1.ag tathant ar an gCoimisiún agus ar na Ballstáit luachanna AE a urramú agus a chur chun cinn mar a chumhdaítear in Airteagal 2 CAE; ag tathant ar an gCoimisiún, thairis sin, a oibleagáidí a chomhlíonadh, amhail measúnuithe tionchair críochnúla ar chearta bunúsacha a dhéanamh go córasach agus togra reachtach á ullmhú agus á thíolacadh aige, mar aon le nósanna imeachta um shárú a sheoladh i gcás inar gá agus gan nósanna imeachta meara a úsáid ach amháin nuair atá géarghá leo;

2.ag tathant ar an gCoimisiún na tuarascálacha bliantúla maidir le cur i bhfeidhm na Cairte a neartú trí fhorléargas uile-Aontais a thabhairt ar a cur i bhfeidhm ar fud an Aontais, lena n-áirítear measúnú ar chomhlíonadh fhorálacha na Cairte, moltaí do na Ballstáit, agus obair leantach níos soiléire maidir le dúshláin shainaitheanta i ndáil le cearta bunúsacha;

3.á chur in iúl gur cúis bhuartha di go n-eascraíonn cur i bhfeidhm neamhleor forálacha áirithe den Chairt as léirmhínithe náisiúnta éagsúla, mar a léiríodh i dTuarascáil 2025 ó FRA maidir le Cearta Bunúsacha; á iarraidh ar an gCoimisiún bearta éifeachtacha a ghlacadh chun a áirithiú go gcuirfear an Chairt i bhfeidhm go hiomlán agus go haonfhoirmeach ar fud an Aontais agus ar na Ballstáit nach bhfuil sé sin déanta acu go fóill pointí fócasacha náisiúnta a ainmniú chun a áirithiú go mbeidh reachtaíocht, beartais agus tionscadail náisiúnta arna gcistiú ag an Aontas go hiomlán comhlíontach leis an gCairt; á chreidiúint gur cheart d’institiúidí an Aontais a bheith níos glóraí maidir le sáruithe ar chearta bunúsacha a cháineadh agus maidir le hiarraidh ar na Ballstáit na bearta is gá a ghlacadh chun aghaidh a thabhairt orthu; á iarraidh go gcuirfí feabhas ar fheachtais múscailte feasachta ar leibhéal an Aontais agus ar an leibhéal náisiúnta, lena n-áirítear i gcomhar le FRA, arb é is aidhm dóibh a chur ar chumas daoine aonair a gcearta a thuiscint agus a fheidhmiú go hiomlán;

4.ag moladh ról FRA maidir le faireachán a dhéanamh ar staid na gceart bunúsach san Aontas, maidir le tacú le lucht ceaptha beartas trí shonraí, anailís agus comhairle a chur ar fáil, agus maidir lena áirithiú go n-urramófaí cearta bunúsacha agus go gcuirfí chun cinn iad i reachtaíocht agus i mbeartas an Aontais atá ann cheana agus a bheidh ann amach anseo; á chur i bhfáth gur gá acmhainní daonna agus airgeadais feabhsaithe a chur ar fáil do FRA chun a áirithiú gur féidir leis na dualgais a chuirtear de chúram air a chomhlíonadh go hiomlán agus go héifeachtúil;

5.á iarraidh ar an gCoimisiún leanúint d’fheabhas a chur ar éifeachtacht agus ar chomhleanúnachas na n-ionstraimí atá ann cheana, lena n-áirítear sásraí faireacháin agus meastóireachta; á aithint go bhfuil ról ríthábhachtach ag na coinníollacha cumasúcháin cothrománacha i Rialachán na bhForálacha Coiteanna Rialachán (EU) 2021/1060 ó Pharlaimint na hEorpa agus ón gComhairle an 24 Meitheamh 2021 lena leagtar síos forálacha coiteanna maidir le Ciste Forbraíochta Réigiúnaí na hEorpa, Ciste Sóisialta na hEorpa Plus, an Ciste Comhtháthaithe, an Ciste um Aistriú Cóir agus an Ciste Eorpach Muirí, Iascaigh agus Dobharshaothraithe agus rialacha airgeadais maidir leis na cistí sin agus maidir leis an gCiste um Thearmann, Imirce agus Lánpháirtíocht, an Ciste Slándála Inmheánaí agus an Ionstraim le haghaidh Tacaíocht Airgeadais don Bhainistiú Teorainneacha agus don Bheartas Víosaí (IO L 231, 30.6.2021, lch. 159, ELI: http://data.europa.eu/eli/reg/2021/1060/oj). maidir lena áirithiú go gcuirfí an Chairt i bhfeidhm go córasach agus go ndéanfí cláir an Aontais a ailíniú leis an gCairt agus le luachanna an Aontais a chumhdaítear in Airteagal 2 CAE araon; á chur i bhfios go láidir gur gá trédhearcacht fheabhsaithe agus rannpháirtíocht páirtithe leasmhara a áirithiú;

6.á athdhearbhú nach teagmhais aonair iad cúlú daonlathach, ionsaithe ar neamhspleáchas breithiúnach agus bagairtí ar spás sibhialta ach go bhfuil siad mar chuid de chreimeadh sistéamach an smachta reachta i roinnt Ballstát, mar a deimhníodh i dTuarascáil 2025 ó FRA maidir le Cearta Bunúsacha agus i dTuarascáil 2025 ón gCoimisiún maidir leis an Smacht Reachta; á chur i bhfáth go mbaineann na treochtaí sin an bonn den mhuinín fhrithpháirteach idir na Ballstáit agus d’fheidhmiú cuí an mhargaidh inmheánaigh;

7.ag tabhairt dá haire, agus é ina ábhar imní di, go bhfuil méadú ag teacht ar an gcur isteach polaitiúil ar an mbreithiúnacht, go bhfuil breithiúna agus ionchúisitheoirí á gciapadh, agus go bhfuil imeachtaí araíonachta á n-úsáid chun guthanna breithiúnacha neamhspleácha a chur ina dtost, mar atá doiciméadaithe ag FRA agus ag Comhairle na hEorpa; á mheabhrú nach féidir athchóirithe páirteacha nó siombalacha i roinnt Ballstát, amhail an Ungáir, a chur in ionad fíor-chomhlíonadh an neamhspleáchais bhreithiúnaigh, ráthaíochtaí éifeachtacha frithéillithe agus urraim don tsochaí shibhialta; á chur i bhfios go láidir go bhfuil dlúthbhaint ag na gnéithe sin le cosaint na gceart bunúsach, lena n-áirítear an ceart chun leigheas éifeachtach a fháil, comhionannas os comhair an dlí agus rochtain ar cheartas, mar a chumhdaítear in Airteagail 20 agus 47 den Chairt;

8.ag athdhearbhú a hiarrata ar an gCoimisiún agus ar an gComhairle dul i mbun caibidlíochta láithreach leis an bParlaimint maidir le sásra AE um an daonlathas, um an smacht reachta agus um chearta bunúsacha i bhfoirm comhaontú idirinstitiúideach lena gcuimseofar luachanna uile an Aontais a chumhdaítear in Airteagal 2 CAE, lena n-áirítear timthriall beartais buan i measc institiúidí AE lena gcomhtháthófar na huirlisí uile atá ann cheana, lena n-áirítear nós imeachta Airteagal 7 CAE, Creat agus Tuarascáil an Smachta Reachta, an Rialachán maidir le Coinníollacht an Smachta Reachta, Rialachán na bhForálacha Coiteanna agus na nósanna imeachta um shárú, i gcreat aonair in-fhorfheidhmithe;

9.á iarraidh ar an gCoimisiún an Rialachán maidir le Coinníollacht an Smachta Reachta a úsáid go córasach agus a fhorfheidhmiú go dian chun a áirithiú nach rannchuideoidh cistí AE le sáruithe ar na luachanna a chumhdaítear in Airteagal 2 CAE;

10.á iarraidh ar institiúidí AE dul i mbun idirphlé le Comhairle na hEorpa agus le rialtais náisiúnta chun a áirithiú go leanfaidh cosaint chearta bunúsacha an duine de bheith éifeachtach; á mheabhrú nach mór foráil a dhéanamh sa dlí maidir le haon teorannú ar fheidhmiú na gceart agus na saoirsí arna n-aithint sa Chairt agus nach mór bunbhrí na gceart agus na saoirsí sin a urramú;

11.ag tathant ar na Ballstáit, go háirithe iad siúd a bhfuil líon suntasach breithiúnas ón gCúirt Eorpach um Chearta an Duine acu nár cuireadh chun feidhme, dlús a chur lena gcur chun feidhme agus sásraí faireacháin náisiúnta trédhearcacha a bhunú chun comhlíonadh a áirithiú; á iarraidh ar an gCoimisiún agus ar an gComhairle an comhar le Comhairle na hEorpa a neartú chun forghníomhú éifeachtach na mbreithiúnas sin a chur chun cinn;

12.á chur in iúl gur cúis mhór bhuartha di na sáruithe córasacha leanúnacha ag an Ungáir ar na luachanna a chumhdaítear in Airteagal 2 CAE, atá fós faoi nós imeachta Airteagal 7(1) CAE ó 2018 gan aon dul chun cinn inbhraite a bheith déanta ina leith; á chur i bhfáth go bhfuil creimeadh leanúnach den sórt sin ar chaighdeáin dhaonlathacha agus ar chearta bunúsacha ina bhagairt d’inchreidteacht an Aontais mar chomhphobal luachanna; á chur in iúl gur saoth léi lagú d’aon ghnó ar neamhspleáchas breithiúnach, ar iolrachas na meán agus ar shaoirse acadúil, mí-úsáid cumhachtaí éigeandála, agus spriocdhíriú na sochaí sibhialta agus daoine LADTIA+; ag tabhairt dá haire go ndeimhnítear i dTuarascáil 2025 ón gCoimisiún maidir leis an Smacht Reachta agus i dTuarascáil 2025 ó FRA maidir le Cearta Bunúsacha go bhfuil meath breise tagtha ar shrianta agus ceartúcháin, agus ar éilliú forleathan agus ar neamhchomhlíonadh bhreithiúnais CBAE agus na Cúirte Eorpaí um Chearta an Duine; ag tathant ar an gCoimisiún agus ar na Ballstáit tús a chur leis an nós imeachta faoi Airteagal 7(2) CAE; á iarraidh ar an gComhairle moltaí tírshonracha a ghlacadh le spriocdhátaí soiléire agus tagarmharcanna intomhaiste;

13.á mheabhrú gur cheart úsáid cumhachta lánroghnaí a rialú le hathbhreithnithe breithiúnacha nó le hathbhreithnithe neamhspleácha eile; á iarraidh ar na Ballstáit sásraí a bhunú chun mí-úsáid cumhachtaí lánroghnacha a chosc, a cheartú agus smachtbhannaí a fhorchur ina leith, agus cúiseanna fónta a thabhairt lena gcinntí, go háirithe nuair a dhéanann siad difear do chearta daoine aonair;

14.á mheabhrú, de réir chaighdeáin na Náisiún Aontaithe maidir le forfheidhmiú an dlí, go ndéanfaidh údaráis forfheidhmithe dlí iarracht ar dtús https://www.ohchr.org/sites/default/files/Documents/Publications/training5Add1en.pdf. modhanna neamhfhoréigneacha a úsáid; á iarraidh, i ndáil leis sin, ar na Ballstáit caighdeáin na Náisiún Aontaithe maidir le forfheidhmiú an dlí a chomhlíonadh; á mheabhrú go bhfuil údaráis forfheidhmithe dlí cuntasach go hiomlán as a ndualgais a chomhlíonadh; á chur i bhfios go láidir a thábhachtaí atá sé a áirithiú go mbeidh imscrúduithe ar aon chásanna líomhnaithe d’úsáid iomarcach fornirt agus cóireáil idirdhealaitheach ag údaráis forfheidhmithe dlí trédhearcach, neamhspleách agus éifeachtach; á iarraidh ar an gCoimisiún treoirlínte uile-Aontais a thabhairt isteach maidir le roghnú, tástáil agus triail na n-arm a úsáideann údaráis forfheidhmithe dlí, bunaithe ar chaighdeáin, ar mholtaí agus ar threoirphrionsabail na Náisiún Aontaithe; á iarraidh ar na Ballstáit sonraí a bhailiú maidir le gach úsáid a bhaintear as forneart, agus maidir leis na cúiseanna atá leo agus na hiarmhairtí a bhaineann leo;

15.á chur in iúl gur cúis mhór bhuartha di an leibhéal méadaitheach éillithe a tugadh faoi deara i mBallstáit áirithe agus an teacht chun cinn de chásanna um éilliú a bhaineann le hoifigigh ardleibhéil agus polaiteoirí; ag tathant ar na Ballstáit an t-éilliú a chomhrac agus moltaí GRECO a chomhlíonadh go hiomlán, lena n-áirítear iad siúd ina chúigiú babhta meastóireachta maidir le daoine a bhfuil príomhfheidhmeanna feidhmiúcháin agus gníomhaireachtaí forfheidhmithe dlí acu, agus moltaí arna n-eisiúint ag comhlachtaí ábhartha idirnáisiúnta agus Eorpacha eile a chomhlíonadh go hiomlán, lena n-áirítear Oifig an Ionchúisitheora Phoiblí Eorpaigh (OIPE), chomh maith leo siúd a eascraíonn as coinbhinsiúin frithéillithe na Náisiún Aontaithe agus Chomhairle na hEorpa;

16.á chur in iúl gur geal léi an Treoir maidir leis an Éilliú a Chomhrac agus á iarraidh go n-áiritheofaí cur chun feidhme éifeachtach, tráthúil agus uaillmhianach chun an comhrac i gcoinne an éillithe a neartú;

17.á iarraidh ar na Ballstáit trédhearcacht a áirithiú sa chaiteachas poiblí agus sa mhaoiniú polaitiúil, agus cosaint a thabhairt do sceithirí a nochtann éilliú in institiúidí poiblí agus san earnáil phríobháideach;

18.á iarraidh ar an gCoimisiún measúnú cuimsitheach a dhéanamh ar chur chun feidhme na Treorach maidir le Sceithirí agus na bearta is gá a dhéanamh chun a trasuí iomlán agus ceart a áirithiú;

19.á chur in iúl gur cúis mhór bhuartha di an meath ar shaoirse na meán agus ar shábháilteacht iriseoirí agus gníomhaithe sna meáin i roinnt Ballstát, go háirithe iad siúd a rangaíodh is ísle in Innéacs Domhanda Shaoirse an Phreasa 2025, agus an brú agus na hionsaithe méadaitheacha ar neamhspleáchas eagarthóireachta agus ar shláine iriseoireachta, agus an cur isteach polaitiúil orthu;

20.á mheabhrú gur bunchloch de shochaí dhaonlathach, coimirce i gcoinne mhí-úsáid na cumhachta agus frithnimh i gcoinne na bréagaisnéise iad saoirse agus iolrachas na meán, lena n-áirítear meáin nuachta atá ar ardchaighdeán, a mhaoinítear go hinbhuanaithe agus go trédhearcach agus atá neamhspleách, idir iriseoirí traidisiúnta agus digiteacha, iriseoirí neamhspleácha agus iniúchta, seiceálaithe fíorais agus taighdeoirí, agus meáin láidre neamhspleácha seirbhíse poiblí;

21.ag cáineadh na straitéisí leatromacha a úsáideann rialtais roinnt Ballstát, amhail úsáid SLAPPanna agus feachtais chlúmhillte, tionchar méadaitheach olagarcaí atá ailínithe leis an rialtas, comhchruinniú méadaitheach úinéireacht na meán a bhféadfadh tionchar suntasach a bheith acu ar iolrachas na meán agus ar neamhspleáchas eagarthóireachta ar fud an Aontais, agus rialú stáit ar na meáin phoiblí, ar an tsochaí shibhialta agus ar institiúidí acadúla, a bhfuil gach ceann acu ag cur leis an meath méadaitheach ar shaoirse na meán agus ar shaoirse acadúil;

22.á chur in iúl gur saoth léi an cleachtas, atá ag méadú, ag oifigigh ardleibhéil i roinnt Ballstát maidir le cumarsáid le heagraíochtaí tábhachtacha meán a theorannú; ag cur béim ar an bhfíoras gur féidir leis na bearta sin srian a chur le saoirse agus trédhearcacht na meán agus gur féidir leo cur le scaipeadh na bréagaisnéise sa spás poiblí; á chur i bhfios go láidir go bhfuil freagracht speisialta ar oifigigh phoiblí agus cumarsáid a déanamh acu leis an bpobal; á chur i bhfáth gur fadhbanna iad scaipeadh na bréagaisnéise agus ionsaithe poiblí ar iriseoirí ag oifigigh phoiblí atá ag dul i méid agus a chothaíonn timpeallacht lena gceadaítear bolscaireacht, polarú, an fhuathchaint agus fiú coireanna fuatha; ag tathant ar na pearsana poiblí uile a bhfreagrachtaí sa chumarsáid phoiblí a aithint agus cloí leo, lena n-áiritheofar go leanfaidh a bplé de bheith ómósach, fíorasach agus gairmiúil;

23.á chur in iúl gur saoth léi na teipeanna sistéamacha maidir le coireanna i gcoinne iriseoirí i roinnt Ballstát a imscrúdú agus a ionchúiseamh; á chur i bhfios go láidir go bhfuil géarghá le coimircí níos láidre agus creataí dlíthiúla láidre chun iriseoirí a chosaint; á chur i bhfios go láidir go gcuirtear iriseoirí i mbaol níos mó bagairtí agus foréigin le mainneachtain coireanna a ionchúiseamh a nochtann siad; ag tathant ar na húdaráis náisiúnta deireadh a chur leis an tsaoirse ó phionós trí imscrúduithe agus ionchúisimh chuimsitheacha thrédhearcacha; ag tabhairt aitheantas do Ján Kuciak, Daphne Caruana Galizia agus Giorgos Karaivaz, agus ag aithint a n-oibre bunriachtanaí mar iriseoirí imscrúdaitheacha; á iarraidh ar na húdaráis inniúla a áirithiú go mbaintear an ceartas amach faoi dheireadh;

24.ag cáineadh go láidir gach cineál foréigin, bagairtí, imeaglaithe agus faireachais in aghaidh iriseoirí, chomh maith le ciapadh agus coiriúlú iriseoirí as a gcuid oibre; á iarraidh go ndéanfaí clúmhilleadh a dhíchoiriúlú; á thabhairt chun suntais go ndírítear ar iriseoirí mná go háirithe agus gur cúis imní é sin; á chur i bhfáth go bhféadfadh féinchinsireacht a bheith mar thoradh ar thimpeallacht dhoicheallach don obair iriseoireachta nó bhféadfadh sí daoine aonair a dhíspreagadh ó ghairmeacha iriseoireachta a roghnú;

25.á iarraidh ar an gCoimisiún, ar na Ballstáit agus ar na tíortha is iarrthóirí agus na tíortha is iarrthóirí ionchasacha sábháilteacht agus cosaint láithreach agus éifeachtach iriseoirí agus gairmithe meán a áirithiú, lena n-áirítear na daoine sin a throideann in aghaidh an éillithe ar na leibhéil rialtais is airde;

26.á iarraidh ar an gCoimisiún agus ar na Ballstáit meáin shaora, neamhspleácha agus iolraíocha a chur chun cinn; á chur i bhfáth gur gá cosaintí láidre dlíthiúla a áirithiú do na meáin seirbhíse poiblí, lena ráthaítear a neamhspleáchas eagarthóireachta agus cistiú cobhsaí agus lena gcosnaítear iad ar thionchar agus trasnaíocht pholaitiúil, chun iad a chumasú le freastal ar leas an phobail go héifeachtach agus go neamhchlaonta; á iarraidh ar an gCoimisiún dlúthfhaireachán a dhéanamh ar na forbairtí sin ar fud an Aontais agus aghaidh a thabhairt ar na dúshláin atá ann cheana;

27.ag meabhrú roinnt cásanna inar coinníodh iriseoirí a bhfuil saoránacht AE acu ar chúisimh bhréige agus a ndualgais ghairmiúla á gcomhlíonadh acu i dtíortha nach tíortha den Aontas iad, lena n-áirítear tíortha is iarrthóirí; ag tathant ar an gCoimisiún agus ar na Ballstáit, i gcomhréir le Moladh (AE) 2022/758 ón gCoimisiún, a n-iarrachtaí a mhéadú chun cabhrú leis na hiriseoirí sin atá á gcoinneáil go treallach a scaoileadh saor agus a thabhairt abhaile go sábháilte; á iarraidh ar an gCoimisiún aird ar leith a thabhairt ar chásanna ina gcoinnítear iriseoirí gan údar i dtíortha is iarrthóirí, lena n-áirítear an Tuirc, agus ar na himeachtaí dlíthiúla i gcoinne an iriseora Shualannaigh Joakim Medin;

28.ag tathant ar an gCoimisiún cur chun feidhme iomlán agus ceart an Ghnímh Eorpaigh um Shaoirse na Meán a áirithiú; ag tathant thairis sin ar an gCoimisiún agus ar na Ballstáit cur chun feidhme tapa agus cuí na Treorach in aghaidh Cásanna Dlí Straitéiseacha i gcoinne na Rannpháirtíochta Poiblí (SLAPP) a ráthú agus bearta éifeachtacha a ghlacadh chun deireadh a chur le gach cás SLAPP ar fud an Aontais;

29.á iarraidh ar na Ballstáit an moladh a leanúint ó Ardán Chomhairle na hEorpa maidir le Sábháilteacht Iriseoirí maidir leis na cosaintí d’iriseoirí ar deoraíocht a neartú, lena n-áirítear coimircí i gcoinne mhí-úsáid fhógraí dearga INTERPOL;

30.á mheabhrú gur gheall 16 Bhallstát de chuid an Aontais le déanaí tacaíocht a neartú d’iomláine na faisnéise agus na meán neamhspleách; á aithint gur ghlac roinnt Ballstát pleananna gníomhaíochta tiomnaithe agus gur ghlac siad céimeanna chun struchtúir thacaíochta thiomnaithe a chur ar bun lena gcuirtear sábháilteacht iriseoirí chun cinn;

31.á thabhairt chun suntais go bhfuil treocht na hionramhála toghchán ag fás san Aontas ag gníomhaithe inmheánacha agus eachtracha araon; á iarraidh ar an gCoimisiún anailísí rialta sonracha a dhéanamh ar na huirlisí atá ar fáil do Bhallstáit agus a úsáideann siad chun an bhréagaisnéis agus an trasnaíocht eachtrach atá nasctha le próisis thoghchánacha a chomhrac, agus a aithint go mbaineann na bagairtí sin an bonn ó chearta bunúsacha, lena n-áirítear an ceart chun faisnéis a fháil agus a scaipeadh, chun rannpháirtíocht dhaonlathach, agus chun saorthoghcháin chóra;

32.á iarraidh ar an gCoimisiún agus ar na Ballstáit a áirithiú go n-áireofar coimircí láidre agus daingne do chearta bunúsacha, lena n-áirítear an tsaoirse chun tuairimí a nochtadh, i ngach beart a dhéantar chun an tAontas a chosaint ar thrasnaíocht eachtrach agus ar ionramháil ar fhaisnéis; á thabhairt dá haire gur mhol an Coimisiún an sásra nua ‘Sciath Eorpach don Daonlathas’ agus á chur in iúl go bhfuil sé i gceist aici a bheith rannpháirteach go tairbheach ina fhorbairt bhreise;

33.á iarraidh ar an gCoimisiún measúnú a dhéanamh an gcomhlíonann bearta sriantacha an Aontais, a fhorchuirtear ar roinnt daoine den lucht acadúil, eolaithe agus anailísithe, na riachtanais chomhréireachta agus gá faoi dhlí an Aontais agus Airteagal 11 den Chairt, agus an bhfuil siad deartha chun a dtionchar ar chearta eacnamaíocha, sóisialta agus cultúrtha a íoslaghdú; á mheabhrú nach mór an ceart éisteachta a ráthú https://www.ohchr.org/en/press-releases/2026/01/european-union-restrictive-measures-against-academics-negatively-impact.;

34.á iarraidh ar an gCoimisiún agus ar na Ballstáit cur chun feidhme agus forfheidhmiú éifeachtach GSD, an Ghnímh um an Intleacht Shaorga Rialachán (AE) 2024/1689 ó Pharlaimint na hEorpa agus ón gComhairle an 13 Meitheamh 2024 lena leagtar síos rialacha comhchuibhithe maidir leis an intleacht shaorga agus lena leasaítear Rialacháin (CE) Uimh. 300/2008, (AE) Uimh. 167/2013, (AE) Uimh. 168/2013, (AE) 2018/858, (AE) 2018/1139 agus (AE) 2019/2144 agus Treoracha 2014/90/AE, (AE) 2016/797 agus (AE) 2020/1828 (an Gníomh um an Intleacht Shaorga) (IO L, 2024/1689, 12.7.2024, ELI: http://data.europa.eu/eli/reg/2024/1689/oj). agus an Rialacháin maidir le Trédhearcacht agus Spriocdhíriú na Fógraíochta Polaitiúla Rialachán (AE) 2024/900 ó Pharlaimint na hEorpa agus ón gComhairle an 13 Márta 2024 maidir le trédhearcacht agus spriocdhíriú na fógraíochta polaitiúla (IO L, 2024/900, 20.3.2024, ELI: http://data.europa.eu/eli/reg/2024/900/oj)., lena n-áirítear trí acmhainní leormhaithe daonna agus teicniúla a áirithiú chun sláine na dtoghchán san Aontas amach anseo a choimirciú;

35.ag aithint an róil thábhachtaigh atá ag teicneolaíochtaí digiteacha maidir le rochtain ar fhaisnéis agus rannpháirtíocht dhaonlathach a chothú; á chur i bhfáth gur féidir le samhail ghnó na n-ardán meán sóisialta atá bunaithe ar mhicri-spriocdhíriú iompar andúile a spreagadh, agus gur féidir léi a bheith ina cúis le fás inneachair dheighiltigh, ag a bhfuil iarmhairtí tromchúiseacha do chearta bunúsacha, amhail cearta an linbh, an ceart chun sonraí pearsanta a chosc, comhionannas agus neamh-idirdhealú; á chur i bhfios go láidir gur minic a úsáidtear ardáin meán sóisialta mar uirlis don trasnaíocht eachtrach agus d’ionsaithe hibrideacha mar gheall ar a n-éifeachtaí méadaitheacha ar an gcomhtháthú sóisialta agus ar phróisis dhaonlathacha; á chur i bhfios go láidir gur gá aghaidh a thabhairt ar na dúshláin sin mar chuid d’éiceachóras athléimneachta forleathan an Aontais;

36.á iarraidh ar an gCoimisiún na hoibleagáidí maidir le measúnú agus maolú riosca a threisiú d’ardáin agus innill chuardaigh ar líne atá an-mhór, agus obair leantach éifeachtach a áirithiú; ag tathant ar an gCoimisiún fanacht daingean in aghaidh iarrachtaí chun an bonn a bhaint ó GSD agus imscrúduithe leantacha ar ardáin ar líne an-mhór a shaothrú;

37.á thabhairt chun suntais go bhfuil dúshláin ann mar gheall ar botaí comhrá le IS giniúnach, lena n-áirítear an fhéidearthacht go mbeidh na córais sin ina gcúis le dochar cognaíoch trína n-idirghníomhaíochtaí; á mheas nach mór go mbeidh teicneolaíochtaí nua, lena n-áirítear córais IS, treoraithe le prionsabail na trédhearcachta, na hinmhínitheachta, na cothroime agus na cuntasachta agus le coimircí iomchuí i gcórais algartamacha, amhail measúnuithe tionchair neamhspleácha a dhéanamh chun iad a chosc ón idirdhealú agus éagothromaíochtaí atá ann cheana a dhéanamh níos measa; á chur in iúl go bhfuil sí den tuairim chéanna le hArd-Rúnaí na Náisiún Aontaithe nár cheart go gcinnfeadh algartaim go heisiach an fhaisnéis a mbíonn rochtain ag daoine uirthi, agus gur cheart do chuideachtaí teicneolaíochta a áirithiú go ndéanfaí a n-algartaim agus a gcórais lena moltar ábhar a dhearadh agus a úsáid ar bhealaí nach mbaineann an bonn ó chearta bunúsacha agus ó luachanna daonlathacha;

38.á mheabhrú, i gcomhréir le hAirteagal 27 de GSD, nach mór go leagfaidh soláthróirí ardán ar líne amach ina dtéarmaí agus coinníollacha na príomhpharaiméadair a úsáidtear ina gcórais moltaí, aon rogha atá ar fáil d’úsáideoirí chun na paraiméadair sin a mhodhnú nó tionchar a imirt orthu agus míniú ar an gcúis a mholtar ábhair áirithe don úsáideoir; ag tathant ar idirghabhálaithe ar líne deireadh a cur le cleachtais lena ndéantar dúshaothrú ar an bpolarú d’aon ghnó ar mhaithe le brabús a bhaint amach;

39.á thabhairt chun suntais gur féidir éifeachtaí diúltacha a bheith ag ardáin ar líne ar chearta bunúsacha agus ar mheabhairshláinte leanaí; á chur i bhfáth gur gá leanaí a chosaint ar líne, agus á iarraidh ar an gCoimisiún dlúthfhaireachán a dhéanamh chun a fháil amach an féidir leis na creataí dlíthiúla atá ann cheana aghaidh a thabhairt go héifeachtach ar na hábhair imní sin, agus díriú go sonrach ar dhearcadh láidir a áirithiú maidir le cearta an linbh agus cearta bunúsacha sna measúnuithe sin; á chur i bhfios go láidir nach mór don Ghníomh um Chothroime Dhigiteach atá ar na bacáin leanaí a chosaint go héifeachtach ar líne agus a gcearta a choimirciú; á iarraidh ar an gCoimisiún, thairis sin, leibhéal ard príobháideachais, sábháilteachta agus slándála a áirithiú do leanaí, agus iad a chosaint ar bhealach níos fearr ar ábhar dochrach agus neamhdhleathach agus ar fhógraíocht atá bunaithe ar phróifíliú;

40.á chur in iúl gur geal léi gur fógraíodh an chéad fhiosrúchán uile-Aontais ar éifeachtaí na meán sóisialta ar an bhfolláine, agus á iarraidh ar an gCoimisiún dlús a chur leis an bpróiseas;

41.á iarraidh go ndéanfaí infheistíocht níos láidre i litearthacht sna meáin agus sa litearthacht dhigiteach mar an coimirce is éifeachtaí in aghaidh na hionramhála; ag tathant ar na Ballstáit litearthacht sna meáin agus an litearthacht dhigiteach, oideachas sibhialta, stair na hEorpa, urraim do chearta bunúsach, machnamh criticiúil agus cur chun cinn rannpháirtíocht an phobail i gcuraclaim scoile agus ollscoile a áireamh, toisc go n-aithnítear iad mar ghnéithe ríthábhachtacha do rannpháirtíocht fhónta sa saol daonlathach agus d’fheidhmiú éifeachtach na gceart bunúsach, lena n-áirítear an tsaoirse chun tuairimí a nochtadh agus an ceart chun fhaisnéis a fháil; á thabhairt chun suntais gur gá obair chomhthreomhar a dhéanamh maidir le feasacht a mhúscailt ar an mbealach chun dul i ngleic leis an mbréagaisnéis agus an litearthacht dhigiteach a chur chun cinn; á iarraidh go mbeadh straitéis chomhbheartaithe de chuid an Aontais ann maidir le litearthacht sna meáin agus an litearthacht dhigiteach le tionscadail a chruthaíonn torthaí nithiúla ar scála suntasach ar fud an Aontais;

42.á chur in iúl gur saoth léi an cleachtas faireachais rialtais, atá ag fás, ar eagraíochtaí meán agus iriseoirí neamhspleácha ag seirbhísí faisnéise; ag cáineadh go láidir iarrachtaí ag rialtais áirithe na meáin agus iriseoirí neamhspleácha a chur i láthair mar spreagthóirí an radacaithe nó chun a n-obair a shrianadh trí lipéad na bagartha ar an tslándáil shochaíoch nó náisiúnta a bhualadh orthu;

43.ag athdhearbhú nach mór faireachas a dhéanamh i gcomhréir leis an dlí, aidhm dhlisteanach a bheith aige agus go mbeidh sé riachtanach agus comhréireach i bhfianaise na bagartha a dhéanann sé ar chearta bunúsach agus ar an daonlathas; á chur in iúl gur oth léi nach soláthraíonn an creat dlíthiúil i roinnt Ballstát coimircí beachta, éifeachtacha agus cuimsitheacha maidir le húdarú agus forghníomhú na mbeart faireachais agus maidir leis na sásraí sásaimh a d’fhéadfadh a bheith ann i gcoinne na mbeart sin; á chur i bhfios go láidir nach mór do gach beart faireachais a bheith faoi réir athbhreithniú iomchuí breithiúnach agus maoirseacht éifeachtach; á chur in iúl gur cúis bhuartha di cásanna nua ina ndéantar ‘slándáil náisiúnta’ a agairt gan údar chun údar a thabhairt le himscaradh agus úsáid earraí spiaireachta agus chun rúndacht iomlán agus easpa cuntasachta a áirithiú; á chur in iúl gur geal léi an ráiteas ón gCoimisiún, i gcomhréir le dlí-eolaíocht CBAE, nach féidir tagairt don tslándáil náisiúnta a léirmhíniú mar eisceacht gan teorainn ar dhlí an Aontais agus gur cheart go gceanglófaí údar soiléir a bheith ann ina leith; á iarraidh ar an gCoimisiún obair leantach a dhéanamh ar an ráiteas sin i gcásanna inarb ann do tháscairí mí-úsáide; á mheabhrú, i sochaí thrédhearcach dhaonlathach a chloíonn leis an smacht reachta, gur eisceacht seachas an riail a bheidh san fhaireachas in ainm na slándála náisiúnta;

44.ag athdhearbhú a hiarrata ar na Ballstáit Go háirithe an Ghréig, an Chipir, an Iodáil, an Ungáir, an Pholainn agus an Spáinn. na moltaí uile ó PEGA agus ó Choimisiún na Veinéise a leanúint, a sholáthraíonn treoraíocht thábhachtach maidir le comhlíonadh ceart bunúsach, an smacht reachta agus an mhaoirseacht dhaonlathach a áirithiú; á chur i bhfáth go bhfuil gá le cuntasacht agus trédhearcacht iomlán i ngach cás faireachais chunóirigh; ag tathant ar an gCoimisiún freagairt do na bagairtí atá ann agus atá ag fás mar gheall ar theicneolaíochtaí le hearraí spiaireachta; á iarraidh go mbeadh maoirseacht éifeachtach bhreithiúnach ann chun a áirithiú nach n-úsáidtear faireachas riamh in aghaidh iriseoirí, gníomhaithe ná freasúróirí polaitiúla;

45.ag tathant go dtabharfaí aontachas an Aontais le ECHR chun críche; á mheabhrú gur shainaithin CBAE, i dTuairim 2/13 uaidh, roinnt bacainní dlíthiúla ar an aontachas, agus á chur i bhfios go láidir a thábhachtaí atá sé aghaidh a thabhairt ar na bacainní sin chun aontachas tráthúil rathúil an Aontais a chumasú; á chur i bhfáth go bhfuil an chéim sin bunriachtanach chun creat dlíthiúil an Aontais a ailíniú leis na caighdeáin is airde maidir le cosaint chearta an duine;

46.á mheabhrú go mbunaítear, sa chreat reachtach nua faoi Chomhshocrú an Aontais maidir le hImirce agus Tearmann, rialacha athbhreithnithe le haghaidh nósanna imeachta tearmainn, bainistiú teorainneacha agus na dlúthpháirtíochta; á chur i bhfios go láidir go n-éilítear urraim iomlán do chearta bunúsacha dá chur chun feidhme éifeachtach; á thabhairt chun suntais nach mór leanúint de dhlúthfhaireachán a dhéanamh ar an urraim do chearta bunúsacha;

47.á iarraidh ar an Aontas agus ar na Ballstáit, go háirithe ar a n-údaráis inniúla, cloí leis na hoibleagáidí idirnáisiúnta um chearta an duine agus le gealltanais ina mbeartais imirce, imscrúduithe prasa a chur chun cinn, dlúthfhaireachán a dhéanamh ar thionchar na mbeartas sin ar chearta bunúsacha, sna creataí dlíthiúla atá ann cheana agus i bhforbairt na reachtaíochta amach anseo araon, agus staonadh ó bheartais imirce a ghlacadh lena ndéantar an éagothromaíocht agus an t-eisiamh níos measa; ag spreagadh an Aontais agus na mBallstát cás agus riachtanais shonracha grúpaí leochaileacha a chur san áireamh; á iarraidh go mbunófaí sásra chun faireachán a dhéanamh ar chomhlíonadh na n-oibleagáidí sin;

48.á iarraidh ar na Ballstáit an Comhshocrú maidir le hImirce agus Tearmann a chur chun feidhme ina iomláine agus go tráthúil; á thabhairt chun suntais gur gá cloí leis an spriocdháta cur chun feidhme; á thabhairt dá haire, agus é ina ábhar imní di, go bhfuil easpa ullmhachta ag roinnt Ballstát chun an spriocdháta cur chun feidhme a chomhlíonadh, lena n-áirítear maidir le forálacha a bhaineann le cearta bunúsacha, agus ag spreagadh tacaíocht agus comhar leantach chun a chur chun fheidhme iomláin a áirithiú; á thabhairt chun suntais go n-aithnítear sa dlí idirnáisiúnta gur gníomh dleathach é tearmann a iarraidh agus, dá bhrí sin, nach féidir iarrthóir tearmainn a choinneáil gan chúis bunaithe amháin ar an bhforas gur iarrthóir tearmainn an duine sin; á mheabhrú nach mór rogha dheireanach a bheith i gceist le hiarrthóirí tearmainn a choinneáil murar féidir bearta malartacha nach bhfuil chomh comhéigneach sin a chur i bhfeidhm go héifeachtach; á chur i bhfáth nach mór aon choinneáil iarrthóirí tearmainn a bheith eisceachtúil, riachtanach agus comhréireach, agus nach bhféadfar í a ordú ach amháin ar bhonn measúnú aonair do na cúiseanna sonracha a thugtar faoi dhlí an Aontais;

49.ag cáineadh go láidir sáruithe ar chearta an duine ag teorainneacha, drochíde agus úsáid an fhoréigin ag údaráis náisiúnta amhail údaráis forfheidhmithe dlí agus gardaí teorann; á thabhairt dá haire gur minic nach ndéantar tuairisciú ná imscrúdú ar na cleachtais sin; á thabhairt dá haire, thairis sin, go bhfuil brú suntasach oibríochtúil fós ar roinnt Ballstát ag a dteorainneacha seachtracha; á chur i bhfios go láidir go n-éilíonn na dúshláin sin freagairt chomhordaithe Eorpach, lena n-áirítear nósanna imeachta cuíchóirithe éifeachtacha, i gcomhréir iomlán leis an gcreat dlíthiúil de chuid an Aontais agus idirnáisiúnta is infheidhme;

50.ag athdhearbhú na hoibleagáide faoi Dhlí Idirnáisiúnta na Farraige chun cabhrú le daoine atá i nguais, agus á iarraidh go práinneach ar an gCoimisiún agus ar na Ballstáit oibríochtaí buana comhordaithe cuardaigh agus tarrthála a bhunú le díbhordálacha tapa; á iarraidh, thairis sin, ar na Ballstáit gach beart is féidir a dhéanamh chun saol daoine atá i nguais ar farraige a shábháil; á iarraidh, thairis sin, go n-áiritheofaí gur féidir le hoibríochtaí cuardaigh agus tarrthála (SAR) oibriú i gcomhréir le dlí an Aontais agus leis an dlí idirnáisiúnta agus go ndéanfaí na hiarrachtaí sin a chomhordú, i gcás inar féidir, idir gníomhaithe ábhartha, lena n-áirítear údaráis na mBallstát, gníomhaireachtaí ábhartha an Aontais agus gníomhaithe neamhrialtasacha ábhartha;

51.á mheabhrú gur féidir Airteagal 46 den Rialachán maidir leis an nGníomhaireacht Eorpach um an nGarda Teorann Rialachán (AE) 2019/1896 ó Pharlaimint na hEorpa agus ón gComhairle an 13 Samhain 2019 maidir leis an nGarda Teorann agus Cósta Eorpach agus lena n-aisghairtear Rialacháin (AE) Uimh. 1052/2013 agus (AE) 2016/1624 (IO L 295, 14.11.2019, lch. 1, ELI: http://data.europa.eu/eli/reg/2019/1896/oj). a ghníomhú i gcásanna sáruithe féideartha ar chearta bunúsacha; á iarraidh ar an ngníomhaireacht úsáid iomlán a bhaint as na huirlisí atá ar fáil di go réamhghníomhach, go háirithe an fhéidearthacht Airteagal 46 a ghníomhú i gcásanna sáruithe féideartha ar chearta bunúsacha;

52.ag tathant ar na Ballstáit go gcuirfidís san áireamh na moltaí a rinne Coimisinéir Chomhairle na hEorpa um Chearta an Duine ina thuarascáil dar teideal ‘Protecting the Defenders: Ending repression of human rights defenders assisting refugees, asylum seekers and migrants in Europe’ [Na Cosantóirí a Chosaint: Deireadh a chur le cur faoi chois chosantóirí chearta an duine atá ag tabhairt cúnaimh do dhídeanaithe, iarrthóirí tearmainn agus imircigh san Eoraip] https://rm.coe.int/recommendation-protecting-the-defenders-ending-repression-of-human-rig/1680ae9b1c.; á chur i bhfáth a thábhachtaí atá sé plé poiblí a chothú atá bunaithe ar urraim do dhínit an duine, agus an tábhacht a bhaineann le hidirphlé poiblí atá bunaithe ar fhírinní agus freagrach maidir leis an imirce agus tearmann á chur i bhfios go láidir; ag cáineadh go láidir reitric fhrithdhídeanaithe agus fhrith-imirceach a tharlaíonn arís agus arís eile;

53.ag cáineadh go láidir go bhfuil cúlú ag tarlú ar chearta na mban agus cearta LADTIA+ i roinnt Ballstát; á iarraidh ar an gCoimisiún agus ar na Ballstáit an comhionannas inscne agus cearta bunúsacha a chosaint agus a chur chun cinn, lena n-áirítear trí aghaidh a thabhairt ar an mbréagaisnéis agus ar fheachtais eagraithe a bhfuil i gceist leo na cearta sin a theorannú, agus na bearta is gá a dhéanamh chun an ionadaíocht inscne a chur chun cinn;

54.ag tathant ar an gCoimisiún agus ar na Ballstáit na bearta is gá a dhéanamh chun gluaiseachtaí frithinscne agus frithchearta a chomhrac, lena n-áirítear gluaiseachtaí frith-LADTIA+, agus taighde, faireachán agus anailís dhomhain a dhéanamh ar thionchar na ngluaiseachtaí sin chun tuiscint níos soiléire a fháil ar a n-oibríochtaí, a gcomhordú agus a straitéisí maoiniúcháin; á chur i bhfáth gur ríthábhachtach an tuiscint sin chun Eoraip chuimsitheach chaoinfhulangach a choimirciú atá bunaithe ar na luachanna atá cuimsithe in Airteagal 2 CAE;

55.ag tathant ar an gCoimisiún a áirithiú, sa CAI nua, nach gcuirfear aon chistiú ón Aontas ar fáil do ghrúpaí frithinscne ná frithchearta arb é is aidhm leo an dul chun cinn i gcearta na mban agus cearta daoine LADTIA+ a tharraingt siar, ná d’aon ghrúpa ná tionscadal nach n-urramaíonn luachanna an Aontais ná na cearta bunúsacha a leagtar amach sa Chairt; ag tathant ar an gCoimisiún dlúthfhaireachán a dhéanamh ar chur chun feidhme cistí faoi bhainistíocht chomhroinnte sna Ballstáit arb é is aidhm dóibh comhionannas inscne a chur chun cinn agus tacú leis an tsochaí shibhialta, lena n-áirítear eagraíochtaí neamhrialtasacha do mhná, chun a áirithiú nach ndéanfar glaonna ar thograí chun cistí den sórt sin a fháil a chur ar sos nó a choinneáil siar d’aon ghnó;

56.á chur in iúl gur cúis mhór bhuartha di na hionsaithe, atá ag éirí níos tromchúisí agus níos tromchúisí, ar an bpobal LADTIA+ agus ar a gcearta bunúsacha i roinnt Ballstát; ag cur béim ar an bhfíoras go sáraítear, leis na hionsaithe sin, an ceart chun neamh-idirdhealaithe, an ceart chun comhionannas faoin dlí agus an ceart chun cosaint chomhionann gan idirdhealú faoin dlí; á iarraidh ar an Aontas agus ar na Ballstáit gach cineál foréigin agus idirdhealaithe in aghaidh daoine LADTIA+ a chomhrac agus aghaidh a thabhairt ar éagsúlachtaí i ndáil le cosaint a eascraíonn as cur chun feidhme neamhleanúnach beart cosanta ar fud na mBallstát; á chur in iúl gur geal léi Straitéis nua um Chomhionannas LADTIA+ 2026-2030, agus á iarraidh ar an gCoimisiún agus ar na Ballstáit a cur chun feidhme pras a áirithiú; á iarraidh ar na Ballstáit pleananna gníomhaíochta nó straitéisí náisiúnta nua LADTIA+ a athnuachan nó a ghlacadh chun tionscnaimh an Aontais a chomhlánú le bearta náisiúnta éifeachtacha;

57.á chur i bhfios go láidir gurb ionann an easpa nósanna imeachta dlíthiúla maidir le haitheantas inscne agus sárú ar chearta bunúsacha; ag cáineadh cleachtais tiontúcháin, amhail cleachtais atá dírithe ar ghnéaschlaonadh, féiniúlacht inscne agus/nó léiriú inscne duine a athrú nó a chur faoi chois, mar sháruithe ar chearta bunúsacha, agus ag tathant ar an gCoimisiún dul i ngleic leo trí ghníomhaíochtaí nithiúla; ag tathant thairis sin ar an gCoimisiún, i ndáil leis sin, togra a chur i láthair le haghaidh gníomh dlíthiúil lena leagtar amach toirmeasc de chuid an Aontais ar chleachtais tiontúcháin i ngach Ballstát mar ghníomh leantach don Tionscnamh Eorpach ó na Saoránaigh ‘Toirmeasc ar chleachtais tiontúcháin san Aontas Eorpach’;

58.á chur in iúl gur cúis mhór bhuartha di na cleachtais idirdhealaitheacha a tugadh isteach i roinnt Ballstát faoin leithscéal ‘bolscaireacht LADTIA+’ a chomhrac, lena bhfuiltear ag cur le méadú imníoch ar choireanna fuatha agus ar an bhfuathchaint atá dírithe ar dhaoine LADTIA+; á thabhairt chun suntais go bhfuil tionchar diúltach ag na bearta sin ar an tsaoirse cainte agus an tsaoirse chomhthionóil; ag cur béim ar an bhfíoras go spreagann na bearta seo idirdhealú agus go sáraíonn siad dlí an Aontais; á chur i bhfáth a thábhachtaí atá an ceart féinchinntiúcháin atá ag daoine LADTIA+ agus an cásdlí ábhartha i ndáil leis sin;

59.á iarraidh ar na Ballstáit uile cearta LADTIA+ a chosaint i gcomhréir le dlí an Aontais, leis an gCairt, agus le cásdlí CBAE agus ECtHR; ag tathant ar an gCoimisiún aghaidh a thabhairt ar an mainneachtain leantach breithiúnais CBAE a chur chun feidhme i ndáil le cearta bunúsacha daoine LADTIA+, agus úsáid á baint aige as gach sásra atá ar fáil dó;

60.á mheabhrú go leanann bacainní dlíthiúla de bheith ar aitheantas a thabhairt do pháirtnéireachtaí, tuismíocht agus póstaí comhghnéis thar teorainneacha i roinnt Ballstát; ag tabhairt rabhaidh go gcuireann na cleachtais sin bac ar shaorghluaiseacht teaghlach LADTIA+ laistigh den Aontas, go sáraíonn siad prionsabal an neamh-idirdhealaithe faoin dlí agus go leagann siad béim ar easpa na cosanta aonfhoirmí do dhaoine LADTIA+ ar fud na mBallstát; á iarraidh ar na Ballstáit nach bhfuil sin déanta fós acu aitheantas dlíthiúil a thabhairt isteach do pháirtnéireachtaí comhghnéis; á iarraidh ar an gCoimisiún Treoir 2004/38/CE Treoir 2004/38/CE ó Pharlaimint na hEorpa agus ón gComhairle an 29 Aibreán 2004 maidir le cearta shaoránaigh an Aontais agus ceart bhaill dá dteaghlaigh gluaiseacht agus cónaí faoi shaoirse ar chríoch na mBallstát lena leasaítear Rialachán (CEE) Uimh. 1612/68 agus lena n-aisghairtear Treoracha 64/221/CEE, 68/360/CEE, 72/194/CEE, 73/148/CEE, 75/34/CEE, 75/35/CEE, 90/364/CEE, 90/365/CEE agus 93/96/CEE (IO L 158, 30.4.2004, lch. 77, ELI: http://data.europa.eu/eli/dir/2004/38/oj). a athmhúnlú chun aitheantas follasach trasteorann do chearta príobháideacha agus teaghlaigh a chur san áireamh; á chur i bhfáth go bhfuil gach leanbh mar a chéile faoin dlí agus nach mór do gach Ballstát gníomhú ar mhaithe le leas an linbh;

61.á mheabhrú go bhfuil sainordú ag an bParlaimint maidir leis an Rialachán maidir le Tuismíocht, a thacaíonn le haithint na tuismíochta ar fud an Aontais gan beann ar chineál an teaghlaigh; á iarraidh ar na Ballstáit an Rialachán maidir le Tuismíocht a ghlacadh go pras chun cinnteacht dhlíthiúil a thabhairt do thuismitheoirí agus leanaí ar fud an Aontais agus a áirithiú go n-aithnítear tuismíocht a bhunaítear i mBallstát amháin de chuid an Aontais ar fud an Aontais; ag tathant ar an gCoimisiún urraim iomlán a áirithiú don tsaoirse gluaiseachta, do chearta an linbh, don cheart cónaithe agus don cheart chun athaontú teaghlach laistigh den Aontas, lena gceadaítear do gach saoránach tairbhiú as cearta comhionanna agus iad a fheidhmiú go hiomlán;

62.á chur in iúl gur geal léi Treochlár an Aontais um Chearta na mBan agus an Dearbhú prionsabal le haghaidh sochaí atá comhionann ó thaobh inscne de atá i gceangal leis sin; á chur in iúl gur oth léi, áfach, an easpa gealltanas láidir airgeadais; á chur in iúl gur cúis bhuartha di an leibhéal neamh-leordhóthanach uaillmhéine chun Aontas an Chomhionannais a chosaint agus a chur chun cinn;

63.á chur i bhfios go láidir gur cion mór agus rábach é an foréigean inscnebhunaithe, ar líne agus as líne araon, chomh maith le sárú ar chearta bunúsacha agus ar phrionsabal an chomhionannais faoin dlí; á iarraidh ar an gCoimisiún agus ar na Ballstáit bearta a dhéanamh in aghaidh gach cineáil foréigin inscnebhunaithe, ar líne agus as líne araon;

64.á chur in iúl gur cúis bhuartha di go leanann cineálacha agus pátrúin cibearfhoréigin inscnebhunaithe d’fhás; á chur i bhfios go láidir go bhfuil comhroinnt ábhair dhlúthphearsanta agus fuathchainte i measc na gcineálacha is forleithne cibearfhoréigin; á thabhairt chun suntais gur gá bearta a fhorbairt chun aghaidh a thabhairt ar fhás luachanna frithbhanda agus luachanna a mhéid a bhaineann leis an gcomhionannas inscne agus cearta na mban, agus dul i ngleic leis na luachanna sin; á chur i bhfáth go bhfuil gá le tuiscint níos doimhne ar fheiniméan an incel agus an idé-eolaíocht a bhaineann leis, agus ag cur béim ar a thábhachtaí atá cosc trí bhearta níos gníomhaí chun na feiniméin agus a n-insintí a fhritháireamh;

65.ag tathant ar an gCoimisiún agus ar na Ballstáit aghaidh a thabhairt ar an dochar féideartha, atá ag méadú, agus ar an éifeacht drochmhisnigh is féidir a bheith ag teicneolaíochtaí nua, lena n-áirítear an intleacht shaorga, ar íospartaigh, agus bearta coisctheacha agus tacaíochta a chur in áit; ag tathant thairis sin ar an gCoimisiún beart a dhéanamh in aghaidh an fhoréigin rábaigh ar líne a dhíríonn ar mhná, atá ina bhacainn mhéadaitheach ar rannpháirtíocht na mban sa saol poiblí agus ar an rannpháirtíocht chomhionann; ag tathant i ndáil leis sin ar an gCoimisiún agus ar na Ballstáit an reachtaíocht ábhartha a chur chun feidhme go hiomlán agus go cuí, go háirithe an Treoir maidir le foréigean in aghaidh na mban agus foréigean teaghlaigh a chomhrac Treoir (AE) 2024/1385 ó Pharlaimint na hEorpa agus ón gComhairle an 14 Bealtaine 2024 maidir le foréigean in aghaidh na mban agus foréigean teaghlaigh a chomhrac (IO L, 2024/1385, 24.5.2024, ELI: http://data.europa.eu/eli/dir/2024/1385/oj). agus GSD;

66.á chur in iúl gur saoth léi go mór agus ag cáineadh scaipeadh na coire fuatha agus na fuathchainte, lena n-áirítear ar na meáin shóisialta; á chur i bhfios go láidir gur bagairt thromchúiseach iad ar urraim don daonlathas, don smacht reachta agus do chearta bunúsacha; á chur i bhfios go láidir go bhfuil rioscaí ann don idirphlé daonlathach agus do chearta bunúsach nuair a dhéantar an tsaoirse chun tuairimí a nochtadh agus faisnéis a fháil a mhí-úsáid ag gluaiseachtaí agus polaiteoirí frithdhaonlathacha chun an fhuathchaint, an bhréagaisnéis agus imeaglú iriseoirí agus mionlach a dhlisteanú, agus ag cáineadh na rioscaí sin; á chur i bhfios go láidir nach mór an tsaoirse chun tuairimí a nochtadh a fheidhmiú laistigh den dlí agus i gcomhréir le hAirteagal 11 den Chairt agus nach féidir úsáid a bhaint aisti mar leithscéal as an mbonn a bhaint ón daonlathas agus ó chearta bunúsacha;

67.ag tathant ar an gCoimisiún agus ar na Ballstáit na bearta is gá a dhéanamh chun an fhuathchaint agus an choireacht fuatha a chomhrac, as líne agus ar líne araon, go háirithe i gcás inar féidir an t-iompar sin a ghéarú go pointe an fhoréigin, lena n-áirítear foréigean inscnebhunaithe; á chur i bhfáth, thairis sin, a thábhachtaí atá sé reachtaíocht de chuid an Aontais a chur in áit chun coireanna fuatha agus an fhuathchaint a chomhrac, lena n-áirítear ar fhorais amhail an fhéiniúlacht inscne agus an gnéaschlaonadh; ag spreagadh an Choimisiúin obair leantach a dhéanamh ar an Straitéis um Chomhionannas LADTIA+ 2026-2030; á chur in iúl gur geal léi an tionscnamh ón gCoimisiún chun liosta na gcoireanna san Aontas faoi Airteagal 83(1) CFAE a leathnú chun an fhuathchaint agus an choireacht fuatha a áireamh, agus béim á leagan ar an ngá atá le freagairt láidir ón Aontas, ó thaobh dlí coiriúil de, i ndáil leis sin;

68.ag tathant ar an gComhairle an liosta reatha ‘coireanna san Aontas’ faoi Airteagal 83(1) CFAE a leathnú chun an fhuathchaint agus an choireacht fuatha a áireamh; á iarraidh ar an gComhairle an ‘clásal passerelle’ a ghníomhú i ndáil leis sin; á iarraidh ar an gCoimisiún a bheith réidh tús a chur leis an dara céime den nós imeachta agus treoir a mholadh a mbeadh sé mar aidhm léi an fhuathchaint agus coireanna fuatha a chomhrac as líne agus ar líne araon, agus seasamh na Parlaiminte i ndáil leis sin a chur san áireamh https://www.europarl.europa.eu/doceo/document/TA-9-2024-0044_EN.html.;

69.ag cur béim ar an bhfíoras gurb ionann easpa rochtana ar shláinte agus cearta gnéis agus atáirgthe, nó diúltú rochtana ar an tsláinte agus na cearta sin, lena n-áirítear ginmhilleadh sábháilte agus dlíthiúil, agus cineál foréigin inscnebhunaithe agus sárú ar chearta an duine agus ar chearta bunúsacha; ag tathant ar an gCoimisiún obair a dhéanamh go gníomhach i dtreo inrochtaineacht fhorleathan a áirithiú ar shláinte agus cearta gnéis agus atáirgthe; ag athdhearbhú a hiarrata go n-áireofaí an ceart chun ginmhillte shábháilte agus dhlíthiúil sa Chairt;

70.ag tathant ar an gCoimisiún obair leantach cuí a áirithiú ar an Tionscnamh Eorpach ó na Saoránaigh ‘Mo Ghuth Mo Rogha: Ar Mhaithe le Ginmhilleadh Sábháilte Inrochtana’ agus togra a chur isteach le haghaidh sásra maoiniúcháin chun tacú leis na Ballstáit atá toilteanach seirbhísí sábhailte cúraim sláinte gnéis agus atáirgthe a sholáthar, lena n-áirítear ginmhilleadh sábháilte dlíthiúil, dóibh sin san Aontas a bhfuil easpa rochtana fós acu ar na seirbhísí sin;

71.á chur i bhfáth nach bhfuil aon sainmhíniú uile-Aontais fós ann ar éigniú bunaithe ar an easpa toilithe; á iarraidh ar na Ballstáit a áirithiú nach nglactar leis sa dlí ná sa chleachtas go dtugtar toiliú i gcás ina bhfuil easpa diúltaithe d’iompar gnéis, gan beann ar má d’úsáid an ciontaí foréigean ná má bhagair an ciontaí foréigean, nó má tá an t-íospartach i ndlúthchaidreamh, ná pósta, leis an gciontaí; ag tathant ar na Ballstáit nach ndearna amhlaidh go fóill sainmhíniú a áireamh ina reachtaíocht náisiúnta ar an éigniú bunaithe ar easpa toilithe a thugtar go saor, i gcomhréir le Coinbhinsiún Iostanbúl agus le caighdeáin idirnáisiúnta atá ag forbairt; á iarraidh ar an gCoimisiún togra a chur ar aghaidh le haghaidh an tsainmhínithe sin ar leibhéal an Aontais; ag athdhearbhú gur sárú tromchúiseach ar chearta agus ar dhínit an duine é an foréigean gnéis, lena n-áirítear éigniú;

72.ag meabhrú chorpas na ndoiciméad a foilsíodh i ndáil leis an gciontóir gnéis ciontaithe Jeffrey Epstein, lena léirítear go ndearnadh an iliomad coireanna agus, dá bhrí sin, go bhfuil grúpa mór déantóirí coire faoi cheilt; ag tabhairt dá haire go bhfuil sé dea-doiciméadaithe go raibh líonra domhain ag Epstein i measc na maithe agus na móruaisle ar fud na hEorpa, lena n-áirítear ríchíosanna, ardtaidhleoirí agus polaiteoirí; ag cáineadh an fhíorais nár suíodh go fóill cé mhéad acu, agus cé na baill den líonra sin, a bhí ar an eolas faoi gháinneáil ar dhaoine, faoi theacht i dtír gnéasach ar leanaí, faoi chalaois agus faoi choireacht airgeadais nó a raibh baint acu leo; á chur i bhfáth ní hamháin gur cúis mhór imní é nár gabhadh na daoine aonair sin fós, ach freisin go mbaineann an easpa cuntasachta iomláine an bonn den smacht reachta agus de mhuinín an phobail as institiúidí daonlathacha; á chur i bhfáth gur cheart aghaidh a thabhairt ar leibhéal an Aontais ar chásanna a bhaineann le gnéithe trasteorann laistigh den Aontas; ag ceistiú chumas an Aontais coireacht chasta trasteorann arna déanamh ag scothaicmí na sochaí a imscrúdú, a chosc agus a chomhrac; ag tathant ar an gCoimisiún a chur de chúram go pras ar lárionad saineolaithe AE um chosc na coireachta (Europol), in éineacht leis an Oifig Eorpach Frith-Chalaoise agus leis na húdaráis náisiúnta, imscrúdú agus anailís a dhéanamh ar chineál na gníomhaíochta coiriúla sin, mar aon leis na daoine is féidir a thabhairt chun cuntais a shainaithint.

73.ag tathant ar na Ballstáit aitheantas foirmiúil a thabhairt don fheimeamharú mar choir shonrach inscnebhunaithe sa reachtaíocht náisiúnta, straitéisí cuimsitheacha a ghlacadh agus a fhorfheidhmiú chun é a chosc agus a chomhrac, chun a áirithiú go ndéanfar gach cás a imscrúdú agus a ionchúiseamh go héifeachtach, agus chun tearmainn, comhairleoireacht agus sásraí cúitimh speisialta a sholáthar do ghaolta na n-íospartach;

74.ag cáineadh, gan fiacail a chur ann, úsáid an éignithe agus cineálacha eile foréigin ghnéasaigh mar arm cogaidh go láidir agus á mheabhrú go bhféadfadh an t-iompar sin a bheith ina choir chogaidh nó ina choir in aghaidh an chine dhaonna faoin dlí idirnáisiúnta; ag tathant go neartófaí iarrachtaí idirnáisiúnta chun na coireanna sin a dhoiciméadú, agus ag cur béim ar a thábhachtaí atá sé rochtain a áirithiú ar ghinmhilleadh sábháilte agus dlíthiúil d’íospartaigh an fhoréigin gnéis, lena n-áirítear íospartaigh éignithe i gcomhthéacs cogaidh;

75.á iarraidh ar gach Ballstát Coinbhinsiún Iostanbúl a dhaingniú; á chur in iúl gur cúis mhór bhuartha di na Ballstáit nár dhaingnigh go fóill é agus aon tarraingt siar ó Choinbhinsiún Iostanbúl; á chur i bhfios go láidir go bhfuil na hathruithe sin mar gheall ar fheachtas faidréiseach bréagaisnéise maidir le raon feidhme agus aidhm an Choinbhinsiúin ag fórsaí frithdhaonlathacha ar fud an Aontais;

76.á mheabhrú go bhfuil an toirmeasc ar chéasadh agus íde neamhdhaonna nó tháireach, arna leagan amach in Airteagal 4 den Chairt agus Airteagal 3 ECHR, dearbh agus domhaolaithe, agus go bhfuil feidhm acu maidir le gach duine uile, lena n-áirítear iad siúd a bhfuil saoirse glactha uathu; ag tathant ar na Ballstáit a áirithiú gur féidir leis an gCoiste Eorpach chun Céastóireacht a Chosc agus sásraí coisctheacha náisiúnta cuairteanna neamhtheoranta a thabhairt ar gach ionad coinneála agus go gcuirfí a moltaí chun feidhme go hiomlán;

77.á thabhairt dá haire, agus é ina chúis imní di, go n-úsáidtear coinneáil réamhthrialach i roinnt Ballstát go hiomarcach nó gan údar leordhóthanach; ag tathant ar na Ballstáit a áirithiú nach n-úsáidfear baint na saoire roimh thriail ach amháin mar rogha dheiridh, i gcomhréir iomlán le caighdeáin ECHR agus le toimhde na neamhchiontachta, agus chun maoirseacht bhreithiúnach agus athbhreithniú tréimhsiúil ar chinntí coinneála a neartú;

78.ag cáineadh an phlódaithe chórasaigh, na heaspa cúraim sláinte agus fadú neamhdhleathach na coinneála réamhthrialach go láidir; á iarraidh ar an gCoimisiún agus ar na Ballstáit a áirithiú go gcomhlíonfar Rialacha Nelson Mandela, Coinbhinsiún na Náisiún Aontaithe in aghaidh na Céastóireachta agus a Phrótacal Roghnach agus Rialacha Príosúnachta na hEorpa go hiomlán trí dhálaí coinneála a fheabhsú i ngach príosún agus bearta coisctheacha athshlánúcháin, lena n-áirítear i saoráidí óige, chomh maith le dul i ngleic leis an plódú, lena n-áiritheofaí rochtain ar chúram sláinte agus tacaíocht shíceolaíoch agus neartú beart lena gcoisctear féinmharú; á chur i bhfáth gur léiriú ar neart sochaí daonlathaí í cosaint dhínit an duine;

79.á iarraidh ar an gCoimisiún aghaidh a thabhairt ar sháruithe tromchúiseacha i bpríosúin, i gcomhréir leis an oibleagáid atá ar an Aontas seasamh leis na luachanna atá cumhdaithe in Airteagal 2 CAE;

80.á mheabhrú, de réir Airteagal 11(2) CAE, nach mór d’institiúidí an Aontais idirphlé oscailte, trédhearcach agus struchtúrtha a choinneáil ar bun le ESSanna agus le comhlachais ionadaíocha; á iarraidh ar an gCoimisiún agus ar na Ballstáit próisis éifeachtacha chomhairliúcháin a áirithiú i gcomhréir le caighdeáin dea-rialachais, chun rannpháirtíocht agus rannpháirteachas éifeachtach na saoránach agus ESSanna sa cheapadh beartais a áirithiú, lena n-áirítear maidir le hábhair a bhaineann le cosaint agus cur chun cinn ceart bunúsach, agus tacú lena n-acmhainneacht chun bheith rannpháirteach i mbeartais an Aontais, agus trédhearcacht agus comhlíonadh iomlán na rialacha is infheidhme á n-áirithiú;

81.á iarraidh ar an gCoimisiún agus ar na Ballstáit cistiú inbhuanaithe, solúbtha agus inrochtana do ESSanna, agus rochtain ar an gceartas, a áirithiú;

82.á chur in iúl gur geal léi an togra ón gCoimisiún, i gcomhthéacs an chéad CAI eile, chun ath-leithdháileadh cistí reoite ar ESSanna a chumasú, agus á chur i bhfáth gur gá a ráthú gur féidir le cion de na hacmhainní sin tacú le heagraíochtaí a oibríonn chun cearta bunúsacha agus luachanna eile de chuid an Aontais a chur chun cinn i mBallstáit ina leanann cistí de bheith reoite; á mheabhrú a thábhachtaí atá an Clár um Shaoránaigh, Comhionannas, Cearta agus Luachanna (CERV) maidir le cearta agus luachanna a chumhdaítear sna Conarthaí, sa Chairt agus sna coinbhinsiúin idirnáisiúnta is infheidhme maidir le cearta an duine a chosaint agus a chur chun cinn, go háirithe trí thacú le ESSanna agus trí rannpháirtíocht shibhialta agus dhaonlathach a spreagadh, chun sochaithe oscailte, cearta-bhunaithe, daonlathacha, comhionanna agus cuimsitheacha a chothú agus a fhorbairt tuilleadh; á mheas nach mór don chlár nua AgoraEU an leibhéal uaillmhéine céanna le clár CERV a choimirciú ar a laghad;

83.a chur in iúl gur geal léi straitéis an Aontais don tsochaí shibhialta ón gCoimisiún; á chur in iúl gur geal léi, thairis sin, go bhfuil an straitéis dírithe ar ESSanna agus cosantóirí chearta an duine, agus go n-áirítear inti gníomhaíochtaí amhail rannpháirtíocht éifeachtach agus fhóinteach leis an tsochaí shibhialta a neartú, spás sibhialta oscailte, sábháilte agus cumasúcháin a áirithiú trí thacaíocht agus cosaint a thabhairt, lena n-áirítear laghdú ar ualaí riaracháin do ESSanna ar an láthair, agus tacú le ESSanna le cistiú leormhaith, inbhuanaithe agus trédhearcach; ag tathant ar an gCoimisiún cur chun feidhme iomlán na straitéise a áirithiú agus faireachán córasach a dhéanamh ar chás an spáis shibhialta ina thuarascálacha ar an smacht reachta;

84.á chur in iúl gur cúis mhór bhuartha di an spás sibhialta atá ag laghdú agus an méadú atá ag teacht ar ionchúiseamh ESSanna agus chosantóirí chearta an duine i roinnt Ballstát, go háirithe iad siúd atá ag obair sna réimsí maidir le frithchiníochas, cosaint na haeráide, cearta LADTIA+, cearta na mban agus imirce; ag tabhairt dá haire go bhfuil raon bagairtí roimh na grúpaí sin, srianta dlíthiúla agus airgeadais, fionraíochtaí cistiúcháin, feachtais chlúmhillte, imeaglú agus coiriúlú san áireamh; á chur in iúl gur oth léi gur minic go dtéann srianta ar na saoirsí cainte, chun tuairimí a nochtadh, agus comhlachais i bhfeidhm go neamhréireach ar ghrúpaí nó cúiseanna sonracha;

85.á chur i bhfáth gur cearta bunúsacha iad an ceart chun comhthionól síochánta, saoirse comhlachais agus tuairimí a nochtadh, agus saoirse na n-ealaíon agus na n-eolaíochtaí, a chosnaítear leis an dlí idirnáisiúnta, agus go bhfuil siad bunriachtanach don daonlathas; á chur i bhfios go láidir go bhfuil an tsaoirse comhlachais, mar a ráthaítear le hAirteagal 12 den Chairt agus Airteagal 11 ECHR, ina cloch choirnéil do shochaí dhaonlathach;

86.ag cáineadh choiriúlú oibrithe daonnúla agus gníomhaithe daonnúla; ag spreagadh na mBallstát a áirithiú nach ndéanfar cúnamh daonnúil a thugtar do dhaoine leochaileacha a choiriúlú; á mheabhrú nach mór do reachtaíocht an Aontais a bheith ailínithe le caighdeáin Eorpacha agus idirnáisiúnta maidir le cearta an duine, agus á iarraidh ar an gCoimisiún agus ar na Ballstáit aghaidh a thabhairt ar na cásanna ina bhfuil an t-ailíniú sin in easnamh;

87.á thabhairt dá haire, agus é ina ábhar imní di, go bhfuil bearta díréireacha curtha i bhfeidhm ag roinnt Ballstát agus tíortha is iarrthóirí agus tíortha is iarrthóirí féideartha ar oibrithe agus gníomhaithe daonnúla; ag cáineadh go láidir úsáid ‘dlíthe na ngníomhairí eachtracha’, a shrianann easaontú, a dhíríonn ESSanna agus a shrianann a n-oibríochtaí, lena gcruthaítear éifeacht drochmhisnigh ar an tsochaí shibhialta agus ar chosantóirí chearta an duine; ag cáineadh na mbeart díréireach i roinnt Ballstát in aghaidh agóidí síochánta, lena n-áirítear toirmisc réamhchoisctheacha, úsáid an fhórsa iomarcaigh agus coinneáil agóideoirí, a bhfuil éifeachtaí drochmhisnigh ag gabháil leo; á iarraidh ar na Ballstáit staonadh ó ghníomh dlíthiúil díréireach in aghaidh na ndaoine sin a bhfuil páirt á glacadh acu in agóidí síochánta;

88.ag tathant ar an gCoimisiún agus ar na Ballstáit a áirithiú gur féidir an ceart chun comhthionól síochánta a fheidhmiú, staonadh ó bhearta a mholadh ná a chur chun feidhme a bhféadfadh éifeacht drochmhisnigh a bheith acu ar an spás sibhialta, agus imní á chur in iúl go bhfacthas iarrachtaí mar sin i roinnt Ballstát, agus idirphlé sláintiúil a éascú maidir le haon ábhar imní poiblí; ag cáineadh cleachtas ar bith a bhfuil éifeacht drochmhisnigh aige ar agóidí síochánta, amhail úsáid an fhórsa iomarcaigh, faireachas agus ciapadh breithiúnach;

89.á iarraidh ar an gCoimisiún sásra mearfhreagartha a chur ar bun san Aontas chun tacú le ESSanna agus cosantóirí chearta an duine a chosnaíonn luachanna an Aontais agus a chuireann chun cinn iad; á iarraidh ar an gCoimisiún innéacs a bhunú don spás sibhialta Eorpach agus faireachán agus tuairisciú a dhéanamh go bliantúil ar an timpeallacht chumasaithe don tsochaí shibhialta; á iarraidh thairis sin go mbeadh trédhearcacht ann do chistiú gach gníomhaí i gClár Trédhearcachta an Aontais;

90.ag tathant ar na Ballstáit Moladh (AE) 2022/758 ón gCoimisiún maidir le hiriseoirí agus cosantóirí chearta an duine a bhíonn i mbun rannpháirtíocht an phobail a chosaint Moladh (AE) 2022/758 ón gCoimisiún an 27 Aibreán 2022 maidir le hiriseoirí agus cosantóirí chearta an duine a bhíonn i mbun rannpháirtíocht an phobail a chosaint ó imeachtaí cúirte ar follasach go bhfuil siad gan bhunús nó mí-úsáideach (‘Cúiseanna dlí straitéiseacha in aghaidh rannpháirtíocht an phobail’) (IO L 138, 17.5.2022, lch. 30, ELI: http://data.europa.eu/eli/reco/2022/758/oj). a chur chun feidhme;

91.á mheabhrú go gcumhdaítear i gConarthaí an Aontais agus sa Chairt sainordú agus freagracht an Aontais maidir le hidirdhealú a chomhrac agus cóir chomhionann do chách a chur chun cinn; á iarraidh ar an gCoimisiún aghaidh a thabhairt ar na bearnaí i gcreat frith-idirdhealaithe an Aontais agus ag tathant ar na Ballstáit reachtaíocht frith-idirdhealaithe reatha an Aontais a chur chun feidhme go hiomlán agus i gceart;

92.á chur in iúl gur geal léi cinneadh an Choimisiúin tarraingt siar na Treorach Cothrománaí Frith-Idirdhealaithe a bhí beartaithe a aisiompú; ag athdhearbhú a hiarrataí chun deireadh a chur leis an mbac ar phléití sa Chomhairle maidir leis an Treoir gan mhoill agus ag tathant ar na Ballstáit comhaontú ina leith a thabhairt chun críche;

93.ag aithint agus ag cáineadh an chiníochais struchtúraigh san Aontas a spreagtar le steiréitíopaí a chothaítear le dioscúrsa poiblí, a ndéantar idirdhealú ar mhionlaigh eitneacha de thoradh air sin i ngach réimse dá saol; á chur in iúl gur cúis mhór bhuartha di cineálacha aonair, struchtúracha agus institiúideacha ciníochais agus seineafóibe san Aontas agus an t-idirdhealú atá ag dul i méid in aghaidh na nArabach https://fra.europa.eu/sites/default/files/fra_uploads/fra-2017-eu-midis-ii-main-results_en.pdf., na nEorpach Dubh https://fra.europa.eu/en/publication/2026/antisemitism-overview., daoine de bhunadh na hÁise https://fra.europa.eu/en/publication/2024/being-muslim-eu., daoine Giúdacha https://fra.europa.eu/en/publication/2025/roma-survey-2024., Moslamacha https://infocuria.curia.europa.eu/tabs/document?source=document&text=&docid=300973&pageIndex=0&doclang=EN&mode=req&dir=&occ=first∂=1&cid=900537. agus Romaigh https://fra.europa.eu/en/publication/2025/roma-survey-2024.; ag tathant ar na Ballstáit idirdhealú a chomhrac ar gach leibhéal;

94.á chur i bhfáth gur gá gach cineál idirdhealaithe a chomhrac faoin dlí; á chur in iúl gur cúis bhuartha di an easpa dul chun cinn sa reachtaíocht chomhionannais agus frith-idirdhealaithe agus ina cur chun feidhme i roinnt Ballstát; á chur in iúl gur oth léi, d’ainneoin reachtaíocht reatha an Aontais amhail Treoir 2000/78/CE maidir le cóir chomhionann Treoir 2000/78/CE ón gComhairle an 27 Samhain 2000 lena mbunaítear creat ginearálta le haghaidh na córa comhionainne san fhostaíocht agus sa tslí bheatha (IO L 303, 2.12.2000, lch. 16, ELI: http://data.europa.eu/eli/dir/2000/78/oj)., go bhfuil bearnaí fós sa chreat dlíthiúil, ina chur chun feidhme agus ina fhorfheidhmiú, rud a fhágann íospartaigh gan cúiteamh dlíthiúil leormhaith; á mheabhrú nach mór do chreataí dlíthiúla na mBallstát prionsabal na córa comhionainne a chumhdach laistigh dá gcórais dhlíthiúla agus rochtain éifeachtach a áirithiú ar cheartas do gach duine; á iarraidh ar an gCoimisiún gníomhú i gcásanna nach gcomhlíontar na prionsabail sin;

95.á chur i bhfios go láidir gur cheart go mbeadh rochtain ar chistí an Aontais choinníollach ar chomhlíonadh iomlán na gceart bunúsach, lena n-áirítear prionsabal an neamh-idirdhealaithe, agus á iarraidh go mbeadh comharthú trédhearcach ann chun tacaíocht fhadtéarmach a ráthú do chearta an duine agus ESSanna atá dírithe ar an gcomhionannas;

96.ag tathant ar na Ballstáit, go háirithe an Ungáir, athbhreithniú a dhéanamh ar aon dlí nó beartas lena ndéantar idirdhealú ar dhaoine LADTIA+ agus ar theaghlaigh bogha ceatha; á iarraidh ar an Ungáir a áirithiú nach féidir creataí náisiúnta bunreachtúla agus reachtaíochta a mhí-úsáid chun an bonn a bhaint ó thosaíocht dhlí an Aontais ná chun mionlaigh a stiogmatú trí ‘aitheantas náisiúnta’ a úsáid mar leithscéal; ag cáineadh chur chun feidhme leantach an dlí um chosaint leanaí, mar a thugtar air, san Ungáir go láidir, arb ionann é agus idirdhealú díreach atá i gcodarsnacht le hAirteagail 7, 11, 21 agus 24 den Chairt https://infocuria.curia.europa.eu/tabs/document?source=document&text=&docid=300973&pageIndex=0&doclang=EN&mode=req&dir=&occ=first&part=1&cid=900537.; á iarraidh ar an gCoimisiún measúnú práinneach a dhéanamh ar chomhoiriúnacht dhlí na hUngáire maidir le cosaint an aitheantais áitiúil le dlí an Aontais, go háirithe an Treoir maidir le Comhionannas Ciníoch agus an Chairt;

97.á iarraidh ar an gCoimisiún gach beart is gá a dhéanamh, lena n-áirítear nósanna imeachta um shárú a sheoladh, i gcás ina sainaithnítear sáruithe; á iarraidh ar na Ballstáit a áirithiú go gcomhlíonann beartais áitiúla tithíochta agus chónaithe prionsabail an chomhionannais agus an neamh-idirdhealaithe agus nach dtarlaíonn leithscaradh eitneach ná socheacnamaíoch de thoradh orthu;

98.á chur i bhfios go láidir gurb í tosaíocht dhlí an Aontais an chloch choirnéil d’fheidhmiú an Aontais agus d’urramú an smachta reachta ar fud na mBallstát, a dtugann gach Ballstát gealltanas ina leith tráth an aontachas; ag tathant ar na Ballstáit uile cloí le cásdlí reatha CBAE agus ECtHR; á iarraidh ar an gCoimisiún faireachán cúramach a dhéanamh ar chur chun feidhme ag na Ballstáit maidir le breithiúnais arna dtabhairt ag CBAE agus ECtHR, agus aird ar leith á tabhairt ar bhreithiúnais lena mbaineann neamh-idirdhealú, chomhionannas inscne agus cearta na mionlach;

99.á iarraidh ar an gCoimisiún straitéisí nua uaillmhianacha comhionannais agus frithchiníochais a chur i láthair do na blianta atá amach romhainn, ina n-áireofar moltaí na Parlaiminte freisin, chun aghaidh a thabhairt ar an idirdhealú go cuimsitheach ar fud gach forais agus réimse saoil; á chur i bhfios go láidir gur gá cur chuige cuimsitheach agus comhordaithe a áirithiú ar fud na straitéisí, creataí, agus pleananna gníomhaíochta uile atá ann cheana agus atá ar na bacáin, chun sineirgí a uasmhéadú agus comhleanúnachas a áirithiú ina gcur chun feidhme;

100.á iarraidh ar na Ballstáit pleananna gníomhaíochtaí náisiúnta in aghaidh an chiníochais nó straitéisí le caighdeáin uaillmhianacha, lena n-áirítear spriocanna, amlínte agus buiséid shoiléire a ghlacadh agus a chur chun feidhme go hiomlán; á iarraidh ar an gCoimisiún sásraí faireacháin rialta a áirithiú, i gcomhar leis an tsochaí shibhialta;

101.á chur i bhfios go láidir nach mór caitheamh le náisiúnaigh tríú tíortha san Aontas ar bhealach neamh-idirdhealaitheach; á thabhairt dá haire go bhfuil an ceart ag náisiúnaigh tríú tíortha iarratas a dhéanamh ar chosaint idirnáisiúnta faoin dlí idirnáisiúnta agus faoi dhlí an Aontais, lena n-áirítear i gcomhréir le prionsabal an non-refoulement; á iarraidh ar na Ballstáit le linn an smacht reachta agus na cearta bunúsacha a chlúdaítear sa Chairt a chaomhnú agus le linn an reachtaíocht arna glacadh ag na comhreachtóirí a chur chun feidhme; á chur i bhfáth go bhfuil rialuithe CBAE agus ECtHR ceangailteach;

102.á iarraidh ar an gCoimisiún agus ar na Ballstáit próifíliú ciníoch agus cleachtais idirdhealaitheacha eile a thoirmeasc, lena n-áirítear ag teorainneacha, acmhainní suntasacha a leithdháileadh ar thionscnaimh atá bunaithe ar chuimsiú agus cearta agus sásraí neamhspleácha faireacháin, cuntasachta agus gearán a bhunú; á iarraidh ar an gCoimisiún measúnuithe tionchair ceangailteacha maidir le cearta an duine agus comhionannas a bhunú chun idirdhealú algartamach a chosc; á iarraidh, thairis sin, ar an gCoimisiún agus ar na Ballstáit aghaidh a thabhairt ar nochtach díréireach na bpobal radacaithe ar an truailliú, ar an díghrádú comhshaoil agus ar rioscaí a bhaineann leis an aeráid;

103.á iarraidh ar na Ballstáit institiúidí náisiúnta um chearta an duine a bhunú, i gcomhréir le Prionsabail Pháras na Náisiún Aontaithe, chun a neamhspleáchas agus a n-acmhainneacht chun a gcúraimí a chur i gcrích go héifeachtach a ráthú, agus chun coimircí in aghaidh na trasnaíochta polaitiúla;

104.á iarraidh ar na Ballstáit Treoir (AE) 2024/1500 Treoir (AE) 2024/1500 ó Pharlaimint na hEorpa agus ón gComhairle an 14 Bealtaine 2024 maidir le caighdeáin le haghaidh comhlachtaí comhionannais i réimse na córa comhionainne agus an chomhionannais deiseanna idir mná agus fir i gcúrsaí fostaíochta agus slí beatha, agus lena leasaítear Treoracha 2006/54/CE agus 2010/41/AE (IO L, 2024/1500, 29.5.2024, ELI: http://data.europa.eu/eli/dir/2024/1500/oj). agus Treoir (AE) 2024/1499 Treoir (AE) 2024/1499 ón gComhairle an 7 Bealtaine 2024 maidir le caighdeáin le haghaidh comhlachtaí comhionannais i réimse na córa comhionainne idir daoine gan beann ar a dtionscnamh ciníoch nó eitneach, na córa comhionainne i gcúrsaí fostaíochta agus slí beatha idir daoine gan beann ar reiligiún nó creideamh, míchumas, aois nó claonadh gnéasach, na córa comhionainne idir mná agus fir i gcúrsaí slándála sóisialta ina rochtain ar earraí agus ar sheirbhísí agus ó thaobh soláthar earraí agus seirbhísí, agus lena leasaítear Treoracha 2000/43/CE agus 2004/113/CE (IO L, 2024/1499, 29.5.2024, ELI: http://data.europa.eu/eli/dir/2024/1499/oj). a chur chun feidhme go hiomlán, lena mbunaítear íoschaighdeáin do Chomhlachtaí Comhionannais; á iarraidh go ndéanfaí bearta nithiúla chun neamhspleáchas na gcomhlachtaí comhionannais a ráthú agus chun a n-éifeachtacht a áirithiú le linn comhionannas a chur chun cinn; ag spreagadh tacaíocht do ESSanna maidir le tionscnaimh oideachais a fhorbairt agus a scaipeadh chun an comhionannas a chur chun cinn agus for-rochtain agus inrochtaineacht fhorleathan a áirithiú;

105.á iarraidh ar an gCoimisiún agus ar na Ballstáit beart éifeachtach a dhéanamh in aghaidh an fhrith-Sheimíteachais, an chiníochais, an fhuatha ban, na homafóibe, na trasfhóibe agus in aghaidh aon chineáil eile claontachta, éadulaingthe, idirdhealaithe agus coireachta fuatha ar bhealach iomlánaíoch; á iarraidh thairis sin go mbeadh iarrachtaí marthanacha ann ar leibhéal an Aontais agus ar na leibhéil náisiúnta chun faireachán a dhéanamh ar choireanna fuatha agus chun iad a chosc agus a ionchúiseamh agus chun mionlaigh a chosaint;

106.á thabhairt dá haire, agus é ina ábhar imní di, fionnachtana FRA, ina léirítear ardú suntasach ar an bhfrith-Sheimíteachas ar fud an Aontais, lena n-áirítear ar líne, i spásanna poiblí agus laistigh de phobail áitiúla; á chur i bhfáth go dtuairiscíonn go leor daoine Giúdacha bacainní ar a gcéannachtaí a chur in iúl go hoscailte agus go leanann ábhair imní maidir leis an tsláinte de bheith rompu; ag tathant ar an gCoimisiún agus ar na Ballstáit sásraí coisc, tuairiscithe agus tacaíochta d’íospartaigh a neartú, dlús a chur le cur chun feidhme straitéis an Aontais maidir leis an bhfrith-Sheimíteachas a chomhrac agus forfheidhmiú iomlán dhlí an Aontais agus an dlí náisiúnta a áirithiú, agus bearta oideachais, múscailte feasachta agus slándála a fheabhsú i gcás inar gá; ag cáineadh leibhéal an fhrith-Sheimíteachais, atá ag dul i méid ar fud an Aontais, go láidir;

107.á chur in iúl gur cúis bhuartha go bhfuil roinnt beartas arna nglacadh i roinnt Ballstát ina gcúis le hidirdhealú in aghaidh grúpaí áirithe, lena n-áirítear iad sin a shainítear de réir cine, datha, bunadh eitneach, teanga, reiligiúin, míchumais nó gnéaschlaonta; ag cáineadh go n-áirítear in éifeachtaí na mbeartas sin cleachtais idirdhealaitheacha dhlíthiúla agus forfheidhmithe dlí, chomh maith le dídhlisteanú – agus i gcásanna áirithe coiriúlú nó iarracht ar choiriúlú – dioscúrsaí polaitiúla, reiligiúnacha agus cineálacha eile dioscúrsa; á iarraidh ar na Ballstáit staonadh ó chleachtais den chineál sin nó ó bheartais agus reachtaíocht a ghlacadh a bhféadfadh na hiarmhairtí sin ar na grúpaí sin a bheith de thoradh orthu;

108.ag cáineadh aon chineáil idirdhealaithe agus naimhdis in aghaidh pobail reiligiúnacha go láidir, lena n-áirítear Ioslamafóibe, agus gach cineáil idirdhealaithe agus ciníochais eile ar fud an Aontais, lena n-áirítear gníomhaíochta foréigneacha, imeaglú, fuathchaint agus taispeáint comharthaí fuatha i spásanna poiblí; á iarraidh ar na Ballstáit agus ar thíortha is iarrthóirí a chinntiú go gcaithfear le baill de gach mionlach go comhionann faoin dlí;

109.á iarraidh ar an gCoimisiún agus ar na Ballstáit aghaidh a thabhairt ar an idirdhealú agus ar an eisiamh sóisialta a bhíonn os comhair grúpaí leochaileacha, lena n-áirítear Romaigh, agus cur chun feidhme éifeachtach chreat straitéiseach an Aontais le haghaidh chomhionannas, chuimsiú agus rannpháirtíocht na Romach a áirithiú; ag tathant ar na Ballstáit breithiúnais ECtHR a chur chun feidhme a mhéid a bhaineanna le cearta na Romach, agus á iarraidh ar an gCoimisiún faireachán a dhéanamh ar a gcur chun feidhme;

110.á iarraidh ar an gCoimisiún agus ar na Ballstáit idirdhealú in aghaidh daoine faoi mhíchumas a chomhrac agus a gcuimsiú agus rannpháirtíocht iomlán sa tsochaí a chur chun cinn; á iarraidh, thairis sin, ar an Aontas agus ar na Ballstáit moltaí Choinbhinsiún na Náisiún Aontaithe ar Chearta Daoine faoi Mhíchumas a leanúint maidir le deireadh a chur le hidirdhealú in aghaidh gach duine faoi mhíchumas agus a áirithiú go dtairbhíonn siad ar bhonn comhionann de na cearta bunúsacha agus de rannpháirtíocht iomlán i ngach réimse den tsochaí https://tbinternet.ohchr.org/_layouts/15/treatybodyexternal/Download.aspx?symbolno=CRPD%2FC%2FEUR%2FCO%2F2-3&Lang=en.;

111.ag cáineadh gach cineáil foréigin agus comhéigin in aghaidh daoine faoi mhíchumas, go háirithe aimridiú éigeantais, arb ionann é agus sárú tromchúiseach ar dhínit an duine agus ar shláine an choirp; á iarraidh ar an gCoimisiún agus ar na Ballstáit aimridiú éigeantais bunaithe ar mhíchumas nó acmhainneacht dhlíthiúil a choiriúlú gan eisceacht agus cúiteamh a sholáthar do mharthanóirí; á iarraidh go mbeadh plean gníomhaíochta de chuid an Aontais ann maidir le comhionannas agus trasnachas; ag tathant go n-aithneofaí agus go n-áireofaí teangacha comharthaíochta náisiúnta mar chuid d’éagsúlacht teanga an Aontais;

112.á iarraidh go dtreiseofaí Ardán an Aontais do Dhaoine faoi Mhíchumas mar shásra buan rannpháirtíochta le haghaidh idirphlé maidir le beartais le heagraíochtaí do dhaoine faoi mhíchumas; á iarraidh go gcoinneodh an Coimisiún creat trédhearcach faireacháin do straitéis an Aontais maidir le cearta daoine faoi mhíchumas 2021-2030, le tuairisciú poiblí bliantúil agus rannpháirtíocht fhóinteach na sochaí sibhialta; á chur i bhfáth nach mór d’institiúidí an Aontais ceannaireacht a thabhairt le dea-shampla trí inrochtaineacht, earcú cuimsitheach agus méadú suntasach ar líon na mball foirne faoi mhíchumas laistigh de riarachán an Aontais; ag tacú le cur chun feidhme plean gníomhaíochta do dhaoine faoi mhíchumas i ngníomhaíocht sheachtrach an Aontais, lena n-áiritheofaí go ndéanfadh cláir forbartha agus dhaonnúla an Aontais cearta daoine faoi mhíchumas a chomhtháthú go hiomlán, i gcomhréir le hAirteagal 32 de Choinbhinsiún na Náisiún Aontaithe ar Chearta Daoine faoi Mhíchumas;

113.á iarraidh ar an gCoimisiún a áirithiú go ndéanfaí cistí an Aontais arna dtiomnú don chuimsiú sóisialta a chur chun cinn agus caighdeáin mhaireachtála a fheabhsú – lena n-áirítear rochtain ar thithíocht inacmhainne, oideachas ardcháilíochta, slándáil shóisialta agus cúram sláinte – a úsáid go héifeachtach agus go trédhearcach; á chur i bhfáth gur cúis bhuartha di na cásanna mí-úsáide cistí a bhí ann le déanaí;

114.ag tathant ar an gCoimisiún faireachán, iniúchóireacht agus rannpháirtíocht dhíreach ón bpobal a neartú chun a ráthú go sroichfidh gach euro an tairbhí beartaithe agus go gcuirfidh gach euro le feabhas dílis ar dhálaí maireachtála grúpaí faoi mhíbhuntáiste agus grúpaí imeallaithe, lena n-áirítear mionlaigh eitneacha agus daoine a ndearnadh an t-aistriú glas agus an t-aistriú digiteach difear dóibh; á iarraidh ar na Ballstáit urraim a áirithiú do Chairt Shóisialta na hEorpa agus do Cholún Eorpach na gCeart Sóisialta; á iarraidh ar an gCoimisiún dlúthfhaireachán a dhéanamh ar a gcur chun feidhme agus beart a dhéanamh i gcásanna cur chun feidhme neamhleor;

115.á chur in iúl gur cúis bhuartha di go gcaitear leis an tithíocht mar thráchtearra; á iarraidh go mbeadh rochtain mhéadaitheach ar thithíocht shóisialta agus inacmhainne agus go nglacfaí straitéisí tithíochta fadtéarmacha ceartbhunaithe atá dírithe freisin ar chosc na heaspa dídine; ag tathant ar an gCoimisiún a áirithiú go dtabharfar tosaíocht, i bplean gníomhaíochta an Aontais atá ar na bacáin don tithíocht inacmhainne, don inrochtaineacht, don inacmhainneacht, agus don éifeachtúlacht fuinnimh, agus machnamh a dhéanamh ar chiste tiomnaithe a chur ar bun;

116.á chur i bhfios go láidir a thábhachtaí atá sé rochtain a thabhairt ar cheartas, trédhearcacht agus rannpháirtíocht in ábhair chomhshaoil; á iarraidh go ndéanfaí bearta arb é is aidhm leo leibhéal ard cosanta comhshaoil a bhaint amach agus cáilíocht an chomhshaoil a fheabhsú, mar atá cumhdaithe in Airteagal 37 den Chairt, a chomhtháthú i mbeartais an Aontais; ag athdhearbhú a hiarrata go n-aithneofaí an ceart chun comhshaol sláintiúil sa Chairt; ag tathant ar an Aontas agus ar na Ballstáit beart láithreach a dhéanamh chun an t-athrú aeráide a chomhrac; ag athdhearbhú a hiarrata ar an gCoimisiún sainordú OIPE a fhairsingiú chun coireanna comhshaoil a áireamh;

117.á mheabhrú gurb ionann an bochtaineacht agus sárú ar dhínit an duine, a bhaineann an bonn ó réadú iomlán na gceart bunúsach mar a aithníonn an Chairt agus Airteagal 9 CFAE; á chur i bhfáth nach mór don chomhrac in aghaidh na bochtaineachta a bheith ina thosaíocht lárnach don Aontas agus do na Ballstáit uile; á iarraidh go ndéanfaí cuspóirí um dhíothú na bochtaineachta a chomhtháthú i mbeartais ábhartha eacnamaíocha, sóisialta agus comhshaoil an Aontais trí chur chuige cuíchóirithe atá ailínithe le Colún Eorpach na gCeart Sóisialta agus Spriocanna Forbartha Inbhuanaithe na Náisiún Aontaithe (SFI 1); ag tathant ar an gCoimisiún díothú na bochtaineachta a chumhdach mar chuspóir cothrománach sa chéad timthriall straitéiseach eile de chuid an Aontais agus sásraí soiléire rialachais agus faireacháin a bhunú;

118.á athdhearbhú gur réamhriachtanas í rochtain ar ioncam leormhaith chun saol le dínit a bhaint amach; á thabhairt dá haire, mar obair leantach ar an togra ón gCoimisiún le haghaidh moladh ón gComhairle maidir le hioncam íosta leormhaith lena n-áirithítear cuimsiú gníomhach, go bhféadfadh Treoir de chuid an Aontais maidir le hioncam íosta leormhaith rannchuidiú leis an sprioc an bhochtaineacht a laghdú faoi leath ar a laghad i ngach Ballstát faoi 2030;

119.á iarraidh ar an gCoimisiún straitéis Eorpach frithbhochtaineachta a fhorbairt leis an aidhm chun an bhochtaineacht a dhíothú faoi 2035, ina n-áireofaí spriocanna intomhaiste idirmheánach; ag tathant ar an gCoimisiún tascfhórsa frithbhochtaineachta de chuid an Aontais a chruthú, agus é mar aidhm leis faireachán a dhéanamh ar chur chun feidhme agus comhordú straitéis frithbhochtaineachta an Aontais atá ar na bacáin agus bochtaineacht agus éagothromaíocht ilghnéitheach a rianú ar fud na mBallstát; á iarraidh go mbeadh rannpháirtíocht struchtúrtha ann ó dhaoine atá buailte ag an mbochtaineacht agus a n-eagraíochtaí ionadaíocha;

120.á thabhairt chun suntais go mbíonn baint idir an bhochtaineacht agus inscne, aois, míchumas, bunadh eitneach, stádas imirce agus míbhuntáiste tuaithe nó réigiúnach; á iarraidh go ndéanfaí bearta frithbhochtaineachta spriocdhírithe; á chur i bhfáth, chun an bhochtaineacht trasnach a chomhrac, go bhfuil gá le meascán beart, lena n-áirítear beartas frith-idirdhealaithe, fostaíocht ardcháilíochta, seirbhísí inacmhainne, agus bearta lena bhfeabhsaítear an infhostaitheacht;

121.ag aithint go bhfuil rannpháirtíocht fhóinteach daoine atá buailte ag an mbochtaineacht bunriachtanach don dlisteanacht dhaonlathach agus d’éifeachtacht beartas frithbhochtaineachta; á iarraidh go mbeadh struchtúir bhuana idirphlé ann ar leibhéal an Aontais agus ar an leibhéal náisiúnta le ESSanna agus comhpháirtithe sóisialta chun an cuimsiú sóisialta a fheabhsú;

122.á mheabhrú gur áiríodh i mbunchlocha thionscadal an Aontais folláine daoine mar cholún agus á mheas, gan beann ar aon dúshlán geopholaitiúil, slándála ná socheacnamaíoch, nach féidir leis an Aontas neamhaird a thabhairt ar gnéithe na gceart sóisialta agus bunúsach ar ar tógadh é; á iarraidh go gcuirfeadh an Coimisiún folláine daoine san áireamh go cuí, lena n-áirítear na daoine is leochailí, i ngach beartas de chuid an Aontais atá ann cheana agus atá ar na bacáin, agus slándáil bia agus sláinte a áireamh ina chlár oibre slándála polaitiúla;

123.á threorú dá hUachtarán an rún sin a chur ar aghaidh chuig an gComhairle, chuig an gCoimisiún agus chuig rialtais agus parlaimintí na mBallstát.