A.de bhrí gur tharchuir Buanionadaíocht na hOstaire chuig an Aontas Eorpach iarraidh ó Oifig an Ionchúisitheora Phoiblí Vín maidir le tarscaoileadh dhíolúine Harald Vilimsky, Feisire de Pharlaimint na hEorpa, a toghadh san Ostáir, i ndáil le gníomhartha líomhnaithe claonchasaidh, ar cionta iad faoi Airteagal 153(1) agus (3) de Chód Coiriúil na hOstaire, de bharr a rannpháirtíochta líomhnaithe sa chionta de réir bhrí Airteagal 12 den Chód sin;

B.de bhrí, i gcomhréir leis an iarraidh, tar éis iarrataí roimhe sin ó Oifig an Ionchúisitheoira Phoiblí i Vín in 2021, go ndéanfaí díolúine Harald Vilimsky a tharscaoileadh, chomh maith leis an gcinneadh ó Pharlaimint na hEorpa an 11 Samhain 2021 lena dtarscaoiltear a dhíolúine, agus i bhfianaise fíorais nua a bheith ag teacht chun cinn, gurb iomchuí freisin tarscaoileadh dhíolúine Harald Vilimsky a iarraidh ar bhonn na fianaise nua sin; de bhrí, de réir na faisnéise ón imscrúdú, go bhfuil amhras ann gur bhain Harald Vilimsky mí-úsáid as a chumhacht trí úsáid a bhaint as cistí óna pháirtí polaitiúil FPÖ (Freiheitliche Partei Österreichs – Die Freiheitlichen) chun críocha nach mbaineann lena ghníomhaíochtaí, ar dhátaí in 2013 nár suíodh go beacht go fóill, go háirithe trí íocaíochtaí de chineál príobháideach a údarú nach mbaineann le gníomhaíochtaí an pháirtí, maidir le doras agus glas a shuiteáil ag a sheoladh príobháideach, rud a d’fhág go ndearnadh damáiste EUR 9 434,00 san iomlán do shócmhainní FPÖ.

C.de bhrí gur toghadh Harald Vilimsky chuig Parlaimint na hEorpa sna toghcháin Eorpacha i mí na Bealtaine 2019 agus gur athtoghadh é i mí an Mheithimh 2024 agus dá bhrí sin, nach raibh sé ina Fheisire de Pharlaimint na hEorpa tráth na gcionta líomhnaithe;

D.de bhrí nach ionann na cionta líomhnaithe agus tuairim a thug Harald Vilimsky ná vóta a chaith sé agus a dhualgais á gcomhlíonadh aige de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh, agus nach bhfuil baint dá réir sin ag an iarraidh ar a dhíolúine a tharscaoileadh le tuairim ná vóta den sórt sin.

E.de bhrí go bhforáiltear le hAirteagal 9, an chéad mhír, pointe (a), de Phrótacal Uimh. 7 ar Phribhléidí agus Díolúintí an Aontais Eorpaigh, le linn sheisiúin Pharlaimint na hEorpa, go dteachtfaidh a Feisirí, i gcríoch a mBallStáit féin, na díolúintí a thugtar do chomhaltaí pharlaimint a mBallstát féin;

F.de bhrí go bhforáiltear in Airteagal 57(2) agus (3) de Bhunreacht na hOstaire:

‘2. Ní fhéadfar comhaltaí na Comhairle Náisiúnta a ghabháil as cion coiriúil, ach amháin le toiliú na Comhairle Náisiúnta, mura ngabhfar iad i mbun coir a dhéanamh. Tá chomhaltaí na Comhairle Náisiúnta díolmhaithe ó aon chuardach a dhéantar ar áitreabh, seachas le toiliú na Comhairle Náisiúnta.

3. I ngach cás eile,, ní fhéadfar comhaltaí den Chomhairle Náisiúnta a ionchúiseamh go hoifigiúil mar gheall ar chion coiriúil, gan toiliú na Comhairle Náisiúnta, ach amháin i gcás nach bhfuil aon bhaint ag an ngníomh le gníomhaíocht pholaitiúil an chomhalta. Mar sin féin, déanfaidh an t-údarás ionchúisimh cinneadh a fháil ón gComhairle Náisiúnta maidir le cibé acu an bhfuil nó nach bhfuil nasc den sórt sin ann má iarrann an comhalta lena mbaineann nó aon trian de chomhaltaí an bhuanchoiste atá freagrach as cásanna den sórt sin amhlaidh. Arna iarraidh sin dó, staonfaidh an t-údarás ionchúisimh láithreach ó aon ghníomh a dhéanamh agus stopfaidh sé aon ghníomh a tosaíodh cheana féin’;

G.de bhrí gurb é is cuspóir do dhíolúine dá bhforáiltear i bPrótacal Uimh. 7 ar Phribhléidí agus Díolúintí an Aontais Eorpaigh ná Parlaimint na hEorpa agus a Feisirí a chosaint ar imeachtaí dlíthiúla a bhaineann le gníomhaíochtaí a dhéantar agus dualgais pharlaiminteacha á gcomhlíonadh agus nach féidir a scaradh ó na dualgais sin;

H.de bhrí, i gcomhréir le Riail 5(2) dá Rialacha Nós Imeachta, nach pribhléid phearsanta í díolúine pharlaiminteach don Fheisire, ach gur ráthaíocht í ar neamhspleáchas na Parlaiminte ina hiomláine agus a Feisirí;

I.de bhrí, sa chás seo, nár aimsigh an Pharlaimint aon fhianaise ar fumus persecutionis, is é sin le rá, nach cosúil gurb é rún na n-imeachtaí dlíthiúla dochar a dhéanamh do ghníomhaíocht pholaitiúil Harald Vilimsky ina cháil mar Fheisire de Pharlaimint na hEorpa agus dá bhrí sin, do neamhspleáchas na Parlaiminte.

J.de bhrí nach féidir le Parlaimint na hEorpa ról cúirte a ghlacadh uirthi féin, agus de bhrí nach féidir, i nós imeachta um dhíolúine a tharscaoileadh, Feisire a mheas mar ‘chosantóir’ Breithiúnas ón gCúirt Ghinearálta an 30 Aibreán 2019, Briois v an Pharlaimint, T-214/18, ECLI:EU:T:2019:266.;