faoi mhíchumas, go háirithe mná agus cailíní faoi mhíchumas, maidir le rochtain a fháil ar cheartas agus ar rannpháirtíocht phoiblí; béim a leagan ar an ngá atá le bearta sonracha chun a áirithiú go gcuimseofar go hiomlán iad agus go mbeidh rochtain uilíoch acu ar chosaint éifeachtach; a áirithiú go léireoidh an tAontas ceannaireacht láidir agus go nglacfaidh sé seasamh aontaithe maidir le córais cheartais chuimsitheacha neamhchlaonta; tacú le creataí dlíthiúla cuimsitheacha lena gcosnaítear cearta na mban agus lena n-áirithítear rannpháirtíocht iomlán agus chomhionann na mban, na gcailíní agus na ndaoine ina n-éagsúlacht uile faoin dlí náisiúnta agus idirnáisiúnta araon; a iarraidh go n-áiritheofaí agus go gcuirfí chun cinn ceart na n-íospartach cúiteamh tráthúil a fháil, ar cúiteamh é a íocann ciontóirí, laistigh d’imeachtaí coiriúla agus go ndéanfaí dea-chleachtas a mhalartú chun íospairt thánaisteach a chosc, lena n-áirítear trí shásraí seachaíochta stáit;(f)gníomhaíocht a dhéanamh chun na gealltanais atá ann cheana maidir le comhionannas inscne agus cumhachtú na mban a chur chun feidhme go hiomlán, lena n-áiritheofar cosaint chearta comhionanna an duine agus saoirsí bunúsacha na mban gan idirdhealú, chun a rannpháirtíocht sa saol poiblí a chur chun cinn;(fa)béim a leagan ar a thábhachtaí atá sé tacú le beartais phoiblí lena gcuirtear an máithreachas chun cinn agus lena dtacaítear leis;(g)béim a leagan ar a thábhachtaí atá sé rochtain éifeachtach ar an gceartas a ráthú do mhná agus do chailíní ar gach leibhéal, lena n-áirítear bealaí tuairiscithe soiléire agus próiseáil thapa beart cosanta agus tacaíochta; deireadh a chur le bacainní, go háirithe do ghrúpaí ban faoi mhíbhuntáiste agus leochaileacha, a mbíonn bacainní rompu go minic maidir le rochtain a fháil ar cheartas, mar gheall ar éifeacht iolraithe na n-acmhainní teoranta agus tearcmhaoinithe laistigh den chóras ceartais, chomh maith le tosca socheacnamaíocha agus soch-chultúrtha agus idirdhealú trasnach; seirbhísí tacaíochta agus cosanta leordhóthanacha íospartach-lárnacha a áirithiú i gcásanna foréigin inscnebhunaithe, agus cosc a chur ar aon chineál íospartha tánaistí nuair a thugtar tuairiscí do na póilíní nó le linn imeachtaí cúirte; a thabhairt chun suntais go bhfuil neamhionannas eacnamaíoch fós ina bhac suntasach ar rochtain a fháil ar cheartas;(h)béim a leagan ar an ngá atá ann apartheid inscne a aithint mar choir in aghaidh an chine dhaonna faoi Reacht na Róimhe agus tacú lena haitheantas idirnáisiúnta, chun rochtain ar cheartas, cuntasacht agus an fhéidearthacht ionchúisimh ag cúirteanna idirnáisiúnta a áirithiú; tacú leis an sainmhíniú ar Mheitheal na Náisiún Aontaithe um Idirdhealú in aghaidh na mBan agus na gCailíní de apartheid inscne mar ghníomhartha laistigh de chóras institiúidithe idirdhealaithe agus forlámhas inscnebhunaithe;(i)malartú dea-chleachtas a áirithiú, lena n-áirítear trí oiliúint bhreithiúnach, maidir le tionchair shíceolaíocha, mheabhracha, fhisiceacha, chomhéigneacha agus airgeadais an fhoréigin inscnebhunaithe; gealltanas a thabhairt gné na hinscne a chomhtháthú sa chinnteoireacht bhreithiúnach agus an ghné sin a spreagadh; an fhéidearthacht dlíodóirí baineanna a chur ar fáil d’íospartaigh arna iarraidh sin; oiliúint atá íogair ó thaobh inscne de agus íospartach-lárnach a chur chun cinn d’oifigigh a bhíonn i dteagmháil le híospartaigh, i gcomhréir lena bhfeidhmeanna, lena n-áirítear póilíní, ionchúisitheoirí agus breithiúna, chun íospairt thánaisteach a chosc, chun dul i ngleic le steiréitíopaí agus claontachtaí inscne, agus chun a áirithiú go gcaithfear go measúil agus go neamh-idirdhealaitheach le híospartaigh;(j)béim a leagan ar a thábhachtaí atá sé a áirithiú go mbeidh faisnéis inrochtana, chuimsitheach agus chomhleanúnach ag mná agus cailíní faoina gcearta, faoina dtacaíocht agus faoina gcosaint, trí gach céim den phróiseas breithiúnach, go háirithe i gcásanna foréigin in aghaidh na mban nó foréigin teaghlaigh, lena n-áirítear trí thionscnaimh múscailte feasachta; béim a leagan ar an ngá atá le tacú le cláir um chumhachtú dlíthiúil an phobail lena gcuidítear le mná agus cailíní a gcearta a thuiscint agus a fheidhmiú agus lena spreagtar seirbhísí tacaíochta ginearálta agus speisialaithe araon a bhunú d’íospartaigh coireanna, agus a gcomhordú éifeachtach agus a modhanna tarchuir a áirithiú; béim a leagan ar an ról lárnach atá ag na seirbhísí sin maidir le híospartaigh a chur ar an eolas faoina gcearta agus maidir lena rochtain ar cheartas a éascú; a áirithiú go mbeidh sé éasca rochtain a fháil ar an bhfaisnéis a chuirtear ar fáil d’íospartaigh agus go mbeidh sí ar fáil i dteanga shimplí; línte cabhracha d’íospartaigh a chur chun cinn agus a n-úsáid agus a áirithiú go mbeidh siad ar fáil trí bhealaí éagsúla, lena n-áirítear teicneolaíochtaí teileafóin, faisnéise agus cumarsáide; a aithint go gcuireann rochtain theoranta ar theicneolaíochtaí faisnéise agus cumarsáide in go leor tíortha ar fud an domhain bac ar leas iomlán a bhaint as acmhainneacht na mban agus na gcailíní;(k)gealltanas a thabhairt rochtain ar chúnamh dlíthiúil a áirithiú d’íospartaigh ó thús imeachtaí sibhialta nó coiriúla agus an cur chuige sin a chur chun cinn ar fud an domhain, in éineacht le comhpháirtithe idirnáisiúnta; a iarraidh go ndéanfaí gné na hinscne a ionchorprú i ngach beartas, dlí, nós imeachta, clár agus cleachtas chun aghaidh a thabhairt ar bhacainní sonracha a bhíonn roimh mhná agus cailíní, lena n-áirítear feasacht theoranta ar chearta, dearcthaí idirdhealaitheacha agus steiréitíopaí inscne laistigh de chórais cheartais, agus infhaighteacht neamhleor seirbhísí speisialaithe, go háirithe i gceantair thuaithe agus iargúlta; an cleachtas a chur chun cinn maidir le measúnú a dhéanamh ar cheart na mban agus na gcailíní chun cúnaimh dhlíthiúil bunaithe ar a n-acmhainní airgeadais féin amháin, neamhspleách ar ioncam a bhfear céile, a gcomhpháirtithe nó a dteaghlach, rud atá ábhartha go háirithe i gcásanna foréigin inscnebhunaithe; a thabhairt chun suntais a thábhachtaí atá sonraí atá imdhealaithe ó thaobh inscne de maidir le rochtain ar cheartas, torthaí cáis, úsáid cúnaimh dhlíthiúil agus bacainní, chun tacú le ceapadh beartas fianaisebhunaithe;(l)ceannaireacht na mban, rannpháirtíocht chomhionann agus ionadaíocht mhéadaithe na mban sa bhreithiúnacht agus ina comhlachtaí rialaithe a chur chun cinn agus céimeanna gníomhacha a ghlacadh chun rochtain leathan na mban ó mhionlaigh agus ó ghrúpaí imeallaithe ar ghairm an dlí a chur chun cinn, d’fhonn bacainní struchtúracha laistigh den chóras ceartais a dhíchur agus breithiúna cothroma ionadaíocha a chothú, agus ar an gcaoi sin comhionannas deiseanna a áirithiú;(m)gníomhaíochtaí agus bearta nithiúla a chur chun cinn agus tacú leo chun rannpháirtíocht agus ceannaireacht na mban i gcinnteoireacht sa saol poiblí a áirithiú, lena n-áirítear i réimsí an bheartais eachtraigh, na cosanta agus na slándála agus coinbhleachtaí agus géarchéimeanna a chosc, a bhainistiú agus a réiteach; béim a leagan ar an ngá atá le modheolaíocht chomhchoiteann rianaithe chun sonraí a bhailiú maidir le rannpháirtíocht na mban sna hearnálacha sin;(n)tacú go gníomhach le Moladh Ginearálta CEDAW 2024 Uimh. 40 maidir le hionadaíocht chomhionann agus chuimsitheach na mban i gcórais chinnteoireachta, a shainmhínítear mar phaireacht 50:50 idir mná agus fir ina n-éagsúlacht uile ó thaobh rochtain chomhionann ar chórais chinnteoireachta agus cumhacht chomhionann laistigh díobh;(o)rannpháirtíocht fhóinteach na mban a spreagadh ar gach leibhéal den chinnteoireacht sa bheartas eachtrach, slándála agus cosanta, agus i réiteach coinbhleachta, san Aontas agus ar fud an domhain araon;(p)gníomhaíocht a dhéanamh chun na gealltanais atá ann cheana maidir le comhionannas inscne agus cumhachtú na mban a chur chun feidhme go práinneach agus go hiomlán, lena n-áiritheofar cosaint chearta comhionanna an duine agus saoirsí bunúsacha na mban gan idirdhealú, lena n-áirítear trí institiúidí agus beartais láidre phoiblí lena ráthaítear comhdheiseanna, chun a rannpháirtíocht éifeachtach agus iomlán sa saol poiblí a chur chun cinn, agus ar an gcaoi sin a rannpháirtíocht i bpróisis chinnteoireachta a éascú; an fhuathchaint ar líne atá dírithe ar mhná agus a tionchar ar a rannpháirtíocht sa saol poiblí a cháineadh, agus tacú le litearthacht sna meáin agus le cláir sábháilteachta digití do mhná agus do chailíní;(q)a chur i bhfáth go gcothaítear torthaí níos fearr do phobail, rochtain ar cheartas agus síocháin níos inbhuanaithe trí mhná agus eagraíochtaí um chearta na mban a chumhachtú agus trí thacú le rannpháirtíocht na mban i gcinnteoireacht a bhaineann le beartas seachtrach agus coinbhleacht; cáineadh soiléir a dhéanamh ar chiorruithe cistiúcháin a rinneadh le déanaí ar eagraíochtaí ban, ar eagraíochtaí um chearta na mban agus ar eagraíochtaí na sochaí sibhialta a dhéanann foréigean inscnebhunaithe a chomhrac agus a chumhachtaíonn mná chun rochtain a fháil ar cheartas; ina theannta sin, cistiú inbhuanaithe agus cosaint dhlíthiúil a áirithiú d’eagraíochtaí feimineacha agus LGBTIQ+, go háirithe grúpaí pobail atá faoi ionsaí mar gheall ar an laghdú atá ag teacht ar an spás sibhialta agus ar dhlíthe sriantacha atá dírithe ar eagraíochtaí neamhrialtasacha;(r)sainordú CSW na Náisiún Aontaithe a chosaint i bhfianaise iarrachtaí na Stát Aontaithe agus na dtíortha ailínithe tosaíochtaí comhaontaithe maidir le comhionannas inscne a lagú, agus a chur in iúl gur cúis bhuartha di go bhféadfadh brú polaitiúil den sórt sin, mar aon le ciorruithe cistiúcháin ar chláir um chomhionannas inscne, an bonn a bhaint d’éifeachtacht agus d’inchreidteacht CSW; dlús a chur le cistiú cabhrach um fhorbairt chun an bhearna atá fágtha tar éis rolladh siar Ghníomhaireacht na Stát Aontaithe um Fhorbairt Idirnáisiúnta a chúiteamh; a athdhearbhú go dtacaíonn sí go hiomlán le hobair Mhná na Náisiún Aontaithe, ar gníomhaí lárnach é i gcóras na Náisiún Aontaithe chun cearta na mban ina n-éagsúlacht uile a chur chun cinn agus na páirtithe leasmhara ábhartha uile a thabhairt le chéile chun athrú beartais a chruthú agus gníomhaíochtaí a chomhordú; tathant ar Bhallstáit uile na Náisiún Aontaithe, in éineacht leis an Aontas, cistiú leormhaith a áirithiú do Mhná na Náisiún Aontaithe; gealltanas a thabhairt cistiú leordhóthanach a chur ar fáil don chomhionannas inscne agus do chearta na mban, lena n-áirítear SRHR;(s)príomhshruthú inscne agus buiséadú inscne a chur i bhfeidhm i réimsí beartais uile an Aontais, lena n-áirítear gníomhaíocht sheachtrach; a chur i bhfáth gur gá do stáit cistiú leormhaith, leordhóthanach agus intuartha a leithdháileadh do chúnamh dlíthiúil inscne-fhreagrúil agus do sheirbhísí tacaíochta, go háirithe do mharthanóirí foréigin inscnebhunaithe, agus rochtain leordhóthanach ar chúiteamh, ós rud é go ndéanann na bacainní atá ann faoi láthair difear díréireach do rochtain na mban ar cheartas; béim a leagan ar a thábhachtaí atá sé aghaidh a thabhairt ar bhacainní praiticiúla, réigiúnacha agus inrochtaineachta a chuireann bac ar rochtain na mban agus na ngrúpaí leochaileacha ar an gceartas, go háirithe i réigiúin thuaithe, iargúlta agus faoi mhíbhuntáiste eacnamaíoch; béim a leagan ar na dúshláin shonracha atá roimh mhná faoi mhíchumas, mná scothaosta agus tuismitheoirí aonair, lena n-áirítear bacainní fisiciúla inrochtaineachta agus easpa seirbhísí tacaíochta saincheaptha; a aithint gur minic a bhíonn cúnamh dlíthiúil tearcmhaoinithe nó go ndéantar tearcluacháil air, rud a chruthaíonn bacainn eile fós do mhná i gcásanna géarchéime a lorgaíonn rochtain ar cheartas, rud a dhéanann difear díréireach do mhná i bpoist shocheacnamaíocha níos ísle agus dóibh siúd is leochailí, ó thaobh rochtain a fháil ar cheartas nuair a sháraítear a gcearta;(t)tiomantas an Aontais a athdhearbhú maidir leis an bhforéigean inscnebhunaithe, lena n-áirítear foréigean gnéasach, a chomhrac agus deireadh a chur leis an tsaoirse ó phionós ina leith; tacú le deireadh a chur le saoirse ó phionós i gcás gach cineál foréigin inscnebhunaithe, lena n-áirítear foréigean teaghlaigh, foréigean gnéasach, gáinneáil agus cleachtais dhíobhálacha; dlús a chur le cur chun feidhme gealltanas idirnáisiúnta chun gach cineál foréigin in aghaidh na mban agus na gcailíní a chosc agus freagairt dó a thuilleadh i réimsí poiblí agus príobháideacha araon, lena n-áirítear éigniú, ciorrú ball giniúna ban, pósadh éigeantais, cleachtais tiontúcháin mar a thugtar orthu, comhroinnt neamhthoiliúil ábhair phearsanta nó ionramháilte, domhainbhrionnuithe agus ábhar a ghintear leis an intleacht shaorga, cibearstalcaireacht, cibearchiapadh, cibearsplancáil, cibirghríosú chun foréigin nó fuatha, fuathchaint agus fuathchoireanna; béim a leagan ar a thábhachtaí atá sé aghaidh a thabhairt ar an mbagairt a bhaineann le teicneolaíocht atá á hionramháil ag IS agus tacú, ar leibhéal an Aontais agus ar an leibhéal idirnáisiúnta, le gníomhaíocht níos láidre i gcoinne an fhoréigin ar líne, a dhéanann difear díréireach do mhná agus a chuireann bac ar a rannpháirtíocht iomlán sa saol poiblí; tathant ar ardáin an-mhór ar líne agus ar innill chuardaigh an-mhór ar líne grinnscrúdú poiblí a dhéanamh ar a measúnuithe riosca bliantúla agus ar a mbearta maolaithe a bhaineann le foréigean inscnebhunaithe chun taighde agus réitigh níos fearr a chumasú;(u)a chur i bhfios go láidir gurb ionann easpa rochtana ar SRHR nó diúltú rochtana ar SRHR, lena n-áirítear ginmhilleadh sábháilte agus dlíthiúil, agus cineál foréigin inscnebhunaithe agus sárú ar chearta an duine agus ar chearta bunúsacha; a iarraidh go ndéanfaí iarrachtaí chun rochtain leathan agus chothrom ar SRHR a áirithiú ar fud an domhain, agus a athdhearbhú gur cuid bhunúsach de SRHR na mban í rochtain ar ghinmhilleadh sábháilte agus dlíthiúil agus go bhfuil sí bunriachtanach dá neamhspleáchas coirp; rochtain shábháilte ar ghinmhilleadh, ar fhrithghiniúint agus ar chúram máthartha a éileamh do chách, go háirithe frithghiniúint éigeandála, tástáil le haghaidh ionfhabhtuithe gnéas-tarchurtha agus próifiolacsas iartheagmhála; rochtain ar sheirbhísí meabhairshláinte atá íogair ó thaobh inscne de a áirithiú do mhná óga agus do dhaoine LADTIA+, agus aitheantas á thabhairt don mheabhairshláinte mar ghné ríthábhachtach den rannpháirtíocht agus den chomhionannas;(v)a áirithiú go ndéanfar rochtain ar SRHR a chur chun cinn go gníomhach i mbeartais sheachtracha an Aontais mar chuid de na SDGanna a bhaint amach;(w)a athdhearbhú go bhfuil éigniú fós ar cheann de na sáruithe is forleithne ar chearta an duine ar fud an domhain; a chur i bhfáth a thábhachtaí atá sé reachtaíocht um éigniú atá bunaithe ar thoiliú a ghlacadh mar ghné bhunriachtanach de chur chuige cuimsitheach chun foréigean gnéasach in aghaidh na mban agus na gcailíní a chomhrac; tacú le sainmhíniú atá bunaithe ar thoiliú ar éigniú mar chaighdeán uilíoch ar fud an domhain, arb é is aidhm dó cosaintí dlíthiúla a fheabhsú agus a áirithiú go saineofar foréigean gnéasach trí easpa toilithe, seachas trí úsáid a bhaint as foréigean, comhéigean nó bagairt amháin; an coincheap a chur chun cinn nach ionann tost agus easpa frithbheartaíochta na n-íospartach agus toiliú; a chur i bhfios go láidir nach dtugtar le tuiscint le toiliú roimh ré ná le caidreamh atá ann cheana go bhfuil toiliú leanúnach nó toiliú amach anseo ann le haghaidh aon ghníomhartha gnéasacha; a iarraidh, i ndáil leis sin, ar gach tír sainmhíniú ar éigniú atá bunaithe ar thoiliú a thabhairt isteach agus rochtain ar cheartas a ráthú do mharthanóirí;(x)úsáid an éignithe agus cineálacha eile foréigin ghnéasaigh mar arm cogaidh a cháineadh go láidir agus a mheabhrú go bhfuil gníomhartha den sórt sin ina gcoireanna cogaidh nó ina gcoireanna in aghaidh an chine dhaonna faoin dlí idirnáisiúnta; oibriú go gníomhach chun ionchúiseamh agus cuntasacht na gcineálacha coireanna sin a áirithiú ar an leibhéal idirnáisiúnta, lena n-áirítear trí Chóras Domhanda Smachtbhannaí an Aontais i ndáil le Cearta an Duine a chur i bhfeidhm; tacaíocht a neartú d’iarrachtaí idirnáisiúnta chun na coireanna sin a dhoiciméadú i gcoinbhleachtaí leanúnacha agus do bhearta coisctheacha; a iarraidh, thairis sin, go dtabharfaí tacaíocht ghníomhach do gach tionscnamh atá dírithe ar chuntasacht a áirithiú do dhéantóirí coire agus ar rochtain ar cheartas a áirithiú do mharthanóirí éignithe mar arm cogaidh, á aithint, i gcomhréir le Rialachán 1820 (2008) ó Chomhairle Slándála na Náisiún Aontaithe, go bhfuil éigniú agus cineálacha eile foréigin ghnéasaigh ina gcoireanna cogaidh, ina gcoireanna in aghaidh an chine dhaonna, nó ina ngníomhartha a chuireann le cinedhíothú; dlúthchomhar Eurojust leis an gCúirt Choiriúil Idirnáisiúnta (ICC) a chur chun cinn maidir le doiciméadú a dhéanamh ar éigniú cogaidh, ar mhí-úsáid agus ar chineálacha eile foréigin ghnéasaigh san Úcráin, agus a iarraidh ar an Aontas, ar Eurojust agus ar an gCúirt Choiriúil Idirnáisiúnta iarrachtaí doiciméadachta atá comhordaithe, bunaithe ar thráma agus íospartach-lárnach a neartú a thuilleadh, agus creataí comhair a chruthú ar fud an domhain do limistéir choinbhleachta eile, chun a áirithiú go ndéanfar íospartaigh a shainaithint, a chosaint agus go mbeidh siad in ann rochtain a fháil ar an gceartas;(y)béim a leagan ar a thábhachtaí atá sé aitheantas iomlán a thabhairt do mhná trasinscneacha mar mhná, ag tabhairt dá haire go bhfuil a gcuimsiú bunriachtanach d’éifeachtacht aon bheartais maidir le comhionannas inscne agus frithfhoréigean; a iarraidh go dtabharfaí aitheantas do mhná trasinscneacha agus go dtabharfaí rochtain chomhionann dóibh ar sheirbhísí cosanta agus tacaíochta;(z)a iarraidh ar na tíortha uile nár dhaingnigh Coinbhinsiún Iostanbúl go fóill é sin a dhéanamh agus glacadh domhanda a chaighdeán cuimsitheach a chur chun cinn chun foréigean in aghaidh na mban agus foréigean teaghlaigh a chomhrac;(aa)a iarraidh ar rialtais agus ar chomhlachtaí idirnáisiúnta aghaidh a thabhairt ar na rioscaí sonracha a bhíonn roimh mhná agus cailíní de bharr foréigin in ionaid ghlactha agus nósanna imeachta measúnaithe aoise a fheabhsú;(ab)tacú le ceart na gcailíní chun oideachais chuimsithigh, chothroim agus ardcháilíochta, mar phríomhspreagadh do chumhachtú agus do bhaint amach an chomhionannais inscne, lena dtabharfar dóibh an t-eolas, na scileanna, na deiseanna agus na cumais atá riachtanach dá saol ar fad, lena gcuirfear ar a gcumas a gcearta a éileamh, rochtain a fháil ar cheartas, páirt iomlán a ghlacadh sa saol poiblí, agus foréigean inscnebhunaithe a chomhrac; a chur i bhfios a thábhachtaí atá sé cumhachtú na mban a chur chun cinn trí oideachas, oiliúint agus foghlaim ar feadh an tsaoil atá cuimsitheach, cothrom agus ar ardchaighdeán, atá ríthábhachtach chun steiréitíopaí, dearcthaí agus claontachtaí inscne ina ngnéithe uile a chomhrac agus chun neamhionannais leanúnacha a chomhrac; a mheabhrú a thábhachtaí atá sé foréigean inscnebhunaithe a chosc trí fheachtais leordhóthanacha agus gníomhaíochtaí eile, lena n-áirítear trí litearthacht sna meáin dhigiteacha a mhéadú, agus trí oideachas ábhartha, spriocdhírithe maidir le caidrimh chuimsitheacha agus gnéasacht atá oiriúnach ó thaobh aoise de, chun eolas faoi shláine coirp a mhéadú; a thabhairt chun suntais go bhfuil gá le tuiscint níos doimhne ar ghluaiseachtaí frithchearta agus frithinscne, lena n-áirítear bréagaisnéis maidir le comhionannas inscne, an feiniméan incel agus fuath ban agus, go háirithe, a léiriú ar líne ar a dtugtar an fearsféar; tacú le beartais níos gníomhaí chun dul i ngleic leis na feiniméin sin agus lena n-insintí;(ac)a chur i bhfios go láidir go bhfuil tionchar díréireach tubaisteach ag cogaidh agus ag coinbhleachtaí ar mhná, agus tacú leis an tsíocháin agus le caibidlíochtaí cuimsitheacha ar fud an domhain mar bhealaí bunriachtanacha chun deireadh a chur le coinbhleachtaí agus leis an bhforéigean a bhíonn os comhair na mban agus na gcailíní sna suíomhanna sin; aitheantas a thabhairt don obair iontach a dhéanann mná atá ag fónamh i misin síochánaíochta na Náisiún Aontaithe trasna na limistéar coinbhleachta; a chur i bhfáth go bhfuil cearta na mban agus comhionannas inscne bunriachtanach don smacht reachta agus do dhaonlathais athléimneacha agus chuimsitheacha; a thabhairt chun suntais, agus é ina ábhar imní di, go leanann na milliúin ban agus cailíní, go háirithe i gcomhthéacs coinbhleachta agus easáitithe, d’idirdhealú, d’fhoréigean agus de dhiúltú dá ndínit agus dá n-inniúlacht gníomhaithe a fhulaingt;(ad)an tAontas a thiomnú do bheartas eachtrach, forbartha agus slándála, atá cuimsitheach agus trasnach, agus tús áite á thabhairt do riachtanais na mban agus chosantóirí chearta an duine LADTIA+;(ae)a chur i bhfáth go bhfuil feimeamharú, a shainmhínítear mar mharú ban agus cailíní a bhaineann le hinscne, ar cheann de na cineálacha foréigin inscnebhunaithe is measa agus gur sárú tromchúiseach ar chearta bunúsacha uilíocha é; ag cáineadh go láidir nach ann do shainmhíniú comhchuibhithe ar an gcoir sin agus na neamhréireachtaí leanúnacha maidir le bailiú agus tuairisciú sonraí ina leith, rud a chuireann bac mór ar chosc éifeachtach agus ar cheapadh beartas fianaisebhunaithe; a iarraidh go dtabharfaí aitheantas domhanda don choir sin agus go ndéanfaí iarrachtaí domhanda chun deireadh a chur leis an bhfeimeamharú;

2.á threorú dá hUachtarán an moladh sin a chur ar aghaidh chuig an gComhairle, chuig an gCoimisiún agus chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála, agus, mar eolas, chuig Ionadaí Speisialta an Aontais Eorpaigh um Chearta an Duine.