A.de bhrí, i litir dar dáta an 7 Deireadh Fómhair 2025, gur iarr Uachtarán Chúirt Uachtarach na Spáinne go ndéanfaí díolúine Alvise Pérez, Feisire de Pharlaimint na hEorpa a toghadh sa Spáinn, a tharscaoileadh i dtaca le cionta líomhnaithe a tharla in 2024;

B.de bhrí go léirítear san iarraidh go líomhnaítear gur fhoilsigh riarthóir cainéil Telegram ar a dtugtar ‘Alvise Pérez Chat’ ráitis i mí Eanáir agus i mí Feabhra 2024 ina léirítear ainmneacha ‘na ndaoine atá freagrach as an ngéarleanúint idé-eolaíoch ar a dtugtar coireanna fuatha’, ag tagairt go háirithe don ionchúisitheoir poiblí tarmligthe um choireanna fuatha in Valencia; de bhrí gur ghin na ráitis a foilsíodh ar an gcainéal sin freagairt láithreach ó go leor leantóirí den chainéal, a sheol níos mó ná 1 500 trácht chuig an ionchúisitheoir poiblí tarmligthe sin, de chineál maslach den chuid is mó; de bhrí go bhféadfadh an t-iompar líomhnaithe a bheith ina gcionta ciaptha nó stalcaireachta, ina ghríosú chun ionsaí a dhéanamh ar údarás nó ar oifigeach poiblí, ina chomhéigean agus/nó ina scaipeadh fuatha trí na meáin shóisialta, de bhun Airteagal 172-b agus Airteagal 18(1) de Chód Coiriúil na Spáinne i dtaca le hAirteagal 553 de Chód Coiriúil na Spáinne.

C.de bhrí gur toghadh Alvise Pérez chuig Parlaimint na hEorpa sna toghcháin Eorpacha i Meitheamh 2024 agus nach raibh sé, dá bhrí sin, ina Fheisire de Pharlaimint na hEorpa tráth na gcionta líomhnaithe;

D.de bhrí nach ionann na cionta líomhnaithe, agus nach bhfuil baint ag an iarraidh dá éis sin ar dhíolúine Alvise Pérez a tharscaoileadh, le tuairim a chuir sé in iúl ná le vóta a chaith sé i gcomhlíonadh a dhualgas de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;

E.de bhrí go bhforáiltear le hAirteagal 9, an chéad mhír, pointe (a), de Phrótacal Uimh. 7 ar Phribhléidí agus Díolúintí an Aontais Eorpaigh, le linn sheisiúin Pharlaimint na hEorpa, go dteachtfaidh a Feisirí, i gcríoch a mBallstáit féin, na díolúintí a thugtar do chomhaltaí pharlaimint a mBallstáit féin;

F.de bhrí go bhforáiltear le hAirteagal 71(1) agus (2) de Bhunreacht na Spáinne an méid seo a leanas:

‘(1). Beidh pribhléid iomlán ag teachtaí agus ag seanadóirí i ndáil le tuairimí a nochtar le linn dóibh a gcuid dualgas a chomhlíonadh..

(2). Le linn a dtéarma oifige, beidh díolúine freisin ag teachtaí agus ag seanadóirí agus ní fhéadfar iad a ghabháil ach amháin má fhaightear iad i mbun cion a dhéanamh. Ní féidir iad a chúiseamh ná a ionchúiseamh gan údarú roimh ré ón dlísheomra dlíthiúil ábhartha’;

G.de bhrí gurb é is cuspóir don díolúine dá bhforáiltear i bPrótacal Uimh. 7 ar Phribhléidí agus Díolúintí an Aontais Eorpaigh an Pharlaimint agus a Feisirí a chosaint ar imeachtaí dlíthiúla i ndáil le gníomhaíochtaí a dhéantar i gcomhlíonadh dualgas parlaiminteach agus nach féidir a scaradh ó na dualgais sin;

H.de bhrí, i gcomhréir le Riail 5(2) dá Rialacha Nós Imeachta, nach pribhléid phearsanta í díolúine pharlaiminteach don Fheisire, ach gur ráthaíocht í ar neamhspleáchas Pharlaimint na hEorpa ina hiomláine agus a Feisirí;

I.de bhrí, sa chás seo, nár aimsigh Parlaimint na hEorpa aon fhianaise ar fumus persecutionis, is é sin le nach cosúil gurb é rún na n-imeachtaí dlíthiúla i dtrácht dochar a dhéanamh do ghníomhaíocht pholaitiúil Alvise Pérez mar Fheisire de Pharlaimint na hEorpa agus, dá bhrí sin, do neamhspleáchas Pharlaimint na hEorpa;

J.de bhrí nach féidir le Parlaimint na hEorpa ról cúirte a ghlacadh uirthi féin, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir breithiúnas ón gCúirt Ghinearálta an 30 Aibreán 2019, Briois v Parliament, T-214/18, ECLI:EU:T:2019:266.;