(1a) Il-konklużjonijiet tal-Kunsill Ewropew tat-12 ta’ Diċembru 2019 japprovaw l-objettiv li tinkiseb Unjoni newtrali għall-klima sal-2050, f’konformità mal-objettivi tal-Ftehim ta’ Pariġi.

(3a) L-implimentazzjoni tas-sistema għall-iskambju ta’ kwoti tal-emissjonijiet għas-setturi tal-bini, tat-trasport bit-triq u oħrajn addizzjonali jeħtieġ li tkun akkumpanjata minn miżuri komplementari ta’ dekarbonizzazzjoni li huma l-aktar għodda effettiva biex l-unitajiet domestiċi jiġu megħjuna jnaqqsu d-dipendenza mill-fjuwils fossili u għalhekk jiġi mmitigat l-impatt tal-ETS2 fuq il-konsumaturi, peress li d-domanda għall-fjuwil fil-bini u fit-trasport għadha fil-biċċa l-kbira inelastika fuq terminu qasir. L-Istati Membri obbligati jużaw id-dħul mill-irkant tal-kwoti għall-finijiet skont l-Artikolu 30d(6) tad-Direttiva 2003/87/KE, filwaqt li jagħtu prijorità lil attivitajiet li jistgħu jikkontribwixxu biex jiġu indirizzati l-aspetti soċjali tal-iskambju ta’ kwoti tal-emissjonijiet skont l-ETS2. Għalhekk, ikun xieraq li l-Istati Membri jużaw id-dħul mill-irkant tal-kwoti rilaxxati mir-riżerva biex jikkomplementaw il-Pjanijiet Soċjali għall-Klima tagħhom. Huwa daqstant importanti li l-Kummissjoni tikkomplementa l-analiżi tagħha tal-Pjanijiet Nazzjonali għall-Enerġija u l-Klima aġġornati finali billi tidentifika, għal kull Stat Membru, miżuri ta’ dekarbonizzazzjoni settorjali u użu aħjar tad-dħul mill-ETS li jistgħu jgħinu biex titnaqqas id-domanda għall-kwoti tal-ETS2. Huwa importanti wkoll li tissaħħaħ il-Faċilità tal-Frontloading tal-BEI u li jiġu kkunsidrati miżuri addizzjonali biex jiżdied il-baġit tal-Fond Soċjali għall-Klima ħalli jiġi żgurat li l-appoġġ finanzjarju jiġi pprovdut lill-unitajiet domestiċi b’mod f’waqtu u f’livell li jirrifletti l-evoluzzjoni tal-prezzijiet tal-ETS2. Jeħtieġ li l-Kummissjoni tikkunsidra li testendi d-durata tal-Fond Soċjali għall-Klima.

(6a) Il-livelli eċċessivi tal-prezzijiet tal-kwoti fis-sistema għall-iskambju ta’ kwoti tal-emissjonijiet għas-setturi tal-bini, tat-trasport bit-triq u oħrajn addizzjonali xorta jista’ jkollhom impatti sproporzjonati fuq l-unitajiet domestiċi vulnerabbli, filwaqt li l-fluttwazzjonijiet eċċessivi fil-prezzijiet jistgħu ma jkunux limitati għal okkorrenza darbtejn fis-sena. Fil-kuntest tar-rieżami tad-Direttiva 2003/87/KE tal-Parlament Ewropew u tal-Kunsill, huwa essenzjali li jiġu kkunsidrati aktar miżuri ta’ salvagwardja soċjali, u jista’ jkun xieraq li l-Kummissjoni tikkunsidra strumenti aktar b’saħħithom għat-tnaqqis tal-prezzijiet biex tiggarantixxi l-istabbiltà tal-prezzijiet fit-tul. F’dan ir-rigward, il-Kummissjoni tista’ tikkunsidra lista ta’ għażliet bħat-tisħiħ u l-estensjoni lil hinn mill-31 ta’ Diċembru 2029 tal-mekkaniżmu ta’ żieda eċċessiva fil-prezzijiet ta’ EUR 45 stabbilit fil-prezzijiet tal-2026, u l-adattament tar-riżerva tal-istabbiltà tas-suq kif xieraq, inklużi l-frekwenza u l-volum tar-rilaxxi tal-kwoti u l-volum fir-riżerva, u jekk ikun meħtieġ, tivvaluta l-fattibbiltà li l-Istati Membri jitħallew temporanjament ma japplikawx is-sistema għall-bini residenzjali permezz ta’ deroga, dment li juru li jistgħu jilħqu l-miri tal-kondiviżjoni tal-isforzi billi jistabbilixxu miżuri oħra u dment li jkunu ttrasponew id-Direttiva (UE) 2024/1275 tal-Parlament Ewropew u tal-Kunsill fid-dritt nazzjonali, filwaqt li jiżguraw il-possibbiltà li jintuża d-dħul mill-iskambju ta’ kwoti tal-emissjonijiet għal appoġġ dirett, bħad-dividendi klimatiċi, mingħajr ma jkollhom għalfejn jagħtu prova ta’ impatt ambjentali pożittiv jew jintroduċu miżuri oħra biex jimminimizzaw il-kost mgħoddi fuq l-unitajiet domestiċi vulnerabbli. Sal-1 ta’ Marzu 2027, dawk l-għażliet jeħtieġ li jiġu vvalutati kif xieraq mill-Kummissjoni fir-rigward tal-impatti soċjali u ambjentali tagħhom filwaqt li jiġi żgurat li ma jkunux ta’ detriment biex jintlaħqu l-għanijiet klimatiċi tal-Unjoni kif stabbiliti fir-Regolament (UE) 2021/1119 tal-Parlament Ewropew u tal-Kunsill.

(6b) Wara r-reviżjoni tar-riżerva tal-istabbiltà tas-suq prevista f’din id-Deċiżjoni emendatorja, ikun xieraq li l-Kummissjoni twettaq valutazzjoni tal-impatt tas-sistema għall-iskambju ta’ kwoti tal-emissjonijiet għas-setturi tal-bini, tat-trasport bit-triq u oħrajn addizzjonali biex tivvaluta l-impatt soċjali tagħha u l-impatt tagħha fuq l-ilħuq tal-għanijiet klimatiċi, kif ukoll valutazzjoni distributtiva tal-għadd ta’ unitajiet domestiċi vulnerabbli li għalihom sar disponibbli l-appoġġ mill-Fond Soċjali għall-Klima u mill-Faċilità tal-Frontloading tal-BEI sa dik id-data, inkluża, skont kif ikun fattibbli, diżaggregazzjoni skont it-tip ta’ żona ġeografika, skont id-distribuzzjoni tal-introjtu u skont il-ġeneru, li jeħtieġ li tikkunsidra wkoll miżuri addizzjonali biex jiġu żgurati kemm l-integrità ambjentali kif ukoll il-ġustizzja soċjali fi ħdan l-ETS2.

“Mill-1 ta’ Jannar 2034, 50 % tal-kwoti msemmija f’dak is-subparagrafu li ma jkunux ġew rilaxxati mir-riżerva ma għandhomx jibqgħu validi. Mill-1 ta’ Jannar 2036, il-kwoti li jifdal imsemmija f’dak is-subparagrafu li ma jkunux ġew rilaxxati mir-riżerva ma għandhomx jibqgħu validi.”;

(4a) Fil-paragrafu 7, it-tieni sentenza hija sostitwita b’dan li ġej:

““Il-volumi li jridu jiġu rilaxxati mir-riżerva għandhom jiġu distribwiti b’mod ugwali matul perjodu ta’ tliet xhur, li jibda mhux aktar tard minn 30 jum wara d-data li fiha l-kundizzjonijiet ġew issodisfati skont il-pubblikazzjoni f’dak ir-rigward f’Il-Ġurnal Uffiċjali tal-Unjoni Ewropea skont l-Artikolu 30h(8) tad-Direttiva 2003/87/KE.”.

Artikolu 1a