1.Jilqa’ l-progress li sar fir-rigward tal-MSU u l-SRM matul l-aħħar għaxar snin; jappella għal tlestija sħiħa u rapida tal-Unjoni Bankarja, inkluża ħidma kontinwa sabiex jiġi stabbilit it-tielet Pilastru tagħha, l-Iskema Ewropea ta’ Assigurazzjoni tad-Depożiti, u miżuri biex tiġi approfondita l-integrazzjoni tas-suq u tiġi ffaċilitata ċ-ċirkolazzjoni effettiva tal-kapital u l-likwidità fi ħdan il-gruppi bankarji; jisħaq li l-Unjoni Bankarja trid tappoġġja sistema finanzjarja aktar inklużiva, kompetittiva u sostenibbli allinjata mal-koeżjoni soċjali u mat-tranżizzjoni doppja;

2.Jistieden lill-Kummissjoni tagħti prijorità lit-tlestija tal-Unjoni Bankarja u lill-Unjoni tat-Tfaddil u tal-Investimenti (SIU); jenfasizza l-importanza tagħhom għaċ-ċittadini, għall-SMEs u għall-ekonomija reali peress li dawn irawmu r-reżiljenza, il-prosperità sostenibbli, l-impjiegi ta’ kwalità u l-istabbiltà finanzjarja; jissottolinja l-fatt li Unjoni Bankarja aktar integrata tappoġġja t-tkabbir u l-kompetittività tal-banek Ewropej; jissottolinja l-ħtieġa ta’ qafas b’saħħtu u robust li jkun ibbażat fuq regoli u obbligi ċari u li jipprevjeni assalti bankarji, isaħħaħ l-istabbiltà finanzjarja u l-kompetittività u jsaħħaħ is-settur bankarju tal-UE; jisħaq li t-tlestija tal-Unjoni tas-Swieq Kapitali flimkien mal-iżvilupp tal-Unjoni Bankarja se tgħin biex jinħolqu kundizzjonijiet aħjar għall-finanzjament tal-ekonomija Ewropea, kemm għall-unitajiet domestiċi kif ukoll għall-kumpaniji li għadhom jiddependu ħafna mill-kreditu bankarju biex jagħmlu l-investimenti u joħolqu l-impjiegi, u sabiex tikkontribwixxi wkoll għar-reżiljenza tal-ekonomija Ewropea;

3.Jenfasizza li fatt li r-rati tal-imgħax offruti lill-unitajiet domestiċi u lill-SMEs fl-Istati Membri jvarjaw ħafna; jinkoraġġixxi l-Kummissjoni tqis miżuri sabiex tiżgura aċċess imtejjeb għall-finanzi għaċ-ċittadini u n-negozji, speċjalment fil-każ ta’ SMEs li jeħtieġu tabilħaqq kapital b’rati ġusti u kompetittivi;

4.Jenfasizza r-rwol tas-settur bankarju fil-finanzjament tat-tranżizzjoni doppja; jenfasizza l-isforzi ta’ simplifikazzjoni tal-qafas ta’ finanzjament sostenibbli tal-UE biex tiġi żgurata l-koerenza, titnaqqas id-duplikazzjoni u jiġu allinjati l-obbligi fir-regoli bankarji, tad-divulgazzjoni u tal-ġestjoni tar-riskju; jiġbed l-attenzjoni lejn ir-rakkomandazzjoni tal-Awtorità Ewropea tal-Assigurazzjoni u l-Pensjonijiet tax-Xogħol li jissaħħu r-rekwiżiti ta’ kapital għall-assi mhux rekuperabbli;

5.Jiddispjaċih għall-ostakli li għad hemm fir-rigward tas-servizzi bankarji għall-konsumatur transfruntiera; jenfasizza l-potenzjal ta’ Unjoni Bankarja integrata biex ittejjeb il-kompetizzjoni u l-għażla tal-konsumatur fil-qasam tas-servizzi bankarji għall-konsumatur, inkluż permezz ta’ opportunitajiet imtejba għall-forniment ta’ servizzi bankarji għall-konsumatur transfruntiera;

6.Jirrikonoxxi l-progress li sar fin-negozjati tal-euro diġitali online u offline; jilqa’ l-progress fl-euro diġitali u l-potenzjal tiegħu li jikkomplementa u jippreserva l-flus kontanti, filwaqt li jsaħħaħ is-sovranità finanzjarja u l-awtonomija tal-UE u jikkontribwixxi għall-inklużività finanzjarja; jilqa’ l-finalizzazzjoni tal-Approċċ Ġenerali tal-Kunsill dwar l-euro diġitali f’Diċembru 2025 u jqis li huwa essenzjali li l-Parlament jiffinalizza l-pożizzjoni tiegħu malajr kemm jista’ jkun;

7.Iqis il-progress dwar il-ġeneri fl-istituzzjonijiet finanzjarji, speċjalment fejn jirrigwarda l-karigi ta’ ġestjoni, għadu limitat; jisħaq li tmexxija diversa u aċċess aħjar għall-finanzi għal ditti mmexxija min-nisa13 L-Istitut Ewropew għall-Ugwaljanza bejn is-Sessi, Gender in entrepreneurship, 2017, pp. 5–6. jtejbu l-governanza, l-innovazzjoni u l-prestazzjoni ekonomika; jistieden lill-istituzzjonijiet finanzjarji, lill-partijiet ikkonċernati, lill-Kummissjoni u lill-Istati Membri jadottaw strateġiji effettivi dwar id-diversità, jimmonitorjaw id-disparitajiet bejn il-ġeneri u jinkorporaw l-ugwaljanza bejn il-ġeneri fl-oqfsa superviżorji u ta’ investiment biex jiżguraw aċċess inklużiv għall-kapital madwar l-UE; ifakkar li l-pożizzjoni tal-Parlament hija li jinżammu listi bbilanċjati fil-ġeneru u jingħataw preċedenza għall-kandidati futuri; jisħaq fuq l-importanza li jiġi żgurat il-bilanċ bejn il-ġeneri fil-livelli kollha tal-maniġment fl-istituzzjonijiet u fil-korpi tal-UE li huma risponsabbli mill-Unjoni Bankarja;

8.Jinnota li b’segwitu għaż-żieda fir-rati tal-interessi tal-BĊE l-profittabbiltà u r-reżiljenza tal-banek tal-UE tjiebu b’mod sinifikanti14 Maneely, M./Ratnovski, L., ‘Bank Profits and Bank Taxes in the EU’, (Profitti tal-Banek u Taxxi tal-Banek fl-UE), il-FMI, Lulju 2024. u baqgħu għoljin fl-2025; jenfasizza li din il-profittabbiltà u r-reżiljenza tista’ tappoġġja l-investiment essenzjali fl-ekonomija tal-UE u l-finanzjament tal-unitajiet domestiċi u tal-kumpaniji, b’mod partikolari l-SMEs u n-negozji ġodda, kif ukoll il-professjonisti żgħażagħ; jissottolinja r-rwol importanti tal-banek biex jappoġġja l-SMEs u l-ekonomiji lokali u jappella lill-Kummissjoni tiżgura li kwalunkwe regolament jibqa’ sensittiv għar-riskji; jenfasizza l-istituzzjonijiet ta’ kreditu li jirċievu l-għajnuna mill-Istat jeħtieġ topera fi ħdan parametri prudenti għad-dividendi, ix-xiri lura u r-remunerazzjoni varjabbli;

9.Jisħaq li l-funzjonament xieraq u l-kredibbiltà tal-Unjoni Bankarja jiddependu wkoll mir-rispett sħiħ u l-infurzar effettiv tal-liġi tal-UE dwar il-protezzjoni tal-konsumatur fis-settur bankarju; jenfasizza l-fatt li l-istituzzjonijiet ta’ kreditu jeħtieġ joqogħdu lura milli jużaw termini kuntrattwali u prattiki kummerċjali inġusti, b’mod partikolari fis-self ipotekarju u dak għall-konsumatur; jissottolinja l-fatt li l-konsumaturi, inklużi l-mutwatarji, iridu jibbenefikaw minn protezzjoni effettiva, ċertezza legali u aċċess għal rimedju effettiv; f’dan ir-rigward, jistieden lill-Istati Membri u lill-awtoritajiet kompetenti jiżguraw miżuri robusti ta’ superviżjoni u infurzar f’każijiet ta’ ksur; jisħaq ukoll fuq l-importanza li tiġi żgurata protezzjoni adegwata tar-residenzi primarji, speċjalment fil-każ ta’ unitajiet domestiċi vulnerabbli, b’kont meħud tad-daqs tar-residenza u jekk il-mutwatarji jkunux diġà ħallsu lura parti sostanzjali mis-self tagħhom, bħal 50% tas-self inizjali;

10.Jilqa’ r-rwol tal-Awtorità għall-Ġlieda kontra l-Ħasil tal-Flus (AMLA) fit-tisħiħ tal-ġlieda tal-UE kontra l-ħasil tal-flus u l-finanzjament tat-terroriżmu; jappella għal implimentazzjoni konsistenti, kooperazzjoni msaħħa, kondiviżjoni tal-informazzjoni u infurzar koordinat madwar l-UE; jisħaq fuq il-ħtieġa ta’ kooperazzjoni effiċjenti bejn l-AMLA u l-Awtoritajiet Superviżorji Ewropej u l-awtoritajiet prudenzjali; jenfasizza l-ħtieġa li l-AMLA taderixxi mal-prinċipju tal-proporzjonalità u l-koordinazzjoni fil-ħidma superviżorja u regolatorja tagħha;

11.Jissottolinja l-fatt li rapportar finanzjarju robust, proporzjonat, konsistenti u f’waqtu huwa vitali għas-superviżjoni u l-istabbiltà; jisħaq fuq l-importanza taċ-ċertezza legali, il-prevedibbiltà u l-istabbiltà għas-settur bankarju, u li s-simplifikazzjoni jeħtieġ li ma ddgħajjifx l-istandards prudenzjali, ta’ reżiljenza, ta’ protezzjoni tal-konsumaturi jew ta’ stabbiltà; jenfasizza l-ħtieġa ta’ aktar miżuri li jippromwovu d-diġitalizzazzjoni u s-simplifikazzjoni filwaqt li jinżammu dawk l-istandards; jappella għal approċċ bilanċjat u aktar integrat, li jinkludi hub tad-data ċentralizzat, mibni fuq definizzjonijiet standardizzati, dizzjunarju tad-data komuni u repożitorju ta’ talbiet kondiviż, sabiex jitneħħew il-kumplessitajiet mhux neċessarji fost l-awtoritajiet, jitnaqqsu d-duplikazzjonijiet u titjieb il-kwalità tad-data, filwaqt li tiġi ppreżervata r-robustezza tal-qafas tal-Unjoni Bankarja;

12.Jirrikonoxxi l-progress istituzzjonali u regolatorju li saħħaħ ir-reżiljenza tal-banek taż-żona tal-euro; jinnota li għad hemm ostakli sinifikanti biex jiġi sfruttat il-potenzjal sħiħ tas-Suq Uniku tal-UE għas-servizzi finanzjarji; jistieden lill-Kummissjoni, lill-Istati Membri u lill-korpi tal-UE jaraw li l-ambizzjonijiet jimxu id f’id ma’ passi konkreti biex jikkompletaw l-Unjoni tat-Tfaddil u tal-Investimenti (SIU) u s-Suq Uniku, filwaqt li jagħtu spinta lis-simplifikazzjoni u l-kompetittività; jappella lill-Kummissjoni, fir-rapport tagħha tal-2026 dwar il-kompetittività tas-settur bankarju tal-UE, tipproponi azzjonijiet sinifikattivi mmirati lejn iż-żieda tal-kompetittività tal-banek tal-UE, filwaqt li jiġi savlagwardjat ir-rwol essenzjali tal-banek għall-finanzjament tal-investimenti neċessarji biex jitwettqu t-tranżizzjoni diġitali u dik ekoloġika tal-Unjoni;

13.Jisħaq li, minħabba l-inċertezza ġeopolitika li għaddejja bħalissa, is-swieq tal-ishma potenzjalment sopravalutati u l-każijiet reċenti ta’ taqlib fl-Istati Uniti wara self mhux ċar fis-settur mhux bankarju (kreditu privat), is-superviżuri għandhom iżommu perspettiva li tħares ’il quddiem u jimmonitorjaw biżżejjed ir-riskji, u li l-banek għandhom iżommu ilqugħ ta’ kapitali adegwati u jkunu operazzjonalment reżiljenti; jissottolinja, f’dan ir-rigward, il-ħtieġa li jittejbu s-superviżjoni u r-reżiljenza tal-intermedjarji finanzjarji mhux bankarji; jenfasizza li superviżjoni prudenti llum tista’ tipproteġi lill-kontribwenti, lid-depożitanti u lill-ekonomija reali mit-telf ta’ għada;

14.Jinnota li l-proporzjon tal-kapital ta’ Grad 1 ta’ Ekwità Komuni (CET1) tal-banek tal-MSU laħaq 16.12 % fit-tieni trimestru tal-2025, b’redditu fuq l-ekwità (ROE) ta’ 10.11 %, filwaqt li s-self li ma jrendix (non performing loans - NPLs) naqas għal 2.22 % u s-self tal-istadju 2 huwa ta’ 9.59 %15 BĊE, “Supervisory Banking Statistics – Second quarter 2025” (Statistika bankarja superviżorja - It-Tieni Trimestru 2025).; jenfasizza l-ħtieġa li jiġi mmonitorjat ir-riskju ta’ kreditu filwaqt li jinżammu biżżejjed kapital u likwidità għar-reżiljenza tas-settur bankarju; jenfasizza li l-fatt li dan il-progress fil-miżuri ta’ tnaqqis tar-riskji ma ġiex akkumpanjat minn progress proporzjonat fil-kondiviżjoni tar-riskju;

15.Jenfasizza l-kundizzjonijiet makroekonomiċi negattivi u d-diffikultajiet ġeopolitiċi, li jistgħu jwasslu għal deterjorament fil-kwalità tal-assi;

16.Jinnota li l-banek huma esposti dejjem aktar għall-istituzzjonijiet finanzjarji mhux bankarji, u li dan joħloq riskji potenzjali minn likwidità sa esponiment tal-kontroparti u jappela għal superviżjoni Ewropea komprensiva tas-settur tal-istituzzjonijiet finanzjarji mhux bankarji; jissottolinja l-fatt li l-korpi internazzjonali u dawk tal-UE oħra enfasizzaw ripetutament ir-riskju li jirriżulta mis-settur finanzjarju mhux bankarju, b’mod partikolari minħabba l-interkonnettività akbar tiegħu mas-settur bankarju tradizzjonali; jappoġġja testijiet tal-istress għas-sistema kollha sabiex tiġi vvalutata r-reżiljenza tas-sistema għas-suq ewlieni; iħeġġeġ lill-Kummissjoni teżamina l-lakuni fis-sett ta’ għodod superviżorji, inklużi l-likwidità u r-riskji sistemiċi, u tipproponi miżuri għas-salvagwardja tal-istabbilità finanzjarja, fejn ikun xieraq;

17.Jilqa’ l-finalizzazzjoni u l-implimentazzjoni tal-qafas Basel III, li se jsaħħaħ ir-reżiljenza fl-UE; jinnota li ġuriżdizzjonijiet oħra segwew aġenda ta’ implimentazzjoni inqas ambizzjuża; jissottolinja n-nuqqas kontinwu ta’ ċarezza dwar l-implimentazzjoni tal-istandards ta’ Basel III f’xi ġuriżdizzjonijiet oħra; ifakkar li l-MSU tenna ripetutament li l-implimentazzjoni tar-rieżami fundamentali tal-portafoll tan-negozjar issaħħaħ ir-reżiljenza tal-banek tal-UE u ma timminax il-kompetittività tagħhom; jistieden lill-Kummissjoni tirrieżamina d-deċiżjonijiet ta’ ekwivalenza ma’ ġuriżdizzjonijiet li ma jimplimentawx dawk l-istandards;

18.Jieħu nota tal-pubblikazzjoni tal-BĊE16 Behn, M. & Reghezza, A., “Capital requirements: a pillar or a burden for bank competitiveness?” (Rekwiżiti kapitali: pilastru jew piż għall-kompetittività tal-banek?), Serje ta’ Papers Okkażjonali tal-BĊE, Nru 376, Frankfurt 2025. li tissuġġerixxi li r-rekwiżiti kapitali għoljin ma jfixklux il-kompetittività tal-banek, iżda pjuttost jiżguraw ir-reżiljenza u l-kapaċità tal-banek li jiffinanzjaw l-ekonomija matul iċ-ċiklu;

19.Jiddispjaċih dwar l-għadd dejjem jikber ta’ għeluq ta’ fergħat bankarji, hekk kif dan jaffettwa l-komunitajiet vulnerabbli u periferiċi; ifakkar fid-dritt taċ-ċittadini li jkollhom aċċess għal servizzi finanzjarji bażiċi; jissottolinja r-rwol tal-banek iżgħar fl-aċċess għas-servizzi lill-unitajiet domestiċi u n-negozji żgħar; jenfasizza li fatt li d-diversità tal-mudelli ta’ negozju bankarju ssaħħaħ ir-reżiljenza tas-sistema finanzjarja; jirrikonoxxi l-importanza tad-diġitalizzazzjoni u l-intelliġenza artifiċjali għat-tiħiħ tal-effettività tas-settur bankarju; jinnota bi tħassib, madankollu, li kien hemm telf ta’ impjiegi marbuta mal-IA; jistieden lill-istituzzjonijiet ta’ kreditu jimplimentaw politiki ta’ taħriġ mill-ġdid u jiżguraw is-sorveljanza umana fid-deċiżjonijiet awtomatizzati; jisħaq fuq il-ħtieġa li jiġu ssalvagwardjati l-kwalità tal-impjiegi, il-kundizzjonijiet ġusti u l-aċċess bankarju ekwu;

20.Jirrikonoxxi r-riskji speċifiċi maħluqa mill-kriptoassi, filwaqt li jirrikonoxxi wkoll l-opportunitajiet li joffru, bħall-istablecoins denominati f’euro; jappella għal superviżjoni konsistenti favur l-innovazzjoni biex jiġi żgurat li l-innovazzjoni taqdi lill-pubbliku; jitlob lill-UE u lill-awtoritajiet nazzjonali jimmonitorjaw l-esponimenti, jindirizzaw ir-riskji, jikkumbattu l-imġiba spekulattiva, jiġġieldu l-kriminalità finanzjarja u jipproteġu lill-konsumaturi; jissottolinja l-importanza ta’ standards globali f’dan il-qasam;

21.Jistieden lill-Kummissjoni, lill-Awtorità Bankarja Ewropea u lill-awtoritajiet nazzjonali kompetenti fi ħdan l-Unjoni Bankarja jiżguraw l-implimentazzjoni u l-infurzar stretti, konsistenti u leali tar-Regolament dwar is-Swieq fil-Kriptoassi17 Ir-Regolament (UE) 2023/1114 tal-Parlament Ewropew u tal-Kunsill tal-31 ta’ Mejju 2023 dwar is-swieq fil-kriptoassi, u li jemenda r-Regolamenti (UE) Nru 1093/2010 u (UE) Nru 1095/2010 u d-Direttivi 2013/36/UE u (UE) 2019/1937, ĠU L 150, 9.6.2023, p. 40, ELI: http://data.europa.eu/eli/reg/2023/1114/oj. bħala komplement meħtieġ għall-qafas ta’ stabbiltà finanzjarja bbażat fuq il-banek tal-Unjoni;

22.Jieħu nota tal-inċertezzi li joriġinaw minn stablecoins ta’ diversi ħruġ minn pajjiżi terzi għall-banek tal-UE; jissottolinja l-arbitraġġ regolatorju potenzjali bejn il-ġuriżdizzjonijiet, li jista’ jwassal għal assalti bankarji tal-UE u jkollu effetti konsegwenzjali;

23.Ifaħħar ir-riforma tal-ġestjoni tal-kriżijiet u tal-assigurazzjoni tad-depożiti (CMDI) għall-forniment ta’ ġestjoni koerenti tal-kriżijiet u l-assigurazzjoni tad-depożiti, it-tisħiħ tal-istabbiltà, il-protezzjoni tat-tfaddil u tal-kontribwenti u l-iżgurar ta’ użu aħjar tal-fondi pubbliċi għar-riżoluzzjoni meta jkunu fl-interess pubbliku; jenfasizza l-ħtieġa ta’ flessibbiltà għall-banek żgħar u medji u u li l-awtoritajiet rilevanti jingħataw l-għodod effettivi, id-data u l-mekkaniżmi ta’ teħid tad-deċiżjonijet sabiex jiżguraw Unjoni Bankarja reżiljenti u soċjalment responsabbli, u sabiex ikunu jistgħu jirrispondu b’mod effettiv għall-fallimenti tal-banek u jipprovdu s-salvagwardji, bl-appoġġ ta’ qafas regolatorju li jrawwem l-iżvilupp tal-banek u jikkontribwixxi għal Unjoni Bankarja reżiljenti u finanzjarjament stabbli;

24.Jilqa’ l-ftehim proviżorju milħuq fid-19 ta’ Novembru 2025 bejn il-Parlament u l-Kunsill dwar id-Direttiva li tarmonizza ċerti aspetti tal-liġi dwar l-insolvenza, peress li allinjament ulterjuri tal-liġijiet dwar l-insolvenza u l-proċeduri ta’ ristrutturar jistgħu jgħinu biex titlesta l-Unjoni Bankarja;

25.Jisħaq li, f’każ li xi banek ifallu, l-azzjonisti, il-kredituri jew il-mekkaniżmi ffinanzjati mill-industrija għandhom jinżammu responsabbli l-ewwel, u l-fondi pubbliċi għandhom jintużaw biss bħala l-aħħar alternattiva għax id-dipendenza fuq flus il-kontribwent għar-riżoluzzjoni tal-banek trid tiġi evitata, f’konformità mar-responsabbiltà fiskali, il-ġustizzja soċjali u d-dixxiplina tas-suq; jisħaq fuq il-ħtieġa ta’ superviżjoni kontinwa u effettiva tal-konformità mar-regoli prudenzjali u ta’ riżoluzzjoni li jiżguraw il-kredibbiltà u l-eżekuzzjoni effettiva tal-għodod f’każ ta’ fallimenti bankarji;

26.Ifakkar li rekwiżit minimu suffiċjenti għal fondi proprji u obbligazzjonijiet eliġibbli (MREL) huwa essenzjali għal qafas ta’ riżoluzzjoni kredibbli u biex l-awtoritajiet jingħataw il-flessibbiltà li japplikaw strateġiji ta’ riżoluzzjoni xierqa waqt kriżi;

27.Ifakkar li l-banek jeħtiġilhom ikomplu jfornu s-servizzi essenzjali waqt ir-riżoluzzjoni; jisħaq fuq il-ħtieġa ta’ qafas ċar u prevedibbli li jipproteġi lid-depożitanti u li jappoġġja lill-klijenti u lin-negozji iżgħar, inklużi l-SMEs, b’mod partikolari;

28.Jilqa’ l-Fond Uniku ta’ Riżoluzzjoni bħala xibka ta’ sikurezza kompletament mutwalizzata u ffinanzjata mill-industrija; itenni t-talba għal ratifika sħiħa tal-ftehim li jemenda tat-Trattat li jistabbilixxi l-Mekkaniżmu Ewropew ta’ Stabbiltà biex jissaħħu l-kredibbiltà, ir-riżolvibbiltà u r-reżiljenza taż-żona tal-euro; jenfasizza l-għan tal-protezzjoni tal-kontribwenti fil-każ ta’ riżoluzzjoni u jtenni li lil hinn mill-Garanzija ta’ Kontinġenza Komuni miftiehma, l-ebda riżorsa addizzjonali tal-kontribwenti ma għandha tintuża għal banek li qed ifallu;

29.Ifakkar li l-politika ta’ piż żero għad-dejn pubbliku tista’ tkun problema li jeħtieġ li tiġi indirizzata skont standards internazzjonali;

30.Jafferma mill-ġdid l-impenn qawwi tiegħu għall-ħolqien ta’ Skema Ewropea ta’ Assigurazzjoni tad-Depożiti bħala t-tielet pilastru, l-aħħar pilastru u l-pilastru essenzjali tal-Unjoni Bankarja; ifakkar li l-proposta tal-Iskema Ewropea ta’ assigurazzjoni tad-Depożiti ġiet ippreżentata fl-2015; jisħaq li sistema komuni ta’ protezzjoni tad-depożiti hija indispensabbli biex tiġi żgurata protezzjoni ugwali tad-depożitanti madwar l-Unjoni, biex tissaħħaħ aktar l-istabbiltà finanzjarja u biex jitnaqqsu b’mod sinifikanti r-rabtiet li fadal bejn il-banek u s-sovrani; jissottolinja li l-kontribuzzjonijiet għal Skema Ewropea ta’ Assigurazzjoni tad-Depożiti għandha tqis il-profil tar-riskju ta’ kull settur parteċipanti; jissottolinja wkoll l-importanza li tiġi żgurata l-applikazzjoni sħiħa tar-regoli attwali, bħala mod kif il-banek Ewropej ikunu jistgħu jiffinanzjaw b’mod effiċjenti n-negozji madwar l-UE u jtejbu l-kompetittività;

31.Jilqa’ l-adozzjoni tal-pakkett CMDI bħala pass pożittiv li jsaħħaħ l-iskemi nazzjonali ta’ garanzija tad-depożiti, isaħħaħ il-fiduċja fis-settur bankarju u jsaħħaħ il-kundizzjonijiet operattivi u legali biex nimxu b’mod gradwali u kredibbli lejn protezzjoni komuni tal-UE għad-depożitanti u l-kontribwenti; ifakkar il-pożizzjoni tal-2024 tal-Kumitat għall-Affarijiet Ekonomiċi u Monetarji tal-Parlament dwar l-istabbiliment ta’ Skema Ewropea ta’ Assigurazzjoni tad-Depożiti; iħeġġeġ bil-qawwa lill-Kunsill javvanza n-negozjati; jappella lill-President il-ġdid tal-Grupp tal-Euro jerġa’ jibda d-diskussjonijiet dwar dan is-suġġett mill-aktar fis possibbli;

32.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Bank Ċentrali Ewropew, lill-Bord Uniku ta’ Riżoluzzjoni u lill-Awtorità Bankarja Ewropea.