1.Itenni l-impenn sħiħ tiegħu għall-valur dejjiemi tal-multilateraliżmu u jissottolinja li sistema multilaterali modernizzata li tirregola l-kummerċ hija essenzjali; jitlob aġenda kummerċjali bbażata fuq kummerċ miftuħ, ġust u bbażat fuq ir-regoli għall-ġid ta’ kulħadd, li tikkontribwixxi għal żvilupp ekonomiku sostenibbli, u b’hekk jissaħħu l-paċi u s-sigurtà; jenfasizza l-fatt li d-WTO għandha tippromwovi t-twettiq tad-drittijiet soċjali u ambjentali, fosthom l-SDGs, kif ukoll għandha tiżgura l-applikazzjoni universali tar-regoli armonizzati maqbula fil-livell multilaterali;

2.Iħeġġeġ lill-membri kollha tad-WTO jimpenjaw ruħhom favur eżitu pożittiv tal-KM14, fid-dawl tat-theddida eżistenzjali li għandha quddiemha s-sistema kummerċjali multilaterali; jemmen li l-KM14 għandha ssir il-punt tat-tluq biex titmexxa ’l quddiem u tiġi modernizzata d-WTO bil-għan li jiġi żgurat li tkun tista’ tiżvolġi rwol biex tindirizza l-isfidi tas-seklu 21; jistieden lid-WTO tipproċedi lejn il-konvokazzjoni ta’ konferenzi ministerjali annwali, minflok iċ-ċiklu biennali attwali, b’tali mod li ssaħħaħ it-tmexxija politika, l-obbligu ta’ rendikont u l-kapaċità tagħha li tirrispondi għall-isfidi kummerċjali dinjin f’waqthom;

3.Jistieden lill-membri tad-WTO jadottaw pakkett komprensiv ta’ rieżami tal-funzjonijiet ta’ monitoraġġ, negozjar, deliberazzjoni u soluzzjoni tat-tilwim tad-WTO; jappoġġja bis-sħiħ il-proċess ta’ modernizzazzjoni tad-WTO mmexxi minn faċilitatur u l-aġenda relatata tagħha għall-KM14 dwar modernizzazzjoni komprensiva, u jaqbel mat-tliet perkorsi proposti mill-faċilitatur, jiġifieri governanza, ekwità (kundizzjonijiet ekwivalenti ta’ kompetizzjoni u kummerċ ibbilanċjat) u “kwistjonijiet ta’ żmienna”; jitlob li matul il-KM14 jiġi approvat pjan direzzjonali ċar għar-riforma, bil-għan li jiġi żgurat li jintlaħaq qbil fuq il-modernizzazzjoni matul il-15-il Konferenza Ministerjali;

4.Jissottolinja li l-prevedibbiltà tibqa’ l-pedament tas-sistema kummerċjali multilaterali u li d-dixxiplini ewlenin tad-WTO, inklużi dawk dwar il-valutazzjoni doganali, il-miżuri sanitarji u fitosanitarji, l-ostakli tekniċi għall-kummerċ, il-faċilitazzjoni tal-kummerċ u l-proprjetà intellettwali, ikomplu jipprovdu ċertezza legali essenzjali għall-gvernijiet u għan-negozji madwar id-dinja kollha;

5.Jemmen li l-prattika, fit-teħid ta’ deċiżjonijiet bejn il-166 membru tad-WTO, li ftehim b’konsensus jitqies ekwivalenti għal unanimità, wassal għal paraliżi; jinsisti fuq il-fatt li d-WTO teħtieġ titgħallem minn organizzazzjonijiet internazzjonali oħra u tintroduċi approċċi differenti fit-teħid ta’ deċiżjonijiet, kif ukoll teħtieġ tiġġenera konverżazzjoni kostruttiva dwar il-prattika tal-konsensus u tagħmel distinzjoni bejnha u bejn l-unanimità; jisħaq li d-WTO għandha teżamina l-possibbiltà li tadotta proċess ta’ teħid ta’ deċiżjonijiet aktar effettiv u flessibbli, inkluża l-implimentazzjoni tal-kunċett ta’ “kunsens responsabbli”, skont liema l-membri jkunu mħeġġa jeżerċitaw is-setgħa tal-veto meta jkun neċessarju biss u jagħtu ġustifikazzjoni ċara, u b’hekk jitrawmu l-obbligu ta’ rendikont u l-parteċipazzjoni kostruttiva; jisħaq, barra minn hekk, li d-WTO għandha teżamina l-possibbiltà li twaqqaf organu ta’ ġestjoni jew eżekuttiv bi rwol speċifiku biex jistabbilixxi l-aġenda jew iwettaq funzjonijiet ta’ superviżjoni, b’mod analogu għall-bordijiet eżekuttivi tal-Fond Monetarju Internazzjonali u tal-Bank Dinji;

6.Iħeġġeġ l-avvanz tan-negozjati dwar il-ftehimiet multilaterali, filwaqt li jisħaq fuq il-bżonn li jinħoloq perkors aktar faċli biex il-ftehimiet plurilaterali jiġu integrati fl-arkitettura multilaterali bil-għan li jiġi żgurat progress f’oqsma li mhumiex maturi biżżejjed għall-membri kollha; jissottolinja li l-inizjattivi plurilaterali miftuħa għandhom jippermettu l-parteċipazzjoni ta’ kull membru li jixtieq jagħmel dan; itenni, għaldaqstant, l-appell tiegħu lill-membri tad-WTO biex jirriflettu dwar mod kif tiġi żviluppata sistema ġdida, fejn membru wieħed jew grupp ta’ membri li ma jipparteċipawx ma jkunux jistgħu jimblukkaw kooperazzjoni aktar mill-qrib dwar inizjattiva plurilaterali, speċjalment meta din il-kooperazzjoni tkun ibbażata fuq l-MFN, u l-benefiċċji tagħha għalhekk japplikaw għall-membri kollha b’mod ġenerali, u abbażi ta’ dan jiġi stabbilit mekkaniżmu sempliċi li jippermetti li l-ftehimiet li jirriżultaw jiġu inkorporati fl-istruttura tad-WTO;

7.Jiddispjaċih biż-żieda tal-politiki kummerċjali protezzjonisti fid-dinja kollha u bid-deċiżjoni tal-Istati Uniti li jimponu dazji addizzjonali fuq l-importazzjonijiet minn sħab kummerċjali, inkluża l-UE, u jitilqu mill-prinċipju tal-MFN mingħajr ebda ġustifikazzjoni; jistieden lill-Istati Uniti jinvolvu ruħhom b’mod kostruttiv mal-membri tad-WTO biex isaħħu aktar milli jimminaw is-sistema kummerċjali multilaterali, u b’hekk juru tmexxija globali, u jagħtu eżiti konkreti fil-KM14; jilqa’ l-fatt li l-Istati Uniti ħatru Ambaxxatur għad-WTO;

8.Jafferma mill-ġdid li l-prinċipju tal-MFN jikkostitwixxi pedament tas-sistema kummerċjali multilaterali; jissottolinja r-rwol ċentrali tiegħu biex jiżgura n-nondiskriminazzjoni, il-prevedibbiltà u l-ġustizzja fil-kummerċ internazzjonali; jisħaq li kwalunkwe modernizzazzjoni tad-WTO għandha sseħħ billi tinbidel is-sistema aktar milli permezz ta’ diżrispett lejha;

9.Jirrikonoxxi l-ambizzjonijiet tal-Indja li tindirizza l-kwistjoni li ilha preżenti tal-ħżin pubbliku għal finijiet ta’ sigurtà tal-ikel, iżda jiddispjaċih li l-Indja mhijiex allinjata mal-pożizzjonijiet tal-UE dwar il-moratorju fuq il-kummerċ elettroniku, in-negozjati dwar is-sussidji għas-sajd u l-progress ġenerali fil-qasam tan-negozjati plurilaterali; jistieden lill-Indja tippermetti lil membri oħra tad-WTO jagħmlu progress f’dawn il-kwistjonijiet kollha; jiddispjaċih, barra minn hekk, dwar il-fatt li l-Indja opponiet l-estensjoni tal-mandat tad-WTO għal kwistjonijiet ġodda relatati mal-klima, max-xogħol u mal-ġeneru; jistieden lill-Kummissjoni tindirizza wkoll dawn il-kwistjonijiet fil-ftehim kummerċjali bejn l-UE u l-Indja li ġie konkluż dan l-aħħar;

10.Jieħu nota tad-deċiżjoni taċ-Ċina li tirrinunzja għall-vantaġġi marbuta mat-trattament speċjali u differenzjat tad-WTO fil-ftehimiet futuri tad-WTO, kif diġà għamlu membri kbar oħrajn li qed jiżviluppaw; jistieden liċ-Ċina tiżgura li dan l-impenn jiġi rifless retroattivament fl-implimentazzjoni tal-ftehimiet fis-seħħ tad-WTO;

11.Ifakkar li l-użu estensiv miċ-Ċina ta’ intrapriżi statali, ta’ sussidji mhux trasparenti u ta’ politiki industrijali statali qed ikompli joħloq kapaċitajiet żejda u distorsjonijiet sinifikanti fil-kummerċ dinji; jiddeplora l-fatt li ċ-Ċina tuża l-kummerċ u d-dipendenzi bħala arma u li s-sistema tagħha ta’ kontrolli tal-esportazzjoni ma għandhomx ġustifikazzjonijiet ta’ użu doppju; jistieden liċ-Ċina tagħmel l-impenji tagħha tad-WTO konsistenti mal-piż ekonomiku tagħha u taħdem biex toħloq kundizzjonijiet ekwivalenti ta’ kompetizzjoni, tindirizza dawn il-kwistjonijiet u tgħin biex titwettaq il-modernizzazzjoni tad-WTO;

12.Jissottolinja l-bżonn ta’ kollaborazzjoni saħansitra aktar mill-qrib bejn is-sħab tal-istess fehma u li jimpenjaw ruħhom biex jiddefendu u jsaħħu l-ordni kummerċjali multilaterali bbażat fuq ir-regoli, imsejjes fuq id-WTO; jinsisti biex, f’dan il-kuntest diffiċli, l-UE tkompli tkun impenjata biex tkun sieħba affidabbli u tappoġġja l-kummerċ ibbażat fuq ir-regoli;

13.Jistieden lill-membri tad-WTO jerġgħu jistabbilixxu sistema għas-soluzzjoni tat-tilwim li tiffunzjona bis-sħiħ, indipendenti, vinkolanti u fuq żewġ livelli bħala pilastru indispensabbli ta’ prevedibbiltà, filwaqt li jiżguraw li r-regoli jiġu infurzati permezz tal-liġi aktar milli permezz ta’ azzjoni unilaterali, irrispettivament mid-daqs jew mis-setgħa ekonomika tal-membri;

14.Jilqa’ l-fatt li 58 membru tad-WTO (li jirrappreżentaw kważi 60 % tal-kummerċ dinji) daħlu fl-Arranġament Proviżorju ta’ Arbitraġġ tal-Appell bejn Bosta Partijiet (MPIA), bħala miżura temporanja sakemm ma terġa’ tkun totalment operattiva sistema ta’ soluzzjoni tat-tilwim tad-WTO; jistieden lill-membri l-oħra jidħlu fl-MPIA biex juru l-impenn tagħhom favur sistema ġusta u funzjonanti ta’ soluzzjoni tat-tilwim; jisħaq li l-MPIA hija soluzzjoni temporanja u volontarja u ma tridx issir sostitut permanenti għal mekkaniżmu multilaterali tal-appell applikabbli għall-membri kollha tad-WTO;

15.Jinsisti fuq il-fatt li l-ekwità hija l-bażi ta’ sistema dejjiema u kredibbli; jinnota li l-interventi statali distorsivi attwali, inklużi s-sussidji industrijali fuq skala kbira u l-prattiki mhux tas-suq, li wasslu għal tensjonijiet fost il-membri u rriżultaw f’kompetizzjonijiet ta’ sussidji li swew il-flus, urew li r-regoli attwali fil-qasam tas-sussidji ma kinux ġew adattati għaċ-ċirkostanzi li qed jinbidlu tal-kummerċ dinji; jinsisti li r-riforma tar-regoli tad-WTO dwar is-sussidji industrijali u l-interventi statali jridu jkunu bbażati fuq tliet pilastri komplementari: rekwiżiti mtejba ta’ trasparenza u notifika, dixxiplini msaħħa u ċċarati, u rimedji aktar effettivi biex jiġu indirizzati l-effetti kollaterali negattivi u l-kapaċità żejda; jitlob li dawn it-temi jiġu indirizzati bħala element ċentrali tal-modernizzazzjoni tad-WTO, fuq l-istess livell ma’ temi oħra dwar il-modernizzazzjoni; jesprimi appoġġ għall-proċess ta’ deliberazzjonijiet informali bħala mezz biex jiżdied il-fehim kondiviż bejn il-membri tad-WTO u biex iwitti t-triq għat-tfassil tar-regoli;

16.Jissottolinja li r-regoli tad-WTO u d-dixxiplini futuri jridu jkunu kompatibbli mal-objettivi tal-Ftehim ta’ Pariġi u ma’ ftehimiet ambjentali multilaterali rilevanti oħrajn u jappoġġjaw it-tranżizzjoni lejn ekonomiji newtrali għall-klima, u jindirizzaw ukoll b’mod effettiv l-effetti kollaterali negattivi bħall-kapaċità żejda u l-ktajjen tal-provvista intensivi fil-karbonju, filwaqt li jevitaw restrizzjonijiet kummerċjali mhux ġustifikati;

17.Jilqa’ d-dħul fis-seħħ, f’Settembru 2025, tal-ewwel Ftehim dwar is-Sussidji għas-Sajd; jisħaq fuq l-importanza kruċjali li jintlaħaq ukoll ftehim malajr dwar id-dixxiplini relatati mas-sussidji għas-sajd li jikkontribwixxu għall-kapaċità żejda u għas-sajd eċċessiv, u dan jirrappreżenta aktar min-nofs tas-sussidji kollha għas-sajd, bil-għan li jiġi evitat it-tnaqqis tar-riżorsi bijoloġiċi tal-baħar u jitħalla li ssir ġestjoni sostenibbli tagħhom, filwaqt li jiġi rispettat il-bżonn ta’ trattament speċjali u differenzjat f’konformità mal-mira 14.6 tal-SDG;

18.Jisħaq fuq il-bżonn li tissaħħaħ u tiġi integrata d-dimensjoni tal-iżvilupp fid-WTO, inkluż permezz tal-proċess ta’ modernizzazzjoni tad-WTO, billi tiġi rikonoxxuta d-diversità tas-sitwazzjonijiet ekonomiċi tal-pajjiżi li qed jiżviluppaw u jiġi evitat li d-dispożizzjonijiet ta’ trattament speċjali u differenzjat japplikaw skont approċċ ta’ “kulħadd f’keffa waħda” u li dawn id-dispożizzjonijiet ikunu aktar dettaljati, aktar ibbażati fuq l-evidenza u fuq il-bżonnijiet, ikunu soġġetti għal rieżami regolari, jinkludu mekkaniżmi ta’ gradwazzjoni ċari, sabiex ikunu jistgħu jilħqu aħjar il-bżonnijiet tal-pajjiżi li qed jiżviluppaw, inklużi l-pajjiżi l-anqas żviluppati; jissottolinja, barra minn hekk, li l-awtodeżinjazzjoni tal-membri tal-istatus ta’ żvilupp tagħhom ma tistax tibqa’ l-uniku kriterju għal trattament speċjali u differenzjali, u jitlob kriterji oġġettivi, trasparenti u rieżaminati regolarment, filwaqt li tiġi żgurata flessibbiltà adegwata għall-ifqar pajjiżi u għal dawk l-aktar vulnerabbli;

19.Jilqa’ l-konklużjoni tan-negozjati dwar il-Ftehim dwar il-Faċilitazzjoni tal-Investiment għall-Iżvilupp sabiex jinħoloq kuntest aktar ġust, aktar trasparenti, aktar effiċjenti u aktar prevedibbli għall-faċilitazzjoni tal-investiment transfruntier u għall-parteċipazzjoni tal-pajjiżi li qed jiżviluppaw fil-flussi ta’ investiment fid-dinja; jilqa’ l-appoġġ ta’ 128 membru (minn 166), inklużi 91 ekonomija li qed tiżviluppa (fosthom 27 pajjiż l-anqas żviluppat), u jħeġġeġ lill-membri li fadal ineħħu l-oppożizzjoni tagħhom u jinkorporaw dan il-ftehim fil-ġabra tar-regoli tad-WTO fl-Anness 4 relatat mal-Ftehimiet Kummerċjali Plurilaterali;

20.Jisħaq fuq il-bżonn li jsir progress fin-negozjati dwar l-agrikoltura sabiex jinkisbu eżiti kredibbli dwar kwistjonijiet bħall-ħżin pubbliku għal finijiet ta’ sigurtà tal-ikel, l-appoġġ intern, l-aċċess għas-suq, il-qoton, ir-restrizzjonijiet fuq l-esportazzjoni u l-kompetizzjoni fl-esportazzjoni, kif ukoll it-tisħiħ tas-settur agrikolu biex jirrispondi għall-isfidi kontemporanji, inklużi l-mezzi ta’ sussistenza rurali u s-sostenibbiltà ambjentali; jissottolinja li d-diskussjonijiet ma għandhomx jiffukaw biss fuq it-tnaqqis tal-appoġġ intern b’effetti distorsivi tal-kummerċ, iżda wkoll fuq l-integrazzjoni, fid-diskussjonijiet dwar l-agrikoltura, tal-isfidi rilevanti fid-dinja, fosthom is-sigurtà tal-ikel u s-sostenibbiltà;

21.Jistieden lill-membri tad-WTO jġeddu, waqt il-KM14, il-Programm ta’ Ħidma dwar il-Kummerċ Elettroniku kif ukoll il-moratorju dwar id-dazji doganali fuq it-trażmissjonijiet elettroniċi; iqis li t-tiftix ta’ soluzzjoni permanenti għan-nonimpożizzjoni ta’ dazji doganali fuq it-trażmissjonijiet elettroniċi huwa essenzjali għan-negozji madwar id-dinja kollha, anki għal dawk fil-pajjiżi li qed jiżviluppaw;

22.Jistieden lill-membri tad-WTO jappoġġjaw li l-Ftehim dwar il-Kummerċ Elettroniku jiġi inkorporat fil-qafas tad-WTO bħala kwistjoni ta’ prijorità; jiġbed l-attenzjoni għall-fatt li l-ftehim jistabbilixxi l-ewwel regoli fid-dinja fil-qasam tal-kummerċ diġitali, u joħloq qafas ġust, prevedibbli u trasparenti li minnu jibbenefikaw il-konsumaturi u n-negozji billi jiffaċilita t-tranżazzjonijiet transfruntieri, inaqqas l-ostakli u jippromwovi l-innovazzjoni u l-fiduċja; jenfasizza li l-ftehim huwa maħsub biex minnu jibbenefikaw il-pajjiżi li qed jiżviluppaw u l-pajjiżi l-anqas żviluppati daqstant ukoll l-ekonomiji avvanzati; jilqa’ l-inizjattivi u l-programmi għat-tisħiħ tal-kapaċitajiet previsti mill-ftehim biex jappoġġjaw l-isforzi tal-pajjiżi li qed jiżviluppaw u ta’ dawk l-anqas żviluppati bil-għan li jisfruttaw l-opportunitajiet li joffri l-kummerċ diġitali; itenni l-importanza tal-ftehim għall-appoġġ lill-impriżi mikro, żgħar u ta’ daqs medju; jappoġġja l-isforzi tal-koorganizzaturi biex tinkiseb l-implimentazzjoni fil-pront tal-Ftehim;

23.Jenfasizza l-importanza dejjem akbar tas-sistemi tal-intelliġenza artifiċjali (IA) fil-kummerċ internazzjonali; jappella, f’dan il-kuntest, għal aktar kooperazzjoni internazzjonali dwar ir-regolamenti u l-politiki tal-IA, filwaqt li jiġi rrispettat id-dritt tal-membri tad-WTO li jirregolaw; jissottolinja li d-WTO għandha tikkontribwixxi b’mod sinifikanti biex jiġi żviluppat qafas ta’ governanza robust, sikur, inklużiv u affidabbli tal-IA għall-kummerċ, inkluż billi jiġi stabbilit Grupp ta’ Ħidma ddedikat tad-WTO dwar l-Intelliġenza Artifiċjali biex jiffaċilita d-djalogu, il-kondiviżjoni tal-għarfien u l-kooperazzjoni fost il-membri dwar ir-regolamenti u l-politiki tal-IA;

24.Jistieden lill-Kummissjoni u lill-Kunsill jiżguraw li l-Parlament ikompli jkun involut mill-qrib fit-tħejjija tal-KM14 u jinżamm aġġornat u kkonsultat fil-pront matul il-KM14;

25.Jistieden lill-membri tad-WTO jiżguraw il-leġittimità demokratika u t-trasparenza billi jsaħħu d-dimensjoni parlamentari tad-WTO u tal-Konferenza Parlamentari dwar id-WTO; ifaħħar il-ħidma importanti li għamlet il-Konferenza Parlamentari konġunta tal-Parlament Ewropew u tal-Unjoni Interparlamentari dwar id-WTO; jisħaq fuq il-ħtieġa li jiġi żgurat li l-parlamentari jkollhom aċċess aħjar għan-negozjati kollha relatati mal-kummerċ u jkunu involuti fit-tfassil u fl-implimentazzjoni tad-deċiżjonijiet tad-WTO; iħeġġeġ lill-mexxejja jappoġġjaw narrattiva ġdida dwar il-kummerċ fejn dan jitqies bħala fattur abilitanti, aktar milli bħala ostaklu, bil-għan li jinkisbu s-sostenibblità, is-sigurtà u l-inklużività;

26.Jistieden lill-membri tad-WTO jintensififikaw id-diskussjonijiet mal-partijiet ikkonċernati kollha, inklużi s-soċjetà ċivili, in-negozji u t-trade unions, u jżidu l-kooperazzjoni ma’ organizzazzjonijiet internazzjonali oħra bħall-Kamra Internazzjonali tal-Kummerċ, l-Organizzazzjoni Internazzjonali tax-Xogħol u, fuq livell aktar ġenerali, is-sistema tan-Nazzjonijiet Uniti; jistenna li l-mexxejja jikkomunikaw aktar, u f’kull livell, dwar il-vantaġġi tal-kummerċ ibbażat fuq ir-regoli;

27.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti tal-Istati Membri, lid-Direttur Ġenerali tal-Organizzazzjoni Dinjija tal-Kummerċ u lis-Segretarju Ġenerali tal-Unjoni Interparlamentari.