1.Jilqa’ l-pjan ta’ azzjoni tal-Kummissjoni kontra l-bullying ċibernetiku bħala qafas biex jiġi indirizzat il-bullying ċibernetiku, inkluża d-definizzjoni proposta tagħha li tippermetti valutazzjoni statistika koerenti u l-iskambju tal-aħjar prattika, u l-implimentazzjoni u l-infurzar aktar stretti tal-leġiżlazzjoni attwali;

2.Jilqa’ l-enfasi tal-pjan ta’ azzjoni kontra l-bullying ċibernetiku fuq il-prevenzjoni u l-litteriżmu diġitali bħala għodod effettivi fit-tul; jistieden lill-Kummissjoni u lill-Istati Membri jinvestu f’edukazzjoni diġitali u litteriżmu medjatiku xierqa għall-età, sabiex jiġi żgurat li dawn ir-riżorsi jilħqu lit-tfal fil-kuntesti soċjoekonomiċi kollha;

3.Itenni t-talba tiegħu lill-Istati Membri biex jistabbilixxu pjanijiet nazzjonali komprensivi kontra l-bullying ċibernetiku u biex jipprevedu pieni effettivi, proporzjonati u dissważivi għar-reati tal-bullying ċibernetiku, filwaqt li jqisu s-serjetà tal-imġiba u l-vulnerabbiltà tal-vittma;

4.Jemmen li l-vittmi għandhom ikunu jistgħu jirrapportaw il-bullying ċibernetiku b’mod faċli; jinnota li l-pjan ta’ azzjoni kontra l-bullying ċibernetiku jipprevedi applikazzjoni tas-sikurezza online kontra l-bullying ċibernetiku, bħala mekkaniżmu ta’ rapportar faċli għall-utent u interoperabbli fl-UE kollha, biex jiċċentralizza r-rapportar, l-appoġġ ikkoordinat u l-ġbir tal-evidenza;

5.Jesprimi tħassib li minkejja l-miżuri leġiżlattivi u ta’ politika meħuda fil-livell tal-UE u dak nazzjonali, il-bullying ċibernetiku u l-abbuż ibbażat fuq l-immaġni jew il-vidjo qed ikomplu jiżdiedu madwar l-UE, u dan jindika li l-istrumenti eżistenti, inklużi l-obbligi skont id-DSA u l-armonizzazzjoni skont id-direttiva dwar il-ġlieda kontra l-vjolenza kontra n-nisa u l-vjolenza domestika, jistgħu ma jkunux biżżejjed biex jindirizzaw l-iskala sħiħa u s-severità tal-problema;

6.Jinnota li l-pjan ta’ azzjoni kontra l-bullying ċibernetiku ma jipprevedix miżuri fil-qasam tal-liġi kriminali fil-livell tal-UE;

7.Jistieden lill-Kummissjoni tivvaluta l-ħtieġa ta’ approċċ aktar armonizzat fil-livell tal-UE biex tiddefinixxi l-bullying ċibernetiku; jistieden lill-Kummissjoni teżamina jekk il-bullying ċibernetiku, inkluż it-tixrid mhux kunsenswali ta’ materjal intimu, għandux jiġi rikonoxxut bħala delitt partikolarment serju b’dimensjoni transfruntiera fil-livell tal-UE; itenni l-appoġġ tiegħu biex id-delitti ta’ mibegħda, li jistgħu jkopru l-aktar forom severi ta’ bullying ċibernetiku, jiżdiedu mal-lista tal-UE ta’ reati kriminali skont l-Artikolu 83(1) TFUE;

8.Jenfasizza li l-awtoritajiet tal-infurzar tal-liġi b’riżorsi tajbin, inklużi persunal adegwat, għarfien espert tekniku u infrastruttura tal-IT, huma parti indispensabbli mill-indirizzar effettiv tal-bullying ċibernetiku; jistieden lill-Kummissjoni u lill-Europol iżidu l-kapaċitajiet investigattivi tal-Istati Membri, inkluż għall-ġlieda kontra l-bullying ċibernetiku transfruntier;

9.Jistieden lill-Istati Membri jikkondividu l-aħjar prattika dwar l-approċċi legali tagħhom; jenfasizza li l-isforzi għandhom jagħtu prijorità lill-miżuri ta’ prevenzjoni, edukazzjoni u sensibilizzazzjoni mmirati lejn it-tfal, il-ġenituri u l-edukaturi, kif ukoll il-litteriżmu diġitali u l-approċċi restorattivi, b’mod partikolari meta jkunu involuti l-minorenni;

10.Jappella għall-implimentazzjoni u t-traspożizzjoni rapidi tad-Direttiva riveduta dwar id-Drittijiet tal-Vittmi;

11.Jistieden lill-Kummissjoni u lill-Istati Membri jiżguraw li l-pjattaformi jinżammu responsabbli għall-prevenzjoni u l-ġlieda kontra l-bullying ċibernetiku;

12.Jirrimarka li l-mudell kummerċjali ta’ ċerti pjattaformi online jinċentiva t-tixrid ta’ kontenut ta’ mibegħda u għalhekk jikkontribwixxi għal ambjent dejjem aktar mhux sikur online, b’mod partikolari għall-minorenni, in-nisa, il-membri tal-komunità LGBTIQ+ jew minoranzi oħra; jenfasizza r-rwol ta’ sistemi ta’ rakkomandazzjoni iperpersonalizzati li jixprunaw id-diskors ta’ mibegħda u jippenalizzaw il-kontenut anqas diviżiv;

13.Jissottolinja li d-DSA jindirizza xi aspetti tal-fastidju u l-bullying ċibernetiku, b’mod partikolari l-Artikolu 28 tiegħu, li diġà jobbliga lill-fornituri jiżguraw livell għoli ta’ privatezza, sikurezza u sigurtà għall-minorenni; jenfasizza, f’dan ir-rigward, il-linji gwida tal-Kummissjoni skont id-DSA, li jispeċifikaw kif il-pjattaformi jistgħu jiżguraw li l-minorenni jkunu sikuri meta jużaw is-servizzi tagħhom; jinnota li l-pjattaformi online kbar ħafna naqsu, b’mod konsiderevoli, milli jimplimentaw dawn il-miżuri; jistieden lill-Kummissjoni u lill-Istati Membri jżidu l-infurzar tal-Artikolu 28 tad-DSA u tad-dispożizzjoni dwar l-avviż u l-azzjoni tad-DSA, li għandu impatt fuq il-protezzjoni tal-vittmi tal-bullying ċibernetiku;

14.Jistieden lill-Kummissjoni tikkonkludi każijiet ta’ infurzar pendenti, tiftaħ investigazzjonijiet dwar kwalunkwe ksur tal-Artikolu 28 tad-DSA, inklużi riskji sistemiċi maħluqa minn sistemi ta’ rakkomandazzjoni, u tinforza b’mod rigoruż l-obbligu ta’ avviż u tneħħija tal-pjattaformi; jirrifjuta bil-qawwa kwalunkwe tentattiv biex jerġa’ jinfetaħ id-DSA; jirrimarka li l-aċċess għar-riċerkaturi fl-ambitu tad-DSA huwa kruċjali biex tiġi żgurata leġiżlazzjoni bbażata fuq l-evidenza;

15.Jistieden lill-Kummissjoni ssegwi l-linji gwida mħabbra tagħha għas-sinjalaturi fdati dwar il-bullying ċibernetiku, sabiex jiġi ċċarat ir-rwol tagħhom fl-indirizzar tal-kontenut illegali;

16.Jiddispjaċih dwar in-nuqqas attwali ta’ qafas legali li jippermetti l-identifikazzjoni ta’ materjal ta’ abbuż sesswali tat-tfal online u jistieden lill-Kummissjoni tieħu azzjoni rapida biex tiżgura li jiġu stabbiliti mekkaniżmi ta’ rapportar volontarju ta’ materjal ta’ abbuż sesswali tat-tfal; jissottolinja l-obbligi tal-pjattaformi li jiżguraw spazju diġitali sikur għat-tfal li jirrispetta d-drittijiet fundamentali tagħhom u l-privatezza tad-data għal kull utent;

17.Jesprimi tħassib dwar l-użu dejjem jikber tal-IA għal skopijiet abbużivi, inkluż il-ġenerazzjoni ta’ deepfakes, klonazzjoni tal-vuċi u kontenut intimu mhux kunsenswali; itenni l-ħtieġa li jiġu pprojbiti “applikazzjonijiet nudifikanti” skont l-Att dwar l-IA bħala parti min-negozjati omnibus dwar l-IA; jistieden lill-fornituri jikkonformaw, mingħajr dewmien mal-Artikolu 50 tal-Att dwar l-IA dwar it-trasparenza u l-immarkar tal-ilma, sabiex jiġi żgurat li l-kontenut iġġenerat mill-IA jkun ittikkettat b’mod ċar biex jittaffa l-impatt dannuż tad-deepfakes, b’mod partikolari fuq il-minorenni;

18.Jistieden lill-Kummissjoni tivvaluta jekk il-valutazzjoni tar-riskju eżistenti u l-obbligi ta’ mitigazzjoni skont id-dritt tal-UE jkoprux b’mod adegwat l-operaturi tal-logħob online, b’mod partikolari dawk li joffru karatteristiċi ta’ komunikazzjoni f’ħin reali li jistgħu jesponu lill-minorenni għall-bullying ċibernetiku;

19.Ifakkar fl-obbligi skont id-Direttiva riveduta dwar is-Servizzi tal-Media Awdjoviżiva biex il-minorenni jiġu protetti minn kontenut illegali u ta’ ħsara u l-utenti kollha jiġu protetti minn kontenut li jinċita l-vjolenza jew il-mibegħda; jistieden lill-Kummissjoni biex timmonitorja l-implimentazzjoni ta’ din id-direttiva mill-Istati Membri;

20.Ifakkar fil-ħtieġa li jissaħħu l-protezzjoni u l-appoġġ għall-vittmi tal-bullying ċibernetiku; jinsab imħasseb li l-organizzazzjonijiet tal-vittmi qed ikunu dejjem aktar mhedda minħabba nuqqas ta’ finanzjament; jappella għal finanzjament akbar u sostenibbli tal-UE għall-organizzazzjonijiet tas-soċjetà ċivili, il-helplines u s-servizzi ta’ appoġġ għall-vittmi, u għall-integrazzjoni ta’ miżuri ta’ prevenzjoni u rispons għall-bullying ċibernetiku fl-istrateġiji nazzjonali tas-saħħa mentali, b’attenzjoni partikolari għall-minorenni u gruppi vulnerabbli oħra;

21.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.