1.á chur in iúl gur geal léi an dul chun cinn atá déanta maidir le SAM agus SRA le deich mbliana anuas; á iarraidh go gcuirfí an tAontas Baincéireachta i gcrích go hiomlán agus go tapa, lena n-áirítear obair leanúnach chun an tríú Colún de, SEÁT, a bhunú, agus bearta chun imeascadh an mhargaidh a dhoimhniú agus chun saorchúrsaíocht éifeachtach caipitil agus leachtachta laistigh de ghrúpaí baincéireachta a éascú; á chur i bhfáth nach mór don Aontas Baincéireachta tacú le córas airgeadais atá níos cuimsithí, níos iomaíche agus níos inbhuanaithe, córas atá ailínithe leis an gcomhtháthú sóisialta agus leis an trasdul déach;

2.á iarraidh ar an gCoimisiún tosaíocht a thabhairt do thabhairt chun críche an Aontais Baincéireachta agus an Aontais Coigiltis agus Infheistíochta; á thabhairt chun suntais a thábhachtaí atá siad do shaoránaigh, do FBManna agus don fhíorgheilleagar trí athléimneacht, rathúnas inbhuanaithe, poist ardcháilíochta agus cobhsaíocht airgeadais a chothú; á chur i bhfáth go dtacódh Aontas Baincéireachta níos comhtháite le fás agus le hiomaíochas banc na hEorpa; á chur i bhfáth gur gá creat láidir stóinsithe atá bunaithe ar rialacha agus ar oibleagáidí soiléire agus lena gcoisctear fuadair bainc, lena bhfeabhsaítear an chobhsaíocht airgeadais agus an t-iomaíochas, agus lena neartaítear earnáil bhaincéireachta an Aontais; á chur i bhfáth go gcabhróidh tabhairt chun críche Aontas na Margaí Caipitil, i dteannta an tAontas Baincéireachta a fhorbairt, le dálaí níos fearr a sholáthar do mhaoiniú gheilleagar na hEorpa, do theaghlaigh agus do chuideachtaí araon atá fós ag brath go mór ar chreidmheas bainc chun infheistíochtaí agus cruthú post a chothú, agus rannchuidiú freisin le hathléimneacht gheilleagar na hEorpa;

3.á thabhairt chun suntais go bhfuil na rátaí úis a thairgtear do theaghlaigh agus do FBManna ar fud na mBallstát an-éagsúil; ag spreagadh an Choimisiúin chun bearta a bhreithniú chun rochtain níos fearr ar mhaoiniú a áirithiú do gach saoránach agus gnó, go háirithe i gcás FBManna a dteastaíonn caipiteal uathu go géar ar rátaí córa iomaíocha;

4.ag cur béim ar ról na hearnála baincéireachta i maoiniú an trasdula dhéacha; á thabhairt chun suntais gurb ann do na hiarrachtaí simplithe faoi chreat an Aontais um airgeadas inbhuanaithe chun comhsheasmhacht a áirithiú, dúbailt a laghdú agus oibleagáidí a ailíniú thar rialacha baincéireachta, nochta agus bainistithe riosca; ag tarraingt aird ar mholadh an Údaráis Eorpaigh um Árachas agus Pinsin Cheirde ceanglais chaipitil níos airde a shocrú le haghaidh sócmhainní deacair a úsáid;

5.á chur in iúl gur oth léi na bacainní atá fós ann maidir le seirbhísí baincéireachta miondíola trasteorann; ag cur béim ar an bhfíoras go bhféadfadh Aontas Baincéireachta comhtháite feabhas a chur ar an iomaíocht agus ar rogha na dtomhaltóirí i réimse na baincéireachta miondíola, lena n-áirítear trí dheiseanna feabhsaithe chun seirbhísí baincéireachta miondíola trasteorann a sholáthar;

6.á aithint go bhfuil dul chun cinn déanta maidir leis an gcaibidlíocht i ndáil leis an euro digiteach ar líne agus as líne; á chur in iúl gur geal léi an poitéinseal atá ag an euro digiteach an t‑airgead tirim a chomhlánú agus a chaomhnú, agus flaitheas agus uathriail airgeadais an Aontais á bhfeabhsú ag an am céanna agus ag rannchuidiú leis an gcuimsiú airgeadais; á chur in iúl gur geal léi go bhfuil Cur chuige Ginearálta na Comhairle maidir leis an euro digiteach tugtha chun críche i mí na Nollag 2025 agus á mheas gur ríthábhachtach go dtabharfadh an Pharlaimint a seasamh féin chun críche a luaithe is féidir;

7.á mheas gur teoranta an dul chun cinn atá déanta maidir leis an gcothromaíocht inscne in institiúidí airgeadais, go háirithe sa bhainistíocht; á chur i bhfáth go bhfeabhsaíonn ceannaireacht ilghnéitheach agus rochtain níos fearr ar mhaoiniú do ghnólachtaí atá faoi stiúir ban13 An Institiúid Eorpach um Chomhionannas Inscne, Inscne san fhiontraíocht, 2017, lgh. 5–6. an rialachas, an nuálaíocht agus an fheidhmíocht eacnamaíoch; á iarraidh ar institiúidí airgeadais, ar pháirtithe leasmhara, ar an gCoimisiún agus ar na Ballstáit straitéisí éifeachtacha ilghnéitheachta a ghlacadh, faireachán a dhéanamh ar bhearnaí inscne agus an comhionannas inscne a leabú i gcreataí maoirseachta agus infheistíochta chun rochtain chuimsitheach ar chaipiteal a áirithiú ar fud an Aontais; á mheabhrú gurb é seasamh na Parlaiminte seasamh le gearrliostaí atá cothrom ó thaobh inscne de agus tosaíocht a thabhairt dóibh le haghaidh iarrthóirí amach anseo; á chur i bhfáth a thábhachtaí atá sé an chothromaíocht inscne a áirithiú ar gach leibhéal den bhainistíocht sna hinstitiúidí agus sna comhlachtaí de chuid an Aontais atá freagrach as an Aontas Baincéireachta;

8.á thabhairt dá haire go bhfuil feabhas mór tagtha ar bhrabúsacht agus ar athléimneacht bhainc an Aontais tar éis arduithe ar rátaí úis BCE14 Maneely, M./Ratnovski, L., Brabúis Bhainc agus Cánacha Bainc san Aontas Eorpach, CAI, Iúil 2024. agus gur fhan siad ard in 2025; á chur i bhfios go láidir gur féidir leis an mbrabúsacht agus leis an athléimneacht sin tacú le hinfheistíocht riachtanach i ngeilleagar an Aontais agus le cistiú teaghlach agus cuideachtaí, go háirithe FBManna agus gnólachtaí nuathionscanta, mar aon le gairmithe óga; ag cur béim ar an ról tábhachtach atá ag bainc maidir le tacú le FBManna agus le geilleagair áitiúla agus á iarraidh ar an gCoimisiún a áirithiú go mbeidh aon rialáil fós íogair do riosca; á chur i bhfios go láidir nach mór d’institiúidí creidmheasa a fhaigheann státchabhair oibriú laistigh de pharaiméadair stuama maidir le díbhinní, athcheannachais agus luach saothair athraitheach;

9.á chur i bhfáth go mbraitheann dea-fheidhmiú agus creidiúnacht an Aontais Baincéireachta freisin ar lánurraim do dhlí an Aontais maidir le cosaint tomhaltóirí san earnáil bhaincéireachta, agus ar fhorfheidhmiú éifeachtach an dlí sin; á thabhairt chun suntais nach mór d’institiúidí creidmheasa staonadh ó théarmaí conarthacha éagóracha agus ó chleachtais thráchtála éagóracha a úsáid, go háirithe i ndáil le hiasachtú morgáiste agus miondíola; á chur i bhfáth nach mór do thomhaltóirí, lena n-áirítear iasachtaithe, tairbhe a bhaint as cosaint éifeachtach, deimhneacht dhlíthiúil agus rochtain ar leigheas éifeachtach; ina leith sin, á iarraidh ar na Ballstáit agus ar na húdaráis inniúla maoirseacht stóinsithe agus bearta forfheidhmithe a áirithiú i gcásanna sáraithe; á chur i bhfáth tuilleadh a thábhachtaí atá sé cosaint leordhóthanach a áirithiú do phríomhchónaithe, go háirithe i gcás teaghlaigh leochaileacha, agus méid an chónaithe á chur san áireamh mar aon le cibé acu an bhfuil cuid shuntasach dá n‑iasacht aisíoctha cheana féin ag iasachtaithe, amhail 50 % den iasacht tosaigh;

10.á chur in iúl gur geal léi ról ÚCSA maidir le comhrac an Aontais in aghaidh sciúradh airgid agus mhaoiniú na sceimhlitheoireachta a neartú; á iarraidh go ndéanfaí cur chun feidhme comhsheasmhach, comhar feabhsaithe, comhroinnt faisnéise agus forfheidhmiú comhordaithe ar fud an Aontais; á chur i bhfáth go bhfuil gá le comhoibriú éifeachtúil idir ÚCSA agus na hÚdaráis Eorpacha Maoirseachta agus údaráis stuamachta; á thabhairt chun suntais gur gá do ÚCSA cloí le prionsabal na comhréireachta agus leis an gcomhordú ina chuid oibre maidir le maoirseacht agus rialáil;

11.á chur i bhfios go láidir go bhfuil tuairisciú airgeadais atá stóinsithe, comhréireach, comhsheasmhach agus tráthúil ríthábhachtach don mhaoirseacht agus don chobhsaíocht; á chur i bhfáth a thábhachtaí atá an deimhneacht dhlítheanach, an intuarthacht agus an chobhsaíocht don earnáil bhaincéireachta, agus nach foláir nach mbainfeadh an simpliú de chaighdeáin stuamachta, athléimneachta, cosanta tomhaltóirí ná cobhsaíochta; á thabhairt chun suntais go bhfuil gá le tuilleadh beart chun an digitiú agus an simpliú a chur chun cinn agus na caighdeáin sin á gcoinneáil ar bun ag an am céanna; á iarraidh go mbeadh cur chuige cothrom níos comhtháite ann, lena n-áirítear mol sonraí lárnaithe, a bheadh bunaithe ar shainmhínithe caighdeánaithe, ar fhoclóir sonraí coiteann agus ar thaisclann iarratais chomhroinnte, d’fhonn castacht gan ghá a laghdú trasna údarás, dúbailt a laghdú agus cáilíocht sonraí a fheabhsú, agus stóinsíocht chreat an Aontais Baincéireachta á caomhnú ag an am céanna;

12.á aithint go bhfuil dul chun cinn institiúideach agus rialála déanta lena bhfuil athléimneacht bhainc an limistéir euro neartaithe; á thabhairt dá haire go bhfuil bacainní suntasacha fós ann maidir le leas iomlán a bhaint as acmhainneacht mhargadh aonair an Aontais le haghaidh seirbhísí airgeadais; á iarraidh ar an gCoimisiún, ar na Ballstáit agus ar chomhlachtaí an Aontais na huaillmhianta a chur i gcomhréir le bearta nithiúla chun an tAontas Coigiltis agus Infheistíochta agus an margadh aonair a thabhairt chun críche, agus an simpliú agus an t-iomaíochas a threisiú; á iarraidh ar an gCoimisiún gníomhartha fóinteacha a mholadh ina thuarascáil 2026 maidir le hiomaíochas earnáil bhaincéireachta an Aontais, arb é is aidhm dóibh iomaíochas bhainc an Aontais a mhéadú, agus ról ríthábhachtach na mbanc á choimirciú ag an am céanna maidir leis na hinfheistíochtaí is gá a mhaoiniú chun trasdul glas agus trasdul digiteach an Aontais a bhaint amach;

13.á chur i bhfáth, i bhfianaise na héiginnteachta geopolaitiúla atá ann, go bhféadfadh margaí stoc a bheith ró-luacháilte agus suaitheadh a bheith ann le déanaí sna Stáit Aontaithe tar éis iasachtú teimhneach san earnáil neamhbhainc (creidmheas príobháideach), gur cheart do mhaoirseoirí dearcadh réamhbhreathnaitheach a choimeád agus monatóireacht leordhóthanach a dhéanamh ar rioscaí, agus gur cheart do bhainc maoláin chaipitil leordhóthanacha a choinneáil ar bun agus a bheith athléimneach go hoibríochtúil; á thabhairt chun suntais, ina leith sin, go bhfuil gá le feabhas a chur ar mhaoirseacht agus ar athléimneacht idirghabhálaithe airgeadais neamhbhainc; á thabhairt chun suntais gur féidir le maoirseacht stuama inniu cáiníocóirí, taisceoirí agus an fíorgheilleagar a chosaint ar chaillteanais amach anseo;

14.á thabhairt dá haire gur shroich comhchoibhneas comhiomlán Ghnáthchothromas Leibhéal 1 (CET1) bhainc SAM 16.12 % sa dara ráithe de 2025, agus go raibh toradh ar chothromas (ROE) ag 10.11 %, agus gur tháinig laghdú ar iasachtaí neamhthuillmheacha (NPLanna) go 2.22 % agus go raibh iasachtaí Chéim 2 ag 9.59 %15 BCE, Staidreamh baincéireachta maoirseachta – an dara ráithe de 2025’.; ag cur béim ar an bhfíoras gur gá faireachán a dhéanamh ar riosca creidmheasa agus, ag an am céanna, caipiteal agus leachtacht leordhóthanach a choinneáil ar bun d’athléimneacht na hearnála baincéireachta; á thabhairt chun suntais bhfuil dul chun cinn comhréireach maidir le comhroinnt riosca ag teacht leis an dul chun cinn sin maidir le bearta laghdaithe riosca;

15.á thabhairt chun suntais go bhfuil dálaí codarsnacha maicreacnamaíocha agus constaicí geopolaitiúla ann, rud a d’fhéadfadh meath ar cháilíocht na sócmhainní a bheith mar thoradh air;

16.á thabhairt dá haire go bhfuil bainc ag éirí níos neamhchosanta ar NBFInna, rud a chruthaíonn rioscaí féideartha ó leachtacht go neamhchosaint ar an bhfrithpháirtí, agus á iarraidh go ndéanfaí maoirseacht chuimsitheach Eorpach ar an earnáil NBFI; á chur i bhfáth go bhfuil comhlachtaí idirnáisiúnta agus comhlachtaí de chuid an Aontais tar éis rioscaí na hearnála neamhbhaincéireachta a thabhairt chun suntais go minic, go háirithe de bharr a hidirnascachta méadaithe leis an earnáil bhaincéireachta thraidisiúnta; ag tacú le tástálacha struis ar fud an chórais chun athléimneacht lárnach an mhargaidh a mheasúnú; ag tathant ar an gCoimisiún scrúdú a dhéanamh ar bhearnaí sna huirlisí maoirseachta, lena n-áirítear leachtacht agus rioscaí sistéamacha, agus bearta a mholadh chun an chobhsaíocht airgeadais a choimirciú, i gcás inarb iomchuí;

17.á chur in iúl gur geal léi creat Basel III a bheith tugtha chun críche agus á chur chun feidhme, rud a neartóidh an athléimneacht san Aontas; á thabhairt dá haire go bhfuil dlínsí eile tar éis clár oibre nach bhfuil chomh huaillmhianach sin maidir le cur chun feidhme a shaothrú; á chur i bhfáth go bhfuil easpa soiléireachta ann i gcónaí maidir le cur chun feidhme chaighdeáin Basel III i ndlínsí áirithe eile; á mheabhrú go bhfuil sé ráite arís agus arís eile ag SAM go neartódh cur chun feidhme an athbhreithnithe bhunúsaigh ar an leabhar trádála athléimneacht bhainc an Aontais agus nach mbainfeadh sé an mhaith dá n-iomaíochas; á iarraidh ar an gCoimisiún athbhreithniú a dhéanamh ar chinntí maidir le coibhéis i ndáil le dlínsí nach bhfuil na caighdeáin sin á gcur chun feidhme acu;

18.á thabhairt dá haire go bhfuil foilseachán ó BCE16 Behn, M. & Reghezza, A., Capital requirements: a pillar or a burden for bank competitiveness? [Ceanglais chaipitil: colún nó ualach ar iomaíochas bainc?], ECB Occasional Paper Series, Uimh. 376, Frankfurt 2025. ann a thugann le fios nach gcuireann ceanglais arda caipitil bac ar iomaíochas na mbanc, ach gur fearr a áirithítear leo athléimneacht na mbanc agus a n-acmhainneacht chun an geilleagar a mhaoiniú i rith an timthrialla;

19.á chur in iúl gur oth léi an méadú atá ag teacht ar dhúnadh brainsí banc, rud a dhéanann difear do phobail leochaileacha agus do phobail fhorimeallacha; á mheabhrú go bhfuil an ceart ag saoránaigh teacht a bheith acu ar bhunseirbhísí airgeadais; ag cur suntais sa ról atá ag bainc níos lú maidir le rochtain teaghlach agus gnólachtaí beaga ar sheirbhísí; á thabhairt chun suntais go bhfeabhsaíonn éagsúlacht na samhlacha gnó baincéireachta athléimneacht an chórais airgeadais; á aithint a thábhachtaí atá an digitiú agus an intleacht shaorga chun éifeachtacht na hearnála bhaincéireachta a neartú; á thabhairt dá haire le himní, áfach, gurbh ann do chaillteanais post mar gheall ar an intleacht shaorga; á iarraidh ar institiúidí creidmheasa beartais athscilithe a chur chun feidhme agus maoirseacht dhaonna i ngach cinneadh uathoibrithe a áirithiú; á chur i bhfáth gur gá cáilíocht post, dálaí cothroma agus rochtain chothrom ar bhaincéireacht a choimirciú;

20.ag aithint na rioscaí sonracha a bhaineann le cripteashócmhainní, agus, ag an am céanna, ag aithint na ndeiseanna a sholáthraíonn siad, amhail cripteamhonaí cobhsaí arna n-ainmniú in euro; á iarraidh go mbeadh maoirseacht chomhsheasmhach ann atá fabhrach don nuálaíocht chun a áirithiú go bhfónfaidh an nuálaíocht don phobal; á iarraidh ar an Aontas agus ar na húdaráis náisiúnta faireachán a dhéanamh ar neamhchosaintí, aghaidh a thabhairt ar rioscaí agus cur i gcoinne iompraíochtaí amhantracha, an choireacht airgeadais a chomhrac agus tomhaltóirí a chosaint; ag cur béim ar an tábhacht a bhaineann le caighdeáin dhomhanda sa réimse seo;

21.á iarraidh ar an gCoimisiún, ar ÚBE agus ar na húdaráis náisiúnta inniúla laistigh den Aontas Baincéireachta cur chun feidhme agus forfheidhmiú docht, comhsheasmhach agus dílis an Rialacháin maidir le Margaí i gCripteashócmhainní17 Rialachán (AE) 2023/1114 ó Pharlaimint na hEorpa agus ón gComhairle an 31 Bealtaine 2023 maidir le margaí i gcripteashócmhainní, agus lena leasaítear Rialacháin (AE) Uimh. 1093/2010 agus (AE) Uimh. 1095/2010 agus Treoracha 2013/36/AE agus (AE) 2019/1937, (IO L 150, 9.6.2023, lch. 40, ELI: http://data.europa.eu/eli/reg/2023/1114/oj. a áirithiú mar chomhlánú riachtanach ar chreat cobhsaíochta airgeadais an Aontais atá bunaithe ar bhainc;

22.ag cur suntais sna héiginnteachtaí a eascraíonn ó chripteamhonaí cobhsaí tríú tír le haghaidh bhainc an Aontais a ileisiúint; ag cur béim ar an árbitráiste rialála a d’fhéadfadh a bheith ann idir dlínsí, rud a d’fhéadfadh fuadair bainc a bheith mar thoradh air i gcás bhainc an Aontais agus a d’fhéadfadh iarmhairtí iompair a bheith aige;

23.ag moladh an athchóirithe ar an mbainistiú géarchéime agus ar an árachas taiscí (BGAÁT) as bainistiú géarchéime agus árachas taiscí comhsheasmhach a sholáthar, an chobhsaíocht a neartú, coigilteas agus cáiníocóirí a chosaint agus úsáid níos fearr a bhaint as airgead poiblí le haghaidh réitigh nuair atá sé sin ar mhaithe le leas an phobail, laistigh de chreat rialála soiléir; á chur i bhfáth go bhfuil gá le solúbthacht do bhainc bheaga agus mheánmhéide agus leis na huirlisí, na sonraí agus na sásraí cinnteoireachta éifeachtacha a chur ar fáil do na húdaráis ábhartha chun Aontas Baincéireachta a áirithiú atá athléimneach agus freagrach go sóisialta, agus chun a chur ar a gcumas freagairt go héifeachtach do theipeanna banc agus na cosaintí is gá a sholáthar, le tacaíocht ó chreat rialála a chothaíonn forbairt na mbanc agus a rannchuidíonn le hAontas Baincéireachta atá athléimneach agus cobhsaí ó thaobh airgeadais de;

24.á chur in iúl gur geal léi an comhaontú sealadach ar tháinig an Pharlaimint agus an Chomhairle air an 19 Samhain 2025 maidir leis an Treoir chun gnéithe áirithe den dlí dócmhainneachta a chomhchuibhiú, mar go bhféadfadh ailíniú breise ar dhlíthe dócmhainneachta agus ar nósanna imeachta athstruchtúraithe cuidiú le cur i gcrích an Aontais Baincéireachta;

25.á chur i bhfáth nár mhór, i gcás go dteipfeadh ar bhanc, scairshealbhóirí, creidiúnaithe nó sásraí arna gcistiú ag an tionscal a ghairm chun cuntais ar dtús, agus nár cheart cistí poiblí a úsáid ach mar rogha dheireanach, de bhrí nach mór spleáchas ar airgead na gcáiníocóirí le haghaidh réiteach banc a sheachaint, i gcomhréir leis an bhfreagracht fhioscach, leis an gceartas sóisialta agus leis an smacht margaidh; á chur i bhfáth go bhfuil gá le maoirseacht leanúnach éifeachtach ar chomhlíonadh rialacha stuamachta agus réitigh lena n‑áirítear creidiúnacht agus cur chun feidhme éifeachtach uirlisí i gcás go dteipfeadh ar bhanc;

26.á mheabhrú go bhfuil íoscheanglas leordhóthanach le haghaidh cistí dílse agus dliteanais incháilithe (ICDI) bunriachtanach le haghaidh creat réitigh inchreidte agus chun solúbthacht a thabhairt do na húdaráis straitéisí réitigh iomchuí a chur i bhfeidhm le linn géarchéime;

27.á mheabhrú nach mór do bhainc leanúint de sheirbhísí bunriachtanacha a sholáthar le linn réitigh; á chur i bhfáth go bhfuil gá ar leith le creat soiléir intuartha lena gcosnaítear taisceoirí agus lena dtacaítear le cliaint agus le gnólachtaí níos lú, lena n-áirítear FBManna;

28.á chur in iúl gur geal léi an Ciste Réitigh Aonair mar líontán sábhála atá go hiomlán frithpháirtithe agus arna mhaoiniú ag an tionscal; á iarraidh an athuair go ndéanfaí daingniú iomlán ar an gcomhaontú lena leasaítear an Conradh lena mbunaítear an Sásra Cobhsaíochta Eorpach chun an chreidiúnacht, an inréiteacht agus athléimneacht an limistéir euro a neartú; á thabhairt chun suntais gurb é is aidhm do chosaint na gcáiníocóirí i gcás réitigh agus á athdhearbhú nach ceart aon acmhainní breise de chuid cáiníocóirí a úsáid le haghaidh banc atá ag teip thar an taca cúil comhchoiteann arna chomhaontú;

29.á mheabhrú go bhféadfadh sé gur fadhb é beartas an ualaigh nialasaigh le haghaidh fiachas poiblí ar gá aghaidh a thabhairt uirthi i gcomhréir le caighdeáin idirnáisiúnta;

30.ag athdhearbhú a tiomantais láidir d’fhorbairt bhreise a dhéanamh ar SEÁT mar an tríú colún den Aontas Baincéireachta; á mheabhrú gur tíolacadh togra SEÁT in 2015; á chur i bhfáth go bhfuil comhchóras cosanta taiscí fíor-riachtanach chun cosaint chomhionann a áirithiú do thaisceoirí ar fud an Aontais, chun an chobhsaíocht airgeadais a neartú tuilleadh agus chun na naisc atá fágtha idir bainc agus ceannasaithe a laghdú go suntasach; á chur i bhfáth gur cheart go gcuirfí próifíl riosca gach earnála rannpháirtí san áireamh sna ranníocaíochtaí le SEÁT; á chur i bhfáth freisin a thábhachtaí atá sé cur i bhfeidhm iomlán na rialacha reatha a áirithiú, rud a chuirfidh ar chumas bhainc an Aontais gnólachtaí a mhaoiniú go héifeachtúil ar fud an Aontais agus an t-iomaíochas a fheabhsú;

31.á chur in iúl gur geal léi gur glacadh an pacáiste maidir leis an mbainistiú géarchéime agus ar árachas taiscí mar chéim dhearfach lena neartaítear scéimeanna náisiúnta ráthaithe taiscí, lena dtreisítear muinín in earnáil na baincéireachta agus lena bhfeabhsaítear na coinníollacha oibríochtúla agus dlíthiúla chun bogadh go creidiúnach agus de réir a chéile i dtreo comhchosaint an Aontais do thaisceoirí agus do cháiníocóirí; ag meabhrú sheasamh 2024 óna Coiste um Ghnóthaí Eacnamaíochta agus Airgeadaíochta maidir le SEÁT a bhunú; ag tathant go láidir ar an gComhairle an chaibidlíocht a chur chun cinn; á iarraidh ar Uachtarán nua an Ghrúpa Euro tús a chur athuair leis an bplé ar an ábhar seo a luaithe is féidir;

32.á threorú dá hUachtarán an rún seo a chur ar aghaidh chuig an gComhairle, chuig an gCoimisiún, chuig an mBanc Ceannais Eorpach, chuig an mBord Réitigh Aonair agus chuig an Údarás Baincéireachta Eorpach.