1.Jaqbel mal-Kummissjoni li l-kundizzjonijiet stabbiliti fir-Regolament dwar il-FEG u b’mod partikolari fl-Artikolu 4(2), il-punt (a), tiegħu, huma ssodisfati u li l-Awstrija hija intitolata għal kontribuzzjoni finanzjarja ta’ EUR 1 806 624 skont dak ir-Regolament, somma li tirrappreżenta 60 % tal-kost totali ta’ EUR 3 011 040, liema kost jinkludi n-nefqa għal servizzi personalizzati ta’ EUR 2 895 120 u n-nefqa għall-attivitajiet ta’ tħejjija, ġestjoni, informazzjoni u reklamar, kontroll u rapportar ta’ EUR 115 920;

2.Jinnota li l-awtoritajiet Awstrijaċi ressqu l-applikazzjoni fil-15 ta’ Settembru 2025, u li, wara li waslet informazzjoni addizzjonali mill-Awstrija, il-Kummissjoni ffinalizzat il-valutazzjoni tagħha fis-6 ta’ Frar 2026 u nnotifikatha lill-Parlament fil-11 ta’ Frar 2026; jisħaq fuq l-importanza li jitqassar iż-żmien bejn it-tressiq ta’ applikazzjoni għal assistenza mill-FEG u d-deċiżjoni ta’ finanzjament, filwaqt li jiġu ssalvagwardjati bis-sħiħ id-drittijiet tal-Parlament Ewropew bħala waħda mill-fergħat tal-awtorità baġitarja;

3.Jinnota li l-applikazzjoni hija relatata ma’ 1 488 ħaddiem affettwat mill-proċedimenti ta’ insolvenza ta’ KTM, li kienu l-akbar proċedimenti li qatt saru fl-Awstrija ta’ Fuq; jinnota wkoll li total ta’ 420 ħaddiem issensjat se jkunu benefiċjarji fil-mira u huma mistennija jipparteċipaw fil-miżuri;

4.Jinnota li KTM kienet l-akbar produttur tal-muturi tal-Unjoni u l-akbar sussidjarja ta’ Pierer Mobility AG; jiddispjaċih li l-kumpanija prinċipali ddeċidiet li ċċaqlaq il-produzzjoni lejn iċ-Ċina u l-Indja f’Diċembru 2023 minħabba kundizzjonijiet kompetittivi inġusti; jinnota li dan wassal għal sensji inizjali ta’ 300 impjieg u li t-telf sussegwenti fil-bejgħ wassal lil KTM biex timplimenta tnaqqis fil-kostijiet, inklużi s-sensji ta’ aktar minn 500 impjegat matul l-2024;

5.Jinnota li l-kumpanija omm kellha tibda proċess ta’ ristrutturar u li, matul l-ewwel għeluq tal-produzzjoni ta’ KTM fl-2025, aktar minn 750 impjegat addizzjonali ngħataw is-sensja; jinnota li l-investitur Bajaj Auto International Holdings B.V. ipprovda r-riżorsi meħtieġa biex jiżgura l-kontinwazzjoni ta’ KTM fit-22 ta’ Mejju 2025, filwaqt li evita l-falliment ta’ KTM, u ppermetta li l-produzzjoni terġa’ tibda f’Lulju 2025 filwaqt li naqqas l-infiq;

6.Jinnota li KTM darba kienet waħda mill-aktar ditti tal-muturi ta’ suċċess fl-Ewropa, impjegatur sinifikanti u pilastru ekonomiku kritiku ta’ ħafna fornituri fid-distrett ta’ Braunau fl-Awstrija ta’ Fuq; jinnota li konsegwentement, il-qgħad fid-distrett żdied b’37,1 % f’Novembru 2024 , meta mqabbel mal-istess xahar tas-sena preċedenti; jinnota li, fl-2025, il-qgħad laħaq l-ogħla livell li qatt intlaħaq fid-distrett ta’ Braunau;

7. Ifakkar li, bi qbil mas-sħab soċjali, is-servizzi personalizzati li se jiġu pprovduti lill-ħaddiema jikkonsistu fil-miżuri li ġejjin: ġestjoni ta’ każijiet: gwida għall-karriera u orjentazzjoni tal-karriera: taħriġ u taħriġ mill-ġdid: tiftix proattiv għal xogħol: allowances għat-taħriġ: jenfasizza l-importanza li jitrawmu impjiegi ta’ kwalità għolja u orjentati lejn il-futur biex tiġi żgurata reżiljenza ekonomika u soċjali fit-tul; jisħaq fuq l-importanza ta’ kooperazzjoni mill-qrib man-negozji u l-impjegaturi reġjonali biex jiġi żgurat li l-programmi ta’ taħriġ u ta’ rikwalifikazzjoni jirrispondu għal ħtiġijiet konkreti tas-suq tax-xogħol u jiffaċilitaw ir-riintegrazzjoni rapida tal-ħaddiema ssensjati;

8.Ifakkar li l-FEG huwa strument ta’ solidarjetà u tranżizzjoni ġusta u, għalkemm jipprovdi appoġġ wara t-telf ta’ impjiegi, ma jistax jissostitwixxi politika industrijali proattiva; jisħaq li l-kompitu primarju tal-Unjoni jrid ikun li l-ewwel nett tipprevjeni tali għeluq, billi toħloq il-kundizzjonijiet biex il-produzzjoni industrijali tinżamm kompetittiva, waqt li fl-istess ħin tinvesti fil-ħiliet kemm għall-ħaddiema bi kwalifiki għoljin kif ukoll għall-ħaddiema industrijali; jissottolinja l-ħtieġa li jingħata appoġġ speċifiku mfassal apposta għall-profili tal-ħaddiema b’livelli baxxi ta’ edukazzjoni, filwaqt li jittieħdu miżuri biex jitnaqqsu l-fallimenti u jiġu indirizzati d-disparitajiet soċjali li jwasslu għall-esklużjoni mill-forza tax-xogħol;

9.Jenfasizza li l-awtoritajiet Awstrijaċi għandhom jiżguraw il-viżibbiltà tal-finanzjament tal-Unjoni u jissottolinjaw il-valur miżjud tiegħu billi jipprovdu informazzjoni effettiva u mmirata lill-benefiċjarji, lill-awtoritajiet reġjonali u lokali, lis-sħab soċjali, u lill-pubbliku ġenerali;

10.Jitlob evalwazzjonijiet finali bir-reqqa tal-miżuri implimentati, inkluża informazzjoni ċara dwar kif intużaw il-fondi u jekk intefqux f’konformità mal-pjanijiet approvati;

11.Jinnota li l-Awstrija bdiet tipprovdi servizzi personalizzati lill-benefiċjarji fil-mira kif ukoll bdiet iġġarrab nefqa amministrattiva biex timplimenta l-FEG fl-1 ta’ Marzu 2025, u li l-perjodu ta’ eliġibbiltà għal kontribuzzjoni finanzjarja mill-FEG se jkun għalhekk minn dik id-data sa, rispettivament, 24 xahar u 31 xahar wara d-data tad-dħul fis-seħħ tad-deċiżjoni ta’ finanzjament;

12.Jinnota li l-awtoritajiet Awstrijaċi pprovdew aċċertament li l-prinċipji ta’ trattament ugwali u ta’ nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

13.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-kumpaniji, bis-saħħa tal-leġiżlazzjoni nazzjonali jew ta’ ftehimiet kollettivi;

14.Japprova d-deċiżjoni annessa ma’ din ir-riżoluzzjoni;

15.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

16.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.