1.Jappoġġja l-allinjament tal-prijoritajiet tar-R&I tal-Unjoni u dawk nazzjonali biex tiġi żgurata l-komplementarjetà, tiżdied il-kooperazzjoni bejn l-universitajiet, l-organizzazzjonijiet tar-riċerka, ir-reġjuni, l-Istati Membri u l-industriji, jinħoloq qafas ta’ governanza effettiv, il-karrieri fir-riċerka u l-investiment privat isiru aktar attraenti, u tintlaħaq il-mira ta’ investiment tal-Unjoni ta’ 3 % tal-PDG fir-riċerka u l-iżvilupp (R&Ż);

2.Jappella għal approċċ fuq żewġ binarji ta’ kooperazzjoni volontarja fl-ambitu tal-Aġenda ta’ Politika taż-ŻER 2025–2027 flimkien ma’ miżuri leġiżlattivi, inkluż l-Att dwar iż-ŻER u inizjattivi komplementari, biex iż-ŻER tiġi pprovduta b’qafas vinkolanti u infurzabbli;

3.Jirrakkomanda li l-Att dwar iż-ŻER ikun regolament biex jintlaħqu l-objettivi tal-Artikolu 179 tat-TFUE, li jiżgura applikabbiltà diretta madwar l-Istati Membri, jistimula l-investiment privat fir-R&Ż, iċ-ċirkolazzjoni libera tar-riċerkaturi, l-għarfien xjentifiku u t-teknoloġija, u jikkontribwixxi għat-tnaqqis tal-frammentazzjoni tas-suq uniku;

4.Jafferma mill-ġdid l-importanza tal-libertà tar-riċerka xjentifika u l-awtonomija istituzzjonali; jitlob li l-proposta tal-Att dwar iż-ŻER tkun akkumpanjata minn proposta leġiżlattiva separata b’bażi legali distinta li tipproteġi l-libertà fundamentali tar-riċerka xjentifika, inklużi standards minimi għad-drittijiet tar-riċerkaturi, l-imġiba etika, l-integrità u l-indipendenza istituzzjonali, u appoġġjata minn mekkaniżmi ta’ monitoraġġ effettivi;

5.Jitlob li l-Att dwar iż-ŻER jinkludi l-mira tal-Unjoni li tinvesti mill-inqas 3 % tal-PDG tal-Unjoni fir-R&Ż sal-2030, ikkomplementata minn miri nazzjonali għan-nefqa totali fuq ir-R&Ż, li jikkontribwixxu għall-objettiv tal-Unjoni; jistieden lill-Istati Membri jtejbu l-koordinazzjoni tal-investiment fir-R&Ż permezz ta’ pjanijiet direzzjonali u miri nazzjonali biex tiġi żgurata l-komplementarjetà tal-finanzjament pubbliku u privat; jirrikonoxxi li l-kumpaniji u l-industriji ffukati fuq ir-riċerka huma kruċjali biex jixprunaw l-investiment privat, jilħqu l-mira ta’ 3 %, u jrawmu impjiegi ta’ kwalità;

6.Jappella għal dispożizzjonijiet biex tissaħħaħ il-parteċipazzjoni privata fl-ekosistema tar-R&I tal-UE permezz ta’ koordinazzjoni aktar mill-qrib u sħubijiet pubbliċi-privati, biex jiġu indirizzati l-lakuni persistenti fl-investiment u l-frammentazzjoni tas-suq u biex titlesta l-unjoni tas-swieq kapitali biex tiġi aċċellerata l-valorizzazzjoni tal-għarfien, tissaħħaħ is-sovranità teknoloġika u jiġu appoġġjati l-ekosistemi tal-innovazzjoni reġjonali;

7.Jappella għal aktar appoġġ għar-riċerka pubblika billi jissaħħaħ il-finanzjament għal programmi Ewropej bħal Orizzont Ewropa; iħeġġeġ lill-Istati Membri jżidu r-riżorsi finanzjarji għall-universitajiet u l-organizzazzjonijiet pubbliċi tar-riċerka;

8.Jistieden lill-Istati Membri jwettqu riformi biex ineħħu l-ostakli għaċ-ċirkolazzjoni libera tar-riċerkaturi u l-għarfien, u jsaħħu l-kollaborazzjoni u l-innovazzjoni transfruntiera, bl-għan li l-Ewropa ssir komunità tar-riċerka globali inklużiva u attraenti;

9.Jirrakkomanda li l-Att dwar iż-ŻER juża għodod ta’ ppjanar, metriċi li jistgħu jitkejlu u monitoraġġ, rapportar u evalwazzjoni, u li jistinka biex jiżgura bilanċ bejn l-oqsma tar-riċerka u r-riċerka bażika u applikata;

10.Jitlob governanza msaħħa taż-ŻER, u li l-istrumenti ta’ politika u ta’ monitoraġġ eżistenti jiġu razzjonalizzati;

11.Jistieden lill-Kummissjoni u lill-Istati Membri jtejbu l-koordinazzjoni bejn l-inizjattivi nazzjonali u tal-UE tar-R&I f’konformità mal-prijoritajiet ġenerali taż-ŻER, filwaqt li jiżguraw sinerġiji bejn l-istrumenti u l-politiki ta’ finanzjament nazzjonali u tal-Unjoni biex tissaħħaħ it-tmexxija xjentifika u teknoloġika globali tal-Ewropa;

12.Jappella għal ekosistemi Ewropej tal-innovazzjoni u tat-teknoloġija aktar b’saħħithom u aktar inklużivi biex tiġi promossa l-kooperazzjoni bejn l-universitajiet, l-istituzzjonijiet tar-riċerka, in-negozji ġodda, il-SMEs u l-industrija biex jiġi żgurat trasferiment effettiv u sigur tal-għarfien u użu aħjar tar-riżultati mill-kumpaniji Ewropej, u biex jiġu promossi t-titjib tal-ħiliet u t-taħriġ mill-ġdid, u t-tagħlim tul il-ħajja; jisħaq fuq il-ħtieġa li jiġu indirizzati d-disparitajiet fir-R&I fost l-Istati Membri, b’mod partikolari dawk bi prestazzjoni aktar baxxa fir-R&I, biex tittejjeb il-parteċipazzjoni tagħhom fil-programmi tal-Unjoni;

13.Jisħaq li ŻER li tiffunzjona tirrikjedi ċ-ċirkolazzjoni libera tar-riċerkaturi u l-għarfien, u l-kollaborazzjoni transfruntiera; jappella għal miżuri konkreti biex jiġu ffaċilitati u ssimplifikati l-perkorsi tal-karriera tar-riċerkaturi, speċjalment ir-riċerkaturi żgħażagħ u dawk fil-bidu tal-karriera tagħhom, itejbu l-mobbiltà, ir-rikonoxximent reċiproku tal-kwalifiki, u jiġu ffaċilitati l-proċeduri tal-viża; itenni l-appoġġ tiegħu għal Karta Ewropea għar-Riċerkaturi; jinnota li x-xogħol mill-bogħod u ibridu joħloq opportunitajiet għar-riċerkaturi biex jaħdmu fi Stati Membri oħra mingħajr rilokazzjoni;

14.Iħeġġeġ lill-Kummissjoni u lill-Istati Membri javvanzaw l-ugwaljanza bejn il-ġeneri u l-opportunitajiet indaqs fir-R&I, speċjalment f’setturi sottorappreżentati, filwaqt li jnaqqsu d-differenza fil-pagi bejn il-ġeneri;

15.Jisħaq fuq il-ħtieġa li tiġi żgurata ċ-ċirkolazzjoni miftuħa u sigura tal-għarfien, l-aċċessibbiltà mtejba tal-infrastruttura tar-riċerka, il-valorizzazzjoni tal-għarfien u l-użu etiku u affidabbli tat-teknoloġiji emerġenti, inkluża l-IA, f’konformità mal-valuri u d-drittijiet fundamentali tal-UE; jissottolinja l-importanza tas-sigurtà tar-riċerka, l-integrità u t-tixrid effettiv tar-riċerka ffinanzjata pubblikament, inkluż fil-libreriji, filwaqt li tiġi żgurata l-protezzjoni tad-drittijiet tal-proprjetà intellettwali;

16.Jirrakkomanda li l-Att dwar iż-ŻER ikun allinjat ma’ inizjattivi eżistenti u futuri, bħall-Att dwar l-Innovazzjoni, il-Patt għar-R&I, il-Programm Qafas u ż-Żona Ewropea tal-Edukazzjoni, biex jiġu żgurati riformi li jsaħħu lil xulxin, l-adozzjoni tal-innovazzjoni, il-mobbiltà tat-talenti u l-finanzjament;

17.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kummissjoni u lill-Kunsill.