1.ag aontú leis an gCoimisiún go bhfuil na coinníollacha a leagtar amach i Rialachán CED agus go háirithe in Airteagal 4(2), pointe (a), de comhlíonta agus go bhfuil an Bheilg i dteideal EUR 1 622 650 de ranníocaíocht airgeadais a fháil faoin Rialachán sin, arb ionann í agus 85 % den chostas iomlán EUR 1 909 000, a chuimsíonn EUR 1 843 500 de chaiteachas ar sheirbhísí pearsantaithe agus EUR 65 500 de chaiteachas ar ghníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe;

2.ag tabhairt dá haire gur thíolaic údaráis na Beilge an t-iarratas an 28 Lúnasa 2025, agus, tar éis faisnéis bhreise a fháil ón mBeilg, gur chuir an Coimisiún bailchríoch ar a mheasúnú an 20 Eanáir 2026, nach mór 5 mhí ina dhiaidh, agus gur thug sé fógra do Pharlaimint na hEorpa faoi an lá céanna; á chur i bhfáth a thábhachtaí atá sé an t-am a ghiorrú idir iarratas ar chúnamh CED a thíolacadh agus an cinneadh maoiniúcháin, agus cearta Pharlaimint na hEorpa mar bhrainse amháin den údarás buiséadach á gcosaint go hiomlán ag an am céanna;

3.ag tabhairt dá haire go mbaineann an t-iarratas le 267 dtairbhí spriocdhírithe a cuireadh ar iomarcaíocht in Tupperware;

4.ag tabhairt dá haire go raibh Tupperware lonnaithe in Aalst i gCúige Fhlóndras Thoir, áit nach raibh ach duine as gach beirt fostaithe, i gcomparáid le duine as gach triúir ar an meán ar fud réigiún Fhlóndras, roimh fhéimheacht Tupperware; á chur in iúl gur oth léi go mbeidh an staid níos measa de dheasca na n-iomarcaíochtaí sin; á chur i bhfáth go bhfuil gá le gníomhaíocht ghasta chun meath struchtúrach réigiúnach a chosc;

5.á chur in iúl gur saoth léi gur ghlac creidiúnaithe smacht ar an máthairchorparáid Mheiriceánach Tupperware Brands i mí Dheireadh Fómhair 2024 agus, mar gheall ar athstruchtúrú suntasach, gur baineadh an monarú agus na ceadúnais arna ndeonú ar Tupperware General Services NV, a d’fhág an fhochuideachta Bheilgeach neamh-inmharthana agus a bhí mar chúis lena féimheacht an 17 Feabhra 2025;

6.á chur in iúl gur geal léi an tionscnamh ó ghrúpa fiontraithe Eorpacha arb é is aidhm dó an branda a athbheochan sa Ghearmáin, sa Fhrainc, sa Bheilg, san Iodáil agus sa Pholainn;

7.ag leagan béim ar an bhfíoras go bhfuil riosca na dífhostaíochta sa Fhlóndras os cionn dhá oiread níos airde do dhaoine le leibhéal íseal oideachais; á thabhairt dá haire nach bhfuil níos mó ná leibhéal oideachais meánscoile shóisearaigh ag aon trian de na hoibrithe iomarcacha; á iarraidh ar údaráis na Beilge tacaíocht shonrach a sholáthar do na próifílí sin chun cuidiú le hoibrithe a n-easnaimh a shárú agus poist nua a aimsiú, agus bearta á nglacadh chun féimheachtaí a laghdú agus aghaidh a thabhairt ar dhifríochtaí sóisialta as a dtagann eisiamh lucht saothair;

8.á mheabhrú, i gcomhaontú leis na ceardchumainn, na saineolaithe agus na comhpháirtithe sóisialta, gurb iad na bearta seo a leanas atá sna seirbhísí pearsantaithe atá le soláthar do na hoibrithe: seisiúin faisnéise le haghaidh ath-imeascadh san fhostaíocht, seirbhísí socrúcháin sheachtraigh, lena n-áirítear oiliúint TCF; cuidiú chun post a fháil trí threoir agus cuidiú cuardaithe poist, oiliúint agus athoiliúint, aonaigh poist, scabhtáil fostaíochta agus meaitseáil poist; ag cur béim ar a thábhachtaí atá sé poist ardcháilíochta atá dírithe ar an todhchaí a chothú chun athléimneacht fhadtéarmach eacnamaíoch agus shóisialta a áirithiú; á iarraidh ar údaráis na Beilge idirphlé a bhunú le hionadaithe nua Tupperware na hEorpa chun féidearthachtaí a fhiosrú maidir le hoibrithe iomarcacha a ath-imeascadh ina ngníomhaíochtaí eacnamaíocha;

9.ag cur béim ar an bhfíoras go bhfuil cáilíochtaí agus scileanna na n-oibrithe a leagadh as a bpoist ríthábhachtach i gcónaí do gheilleagar Eorpach a sheasfaidh an aimsir; á mheas, dá bhrí sin, gur gá slógadh CED a leabú i bhfreagairt bheartais níos mó ar gach leibhéal polaitiúil chun a áirithiú go bhfaighidh na hoibrithe a ndéantar difear dóibh deiseanna leormhaithe i gcomhréir lena gcáilíochtaí agus lena scileanna; á mheabhrú thairis sin gur ionstraim dlúthpháirtíochta agus aistrithe chóir é CED agus nach mór gurb é príomhchúram an Aontais ná dúnadh mar sin a chosc i dtosach báire; á mheas, cé go gcuireann CED an tacaíocht is gá ar fáil d’oibrithe a ndéantar difear dóibh, go bhfuil beartas tionsclaíoch níos láidre, geilleagar níos láidre, níos inbhuanaithe agus níos athléimní, agus laghdú ar spleáchais straitéiseacha bunriachtanach chun bonn fostaíochta tionsclaíoch na hEorpa a choimirciú;

10.á chur i bhfáth go n-áiritheoidh údaráis na Beilge infheictheacht an chistithe ón Aontas agus go leagfaidh siad béim ar a bhreisluach trí fhaisnéis éifeachtach agus spriocdhírithe a chur ar fáil do thairbhithe, d’údaráis réigiúnacha agus áitiúla, do chomhpháirtithe sóisialta agus don phobal i gcoitinne;

11.á iarraidh go ndéanfar meastóireachtaí críochnúla deiridh ar na bearta a cuireadh chun feidhme, lena n-áirítear faisnéis shoiléir faoin gcaoi ar úsáideadh na cistí agus i dtaobh cé acu ar caitheadh iad i gcomhréir leis na pleananna formheasta nó nár caitheadh; á chur i bhfáth gur cheart na meastóireachtaí sin a bheith bunaithe ar chuspóirí atá sainithe go soiléir agus ar thorthaí intomhaiste, rud a d’fhágfadh go bhféadfaí measúnú a dhéanamh ar na torthaí a bhaintear amach do na hoibrithe lena mbaineann; á chur i bhfios go láidir a thábhachtaí atá sé idirghabhálacha níos tapúla agus níos éifeachtaí a áirithiú agus á mheabhrú, sa chomhthéacs sin, gur gá féachaint ar bhealaí chun inbhuanaitheacht CED, nó inbhuanaitheacht an chláir a thiocfaidh ina dhiaidh, a áirithiú, faoi chuimsiú an chéad Chreata Airgeadais Ilbhliantúil eile 2028-2034;

12.ag tabhairt dá haire gur thosaigh an Bheilg ar sheirbhísí pearsantaithe a sholáthar do na tairbhithe spriocdhírithe an 17 Feabhra 2025 agus, dá bhrí sin, gurb ón dáta sin go dtí 24 mhí tar éis theacht i bhfeidhm an chinnidh maoiniúcháin a bheidh tréimhse na hincháilitheachta le haghaidh ranníocaíocht airgeadais ó CED;

13.ag tabhairt dá haire gur thosaigh an Bheilg ag tabhú caiteachas riaracháin chun CED a chur chun feidhme an 17 Feabhra 2025 agus, dá bhrí sin, go mbeidh an caiteachas sin incháilithe le haghaidh ranníocaíocht airgeadais ó CED ón dáta sin go dtí 31 mhí tar éis theacht i bhfeidhm an chinnidh maoiniúcháin;

14.ag tabhairt dá haire gur thug údaráis na Beilge dearbhú go n-urramófar prionsabail na córa comhionainne agus an neamh-idirdhealaithe sa rochtain ar na gníomhaíochtaí atá beartaithe agus ina gcur chun feidhme, agus go gcoiscfear aon mhaoiniú dúbailte;

15.á athdhearbhú nach ceadmhach cúnamh ó CED a chur in ionad gníomhaíochtaí atá mar fhreagracht ar chuideachtaí, de bhua an dlí náisiúnta nó comhaontuithe comhchoiteanna;

16.ag formheas an chinnidh atá i gceangal leis an rún seo;

17.á threorú dá hUachtarán an cinneadh seo a shíniú le hUachtarán na Comhairle agus a shocrú go ndéanfar é a fhoilsiú in Iris Oifigiúil an Aontais Eorpaigh;

18.á threorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.