A.de bhrí, i gcomhthéacs geopholaitiúil ina bhfuil méadú ar iomaíocht mhór cumhachta, ar luaineacht pholaitiúil, slabhraí soláthair domhanda ilroinnte, caomhnaitheacht atá ag dul i méid, úsáid na trádála mar arm, ar leochaileachtaí sa tslándáil eacnamaíoch agus ar dhlús an athraithe aeráide, nach mór do AE an comhar le comhpháirtithe atá ar aon intinn leis amhail Ceanada a dhoimhniú; de bhrí go bhfuil leas comhroinnte agus méadaithe ag AE agus Ceanada a gcomhar a dhoimhniú, a naisc eacnamaíocha a neartú agus an t-ord idirnáisiúnta riailbhunaithe a chaomhnú, agus comhsheasaimh acu maidir le beagnach gach réigiún den domhan; de bhrí go bhfuil an tAontas fós ina chomhghuaillí iontaofa agus dílis de Cheanada;

B.de bhrí gur comhpháirtithe straitéiseacha iad an tAontas agus Ceanada atá aontaithe ina dtuairim go bhfuil an daonlathas, an smacht reachta, cearta an duine agus comhar iltaobhach, go háirithe i réimsí na slándála agus na trádála, tairbheach do shochaithe Cheanada agus do shochaithe na hEorpa agus don chomhphobal idirnáisiúnta agus gur cheart, dá bhrí sin, go ndéanfadh comhghuaillíochtaí domhanda comhpháirtithe atá ar aon intinn leo iad a chosaint;

C.de bhrí go bhfuil an chomhpháirtíocht idir AE agus Ceanada lárnach anois maidir leis an iltaobhachas agus an daonlathas a chosaint agus a chaomhnú ar fud an domhain tráth a bhfuil na prionsabail agus na héachtaí seanbhunaithe sin faoi bhagairt leanúnach agus mhéadaitheach; de bhrí go bhfuil Ceanada agus Ballstáit uile AE ina bpáirtithe sa Chonradh maidir le Neamhleathadh Arm Núicléach;

D.de bhrí go raibh comhar seanbhunaithe ann idir AE agus Ceanada san Eagraíocht Dhomhanda Trádála (EDT), chomh maith le tiomantas oibriú le chéile chun an córas trádála idirnáisiúnta riailbhunaithe a chobhsú agus a neartú, ar córas é atá faoi bhagairt faoi láthair, chun EDT a nuachóiriú agus a chóras um réiteach díospóidí a athbheochan, lena n-áirítear tríd an gComhshocrú maidir le hEadráin Eatramhach Achomhairc;

E.de bhrí go bhfuil comhar éifeachtach idir an tAontas agus Ceanada atá bunaithe ar cheannaireacht agus freagracht chomhpháirteach ríthábhachtach chun dul i ngleic le dúshláin dhomhanda, amhail cogadh na Rúise i gcoinne na hÚcráine, cogaíocht hibrideach na Rúise i gcoinne sochaithe daonlathacha, iomaíocht gheopholaitiúil san Artach, gníomhaíochtaí na Síne atá ag éirí níos teanntásaí agus comhéigean eacnamaíoch na Síne lasmuigh de na creataí atá bunaithe go hidirnáisiúnta, luaineacht mhéadaithe i mbeartas eachtrach na Stát Aontaithe, an t-athrú aeráide agus an staid sa Mheánoirthear;

F.de bhrí go bhfuil comhar idir an tAontas agus Ceanada laistigh de na creataí atá ann cheana bunriachtanach chun rathúnas a chaomhnú agus a fheabhsú don dá pháirtí; de bhrí go n-áirítear ar shamplaí den chomhar bunriachtanach sin trádáil agus comhar eacnamaíoch, agus uaillmhianta comhpháirteacha chun aghaidh a thabhairt ar dhúshláin amhail an t-aistriú glas agus an t-aistriú digiteach, an intleacht shaorga (IS) agus teicneolaíochtaí eile atá ag teacht chun cinn, an tslándáil, lena n-áirítear comhar míleata, an fhrithsceimhlitheoireacht agus an choireacht eagraithe a chomhrac, agus bonneagar, fuinneamh, sláinte agus slándáil bia;

G.de bhrí, an 1 Nollaig 2025, gur éirigh le Ceanada agus leis an Aontas caibidlíocht a thabhairt i gcrích maidir le comhaontú le haghaidh rannpháirtíocht Cheanada sa chlár um Ghníomhaíocht Slándála don Eoraip (SAFE), agus ar an gcaoi sin tógáil ar a gComhpháirtíocht Slándála agus Chosanta a síníodh ag an gCruinniú Mullaigh idir an tAontas agus Ceanada i mí an Mheithimh 2025;

H.de bhrí go meastar go bhfuil tionchar dearfach ag CETA, rud a mhéadaíonn go suntasach an trádáil in earraí agus seirbhísí idir an tAontas agus Ceanada faoi thart ar 63 % agus EUR 75.6 billiún, rud a chuireann deireadh le 99 % de na línte taraife agus go bhfuil tionchar dearfach díreach aige ar fhiontair bheaga agus mheánmhéide (FBManna) san Aontas agus i gCeanada araon, agus go bhfuil méadú tagtha ar líon na FBManna atá i mbun trádáil dhéthaobhach; de bhrí nár fíoraíodh an imní a bhí ann ar dtús go bplúchfadh mairteoil ó Cheanada margadh na hEorpa, agus nach raibh ach thart ar 2 % den chuóta bliantúil le haghaidh mairteola a bunaíodh faoi CETA á úsáid in 2023;

I.de bhrí go bhfuil dúshláin fós ann i bhforfheidhmiú CETA i réimsí áirithe, amhail comhar rialála, an chaibidil maidir le trádáil agus forbairt inbhuanaithe, agus rochtain thrédhearcach ar shonraí soláthair iomlána An Coimisiún Eorpach: Ard-Stiúrthóireacht um an Trádáil agus Slándáil Eacnamaíoch et al., ‘Study in support of an ex-post evaluation of the Comprehensive Economic and Trade Agreement (CETA) between the EU and its Member States and Canada – Final report – Annexes’ [Staidéar chun tacú le meastóireacht ex-post ar an gComhaontú Cuimsitheach Eacnamaíoch agus Trádála (CETA) idir an tAontas Eorpach agus a Bhallstáit agus Ceanada – Tuarascáil chríochnaitheach – Iarscríbhinní], Oifig Foilseachán an Aontais Eorpaigh, 2025, https://data.europa.eu/doi/10.2781/9705637.;

J.de bhrí go bhfuil na caibidlí maidir le ríomhthráchtáil, trádáil agus forbairt inbhuanaithe agus an fhoráil maidir le cosaint infheisteoirí in CETA as dáta agus nach léiríonn siad beartas reatha an Choimisiúin; de bhrí go bhfuil tograí curtha ar aghaidh ag Rialtas Cheanada chun feabhas a chur ar in-fhorfheidhmitheacht fhorálacha trádála agus forbartha inbhuanaithe CETA;

K.de bhrí go bhforáiltear le CETA do chreat le haghaidh aitheantas frithpháirteach do cháilíochtaí i ngairmeacha rialáilte amhail ailtireacht, cuntasaíocht agus innealtóireacht;

L.de bhrí go bhfuil eolas traidisiúnta ag pobail dhúchasacha i gCeanada nach féidir é a athsholáthar, go ngníomhaíonn siad mar phríomh-mhaoir éiceachóras agus go ndéanann an t-athrú aeráide, an t-imeallú socheacnamaíoch agus díghrádú comhshaoil difear díréireach dóibh cheana féin; de bhrí gur fhormhuinigh Ceanada agus an tAontas araon Dearbhú na Náisiún Aontaithe maidir le Cearta na bPobal Dúchasach, lena n-áirítear gealltanas dul i gcomhairle agus comhoibriú de mheon macánta le pobail dhúchasacha chun a saorthoiliú feasach roimh ré a fháil sula bhformheasfar aon tionscadal a dhéanann difear dá dtailte, dá gcríocha nó dá n-acmhainní;

M.de bhrí go bhfuil sé cruthaithe go bhfuil Ceanada, trína thiomantas do thacaíocht fhadtéarmach a sholáthar don Úcráin agus trína cheannaireacht láidir le linn a Uachtaránachta ar G7, ina chomhpháirtí straitéiseach don Aontas agus ina chomhghuaillí iontaofa de ECAT;

N.de bhrí nach mór leas a bhaint as acmhainneacht iomlán na n-ionstraimí atá ann cheana maidir le comhar idir an tAontas agus Ceanada agus an chomhpháirtíocht idir an tAontas agus Ceanada a fheabhsú go láidir chun gur féidir leis an Aontas agus Ceanada seasamh go daingean i gcoinne chogadh na Rúise i gcoinne na hÚcráine, athbhreithniúchas na ngníomhaithe geopholaitiúla, géarú na bhfeachtas cogaíochta hibridí i gcoinne sochaithe daonlathacha, an athraithe aeráide, agus na ndúshlán don ord trádála domhanda;