1.Jisħaq fuq il-vantaġġ kompetittiv tal-investiment fil-mudell soċjali tal-UE; jappella biex ir-rakkomandazzjonijiet tal-Grupp ta’ Livell Għoli dwar il-futur tal-protezzjoni soċjali u tal-istat soċjali, kif ukoll ir-rakkomdanazzjonijiet tar-rapporti ta’ Letta u ta’ Draghi, jiġu integrati fil-proċess tas-Semestru Ewropew sabiex l-ekonomija soċjali tas-suq tal-UE tiġi protetta u rinfurzata; jisħaq fuq il-ħtieġa ta’ approċċ ibbilanċjat li jappoġġja d-drittijiet soċjali, is-servizzi pubbliċi, u l-istrutturi u l-kopertura tan-negozjar kollettiv daqs il-kompetittività; jilqa’ l-integrazzjoni tal-EPSR fil-qafas tal-governanza ekonomika u jistieden lill-Istati Membri jieħdu vantaġġ mill-possibbiltà li jestendu l-perjodu ta’ aġġustament għall-investiment fil-prijoritajiet tal-EPSR; jappella biex il-qafas integrat ta’ governanza jiġi rifless fil-proċessi interni tal-istituzzjonijiet tal-UE, bil-korpi ekonomiċi u soċjali tagħhom involuti f’livelli ugwali;

2.Iħeġġeġ lill-Kummissjoni u lill-Istati Membri jimplimentaw bis-sħiħ l-EPSR; jisħaq li l-pjan ta’ azzjoni aġġornat tal-EPRS irid isarraf l-impenji politiċi f’miżuri konkreti u ambizzjużi, appoġġjati minn miri ċari u li jistgħu jitkejlu u minn indikaturi ta’ monitoraġġ robusti, sabiex jiġu indirizzati b’mod effettiv il-faqar u l-esklużjoni soċjali u biex il-ħaddiema jiġu appoġġjati fil-ġestjoni tat-tranżizzjonijiet ekoloġiċi u diġitali, b’mod partikolari fir-rigward tal-ħiliet, il-VET u t-tagħlim tul il-ħajja; jappella biex il-miri tal-pjan ta’ azzjoni tal-EPSR jiġu inkorporati fil-qalba tas-Semestru Ewropew billi jsiru punti ta’ riferiment fil-valutazzjonijiet tas-Semestru Ewropew; jinnota li l-proposta tal-Kummissjoni għal rapport konġunt tal-2026 dwar l-impjiegi tiffoka fil-biċċa l-kbira fuq in-nuqqas ta’ ħiliet u ħaddiema u ma tilħaqx valutazzjoni komprensiva tal-implimentazzjoni tal-20 prinċipju tal-EPRS, kif meħtieġ mir-Regolament (UE) 2024/1263; jistieden lill-Kummissjoni tiżgura li l-prinċipji kollha tal-EPSR jiġu indirizzati f’ċikli futuri biex tiġi żgurata stampa preċiża u sħiħa tas-sitwazzjoni soċjali fl-UE;

3.Jilqa’ l-ambizzjoni tal-Kummissjoni li teqred il-faqar sal-2050, il-pjan Ewropew tagħha għal akkomodazzjoni affordabbli, u l-intenzjoni tagħha li tipproponi att dwar impjiegi ta’ kwalità; jilqa’, barra minn hekk, l-ewwel strateġija tal-UE kontra l-faqar u t-tisħiħ tal-Garanzija Ewropea għat-Tfal; jenfasizza l-ħtieġa li jkun hemm koerenza bejn is-Semestru Ewropew, is-segwitu għall-pjan ta’ azzjoni tal-EPSR u dawn l-istrumenti futuri, u li jkollhom miri li jistgħu jitkejlu u rakkomandazzjonijiet korrispondenti speċifiċi għall-pajjiż;

4.Ifakkar fl-impenn, li għamlet il-President tal-Kummissjoni Ursula von der Leyen fl-2019, biex jiġi żgurat li kull tifel u tifla fl-Ewropa f’riskju ta’ faqar jew ta’ esklużjoni soċjali jkollhom aċċess għall-aktar drittijiet bażiċi, bħall-kura tas-saħħa u l-edukazzjoni, u dan kien segwit mill-adozzjoni tar-Rakkomandazzjoni tal-Kunsill (UE) 2021/1004 tal-14 ta’ Ġunju 2021 ĠU L 223, 22.6.2021, p. 14, ELI: http://data.europa.eu/eli/reco/2021/1004/oj. li tistabbilixxi Garanzija Ewropea għat-Tfal; jisħaq li l-objettivi tal-Garanzija Ewropea għat-Tfal ma jistgħux jintlaħqu mingħajr baġit ambizzjuż iddedikat fil-livell tal-UE kif ukoll f’dak nazzjonali; itenni, f’dan il-kuntest, it-talba tiegħu għal baġit sostanzjali ddedikat ta’ mill-anqas EUR 20 biljun għall-Garanzija Ewropea għat-Tfal; jissottolinja l-ħtieġa urġenti li dan il-baġit iddedikat jiġi allokat fil-qafas finanzjarju pluriennali li jmiss sabiex iwieġeb għall-isfida dejjem tikber tal-faqar u l-esklużjoni soċjali fost it-tfal;

5.Jisħaq fuq l-importanza li jinqerdu l-faqar u l-esklużjoni soċjali fost it-tfal sabiex jitkissru ċ-ċikli interġenerazzjonali; jilqa’ l-inklużjoni ta’ valutazzjoni tal-implimentazzjoni tal-Garanzija għat-Tfal fir-rapporti tal-pajjiżi kollha fil-Pakkett tar-Rebbiegħa 2025 u jħeġġeġ monitoraġġ kontinwu tal-progress fis-Semestru Ewropew; jiddispjaċih, madankollu, dwar in-nuqqas ta’ segwitu għal dawn is-sejbiet, b’żewġ rakkomandazzjonijiet speċifiċi għall-pajjiż biss fl-2025 li appellaw biex jiġi indirizzat il-faqar fost it-tfal; iqis li r-rakkomandazzjonijiet speċifiċi għall-pajjiż għandhom jirriflettu l-konformità baġitarja tal-Istati Membri mar-rekwiżiti dwar l-allokazzjoni minima biex jiġi indirizzat il-faqar fost it-tfal kif stabbilit fir-Regolament ESF+ Ir-Regolament (UE) 2021/1057 tal-Parlament Ewropew u tal-Kunsill tal-24 ta’ Ġunju 2021 li jistabbilixxi l-Fond Soċjali Ewropew Plus (FSE+) u li jħassar ir-Regolament (UE) Nru 1296/2013 (ĠU L 231, 30.6.2021, p. 21, ELI: http://data.europa.eu/eli/reg/2021/1057/oj).;

6.Itenni f’dan ir-rigward l-appell tiegħu biex jiżdied il-finanzjament tal-Garanzija Ewropea għat-Tfal, b’baġit sostanzjali ddedikat, u biex l-Istati Membri jallokaw mill-anqas 5 % tal-fondi tagħhom allokati mill-FSE+ għall-ġlieda kontra l-faqar fost it-tfal u għall-promozzjoni tal-benesseri tat-tfal, u mill-anqas 10 % jiġu allokati għall-Istati Membri b’livelli ta’ faqar fost it-tfal li jaqbżu l-medja tal-UE;

7.Jinsab imħasseb dwar il-livell ta’ qgħad fost iż-żgħażagħ, li għadu għoli aktar mid-doppju tar-rata ta’ qgħad tal-UE; jisħaq li, għaż-żgħażagħ, huwa essenzjali li l-miżuri tal-attivazzjoni tal-impjiegi jiġu komplementati b’appoġġ sostnut, inkluż aċċess għal servizzi soċjali integrati, appoġġ għall-akkomodazzjoni u għas-saħħa mentali sabiex tiġi żgurata l-parteċipazzjoni kontinwa tagħhom fl-edukazzjoni jew fl-impjieg; jenfasizza l-ħtieġa li l-Istati Membri jinvestu fil-Garanzija għaż-Żgħażagħ rinfurzata sabiex jiżguraw appoġġ ta’ kwalità u f’waqtu għaż-żgħażagħ kollha li jinsabu barra mill-edukazzjoni, impjieg jew taħriġ (NEETs) taħt l-età ta’ 30 sena; iħeġġeġ lill-Istati Membri jsaħħu l-użu tal-Garanzija għaż-Żgħażagħ bħala għodda li tappoġġja lil dawk iż-żgħażagħ li jitilqu mill-kura u tipprevjeni li jitilquha għallarrieda, inkluż permezz ta’ aċċess għal gwida għall-karriera;

8.Jistieden lill-Kummissjoni u lill-Istati Membri, fil-qafas tas-Semestru Ewropew, jippromwovu traineeships ta’ kwalità għolja u remunerati b’mod ġust u jipprevjenu l-użu ħażin tagħhom bħala sostituzzjoni għal impjieg regolari; jappella biex id-direttiva li jmiss dwar it-titjib tal-kundizzjonijiet tax-xogħol tat-trainees1a tkun ambizzjuża u komprensiva, filwaqt li tiżgura l-protezzjoni sħiħa tad-drittijiet tat-trainees Il-proposta tal-Kummissjoni tal-20 ta’ Marzu 2024 għal direttiva tal-Parlament Ewropew u tal-Kunsill dwar it-titjib u l-infurzar tal-kundizzjonijiet tax-xogħol tat-trainees u l-ġlieda kontra relazzjonijiet ta’ impjieg regolari li taparsi jkunu traineeships (id-“Direttiva dwar it-Traineeships”) (COM(2024)0132)., inkluża l-possibbiltà li t-traineeship jintemm mingħajr preġudizzju f’każ ta’ ksur tad-drittijiet fundamentali, u jappella għall-konklużjoni rapida tan-negozjati;

9.Iqis li hija meħtieġa azzjoni fil-livell tal-UE u tal-Istati Membri biex jiġu evitati u indirizzati livelli persistentement għoljin ta’ faqar u ta’ esklużjoni soċjali, u jilqa’ t-tħabbira tal-ewwel strateġija tal-UE kontra l-faqar f’dan ir-rigward; jemmen li l-istrateġija trid tipprovdi approċċ komprensiv biex jiġu indirizzati l-kawżi ewlenin u l-aspetti multidimensjonali tal-faqar u tal-esklużjoni soċjali, b’azzjonijiet konkreti, allokazzjoni baġitarja robusta, objettivi ċari, stadji importanti u miżuri strutturali, filwaqt li tiżgura wkoll implimentazzjoni u monitoraġġ b’saħħithom; jistieden lill-Istati Membri jimplimentaw id-direttiva dwar pagi minimi adegwati Id-Direttiva (UE) 2022/2041 tal-Parlament Ewropew u tal-Kunsill tad-19 ta’ Ottubru 2022 dwar pagi minimi adegwati fl-Unjoni Ewropea (ĠU L 275, 25.10.2022, p. 33, ELI: http://data.europa.eu/eli/dir/2022/2041/oj). biex jiġġieldu l-faqar fost dawk li jaħdmu u jinċentivaw ix-xogħol; jappella biex l-Istrateġija tal-UE kontra l-faqar tpoġġi l-ġlieda kontra l-faqar fost it-tfal fil-qalba tagħha sabiex tkisser iċ-ċiklu tal-faqar; iħeġġeġ lill-Istati Membri jimplimentaw bis-sħiħ ir-Rakkomandazzjoni tal-Kunsill dwar introjtu minimu adegwat Ir-Rakkomandazzjoni tal-Kunsill tat-30 ta’ Jannar 2023 dwar introjtu minimu adegwat li jiżgura inklużjoni attiva 2023/C 41/01 (ĠU C 41, 3.2.2023, p. 1).;

10.Ifakkar fl-importanza li jittejjeb l-aċċess għall-protezzjoni soċjali għall-persuni li jaħdmu għal rashom u jistieden lill-Kummissjoni tuża l-proċess tas-Semestru Ewropew biex timmonitorja l-implimentazzjoni nazzjonali tar-Rakkomandazzjoni tal-Kunsill dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom Ir-Rakkomandazzjoni tal-Kunsill tat-8 ta’ Novembru 2019 dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom (ĠU C 387, 15.11.2019, p. 1)., inkluż ir-rakkomandazzjonijiet speċifiċi għall-pajjiż; ifakkar, hekk kif ir-rata tal-professjonisti li jaħdmu għal rashom fis-setturi kulturali u kreattivi hija aktar mid-doppju ta’ dik tal-popolazzjoni ġenerali, fil-ħtieġa ta’ miżuri mmirati għas-settur; jilqa’, f’dan il-kuntest, it-tħabbira ta’ Karta tal-Artisti tal-UE bil-għan li tenfasizza l-elementi fundamentali u l-impenji ewlenin għal kundizzjonijiet tax-xogħol ġusti f’dan is-settur iżda jħeġġeġ lill-Kummissjoni tavvanza l-pubblikazzjoni tagħha għall-2026, peress li din tirrappreżenta kwistjonijiet li ilhom jeżistu;

11.Jiddispjaċih li l-objettivi tal-qafas strateġiku tal-UE għar-Rom mhumiex qed jiġu segwiti b’mod attiv mill-Istati Membri u mhux qed jirċievu attenzjoni sostnuta fil-proċess tas-Semestru Ewropew, b’mod partikolari fir-rakkomandazzjonijiet speċifiċi għall-pajjiż; jenfasizza l-għan tal-qafas strateġiku li titnaqqas bin-nofs il-lakuna fl-impjiegi bejn ir-Rom u l-popolazzjoni ġenerali u li jiġi żgurat li mill-anqas 60 % tar-Rom ikunu f’xogħol li jitħallas sal-2030; iħeġġeġ lill-Istati Membri jadottaw approċċ integrat, iffukat fuq l-ugwaljanza u jiżguraw li l-politiki u s-servizzi pubbliċi jilħqu lir-Rom kollha b’mod effettiv, inklużi dawk f’żoni remoti u rurali;

12.Ifakkar bi tħassib fil-lakuna persistenti fl-impjiegi għall-persuni b’diżabbiltà ta’ madwar 24 %, u, min-naħa l-oħra, l-objettiv tal-UE li tgħaddi minn kura istituzzjonali għal kura bbażata fil-komunità jew fil-familja għall-persuni kollha kkonċernati; jistieden lill-Kummissjoni tindirizza l-lakuna fl-impjiegi għall-persuni b’diżabbiltà permezz tas-Semestru Ewropew, inkluż fir-rakkomandazzjonijiet speċifiċi għall-pajjiż, u taġġorna l-istrateġija tal-UE għad-drittijiet tal-persuni b’diżabbiltà 2021-2030 f’konformità mal-Konvenzjoni tan-NU dwar id-Drittijiet ta’ Persuni b’Diżabbiltà, b’inizjattivi ewlenin ġodda, inkluża garanzija Ewropea dwar l-impjiegi u l-ħiliet għall-persuni b’diżabbiltà; itenni l-istedina tiegħu lill-Kummissjoni biex tressaq pjan ta’ azzjoni dwar id-deistituzzjonalizzazzjoni li jkopri l-gruppi kollha li għadhom jgħixu f’istituzzjonijiet, inklużi t-tfal, il-persuni b’diżabbiltà, il-persuni bi kwistjonijiet ta’ saħħa mentali u l-persuni mingħajr dar; jisħaq li l-progress fid-deistituzzjonalizzazzjoni għandu jiġi mmonitorjat fi ħdan is-Semestru Ewropew, u jistieden lill-Istati Membri jagħmlu użu sħiħ mill-FSE+ u minn fondi oħra tal-UE u dawk nazzjonali biex jiffinalizzaw dan il-proċess, jiżviluppaw servizzi bbażati fil-komunità u jinvestu fil-prevenzjoni;

13.Jilqa’ l-inklużjoni permanenti tal-qafas ta’ konverġenza soċjali fis-Semestru Ewropew; jisħaq fuq l-importanza tagħha, flimkien mat-Tabella ta’ Valutazzjoni Soċjali, biex jiġu identifikati r-riskji u biex jiġi intraċċat il-progress fuq il-konverġenza soċjali ’l fuq, jitnaqqsu l-inugwaljanzi, jissaħħu s-sistemi tal-protezzjoni soċjali u jiġu promossi kundizzjonijiet tax-xogħol deċenti u miżuri ta’ sostenn biex tiġi żgurata l-ġustizzja fit-tranżizzjoni; jistieden lill-Kummissjoni tkompli tiżviluppa għodod innovattivi ta’ analiżi kwantitattiva u kwalitattiva fl-ambitu ta’ dan il-qafas il-ġdid sabiex isir l-aħjar użu minnu fiċ-ċikli futuri tas-Semestru Ewropew; jistieden lill-Kummissjoni tanalizza r-riskji għall-konverġenza soċjali ’l fuq enfasizzati fir-rapport konġunt tagħha tal-2025 dwar l-impjiegi, inklużi l-eżiti tal-impjiegi ta’ gruppi sottorappreżentati, it-tluq bikri mill-iskola u t-tagħlim għall-adulti, u l-faqar, fit-tieni stadju tal-analiżi, u jistieden lill-Kummissjoni tiddiskuti mal-Istati Membri kkonċernati dwar il-miżuri meħuda jew ippjanati biex jiġu indirizzati dawn ir-riskji; jinnota li l-indirizzar tal-isfidi identifikati fir-rapport konġunt dwar l-impjiegi se jikkontribwixxi biex tinkiseb konverġenza soċjali ’l fuq;

14.Jistieden lill-Kummissjoni ttejjeb u taġġorna t-Tabella ta’ Valutazzjoni Soċjali, filwaqt li tiżgura li din tirrifletti l-fatturi u l-impatti tal-inugwaljanza, inklużi l-opportunitajiet indaqs, l-impjiegi ta’ kwalità, id-distribuzzjoni tal-ġid, l-aċċess għas-servizzi pubbliċi u soċjali, il-pensjonijiet adegwati, l-akkomodazzjoni u l-kundizzjoni ta’ persuni mingħajr dar, is-saħħa mentali, id-diskriminazzjoni u l-impatti soċjali tad-degradazzjoni tal-ambjent u t-tibdil fil-klima; jistieden lill-Kummissjoni tittratta l-faqar fost dawk li jaħdmu bħala sinjal ta’ twissija fit-Tabella ta’ Valutazzjoni Soċjali u tipproponi rakkomandazzjonijiet speċifiċi għall-pajjiż fejn tali tendenzi jippersistu; jisħaq fuq il-ħtieġa li jiġu indirizzati l-isfidi mmarkati bħala “kritiċi” jew li “għandhom jiġu osservati” fit-Tabella ta’ Valutazzjoni, inklużi t-tluq bikri mill-iskola, il-piż eċċessiv tal-kost tal-akkomodazzjoni, l-impatt tat-trasferimenti soċjali, il-lakuna fl-impjiegi għall-persuni b’diżabbiltà, il-ħtiġijiet mhux issodisfati awtorapportati għall-kura medika, l-indukrar tat-tfal, il-ħiliet diġitali bażiċi u l-faqar fost it-tfal; jappella għall-inklużjoni ta’ indiċi tal-progress soċjali u l-Indiċi tal-Ugwaljanza bejn il-Ġeneri biex jitkejlu b’mod aħjar l-inugwaljanza, l-aċċess għall-opportunitajiet u l-benesseri bl-użu ta’ data diżaggregata; jisħaq fuq il-ħtieġa ta’ data u metodoloġiji f’waqthom, armonizzati u trasparenti biex jittejbu t-tfassil tal-politika bbażat fuq l-evidenza u l-investimenti soċjali mmirati, u biex it-Tabella ta’ Valutazzjoni Soċjali tiġi allinjata ma’ kull wieħed mill-20 prinċipju tal-EPSR;

15.Ifakkar li l-indikatur AROPE ma jkoprix suffiċjentement il-kawżi ewlenin tal-faqar u l-inugwaljanzi kumplessi, b’mod partikolari l-inklużjoni ta’ persuni li jgħixu barra mill-unitajiet domestiċi privati, l-aspetti kwalitattivi tal-faqar u l-esperjenzi ta’ marġinalizzazzjoni li xi nies ikunu għaddew minnhom, filwaqt li jqis ukoll li l-faqar jestendi lil hinn minn introjtu insuffiċjenti jew privazzjoni materjali; jistieden lill-Kumitat tal-Protezzjoni Soċjali jaħdem dwar it-tiġdid tal-miżura statistika AROPE sabiex jespandiha lejn fehim tal-faqar u tal-esklużjoni soċjali b’mod aktar b’saħħtu, diżaggregat u aktar multidimensjonali;

16.Ifakkar li l-investiment soċjali jista’ jkollu impatt pożittiv fuq it-tkabbir ekonomiku, fuq il-produttività u fuq il-kompetittività, filwaqt li jikkontribwixxi għas-sostenibbiltà fiskali u jippromwovi koeżjoni soċjali ’l fuq, kundizzjonijiet tal-għajxien u tax-xogħol, u l-inklużjoni ta’ gruppi vulnerabbli; Jistieden lill-Kummissjoni u lill-Istati Membri jittrattaw l-investiment soċjali bħala pedament għat-tkabbir sostenibbli u jiffukaw fuq investimenti li diġà wrew li huma effettivi f’termini ta’ tkabbir, ta’ produttività, ta’ kwalità tal-impjiegi u ta’ żieda fil-parteċipazzjoni fis-suq tax-xogħol jistieden lill-Istati Membri jagħmlu użu sħiħ u mmirat mill-Faċilità għall-Irkupru u r-Reżiljenza sal-31 ta’ Diċembru 2026 biex jindirizzaw l-isfidi identifikati fir-rakkomandazzjonijiet speċifiċi għall-pajjiż; jitlob li l-Kummissjoni tipprovdi gwida dwar l-użu strateġiku tal-investiment privat u tas-sħubijiet pubbliċi-privati biex jingħalqu l-lakuni tal-infrastruttura soċjali; jilqa’ t-tnedija taċ-Ċentru ta’ Għarfien dwar l-Investiment Soċjali biex jissaħħu t-tagħlim reċiproku u l-assistenza teknika, ikomplu jittejbu l-puntwalità u d-disponibbiltà tal-indikaturi soċjali, jitnaqqas id-dewmien biex jiġu evalwati t-tendenzi tal-faqar u tal-inugwaljanza, u jissaħħaħ l-aċċess tal-Istati Membri għad-data għall-evalwazzjoni tal-politika u għall-valutazzjoni tal-impatt;

17.Ifakkar li l-ekonomija soċjali hija komponent ewlieni tal-investiment soċjali, li għandha rwol uniku biex tiżviluppa soluzzjonijiet inklużivi u innovattivi fil-livell lokali, u dan jikkontribwixxi għall-ħolqien ta’ impjiegi ta’ kwalità, il-forniment ta’ servizzi soċjali u ta’ prossimità li jkunu affordabbli u aċċessibbli, u t-tranżizzjonijiet ekoloġiċi u diġitali; jinnota li l-appoġġ pubbliku għall-ekonomija soċjali huwa b’saħħtu, bi 88 % tar-rispondenti tal-Ewrobarometru jappoġġjaw strateġiji u leġiżlazzjoni biex jippromwovuha; jistieden lill-Kummissjoni u lill-Istati Membri jsaħħu l-kundizzjonijiet qafas tagħhom billi jiffaċilitaw l-aċċess għall-finanzi, jipprovdu opportunitajiet ta’ bini tal-kapaċitajiet u jiżguraw il-viżibbiltà tagħhom, u jirriflettu l-objettivi tal-pjan ta’ azzjoni tal-ekonomija soċjali fis-Semestru Ewropew, inkluż permezz ta’ rakkomandazzjonijiet speċifiċi għall-pajjiż u l-użu mmirat tal-fondi tal-UE;

18.Jenfasizza li l-pjan ta’ akkomodazzjoni affordabbli tal-Kummissjoni għandu jiġi integrat aħjar fis-Semestru Ewropew, b’enfasi aktar qawwija fir-rakkomandazzjonijiet speċifiċi għall-pajjiż dwar akkomodazzjoni affordabbli, deċenti u sostenibbli, b’mod partikolari għal gruppi b’introjtu baxx u medju, kif ukoll għall-persuni b’diżabbiltà u akbar fl-età; jappella għal monitoraġġ imsaħħaħ tal-progress tal-Istati Membri biex jiżguraw aċċess għal akkomodazzjoni adegwata, sikura u mhux segregata għall-komunitajiet Rom li jesperjenzaw faqar estrem; ifakkar lill-firmatarji tad-Dikjarazzjoni ta’ Liżbona dwar il-Pjattaforma Ewropea għall-ġlieda kontra l-kundizzjoni ta’ persuni mingħajr dar dwar l-għan li tinqered din il-kundizzjoni sal-2030; jistieden lill-Istati Membri jgħaqqdu miżuri li jżidu l-provvista, inaqqsu l-kostijiet tal-bini u jindirizzaw in-nuqqas ta’ ħaddiema fis-settur tal-kostruzzjoni u tal-akkomodazzjoni ma’ appoġġ orjentat lejn id-domanda li jippermetti lin-nies, b’mod partikolari l-unitajiet domestiċi f’sitwazzjonijiet vulnerabbli, jaċċessaw akkomodazzjoni affordabbli, deċenti u sostenibbli; jisħaq li l-pjanijiet fiskali-strutturali nazzjonali fuq terminu medju u l-istrateġiji ta’ investiment għandhom jappoġġjaw l-akkomodazzjoni soċjali u affordabbli, il-prevenzjoni u t-tnaqqis tal-kundizzjoni ta’ persuni mingħajr dar u jibnu modifiki retroattivi biex jitnaqqas il-faqar enerġetiku u jittejbu l-kundizzjonijiet tal-akkomodazzjoni, b’mod partikolari għall-unitajiet domestiċi vulnerabbli; ifakkar li l-Fond Soċjali għall-Klima se jipprovdi finanzjament lill-Istati Membri mill-2026 biex jappoġġja lill-unitajiet domestiċi u lill-mikrointrapriżi vulnerabbli;

19.Jenfasizza li l-investiment f’edukazzjoni u fit-tagħlim tul il-ħajja ta’ kwalità għolja u aċċessibbli huwa investiment soċjali strateġiku li huwa essenzjali għall-koeżjoni, għall-inklużjoni, u għat-tħejjija tal-forza tax-xogħol għat-tranżizzjonijiet ekoloġiċi u diġitali u għall-ħtiġijiet relatati mad-difiża tal-UE, inkluż permezz tal-edukazzjoni u t-taħriġ vokazzjonali u l-apprendistati; jilqa’ l-proposta għal rakkomandazzjoni tal-Kunsill fuq il-kapital uman fl-UE u l-attenzjoni tagħha biex tindirizza n-nuqqas ta’ ħiliet, l-użu ta’ informazzjoni dwar il-ħiliet għat-tfassil ta’ strateġiji dwar il-ħiliet u l-iżvilupp ta’ sett wiesa’ ta’ ħiliet bażiċi, inklużi l-litteriżmu diġitali, dak dwar iċ-ċittaadinanza u dak dwar IA, sabiex jipprepraw l-individwi għall-ħajja moderna; jirrikonoxxi li l-investiment insuffiċjenti fil-kapital uman ixekkel l-innovazzjoni, il-kompetittività u l-kapaċità tan-nies li jilħqu l-potenzjal sħiħ tagħhom;

20.Jenfasizza l-ħtieġa ta’ inizjattivi tal-UE dwar in-nuqqas ta’ ħiliet biex jipprovdu appoġġ aktar b’saħħtu għal sistemi ta’ edukazzjoni u ta’ taħriġ komprensivi u inklużivi, inkluż permezz ta’ politiki attivi tas-suq tax-xogħol, kontijiet individwali tat-tagħlim u mikrokredenzjali, u t-tisħiħ tal-proċeduri għall-validazzjoni tal-apprendiment mhux formali u informali; ikompli jisħaq fuq l-importanza li tittejjeb u li tiġi ffaċilitata l-mobbiltà ġusta tal-forza tax-xogħol fl-UE u tar-rwol tal-migrazzjoni legali u r-rikonoxximent ta’ kwalifiki barranin biex jiġi indirizzat in-nuqqas ta’ ħiliet; jinsab imħasseb li l-parteċipazzjoni tal-adulti fit-taħriġ għadha ferm taħt il-mira ta’ 60 % fil-maġġorparti tal-Istati Membri, b’mod partikolari fost il-ħaddiema b’livell baxx ta’ ħiliet, il-ħaddiema akbar fl-età, iċ-ċittadini mhux tal-UE u l-persuni b’diżabbiltà; jistieden lill-Kummissjoni tressaq soluzzjonijiet konkreti għan-nuqqas ta’ ħiliet u tindirizza l-isfidi persistenti fil-Pakkett dwar il-Mobbiltà tax-Xogħol Ġusta, filwaqt li tiżgura li l-Inizjattiva li jmiss dwar it-Trasferibbiltà tal-Ħiliet tindirizza l-ostakli attwali għar-rikonoxximent tal-ħiliet;

21.Jemmen bis-saħħa li dritt individwali għat-taħriġ għall-ħaddiema matul il-ħinijiet tax-xogħol, li jindirizza l-ostakli ewlenin biex isegwu t-taħriġ, jista’ jiżgura titjib tal-ħiliet jew taħriġ mill-ġdid ta’ kwalità, taħriġ tal-impjegati u appoġġ għall-iżvilupp tal-karriera sabiex jiġi żgurat provvista prevedibbli u stabbli ta’ ħaddiema tas-sengħa għall-impjegaturi; jisħaq fuq il-ħtieġa li jiġi indirizzat l-ostaklu tal-kost billi jiġi żgurat li t-taħriġ ikun mingħajr ħlas għall-ħaddiema, appoġġjat minn finanzjament, inċentivi fiskali u sħubijiet; jisħaq li l-istituzzjonijiet nazzjonali u s-sħab soċjali huma responsabbli għat-taħriġ tal-impjegati, u jenfasizza r-rwol essenzjali tagħhom fl-implimentazzjoni tad-dritt għat-taħriġ; jistieden, f’dan ir-rigward, lill-Istati Membri jagħtu prijorità u jippromwovu skemi ta’ taħriġ żviluppati b’mod konġunt mill-ħaddiema u mill-impjegaturi tagħhom, filwaqt li jiżguraw li t-titjib tal-ħiliet u t-taħriġ mill-ġdid jirrispondu għad-domanda reali tas-suq u jikkontribwixxu għall-progressjoni tal-karriera; jistieden lill-Kummissjoni tesplora u toħroġ gwida dwar kif is-sħubijiet pubbliċi-privati bejn l-Istati Membri u l-intrapriżi jistgħu jiffinanzjaw it-taħriġ, it-tiġdid u t-titjib tal-ħiliet tal-ħaddiema, b’mod partikolari d-dritt għat-taħriġ għal ħaddiema individwali;

22.Jenfasizza li l-ġustizzja interġenerazzjonali trid issir komponent strutturali tas-Semestru Ewropew; jistieden lill-Kummissjoni, bħala parti mill-istrateġija tagħha ta’ ġustizzja interġenerazzjonali, tintegra indikaturi dwar il-benesseri fiż-żgħożija u fix-xjuħija, l-aċċess għal impjiegi ta’ kwalità, l-affordabbiltà tal-akkomodazzjoni, id-disponibbiltà, l-aċċessibbiltà fiżika, l-adegwatezza tal-introjtu minimu u l-pensjonijiet, l-aċċess għal servizzi tas-saħħa mentali ta’ kwalità, u l-edukazzjoni u l-ħiliet ta’ kwalità għolja fil-qafas ta’ valutazzjoni tas-Semestru Ewropew, u tevalwa l-impatti fit-tul u distributtivi tar-rakkomandazzjonijiet fiskali u ta’ riforma; jistieden lill-Kummissjoni tivvaluta l-impatti ekonomiċi, ambjentali u soċjali fit-tul tar-rakkomandazzjonijiet ta’ politika, inkluż is-sottoinvestiment, fuq il-ġenerazzjonijiet futuri; Jisħaq li jeħtieġ li l-impatt tat-trasformazzjoni demografika u ż-żieda fil-lonġevità jiġi integrat fis-Semestru Ewropew; jisħaq li t-tibdil demografiku jirrikjedi politiki biex tiżdied il-parteċipazzjoni tal-forza tax-xogħol; jenfasizza l-ħtieġa ta’ miżuri li jappoġġjaw it-tixjiħ attiv u jiżguraw is-sostenibbiltà fit-tul tas-sistemi tal-pensjonijiet u tal-kura; iqis li r-rakkomandazzjonijiet speċifiċi għall-pajjiż għandhom jippromwovu pensjonijiet li jiżguraw ħajja ta’ dinjità, benesseri u aċċess għal kura tas-saħħa ta’ kwalità u affordabbli, u servizzi ta’ prevenzjoni għal kulħadd;

23.Jisħaq li, fil-qafas tas-Semestru Ewropew, l-infiq għad-difiża jrid jiġi ppjanat b’mod ikkoordinat, effiċjenti, trasparenti u Ewropew biex jiġu massimizzati l-benefiċċji għas-soċjetà; jissottolinja li l-investiment relatat mas-sigurtà għandu jinkludi r-reżiljenza tas-soċjetà, inkluża l-infrastruttura b’benefiċċji kbar għall-popolazzjoni ċivili, il-protezzjoni soċjali, l-edukazzjoni ċivika, ir-reżiljenza demokratika u l-protezzjoni kontra d-diżinformazzjoni, filwaqt li jiġi rikonoxxut li l-istabbiltà soċjali u l-fiduċja demokratika huma karatteristiċi importanti tal-arkitettura tas-sigurtà tal-Ewropa u jridu jiġu riflessi fl-analiżi tas-Semestru ta’ ħtiġijiet fit-tul ta’ riforma u investiment;

24.Jissottolinja li r-rakkomandazzjonijiet tas-Semestru Ewropew fl-2026 se jkunu kruċjali biex isawru l-qafas finanzjarju pluriennali li jmiss; jemmen li r-riformi u l-investimenti għandhom jintgħażlu għall-effiċjenza u għall-effettività tagħhom biex jindirizzaw ir-rakkomandazzjonijiet speċifiċi għall-pajjiż rilevanti; iwissi li jekk il-finanzjament tal-UE għandu jkun marbut mal-gwida tas-Semestru, dik il-gwida trid tkun soċjalment ibbilanċjata f’allinjament sħiħ mal-EPSR, u l-atturi reġjonali u lokali jeħtiġilhom ikollhom rwol importanti fl-iżborż tal-fondi; jinnota bi tħassib, f’dan ir-rigward, il-proposta tal-Kummissjoni għall-infiq soċjali, li tirriskja li tnaqqas l-enfasi fuq l-objettivi tal-impjiegi u dawk soċjali, u jappella għal FSE+ awtonomu u rinfurzat b’konċentrazzjonijiet tematiċi;

25.Iqis li l-mudell soċjali tal-UE huwa parti integrali mill-kompetittività tagħha u li l-isforzi biex jiġu ssimplifikati l-piżijiet amministrattivi jeħtieġ li jippreservaw u jiżguraw id-drittijiet soċjali; jenfasizza li l-kwalità tal-impjieg u l-kompetittività mingħajr kost, bħall-kwalità tal-prodotti u tas-servizzi, jistgħu ukoll jappoġġjaw ukoll it-tkabbir tal-produttività u tal-paga; jenfasizza l-importanza li jiġu pprovduti aktar ċarezza, proporzjonalità u ċertezza legali, b’mod partikolari għall-intrapriżi żgħar u ta’ daqs medju u l-professjonisti li jaħdmu għal rashom, u jenfasizza li tali approċċi għandhom jirrispettaw id-diversità tal-mudelli tas-suq tax-xogħol madwar l-Istati Membri, filwaqt li jappoġġjaw l-attività ekonomika sostenibbli u l-ħolqien ta’ impjiegi ta’ kwalità;

26.Jappoġġja proċess tas-Semestru Ewropew aktar demokratiku, li fih il-Parlament ikun involut bis-saħħa biex jiġu stabbiliti prijoritajiet ekonomiċi u soċjali u biex jittieħdu deċiżjonijiet dwar il-governanza ekonomika; jinsisti li l-formulazzjoni, il-monitoraġġ u s-segwitu tar-riformi nazzjonali jridu jinvolvu b’mod sistematiku lis-sħab soċjali, lill-organizzazzjonijiet tas-soċjetà ċivili, u lill-atturi reġjonali u lokali, bi żmien u trasparenza adegwati; iħeġġeġ lill-Kummissjoni u lill-Istati Membri jiżguraw l-involviment xieraq tagħhom fl-istadji kollha tal-analiżi, inkluż fi ħdan il-qafas ta’ konverġenza soċjali, sabiex tissaħħaħ is-sjieda u jiġi żgurat li d-drittijiet soċjali tal-UE jkunu realtà fil-prattika; jenfasizza li r-rispett għall-prinċipju tas-sussidjarjetà u tal-kompetenza nazzjonali jibqa’ ċentrali għas-Semestru Ewropew; ifakkar fil-ħtieġa li l-Kummissjoni tiżgura li s-Semestru Ewropew u l-qafas ta’ governanza ekonomika tal-UE jivvalutaw l-impatt tar-riformi rakkomandati dwar l-ugwaljanza bejn il-ġeneri u l-integrazzjoni tan-nisa fis-suq tax-xogħol, u li l-Kummissjoni tippromwovi l-investiment f’servizzi pubbliċi u infrastruttura tal-kura ta’ kwalità;

27.Jiġbed l-attenzjoni għan-nuqqas ta’ metodoloġija trasparenti għall-formulazzjoni ta’ rakkomandazzjonijiet speċifiċi għall-pajjiż u għan-nuqqas ta’ ċarezza dwar il-kriterji użati għall-għażla tagħhom; iwissi li dan jimmina l-obbligu ta’ rendikont u jirriskja trattament mhux ugwali tal-Istati Membri; jistieden lill-Kummissjoni tiżgura trasparenza sħiħa dwar il-proċeduri u t-teħid ta’ deċiżjonijiet interni, inklużi d-direttorati ġenerali involuti, u ssaħħaħ l-obbligu ta’ rendikont u l-kondiviżjoni tal-informazzjoni mal-Parlament; huwa mħasseb li l-konformità mar-rakkomandazzjonijiet speċifiċi għall-pajjiż għadu baxx b’mod persistenti; jistieden lill-Istati Membri jindirizzaw aħjar ir-rakkomandazzjonijiet fl-oqsma tal-politiki dwar l-impjiegi u dawk soċjali; jistieden lill-Kummissjoni tirrinforza d-djalogu tagħha mal-Istati Membri dwar l-implimentazzjoni tar-rakkomandazzjonijiet eżistenti u l-Linji Gwida dwar l-Impjiegi, inkluż is-segwitu dwar l-azzjonijiet ta’ politika attwali u ppjanati;

28.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.