1.Ifakkar li paga ugwali għal xogħol ugwali jew xogħol ta’ valur ugwali hija prinċipju fundatur tal-UE u li l-Istati Membri għandhom obbligu li jeliminaw id-diskriminazzjoni bejn il-ġeneri fl-aspetti kollha tar-remunerazzjoni, il-kundizzjonijiet tax-xogħol u t-tipi ta’ kuntratti ta’ impjieg; ifakkar li l-implimentazzjoni sħiħa tad-Direttiva dwar it-Trasparenza fil-Pagi se tgħin biex jiġu eliminati d-diskriminazzjoni u l-preġudizzju abbażi tal-ġeneru fuq il-post tax-xogħol, eż. fil-prattiki ta’ reklutaġġ u fl-istrutturi tal-pagi;

2.Jiddispjaċih għall-fatt li d-differenzi fil-pagi bejn il-ġeneri u d-differenzi bejn il-ġeneri fil-pensjonijiet għadhom jippersistu fl-UE, u dan għandu impatt negattiv fuq is-sitwazzjoni soċjali u ekonomika tan-nisa u għalhekk fuq is-soċjetà kollha kemm hi; jiddispjaċih għall-fatt li, filwaqt li kien hemm tnaqqis modest matul l-aħħar għaxar snin fid-differenza medja bejn il-ġeneri fil-pagi u fil-pensjonijiet madwar l-UE, il-pass attwali tal-bidla għadu insuffiċjenti biex jitnaqqsu d-differenzi qabel l-2100; jiddispjaċih li l-faqar u l-esklużjoni fix-xjuħija jibqgħu sfida għan-nisa akbar fl-età, u li dawn qed jiżdiedu kontra x-xejra ġenerali, u jissottolinja l-ħtieġa li jissaħħu s-sistemi tal-pensjonijiet sostenibbli u tiġi appoġġjata l-anzjanità attiva; jilqa’ t-tħabbira ta’ strateġija tal-UE kontra l-faqar u jitlob lill-Kummissjoni tiżgura sinerġija bejn dik il-proposta u l-istrateġija li jmiss dwar l-ugwaljanza bejn il-ġeneri biex jiġu indirizzati r-riskji tal-ġeneru u dawk intersezzjonali tal-faqar;

3.Ifakkar li madwar l-UE, in-nisa huma f’riskju akbar ta’ faqar mill-irġiel, b’mod partikolari n-nisa li jesperjenzaw forom intersezzjonali ta’ diskriminazzjoni, bħall-ommijiet li jrabbu t-tfal waħedhom, in-nisa akbar fl-età, in-nisa b’diżabbiltà, iċ-ċittadini ta’ pajjiżi terzi, il-persuni LGBTIQ+ u n-nisa fiż-żoni rurali; jisħaq li d-differenza bejn il-ġeneri fil-pensjonijiet mhijiex biss ir-riżultat tal-akkumulazzjoni ta’ inugwaljanzi fil-pagi matul il-ħajja iżda wkoll ta’ opportunitajiet differenti fis-suq tax-xogħol, distribuzzjoni mhux ugwali ta’ xogħol ta’ indukrar informali fid-dar, u preġudizzju bejn il-ġeneri fis-soċjetà; jitlob politiki li jirrikonoxxu dawn l-iżvantaġġi filwaqt li jippromwovu l-parteċipazzjoni f’impjiegi ta’ kwalità u opportunitajiet indaqs; jinnota li, minħabba li l-pensjonijiet tal-irtirar jammontaw bħala medja għal erbgħa minn kull ħamsa tal-introjtu ta’ waqt l-irtirar, u minħabba l-isfidi demografiċi kontinwi, meta d-differenza bejn il-ġeneri fil-pensjonijiet ma tiġix indirizzata, dan jista’ jhedded il-koeżjoni soċjali fit-tul tal-Istati Membri u s-sostenibbiltà tas-sistemi ta’ protezzjoni soċjali;

4.Jissottolinja li l-libertà individwali u l-indipendenza ekonomika tan-nisa huma essenzjali għas-sigurtà u d-dinjità personali tagħhom, u li l-parteċipazzjoni baxxa fis-suq tax-xogħol iżżid il-vulnerabbiltà għall-abbuż, il-vjolenza abbażi tal-ġeneru, inklużi l-vjolenza domestika u l-vjolenza fi spazji pubbliċi, u d-dipendenza ekonomika; jistieden lill-Istati Membri jieħdu miżuri mmirati biex jipprevjenu u jiġġieldu l-vjolenza u l-fastidju abbażi tal-ġeneru, kemm online kif ukoll offline, inkluż permezz ta’ kampanji ta’ sensibilizzazzjoni, l-infurzar tal-Konvenzjoni ta’ Istanbul u r-ratifika tal-Konvenzjoni tal-ILO dwar il-Vjolenza u l-Fastidju (il-Konvenzjoni 190) biex jiġu żgurati mekkaniżmi effettivi ta’ protezzjoni tal-vittmi fid-dinja tax-xogħol;

5.Jinnota li n-nisa għadhom iwettqu sehem sproporzjonat ta’ indukrar u xogħol domestiku mhux imħallas, li jnaqqas il-parteċipazzjoni tagħhom fis-suq tax-xogħol u l-akkumulazzjoni tal-pensjoni; jirrikonoxxi li r-rwoli tradizzjonali tal-ġeneru, il-preġudizzji u d-diviżjoni inugwali tar-responsabbiltajiet ta’ indukrar fost in-nisa u l-irġiel joħolqu penali marbuta mal-maternità f’termini ta’ paga u penali għal min jieħu ħsieb it-tfal, il-membri tal-familja jew dipendenti oħra li għandhom diżabbiltà jew li huma akbar fl-età jew morda, u li dawn il-penali mhux biss jikkontribwixxu għad-differenzi persisenti bejn il-ġeneri fil-pagi u fil-pensjonijiet iżda jistgħu wkoll jiskoraġġixxu lin-nisa li jixtiequ jkollhom it-tfal milli jagħmlu dan, fi żmien meta ħafna pajjiżi tal-UE qed jiffaċċjaw tnaqqis demografiku, peress li jnaqqsu l-opportunitajiet għan-nisa żgħażagħ, b’mod partikolari, fis-suq tax-xogħol;

6.Jenfasizza li investiment insuffiċjenti f’servizzi ta’ indukrar tat-tfal u ta’ indukrar fit-tul ta’ kwalità, kif ukoll id-disponibbiltà limitata tagħhom, l-ispiża għolja u n-nuqqas ta’ infrastruttura adegwata f’dan il-qasam, jibqgħu sfida ewlenija, primarjament, għall-parteċipazzjoni sħiħa tan-nisa fis-soċjetà u fis-suq tax-xogħol, u jistgħu jwasslu biex in-nisa jitilqu mis-suq tax-xogħol qabel iż-żmien jew b’mod involontarju jagħmlu xogħol part-time u jfixklu l-progressjoni tal-karriera tagħhom; jissottolinja l-ħtieġa li x-xogħol ta’ indukrar mhux imħallas jiġi rikonoxxut u rifless b’mod sistematiku fit-tfassil tal-politika u fis-sistemi ta’ protezzjoni soċjali filwaqt li, fl-istess ħin, jiġu ffaċilitati l-opportunitajiet għan-nisa biex jirritornaw fis-suq tax-xogħol; jirrikonoxxi li l-indukrar huwa pedament tas-soċjetà u hija, fil-biċċa l-kbira, ipprovduta min-nisa; ifakkar li l-indukrar tat-tfal u tal-membri tal-familja jew ta’ dipendenti oħra li għandhom diżabbiltà jew li huma akbar fl-età jew morda spiss tirrappreżenta responsabbiltajiet addizzjonali jew saħansitra full-time; jenfasizza l-fatt li din ir-realtà hija riflessa fix-xejriet tas-suq tax-xogħol, inklużi rati ogħla ta’ xogħol part-time, pagi fis-siegħa aktar baxxi, interruzzjonijiet fil-karriera u durata iqsar tal-impjieg fost in-nisa; jappella għal politiki li jappoġġjaw lill-familji fid-diversità kollha tagħhom, jippromwovu l-bilanċ bejn ix-xogħol u l-ħajja privata, u jħeġġu kemm lill-irġiel kif ukoll lin-nisa jikkondividu r-responsabbiltajiet ta’ indukrar, filwaqt li jiżguraw li x-xogħol ta’ indukrar, kemm formali kif ukoll informali, jiġi rrispettat u apprezzat b’mod ġust fis-soċjetà;

7.Jisħaq li l-eliminazzjoni tad-differenzi bejn il-ġeneri fil-pagi u fil-pensjonijiet hija essenzjali għall-ugwaljanza u l-kompetittività, u għandha tinkiseb permezz ta’ miżuri bbażati fuq l-evidenza, filwaqt li jiġu rispettati l-prerogattivi tal-Istati Membri u tas-sħab soċjali; ifakkar li d-differenzi bejn il-ġeneri fil-pagi u fl-impjiegi swew lill-UE EUR 390 biljun fl-2023 Eurofound, “Mind the gap!” Gender employment gap cost Europe over €390 billion in 2023” (Attenti għad-distakk! Id-differenza bejn il-ġeneri fl-impjiegi swiet lill-Ewropa aktar minn EUR 390 biljun fl-2023”, is-sit web tal-Eurofound, Marzu 2025. f’termini ta’ qligħ mitluf, kontribuzzjonijiet soċjali mitlufa u l-kostijiet tal-finanzi pubbliċi marbutin mal-benefiċċji soċjali li jirċievu n-nisa li ma jaħdmux; jinnota li t-tnaqqis tad-differenza bejn il-ġeneri fl-impjiegi jista’ jżid il-produttività, li jirriżulta f’żieda ta’ 3.2 % sa 5.5 % fil-PDG per capita sal-2050, filwaqt li kundizzjonijiet tax-xogħol aktar flessibbli, bilanċ aħjar bejn ix-xogħol u l-ħajja privata u pagi ogħla jħeġġu lil aktar nisa jidħlu fis-suq tax-xogħol, u dan iwassal għal żieda fil-kapaċità produttiva tal-ekonomija L-Istitut Ewropew għall-Ugwaljanza bejn is-Sessi, “Economic benefits of gender equality in the European Union – How closing the gender gaps in labour market activity and pay leads to economic growth” (Il-benefiċċji ekonomiċi tal-ugwaljanza bejn il-ġeneri fl-Unjoni Ewropea – Kif it-tneħħija tad-differenzi bejn il-ġeneri fl-attività tas-suq tax-xogħol u fil-pagi jwassal għal tkabbir ekonomiku), 2017.; jirrikonoxxi li l-kriżi tal-għoli tal-ħajja taffettwa b’mod sproporzjonat lin-nisa, inklużi l-ommijiet; jappella għal miżuri li jiżguraw li l-pagi jirriflettu l-għoli tal-ħajja u jinċentivaw il-parteċipazzjoni fil-forza tax-xogħol, filwaqt li jibqgħu jiġu rispettati l-oqfsa nazzjonali tas-suq tax-xogħol u l-ftehimiet tas-sħab soċjali; jisħaq li l-parteċipazzjoni ugwali tan-nisa u l-irġiel f’impjiegi ta’ kwalità ssaħħaħ il-provvista tax-xogħol tal-UE u r-reżiljenza ekonomika ġenerali tagħha u tallinja mal-aġenda tal-kompetittività Ewropea; iħeġġeġ lill-Kummissjoni u lill-Istati Membri jinkludu l-gwadanji kwantifikati minn żieda fl-ugwaljanza bejn il-ġeneri fit-tbassir ekonomiku u fil-valutazzjonijiet tal-impatt tal-politika fejn rilevanti;

8.Jenfasizza l-fatt li fl-2023, id-differenza fil-pagi kienet ogħla fis-settur privat milli fis-settur pubbliku fil-maġġoranza tal-pajjiżi tal-UE Il-Parlament Ewropew, “Suġġetti – Nifhmu d-differenza fil-pagi bejn il-ġeneri: definizzjoni, fatti u kawżi”, is-sit web tal-Parlament Ewropew, 2020. u li huma meħtieġa sforzi speċifiċi biex jiġi żgurat li l-kumpaniji jinkoraġġixxu b’mod attiv prattiki mhux diskriminatorji u jippromwovu opportunitajiet indaqs u paga ugwali għal xogħol ta’ valur ugwali;

9.Ifakkar li l-impjegati u n-negozji huma l-mutur tal-kompetittività tal-UE, kif ġie rikonoxxut fir-rapport ta’ Draghi; jenfasizza li n-nuqqas ta’ ħiliet u ħaddiema, aggravat minn popolazzjoni fl-età tax-xogħol li kulma jmur qed tonqos, qed ixekkel serjament il-produttività u t-tkabbir tal-UE; jirrimarka li t-titjib tal-parteċipazzjoni tan-nisa fis-suq tax-xogħol u t-titjib tal-kundizzjonijiet tax-xogħol, b’mod partikolari f’setturi attwali u emerġenti marbuta mat-tranżizzjonijiet doppji, jistgħu jgħinu biex itaffu dawn il-pressjonijiet; jitlob li l-ugwaljanza bejn il-ġeneri u l-ġlieda kontra l-istereotipi marbuta mal-ġeneru jiġu integrati b’mod li jappoġġja l-parteċipazzjoni tan-nisa fil-forza tax-xogħol, l-iżvilupp tal-ħiliet u l-kompetittività, u jħeġġeġ li jitneħħew l-ostakli għall-opportunitajiet fl-aġendi tal-kompetittività, industrijali, tal-ħiliet u diġitali tal-UE;

10.Jistieden lill-UE u lill-Istati Membri tagħha japplikaw l-ugwaljanza bejn il-ġeneri fil-programmazzjoni, fis-servizzi pubbliċi u, b’mod partikolari, fil-forniment ta’ kura tas-saħħa sesswali u riproduttiva, inkluż l-aċċess għal abort mingħajr ħlas, sikur u legali;

11.Jappella għall-iżvilupp ta’ strateġiji u politiki reattivi għal kwistjonijiet ta’ ġeneru fis-settur diġitali u għal sforzi mmirati biex in-nisa jiġu integrati b’mod aktar effettiv fis-suq tax-xogħol;

12.Ifakkar li prattiki ta’ reklutaġġ u promozzjoni oġġettivi u bbażati fuq il-mertu kif ukoll opportunitajiet indaqs, servizzi ta’ appoġġ u d-dritt li kulħadd jipparteċipa, huma l-bażi ta’ trattament ugwali li jwassal għal kompetizzjoni ġusta f’suq tax-xogħol li jiffunzjona, li jista’ jnaqqas il-preġudizzji li jaffettwaw b’mod negattiv l-avvanz fil-karriera tan-nisa u konsegwentement jippenalizza l-qligħ tagħhom, inkluża mġiba diskriminatorja bbażata fuq il-ġeneru, ir-razza, id-diżabbiltà, l-età u l-orjentazzjoni u l-identità sesswali; jitlob, f’dan ir-rigward, l-implimentazzjoni sħiħa u l-monitoraġġ tad-Direttiva dwar il-Bilanċ bejn il-Ġeneri fuq il-Bordijiet Korporattivi u jħeġġeġ lill-intrapriżi żgħar u ta’ daqs medju (SMEs) u lil kumpaniji oħra mhux ikkwotati jsegwu l-aħjar prattika dwar il-bilanċ bejn il-ġeneri fil-maniġment; jinnota, barra minn hekk, li soċjetà reżiljenti, inklużiva u sostenibbli u ekonomija orjentata lejn it-tkabbir jiġġeneraw impjiegi ta’ kwalità għolja u mħallsa tajjeb f’setturi ddominati min-nisa li jippermettu lin-nisa jiksbu intitolamenti tal-pensjoni b’saħħithom matul il-karrieri tagħhom;

13.Jinnota l-ħtieġa li jiġi żgurat li n-nisa li jaħdmu fis-settur tad-difiża ma jiffaċċjaw l-ebda forma ta’ diskriminazzjoni bbażata fuq l-istereotipi u li jkollhom aċċess għal karrieri mħallsa tajjeb u stabbli b’kontribuzzjonijiet tal-pensjoni adegwati;

14.Iqis li l-Istati Membri għandhom jiffukaw fuq it-tnaqqis tal-ostakli għall-impjieg u l-intraprenditorija, l-appoġġ għall-bilanċ bejn ix-xogħol u l-ħajja privata għall-familji permezz ta’ politiki adegwati dwar il-liv tal-ġenituri, arranġamenti tax-xogħol flessibbli u d-dritt għall-iskonnessjoni, networks tal-edukazzjoni bikrija tat-tfal, servizzi tal-indukrar tat-tfal u tal-indukrar fit-tul ta’ kwalità għolja, aċċessibbli u affordabbli li huma kompatibbli ma’ xogħol full-time, u l-investiment fi programmi ta’ taħriġ, taħriġ mill-ġdid u titjib tal-ħiliet li jgħinu biex jiġi indirizzat in-nuqqas ta’ ħiliet, inkluż għall-ommijiet waħedhom, in-nisa akbar fl-età, il-persuni LGBTIQ+, in-nisa b’diżabbiltà, in-nisa f’sitwazzjonijiet vulnerabbli, iċ-ċittadini ta’ pajjiżi terzi u n-nisa li jirrisjedu f’żoni rurali u remoti u reġjuni ultraperiferiċi, peress li x’aktarx ikollhom l-aktar diffikultà biex jaċċessaw opportunitajiet ta’ taħriġ u xogħol; ifaħħar il-kontribut tan-nisa għall-ekonomija rurali;

15.Jenfasizza l-fatt li s-segmentazzjoni skont il-ġeneru fis-setturi u l-impjiegi hija fattur importanti u strutturali fid-differenza fil-pagi bejn il-ġeneri; jisħaq li din is-segmentazzjoni hija kemm orizzontali, bin-nisa rrappreżentati żżejjed f’setturi b’pagi baxxi u storikament sottovalutati, kif ukoll vertikali, peress li fi ħdan l-istess settur, in-nisa huma anqas probabbli li jkunu fi rwoli ta’ livell għoli u maniġerjali li huma mħallsa aħjar; jissottolinja li s-setturi ddominati min-nisa huma ġeneralment imħallsa anqas u sottovalutati minħabba fatturi varji u li dan ma jistax jiġi ġġustifikat minn differenzi fil-kompetenza jew fil-mertu, b’aktar nisa milli rġiel jirċievu paga baxxa u l-paga minima fi kważi l-Istati Membri kollha tal-UE minkejja li n-nisa żgħażagħ qed jisbqu dejjem aktar lill-irġiel żgħażagħ fil-kisba edukattiva Eurostat, “Statistics Explained – Educational attainment statistics” (Statistika Spjegata – Statistika dwar il-kisbiet edukattivi), is-sit web tal-Eurostat, Marzu 2025.;

16.Jenfasizza l-fatt li 30 % biss tal-membri tal-bordijiet korporattivi huma nisa, filwaqt li anqas minn 1 minn kull 10 presidenti tal-bordijiet jew uffiċjali kapijiet eżekuttivi (CEOs) ta’ kumpaniji kbar huma nisa L-Istitut Ewropew għall-Ugwaljanza bejn is-Sessi, “Gender Equality Index 2021 – Health” (Indiċi tal-Ugwaljanza bejn il-Ġeneri – Saħħa), 2021., li jindika li n-nisa għadhom sostanzjalment sottorappreżentati fi rwoli ta’ livell għoli, tmexxija u programmi ta’ mentoraġġ; jinnota li d-differenza bejn fil-pagi bejn il-ġeneri hija l-ogħla f’impjiegi mħallsa tajjeb Eurofound u ċ-Ċentru Konġunt tar-Riċerka tal-Kummissjoni Ewropea, “European Jobs Monitor 2021: Gender gaps and the employment structure” (Il-Monitor Ewropew tal-Impjiegi: Id-differenzi bejn il-ġeneri u l-istruttura tal-impjiegi), 2021.; jissottolinja li s-soqfa tal-ħġieġ persistenti fil-ġestjoni, ir-riċerka u l-innovazzjoni jillimitaw il-produttività u l-kompetittività; jisħaq li l-għeluq tad-distakk fit-tmexxija huwa essenzjali biex jintlaħqu l-objettivi tal-UE; jenfasizza li forom varjabbli ta’ paga, bħall-ishma jew il-bonusijiet tal-kumpaniji, qed isiru aktar komuni u bħalissa qed jiżdiedu aktar malajr fost l-irġiel milli fost in-nisa Eurofound, “Gender equality at work” (L-ugwaljanza bejn il-ġeneri fuq il-post tax-xogħol), 2020., u dan jenfasizza opportunità importanti biex jiġi żgurat li t-tkabbir ta’ dawn il-mudelli ġodda ta’ kumpens ikun ta’ benefiċċju għan-nisa bl-istess mod u jappoġġja l-progress lejn it-tnaqqis tad-differenza fil-pagi bejn il-ġeneri;

17.Ifakkar fir-rwol uniku tal-persuni li jindukraw u n-natura essenzjali tal-indukrar fis-soċjetà tagħna, b’mod partikolari fid-dawl tax-xejriet demografiċi attwali u t-tixjiħ tal-popolazzjoni; jisħaq li fattur ewlieni fid-differenzi bejn il-ġeneri fil-pagi u fil-pensjonijiet huwa l-kondiviżjoni inugwali tar-responsabbiltajiet tal-indukrar u r-responsabbiltajiet domestiċi, li għadhom jaqgħu kważi esklużivament fuq in-nisa; ifakkar fil-fatt li n-nisa huma aktar probabbli li jkunu qiegħda, jaħdmu part-time, jaħdmu f’setturi li jħallsu anqas u li huma ddominati min-nisa u jinterrompu l-karriera tagħhom, u li dan jista’ jiġi attribwit parzjalment mal-penali marbuta mar-responsabbiltajiet tal-indukrar, bil-konsegwenza li dan iħalli impatt fuq il-pagi u l-progressjoni tal-karriera; ifakkar, barra minn hekk, li l-perjodi ta’ assenza mill-impjieg biex wieħed jassumi responsabbiltajiet ta’ indukrar ma jgħoddux għall-akkumulazzjoni tal-intitolamenti tal-pensjoni, minkejja l-ispejjeż iffrankati mill-istat permezz tal-indukrar informali mwettqa min-nisa;

18.Ifakkar fid-dritt għal-liv tal-ġenituri kif minqux fid-Direttiva dwar il-Bilanċ bejn ix-Xogħol u l-Ħajja Privata, u jisħaq fuq il-ħtieġa tal-implimentazzjoni sħiħa u effettiva tagħha; jissottolinja li l-politika trid tindirizza l-kondiviżjoni mhux ugwali tal-piżijiet bejn in-nisa u l-irġiel u tappoġġja d-distribuzzjoni ġusta tal-liv tal-ġenituri u r-responsabbiltajiet ta’ indukrar bejn il-ġenituri biex jinkiseb mudell fejn ir-responsabbiltajiet tax-xogħol u tal-indukrar jinqasmu b’mod ugwali; jistieden lill-Istati Membri jippromwovu liv tal-paternità mhux trasferibbli u mħallas b’mod adegwat u jintroduċu kampanji ta’ sensibilizzazzjoni u inċentivi biex jiżdied it-teħid tal-liv tal-ġenituri mill-irġiel, u jinkludu miżuri għall-monitoraġġ u r-rapportar tal-progress dwar it-teħid diżaggregat skont il-ġeneru; jenfasizza r-rwol tal-impjegaturi biex jagħmlu l-impjieg full-time kompatibbli mar-responsabbiltajiet ta’ indukrar;

19.Jistieden lill-Istati Membri jaħdmu mill-qrib mas-sħab soċjali biex jieħdu miżuri attivi u kkoordinati, inklużi taħriġ u mentoraġġ immirati biex jindirizzaw l-inugwaljanzi strutturali bejn il-ġeneri li għadhom iġiegħlu lin-nisa joqogħdu lura milli japplikaw għall-promozzjoni jew jenfasizzaw il-kisbiet tagħhom stess; jisħaq li l-fatt li joqogħdu lura mhijiex kwistjoni ta’ għażla individwali iżda tirriżulta minn sterjotipi tal-ġeneru stabbiliti, segregazzjoni okkupazzjonali u gwida vokazzjonali inadegwata, li jaffettwaw b’mod partikolari lin-nisa b’livell baxx ta’ ħiliet u marġinalizzati; iħeġġeġ lill-Istati Membri jaħdmu mill-qrib mas-sħab soċjali biex ineħħu dawn l-ostakli permezz ta’ kulturi inklużivi fuq il-post tax-xogħol, oqfsa mtejba għall-iżvilupp tal-karriera u strateġiji proattivi ta’ ugwaljanza;

20.Iwissi dwar iż-żieda kostanti, mill-2015, fil-faqar u l-esklużjoni soċjali fix-xjuħija, li jaffettwaw b’mod partikolari lin-nisa akbar fl-età, u r-rati drammatiċi ta’ faqar tan-nisa li għandhom’ il fuq minn 75 sena f’diversi Stati Membri, bħala sintomu tal-inugwaljanza ġenerali bejn il-ġeneri fil-qligħ tul il-ħajja; jenfasizza li n-nisa akbar fl-età huma aktar probabbli li jqattgħu perjodi itwal ta’ ħajjithom jeħtieġu servizzi ta’ indukrar u appoġġ huma stess, li l-ispejjeż tagħhom jaqbżu l-introjtu medju tal-pensjoni fil-biċċa l-kbira tal-Istati Membri;

21.Jisħaq li l-preġudizzji inkonxji tal-ġeneru fir-reklutaġġ, fil-promozzjoni u fl-iffissar tal-pagi jikkontribwixxu għad-differenza fil-pagi bejn il-ġeneri; jenfasizza li l-istereotipi marbuta mal-ġeneru, li jirrilegaw lin-nisa f’setturi tradizzjonalment iddominati min-nisa u b’pagi baxxi, jiffavorixxu lill-irġiel fuq kandidati nisa kwalifikati b’mod ugwali, u li “ż-żamma tal-impjegati fil-kategoriji l-baxxi tal-iskala tax-xogħol” L-Istitut Ewropew għall-Ugwaljanza bejn is-Sessi, “Glossary and thesaurus – sticky floor” (Glossarju u teżawru – iż-żamma tal-impjegati fil-kategoriji l-baxxi tal-iskala tax-xogħol), is-sit web tal-Istitut Ewropew għall-Ugwaljanza bejn is-Sessi. għall-avvanz fil-karriera tan-nisa u l-impatt tad-dinamika tan-normi tal-ġeneru fin-negozjati dwar il-pagi huma aggravati tul il-ħajja professjonali tan-nisa;

22.Jissottolinja li huwa essenzjali li jissaħħu s-servizzi ta’ indukrar sabiex tiżdied il-parteċipazzjoni tan-nisa fis-suq tax-xogħol, jitnaqqsu d-differenzi bejn il-ġeneri fl-impjiegi, fil-pagi u fil-pensjonijiet u jiġu indirizzati n-nuqqasijiet ta’ ħiliet u ħaddiema billi jiġu ġġenerati impjiegi ta’ kwalità reżiljenti; jistieden lill-Kummissjoni u lill-Istati Membri jimplimentaw bis-sħiħ l-Istrateġija Ewropea għall-Kura u r-Rakkomandazzjoni tal-Kunsill dwar il-kura fit-tul, jistabbilixxu miri nazzjonali għad-disponibbiltà, l-aċċessibbiltà u l-kwalità tal-indukrar tat-tfal u l-kopertura tal-indukrar fit-tul, u jallokaw riżorsi fi ħdan is-Semestru Ewropew u l-istrumenti ta’ finanzjament tal-UE għal servizzi ta’ indukrar ta’ kwalità għolja, affordabbli u aċċessibbli; jisħaq li l-investiment pubbliku fl-infrastruttura tal-indukrar għandu jiġi kklassifikat bħala nefqa li ssaħħaħ it-tkabbir skont il-qafas rivedut tal-governanza ekonomika tal-UE; jistieden lill-Istati Membri jirratifikaw il-Konvenzjoni tal-ILO dwar il-Ħaddiema Domestiċi 2011;

23.Jisħaq li t-tnaqqis tad-distakk fl-indukrar tat-tfal jibqa’ wieħed mill-opportunitajiet ewlenin biex tittejjeb il-ħajja ta’ ġenituri ġodda madwar l-UE; jinnota li dan id-distakk spiss jidher wara t-twelid ta’ tarbija, ladarba jintemm il-liv tal-ġenituri mħallas u qabel ma jsir disponibbli l-aċċess għall-edukazzjoni u l-indukrar bikri tat-tfal full-time; jissottolinja li l-appoġġ għall-familji matul dan il-perjodu ta’ tranżizzjoni jista’ jsaħħaħ b’mod sinifikanti l-kapaċità tal-ġenituri li jibqgħu fis-suq tax-xogħol;

24.Jinnota li d-ditti mmexxija min-nisa spiss joperaw f’setturi b’pagi aktar baxxi u jiffaċċjaw ostakli addizzjonali bħal aċċess limitat għall-finanzi, preġudizzju bejn il-ġeneri u ostakli regolatorji;

25.Jirrimarka li fl-UE, madwar 6,8 miljun persuna jaħdmu bħala persuni li jindukraw imħallsa u mhux iddikjarati, fis-settur tas-servizzi personali u domestiċi, li minnhom 90 % huma nisa, u li l-maġġoranza tagħhom huma ta’ mezza età u migranti Eurofound, “Undeclared care work in the EU: Policy approaches to a complex socioeconomic challenge” (Xogħol mhux iddikjarat fl-UE: approċċi strateġiċi għal sfida soċjoekonomika kumplessa), 2025. u għalhekk mhumiex koperti mid-drittijiet tal-ħaddiema jew mis-sigurtà soċjali;

26.Jisħaq li l-insigurtà finanzjarja u l-inugwaljanza huma marbuta mill-qrib mal-benesseri psikoloġiku u li l-impatt tal-inugwaljanza fil-pagi fuq is-saħħa mentali ma għandux jiġi injorat; jinnota li n-nisa huma aktar probabbli mill-irġiel li jesperjenzaw problemi ta’ saħħa mentali, bħall-eżawriment u d-dipressjoni kronika, speċjalment f’setturi kkaratterizzati minn xogħol b’paga baxxa u emozzjonalment eżiġenti;

27.Jilqa’ l-isforzi kontinwi tal-Kummissjoni biex tippromwovi l-ugwaljanza bejn il-ġeneri u jistedinha tressaq strateġija ġdida tal-UE dwar l-ugwaljanza bejn il-ġeneri, dettaljata, orjentata lejn ir-riżultati u ambizzjuża, li tibni fuq il-progress preċedenti u l-aħjar prattika, u tipproponi pjan ta’ azzjoni ddedikat biex telimina d-differenzi bejn il-ġeneri fil-pagi u fil-pensjonijiet, permezz ta’ miżuri bbażati fuq l-evidenza, tadotta approċċ transsettorjali u b’għanijiet kwantitattivi u marbuta biż-żmien fil-livell tal-UE li jiżguraw li l-politiki dwar l-ugwaljanza bejn il-ġeneri, li huma prekundizzjoni għal soċjetajiet b’saħħithom u prosperi, jikkontribwixxu wkoll għat-tkabbir ekonomiku sostenibbli, il-kompetittività, l-intraprenditorija, l-innovazzjoni u l-benesseri tal-familja u l-bilanċ bejn ix-xogħol u l-ħajja privata;

28.Jitlob, barra minn hekk, li l-pjan ta’ azzjoni jinkludi miżuri mmirati biex jittejbu l-kundizzjonijiet tax-xogħol u l-paga ġusta fis-setturi ddominati min-nisa, biex jiġu appoġġjati l-familji u biex tingħata prijorità lill-investiment fl-ambitu tal-qafas finanzjarju pluriennali li jmiss li jsaħħaħ il-bilanċ bejn ix-xogħol u l-ħajja privata u settur tal-indukrar affidabbli; jisħaq fuq il-ħtieġa ta’ approċċ li jirrispetta l-kompetenzi nazzjonali u r-realtajiet varji tan-nisa madwar l-UE;

29.Jistieden lill-Kummissjoni taħdem mal-Istati Membri u mas-sħab soċjali biex tiżviluppa linji gwida u proġett pilota Ewropew għal sistemi ta’ evalwazzjoni u klassifikazzjoni tax-xogħol newtrali għall-ġeneru, li jippermettu tqabbil madwar l-UE kollha ta’ xogħol ta’ valur ugwali u d-definizzjoni ta’ kriterji ċari għall-valutazzjoni ġusta tal-valur tax-xogħol u għal sistemi ta’ paga bbażati fuq il-mertu f’setturi ddominati min-nisa, filwaqt li jiġu evitati obbligi regolatorji jew finanzjarji bla bżonn fuq l-impjegaturi; jinnota li dan għandu jsir fis-setturi kollha u billi jiġu żgurati d-drittijiet ta’ negozjar kollettiv; jisħaq li valutazzjoni ġusta ttejjeb il-kwalità, il-motivazzjoni u l-kompetittività tal-impjiegi mingħajr ma ddgħajjef il-flessibbiltà tas-suq tax-xogħol; iħeġġeġ lill-Kummissjoni u lill-Istati Membri jkomplu jipprovdu taħriġ, fejn xieraq, biex jappoġġjaw aħjar il-proċessi ta’ reklutaġġ u evalwazzjoni newtrali għall-ġeneru;

30.Jistieden lill-Kummissjoni tistabbilixxi Patt Ewropew dwar l-indukrar, kif imħabbar matul is-seduti parlamentari tal-2024; jitlob li dan il-patt jinkludi sett ta’ politiki, programmi u rakkomandazzjonijiet, flimkien ma’ pakkett speċifiku ta’ investiment fil-qasam tal-indukrar, bl-għan li titrawwem tranżizzjoni lejn ekonomija tal-indukrar li tirrikonoxxih bħala dritt, u li tagħtih valur bħala s-sinsla tas-soċjetà tagħna; jappella, f’dan il-kuntest, għall-ħolqien ta’ fluss iddedikat ta’ finanzjament fl-ambitu tal-qafas finanzjarju pluriennali 2028-2034 biex jitnedew servizzi ħalli jiġu appoġġjati l-persuni li jindukraw b’mod informali;

31.Jistieden lill-Istati Membri jippremjaw ix-xogħol u jippromwovu soluzzjonijiet li jsaħħu l-familji fid-diversità kollha tagħhom filwaqt li jiżguraw ir-responsabbiltà fiskali u l-appoġġ għall-intrapriżi, bħall-espansjoni tal-arranġamenti tax-xogħol flessibbli għall-ġenituri u l-individwi u d-dritt għall-iskonnessjoni, l-offerta ta’ inċentivi tat-taxxa għas-snin ta’ indukrar u l-benefiċċji għall-ġenituri waħedhom, u l-investiment fil-forniment ta’ servizzi tal-indukrar tat-tfal u tal-indukrar fit-tul ta’ kwalità għolja, affordabbli u aċċessibbli li jkunu kompatibbli mal-politiki dwar l-impjieg full-time u l-liv tal-ġenituri ugwali għall-ġeneru; jistieden, barra minn hekk, lill-Istati Membri jinkoraġġixxu azzjonijiet, permezz tad-djalogu soċjali u n-negozjar kollettiv, biex jiffaċilitaw il-parteċipazzjoni sħiħa tan-nisa fis-suq tax-xogħol u jnaqqsu r-rati tagħhom ta’ waqfiet fil-karriera u xogħol part-time, li huma ogħla minn dawk tal-irġiel; jappella għal miżuri ddedikati biex jiġi ffaċilitat ir-ritorn tan-nisa għax-xogħol wara waqfiet twal fil-karriera b’miżuri ta’ riintegrazzjoni u inċentivi mmirati bħal skemi ta’ taħriġ mill-ġdid;

32.Jistieden lill-Kummissjoni, filwaqt li tirrispetta l-kompetenzi nazzjonali, toħroġ linji gwida biex tgħin fl-identifikazzjoni u l-indirizzar tal-arranġamenti tat-taxxa, bħal skemi ta’ tassazzjoni konġunta, li jistgħu jiskoraġġixxu lil dawk li jaqilgħu paga sekondarja milli jipparteċipaw b’mod attiv fis-suq tax-xogħol, sabiex jiġi żgurat li l-politiki nazzjonali tat-taxxa jappoġġjaw l-ugwaljanza bejn il-ġeneri u l-parteċipazzjoni usa’ tan-nisa fis-suq tax-xogħol u jiffaċilitaw l-iskambju tal-aħjar prattika;

33.Jenfasizza l-importanza li titħeġġeġ l-intraprenditorija tan-nisa u r-rwol tan-negozji mmexxija min-nisa biex itejbu l-emanċipazzjoni ekonomika u l-qligħ potenzjali matul il-ħajja kollha; jisħaq fuq il-ħtieġa ta’ appoġġ aħjar kemm fil-livell tal-UE kif ukoll f’dak nazzjonali, b’mod partikolari fir-rigward tal-iżvilupp tan-negozju, il-programmi ta’ mentoraġġ, l-aċċess għall-finanzi u l-kapital ta’ riskju, u litteriżmu finanzjarju mtejjeb għan-nisa, appoġġjat minn InvestEU, il-Kunsill Ewropew tal-Innovazzjoni u n-Network Enterprise Europe, b’miżuri mmirati għal gruppi sottorappreżentati, inklużi n-nisa fiż-żoni rurali u s-setturi STEAM; jistieden lill-Kummissjoni tindirizza dawn l-aspetti fl-istrateġija li jmiss dwar l-ugwaljanza bejn il-ġeneri u jissottolinja l-importanza tal-edukazzjoni bikrija dwar l-intraprenditorija u l-litteriżmu finanzjarju għall-bniet biex jitrawmu intraprendituri nisa futuri;

34.Jissottolinja li aktar nisa għandhom jiġu mħeġġa jkunu minn ta’ quddiem fit-tmexxija, l-iżvilupp, il-mentoraġġ u l-appoġġ għall-bilanċ bejn ix-xogħol u l-ħajja privata; jinnota l-inklużjoni tal-Kummissjoni ta’ dimensjoni tal-ġeneru fil-pjan direzzjonali tagħha għal impjiegi ta’ kwalità, u jisħaq fuq il-ħtieġa li jiġi żgurat li l-inizjattivi relatati jindirizzaw ir-rikonoxximent ġust tax-xogħol tipikament imwettaq min-nisa fis-setturi kollha, u li jittejbu l-kwalità tal-impjiegi u l-kundizzjonijiet tax-xogħol, u b’hekk jikkontribwixxu għal forza tax-xogħol aktar produttiva u ekonomija Ewropea aktar b’saħħitha u aktar kompetittiva;

35.Jisħaq fuq il-ħtieġa li tiġi diżaggregata s-segmentazzjoni okkupazzjonali tal-ġeneru billi jiġi rikonoxxut il-valur tas-setturi ddominati min-nisa bħall-edukazzjoni, l-indukrar tas-saħħa u s-servizzi soċjali f’termini ta’ paga u kundizzjonijiet tax-xogħol u billi jingħat lok li aktar nisa jipparteċipaw f’setturi b’pagi għoljin bħall-ICT, STEAM u l-finanzi, kif ukoll fi rwoli ta’ maniġment ta’ livell għoli u ta’ tmexxija fuq il-post tax-xogħol, eż. bħala CEOs, u fil-ħajja pubblika u politika; jenfasizza l-ħtieġa li jiġi żgurat li gwida vokazzjonali aktar sensittiva għall-ġeneru u dinamika tiġi integrata fil-livelli kollha tal-edukazzjoni u t-taħriġ is-silos jiġu indirizzati malajr kemm jista’ jkun; iħeġġeġ lill-Istati Membri u lill-impjegaturi jipprovdu gwida vokazzjonali sensittiva għall-ġeneru minn stadju bikri u jippromwovu rappreżentanza bbilanċjata f’pożizzjonijiet għolja u ta’ teħid ta’ deċiżjonijiet;

36.Jisħaq fuq l-importanza li jiġi żgurat li s-suġġetti kollha fil-livelli kollha tal-edukazzjoni u t-taħriġ ikunu aċċessibbli b’mod ugwali għan-nisa u l-bniet; jissottolinja l-ħtieġa li jiġu eliminati l-preġudizzji u l-istereotipi kulturali u tal-ġeneru fil-kurrikuli, fil-materjali tat-tagħlim u fil-gwida vokazzjonali kif ukoll fit-taħriġ għall-edukaturi, sabiex jiġi evitat li n-nisa u l-bniet jiġu diretti lejn għadd limitat ta’ oqsma ta’ studju jew setturi okkupazzjonali; iħeġġeġ lill-Istati Membri jippromwovu aċċess aħjar għall-bniet għal oqsma tradizzjonalment iddominati mill-irġiel; jappella għall-promozzjoni ta’ politiki edukattivi reattivi għal kwistjonijiet ta’ ġeneru li jinkoraġġixxu u jappoġġjaw lill-bniet biex isegwu studji u karrieri fl-oqsma kollha, inkluż STEAM;

37.Jenfasizza l-ħtieġa li x-xogħol li jsir fis-setturi ddominati min-nisa jingħata valur finanzjarju aħjar, li jiġi ggarantit id-dritt għal paga ugwali għal xogħol ta’ valur ugwali, li tiġi pprovduta informazzjoni dwar il-livelli tal-paga individwali tal-ħaddiema u l-livelli tal-paga medja, u li jittejbu l-kundizzjonijiet tax-xogħol, b’mod partikolari l-paga u l-progressjoni tal-karriera, li ttejjeb l-indipendenza finanzjarja tan-nisa u tnaqqas ir-riskju tagħhom ta’ faqar; jisħaq li t-titjib tal-kundizzjonijiet fis-setturi ddominati min-nisa se jnaqqas ukoll is-segmentazzjoni tal-ġeneru u jindirizza n-nuqqasijiet ta’ ħaddiema li kulma jmur sejrin għall-agħar; jistieden lill-Kummissjoni tinkludi dimensjoni tal-ġeneru b’saħħitha fl-inizjattiva għal qafas li jmiss biex jiġu indirizzati l-isfidi tal-forza tax-xogħol u tal-indukrar fit-tul kif ukoll fl-azzjonijiet kollha fl-ambitu tal-Unjoni tal-Ħiliet u fl-Att dwar l-Impjiegi ta’ Kwalità li jmiss; jistieden lill-Istati Membri jieħdu miżuri konkreti biex jiżguraw paga ugwali għal xogħol ugwali, filwaqt li jinkoraġġixxu politiki li jappoġġjaw tkabbir ġust fil-pagi marbut mal-produttività, il-kompetittività u s-sostenibbiltà ekonomika;

38.Jenfasizza li l-persuni b’diżabbiltà, b’mod partikolari n-nisa b’diżabbiltà, għadhom jiffaċċjaw ostakli multipli u intersezzjonali biex jaċċessaw l-impjieg, it-taħriġ u l-intraprenditorija; jistieden lill-Kummissjoni u lill-Istati Membri jippromwovu aċċess ugwali għal impjiegi ta’ kwalità, edukazzjoni vokazzjonali u opportunitajiet ta’ finanzjament, f’konformità mal-istrateġija Ewropea dwar id-drittijiet tal-persuni b’diżabbiltà, filwaqt li jagħmlu użu sħiħ mill-istrumenti eżistenti tal-UE u dawk nazzjonali; jisħaq li l-inklużjoni u l-aċċessibbiltà huma komponenti essenzjali tal-ekonomija soċjali tas-suq u l-kompetittività tal-Ewropa;

39.Jistieden lill-Istati Membri, flimkien mas-sħab soċjali, ifasslu perkorsi tal-karriera u tal-pagi pluriennali u fiskalment responsabbli fis-servizzi pubbliċi u fil-kura essenzjali (il-kura tas-saħħa, il-kura soċjali, l-edukazzjoni) biex itejbu l-kwalità, il-ħiliet u ż-żamma; jistieden lill-Istati Membri jagħmlu użu mmirat mill-Fond Soċjali Ewropew Plus u, fejn xieraq, mill-Faċilità għall-Irkupru u r-Reżiljenza għat-taħriġ, it-titjib tal-ħiliet u ż-żamma, filwaqt li jevitaw distorsjonijiet permanenti fid-dinamika tal-pagi;

40.Iħeġġeġ lill-Kummissjoni u lill-Istati Membri joħolqu mekkaniżmi volontarji ta’ inċentivi, bħal proċeduri amministrattivi simplifikati, rikonoxximent pubbliku jew aċċess prijoritarju għall-fondi tal-UE, għall-impjegaturi li jimplimentaw pjanijiet ta’ ugwaljanza bejn il-ġeneri u l-aħjar prattika fit-trasparenza fil-pagi;

41.Jisħaq fuq l-importanza li tiġi żgurata remunerazzjoni ġusta fis-setturi ddominati min-nisa, filwaqt li tinżamm l-awtonomija fir-rigward tal-iffissar tal-pagi għas-sħab soċjali u jiġu rispettati t-tradizzjonijiet nazzjonali tan-negozjar kollettiv;

42.Jissottolinja kif ix-xogħol formali b’kundizzjonijiet tax-xogħol ta’ kwalità tajba, b’mod partikolari fis-setturi ddominati min-nisa, jista’ jsaħħaħ il-bażijiet tat-taxxa u jiżgura li l-ħaddiema nisa jiġu rikonoxxuti u protetti skont il-liġi; jinnota li l-indirizzar tal-ekonomija informali permezz ta’ riformi mmirati, bħas-simplifikazzjoni tal-amministrazzjoni tar-rekwiżiti tat-taxxa u l-appoġġ għall-intraprenditorija, jista’ jgħin biex jiġu ggarantiti kundizzjonijiet ekwi għan-nisa fis-suq tax-xogħol; jistieden, għalhekk, lill-Istati Membri jissimplifikaw l-aċċess għall-ekonomija formali, jippromwovu miżuri għall-ġlieda kontra l-ekonomija klandestina u jifformalizzaw il-kuntratti tax-xogħol biex jipproteġu lill-ħaddiema f’setturi informali, bħax-xogħol domestiku, il-kura personali, l-agrikoltura u l-impjiegi staġjonali, jiġġieldu x-xogħol mhux iddikjarat, isaħħu l-kompetizzjoni ġusta u jiżguraw li n-nisa jkunu jistgħu jikkontribwixxu għas-sistemi ta’ protezzjoni soċjali u jaċċessaw it-taħriġ u drittijiet u protezzjonijiet oħra relatati max-xogħol; jistieden lill-Kummissjoni u lill-Istati Membri jżidu l-ħidma tagħhom fil-ġlieda kontra l-faqar fost dawk li jaħdmu, li jaffettwa b’mod negattiv l-istandards tal-għajxien tan-nisa, inklużi l-ħaddiema informali li spiss ma jkollhomx salarji tajbin u aċċess għas-sigurtà soċjali;

43.Jirrikonoxxi l-impatt finanzjarju fit-tul li perjodi estiżi ta’ indukrar mhux imħallsa jista’ jkollhom fuq in-nisa; jistieden lill-Istati Membri jiżguraw sistemi ta’ protezzjoni soċjali robusti u sensittivi għall-ġeneru, inkluż għal dawk li jieħdu pawżi fil-karriera biex jieħdu ħsieb persuni dipendenti; jenfasizza, filwaqt li jirrikonoxxi li s-sistemi tal-pensjonijiet huma primarjament kompetenza nazzjonali, l-importanza ta’ pensjonijiet minimi nazzjonali adegwati u krediti tal-indokrar li jgħoddu lejn l-intitolamenti tal-pensjoni għal dawk li jinterrompu l-karriera biex jieħdu ħsieb id-dipendenti; jenfasizza l-ħtieġa li jiġu żgurati protezzjoni u appoġġ għall-introjtu adegwati għall-persuni li jindukraw b’mod informali u li tiġi żgurata l-inklużjoni tal-ħaddiema part-time fil-provvista tal-pensjonijiet tat-tieni pilastru; jenfasizza l-ħtieġa li l-indikaturi tad-differenza bejn il-ġeneri fil-pensjonijiet jiġu integrati fit-Tabella ta’ Valutazzjoni Soċjali tal-UE u li jiġu integrati miżuri biex jiġu indirizzati r-riskji tal-pensjoni relatati mal-ġeneru fir-rakkomandazzjonijiet speċifiċi għall-pajjiż, li jibdew miċ-ċiklu tas-Semestru Ewropew tal-2026; iħeġġeġ lill-Istati Membri jesploraw soluzzjonijiet fiskalment responsabbli u orjentati lejn ix-xogħol li jappoġġjaw ir-ritorn tal-indokraturi fis-suq tax-xogħol, jipprovdu informazzjoni dwar l-aċċess għal skemi ta’ pensjoni pubbliċi u privati, u jsaħħu s-sistemi ta’ appoġġ ibbażati fil-familja u fil-komunità; jistieden lill-Kummissjoni, f’kooperazzjoni mal-Istati Membri, tagħti attenzjoni partikolari lill-emanċipazzjoni ekonomika tal-pensjonanti u tivvaluta l-possibbiltà li tipproponi standards minimi tal-UE għall-krediti ta’ indukrar li jagħtu lok li s-snin ta’ indukrar jgħoddu lejn l-intitolamenti tal-pensjoni; jistieden lill-Istati Membri jiżguraw li l-implimentazzjoni tar-Rakkomandazzjoni tal-Kunsill dwar l-introjtu minimu Rakkomandazzjoni tal-Kunsill tat-30 ta’ Jannar 2023 dwar introjtu minimu adegwat li jiżgura inklużjoni attiva (ĠU C 41, 3.2.2023, p. 1). tkun reattiva għal kwistjonijiet ta’ ġeneru u jkollha l-għan li tappoġġja l-ħtiġijiet tan-nisa li jgħixu fil-faqar, biex tagħtihom libertà, indipendenza u opportunitajiet finanzjarji;

44.Jirrikonoxxi r-rwol li r-reġistrazzjoni awtomatika fl-iskemi tal-pensjoni okkupazzjonali jista’ jkollha biex tinkoraġġixxi aktar parteċipazzjoni min-nisa fit-tfaddil għall-irtirar, tgħin biex ittaffi d-differenza bejn il-ġeneri fil-pensjonijiet u tappoġġja s-sigurtà finanzjarja fit-tul; jinnota li l-Awtorità Ewropea tal-Assigurazzjoni u l-Pensjonijiet tax-Xogħol tappoġġja l-użu ta’ dashboards tal-pensjonijiet, għodod ta’ traċċar biex jiġu mmonitorjati b’mod effettiv id-differenzi bejn il-ġeneri fil-pagi u fil-pensjonijiet, u politiki u prattiki ta’ remunerazzjoni newtrali għall-ġeneru fil-pensjonijiet tax-xogħol; jistieden lill-Istati Membri jippromwovu aċċess mhux diskriminatorju għal skemi ta’ pensjoni supplimentari u okkupazzjonali għall-ħaddiema kollha, inklużi l-ħaddiema part-time;

45.Jistieden lill-Kummissjoni u lill-Istati Membri jipproteġu lin-nisa migranti minn pajjiżi terzi mid-diskriminazzjoni u l-isfruttament, li spiss jiġu impjegati f’impjiegi b’livell baxx ta’ ħiliet, mhux sikuri u mhux imħallsa biżżejjed f’setturi bħall-kura domestika, it-tindif u l-catering Il-Parlament Ewropew, id-Direttorat Ġenerali għas-Servizzi ta’ Riċerka Parlamentari, “Migrant women and the EU labour market – Overcoming double discrimination” (In-nisa migranti u s-suq tax-xogħol tal-UE – Negħlbu d-diskriminazzjoni doppja), Mejju 2023.; jisħaq li l-iżgurar ta’ pagi ġusti, protezzjoni tal-liġi tax-xogħol u kontribuzzjonijiet tas-sigurtà soċjali adegwati huwa essenzjali biex jitnaqqsu d-differenzi bejn il-ġeneri fil-pagi u fil-pensjonijiet;

46.Jistieden lill-Kummissjoni tiżviluppa kampanji ta’ sensibilizzazzjoni u edukazzjoni fl-UE kollha dwar it-trasparenza fil-pagi, it-trattament ugwali u l-istrumenti disponibbli tal-UE għall-promozzjoni tal-ugwaljanza fl-impjiegi; jisħaq li l-ħaddiema u l-impjegaturi infurmati huma kruċjali biex il-leġiżlazzjoni attwali tiġi infurzata b’mod effettiv;

47.Jistieden lill-Istati Membri jirrikonoxxu l-indukrar tan-nanniet – meta n-nanniet jieħdu ħsieb regolarment lin-neputijiet tagħhom biex jippermettu lill-ġenitur(i) tat-tfal jidħlu, jibqgħu jew jirritornaw lura għax-xogħol – bħala eliġibbli għal krediti ta’ indukrar, bi kriterji ċari ta’ eliġibbiltà u verifika;

48.Jisħaq fuq l-importanza li jitneħħew l-ostakli prattiċi fil-postijiet tax-xogħol, inkluż permezz tal-aċċessibbiltà diġitali, l-akkomodazzjoni raġonevoli u l-arranġamenti tax-xogħol flessibbli; iħeġġeġ lill-Istati Membri jipprovdu inċentivi mmirati lill-impjegaturi li jinvestu fl-aċċessibbiltà, fl-iżvilupp tal-ħiliet u fir-reklutaġġ inklużiv, filwaqt li jevitaw piżijiet amministrattivi addizzjonali, sabiex jippromwovu kemm l-ugwaljanza kif ukoll il-kompetittività f’konformità mal-prinċipji tal-ekonomija soċjali tas-suq;

49.Jenfasizza r-rwol ewlieni tad-djalogu soċjali u l-involviment tas-sħab soċjali fit-tfassil, l-implimentazzjoni u l-monitoraġġ tal-istrateġiji għall-ugwaljanza u l-pagi biex jgħinu biex tinqered id-differenza bejn il-ġeneri fil-pagi; iħeġġeġ lis-sħab soċjali jinkludu miżuri biex jippromwovu opportunitajiet indaqs u jiġġieldu l-fastidju, l-inugwaljanza fil-pagi u l-preġudizzji tal-ġeneru fil-ftehimiet kollettivi, u jestendu l-kopertura tan-negozjar kollettiv għall-ħaddiema mhux standard, speċjalment f’setturi ddominati min-nisa u b’pagi baxxi, f’konformità mal-Artikolu 152 tat-TFUE; jistieden lill-Kummissjoni u lill-Istati Membri jinvolvu b’mod sinifikanti lis-sħab soċjali fl-iżvilupp ta’ politiki ġodda biex titnaqqas id-differenza fil-pagi bejn il-ġeneri fl-istrateġija li jmiss dwar l-ugwaljanza bejn il-ġeneri u jkomplu jappoġġjaw lis-sħab soċjali;

50.Jistieden lill-Istati Membri jappoġġjaw il-bini tal-istituzzjonijiet fil-livelli lokali, reġjonali u nazzjonali biex jimmonitorjaw l-implimentazzjoni u l-progress tal-istrateġiji nazzjonali għall-ugwaljanza bejn il-ġeneri; jissottolinja, bl-istess mod, l-importanza li n-nisa jiġu involuti u mismugħa b’mod attiv, f’għadd kbir ta’ setturi u forzi tax-xogħol, fil-formulazzjoni, l-implimentazzjoni u l-evalwazzjoni ta’ politiki mmirati lejn l-eliminazzjoni tad-differenza bejn il-ġeneri fil-pagi, inkluża r-riċerka ta’ aspetti li potenzjalment għandhom impatt fuq il-qligħ u l-parteċipazzjoni tal-forza tax-xogħol tan-nisa iżda li dwarhom hemm nuqqas ta’ data, bħas-saħħa mentali, il-menopawża jew il-mestrwazzjoni; iħeġġeġ bil-qawwa lill-Istati Membri jindirizzaw kwistjonijiet okkupazzjonali relatati mal-endometrite u l-menopawża, inkluż il-ħruġ bikri tan-nisa mis-suq tax-xogħol;

51.Itenni l-ħtieġa tal-integrazzjoni tal-perspettiva tal-ġeneri fil-politiki tal-UE u dawk nazzjonali, inklużi l-impjiegi, is-saħħa, id-diżabbiltà, il-pensjonijiet u l-isport, u fit-teħid ta’ deċiżjonijiet tal-politika, filwaqt li jiġi żgurat li l-objettivi tal-ugwaljanza jiġu inkorporati fl-istadji kollha tal-formulazzjoni tal-politika u l-implimentazzjoni tal-baġit; jitlob li l-integrazzjoni tal-perspettiva tal-ġeneri tissaħħaħ fi ħdan il-qafas finanzjarju pluriennali li jmiss u għal riżorsi ddedikati tal-UE mmirati lejn l-eliminazzjoni tad-differenzi bejn il-ġeneri fil-pagi u fil-pensjonijiet, it-tisħiħ tas-servizzi u l-infrastruttura tal-indukrar, u l-appoġġ għal servizzi tas-saħħa mentali sensittivi għall-ġeneru; ifakkar li l-integrazzjoni tal-objettivi tal-ugwaljanza fil-finanzjament tal-UE ttejjeb l-effettività u t-trasparenza tal-investiment pubbliku; jenfasizza, f’dan ir-rigward, ir-rwol possibbli tal-mekkaniżmi ta’ finanzjament tal-UE bħall-Fond Soċjali Ewropew Plus, il-Fond Ewropew għall-Iżvilupp Reġjonali, il-Faċilità għall-Irkupru u r-Reżiljenza, il-programm dwar iċ-Ċittadini, l-Ugwaljanza, id-Drittijiet u l-Valuri u Orizzont Ewropa fl-għoti ta’ appoġġ finanzjarju għall-objettivi relatati mal-ġeneru;

52.Jappella għall-ġbir, il-komparabbiltà u l-pubblikazzjoni mtejba ta’ data diżaggregata skont il-ġeneru dwar id-differenzi bejn il-ġeneri fil-pagi u fil-pensjonijiet fis-setturi kollha biex jiġi mmonitorjat aħjar il-progress fit-tnaqqis tad-differenza bejn il-ġeneri fil-pagi, filwaqt li jsir użu sħiħ mis-sistemi ta’ rapportar u l-għodod diġitali eżistenti biex jiġu evitati kostijiet amministrattivi akbar għan-negozji; jisħaq li data affidabbli u armonizzata hija essenzjali biex jitfasslu politiki bbażati fuq l-evidenza u jiġi mmonitorjat il-progress lejn l-eliminazzjoni tad-differenzi bejn il-ġeneri; jisħaq fuq ir-rwol ewlieni tal-Istitut Ewropew għall-Ugwaljanza bejn is-Sessi (EIGE) u l-Eurostat fl-appoġġ tal-ġbir ta’ data komparabbli u ta’ kwalità għolja madwar l-UE biex jinfurmaw politiki mmirati; jitlob lill-Eurostat jikkomplementa l-indikatur uffiċjali tad-differenza bejn il-ġeneri fil-pagi b’indikatur standardizzat tad-differenza bejn il-ġeneri fil-ħin;

53.Jappella għat-traspożizzjoni u l-implimentazzjoni rapidi tad-Direttiva dwar it-Trasparenza fil-Pagi, u tad-Direttiva dwar il-Bilanċ bejn il-Ġeneri fil-Bordijiet Korporattivi, li 10 Stati Membri għadhom ma ttrasponewx, u jħeġġeġ lill-Kummissjoni tiżgura l-infurzar robust taż-żewġ direttivi; iħeġġeġ lill-SMEs u lil kumpaniji oħra mhux elenkati jikkunsidraw l-aħjar prattika stabbilita dwar il-bilanċ bejn il-ġeneri fil-maniġment; jistieden lill-Kummissjoni tiżgura li d-Direttiva dwar it-Trasparenza fil-Pagi, bħala l-leġiżlazzjoni ewlenija tal-UE biex tindirizza d-differenza fil-pagi bejn il-ġeneri, ma tiġi inkluża fl-ebda pakkett ta’ simplifikazzjoni omnibus li jmiss, filwaqt li tipprevjeni wkoll id-duplikazzjoni jew it-trikkib fir-rigward ta’ atti mhux leġiżlattivi u leġiżlattivi ġodda li jindirizzaw id-differenza bejn il-ġeneri fil-pagi;

54.Iħeġġeġ lill-Kummissjoni u lill-Istati Membri jiżguraw infurzar robust u, fejn possibbli, it-tisħiħ tal-leġiżlazzjoni attwali tal-UE u dik nazzjonali biex jiggarantixxu l-ugwaljanza fl-iżvilupp tal-karriera, speċjalment wara l-liv tal-maternità; jisħaq li l-ħaddiema għandhom jiġu protetti minn kwalunkwe forma ta’ żvantaġġ, inklużi d-demozzjoni, l-estensjoni tal-probation jew bidliet negattivi fil-kundizzjonijiet tax-xogħol attribwibbli għat-teħid ta’ tali liv;

55.Jenfasizza li l-piż amministrattiv għall-mikrointrapriżi u l-SMEs jista’ jaffettwa b’mod negattiv l-intraprenditorija tan-nisa, li hija kruċjali għall-indipendenza finanzjarja tan-nisa u l-ugwaljanza bejn il-ġeneri;

56.Jistieden lill-Istati Membri jiżguraw li r-regoli dwar it-trasparenza fil-pagi u l-mekkaniżmi tal-ilmenti jkunu aċċessibbli kemm b’mod diġitali kif ukoll fiżiku għall-ħaddiema b’diżabbiltà, u li l-metodi ta’ evalwazzjoni tal-impjiegi jiġu vverifikati biex jiġi evitat il-preġudizzju kontra n-nisa, speċjalment f’impjiegi ddominati min-nisa u fost in-nisa b’diżabbiltà;

57.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.