1.Jissottolinja l-importanza li jiġu żgurati ekosistemi, ħabitats u speċijiet tal-baħar b’saħħithom fl-UE;

2.Jenfasizza r-rwol uniku li jaqdu l-ispeċijiet sensittivi fl-ekosistemi tal-baħar u l-benefiċċji għall-ambjent, għall-ekonomija u għas-soċjetà li jirriżultaw mill-ġestjoni, mill-konservazzjoni u mill-protezzjoni tagħhom;

3.Jisħaq li ħafna speċijiet sensittivi huma indikaturi siewja tas-saħħa tal-ekosistemi tal-baħar, jipprovdu twissija bikrija tal-iżbilanċi ekoloġiċi u jikkontribwixxu għar-reżiljenza tal-ekosistema, b’impatt dirett fuq il-produttività tas-sajd u tal-akkwakultura;

4.Iħeġġeġ lill-Kummissjoni u lill-Istati Membri jimplimentaw approċċ ibbażat fuq l-ekosistema għall-ġestjoni tas-sajd flimkien ma’ approċċi li jiffukaw fuq il-konservazzjoni ta’ speċijiet sensittivi, filwaqt li jappoġġjaw il-prosperità ekonomika u soċjali tas-sajjieda, kif ukoll jiżguraw it-twettiq tal-għanijiet u tal-impenji internazzjonali tal-UE dwar iż-żoni tal-baħar protetti u ż-żoni ta’ importanza kbira għall-bijodiversità;

5.Jistieden lill-Kummissjoni u lill-Istati Membri jiżguraw li l-bidliet fl-ekosistemi kkawżati mit-tibdil fil-klima jiġu riflessi b’mod konsistenti fil-valutazzjonijiet tal-ambjent u fil-ġestjoni tas-sajd;

6.Iħeġġeġ lill-Kummissjoni u lill-Istati Membri jnaqqsu, u fejn possibbli jeliminaw, qabdiet inċidentali ta’ speċijiet tal-baħar sensittivi, f’konformità mal-Artikolu 3 tar-Regolament (UE) 2019/1241, filwaqt li jiżguraw li tali qabdiet ma jirrappreżentawx theddida għall-istat tal-konservazzjoni ta’ dawn l-ispeċijiet;

7.Jissottolinja li, matul l-aħħar deċennji, il-ħabitats inbidlu, u dan wassal għall-għajbien ta’ xi speċijiet filwaqt li ppermetta l-wasla ta’ oħrajn ġodda; jisħaq, f’dan ir-rigward, fuq il-ħtieġa li tiżdied is-sensibilizzazzjoni taċ-ċittadini, u b’mod partikolari tas-sajjieda u tas-sajjieda bil-qasba, dwar l-importanza tal-ġbir tad-data u l-ħtieġa ta’ ġestjoni adattiva;

8.Jisħaq fuq l-importanza ta’ pjanijiet ta’ ġestjoni taż-żoni tal-baħar protetti bbażati fuq ix-xjenza, inklużi d-dimensjonijiet u l-eżiti tal-ambjent, tas-soċjetà u tal-ekonomija tagħhom, biex jiġi żgurat li l-miżuri ta’ konservazzjoni jkunu mmirati, effettivi u allinjati mal-ħtiġijiet speċifiċi għall-ekosistema u li l-implimentazzjoni tagħhom tkun effettiva; jenfasizza l-mira tal-UE li tipproteġi 30 % tal-ibħra tal-UE sal-2030;

9.Ifakkar li s-sajjieda jeħtiġilhom ikunu parti integrali tas-soluzzjoni u jkunu rappreżentati fil-korpi kollha tal-konsulenza, u jenfasizza, f’dan ir-rigward, l-importanza li tiġi żgurata r-rappreżentanza tas-sajjieda kollha, speċjalment dawk fuq skala żgħira u artiġġjanali; jinsab imħasseb li r-rappreżentanza tagħhom mhux dejjem tkun żgurata b’mod adegwat;

10.Jistieden lill-Kummissjoni u lill-Istati Membri jagħmlu użu sħiħ mill-għodod tal-politika komuni tas-sajd (PKS), b’mod partikolari miżuri tekniċi biex jindirizzaw l-interazzjonijiet tas-sajd u jtejbu l-protezzjoni ta’ speċijiet sensittivi, filwaqt li jiżguraw kumpens ġust u effettiv għas-sajjieda affettwati mit-telf ta’ aċċess għal żoni tas-sajd tradizzjonali, f’konformità mad-dispożizzjonijiet tal-Fond Ewropew għall-Affarijiet Marittimi, is-Sajd u l-Akkwakultura; jistieden lill-Kummissjoni tiżgura li l-leġiżlazzjoni attwali ti[i implimentata u infurzata;

11.Iħeġġeġ lill-Istati Membri jagħmlu użu sħiħ mid-dispożizzjonijiet minquxa fl-Artikolu 17 tar-Regolament PKS meta jallokaw l-opportunitajiet tas-sajd, jinċentivaw lis-sajjieda jadottaw miżuri biex jimminimizzaw jew jeliminaw il-qabdiet aċċessorji ta’ speċijiet sensittivi u jipprovdu inċentivi lill-bastimenti tas-sajd li jużaw irkaptu tas-sajd selettiv jew li jużaw tekniki tas-sajd b’impatt imnaqqas fuq l-ambjent, b’attenzjoni speċjali għall-flotot fuq skala żgħira;

12.Ifakkar fl-importanza tad-data miġbura fl-ambitu tal-PKS biex jiġi identifikat b’mod xieraq l-impatt tas-sajd fuq speċijiet sensittivi u l-importanza ta’ sistemi ta’ monitoraġġ imtejba, f’konformità mal-parir xjentifiku u mal-leġiżlazzjoni tal-UE; jissottolinja l-importanza ta’ data komprensiva u speċifika għall-ispeċi dwar il-qabdiet aċċessorji biex tippermetti miżuri ta’ mitigazzjoni mmirati, tinforma l-istrateġiji ta’ ġestjoni adattivi u tiffaċilita l-adozzjoni ta’ miżuri bbilanċjati u mmexxija mix-xjenza li jqisu wkoll il-fatturi soċjoekonomiċi u jiżguraw is-sigurtà alimentari tal-UE;

13.Jenfasizza l-importanza li approċċ olistiku fl-oqsma tal-politika kollha jista’ jikkontribwixxi biex jissaħħu l-monitoraġġ, il-protezzjoni, ir-restawr u l-irkupru ta’ speċijiet u ħabitats sensittivi; jenfasizza, f’dan ir-rigward, l-importanza li l-leġiżlazzjoni attwali tiġi implimentata fl-oqsma ta’ politika rilevanti kollha, u dan jestendi lil hinn minn dawk direttament relatati mal-PKS;

14.Jistieden lill-Kummissjoni u lill-Istati Membri jsaħħu l-approċċi bbażati fuq l-ekosistema għall-ġestjoni tal-ambjent tal-baħar, filwaqt li jqisu l-interazzjonijiet tal-ispeċijiet, fejn possibbli, u jqisu l-pressjonijiet kollha fuq l-ekosistemi tal-baħar, inklużi t-tibdil fil-klima u t-tniġġis, kemm jekk ibbażati fuq l-art kif ukoll minn sorsi oħra;

15.Jenfasizza li ż-żoni tal-baħar protetti u ġestiti b’mod effettiv abbażi tal-aħjar xjenza disponibbli, jikkontribwixxu, skont l-objettivi ta’ konservazzjoni tagħhom, biex jimminimizzaw il-qabdiet inċidentali ta’ speċijiet sensittivi, jipproteġu ż-żoni ta’ riproduzzjoni u ta’ tkabbir tal-ħut u l-frieħ tal-ħut, u jnaqqsu l-impatti fuq ħabitats sensittivi;

16.Jistieden lill-Kummissjoni u lill-Istati Membri jivvalutaw id-daqs tal-popolazzjoni reġjonali u lokali, l-istat u x-xejriet tal-ispeċijiet u l-impatti potenzjali li l-popolazzjonijiet żbilanċjati jista’ jkollhom fuq l-attivitajiet tas-sajd, biex tiġi żgurata ġestjoni tas-sajd ibbażata fuq l-ekosistema, inklużi miżuri għall-protezzjoni ta’ speċijiet sensittivi;

17.Jistieden lill-Kummissjoni u lill-Istati Membri jżidu l-appoġġ għall-programmi xjentifiċi dwar speċijiet sensittivi u approċċi ta’ ġestjoni, kif identifikati fil-leġiżlazzjoni rilevanti; jenfasizza l-fatt li, f’xi reġjuni, speċijiet sensittivi, bħal popolazzjonijiet dejjem akbar ta’ marguni u foki, qed ikollhom impatti fuq l-istokkijiet tal-ħut u fuq l-attivitajiet tas-sajd u tal-akkwakultura u fuq popolazzjonijiet ta’ speċijiet sensittivi oħra; huwa tal-fehma li l-qafas regolatorju għandu l-għodod meħtieġa biex jippermetti titjib, minħabba l-istat lokali tal-ispeċijiet sensittivi; jistieden, għalhekk, lill-Kummissjoni u lill-Istati Membri jikkunsidraw, fost l-azzjonijiet li għandhom jittieħdu, il-possibbiltajiet kollha previsti fid-Direttiva dwar l-Għasafar u fid-Direttiva dwar il-Ħabitats biex jiffaċilitaw aħjar il-ġestjoni attiva u effettiva tal-popolazzjoni u jappoġġjaw il-ġestjoni bbażata fuq l-ekosistema;

18.Iħeġġeġ lill-Kummissjoni tiżgura li l-approċċi tal-ġestjoni tas-sajd tal-UE jkunu allinjati mal-PKS, mal-Istrateġija tal-UE għall-Bijodiversità għall-2030 u mal-impenji internazzjonali tal-UE bħall-Qafas Globali tal-Bijodiversità ta’ Kunming-Montreal; jisħaq, f’dan ir-rigward, li għandhom jittieħdu azzjonijiet biex jitwaqqaf it-tnaqqis ta’ speċijiet sensittivi fl-ekosistemi tal-baħar tal-UE, inkluż permezz tal-implimentazzjoni ta’ miżuri ta’ konservazzjoni xierqa u l-protezzjoni tal-ħabitats;

19.Jistieden lill-Kummissjoni tieħu azzjoni fl-organizzazzjonijiet reġjonali tal-ġestjoni tas-sajd (RFMOs) biex tnaqqas u, fejn possibbli, telimina l-qabdiet aċċessorji ta’ speċijiet sensittivi u tirrestrinġi l-kummerċ u l-importazzjoni ta’ prodotti tal-frott tal-baħar u ssaħħaħ il-miżuri kontra s-sajd illegali, mhux irrappurtat u mhux irregolat, inkluż permezz ta’ kontroll doganali mtejjeb u kollaborazzjoni mas-sħab tal-RFMO;

20.Jissottolinja li l-ispeċijiet aljeni invażivi jheddu s-sajd u l-akkwakultura, il-bijodiversità u l-ekosistemi tal-baħar indiġeni, u b’hekk jaffettwaw l-għajxien u l-introjtu tas-sajjieda u tal-komunitajiet kostali;

21.Jenfasizza l-kontribut vitali tas-sajd kostali fuq skala żgħira għall-ekonomiji lokali u għas-sigurtà alimentari tal-UE, filwaqt li jenfasizza li dawn jiffaċċjaw theddid dejjem akbar minn fatturi ta’ stress ambjentali bħal speċijiet invażivi u t-tibdil fil-klima, inkluż il-moviment massiv ta’ ċerti speċijiet, b’mod partikolari minħabba t-tisħin tal-ilmijiet, fenomenu li jikkawża ħafna telf, b’mod partikolari għall-bdiewa tal-frott tal-baħar bil-qoxra, li huma ppenalizzati doppjament minn tnaqqis fil-produzzjoni u żieda fil-kostijiet marbuta mal-predazzjoni;

22.Ifakkar li fl-UE, 88 speċi aljena invażiva huma strettament regolati, inklużi 47 speċi ta’ annimali u 41 speċi ta’ pjanti li huma sors ta’ tħassib għall-Unjoni;

23.Jiddispjaċih għall-fatt li l-lista attwali ta’ speċijiet ta’ tħassib għall-Unjoni ma tirrikonoxxix għal kollox it-theddida tal-ispeċijiet aljeni invażivi għas-sajd, għall-akkwakultura u għall-ambjent tal-baħar tal-UE, minħabba l-fatt li attwalment żewġ speċijiet tal-baħar biss (Plotosus lineatus u Rugulopteryx okamurae) huma inklużi fil-lista, flimkien ma’ ċerti speċijiet li jinstabu f’ambjenti salmastri; jappella biex din il-lista titjieb abbażi ta’ pariri xjentifiċi u valutazzjonijiet tar-riskju aġġornati;

24.Jirrimarka li jeħtieġ ikun hemm ġestjoni xierqa tal-ispeċijiet u jinnota bi tħassib iż-żieda fil-preżenza tal-ispeċijiet f’ċerti reġjuni, bħal:(a)il-gajdra tal-Paċifiku u l-ispeċijiet aljeni taċ-ċkal fin-Nofsinhar tal-Baħar tat-Tramuntana, b’mod partikolari tul il-kosta Netherlandiża;(b)il-mazzun iswed, li jaffettwa l-ekosistema u speċifikament jhedded il-gambli, il-pixxiċatt u l-mazzuni nattivi speċjalment madwar l-ilmijiet tal-Baħar tat-Tramuntana;(c)il-granċ ikħal, il-granċ Hemigrapsus takanoi, il-bram Mnemiopsis leidyi u l-bram Gonionemus vertens fil-Grigal tal-Atlantiku;(d)il-lionfish Pterois miles, il-ħuta Fistularia commersonii u l-ħuta Lagocephalus sceleratus, madwar il-Greċja u Ċipru;(e)it-tamal żebra (Dreissena polymorpha), introdott fl-Ebro, u l-pixxigatt (Silurus glanis), fi Spanja;(f)l-alka Asjatika Rugulopteryx okamurae, b’mod partikolari fil-Punent tal-Mediterran;

25.Jistieden lill-Kummissjoni u lill-Istati Membri jistabbilixxu sistemi ta’ monitoraġġ reġjonali u speċifiċi għall-ispeċijiet, inklużi strateġiji kkoordinati ta’ twissija bikrija u ta’ rispons għall-ispeċijiet aljeni li jaffettwaw il-ħabitats ekonomikament rilevanti;

26.Jiddispjaċih għan-nuqqas ta’ programmi ta’ monitoraġġ speċifiċi għall-ispeċijiet aljeni invażivi tal-baħar, u jappella għal metodi ta’ monitoraġġ imtejba, kif ukoll għal żieda fl-appoġġ tekniku u finanzjarju, b’mod partikolari għar-reġjuni ultraperiferiċi li jirrikjedu finanzjament addizzjonali speċifiku minħabba l-bijodiversità unika u l-qagħda mbiegħda tagħhom;

27.Jirrakkomanda li jiġu stabbiliti metodoloġija u valuri li jistabbilixxu l-limiti massimi għar-reġjuni u s-subreġjuni tal-baħar Ewropej kollha, filwaqt li jitqiesu l-impatt fuq is-sajd u fuq l-akkwakultura, il-kapaċità li jiġu ġestjonati l-perkorsi u l-ħtieġa li l-flotot tas-sajd tal-UE u dawk li mhumiex tal-UE jiġu kkontrollati b’mod strett, filwaqt li l-ispeċijiet invażivi jkunu fil-mira, u li tiġi infurzata l-Konvenzjoni Internazzjonali għall-Kontroll u l-Ġestjoni tal-Ilma tas-Saborra u tas-Sedimenti tal-Bastimenti u li jiġu applikati linji gwida dwar l-inkrostazzjoni bijoloġika tal-bastimenti;

28.Jenfasizza r-rabtiet potenzjali bejn l-ispeċijiet aljeni invażivi introdotti fl-ekosistemi tal-art u tal-ilma ħelu u dawk fl-oċeani u fl-ibħra, u l-impatt tagħhom fuq is-sajd u l-akkwakultura; jistieden lill-Kummissjoni tiżviluppa strateġija komprensiva biex tindirizza din il-kwistjoni;

29.Jisħaq li approċċ ta’ ġestjoni olistiku, preventiv u bbażat fuq perkorsi ta’ diversi vetturi huwa prijorità assoluta fil-prevenzjoni effettiva tal-introduzzjoni tal-ispeċijiet aljeni invażivi tal-baħar u fl-indirizzar tat-tixrid tagħhom u tal-kawżi ewlenin tal-proliferazzjoni tagħhom; iħeġġeġ lill-Istati Membri jżidu l-użu tal-analiżi tal-prospettivi u tekniki ġodda bħall-eDNA, l-intelliġenza artifiċjali u l-monitoraġġ awtomatizzat, kif ukoll l-involviment tas-sajjieda, tas-sajjieda bil-qasba, tal-komunitajiet kostali u tax-xjenza taċ-ċittadini bħala għodod u riżorsi biex jiġu identifikati speċijiet aljeni invażivi ġodda, emerġenti u ta’ riskju għoli għas-sajd u għall-akkwakultura u biex tingħatalhom prijorità; iħeġġeġ lill-Kummissjoni tapplika dan l-approċċ integrat fl-implimentazzjoni tal-Patt Ewropew għall-Oċeani biex tiżgura azzjoni koordinata fis-setturi u fl-Istati Membri kollha;

30.Jistieden lill-Istati Membri jsaħħu l-komunikazzjoni, il-koordinazzjoni u l-kooperazzjoni, b’mod partikolari f’żoni transfruntiera, filwaqt li jingranaw il-bijosigurtà sabiex jimplimentaw miżuri għad-detezzjoni bikrija u għall-qerda rapida tal-ispeċijiet aljeni invażivi tal-baħar, u biex l-ispeċijiet li diġà nfirxu ħafna jiġu ġestiti; jistieden, barra minn hekk, lill-Kummissjoni tikkoopera mal-Istati Membri biex testendi dawn l-azzjonijiet permezz ta’ kollaborazzjoni ma’ pajjiżi mhux tal-UE li jikkondividu l-istess baċir tal-baħar;

31.Jirrakkomanda aktar kooperazzjoni bejn l-istituzzjonijiet xjentifiċi u l-aġenziji tal-UE biex jittejbu t-trasferiment tal-għarfien u r-riċerka applikata dwar it-tixrid, l-impatt u l-kontroll tal-ispeċijiet tal-baħar invażivi;

32.Jissottolinja li l-Baħar Mediterran, li, skont l-Organizzazzjoni tal-Ikel u l-Agrikoltura, qed jisħon 20 % aktar malajr mill-bqija tad-dinja, huwa hotspot partikolari, li fih aktar speċijiet aljeni invażivi minn kwalunkwe baħar ieħor globalment, b’impatti negattivi sinifikanti fuq l-ekosistemi tal-baħar u fuq is-setturi tas-sajd u tal-akkwakultura, u b’hekk jirrikjedi attenzjoni partikolari; iħeġġeġ lill-Kummissjoni u lill-Istati Membri, f’dan ir-rigward, jallokaw riżorsi addizzjonali u jistabbilixxu miżuri urġenti biex iwaqqfu t-tixrid ta’ dawn l-ispeċijiet f’dan il-baċir tal-baħar;

33.Jistieden lill-Kummissjoni tappoġġja lill-Kummissjoni Ġenerali tas-Sajd għall-Mediterran fl-inizjattivi ta’ monitoraġġ xjentifiku u fil-proġetti pilota tagħha biex tindirizza l-isfidi tal-ispeċijiet tal-baħar invażivi;

34.Jistieden lill-Kummissjoni tagħmel disponibbli finanzjament speċifiku, fil-qafas tal-Fond Ewropew għall-Affarijiet Marittimi, is-Sajd u l-Akkwakultura u programmi baġitarji oħra, biex tappoġġja r-riċerka dwar l-ispeċijiet invażivi u l-prevenzjoni u l-qerda tagħhom jew, fejn il-qerda ma tkunx fattibbli, il-ġestjoni tat-tixrid tagħhom u l-irkupru mill-impatt tat-tixrid, f’kooperazzjoni mas-sajjieda, l-awtoritajiet lokali u l-organizzazzjonijiet xjentifiċi; jafferma mill-ġdid it-twemmin tiegħu li tali finanzjament għandu jkun disponibbli fil-qafas finanzjarju pluriennali li jmiss;

35.Jenfasizza l-importanza tas-Sistema ta’ Notifika EASIN, b’mod partikolari biex jiġu rrapportati fil-ħin u b’mod komprensiv detezzjonijiet ġodda, miżuri ta’ qerda u detezzjonijiet ta’ kontroll uffiċjali; iħeġġeġ lill-Istati Membri jtejbu s-sistema billi jipprovdu informazzjoni addizzjonali, b’mod partikolari data ta’ distribuzzjoni, partikolarment bil-kontribut ta’ informazzjoni mis-sajjieda, mill-produtturi tal-akkwakultura u minn partijiet ikkonċernati rilevanti oħra kollha;

36.Ifakkar fid-dimensjoni internazzjonali tal-ispeċijiet aljeni invażivi u jissuġġerixxi li l-UE ssaħħaħ l-azzjonijiet tagħha f’dan ir-rigward, bl-użu tal-fora internazzjonali kollha disponibbli u, b’mod partikolari, l-RFMOs, il-Konvenzjoni dwar id-Diversità Bijoloġika u l-Qafas Globali tal-Bijodiversità ta’ Kunming-Montreal; jistieden lill-UE ttejjeb il-kondiviżjoni kollaborattiva tal-għarfien u l-iskambji ta’ tagħlim reċiproku ma’ organizzazzjonijiet internazzjonali oħra u ma’ pajjiżi mhux tal-UE;

37.Jissottolinja l-potenzjal għal kollaborazzjoni ma’ pajjiżi mhux tal-UE li jikkondividu l-istess baċir tal-baħar, inkluż permezz tal-RFMOs, biex jikkondividu l-aħjar prattika, jingranaw l-investiment u jistabbilixxu għanijiet kollettivi bil-għan li jindirizzaw l-impatt tal-ispeċijiet aljeni invażivi;

38.Jisħaq li l-ispeċijiet aljeni invażivi għandhom impatti negattivi sinifikanti fuq il-bijodiversità u l-ekosistemi tal-baħar, fuq l-attivitajiet tal-ekonomija blu, inklużi s-sajd u l-akkwakultura, u fuq attivitajiet ekonomiċi oħra mhux relatati mal-baħar u fuq il-komunitajiet kostali u s-soċjetà kollha kemm hi; iqis li huwa kruċjali li jiġu kkunsidrati l-konsegwenzi soċjali, ekonomiċi u kulturali usa’ tal-ispeċijiet aljeni invażivi, lil hinn mit-telfien tal-bijodiversità u l-effetti fuq l-ekosistemi, sabiex jiġu evitati b’mod effettiv invażjonijiet ġodda u jiġu implimentati miżuri ta’ mitigazzjoni b’suċċess;

39.Iħeġġeġ lill-Kummissjoni tiżviluppa indikatur iddedikat għal speċijiet sensittivi u invażivi fl-ibħra tal-UE, filwaqt li tqis listi bħal-Lista l-Ħamra tal-Unjoni Internazzjonali għall-Konservazzjoni tan-Natura u tar-Riżorsi Naturali (IUCN), li għandhom jiġu inklużi fil-pubblikazzjonijiet relatati mal-SDGs tal-Eurostat, biex jiġu mmonitorjati aħjar it-tixrid, u l-isforzi ta’ konservazzjoni u sforzi oħra ta’ ġestjoni;

40.Jistieden lill-Kummissjoni tintegra l-finanzjament għar-riċerka dwar l-ispeċijiet aljeni invażivi u dwar soluzzjonijiet li ma jagħmlux ħsara lill-ambjent għall-ġestjoni u għall-kontroll sostenibbli tagħhom fi proġetti futuri ta’ programmi Ewropej ta’ riċerka u ta’ innovazzjoni;

41.Jissottolinja l-importanza li jiġu appoġġjati l-operaturi tas-sajd u tal-akkwakultura li huma affettwati, permezz ta’ skemi ta’ kumpens u fondi ta’ adattament, f’konformità mad-dispożizzjonijiet finanzjarji eżistenti, speċjalment f’żoni li qed jiffaċċjaw telf ekonomiku dirett minħabba speċijiet invażivi; jisħaq fuq il-ħtieġa li jiġu pprovduti inċentivi finanzjarji u regolatorji mmirati biex jiġu stimulati attivitajiet immirati ta’ qbid u tneħħija mis-sajjieda lokali għall-ispeċijiet invażivi fl-ilmijiet kostali u fil-passaġġi fuq l-ilma interni, bħala mezz biex titnaqqas il-pressjoni ekoloġika filwaqt li jiġi appoġġjat l-għajxien lokali; jissottolinja r-rwol possibbli li l-iskemi tal-assigurazzjoni jista’ jkollhom biex jindirizzaw il-kwistjoni, b’mod partikolari l-konsegwenzi għall-bdiewa tal-frott tal-baħar bil-qoxra, għall-produtturi tal-akkwakultura u għas-sajjieda;

42.Jistieden lill-Istati Membri u lill-Kummissjoni jiżviluppaw kampanji ta’ sensibilizzazzjoni biex jinfurmaw u jinvolvu lis-sajjieda, lil dawk li jrabbu l-ħut u l-frott tal-baħar bil-qoxra, lill-partijiet ikkonċernati fis-settur tas-sajd, inklużi s-sajjieda bil-qasba, u lill-pubbliku ġenerali dwar l-introduzzjoni, id-detezzjoni u l-impatti tal-ispeċijiet aljeni invażivi, l-effetti tagħhom fuq l-ambjent u fuq l-ekonomija, u modi kif jiġu minimizzati r-riskji maħluqa mill-introduzzjoni u mit-tixrid tagħhom;

43.Jirrakkomanda, fejn fattibbli, l-iżvilupp ta’ programmi mmirati lejn speċijiet invażivi li għandhom l-għan li jtejbu l-kontroll tal-popolazzjoni u jipprovdu opportunitajiet ta’ kumpens għas-sajjieda;

44.Iqis li l-ġestjoni tal-ispeċijiet aljeni invażivi tista’ tipprovdi opportunitajiet għal introjtu temporanju addizzjonali permezz tal-innovazzjoni applikata biex jiġu ġġenerati prodotti b’valur miżjud bħal bijofertilizzanti u sottostrati agrikoli li jappoġġjaw il-kontroll ta’ dawk l-ispeċijiet, u, fejn possibbli, il-qerda tagħhom; jistieden lill-Kummissjoni tiffinanzja r-riċerka u t-trasferiment tat-teknoloġija f’dan il-qasam;

45.Jisħaq li, meta l-eradikazzjoni tal-ispeċijiet invażivi ma tkunx fattibbli, l-isfruttament tal-ispeċijiet invażivi għall-konsum mill-bniedem jista’ jipprovdi introjtu temporanju addizzjonali għas-sajjieda u jikkontribwixxi għall-ġid li jkun ta’ benefiċċju għall-ekonomiji lokali fl-UE;

46.Jilqa’ l-użu ekonomiku temporanju ta’ xi speċijiet aljeni invażivi, bħall-alka, għal skopijiet alimentari u dawk mhux alimentari; jirrimarka li tali skopijiet, minbarra l-alimentazzjoni għall-konsum mill-bniedem, jistgħu jinkludu l-għalf tal-annimali u tal-ħut, il-farmaċewtiċi, l-imballaġġ, il-kożmetiċi jew il-bijofjuwils;

47.Itenni li l-għan aħħari huwa dejjem il-qerda tal-ispeċijiet aljeni invażivi; jenfasizza, f’dan ir-rigward, li d-dipendenza ekonomika fuq l-isfruttament tal-ispeċijiet aljeni invażivi għandha dejjem tkun temporanja jew sekondarja u li m’għandhiex tinkoraġġixxi t-tixrid jew it-tqegħid fis-suq ta’ dawk l-ispeċijiet;

48.Jappella għal appoġġ finanzjarju akbar u ddedikat biex jittejbu l-ġestjoni u l-protezzjoni effettivi tal-għajxien kostali u tal-ekosistemi tal-baħar u l-konservazzjoni ta’ speċijiet sensittivi, u għal sistemi ta’ informazzjoni, monitoraġġ u twissija bikrija għall-ispeċi uniċi invażivi fil-livelli reġjonali, nazzjonali u tal-UE, fid-dawl tal-impatt pożittiv ta’ tali appoġġ fuq is-sajd, il-bijodiversità u l-ekosistemi;

49.Jinsisti li l-qafas finanzjarju pluriennali futur jinkludi finanzjament biex tissaħħaħ il-kompetittività tal-flotta tas-sajd fid-dawl ta’ sfidi bħaż-żieda fl-ispejjeż, it-telf ta’ żoni tas-sajd u l-impatt ta’ speċijiet invażivi; iqis li hija prijorità li jittejjeb l-aċċess tas-sajjieda għar-riżorsi finanzjarji biex jimmodernizzaw il-bastimenti tagħhom, jiddiġitalizzaw l-operazzjonijiet tagħhom u jiddiversifikaw is-sorsi ta’ introjtu tagħhom;

50.Ifakkar lill-Kummissjoni li r-reġjuni ultraperiferiċi u l-gżejjer u ż-żoni kostali jservu bħala żoni importanti ta’ sikurezza għall-ispeċijiet tal-baħar sensittivi, filwaqt li huma wkoll vulnerabbli ħafna għall-ispeċijiet aljeni invażivi; jappella biex tiġi rikonoxxuta l-importanza li jiġu protetti dawn l-ispeċijiet sensittivi u li jiġu miġġielda l-ispeċijiet aljeni invażivi f’dawn ir-reġjuni, jiġifieri permezz tal-ħolqien ta’ programm ta’ għażliet għas-sajd lokali li huma speċifiċi għaż-żoni remoti u insulari; jenfasizza l-potenzjal tal-ekoturiżmu sostenibbli bħala mezz biex jiġu pprovduti opportunitajiet ta’ diversifikazzjoni, filwaqt li tiġi ppreservata l-bijodiversità unika ta’ dawk ir-reġjuni u jiġu pprovduti benefiċċji diretti lis-setturi tas-sajd u tal-akkwakultura;

51.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.