1.á mheabhrú gur prionsabal bunaidh de chuid an Aontais é pá comhionann as obair chomhionann nó obair ar comhionann a luach agus go bhfuil sé d’oibleagáid ar na Ballstáit deireadh a chur le hidirdhealú inscnebhunaithe i ngach gné den luach saothair, de dhálaí oibre agus de chineálacha conarthaí fostaíochta; á mheabhrú go gcuideofar le cur chun feidhme iomlán na Treorach maidir le Trédhearcacht Pá chun deireadh a chur le hidirdhealú agus claontacht inscnebhunaithe ag an obair, e.g. i gcleachtais earcaíochta agus i struchtúir phá;

2.á chur in iúl gur oth léi go bhfuil na bearnaí pá agus pinsin idir na hinscní fós ann san Aontas, rud a bhfuil tionchar diúltach aige ar staid shóisialta agus eacnamaíoch na mban agus, dá bhrí sin, ar an tsochaí ina hiomláine; á chur in iúl gur oth léi, cé go bhfuil laghdú beag tagtha le deich mbliana anuas ar an meánbhearna phá agus phinsin idir na hinscní ar fud an Aontais, nach leor fós luas reatha an athraithe chun an bhearna a dhúnadh roimh 2100; á chur in iúl gur oth léi go bhfuil bochtaineacht agus eisiamh seanaoise fós ina ndúshlán do mhná scothaosta, agus go bhfuil siad sin ag dul i méid i gcoinne na treochta foriomláine, agus béim á leagan ar an ngá atá le córais pinsin inbhuanaithe a neartú agus tacú le haosú gníomhach; á chur in iúl gur geal léi an fógra maidir le straitéis frithbhochtaineachta AE agus á iarraidh ar an gCoimisiún sineirge a áirithiú idir an togra sin agus an straitéis um chomhionannas inscne atá ar na bacáin chun aghaidh a thabhairt ar rioscaí inscne agus trasnacha na bochtaineachta;

3.á mheabhrú go bhfuil mná ar fud an Aontais i mbaol bochtaineachta níos mó ná fir, go háirithe mná a ndéantar cineálacha trasnacha idirdhealaithe orthu, amhail máithreacha aonair, mná scothaosta, mná faoi mhíchumas, náisiúnaigh tríú tír, daoine LADTIA+ agus mná i gceantair thuaithe; á chur i bhfáth nach amháin go bhfuil an bhearna phinsin idir na hinscní mar thoradh ar neamhionannais phá a charnadh le linn a saolré ach freisin ar dheiseanna éagsúla ar mhargadh an tsaothair, ar dháileadh éagothrom na hoibre cúraim neamhfhoirmiúil sa bhaile, agus ar chlaontacht inscne sa tsochaí; á iarraidh go mbeadh beartais ann lena n-aithnítear na míbhuntáistí sin agus rannpháirtíocht i bhfostaíocht ar ardchaighdeán agus i gcomhdheiseanna á gcur chun cinn ag an am céanna; ag tabhairt dá haire, ós rud é gurb ionann pinsin seanaoise agus ceithre chúigiú den ioncam iomlán ar an meán tar éis scoir, agus i bhfianaise na ndúshlán déimeagrafach leanúnach, mura dtabharfar aghaidh ar an mbearna phinsin idir na hinscní, d’fhéadfaí comhtháthú sóisialta fadtéarmach na mBallstát agus inbhuanaitheacht na gcóras cosanta sóisialta a chur i mbaol;

4.á chur i bhfios go láidir go bhfuil saoirse aonair agus neamhspleáchas eacnamaíoch na mban bunriachtanach dá slándáil phearsanta agus dá ndínit phearsanta, agus go méadaíonn rannpháirtíocht íseal i margadh an tsaothair leochaileacht i leith drochíde, foréigean inscnebhunaithe, lena n-áirítear foréigean teaghlaigh agus foréigean i spásanna poiblí, agus spleáchas eacnamaíoch; á iarraidh ar na Ballstáit bearta spriocdhírithe a dhéanamh chun foréigean agus ciapadh inscnebhunaithe a chosc agus a chomhrac, ar líne agus as líne araon, lena n-áirítear trí fheachtais feasachta, trí Choinbhinsiún Iostanbúl a fhorfheidhmiú agus trí Choinbhinsiún EIS maidir le Foréigean agus Ciapadh (Coinbhinsiún 190) a dhaingniú chun sásraí éifeachtacha cosanta íospartach a áirithiú i saol na hoibre;

5.ag tabhairt dá haire go ndéanann mná sciar díréireach d’obair chúraim agus tí gan íocaíocht fós, rud a laghdaíonn a rannpháirtíocht i margadh an tsaothair agus a bhfabhrú pinsin; á aithint go gcruthaíonn na róil thraidisiúnta inscne, na claontachtaí agus roinnt mhíchothrom na bhfreagrachtaí cúraim i measc na mban agus na bhfear pionós pá máithreachais agus pionós i leith aire a thabhairt do leanaí, do bhaill teaghlaigh nó do chleithiúnaithe eile atá faoi mhíchumas nó atá níos sine nó breoite, agus go gcuireann na pionóis sin ní hamháin leis na bearnaí leanúnacha pá agus pinsin idir na hinscní ach gur féidir leo mná ar mian leo leanaí a bheith acu a dhíspreagadh freisin, tráth a bhfuil meath déimeagrafach ag bagairt ar go leor tíortha AE, toisc go laghdaíonn siad na deiseanna do mhná óga, go háirithe, i margadh an tsaothair;

6.ag cur béim ar an bhfíoras go bhfuil infheistíocht neamhleor i seirbhísí cúraim leanaí agus cúraim fhadtéarmaigh ar ardchaighdeán, agus infhaighteacht theoranta, ardchostas agus easpa bonneagar leormhaith dóibh, fós ina bpríomhdhúshlán do rannpháirtíocht iomlán na mban sa tsochaí agus i margadh an tsaothair, go príomha, agus go bhféadfadh sé go bhfágfadh mná margadh an tsaothair roimh am nó go neamhdheonach agus go bhféadfaidís bac a chur ar a ndul chun cinn gairme; á chur i bhfios go láidir gur gá obair chúraim gan íocaíocht a aithint agus a léiriú go córasach i ndearadh beartais agus i gcórais cosanta sóisialta agus, ag an am céanna, deiseanna a éascú do mhná filleadh ar mhargadh an tsaothair; á aithint gur cloch choirnéil den tsochaí é an cúram agus gurb iad na mná, den chuid is mó, a sholáthraíonn é; á mheabhrú gur minic a bhíonn freagrachtaí breise nó fiú freagrachtaí lánaimseartha ag baint le cúram a thabhairt do leanaí agus do bhaill teaghlaigh nó do chleithiúnaithe eile atá faoi mhíchumas nó atá níos sine nó breoite; á thabhairt chun suntais go léirítear an réaltacht sin i bpatrúin mhargadh an tsaothair, lena n-áirítear rátaí níos airde d’obair pháirtaimseartha, pá níos ísle in aghaidh na huaire, bristeacha gairme agus tréimhse fostaíochta níos giorra i measc na mban; á iarraidh go mbeadh beartais ann a thacaíonn le teaghlaigh ina n-éagsúlacht uile, a chuireann cothromaíocht oibre is saoil chun cinn, agus a spreagann fir agus mná araon freagrachtaí cúraim a roinnt, agus a áirithiú ag an am céanna go n-urramófar obair chúraim, bíodh sí foirmiúil nó neamhfhoirmiúil, agus go mbeidh meas cothrom uirthi laistigh den tsochaí;

7.á chur i bhfáth go bhfuil sé ríthábhachtach bearnaí pá agus pinsin idir na hinscní a dhúnadh don chomhionannas agus don iomaíochas, agus gur cheart é a bhaint amach trí bhearta fianaise-bhunaithe, agus sainchumais na mBallstát agus na gcomhpháirtithe sóisialta á n-urramú; á mheabhrú go gcosnaíonn bearnaí inscne i bpá agus i bhfostaíocht EUR 390 billiún ar AE in 2023 Eurofound, ‘Mind the gap! Gender employment gap cost Europe over €390 billion in 2023’ [Seachain an bhearna! Cosnóidh an bhearna fostaíochta idir na hinscní os cionn €390 billiún ar an Eoraip in 2023] Suíomh gréasáin Eurofound, Márta 2025. trí thuilleamh caillte, ranníocaíochtaí leasa agus costais airgeadais phoiblí na sochar leasa shóisialta a fhaigheann mná nach bhfuil ag obair; ag tabhairt dá haire go bhféadfadh dúnadh na bearna fostaíochta idir na hinscní táirgiúlacht a mhéadú, rud a d’fhágfadh go dtiocfadh méadú 3,2 % go 5,5 % ar OTI per capita faoi 2050, agus go spreagfadh dálaí oibre níos solúbtha, cothromaíocht oibre is saoil níos fearr agus pá níos airde níos mó ban chun dul isteach sa mhargadh saothair, rud a d’fhágfadh go mbeadh méadú ar acmhainneacht tháirgiúil an gheilleagair An Institiúid Eorpach um Chomhionannas Inscne, ‘Economic benefits of gender equality in the European Union – How closing the gender gaps in labour market activity and pay leads to economic growth’ [Tairbhí eacnamaíocha an chomhionannais inscne san Aontas Eorpach – An chaoi a n-eascraíonn fás eacnamaíoch as na bearnaí idir na hinscní i ngníomhaíocht sa mhargadh saothair agus i bpá a dhúnadh], 2017.; á aithint go mbíonn tionchar díréireach ag an ngéarchéim maidir le costas maireachtála ar mhná, lena n-áirítear máithreacha; á iarraidh go mbeadh bearta ann lena n-áiritheofar go léireoidh pá an costas maireachtála agus go ndreasóidh sé rannpháirtíocht an lucht saothair, agus go leanfaidh sé de chreataí náisiúnta mhargadh an tsaothair agus comhaontuithe comhpháirtíochta sóisialta a urramú ag an am céanna; á chur i bhfáth go neartaítear, le rannpháirtíocht chomhionann na mban agus na bhfear i bhfostaíocht ardcháilíochta, soláthar saothair an Aontais agus a athléimneacht eacnamaíoch fhoriomlán agus go bhfuil sí ag teacht le clár oibre iomaíochais na hEorpa; ag spreagadh an Choimisiúin agus na mBallstát chun gnóthachain chainníochtaithe ó chomhionannas inscne méadaithe a áireamh i réamhaisnéis eacnamaíoch agus i measúnuithe tionchair beartais i gcás inarb ábhartha;

8.á thabhairt chun suntais go raibh an bhearna phá níos airde san earnáil phríobháideach in 2023 ná san earnáil phoiblí i bhformhór thíortha AE Parlaimint na hEorpa, ‘Topaicí – Tuiscint ar an mbearna phá idir na hinscní: sainmhíniú, fíricí agus cúiseanna’, suíomh gréasáin Pharlaimint na hEorpa, 2020. agus go bhfuil gá le hiarrachtaí sonracha chun a áirithiú go spreagfaidh cuideachtaí cleachtais neamh-idirdhealaitheacha go gníomhach agus go gcuirfidh siad comhdheiseanna agus pá comhionann as obair ar comhionann a luach chun cinn;

9.á mheabhrú gurb iad fostaithe agus gnólachtaí a spreagann iomaíochas AE, mar a aithnítear i dtuarascáil Draghi; ag cur béim ar an bhfíoras go bhfuil ganntanais scileanna agus saothair, atá níos measa mar gheall ar an laghdú atá ag teacht ar an daonra in aois oibre, ag cur isteach go mór ar tháirgiúlacht agus ar fhás AE; á chur i bhfios go bhféadfaí cabhrú leis na brúnna sin a mhaolú trí fheabhas a chur ar rannpháirtíocht na mban i margadh an tsaothair agus ar dhálaí oibre na mban, go háirithe sna hearnálacha atá ann faoi láthair agus atá ag teacht chun cinn agus atá nasctha leis an dá aistriú; á iarraidh go ndéanfaí comhionannas inscne agus comhrac steiréitíopaí inscne a phríomhshruthú ar bhealach a thacaíonn le rannpháirtíocht na mban sa lucht saothair, le forbairt scileanna agus le hiomaíochas, agus lena spreagfaí deireadh a chur le bacainní ar dheiseanna ar fud chláir oibre iomaíochais, thionsclaíocha, scileanna agus dhigiteacha an Aontais;

10.á iarraidh ar AE agus ar a Bhallstáit comhionannas inscne a chur i bhfeidhm maidir le clársceidealú, seirbhísí poiblí agus, go háirithe, cúram sláinte gnéis agus atáirgthe a sholáthar, lena n-áirítear rochtain ar ghinmhilleadh saor in aisce, sábháilte agus dlíthiúil;

11.á iarraidh go bhforbrófaí straitéisí agus beartais inscne-fhreagrúla san earnáil dhigiteach agus go ndéanfaí iarrachtaí spriocdhírithe chun mná a lánpháirtiú ar bhealach níos éifeachtaí i margadh an tsaothair;

12.á mheabhrú go bhfuil cleachtais earcaíochta agus cur chun cinn atá oibiachtúil agus bunaithe ar fhiúntas agus comhdheiseanna, seirbhísí tacaíochta agus cearta gach duine a bheith rannpháirteach, mar bhonn le cóir chomhionann as a n-eascraíonn iomaíocht chóir i margadh saothair feidhmiúil, rud a d’fhéadfadh laghdú a dhéanamh ar na claontachtaí a mbíonn tionchar diúltach acu ar dhul chun cinn gairme na mban agus, dá bhrí sin, pionós a ghearradh ar a dtuilleamh, lena n-áirítear iompraíochtaí idirdhealaitheacha bunaithe ar inscne, cine, míchumas, aois agus gnéaschlaonadh agus féiniúlacht; á iarraidh, ina leith sin, go ndéanfaí an Treoir maidir le Cothromaíocht Inscne ar Bhoird Chorparáideacha a chur chun feidhme go hiomlán agus faireachán a dhéanamh uirthi agus ag spreagadh fiontair bheaga agus mheánmhéide (FBManna) agus cuideachtaí neamhliostaithe eile chun dea-chleachtas a leanúint maidir le cothromaíocht inscne sa bhainistíocht; ag tabhairt dá haire, thairis sin, go soláthraítear, i sochaí agus i ngeilleagar athléimneach, cuimsitheach agus inbhuanaithe atá dírithe ar an bhfás, poist ardcháilíochta ar phá maith in earnálacha ina bhfuil ceannas ag mná lena gcuirtear ar chumas na mban teidlíochtaí pinsin láidre a fhorbairt le linn a ngairmeacha beatha;

13.ag tabhairt dá haire gur gá a áirithiú nach mbeidh ar mhná atá ag obair in earnáil na cosanta aghaidh a thabhairt ar aon chineál idirdhealaithe bunaithe ar steiréitíopaí agus go mbeidh rochtain acu ar ghairmeacha cobhsaí a bhfuil pá maith ag gabháil leo agus a bhfuil ranníocaíochtaí leormhaithe pinsin ag gabháil leo;

14.á mheas gur cheart do na Ballstáit díriú ar bhacainní ar fhostaíocht agus ar fhiontraíocht a laghdú, tacú le cothromaíocht oibre is saoil do theaghlaigh trí bheartais leormhaithe um shaoire tuismitheora, socruithe solúbtha oibre agus an ceart chun dícheangail, líonraí oideachais luath-óige, cúram leanaí agus seirbhísí cúraim fhadtéarmaigh atá ar ardchaighdeán, inrochtana agus inacmhainne agus atá comhoiriúnach le hobair lánaimseartha, agus infheistíocht a dhéanamh i gcláir oiliúna, athscilithe agus uas-scilithe lena gcabhraítear le haghaidh a thabhairt ar ghanntanais scileanna, lena n-áirítear do mháithreacha aonair, do mhná scothaosta, do dhaoine LADTIA+, do mhná faoi mhíchumas, do mhná i gcásanna leochaileacha, do náisiúnaigh tríú tír agus do mhná atá ina gcónaí i gceantair thuaithe agus iargúlta agus do na réigiúin is forimeallaí, ós rud é gur dóichí go mbeidh deacracht acu rochtain a fháil ar oiliúint agus ar dheiseanna oibre; ag moladh rannchuidiú na mban le geilleagar na tuaithe;

15.á thabhairt chun suntais go bhfuil deighilt inscne ar fud earnálacha agus gairmeacha ina spreagadh struchtúrach tábhachtach don bhearna phá idir na hinscní; á chur i bhfáth go bhfuil an deighilt sin cothrománach, agus go bhfuil ró-ionadaíocht ag mná in earnálacha ar phá íseal agus atá tearcluacháilte go stairiúil, agus ingearach, inar lú an dóchúlacht, laistigh den earnáil chéanna, go mbeidh róil shinsearacha agus bhainistíochta ar phá níos fearr ag mná; á chur i bhfios go láidir go ndéantar pá níos ísle agus tearcluacháil ar earnálacha ina bhfuil ceannas ag mná go ginearálta mar gheall ar thosca éagsúla agus nach féidir údar a thabhairt leis sin mar gheall ar dhifríochtaí inniúlachta nó fiúntais, agus go bhfaigheann níos mó ban ná fir pá íseal agus an pá íosta i mbeagnach gach Ballstát AE in ainneoin go bhfuil mná níos óige ag éirí níos fearr ná fir níos óige i ngnóthachtáil oideachais Eurostat, Míniú ar Staidreamh – Staidreamh gnóthachtála oideachais’, suíomh gréasáin Eurostat, Bealtaine 2025.;

16.á thabhairt chun suntais nach mná iad ach 30 % de chomhaltaí boird chorparáidigh, agus gur mná iad níos lú ná duine as gach deichniúr uachtarán boird nó príomhoifigigh feidhmiúcháin (POFanna) cuideachtaí móra An Institiúid Eorpach um Chomhionannas Inscne, Innéacs um Chomhionannas Inscne 2021:, rud lena léirítear go bhfuil mná fós faoi ghannionadaíocht shuntasach i róil shinsearacha, i gcláir cheannaireachta agus mheantóireachta; ag tabhairt dá haire go bhfuil an bhearna phá idir na hinscní is airde i bpoist a bhfuil pá maith ag gabháil leo Eurofound agus Airmheán Comhpháirteach Taighde an Choimisiúin Eorpaigh, ‘Faireachlann Eorpach um Poist 2021: Bearnaí idir na hinscní agus an struchtúr fostaíochta’, 2021.; á chur i bhfios go láidir gur rud seasmhach iad na síleálacha gloine sa bhainistíocht, sa taighde agus sa nuálaíocht agus go gcuirtear srian leo ar an táirgiúlacht agus ar an iomaíochas; á chur i bhfáth go bhfuil sé ríthábhachtach an bhearna cheannaireachta a dhúnadh chun cuspóirí an Aontais a bhaint amach; ag cur béim ar an bhfíoras go bhfuil cineálacha éagsúla pá, amhail scaireanna nó bónais chuideachta, ag éirí níos coitianta agus go bhfuil siad ag méadú níos gasta i measc na bhfear ná na mban faoi láthair Eurofound, ‘Comhionannas inscne ag an obair’, 2020., agus béim á leagan ar dheis thábhachtach chun a áirithiú go rachaidh fás na samhlacha nua cúitimh sin chun tairbhe do mhná go cothrom agus ag tacú leis an dul chun cinn i dtreo an bhearna phá idir na hinscní a dhúnadh;

17.ag meabhrú ról uathúil na gcúramóirí agus chineál bunriachtanach an tsoláthair cúraim inár sochaí, go háirithe i bhfianaise na dtreochtaí déimeagrafacha atá ann faoi láthair agus daonra atá ag dul in aois; á chur i bhfáth gur príomhthoisc sna bearnaí pá agus pinsin idir na hinscní é sciar éagothrom na bhfreagrachtaí cúraim agus baile atá ag mná beagnach go heisiach; á mheabhrú gur mó an seans go mbeidh mná dífhostaithe, go n-oibreoidh siad go páirtaimseartha, go n-oibreoidh siad in earnálacha ar phá níos ísle ina bhfuil mná faoi cheannas agus go nglacfaidh siad sosanna gairme, agus gur féidir é sin a chur i leith an phionóis cúraim go páirteach, rud a bhfuil tionchar aige dá bharr sin ar phá agus ar dhul chun cinn gairme agus a chuireann le baol na bochtaineachta; á mheabhrú, thairis sin, nach gcuirtear tréimhsí neamhláithreachta ón bhfostaíocht chun freagrachtaí cúraim a ghlacadh i gcuntas i dtreo teidlíochtaí pinsin a fhabhrú, in ainneoin na gcostas a shábhálann an stát trí chúram neamhfhoirmiúil a dhéanann mná;

18.ag meabhrú an chirt chun saoire do thuismitheoirí mar a chumhdaítear sa Treoir maidir le Cothromaíocht Oibre is Saoil, agus á chur i bhfáth gur gá í a chur chun feidhme go hiomlán agus go héifeachtach; á chur i bhfios go láidir nach mór don bheartas dul i ngleic le comhroinnt éagothrom ualaigh idir mná agus fir agus tacú le dáileadh cothrom saoire do thuismitheoirí agus freagrachtaí cúraim idir tuismitheoirí chun samhail ‘saothraí comhionann, cúramóir comhionann’ a bhaint amach; á iarraidh ar na Ballstáit saoire atharthachta neamh-inaistrithe a íoctar go leormhaith a chur chun cinn agus feachtais feasachta agus dreasachtaí a thabhairt isteach chun glacadh na bhfear le saoire tuismitheora a mhéadú, agus bearta a áireamh chun faireachán agus tuairisciú a dhéanamh ar dhul chun cinn maidir le glacadh atá imdhealaithe de réir inscne; ag cur béim ar ról na bhfostóirí maidir le fostaíocht lánaimseartha a dhéanamh comhoiriúnach le freagrachtaí cúraim;

19.á iarraidh ar na Ballstáit oibriú go dlúth leis na comhpháirtithe sóisialta chun bearta gníomhacha agus comhordaithe a dhéanamh, lena n-áirítear oiliúint agus meantóireacht spriocdhírithe chun aghaidh a thabhairt ar na neamhionannais inscne struchtúracha atá mar bhonn agus mar thaca ag drogall na mban iarratas a dhéanamh ar ardú céime nó chun aird a tharraingt ar a bhfuil bainte amach acu féin; á chur i bhfáth nach rogha aonair é an drogall sin ach go n-eascraíonn sé as steiréitíopaí inscne daingnithe, leithscaradh gairme agus gairmthreoir neamh-leormhaith, a dhéanann difear go háirithe do mhná ar bheagán oiliúna agus imeallaithe; ag tathant ar na Ballstáit oibriú go dlúth leis na comhpháirtithe sóisialta chun deireadh a chur leis na bacainní sin trí chultúir chuimsitheacha san ionad oibre, trí chreataí feabhsaithe forbartha gairme agus trí straitéisí réamhghníomhacha comhionannais;

20.ag tabhairt rabhaidh faoin méadú seasta, ó 2015 i leith, ar bhochtaineacht seanaoise agus ar eisiamh sóisialta, a dhéanann difear go háirithe do mhná scothaosta, agus faoi rátaí bochtaineachta drámatúla na mban os cionn 75 bliana d’aois i roinnt Ballstát, mar shiombail den neamhionannas inscne foriomlán i dtuilleamh saoil; ag cur béim ar an bhfíoras gur mó seans go gcaithfidh mná scothaosta tréimhsí níos faide dá saol a bhfuil cúram agus seirbhísí tacaíochta de dhíth orthu iad féin, ar mó na costais a bhaineann leo ná an meánioncam pinsin i bhformhór na mBallstát;

21.á chur i bhfáth go gcuirtear, de bharr claontachtaí inscne neamh-chomhfhiosacha san earcaíocht, san ardú céime agus i socrú pá, leis an mbearna phá idir na hinscní; ag cur béim ar an bhfíoras go bhfuil steiréitíopaí inscne, lena gcuirtear mná ar ais in earnálacha ina bhfuil ceannas ag mná go traidisiúnta, ar phá íseal, i bhfabhar fir thar iarrthóirí ar mná iad atá chomh cáilithe céanna, agus go ndéantar an ‘urlár greamaitheach’ An Institiúid Eorpach um Chomhionannas Inscne, ‘Glossary and thesaurus – sticky floor’ [Gluais agus teasáras – urlár greamaitheach], suíomh gréasáin na hInstitiúide Eorpaí um Chomhionannas Inscne. do dhul chun cinn gairme na mban agus tionchar na dinimice norm inscne i gcaibidlíochtaí pá níos measa le linn shaol gairmiúil na mban;

22.á chur i bhfios go láidir go bhfuil sé ríthábhachtach seirbhísí cúraim a neartú chun rannpháirtíocht na mban i margadh an tsaothair a mhéadú, chun bearnaí fostaíochta, pá agus pinsin idir na hinscní a dhúnadh agus chun aghaidh a thabhairt ar ghanntanais scileanna agus saothair trí fhostaíocht athléimneach ardcháilíochta a ghiniúint; á iarraidh ar an gCoimisiún agus ar na Ballstáit an straitéis Eorpach um chúram agus an Moladh ón gComhairle maidir le cúram fadtéarmach a chur chun feidhme go hiomlán, spriocanna náisiúnta a leagan síos maidir le hinfhaighteacht, inrochtaineacht agus cáilíocht cúraim leanaí agus cumhdach cúraim fhadtéarmaigh agus acmhainní a chur i leataobh laistigh den Seimeastar Eorpach agus d’ionstraimí cistiúcháin AE le haghaidh seirbhísí cúraim ardcháilíochta, inacmhainne, inrochtana; á chur i bhfáth gur cheart infheistíocht phoiblí i mbonneagar cúraim a aicmiú mar chaiteachas lena gcothaítear fás faoi chreat rialachais eacnamaíoch athbhreithnithe AE; á iarraidh ar na Ballstáit Coinbhinsiún EIS 2011 maidir le hObair Chuibhiúil d’Oibrithe Tí, a dhaingniú;

23.á chur i bhfáth go bhfuil dúnadh na bearna cúraim leanaí fós ar cheann de na príomhdheiseanna chun feabhas a chur ar shaol tuismitheoirí nua ar fud AE; ag tabhairt dá haire gur minic a thagann an bhearna sin chun cinn tar éis breith linbh, a luaithe a thagann deireadh le saoire thuismitheoireachta íoctha agus sula gcuirtear rochtain ar oideachas agus ar chúram luath-óige lánaimseartha ar fáil; á chur i bhfios go láidir gur féidir, trí thacaíocht a thabhairt do theaghlaigh le linn na hidirthréimhse sin, cumas tuismitheoirí fanacht i margadh an tsaothair a neartú go suntasach;

24.ag tabhairt dá haire gur minic a oibríonn gnólachtaí faoi stiúir ban in earnálacha ar phá níos ísle agus go mbíonn bacainní breise rompu amhail rochtain theoranta ar mhaoiniú, laofacht inscne agus bacainní rialála;

25.á chur i bhfios go n-oibríonn thart ar 6.8 milliún duine in AE mar oibrithe cúraim íoctha neamhdhearbhaithe in earnáil na seirbhísí pearsanta agus teaghlaigh, ar mná iad 90 % díobh, agus ar imircigh meánaosta iad a bhformhór Eurofound, ‘Obair chúraim neamhdhearbhaithe san Aontas Eorpach: Cineálacha cur chuige beartais i leith dúshlán socheacnamaíoch casta’, 2025. agus, dá bhrí sin, nach gcuimsíonn cearta saothair ná slándáil shóisialta iad;

26.á chur i bhfáth go bhfuil dlúthnasc idir neamhshlándáil airgeadais agus neamhionannas airgeadais agus folláine shíceolaíoch agus nár cheart neamhaird a thabhairt ar thionchar meabhairshláinte an neamhionannais pá; ag tabhairt dá haire gur dóchúla go mbeidh fadhbanna meabhairshláinte ag mná ná ag fir, amhail traochadh agus dúlagar ainsealach, go háirithe in earnálacha a bhfuil obair ar phá íseal agus obair atá dian ó thaobh mothúchán de mar shaintréith acu;

27.á chur in iúl gur geal léi iarrachtaí leanúnacha an Choimisiúin comhionannas inscne a chur chun cinn agus á iarraidh air straitéis nua, mhionsonraithe, dírithe ar thorthaí agus uaillmhianach AE maidir le comhionannas inscne a chur ar aghaidh, ag tógáil ar dhul chun cinn agus ar dhea-chleachtas roimhe seo, agus plean gníomhaíochta tiomnaithe a mholadh chun na bearnaí pá agus pinsin idir na hinscní a dhíothú, trí bhearta fianaise-bhunaithe, trí chur chuige trasearnála a ghlacadh agus le spriocanna cainníochtúla agus faoi cheangal ama ar leibhéal AE lena n-áiritheofar go rannchuideoidh beartais chomhionannais inscne, ar réamhchoinníoll iad do shochaithe sláintiúla rathúla, le fás eacnamaíoch inbhuanaithe, le hiomaíochas, le fiontraíocht, le nuálaíocht agus le folláine teaghlaigh agus le cothromaíocht oibre is saoil;

28.á iarraidh, thairis sin, go n-áireofaí sa phlean gníomhaíochta bearta spriocdhírithe chun feabhas a chur ar dhálaí oibre agus ar phá cothrom in earnálacha ina bhfuil ceannas ag mná, chun tacú le teaghlaigh agus chun tosaíocht a thabhairt d’infheistíocht faoin gcéad chreat airgeadais ilbhliantúil eile lena neartaítear cothromaíocht oibre is saoil agus earnáil cúraim iontaofa; á chur i bhfáth go bhfuil gá le cur chuige lena n-urramaítear inniúlachtaí náisiúnta agus réaltachtaí éagsúla na mban ar fud an Aontais;

29.á iarraidh ar an gCoimisiún oibriú leis na Ballstáit agus leis na comhpháirtithe sóisialta chun treoirlínte agus treoirthionscadal Eorpach a fhorbairt le haghaidh córais mheastóireachta agus aicmithe post atá neodrach ó thaobh inscne de, lenar féidir comparáid uile-Aontais a dhéanamh idir obair ar comhionann a luach agus critéir shoiléire a shainiú chun measúnú cothrom a dhéanamh ar luach na hoibre agus ar chórais phá atá bunaithe ar fhiúntas in earnálacha ina bhfuil ceannas ag mná, agus oibleagáidí rialála nó airgeadais nach bhfuil gá leo ar fhostóirí á seachaint ag an am céanna; ag tabhairt dá haire gur cheart é sin a dhéanamh ar fud na n-earnálacha agus trí chearta cómhargála a áirithiú; á chur i bhfáth go ndéantar le luacháil chóir feabhas a chur ar cháilíocht, ar spreagadh agus ar iomaíochas post gan an bonn a bhaint ó sholúbthacht mhargadh an tsaothair; ag spreagadh an Choimisiúin agus na mBallstát leanúint d’oiliúint a sholáthar, i gcás inarb iomchuí, chun tacaíocht níos fearr a thabhairt do phróisis earcaíochta agus meastóireachta atá neodrach ó thaobh inscne de;

30.á iarraidh ar an gCoimisiún comhaontú cúraim Eorpach a chur i bhfeidhm, mar a fógraíodh le linn éisteachtaí parlaiminteacha 2024; á iarraidh go n-áireofaí sa chomhaontú sin sraith beartas, clár agus moltaí, mar aon le pacáiste sonrach infheistíochta cúraim, arb é is aidhm dóibh aistriú i dtreo geilleagar cúraim a chothú lena n-aithnítear cúram mar cheart, agus lena gcuirtear luach air mar chnámh droma ár sochaí; á iarraidh, sa chomhthéacs sin, go gcruthófaí sruth cistiúcháin tiomnaithe faoi chreat airgeadais ilbhliantúil 2028-2034 chun seirbhísí a chur i bhfeidhm chun tacú le cúramóirí neamhfhoirmiúla;

31.á iarraidh ar na Ballstáit obair a chúiteamh agus réitigh a chur chun cinn lena neartaítear teaghlaigh ina n-éagsúlacht uile agus freagracht fhioscach agus tacaíocht d’fhiontair á n-áirithiú ag an am céanna, amhail socruithe solúbtha oibre do thuismitheoirí agus do dhaoine aonair agus an ceart chun dícheangail a leathnú, dreasachtaí cánach a thairiscint do bhlianta cúraim agus sochair do thuismitheoirí aonair, agus infheistíocht a dhéanamh i soláthar seirbhísí cúraim leanaí agus cúraim fhadtéarmaigh atá ar ardchaighdeán, inacmhainne agus inrochtana agus atá comhoiriúnach le beartais fostaíochta lánaimseartha agus le beartais maidir le saoire tuismitheora atá comhionann ó thaobh inscne de; á iarraidh, thairis sin, ar na Ballstáit gníomhaíochtaí a spreagadh, trí idirphlé sóisialta agus cómhargáil, chun rannpháirtíocht iomlán na mban i margadh an tsaothair a éascú agus chun a rátaí sosanna gairme agus oibre páirtaimseartha, atá níos airde ná rátaí na bhfear, a laghdú; á iarraidh go mbeadh bearta tiomnaithe ann chun filleadh na mban ar an obair a éascú tar éis sosanna fada gairme le bearta ath-lánpháirtithe agus dreasachtaí spriocdhírithe amhail scéimeanna athscilithe;

32.á iarraidh ar an gCoimisiún, agus inniúlachtaí náisiúnta á n-urramú aige, treoirlínte a eisiúint chun cabhrú le socruithe cánach a shainaithint agus aghaidh a thabhairt orthu, amhail scéimeanna comhpháirteacha cánachais, a d’fhéadfadh saothraithe tánaisteacha a dhíspreagadh ó bheith rannpháirteach go gníomhach i margadh an tsaothair, chun a áirithiú go dtacóidh beartais chánach náisiúnta le comhionannas inscne agus le rannpháirtíocht níos leithne na mban i margadh an tsaothair agus chun malartú dea-chleachtais a éascú;

33.á thabhairt chun suntais a thábhachtaí atá sé fiontraíocht na mban a chothú agus ról na ngnólachtaí faoi stiúir na mban maidir le feabhas a chur ar chumhachtú eacnamaíoch agus ar thuilleamh féideartha thar shaolré; á chur i bhfáth go bhfuil gá le tacaíocht níos fearr ar leibhéal an Aontais agus ar an leibhéal náisiúnta araon, go háirithe maidir le forbairt gnó, cláir mheantóireachta, rochtain ar mhaoiniú agus ar chaipiteal fiontair, agus litearthacht airgeadais fheabhsaithe do mhná, le tacaíocht ó InvestEU, ón gComhairle Nuálaíochta Eorpach agus ón Líonra Fiontar Eorpach, le bearta spriocdhírithe do ghrúpaí faoi ghannionadaíocht, lena n-áirítear mná i gceantair thuaithe agus in earnálacha STEAM; á iarraidh ar an gCoimisiún aghaidh a thabhairt ar na gnéithe sin sa chéad straitéis eile maidir le comhionannas inscne agus á chur i bhfios go láidir a thábhachtaí atá oideachas luathfhiontraíochta agus litearthachta airgeadais do chailíní chun fiontraithe ban a bheidh ann amach anseo a chothú;

34.á chur i bhfios go láidir gur cheart níos mó ban a spreagadh chun iad féin a chur chun cinn trí cheannaireacht, forbairt, meantóireacht agus tacaíocht don chothromaíocht oibre is saoil; ag tabhairt dá haire gur chuir an Coimisiún gné inscne san áireamh ina threochlár post ardcháilíochta, agus á chur i bhfáth gur gá a áirithiú go dtabharfaidh tionscnaimh ghaolmhara aghaidh ar aitheantas cothrom na hoibre a dhéanann mná de ghnáth ar fud earnálacha, agus feabhas a chur ar cháilíocht post agus ar dhálaí oibre, agus ar an gcaoi sin rannchuidiú le lucht saothair níos táirgiúla agus le geilleagar Eorpach níos láidre agus níos iomaíche;

35.á chur i bhfáth gur gá deighilt inscne cheirde a bhriseadh síos trí aitheantas a thabhairt do luach na n-earnálacha ina bhfuil ceannas ag mná amhail oideachas, cúram sláinte agus seirbhísí sóisialta ó thaobh pá agus dálaí oibre de agus trí chur ar chumas níos mó ban páirt a ghlacadh in earnálacha ardphá amhail TFC, STEAM agus airgeadas, chomh maith le róil cheannaireachta sa bhainistíocht shinsearach agus san ionad oibre, e.g. mar Phríomhoifigigh Feidhmiúcháin, agus sa saol poiblí agus polaitiúil; á thabhairt chun suntais gur gá a áirithiú go ndéanfar gairmthreoir atá níos íogaire ó thaobh inscne de agus níos dinimiciúla a phríomhshruthú ar gach leibhéal oideachais agus oiliúna ionas go laghdófar na bacainní a luaithe is féidir; ag spreagadh na mBallstát agus na bhfostóirí gairmthreoir atá íogair ó thaobh inscne de a sholáthar ó chéim luath agus ionadaíocht chothrom a chur chun cinn i bpoist shinsearacha agus chinnteoireachta;

36.á chur i bhfáth a thábhachtaí atá sé a áirithiú go mbeidh rochtain chomhionann ag mná agus ag cailíní ar gach ábhar ar gach leibhéal oideachais agus oiliúna; á chur i bhfios go láidir gur gá deireadh a chur le claontacht agus steiréitíopaí cultúrtha agus inscne i gcuraclaim, in ábhair teagaisc agus i ngairmthreoir agus in oiliúint d’oideoirí, chun cosc a chur ar mhná agus cailíní a threorú chuig líon teoranta réimsí staidéir nó earnálacha gairme; ag spreagadh na mBallstát chun rochtain níos fearr a chur chun cinn do chailíní ar réimsí ina mbíonn ceannas ag fir go traidisiúnta; á iarraidh go ndéanfaí beartais oideachais inscne-fhreagrúla a chur chun cinn lena spreagtar cailíní agus lena dtacaítear leo chun staidéar agus gairmeacha a shaothrú i ngach réimse, lena n-áirítear STEAM;

37.ag cur béim ar an bhfíoras gur gá luach airgeadais níos fearr a chur ar an obair a dhéantar in earnálacha ina bhfuil ceannas ag mná, an ceart chun pá comhionann as obair ar comhionann a luach a ráthú, faisnéis a sholáthar maidir le leibhéil phá aonair agus meánleibhéil phá oibrithe, agus feabhas a chur ar dhálaí oibre, go háirithe pá agus dul chun cinn gairme, lena bhfeabhsaítear neamhspleáchas airgeadais na mban agus lena laghdaítear a mbaol bochtaineachta; á chur i bhfáth go laghdófar deighilt inscne agus go dtabharfar aghaidh ar ghanntanais lucht saothair atá ag dul in olcas trí fheabhas a chur ar dhálaí in earnálacha ina bhfuil ceannas ag mná; á iarraidh ar an gCoimisiún gné láidir inscne a áireamh sa tionscnamh atá le teacht maidir le creat chun aghaidh a thabhairt ar dhúshláin cúraim fhadtéarmaigh agus lucht saothair agus i ngach gníomhaíocht faoi Aontas na Scileanna agus san Acht um Poist Ardchaighdeáin atá ar na bacáin; á iarraidh ar na Ballstáit bearta nithiúla a dhéanamh chun pá comhionann as obair chomhionann a áirithiú, agus beartais a thacaíonn le fás pá cothrom atá nasctha le táirgiúlacht, iomaíochas agus inbhuanaitheacht eacnamaíoch á spreagadh ag an am céanna;

38.ag cur béim ar an bhfíoras go bhfuil bacainní iomadúla agus trasnacha fós roimh dhaoine faoi mhíchumas, go háirithe mná faoi mhíchumas, maidir le rochtain a fháil ar fhostaíocht, ar oiliúint agus ar fhiontraíocht; á iarraidh ar an gCoimisiún agus ar na Ballstáit rochtain chomhionann ar phoist ardcháilíochta, ar ghairmoideachas agus ar dheiseanna cistiúcháin a chur chun cinn, i gcomhréir leis an straitéis Eorpach um chearta daoine faoi mhíchumas, agus leas iomlán á bhaint as ionstraimí AE agus náisiúnta atá ann cheana; á chur i bhfáth gur comhpháirteanna bunriachtanacha de gheilleagar sóisialta margaidh agus d’iomaíochas na hEorpa iad an cuimsiú agus an inrochtaineacht;

39.á iarraidh ar na Ballstáit, in éineacht leis na comhpháirtithe sóisialta, conairí gairme agus pá ilbhliantúla atá freagrach go fioscach a dhearadh i seirbhísí riachtanacha poiblí agus cúraim (cúram sláinte, cúram sóisialta, oideachas) chun cáilíocht, scileanna agus coinneáil a fheabhsú; á iarraidh ar na Ballstáit úsáid spriocdhírithe a bhaint as Ciste Sóisialta na hEorpa Plus agus, i gcás inarb iomchuí, as an tSaoráid Téarnaimh agus Athléimneachta le haghaidh oiliúna, uas-scilithe agus coinneála, agus saobhadh buan ar dhinimic pá á sheachaint;

40.ag spreagadh an Choimisiúin agus na mBallstát chun sásraí dreasachta deonacha a chruthú, amhail nósanna imeachta riaracháin simplithe, aitheantas poiblí nó rochtain tosaíochta ar chistí AE, d’fhostóirí a chuireann pleananna comhionannais inscne agus dea-chleachtas i dtrédhearcacht pá chun feidhme;

41.á chur i bhfáth a thábhachtaí atá sé luach saothair cothrom a áirithiú in earnálacha ina bhfuil ceannas ag mná, agus neamhspleáchas socraithe pá á choinneáil ag an am céanna do na comhpháirtithe sóisialta agus traidisiúin náisiúnta na cómhargála á n-urramú;

42.á chur i bhfios go láidir gur féidir, le hobair fhoirmiúil le dálaí oibre ar ardchaighdeán, go háirithe in earnálacha ina bhfuil ceannas ag mná, boinn chánach a neartú agus a áirithiú go n-aithnítear agus go gcosnaítear oibrithe ban faoin dlí; ag tabhairt dá haire gur féidir machaire comhréidh a áirithiú ar bhealach níos fearr do mhná i margadh an tsaothair trí dhul i ngleic leis an ngeilleagar neamhfhoirmiúil trí athchóirithe spriocdhírithe, amhail riar na gceanglas cánach a shimpliú agus tacú leis an bhfiontraíocht; á iarraidh, dá bhrí sin, ar na Ballstáit rochtain ar an ngeilleagar foirmiúil a shimpliú, bearta a chur chun cinn chun an geilleagar liath a chomhrac agus conarthaí oibre a chur ar bhonn foirmiúil chun oibrithe in earnálacha neamhfhoirmiúla a chosaint, amhail obair tí, cúram pearsanta, talmhaíocht agus poist shéasúracha, chun obair neamhdhearbhaithe a chomhrac, iomaíocht chóir a neartú agus a áirithiú gur féidir le mná rannchuidiú le córais cosanta sóisialta agus le hoiliúint rochtana agus le cearta agus cosaintí eile a bhaineann le saothar; á iarraidh ar an gCoimisiún agus ar na Ballstáit dlús a chur lena gcuid oibre chun bochtaineacht lucht oibre a chomhrac, rud a mbíonn tionchar diúltach aige ar chaighdeáin mhaireachtála na mban, lena n-áirítear oibrithe neamhfhoirmiúla nach mbíonn tuarastail mhaithe agus rochtain ar shlándáil shóisialta acu go minic;

43.ag aithint an tionchair airgeadais fhadtéarmaigh a d’fhéadfadh a bheith ag tréimhsí fada cúraim gan íocaíocht ar mhná; á iarraidh ar na Ballstáit córais láidre cosanta sóisialta atá íogair ó thaobh inscne de a áirithiú, lena n-áirítear dóibh siúd a ghlacann sosanna gairme chun aire a thabhairt do chleithiúnaithe; ag cur béim ar an bhfíoras, cé go n-aithnítear gur inniúlacht náisiúnta go príomha iad córais phinsin, a thábhachtaí atá pinsin íosta náisiúnta leormhaithe agus creidmheasanna cúraim do theidlíochtaí pinsin dóibh siúd a ghlacann sosanna gairme chun cúram a thabhairt do chleithiúnaithe; á thabhairt chun suntais gur gá cosaint agus tacaíocht ioncaim leormhaith a áirithiú do chúramóirí neamhfhoirmiúla agus a áirithiú go gcuirfear oibrithe páirtaimseartha san áireamh i soláthar pinsin an dara colún; á thabhairt chun suntais gur gá táscairí maidir leis an mbearna phinsin idir na hinscní a chomhtháthú i Scórchlár Sóisialta an Aontais agus bearta chun rioscaí pinsin a bhaineann le hinscne a chomhrac a chomhtháthú sna moltaí tírshonracha, ag tosú ó thimthriall Sheimeastar Eorpach 2026; ag spreagadh na mBallstát chun féachaint ar réitigh atá freagrach go fioscach agus dírithe ar an obair lena dtacaítear le cúramóirí filleadh ar an margadh saothair, lena gcuirtear faisnéis ar fáil maidir le rochtain a fháil ar choigilteas pinsin phoiblí agus phríobháidigh, agus lena neartaítear córais tacaíochta teaghlachbhunaithe agus pobalbhunaithe; á iarraidh ar an gCoimisiún, i gcomhar leis na Ballstáit, béim láidir a leagan ar chumhachtú eacnamaíoch na bpinsinéirí agus measúnú a dhéanamh ar an togra a d’fhéadfadh a bheith ann maidir le híoschaighdeáin AE do chreidmheasanna cúraim lena bhféadfaí blianta cúraim a áireamh i dtreo teidlíochtaí pinsin; á iarraidh ar na Ballstáit a áirithiú go mbeidh cur chun feidhme an Mholta ón gComhairle maidir le hioncam íosta freagrúil ó thaobh inscne de Moladh ón gComhairle an 30 Eanáir 2023 maidir le hioncam íosta leordhóthanach lena n-áirithítear cuimsiú gníomhach (IO C 41, 3.2.2023, lch. 1). agus dírithe ar thacú le riachtanais na mban atá ag maireachtáil faoi bhochtaineacht, chun saoirse airgeadais, neamhspleáchas agus deiseanna a thabhairt dóibh;

44.ag aithint an róil a d’fhéadfadh a bheith ag clárú uathoibríoch i scéimeanna pinsin ceirde chun níos mó rannpháirtíochta ag mná i gcoigilteas scoir a spreagadh, rud lena gcuideofar leis an mbearna phinsin idir na hinscní a mhaolú agus lena dtacófar le slándáil airgeadais fhadtéarmach; ag tabhairt dá haire go dtacaíonn an tÚdarás Eorpach um Árachas agus Pinsin Cheirde le húsáid deaiseanna pinsean, uirlisí rianaithe chun faireachán éifeachtach a dhéanamh ar bhearnaí pá agus pinsin idir na hinscní, agus beartais agus cleachtais luacha saothair atá neodrach ó thaobh inscne de i bpinsin cheirde; á iarraidh ar na Ballstáit rochtain neamh-idirdhealaitheach ar scéimeanna pinsin fhorlíontaigh agus ceirde a chur chun cinn do gach oibrí, lena n-áirítear oibrithe páirtaimseartha;

45.á iarraidh ar an gCoimisiún agus ar na Ballstáit mná imirceacha tríú tír, a fhostaítear go minic i bpoist ar bheagán oiliúna, neamhchinnte agus tearcíoctha in earnálacha amhail cúram baile, glanadh agus lónadóireacht Parlaimint na hEorpa, an Ard-Stiúrthóireacht um Sheirbhísí Taighde Pharlaimintigh, ‘Migrant women and the EU labour market – Overcoming double discrimination’ [Mná imirceacha agus margadh saothair AE – Idirdhealú dúbailte a shárú], Bealtaine 2023., a chosaint ar idirdhealú agus ar dhúshaothrú; á chur i bhfáth go bhfuil sé ríthábhachtach pá cothrom, cosaint dhlí an tsaothair agus ranníocaíochtaí slándála sóisialta leormhaithe a áirithiú chun na bearnaí pá agus pinsin idir na hinscní a dhúnadh;

46.á iarraidh ar an gCoimisiún feachtais feasachta agus oideachais a fhorbairt ar fud AE maidir le trédhearcacht pá, cóir chomhionann agus na hionstraimí AE atá ar fáil chun comhionannas san fhostaíocht a chur chun cinn; á chur i bhfáth go bhfuil oibrithe agus fostóirí eolasacha ríthábhachtach chun an reachtaíocht atá ann faoi láthair a fhorfheidhmiú go héifeachtach;

47.á iarraidh ar na Ballstáit aitheantas a thabhairt do chúram seantuismitheoirí – nuair a thugann seantuismitheoirí aire rialta dá ngarleanaí chun a chur ar chumas thuismitheoir(í) an linbh dul isteach san obair, fanacht inti nó filleadh ar an obair – mar chúram atá incháilithe do chreidmheasanna cúraim, le critéir shoiléire incháilitheachta agus fíoraithe;

48.á chur i bhfáth a thábhachtaí atá sé deireadh a chur le bacainní praiticiúla in áiteanna oibre, lena n-áirítear trí inrochtaineacht dhigiteach, cóiríocht réasúnta agus socruithe solúbtha oibre; ag spreagadh na mBallstát dreasachtaí spriocdhírithe a chur ar fáil d’fhostóirí a dhéanann infheistíocht in inrochtaineacht, i bhforbairt scileanna agus in earcaíocht chuimsitheach, agus ualaí breise riaracháin á seachaint ag an am céanna, chun comhionannas agus iomaíochas araon a chur chun cinn i gcomhréir le prionsabail an gheilleagair shóisialta margaidh;

49.á thabhairt chun suntais go bhfuil ról lárnach ag an idirphlé sóisialta agus ag rannpháirtíocht na gcomhpháirtithe sóisialta maidir le straitéisí comhionannais agus pá a dhearadh, a chur chun feidhme agus faireachán a dhéanamh orthu chun cabhrú leis an mbearna phá idir na hinscní a dhíothú; ag spreagadh na gcomhpháirtithe sóisialta chun bearta a áireamh i gcomhaontuithe comhchoiteanna chun comhdheiseanna a chur chun cinn agus chun ciapadh, neamhionannas pá agus laofacht inscne a chomhrac, agus chun cumhdach cómhargála a leathnú d’oibrithe neamhchaighdeánacha, go háirithe in earnálacha ina bhfuil ceannas ag mná agus ina bhfuil pá íseal, i gcomhréir le hAirteagal 152 CFAE; á iarraidh ar an gCoimisiún agus ar na Ballstáit ról fóinteach a thabhairt do na comhpháirtithe sóisialta maidir le beartais nua a fhorbairt chun an bhearna phá idir na hinscní a dhúnadh sa chéad straitéis eile um chomhionannas inscne agus chun tuilleadh tacaíochta a thabhairt do na comhpháirtithe sóisialta;

50.á iarraidh ar na Ballstáit tacú le forbairt institiúidí ar an leibhéal áitiúil, ar an leibhéal réigiúnach agus ar an leibhéal náisiúnta chun faireachán a dhéanamh ar chur chun feidhme agus ar dhul chun cinn na straitéisí náisiúnta um chomhionannas inscne; á chur i bhfios go láidir, ar an gcaoi chéanna, a thábhachtaí atá sé dul i dteagmháil go gníomhach le mná agus éisteacht leo, ar fud an iliomad earnálacha agus lucht saothair, i gceapadh, i gcur chun feidhme agus i meastóireacht beartas atá dírithe ar an mbearna phá idir na hinscní a dhúnadh, lena n-áirítear taighde a dhéanamh ar ghnéithe a d’fhéadfadh tionchar a imirt ar thuilleamh na mban agus ar rannpháirtíocht an lucht saothair ach a bhfuil sonraí ina leith in easnamh, amhail meabhairshláinte, an meanapás nó míostrú; ag moladh go láidir do na Ballstáit aghaidh a thabhairt ar shaincheisteanna ceirde a bhaineann le hinmheitríteas agus leis an meanapás, lena n-áirítear luathfhágáil na mban ó mhargadh an tsaothair;

51.á athdhearbhú go bhfuil gá le príomhshruthú inscne i mbeartais AE agus náisiúnta, lena n-áirítear fostaíocht, sláinte, míchumas, pinsin agus spórt, agus i gcinnteoireacht beartais, lena n-áiritheofar go ndéanfar cuspóirí comhionannais a ionchorprú i ngach céim de cheapadh beartais agus de chur chun feidhme an bhuiséid; á iarraidh go ndéanfaí príomhshruthú inscne a neartú laistigh den chéad chreat airgeadais ilbhliantúil eile agus go mbeadh acmhainní tiomnaithe AE ann arb é is aidhm dóibh deireadh a chur leis na bearnaí pá agus pinsin idir na hinscní, seirbhísí agus bonneagar cúraim a neartú, agus tacú le seirbhísí meabhairshláinte atá íogair ó thaobh inscne de; á mheabhrú go bhfeabhsaítear éifeachtacht agus trédhearcacht na hinfheistíochta poiblí trí chuspóirí comhionannais a chomhtháthú i gcistiú AE; á thabhairt chun suntais, ina leith sin, go bhféadfadh ról a bheith ag sásraí cistiúcháin AE amhail Ciste Sóisialta na hEorpa Plus, Ciste Forbraíochta Réigiúnaí na hEorpa, an tSaoráid Téarnaimh agus Athléimneachta, an Clár um Shaoránaigh, Comhionannas, Cearta agus Luachanna agus an clár Fís Eorpach maidir le tacaíocht airgeadais a sholáthar do chuspóirí a bhaineann le hinscne;

52.á iarraidh go bhfeabhsófaí bailiú, inchomparáideacht agus foilsiú sonraí atá imdhealaithe ó thaobh inscne de maidir le bearnaí pá agus pinsin idir na hinscní ar fud na n-earnálacha uile chun faireachán níos fearr a dhéanamh ar an dul chun cinn maidir leis an mbearna phá idir na hinscní a dhúnadh, agus leas iomlán á bhaint as na córais tuairiscithe agus as na huirlisí digiteacha atá ann cheana chun costais riaracháin mhéadaithe do ghnólachtaí a sheachaint; á chur i bhfáth go bhfuil sonraí iontaofa agus comhchuibhithe bunriachtanach chun beartais fhianaisebhunaithe a dhearadh agus chun faireachán a dhéanamh ar an dul chun cinn i dtreo bearnaí inscne a dhúnadh; á chur i bhfáth go bhfuil ról lárnach ag an Institiúid Eorpach um Chomhionannas Inscne (EIGE) agus ag Eurostat maidir le tacú le bailiú sonraí inchomparáide agus ardcháilíochta ar fud an Aontais chun bonn eolais a chur faoi bheartais spriocdhírithe; á iarraidh ar Eurostat táscaire oifigiúil na bearna pá idir na hinscní a chomhlánú le táscaire caighdeánaithe maidir le bearna ama idir na hinscní;

53.á iarraidh go ndéanfaí an Treoir maidir le Trédhearcacht Pá, agus an Treoir maidir le Cothromaíocht Inscne ar Bhoird Chorparáideacha, nár thrasuigh 10 mBallstát go fóill, a thrasuí agus a chur chun feidhme go pras, agus ag tathant ar an gCoimisiún forfheidhmiú láidir an dá threoir a áirithiú; ag spreagadh FBManna agus cuideachtaí neamhliostaithe eile chun machnamh a dhéanamh ar dhea-chleachtas seanbhunaithe maidir le cothromaíocht inscne sa bhainistíocht; á iarraidh ar an gCoimisiún a áirithiú nach n-áireofar an Treoir maidir le Trédhearcacht Pá, mar phríomhphíosa reachtaíochta AE chun dul i ngleic leis an mbearna phá idir na hinscní, in aon phacáistí simplithe omnibus atá le teacht, agus ag an am céanna dúbailt nó forluí a chosc i ndáil le gníomhartha nua neamhreachtacha agus reachtacha lena dtugtar aghaidh ar an mbearna phá idir na hinscní;

54.ag tathant ar an gCoimisiún agus ar na Ballstáit forfheidhmiú láidir a áirithiú agus, i gcás inar féidir, reachtaíocht reatha AE agus náisiúnta a neartú chun comhionannas a ráthú i bhforbairt gairme, go háirithe tar éis saoire mháithreachais; á chur i bhfáth gur cheart oibrithe a chosaint ar aon chineál míbhuntáiste, lena n-áirítear ísliú céime, síneadh promhaidh nó athruithe díobhálacha ar dhálaí oibre atá inchurtha i leith na saoire sin a thógáil;

55.ag cur béim ar an bhfíoras go bhféadfadh an t-ualach riaracháin ar mhicrifhiontair agus ar FBManna tionchar diúltach a imirt ar fhiontraíocht na mban, rud atá ríthábhachtach do neamhspleáchas airgeadais agus do chomhionannas inscne na mban;

56.á iarraidh ar na Ballstáit a áirithiú go mbeidh rochtain dhigiteach agus fhisiciúil ag oibrithe faoi mhíchumas ar rialacha trédhearcachta pá agus ar shásraí gearáin, agus go ndéanfar modhanna meastóireachta poist a sheiceáil chun claontacht in aghaidh na mban a chosc, go háirithe i bpoist ina bhfuil ceannas ag mná agus i measc na mban faoi mhíchumas;

57.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.