1.ag aontú leis an gCoimisiún go bhfuil na coinníollacha a leagtar amach i Rialachán CED agus go háirithe in Airteagal 4(2), pointe (a) de, comhlíonta agus go bhfuil an Bheilg i dteideal EUR 1 916 733 de ranníocaíocht airgeadais a fháil faoin Rialachán sin, arb ionann í agus 85 % den chostas iomlán EUR 2 254 980, a chuimsíonn EUR 2 168 980 de chaiteachas ar sheirbhísí pearsantaithe agus EUR 86 000 de chaiteachas ar ghníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe;

2.á thabhairt dá haire gur chuir údaráis na Beilge an t-iarratas isteach an 23 Meán Fómhair 2025, agus, tar éis faisnéis bhreise a fháil ón mBeilg, gur chuir an Coimisiún bailchríoch ar a mheasúnú an 6 Feabhra 2026 agus gur thug sé fógra do Pharlaimint na hEorpa faoi an 11 Feabhra 2026; á chur i bhfáth a thábhachtaí atá sé an t-am a ghiorrú idir iarratas ar chúnamh CED a thíolacadh agus an cinneadh maoiniúcháin, agus cearta Pharlaimint na hEorpa mar bhrainse amháin den údarás buiséadach á gcosaint go hiomlán ag an am céanna;

3.á thabhairt dá haire go mbaineann an t-iarratas le hoibrithe a bhfuil deireadh tagtha lena ngníomhaíocht in dhá fhiontar de chuid Casa agus gur tairbhithe spriocdhírithe a bheidh iontu go léir;

4.á thabhairt dá haire go raibh deacrachtaí airgeadais ag Casa ar feadh roinnt blianta roimh an dearbhú féimheachta, rud a d’eascair as leitheadúlacht mhéadaitheach na ríomhthráchtála, iomaíocht idirnáisiúnta mhéadaithe agus dálaí iomaíocha éagóracha, rud a d’fhág go raibh ganntanais leachtachta thromchúiseacha ann agus nach raibh sé in ann ceannaitheoirí ionchasacha a shainaithint don chuideachta; á thabhairt chun suntais gur gá feabhas a chur ar chumas na bainistíochta gnó asleaganacha a chosc trí oiriúnú don chomhthéacs geopholaitiúil atá ann faoi láthair agus chun déileáil go réamhghníomhach le mórtheagmhais athstruchtúraithe;

5.á thabhairt dá haire, cé go bhfuil na hionchais fostaíochta is fabhraí ag cúntóirí díolacháin iomarcacha, go mbíonn deacrachtaí níos mó ag oibrithe trádstórais poist nua a fháil agus go dteastaíonn tacaíocht bhreise uathu trí uas-sciliú, athsciliú, athlonnú nó ath-imlonnú; ag iarraidh ar údaráis na Beilge tacaíocht shaincheaptha shonrach a sholáthar chun cabhrú le hoibrithe a n-easnaimh a shárú agus poist nua a aimsiú atá ailínithe le riachtanais mhargadh an tsaothair; ag cur béim ar an bhfíoras go bhfuil ath-imeascadh na n-oibrithe a leagadh as a bpost ríthábhachtach chun geilleagar Eorpach a bheidh slán i bhfad na haimsire agus a mbeidh bonn tionsclaíoch láidir aige a bhaint amach;

6.á chur in iúl gur oth léi go raibh tionchar diúltach ag an méadú ar fhéimheachtaí le dhá bhliain anuas ar an ráta fostaíochta i roinnt réigiún sa Bheilg, go háirithe sa Bhruiséil agus in Olen (Cúige Antuairp); á thabhairt dá haire gur cailleadh thart ar 45 000 post sa Bheilg laistigh de 18 mí mar gheall ar fhéimheachtaí, a tharla den chuid is mó i bhFlóndras; ag leagan béim ar an bhfíoras go bhfuil riosca na dífhostaíochta sa Fhlóndras os cionn dhá oiread níos airde do dhaoine le leibhéal íseal oideachais; á chur i bhfáth a thábhachtaí atá timpeallacht atá fabhrach do ghnólachtaí lena gcuirtear ar chumas d’fhiontair leanúint de bheith iomaíoch, lena gcruthaítear poist agus lena gcuirtear le fás eacnamaíoch inbhuanaithe.

7.á mheabhrú, i gcomhaontú leis na saineolaithe agus na comhpháirtithe sóisialta, gurb iad na bearta seo a leanas atá sna seirbhísí pearsantaithe atá le soláthar do na hoibrithe: seisiúin faisnéise chun treoir a thabhairt maidir le hath-imeascadh sa mhargadh saothair; seirbhísí socrúcháin sheachtraigh chun oibrithe a threorú agus iad ag cuardach poist; idirghabháil ghníomhach lena ndírítear ar phróifíl gach cuardaitheora poist; cláir phearsantaithe le haghaidh forbairt scileanna, lena n-áirítear scileanna TF; oiliúint agus athoiliúint; oiliúint aonair san ionad oibre; rannpháirtíocht ag aonach fostaíochta; ag cur béim ar a thábhachtaí atá sé poist ardcháilíochta atá dírithe ar an todhchaí a chothú lena neartaítear an t-iomaíochas agus lena dtacaítear leis an gclaochlú digiteach, agus a áirithiú ag an am céanna go gcuirfear CED chun feidhme i gceart agus go rannchuideoidh sé le hathléimneacht fhadtéarmach eacnamaíoch agus shóisialta an Aontais; á chur i bhfáth gur cheart do chomhpháirtithe sóisialta a bheith rannpháirteach le linn chur chun feidhme iomlán bhearta CED, lena n-áirítear an chéim faireacháin, chun cáilíocht agus ábharthacht na tacaíochta a thairgtear do thairbhithe a áirithiú;

8.á mheabhrú gur ionstraim dlúthpháirtíochta agus aistrithe chóir é CED agus cé go gcuireann sé tacaíocht ar fáil tar éis caillteanais post, ní féidir leis teacht in ionad beartas tionsclaíoch réamhghníomhach; á mheas gur gá slógadh CED a leabú i bhfreagairt bheartais níos mó ar gach leibhéal polaitiúil chun a áirithiú go bhfaighidh na hoibrithe a ndéantar difear dóibh deiseanna leormhaithe i gcomhréir lena gcáilíochtaí agus lena scileanna; á chur i bhfáth nach mór é a bheith ina phríomhchúram ag an Aontas cosc a chur ar dhúnadh den sórt sin ar an gcéad dul síos, trí na dálaí a chruthú chun táirgeadh tionsclaíoch a choinneáil iomaíoch, agus ag an am céanna infheistíocht a dhéanamh i scileanna d’oibrithe ardcháilithe agus tionsclaíocha araon; á chur i bhfios go láidir gur gá tacaíocht shonrach a sholáthar atá saincheaptha do phróifílí oibrithe a bhfuil leibhéil ísle oideachais acu, agus bearta á nglacadh chun féimheachtaí a laghdú agus aghaidh a thabhairt ar dhifríochtaí sóisialta as a dtagann eisiamh lucht saothair;

9.á chur i bhfáth go n-áiritheoidh údaráis na Beilge infheictheacht an chistithe ón Aontas agus go leagfaidh siad béim ar a bhreisluach trí fhaisnéis éifeachtach agus spriocdhírithe a chur ar fáil do thairbhithe, d’údaráis réigiúnacha agus áitiúla, do chomhpháirtithe sóisialta agus don phobal i gcoitinne;

10.á iarraidh go ndéanfaí meastóireachtaí críochnaitheacha críochnúla ar na bearta a cuireadh chun feidhme, lena n-áirítear faisnéis shoiléir faoin gcaoi ar úsáideadh na cistí, faoi cé chomh rathúil agus a bhí iarrachtaí chun oibrithe a ath-imeascadh sa mhargadh saothair, agus an bhfuil na cuspóirí ar cruthaíodh CED ina leith bainte amach ag na bearta;

11.á thabhairt dá haire gur thosaigh an Bheilg ar sheirbhísí pearsantaithe a sholáthar do na tairbhithe spriocdhírithe an 14 Márta 2025 agus, dá bhrí sin, gurb ón dáta sin go dtí 24 mhí tar éis theacht i bhfeidhm an chinnidh maoiniúcháin a bheidh tréimhse na hincháilitheachta le haghaidh ranníocaíocht airgeadais ó CED;

12.á thabhairt dá haire gur thosaigh an Bheilg ag tabhú caiteachas riaracháin chun CED a chur chun feidhme an 6 Márta 2025 agus, dá bhrí sin, go mbeidh an caiteachas sin incháilithe le haghaidh ranníocaíocht airgeadais ó CED ón dáta sin go dtí 31 mhí tar éis theacht i bhfeidhm an chinnidh maoiniúcháin;

13.á thabhairt dá haire gur thug údaráis na Beilge dearbhú go n-urramófar prionsabail na córa comhionainne agus an neamh-idirdhealaithe sa rochtain ar na gníomhaíochtaí atá beartaithe agus ina gcur chun feidhme, agus go gcoiscfear aon mhaoiniú dúbailte;

14.á athdhearbhú nach ceadmhach cúnamh ó CED a chur in ionad gníomhaíochtaí atá mar fhreagracht ar údaráis phoiblí nó chuideachtaí faoin dlí náisiúnta nó faoi chomhaontuithe comhchoiteanna; á mheabhrú gur sásra teoranta, spriocdhírithe agus comhlántach é CED.

15.ag formheas an chinnidh a ghabhann leis an rún seo;

16.ag treorú dá hUachtarán an cinneadh a shíniú le hUachtarán na Comhairle agus socrú a dhéanamh dá fhoilsiú in Iris Oifigiúil an Aontais Eorpaigh;

17.ag treorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.