1.Jaqbel mal-Kummissjoni li l-kundizzjonijiet stabbiliti fir-Regolament dwar il-FEG u b’mod partikolari fl-Artikolu 4(2), il-punt (a) tiegħu huma ssodisfati u li l-Belġju għandu dritt għal kontribuzzjoni finanzjarja ta’ EUR 2 033 869 skont dak ir-Regolament, li tirrappreżenta 85 % tal-kost totali ta’ EUR 2 392 788, liema kost jinkludi n-nefqa għal servizzi personalizzati ta’ EUR 2 358 922 u n-nefqa għall-attivitajiet ta’ tħejjija, ġestjoni, informazzjoni u riklamar, kontroll u rapportar ta’ EUR 33 866;

2.Jinnota li l-awtoritajiet Belġjani ppreżentaw l-applikazzjoni fit-13 ta’ Novembru 2025, u li, wara l-wasla tal-informazzjoni addizzjonali mill-Belġju, il-Kummissjoni ffinalizzat il-valutazzjoni tagħha u nnotifikatha lill-Parlament fit-2 ta’ Marzu 2026; jisħaq fuq il-ħtieġa li jitqassar iż-żmien bejn applikazzjoni tal-FEG u d-deċiżjoni ta’ finanzjament, filwaqt li jiġu ssalvagwardjati d-drittijiet baġitarji tal-Parlament;

3.Jinnota li l-applikazzjoni hija relatata ma’ 507 benefiċjarji fil-mira li ngħataw is-sensja mill-kumpanija Liberty;

4.Jinnota li Liberty iffaċċjat snin ta’ diffikultajiet finanzjarji qabel id-dikjarazzjoni ta’ falliment minħabba kundizzjonijiet negattivi tas-suq tal-azzar, tfixkil fil-katina tal-provvista relatat mal-COVID-19, u prezzijiet għoljin tal-enerġija wara l-gwerra ta’ aggressjoni tar-Russja kontra l-Ukrajna flimkien mad-dipendenza tal-Unjoni mill-fjuwils fossili importati u nuqqas ta’ varar ta’ sorsi ta’ enerġija orħos; jinnota li l-linji tal-galvanizzazzjoni ta’ Liberty Steel Liège ilhom ma jintużaw minn Diċembru 2021, prinċipalment minħabba nuqqas ta’ materja prima, li attivat operazzjoni ta’ ristrutturar li wasslet għat-trasferiment legali tagħha lil Liberty Galați fl-2023; jiddispjaċih li l-attività ta’ produzzjoni ma reġgħetx bdiet minkejja l-akkwiżizzjoni u laħqet il-qofol tagħha f’falliment;

5.Jinnota li d-diffikultajiet iffaċċjati minn Liberty Steel huma marbuta wkoll ma’ fatturi speċifiċi għall-kumpaniji wara l-akkwiżizzjoni tagħha minn ArcelorMittal minn GFG Alliance; jisħaq fuq tħassib serju dwar is-sostenibbiltà finanzjarja tal-mudell kummerċjali u n-nuqqas li jiġu ssodisfati l-impenji ta’ investiment, li kkontribwew għad-deterjorament tas-sitwazzjoni ekonomika tal-impjant u s-sensji li rriżultaw;

6.Jinnota li r-reġjun ta’ Wallonia għadda minn proċess ta’ deindustrijalizzazzjoni u trasformazzjoni ekonomika Bank Nazzjonali tal-Belġju. Economic Review 2024 (Rieżami ekonomiku 2024).; jinnota li l-falliment ta’ Liberty jirrappreżenta xokk soċjali kbir għal Wallonia, reġjun li s-suq tax-xogħol tiegħu diġà ddgħajjef minn avvenimenti oħra ta’ ristrutturar; jisħaq li s-settur tal-azzar jibqa’ settur ekonomiku importanti għall-Belġju, bil-proporzjon ta’ impjiegi tal-azzar għal kull abitant jibqa’ għoli; jistieden lill-awtoritajiet Belġjani jipprovdu appoġġ speċifiku mfassal apposta għal dawn il-profili biex jgħinu lill-ħaddiema jkomplu jiżviluppaw il-ħiliet meħtieġa biex isibu impjiegi ta’ kwalità ġodda, filwaqt li jieħdu miżuri biex inaqqsu l-fallimenti u jindirizzaw id-disparitajiet soċjali li jwasslu għall-esklużjoni tal-forza tax-xogħol; jenfasizza li l-Unjoni żżomm ambjent favorevoli għan-negozju, li jistimola t-tkabbir ekonomiku, jippromwovi l-innovazzjoni, jappoġġja l-iżvilupp teknoloġiku, isaħħaħ il-kompetittività u jnaqqas il-piżijiet regolatorji bla bżonn u jissimplifika l-proċeduri burokratiċi u jisħaq fuq il-ħtieġa ta’ politiki li jrawmu l-kompetittività industrijali, il-koeżjoni territorjali, ekonomika u soċjali u l-iżvilupp reġjonali; jisħaq fuq l-importanza ta’ settur tal-azzar Ewropew kompetittiv u reżiljenti, pedament ta’ industrija b’saħħitha u ta’ kwalità għolja u pilastru ċentrali tal-awtonomija strateġika tal-Unjoni;

7.Ifakkar li persuna minn kull erbgħa fost dawk irreġistrati li qed ifittxu impjieg f’Wallonia għandha aktar minn 50 sena u tiffaċċja ostakli akbar biex terġa’ tidħol fis-suq tax-xogħol; jinnota li minkejja l-ispeċjalizzazzjoni għolja tagħhom, it-tranżizzjonijiet tax-xogħol tal-ħaddiema ta’ Liberty huma mhedda mill-età avvanzata tagħhom (52 % tal-ħaddiema għandhom 55 sena jew aktar); jinnota li 69 % tal-ħaddiema li ngħataw is-sensja għandhom livell baxx ta’ edukazzjoni;

8.Ifakkar li, bi qbil mat-trade unions u mal-awtoritajiet reġjonali, is-servizzi personalizzati li għandhom jiġu pprovduti lill-ħaddiema jikkonsistu fil-miżuri li ġejjin: rikollokament u gwida vokazzjonali: taħriġ, taħriġ mill-ġdid u taħriġ vokazzjonali, inklużi f’ħiliet fl-IT; appoġġ lejn il-ħolqien ta’ negozju; kontribuzzjoni għal start-ups; inċentivi u allowances oħra; jisħaq fuq l-importanza li jissaħħu l-investimenti fl-innovazzjoni, fil-ħiliet u fil-modernizzazzjoni industrijali bil-għan li tiġi kkonsolidata l-kompetittività tal-industrija Ewropea u jkun żgurat li l-ħaddiema jkunu mgħammra għall-ħtiġijiet f’evoluzzjoni tas-suq tax-xogħol;

9.Jisħaq fuq l-importanza li jitrawmu impjiegi ta’ kwalità għolja u orjentati lejn il-futur, li jsaħħu l-kompetittività, irawmu t-trasformazzjoni diġitali u jwieġbu d-domandi tas-suq tax-xogħol, bil-għan li tiġi żgurata reżiljenza ekonomika u soċjali fit-tul; iqis għalhekk li l-mobilizzazzjoni tal-FEG jeħtieġ li tiġi inkorporata f’risposta politika akbar fil-livelli politiċi kollha biex jiġi żgurat li l-ħaddiema affettwati jsibu opportunitajiet adegwati f’konformità mal-kwalifiki u l-ħiliet tagħhom; jenfasizza li l-FEG huwa strument ta’ solidarjetà u tranżizzjoni ġusta u li l-kompitu primarju tal-Unjoni jrid ikun li, qabel xejn, tipprevjeni għeluq bħal dan;

10.Jissottolinja l-importanza li tissaħħaħ il-kompetittività industrijali tal-Unjoni u li jiġi promoss l-investiment fis-setturi industrijali strateġiċi, sabiex jiġu evitati aktar deindustrijalizzazzjoni u sensji, u jiġi appoġġjat il-ħolqien tal-impjiegi; jenfasizza l-bżonn ta’ tranżizzjoni lejn l-enerġija rinnovabbli, flimkien ma’ miżuri oħra biex jiġu żgurati prezzijiet tal-enerġija għall-but ta’ kulħadd;

11.Jisħaq li l-awtoritajiet Belġjani għandhom jiżguraw il-viżibbiltà tal-finanzjament tal-Unjoni u jenfasizzaw il-valur miżjud tiegħu billi jipprovdu informazzjoni effettiva u mmirata lill-benefiċjarji, lill-awtoritajiet reġjonali u lokali, lis-sħab soċjali u lill-pubbliku ġenerali;

12.Jitlob li jsiru evalwazzjonijiet finali bir-reqqa, flimkien mas-sħab soċjali, tal-miżuri implimentati, inkluża informazzjoni ċara u trasparenti dwar il-mod kif intużaw il-fondi, ir-riintegrazzjoni tal-ħaddiema fis-suq tax-xogħol u jekk intlaħqux l-objettivi tal-FEG; jenfasizza, f’dan il-kuntest, l-importanza ta’ monitoraġġ regolari tal-miżuri ffinanzjati mill-FEG sabiex tiġi vvalutata l-effikaċja tagħhom;

13.Jinnota li l-Belġju beda joffri servizzi personalizzati lill-benefiċjarji fil-mira fl-1 ta’ Ġunju 2025 u li l-perjodu ta’ eliġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni ta’ finanzjament;

14.Jinnota li l-Belġju beda jġarrab nefqa amministrattiva biex jimplimenta l-FEG fit-22 ta’ April 2025 u li, għalhekk, tali nefqa għandha tkun eliġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni ta’ finanzjament;

15.Jinnota li l-awtoritajiet Belġjani pprovdew aċċertament li l-prinċipji ta’ trattament ugwali u ta’ nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

16.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-awtoritajiet pubbliċi jew tal-kumpaniji fl-ambitu tal-liġi nazzjonali jew ta’ ftehimiet kollettivi; ifakkar li l-FEG huwa mekkaniżmu limitat, immirat u komplementari u li ma jistax jissostitwixxi l-politiki ekonomiċi strutturali u ekonomiċi, li jaqgħu prinċipalment fil-kompetenzi tal-Istati Membri;

17.Japprova d-deċiżjoni annessa ma’ din ir-riżoluzzjoni;

18.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

19.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.