1.á chur i bhfios go láidir a thábhachtaí atá sé éiceachórais, gnáthóga agus speicis shláintiúla mhuirí a áirithiú san Aontas;

2.á thabhairt chun suntais go bhfuil ról uathúil ag speicis íogaire sna héiceachórais muirí, agus na tairbhí comhshaoil, eacnamaíocha agus sóisialta a eascraíonn as iad a bhainistiú, a chaomhnú agus a chosaint;

3.á chur i bhfáth gur táscairí luachmhara iad go leor speiceas íogair maidir le sláinte na n-éiceachóras muirí, go dtugann siad luath-rabhadh faoi mhíchothromaíochtaí éiceolaíocha, go gcuireann siad le hathléimneacht na n-éiceachóras, agus go bhfuil tionchar díreach acu ar tháirgiúlacht an iascaigh agus an dobharshaothraithe;

4.ag tathant ar an gCoimisiún agus ar na Ballstáit cur chuige bunaithe ar éiceachórais a chur chun feidhme maidir le bainistiú iascaigh mar aon le cineálacha cur chuige eile lena ndírítear ar speicis íogaire a chaomhnú, agus ag tacú ag an am céanna le rathúnas eacnamaíoch agus sóisialta na n-iascairí, chomh maith lena áirithiú go mbaintear amach spriocanna agus gealltanais idirnáisiúnta an Aontais maidir le LMFCanna agus limistéir a bhfuil ardtábhacht bithéagsúlachta ag baint leo;

5.á iarraidh ar an gCoimisiún agus ar na Ballstáit a áirithiú go léireofar go comhsheasmhach i measúnuithe comhshaoil agus i mbainistiú iascaigh na hathruithe sna éiceachórais arb é an t-athrú aeráide is cúis leo;

6.ag tathant ar an gCoimisiún agus ar na Ballstáit gabhálacha de thaisme ar speicis mhuirí íogaire a laghdú, agus sa chás inar féidir é, deireadh a chur leo, i gcomhréir le hAirteagal 3 de Rialachán (AE) 2019/1241, lena n-áiritheofar nach bagairt ar stádas caomhnaithe na speiceas sin iad na gabhálacha sin;

7.á chur i bhfios go láidir go bhfuil athrú tagtha ar ghnáthóga le blianta beaga anuas, rud a fhágann go bhfuil roinnt speiceas imithe agus go bhfuil speicis nua ag teacht isteach ag an am céanna; á chur i bhfáth, ina leith sin, gur gá feasacht na saoránach a mhéadú, agus go sonrach feasacht iascairí agus slat-iascairí, maidir leis an tábhacht a bhaineann le bailiú sonraí agus maidir leis an ngá atá le bainistiú oiriúnaitheach;

8.á chur i bhfáth a thábhachtaí is atá pleananna bainistíochta eolaíocht-bhunaithe LMFC, lena n-áirítear na gnéithe agus na torthaí comhshaoil, sóisialta agus eacnamaíocha a bhaineann leo, chun a áirithiú go mbeidh na bearta caomhnaithe spriocdhírithe, éifeachtach agus ailínithe leis na riachtanais a bhaineann go sonrach leis an éiceachóras agus go mbeidh a gcur chun feidhme éifeachtach; á thabhairt chun suntais sprioc an Aontais 30 % d’fharraigí an Aontais a chosaint faoi 2030;

9.á mheabhrú nach mór d’iascairí a bheith ina gcuid lárnach den réiteach agus ionadaíocht a bheith acu i ngach comhlacht a thugann comhairle, agus á thabhairt chun suntais, i ndáil leis an méid sin, a thábhachtaí is atá sé ionadaíocht na n-iascairí uile a áirithiú, go háirithe iascairí mionscála agus ceardaíochta; á chur in iúl gur cúis bhuartha di nach n-áirithítear a n-ionadaíocht go leordhóthanach i gcónaí;

10.á iarraidh ar an gCoimisiún agus ar na Ballstáit leas iomlán a bhaint as uirlisí an chomhbheartais iascaigh (CBI), go háirithe bearta teicniúla chun aghaidh a thabhairt ar idirghníomhaíochtaí iascaigh agus chun cosaint speiceas íogair a fheabhsú, agus cúiteamh cothrom éifeachtach á áirithiú d’iascairí atá thíos le cailliúint rochtana ar mheánna iascaireachta traidisiúnta, i gcomhréir le forálacha an Chiste Eorpaigh Mhuirí, Iascaigh agus Dobharshaothraithe; á iarraidh ar an gCoimisiún cur chun feidhme agus forfheidhmiú na reachtaíochta reatha a áirithiú;

11.ag tathant ar na Ballstáit leas iomlán a bhaint as forálacha Airteagal 17 de Rialachán CBI agus deiseanna iascaireachta á leithdháileadh acu, iascairí a dhreasú chun bearta a ghlacadh chun seachghabháil speiceas íogair a íoslaghdú nó a dhíothú agus dreasachtaí a chur ar fáil do shoithí iascaireachta a úsáideann trealamh roghnaitheach iascaireachta nó a úsáideann teicnící iascaireachta ar lú a dtionchar ar an gcomhshaol, agus aird ar leith á tabhairt ar mhionchabhlaigh;

12.á mheabhrú a thábhachtaí is atá na sonraí a bhailítear faoi CBI chun tionchar an iascaigh ar speicis íogaire a shainaithint i gceart agus a thábhachtaí is atá córais faireacháin fheabhsaithe, i gcomhréir le comhairle eolaíoch agus le reachtaíocht an Aontais; á chur i dtreis a thábhachtaí is atá sonraí seachghabhála cuimsitheacha speiceas-sonracha chun bearta maolaithe spriocdhírithe a chumasú, chun bonn eolais a chur faoi straitéisí bainistithe oiriúnaitheacha agus chun glacadh beart cothrom atá dírithe ar an eolaíocht a éascú lena gcuirtear tosca socheacnamaíocha san áireamh freisin agus lena n-áirithítear slándáil bia an Aontais;

13.á thabhairt chun suntais a thábhachtaí is atá cur chuige iomlánaíoch ar fud na réimsí beartais chun rannchuidiú le faireachán, cosaint, athbhunú agus téarnamh speiceas íogair agus gnáthóg íogair a threisiú; ag cur béim, i ndáil leis an méid sin, ar a thábhachtaí is atá sé an reachtaíocht atá ann faoi láthair a chur chun feidhme i ngach réimse beartais ábhartha, a théann níos faide ná na réimsí sin a bhaineann go díreach le CBI;

14.á iarraidh ar an gCoimisiún agus ar na Ballstáit cineálacha cur chuige atá bunaithe ar éiceachórais maidir le bainistiú na muirthimpeallachta a threisiú, ag cur san áireamh idirghníomhaíochtaí speiceas sna cásanna inar féidir sin, mar aon le gach brú ar na éiceachórais mhuirí, lena n-áirítear an t-athrú aeráide agus truailliú, cibé acu ar talamh nó ó fhoinsí eile;

15.ag cur béim ar an bhfíoras go rannchuidíonn limistéir mhuirí faoi chosaint (LMFCanna) a chosnaítear agus a bhainistítear go héifeachtach bunaithe ar an eolaíocht is fearr atá ar fáil, ag brath ar a gcuspóirí caomhnaithe, le gabhálacha de thaisme ar speicis íogaire a íoslaghdú, le limistéir sceite éisc agus iasclainne agus éisc óga a chosaint, agus leis an tionchar ar ghnáthóga íogaire a laghdú;

16.á iarraidh ar an gCoimisiún agus ar na Ballstáit líon na n-éisc a mheasúnú go réigiúnach agus go háitiúil, mar aon le stádas agus treochtaí na speiceas agus na tionchair a d’fhéadfadh a bheith ag líon neamhchothroma éisc ar ghníomhaíochtaí iascaireachta, chun bainistiú iascaigh atá bunaithe ar éiceachórais a áirithiú, lena n-áirítear bearta chun speicis íogaire a chosaint;

17.á iarraidh ar an gCoimisiún agus ar na Ballstáit tacaíocht a mhéadú do chláir eolaíocha maidir le speicis íogaire agus le cineálacha cur chuige bainistíochta, mar a shainaithnítear sa reachtaíocht ábhartha; á thabhairt chun suntais, i roinnt réigiún, go bhfuil tionchar ag speicis íogaire, amhail líon na mbroigheall agus na rónta ag atá ag méadú leo, ar stoic éisc agus ar ghníomhaíochtaí iascaigh agus dobharshaothraithe agus ar speiceas íogair eile; á chur in iúl go bhfuil sí den tuairim go bhfuil na huirlisí is gá sa chreat rialála chun feabhsuithe a cheadú, i bhfianaise stádas áitiúil na speiceas íogair; á iarraidh, dá bhrí sin, ar an gCoimisiún agus ar na Ballstáit machnamh a dhéanamh, i measc na ngníomhaíochtaí atá le déanamh, ar na féidearthachtaí uile dá bhforáiltear sa Treoir maidir le hÉin agus sa Treoir maidir le Gnáthóga chun bainistiú gníomhach agus éifeachtach ar líon na n-iasc a éascú ar bhealach níos fearr agus chun tacú le bainistiú atá bunaithe ar éiceachórais;

18.ag tathant ar an gCoimisiún a áirithiú go mbeidh cur chuige AE ann maidir le bainistiú iascaigh a bheidh ailínithe le CBI, le Straitéis Bhithéagsúlachta an Aontais do 2030 agus le gealltanais idirnáisiúnta an Aontais amhail Creat Domhanda Bithéagsúlachta Kunming-Montreal; á chur i bhfáth, ina leith sin, gur cheart gníomhaíochtaí a dhéanamh chun stop a chur le meath speiceas íogair in éiceachórais mhuirí an Aontais, lena n-áirítear trí bhearta caomhnaithe iomchuí agus cosaint gnáthóige a chur chun feidhme;

19.Á iarraidh ar an gCoimisiún gníomhaíocht a dhéanamh laistigh de na heagraíochtaí réigiúnacha bainistithe iascaigh (ERBInna) chun seachghabháil speiceas íogair a laghdú agus, sna cásanna inar féidir é, a dhíothú agus chun trádáil agus allmhairiú táirgí bia mara a shrianadh agus bearta i gcoinne iascaireacht neamhdhleathach, neamhthuairiscithe agus neamhrialáilte a neartú, lena n-áirítear trí rialú custaim agus comhoibriú feabhsaithe le comhpháirtithe ERBI;

20.á chur i bhfios go láidir gur bagairt iad speicis choimhthíocha ionracha don iascach agus don dobharshaothrú, don bhithéagsúlacht mhuirí dhúchasach agus d’éiceachórais mhuirí dhúchasacha, rud a imríonn tionchar dá réir ar ioncam iascairí agus phobail cois cósta;

21.Á thabhairt chun suntais rannchuidiú ríthábhachtach an iascaigh cois cósta ar mhionscála le geilleagair áitiúla agus le slándáil bia an Aontais, agus á chur i bhfios go láidir go bhfuil bagairtí atá ag méadú leo i gcónaí os a gcomhair ó strusairí comhshaoil amhail speicis ionracha agus an t-athrú aeráide, lena n-áirítear gluaiseacht ollmhór speiceas áirithe, go sonrach mar gheall ar uiscí atá á dtéamh, feiniméan is cúis le caillteanais thromchúiseacha, go háirithe d’fheirmeoirí sliogéisc, a ngearrtar pionós dúbailte orthu toisc laghdú ar tháirgeadh agus méadú ar na costais de dheasca creachóireachta;

22.á mheabhrú go ndéantar rialú docht ar 88 speicis choimhthíocha ionracha san Aontas, lena n-áirítear 47 speiceas ainmhithe agus 41 speiceas plandaí ar ábhar imní don Aontas iad;

23.á chur in iúl gurb oth léi nach n-aithnítear go hiomlán sa liosta reatha speiceas is ábhar imní don Aontas bagairt na speiceas coimhthíoch ionrach ar iascach, ar dhobharshaothrú agus ar mhuirthimpeallacht an Aontais toisc nach bhfuil ach dhá speiceas mhuirí (Plotosus lineatus agus Rugulopteryx okamurae) san áireamh ar an liosta, in éineacht le speicis áirithe a fhaightear i dtimpeallachtaí breacsháile; á iarraidh go bhfeabhsófaí an liosta, bunaithe ar chomhairle eolaíoch agus ar mheasúnuithe riosca atá cothrom le dáta;

24.á chur i bhfios gur gá speicis a bhainistiú go hiomchuí agus ag tabhairt dá haire, agus é ina ábhar imní di, go bhfuil méadú tagtha ar speicis i réigiúin áirithe, amhail:(a)speicis oisrí agus piardóga coimhthíocha de chuid an Aigéin Chiúin i ndeisceart na Mara Thuaidh, go háirithe ar feadh chósta na hÍsiltíre;(b)an mac siobháin dubh a imríonn tionchar ar an éiceachóras agus atá ina bhagairt shonrach ar an séacla, ar an leathóg agus ar an mac siobháin dúchasach go háirithe timpeall uiscí na Mara Thuaidh;(c)an portán gorm, an Pemigrapsus takanoi (cineál portáin), an Mnemiopsis leidyi agus an Gonionemus vertens (cineálacha smugairle róin) san Atlantach Thoir Thuaidh;(d)an dragainéad coiteann (Pterois miles), an t-iasc Fistularia commersonii agus an t-iasc bolgach geal-leicneach (Lagocephalus sceleratus), timpeall na Gréige agus na Cipire;(e)an diúilicín riabhach (Dreissena polymorpha), a tugadh isteach san Ebro, agus cat fionnuisce Eorpach (Silurus glanis), sa Spáinn;(f)an algaí Áiseach Rugulopteryx okamurae, go háirithe sa Mheánmhuir Thiar;

25.á iarraidh ar an gCoimisiún agus ar na Ballstáit córais faireacháin réigiúnacha a bhaineann go sonrach le speicis a bhunú, lena n-áirítear straitéisí comhordaithe luath-rabhaidh agus freagartha do speicis choimhthíocha a imríonn tionchar ar ghnáthóga atá ábhartha ó thaobh an gheilleagair de;

26.á chur in iúl gurb oth léi an easpa clár faireacháin sonrach do speicis choimhthíocha ionracha muirí, agus á iarraidh go mbeadh modhanna faireacháin feabhsaithe ann agus go ndéanfaí táscairí a chomhchuibhiú ar fud an Aontais agus go méadófaí an tacaíocht theicniúil agus airgeadais, go sonrach do na réigiúin is forimeallaí, a dteastaíonn sainchistiú breise uaithi toisc a mbithéagsúlacht uathúil agus a n-iargúltacht;

27.á mholadh go mbunófaí modheolaíocht agus luachanna chun tairseach a shocrú do réigiúin agus d’fhoréigiúin mhuirí uile na hEorpa, ag tabhairt san áireamh an tionchar ar an iascach agus ar an dobharshaothrú, ar inbhainistitheacht na gconairí agus an gá atá le tuilleadh den rialú dian a dhéanamh cabhlaigh AE agus neamh-AE, ag díriú ar speicis ionracha, agus chun an Coinbhinsiún Idirnáisiúnta um Rialú agus Bainistiú Uisce Ballasta agus Dríodar Longa fhorfheidhmiú agus treoirlínte smálaithe cabhlach a chur i bhfeidhm;

28.á thabhairt chun suntais na naisc fhéideartha idir speicis choimhthíocha ionracha a tugadh isteach in éiceachórais talún agus fionnuisce agus iad siúd sna haigéin agus sna farraigí, agus a dtionchar ar an iascach agus ar an dobharshaothrú; á iarraidh ar an gCoimisiún straitéis chuimsitheach a fhorbairt chun aghaidh a thabhairt ar an tsaincheist sin;

29.á chur i bhfáth gur dearbhthosaíocht é cur chuige bainistíochta iomlánaíoch coisctheach atá bunaithe ar chonairí ilveicteora chun cosc éifeachtach a chur ar thabhairt isteach speicis choimhthíocha ionracha muirí agus chun dul i ngleic lena leathadh agus chun aghaidh a thabhairt ar bhunchúiseanna a leata; ag spreagadh na mBallstát chun cur le húsáid ‘faire na fáistine’ agus teicnící núíosacha amhail eDNA, an intleacht shaorga agus faireachán uathoibrithe, chomh maith le hiascairí, slat-iascairí, pobail cois cósta agus eolaíocht na saoránach a bheith páirteach mar uirlisí agus mar acmhainn chun go n-aithneofaí agus go dtabharfaí tosaíocht do speicis choimhthíocha ionracha atá nua, ag teacht chun tosaigh, agus iadsan ar ardriosca don iascach agus don dobharshaothrú iad; ag tathant ar an gCoimisiún an cur chuige comhtháite sin a chur i bhfeidhm maidir le cur chun feidhme an Chomhshocraithe Eorpaigh um an Aigéan chun gníomhaíocht chomhordaithe a áirithiú ar fud na n-earnálacha agus ar fud na mBallstát;

30.á iarraidh ar na Ballstáit cumarsáid, comhordú agus comhar a neartú, go sonrach i gceantair trasteorann, le linn dóibh an bhithshlándáil a ghiaráil chun bearta a chur chun feidhme go mear maidir le speicis choimhthíocha muirí a bhrath go luath agus a dhíothú go tapa, chomh maith le speicis atá leata go forleathan cheana féin a bhainistiú; á iarraidh, thairis sin, ar an gCoimisiún comhoibriú leis na Ballstáit chun na gníomhaíochtaí sin a leathnú trí chomhoibriú le tíortha nach bhfuil san Aontas a roinneann an t-imchuach farraige céanna;

31.á mholadh go mbeidh comhar méadaithe ann idir institiúidí eolaíocha agus gníomhaireachtaí an Aontais chun feabhas a chur ar aistriú eolais agus ar thaighde feidhmeach maidir le leathadh, tionchar agus rialú na speiceas muirí ionrach;

32.á chur i bhfios go láidir gur pointe te ar leith í an Mheánmhuir, atá, de réir na hEagraíochta Bia agus Talmhaíochta, ag téamh 20 % níos tapúla ná an chuid eile den domhan, ina bhfuil níos mó speicis choimhthíocha ionracha ná in aon fharraige eile ar fud an domhain, agus go bhfuil tionchar diúltach suntasach aige sin ar éiceachórais mhuirí agus ar na hearnálacha iascaigh agus dobharshaothraithe, agus dá bhrí sin gur gá aird ar leith a thabhairt uirthi; ag tathant ar an gCoimisiún agus ar na Ballstáit, i ndáil leis sin, acmhainní breise a leithdháileadh agus bearta práinneacha a bhunú chun stop a chur le leathadh na speiceas sin san imchuach farraige sin;

33.á iarraidh ar an gCoimisiún tacú leis an gCoimisiún Ginearálta Iascaigh don Mheánmhuir ina thionscnaimh faireacháin eolaíoch agus ina threoirthionscadail chun aghaidh a thabhairt ar na dúshláin a bhaineann le speicis mhuirí ionracha;

34.á iarraidh ar an gCoimisiún cistiú sonrach a chur ar fáil, laistigh de chreat an Chiste Eorpaigh Mhuirí, Iascaigh agus Dobharshaothraithe agus de cláir bhuiséadacha eile, chun tacú le taighde ar speicis ionracha agus lena gcosc agus lena ndíothú nó, i gcás nach bhfuil a ndíothú indéanta, le bainistiú a leata agus leis an téarnamh ó thionchar an leata, i gcomhar le hiascairí, le húdaráis áitiúla agus le heagraíochtaí eolaíocha; á athdhearbhú go gcreideann sí gur cheart cistiú den sórt sin a chur ar fáil sa chéad chreat airgeadais ilbhliantúil eile;

35.á thabhairt chun suntais a thábhachtaí is atá Córas Fógartha EASIN, go háirithe chun tuairisciú go tráthúil cuimsitheach ar bhraith nua, ar bhearta díothaithe agus ar bhraith rialuithe oifigiúla; ag tathant ar na Ballstáit an córas a fheabhsú trí fhaisnéis bhreise a chur ar fáil, go sonrach sonraí dáileacháin, le faisnéise a fhaightear ó iascairí, ó dhobharshaothraithe agus ó gheallsealbhóirí ábhartha eile ach go háirithe;

36.ag meabhrú ghné idirnáisiúnta na speiseas coimhthíoch ionrach agus á mholadh go dtreiseodh an tAontas a chuid gníomhaíochtaí i ndáil leis sin, ag baint úsáid as na fóraim idirnáisiúnta uile atá ar fáil agus, go sonrach, na heagraíochtaí réigiúnacha bainistithe iascaigh, an Coinbhinsiún maidir leis an Éagsúlacht Bhitheolaíoch agus Creat Domhanda Bithéagsúlachta Kunming-Montreal; á iarraidh ar an Aontas feabhas a chur ar an gcomhroinnt chomhoibríoch eolais agus ar mhalartuithe foghlama frithpháirteacha le heagraíochtaí idirnáisiúnta eile agus le tíortha nach bhfuil san Aontas;

37.á chur i bhfios go láidir an poitéinseal maidir le comhoibriú le tíortha nach bhfuil san Aontas a bhfuil an t-imchuach farraige céanna acu leis, lena n-áirítear trí eagraíochtaí réigiúnacha bainistithe iascaigh, chun dea-chleachtas a chomhroinnt, infheistíocht a ghiaráil agus spriocanna comhchoiteanna a bhunú chun dul i ngleic le tionchar speiseas coimhthíoch ionrach;

38.á chur i bhfáth go bhfuil tionchair dhiúltacha shuntasacha ag speisis choimhthíocha ionracha ar an mbithéagsúlacht mhuirí agus ar éiceachórais mhuirí, ar ghníomhaíochtaí an gheilleagair ghoirm, lena n-áirítear iascach agus dobharshaothrú, agus ar ghníomhaíochtaí eacnamaíocha eile nach mbaineann leis an bhfarraige, ar phobail cois cósta agus ar an tsochaí ina hiomláine; á mheas go bhfuil sé ríthábhachtach machnamh níos leithne a dhéanamh ar iarmhairtí sóisialta, eacnamaíocha agus cultúrtha na speiseas coimhthíoch ionrach, ní hamháin cailliúint na bithéagsúlachta agus an tionchar ar éiceachórais, chun ionraí nua a chosc go héifeachtach agus chun bearta maolaithe rathúla a chur chun feidhme;

39.ag tathant ar an gCoimisiún táscaire tiomnaithe a fhorbairt do speicis íogaire agus ionracha i bhfarraigí an Aontais, ag tógáil san áireamh liostaí ar nós Liosta Dearg IUCN, le cur san áireamh i bhfoilseacháin Eurostat a bhaineann leis na Spriocanna Forbartha Inbhuanaithe, chun faireachán níos fearr a dhéanamh ar an leathadh, agus ar na hiarrachtaí caomhnaithe agus bainistíochta eile;

40.á iarraidh ar an gCoimisiún cistiú le haghaidh taighde ar speisis choimhthíocha ionracha agus ar réitigh atá neamhdhíobhálach don chomhshaol chun iad a bhainistiú agus a rialú ar bhealach inbhuanaithe a chomhtháthú i dtionscadail de chuid na gclár Eorpach um thaighde agus nuálaíocht amach anseo;

41.á chur i bhfios go láidir a thábhachtaí atá sé tacú leis na hoibreoirí iascaigh agus dobharshaothraithe a ndéantar difear dóibh, trí scéimeanna cúitimh agus cistí oiriúnaithe, i gcomhréir leis na forálacha airgeadais atá ann cheana, go háirithe i limistéir a bhfuil caillteanas díreach eacnamaíoch ag bagairt orthu mar gheall ar speicis ionracha; á chur i bhfáth gur gá dreasachtaí spriocdhírithe airgeadais agus rialála a chur ar fáil chun gníomhaíochtaí spriocdhírithe ‘gabháil-agus-bain’ a spreagadh do speicis ionracha ag iascairí áitiúla in uiscí cois cósta agus in uiscebhealaí intíre, mar bhealach chun brú éiceolaíoch a laghdú agus tacú le slite beatha áitiúla ag an am céanna; á chur i bhfios go láidir go bhféadfadh ról a bheith ag scéimeanna árachais chun aghaidh a thabhairt ar an tsaincheist, go sonrach na hiarmhairtí d’fheirmeoirí sliogéisc, do tháirgeoirí dobharshaothraithe agus d’iascairí;

42.á iarraidh ar na Ballstáit agus ar an gCoimisiún feachtais feasachta a fhorbairt chun iascairí, feirmeoirí éisc agus sliogéisc, geallsealbhóirí san earnáil iascaireachta, lena n-áirítear slat-iascairí, agus an pobal i gcoitinne a chur ar an eolas agus a rannpháirtiú maidir le tabhairt isteach, brath agus tionchair na speisias coimhthíoch ionrach, maidir lena n-éifeachtaí comhshaoil agus eacnamaíocha, agus bealaí chun na rioscaí a bhaineann lena dtabhairt isteach agus lena leathadh a íoslaghdú;

43.á mholadh, sa chás ina bhfuil sé indéanta, go bhforbrófaí cláir lena ndírítear ar speicis ionracha arb é is aidhm dóibh ná an rialú a fheabhsú maidir lena líon agus deiseanna cúitimh a chur ar fáil d’iascairí;

44.á mheas gur féidir le bainistiú speiseas coimhthíoch ionrach deiseanna a chur ar fáil i gcomhair ioncam sealadach breise trí nuálaíocht fheidhmeach chun táirgí breisluacha a ghiniúint amhail bithleasacháin agus substráití talmhaíochta a thacaíonn le rialú na speiceas sin, agus, sa chás inar féidir é, lena ndíothú; á iarraidh ar an gCoimisiún taighde agus aistriú teicneolaíochta sa réimse sin a mhaoiniú;

45.á chur i bhfáth, i gcás nach bhfuil sé indéanta speicis ionracha a dhíothú, gur féidir le saothrú speiceas ionrach lena gcaitheamh ag daoine ioncam sealadach breise a chur ar fáil d’iascairí agus cur leis an saibhreas a théann chun tairbhe do gheilleagair áitiúla san Aontas;

46.á chur in iúl gur geal léi an úsáid eacnamaíoch shealadach a bhaintear as roinnt speiceas coimhthíoch ionrach, amhail algaí, chun críocha bia agus neamhbhia; á chur i bhfios go bhféadfaí beatha ainmhithe agus éisc, cógaisíocht, pacáistíocht, cosmaidí nó bithbhreoslaí a áireamh ar na críocha sin, seachas díreach bia lena chaitheamh ag daoine;

47.á athdhearbhú gurb é díothú na speiseas coimhthíoch ionrach an sprioc dheiridh i gcónaí; ag cur béim ar an bhfíoras, ina leith sin, gur cheart spleáchas eacnamaíoch ar leas a bhaint as speisis choimhthíocha ionracha a bheith sealadach nó tánaisteach i gcónaí agus nár cheart go spreagfaí mar thoradh air go scaipfí na speicis sin nó go gcuirfí ar an margadh iad;

48.á iarraidh go dtabharfaí tacaíocht airgeadais mhéadaithe agus thiomnaithe chun feabhas a chur ar bhainistiú agus ar chosaint éifeachtach slite beatha cois cósta agus éiceachóras muirí agus ar chaomhnú speiceas íogair, agus go mbeadh córais faisnéise, faireacháin agus luath-rabhaidh ann maidir le speisis choimhthíocha ionracha ar an leibhéal réigiúnach, ar an leibhéal náisiúnta agus ar leibhéal an Aontais, i bhfianaise thionchar dearfach na tacaíochta sin ar an iascach, ar an mbithéagsúlacht agus ar éiceachórais;

49.á áitiú go n-áireofaí sa chreat airgeadais ilbhliantúil a bheidh ann amach anseo cistiú chun iomaíochas an chabhlaigh iascaireachta a neartú i bhfianaise dúshláin amhail costais atá ag méadú leo, cailliúint meánna iascaigh agus tionchar speiceas ionrach; á mheas gur tosaíocht é feabhas a chur ar rochtain iascairí ar acmhainní airgeadais chun a gcuid soithí a nua-chóiriú, a n-oibríochtaí a dhigitiú agus a bhfoinsí ioncaim a éagsúlú;

50.á mheabhrú don Choimisiún go bhfeidhmíonn na réigiúin is forimeallaí mar aon leis na ceantair oileánda agus cois cósta mar chalafoirt shábháilte thábhachtacha do speicis mhuirí íogaire, agus go bhfuil siad an-shoghonta do speisis choimhthíocha ionracha ag an am céanna; á iarraidh go n-aithneofar a thábhachtaí atá sé na speicis íogaire sin a chosaint agus speisis choimhthíocha ionracha a chomhrac sna réigiúin sin, eadhon trí chlár roghanna a chruthú don iascaireacht áitiúil a bhaineann go sonrach le limistéir iargúlta agus oileánda; á thabhairt chun suntais poitéinseal na héicea-thurasóireachta inbhuanaithe mar bhealach chun deiseanna éagsúlaithe a chur ar fáil, agus bithéagsúlacht uathúil na réigiún sin a chaomhnú ag an am céanna mar aon le tairbhí díreacha a chur ar fáil d’earnálacha an iascaigh agus an dobharshaothraithe;

51.ag treorú dá hUachtarán an rún seo a chur ar aghaidh chuig an gComhairle agus chuig an gCoimisiún.