–wara li kkunsidra t-talba għat-tneħħija tal-immunità ta’ Nikos Pappas, li waslet permezz ta’ ittra bid-data tal-10 ta’ Settembru 2025 mill-Uffiċċju tal-Prosekutur Ġenerali tal-Qorti Suprema tar-Repubblika Ellenika, u li tittrażmetti talba mill-Prosekutur fil-Qorti tal-Prim’ Istanza ta’ Ateni b’rabta mal-proċedimenti kriminali li se jinbdew kontrih u li kienu mħabbra fil-Parlament fis-6 ta’ Ottubru 2025,
–wara li sema’ lil Nikos Pappas fit 28 ta’ Jannar 2026, skont l-Artikolu 9(6) tar-Regoli ta’ Proċedura tiegħu,
–wara li kkunsidra l-Artikoli 8 u 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea kif ukoll l-Artikolu 6(2) tal-Att tal-20 ta’ Settembru 1976 dwar l-elezzjoni tal-Membri tal-Parlament Ewropew b’vot universali dirett,
–wara li kkunsidra s-sentenzi mogħtija mill-Qorti tal-Ġustizzja tal-Unjoni Ewropea fil-21 ta’ Ottubru 2008, fid-19 ta’ Marzu 2010, fis-6 ta’ Settembru 2011, fis-17 ta’ Jannar 2013 u fid-19 ta’ Diċembru 2019 Is-sentenza tal-Qorti tal-Ġustizzja tal-21 ta’ Ottubru 2008, Marra vs De Gregorio u Clemente, C‑200/07 u C-201/07, ECLI:EU:C:2008:579; is-sentenza tal-Qorti Ġenerali tad-19 ta’ Marzu 2010, Gollnisch vs Il-Parlament, T-42/06, ECLI:EU:T:2010:102; is-sentenza tal-Qorti tal-Ġustizzja tas-6 ta’ Settembru 2011, Patriciello, C-163/10, ECLI: EU:C:2011:543; is-sentenza tal-Qorti Ġenerali tas-17 ta’ Jannar 2013, Gollnisch vs Il-Parlament, T-346/11 u T-347/11, ECLI:EU:T:2013:23; is-sentenza tal-Qorti tal-Ġustizzja tad-19 ta’ Diċembru 2019, Junqueras Vies, C-502/19, ECLI:EU:C:2019:1115.,
–wara li kkunsidra l-Artikolu 5(2), l-Artikolu 6(1) u l-Artikolu 9 tar-Regoli ta’ Proċedura tiegħu,
–wara li kkunsidra r-rapport tal-Kumitat għall-Affarijiet Legali (A10-0077/2026),
A.billi, permezz ta’ ittra bid-data tal-10 ta’ Settembru 2025, l-Uffiċċju tal-Prosekutur Ġenerali tal-Qorti Suprema tar-Repubblika Ellenika ttrażmetta talba mill-Prosekutur tal-Qorti tal-Prim’ Istanza ta’ Ateni biex titneħħa l-immunità ta’ Nikos Pappas, Membru tal-Parlament Ewropew elett fir-Repubblika Ellenika, b’rabta ma’ allegati atti ta’ malafama u insult, li jikkostitwixxu reati skont l-Artikolu 361(1) u l-Artikolu 363 tal-Kodiċi Kriminali Grieg – atti kriminali li jwasslu għal reat;
B.billi, skont it-talba, l-ilment jindika li fil-kuntest ta’ intervista għal show online, Nikos Pappas allegatament għamel, quddiem partijiet terzi, dikjarazzjonijiet foloz u malafamanti dwar ġurnalist, u insulta l-unur tiegħu apposta; billi huwa allegat li Nikos Pappas wettaq dawn ir-reati f’Ateni fl-20 ta’ Marzu 2024;
C.billi Nikos Pappas ġie elett fil-Parlament Ewropew fl-elezzjonijiet Ewropej ta’ Ġunju 2024 u ma kienx Membru tal-Parlament Ewropew fiż-żmien tal-allegati reati; billi l-ilment kontrih imur lura għall-10 ta’ Ġunju 2024;
D.billi l-allegat reat u t-talba sussegwenti għat-tneħħija tal-immunità ta’ Nikos Pappas ma jikkostitwux u mhumiex relatati ma’ opinjoni espressa jew ma’ vot mitfugħ minnu fil-qadi ta’ dmirijietu skont it-tifsira tal-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea;
E.billi l-Artikolu 9, l-ewwel paragrafu, il-punt (a), tal-Protokoll Nru 7 dwar il-Privileġġi u l-Immunitajiet tal-Unjoni Ewropea jipprevedi li, waqt is-sessjonijiet tal-Parlament Ewropew, il-Membri tal-Parlament Ewropew għandhom igawdu, fit-territorju tal-Istat tagħhom stess, l-immunitajiet mogħtija lil membri tal-parlament tal-Istat Membru tagħhom;
F.billi, skont l-Artikolu 62 tal-Kostituzzjoni tar-Repubblika Ellenika, l-ebda Membru Parlamentari ma jista’, matul il-mandat tiegħu, jiġi mħarrek, arrestat, inkarċerat jew soġġett għal miżuri oħra li jinvolvu ċ-ċaħda tal-libertà mingħajr l-awtorizzazzjoni tal-Kamra tad-Deputati;
G.billi l-għan tal-immunità prevista fil-Protokoll Nru 7 dwar il-Privileġġi u l-Immunitajiet tal-Unjoni Ewropea huwa li tipproteġi lill-Parlament u lill-Membri tiegħu minn proċedimenti ġudizzjarji fir-rigward ta’ attivitajiet imwettqa fil-qadi tad-dmirijiet parlamentari u li huma inseparabbli minn dawk id-dmirijiet;
H.billi, skont l-Artikolu 5(2) tar-Regoli ta’ Proċedura tiegħu, l-immunità parlamentari mhix privileġġ personali ta’ Membru imma garanzija tal-indipendenza tal-Parlament kollu kemm hu u tal-Membri tiegħu;
I.billi, f’dan il-każ, il-Parlament ma sab l-ebda evidenza ta’ fumus persecutionis, jiġifieri elementi fattwali li jindikaw li l-proċedimenti ġudizzjarji sottostanti inkwistjoni kellhom l-intenzjoni li jimminaw l-attività politika tal-Membru bħala Membru tal-Parlament Ewropew;
J.billi, minn naħa, il-Parlament ma jistax jitqies bħala qorti u, min-naħa l-oħra, il-Membru ma jistax, fil-kuntest ta’ proċedura għat-tneħħija tal-immunità, jitqies bħala “akkużat” Is-sentenza tal-Qorti Ġenerali tat-30 ta’ April 2019, Briois vs Il-Parlament, T-214/18, ECLI:EU:T:2019:266, paragrafu 91.;