1.Jaqbel mal-Kummissjoni li l-kundizzjonijiet stabbiliti fir-Regolament dwar il-FEG u b’mod partikolari fl-Artikolu 4(2)(a) tiegħu huma ssodisfati u li l-Belġju għandu d-dritt għal kontribuzzjoni finanzjarja ta’ EUR 1 916 733 skont dak ir-Regolament, somma li tirrappreżenta 85 % tal-kost totali ta’ EUR 2 254 980, liema kost jinkludi n-nefqa għal servizzi personalizzati ta’ EUR 2 168 980 u n-nefqa għal attivitajiet ta’ tħejjija, ġestjoni, informazzjoni u reklamar, kontroll u rapportar ta’ EUR 86 000;

2.Jinnota li l-awtoritajiet Belġjani ressqu l-applikazzjoni fit-23 ta’ Settembru 2025, u li, wara l-wasla tal-informazzjoni addizzjonali mill-Belġju, il-Kummissjoni ffinalizzat il-valutazzjoni tagħha fis-6 ta’ Frar 2026 u nnotifikatha lill-Parlament fil-11 ta’ Frar 2026; jisħaq fuq l-importanza li jitqassar iż-żmien bejn it-tressiq ta’ applikazzjoni għal assistenza mill-FEG u d-deċiżjoni ta’ finanzjament, filwaqt li jiġu ssalvagwardjati bis-sħiħ id-drittijiet tal-Parlament Ewropew bħala waħda mill-fergħat tal-awtorità baġitarja;

3.Jinnota li l-applikazzjoni hija relatata ma’ ħaddiema li l-attività tagħhom waqfet fiż-żewġ intrapriżi ta’ Casa u li kollha se jkunu benefiċjarji fil-mira;

4.Jieħu nota li l-intrapriżi ta’ Casa esperjenzaw diffikultajiet finanzjarji għal diversi snin qabel ma ddikjaraw falliment, li rriżulta mill-prevalenza dejjem tikber tal-kummerċ elettroniku, kompetizzjoni internazzjonali akbar u kundizzjonijiet kompetittivi inġusti, u li dawn fl-aħħar mill-aħħar irriżultaw f’nuqqas serju ta’ likwidità u l-inabbiltà li jiġu identifikati xerrejja potenzjali għall-kumpanija; jenfasizza l-ħtieġa li tissaħħaħ il-kapaċità tal-maniġment tan-negozji biex jevitaw is-sensji permezz tal-adattament għall-kuntest ġeopolitiku attwali, u biex ilaħħaq b’mod proattiv ma’ avvenimenti kbar ta’ ristrutturar;

5.Jinnota li, filwaqt li l-assistenti tal-bejgħ issensjati għandhom l-aktar prospetti ta’ impjieg favorevoli, il-ħaddiema tal-imħażen jiffaċċjaw diffikultajiet akbar biex jiżguraw pożizzjonijiet ġodda u jirrikjedu appoġġ addizzjonali permezz ta’ titjib tal-ħiliet, taħriġ mill-ġdid, rilokazzjoni, jew riallokazzjoni; jistieden lill-awtoritajiet Belġjani jipprovdu appoġġ speċifiku mfassal apposta biex jgħinu lill-ħaddiema jegħlbu n-nuqqasijiet tagħhom u jsibu impjiegi ġodda allinjati mal-ħtiġijiet tas-suq tax-xogħol; jenfasizza li l-integrazzjoni mill-ġdid tal-ħaddiema ssensjati hija essenzjali għal ekonomija Ewropea valida għall-futur b’bażi industrijali b’saħħitha;

6.Jiddispjaċih li ż-żieda fil-fallimenti matul dawn l-aħħar sentejn kellha impatt negattiv fuq ir-rata ta’ impjieg f’xi reġjuni fil-Belġju, b’mod partikolari fi Brussell u f’Olen (Provinċja ta’ Antwerp); jinnota li ntilfu madwar 45 000 impjieg fil-Belġju fi żmien 18-il xahar minħabba fallimenti, li seħħew l-aktar fir-reġjun tal-Flanders; jenfasizza li, fir-reġjun tal-Flanders, ir-riskju tal-qgħad huwa aktar mid-doppju għall-persuni b’livell baxx ta’ edukazzjoni; jisħaq fuq l-importanza ta’ ambjent favorevoli għan-negozju li jippermetti lill-intrapriżi jibqgħu kompetittivi, joħloq l-impjiegi u jikkontribwixxi għal tkabbir ekonomiku sostenibbli.

7.Ifakkar li, bi qbil mal-esperti u mas-sħab soċjali, is-servizzi personalizzati li se jiġu pprovduti lill-ħaddiema jikkonsistu fil-miżuri li ġejjin: sessjonijiet ta’ informazzjoni għal gwida dwar l-integrazzjoni mill-ġdid fix-xogħol; servizzi ta’ rikollokament biex jiggwidaw lill-ħaddiema jfittxu impjieg għalihom; medjazzjoni attiva li tiffoka fuq il-profil ta’ kull persuna li qed tfittex impjieg; programmi personalizzati għall-iżvilupp tal-ħiliet, inklużi l-ħiliet tal-IT; taħriġ u taħriġ mill-ġdid: taħriġ individwali fuq il-post tax-xogħol; parteċipazzjoni f’fiera tal-impjiegi; jenfasizza l-importanza li jitrawmu impjiegi ta’ kwalità għolja u orjentati lejn il-futur li jsaħħu l-kompetittività u jappoġġjaw it-trasformazzjoni diġitali, filwaqt li jiġi żgurat li l-FEG jiġi implimentat kif xieraq u jikkontribwixxi għar-reżiljenza ekonomika u soċjali fit-tul tal-Unjoni; jisħaq li s-sħab soċjali jenħtieġ li jkunu involuti matul l-implimentazzjoni kollha tal-miżuri tal-FEG, inkluża l-fażi ta’ monitoraġġ, biex jiġu żgurati l-kwalità u r-rilevanza tal-appoġġ offrut lill-benefiċjarji;

8.Ifakkar li l-FEG huwa strument ta’ solidarjetà u tranżizzjoni ġusta u, filwaqt li jipprovdi appoġġ wara t-telf ta’ impjiegi, ma jistax jissostitwixxi politika industrijali proattiva; iqis li l-mobilizzazzjoni tal-FEG jeħtieġ li tiġi inkorporata f’rispons ta’ politika akbar fil-livelli politiċi kollha biex jiġi żgurat li l-ħaddiema affettwati jsibu opportunitajiet adegwati f’konformità mal-kwalifiki u l-ħiliet tagħhom; jisħaq li l-kompitu primarju tal-Unjoni jrid ikun li l-ewwel nett tipprevjeni tali għeluq, billi toħloq il-kundizzjonijiet biex il-produzzjoni industrijali tinżamm kompetittiva, waqt li fl-istess ħin tinvesti fil-ħiliet kemm għall-ħaddiema bi kwalifiki għoljin kif ukoll għall-ħaddiema industrijali; jissottolinja l-ħtieġa li jingħata appoġġ speċifiku mfassal apposta għall-profili tal-ħaddiema b’livelli baxxi ta’ edukazzjoni, filwaqt li jittieħdu miżuri biex jitnaqqsu l-fallimenti u jiġu indirizzati d-disparitajiet soċjali li jwasslu għall-esklużjoni mill-forza tax-xogħol;

9.Jisħaq li l-awtoritajiet Belġjani għandhom jiżguraw il-viżibbiltà tal-finanzjament tal-Unjoni u jenfasizzaw il-valur miżjud tiegħu billi jipprovdu informazzjoni effettiva u mmirata lill-benefiċjarji, lill-awtoritajiet reġjonali u lokali, lis-sħab soċjali, u lill-pubbliku ġenerali;

10.Jappella biex isiru evalwazzjonijiet finali bir-reqqa tal-miżuri implimentati, inkluża informazzjoni ċara dwar kif intużaw il-fondi, dwar is-suċċess tal-integrazzjoni mill-ġdid tal-ħaddiema fis-suq tax-xogħol, u jekk il-miżuri laħqux l-objettivi li għalihom inħoloq il-FEG;

11.Jinnota li l-Belġju beda joffri servizzi personalizzati lill-benefiċjarji fil-mira fl-14 ta’ Marzu 2025 u li, għalhekk, il-perjodu ta’ eliġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni ta’ finanzjament;

12.Jinnota li l-Belġju beda jġarrab nefqa amministrattiva biex jimplimenta l-FEG fis-6 ta’ Marzu 2025 u li, għalhekk, tali nefqa għandha tkun eliġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni ta’ finanzjament;

13.Jinnota li l-awtoritajiet Belġjani pprovdew aċċertament li l-prinċipji ta’ trattament ugwali u ta’ nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

14.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-awtoritajiet pubbliċi jew tal-kumpaniji fl-ambitu tal-liġi nazzjonali jew ta’ ftehimiet kollettivi; ifakkar li l-FEG huwa mekkaniżmu limitat, immirat u komplementari;

15.Japprova d-deċiżjoni annessa ma’ din ir-riżoluzzjoni;

16.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

17.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.