–ag féachaint don iarraidh ar tharscaoileadh dhíolúine Patryk Jaki, arna tíolacadh ag an gCúirt Dúiche do Vársá-Śródmieście le litir dar dáta an 6 Lúnasa 2025, i ndáil le himeachtaí coiriúla a tionscnaíodh ina choinne trí dhíotáil phríobháideach arna comhdú ag ionadaí dlíthiúil an ionchúisitheora phríobháidigh, agus a fógraíodh sa Pharlaimint an 8 Meán Fómhair 2025,
–tar éis éisteacht a thabhairt do Patryk Jaki an 23 Márta 2026 i gcomhréir le Riail 9(6) dá Rialacha Nós Imeachta,
–ag féachaint d’Airteagail 8 agus 9 de Phrótacal Uimh. 7 ar Phribhléidí agus Díolúintí an Aontais Eorpaigh, agus d’Airteagal 6(2) d’Ionstraim an 20 Meán Fómhair 1976 maidir le toghadh Fheisirí Pharlaimint na hEorpa trí vótáil chomhchoiteann dhíreach,
–ag féachaint do na breithiúnais a thug Cúirt Bhreithiúnais an Aontais Eorpaigh an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013 agus an 19 Nollaig 2019 Breithiúnas ón gCúirt Bhreithiúnais an 21 Deireadh Fómhair 2008, Marra v De Gregorio agus Clemente, C-200/07 agus C-201/07, ECLI:EU:C:2008:579; breithiúnas ón gCúirt Ghinearálta an 19 Márta 2010, Gollnisch v Parlaimint, T-42/06, ECLI:EU:T:2010:102; breithiúnas ón gCúirt Bhreithiúnais an 6 Meán Fómhair 2011, Patriciello, C-163/10, ECLI: EU:C:2011:543; breithiúnas ón gCúirt Ghinearálta an 17 Eanáir 2013, Gollnisch v an Pharlaimint, T-346/11 agus T-347/11, ECLI:EU:T:2013:23; breithiúnas ón gCúirt Bhreithiúnais an 19 Nollaig 2019, Junqueras Vies, C-502/19, ECLI:EU:C:2019:1115.,
–ag féachaint d’Airteagail 105(2) agus (5) de Bhunreacht Phoblacht na Polainne:
–ag féachaint do Riail 5(2), do Riail 6(1) agus do Riail 9 dá Rialacha Nós Imeachta,
–ag féachaint don tuarascáil ón gCoiste um Ghnóthaí Dlíthiúla (A10-0108/2026),
A.de bhrí, i litir dar dáta an 6 Lúnasa 2025, gur thíolaic an Chúirt Dúiche do Vársá-Śródmieście iarraidh ar tharscaoileadh dhíolúine Patryk Jaki, Feisire de Pharlaimint na hEorpa a toghadh sa Pholainn, i dtaca le himeachtaí coiriúla a tugadh os a comhair i leith cion líomhnaithe atá faoi réir ionchúiseamh príobháideach;
B.de bhrí, de réir na hiarrata, le linn na tréimhse ón 5 Meitheamh 2024 go dtí an 7 Meitheamh 2024, ag gníomhú dó go gairid i ndiaidh a chéile agus plean réamhbheartaithe á shaothrú aige, agus le hintinn dhíreach, go líomhnaítear go ndearna Patryk Jaki an t-ionchúisitheoir príobháideach — breitheamh — a chlúmhilleadh ar an mbealach seo a leanas: (i) le linn cruinniú feachtais toghcháin in Będzin an 5 Meitheamh 2024, i malartú le duine de na daoine a bhí i láthair ag an gcruinniú, líomhnaítear go ndearna Patryk Jaki ráitis faoin ionchúisitheoir príobháideach inar ag maíomh gur údaraigh sé i ngan fhios dó féin úsáid earraí spiaireachta Pegasus, agus (ii) an 7 Meitheamh 2024 líomhnaítear gur scaip Patryk Jaki taifead den mhalartú sin ar fud na tíre trí na mórmheáin (i.e. ardáin na meán sóisialta Instagram, Facebook agus X (Twitter)), inar maíodh go ndearna an t-ionchúisitheoir príobháideach faillí ina dhualgais mar bhreitheamh a bhaineann le ‘fiosrúcháin agus seiceálacha’ neamhshonraithe a dhéanamh maidir leis an modh faireachais oibríochtúil i gcomhthéacs iarrataí ar orduithe faireachais oibríochtúla a mheas, gur fheidhmigh sé a ghairm mar bhreitheamh go míchuí, agus go raibh sé claonta de dheasca go raibh sé faoi thionchar páirtí pholaitiúil;
C.de bhrí, dá bhrí sin, go líomhnaítear go ndearna Patryk Jaki clúmhilleadh ar an ionchúisitheoir príobháideach le hintinn dhíreach é a náiriú i súile an phobail agus damáiste a dhéanamh dá chlú, agus go gcaillfeadh sé an mhuinín is gá chun a dhualgais mar bhreitheamh a chomhlíonadh; de bhrí go bhféadfadh na gníomhaíochtaí líomhnaithe a bheith ina gcion faoi Airteagal 212(1), i gcomhar le hAirteagail 212(2) agus 12(1), de Chód Coiriúil na Polainne;
D.de bhrí gur toghadh Patryk Jaki chuig Parlaimint na hEorpa sna toghcháin Eorpacha i Meitheamh 2019 agus, dá bhrí sin, go raibh sé ina Fheisire de Pharlaimint na hEorpa tráth an chiona líomhnaithe;
E.de bhrí nach ionann an cion líomhnaithe, agus nach bhfuil baint ag an iarraidh ina dhiaidh sin ar dhíolúine Patryk Jaki a tharscaoileadh, le tuairim a thug Patryk Jakr ná le vóta a chaith sé i gcomhlíonadh a dhualgas de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;
F.de bhrí go bhforáiltear le hAirteagal 9, an chéad mhír, pointe (a), de Phrótacal Uimh. 7 ar Phribhléidí agus Díolúintí an Aontais Eorpaigh, le linn sheisiúin Pharlaimint na hEorpa, go dteachtfaidh a Feisirí, i gcríoch a mBallstáit féin, na díolúintí a thugtar do chomhaltaí pharlaimint a mBallstáit féin;
G.de bhrí, i gcomhréir le hAirteagal 105(2) agus (5) de Bhunreacht Phoblacht na Polainne, ón lá a fógraítear torthaí na dtoghchán go dtí an lá a théann a shainordú nó a sainordú in éag, nach gcuirfear teachta faoi réir cuntasacht choiriúil gan toiliú Sejm Phoblacht na Polainne agus nach gcoinneofar ná nach ngabhfar é nó í gan toiliú an Sejm, ach amháin i gcásanna inar gabhadh é nó í agus cion á dhéanamh aige nó aici agus inar gá é nó í a choinneáil chun conair cheart na n-imeachtaí a áirithiú;
H.de bhrí gurb é is cuspóir don díolúine dá bhforáiltear i bPrótacal Uimh. 7 ar Phribhléidí agus Díolúintí an Aontais Eorpaigh an Pharlaimint agus a Feisirí a chosaint ar imeachtaí dlíthiúla i ndáil le gníomhaíochtaí a dhéantar i gcomhlíonadh dualgas parlaiminteach agus nach féidir a scaradh ó na dualgais sin;
I.de bhrí, i gcomhréir le Riail 5(2) dá Rialacha Nós Imeachta, nach pribhléid phearsanta í díolúine pharlaiminteach don Fheisire, ach gur ráthaíocht í ar neamhspleáchas na Parlaiminte ina hiomláine agus a Feisirí;
J.de bhrí, sa chás seo, nár aimsigh an Pharlaimint aon fhianaise ar fumus persecutionis, is é sin le rá nach cosúil gurb é rún na n-imeachtaí dlíthiúla i dtrácht dochar a dhéanamh do ghníomhaíocht pholaitiúil Patryk Jaki mar Fheisire de Pharlaimint na hEorpa agus, dá bhrí sin, do neamhspleáchas na Parlaiminte;
K.de bhrí nach féidir le Parlaimint na hEorpa ról cúirte a ghlacadh uirthi féin, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir breithiúnas ón gCúirt Ghinearálta an 30 Aibreán 2019, Briois v Parlaimint, T-214/18, ECLI:EU:T:2019:266;;