A.billi permezz ta’ ittra datata l-21 ta’ Lulju 2025 u kkonfermata b’ittra datata l-1 ta’ Settembru 2025, il-Kap Prosekutur Ewropew ippreżentat talba għat-tneħħija tal-immunità ta’ Angelika Niebler, Membru tal-Parlament Ewropew eletta fil-Ġermanja, b’rabta ma’ allegati reati li seħħew bejn l-2017 u l-2025;

B.billi, skont it-talba, ibbażata fuq l-informazzjoni pprovduta minn parti privata li ħadmet għall-Angelika Niebler minn Awwissu 2021 sa Settembru 2023, Angelika Niebler, fil-perjodu mill-2017 ’il quddiem, jiġifieri mit-tmien sal-għaxar leġiżlatura, allegatament talbet b’mod mhux xieraq rimborż tal-ispejjeż tal-ivvjaġġar għal vjaġġi lejn Strażburgu u Brussell, allegatament temporanjament użat assistenti parlamentari akkreditati u assistenti lokali għal skopijiet privati jew skopijiet mhux marbuta mar-rwol ta’ Membru tal-Parlament Ewropew jew mal-qadi tad-dmirijiet parlamentari, u, barra minn hekk, allegatament impjegat assistent lokali li s-salarju tiegħu tħallas mill-Parlament Ewropew għal Angelika Niebler iżda li allegatament ħadem esklużivament għal ex Membru tal-Parlament Ewropew tal-istess partit; billi skont it-talba, abbażi tal-informazzjoni pprovduta, hemm suspett inizjali li Angelika Niebler użat l-ispejjeż għall-assistenza parlamentari b’mod li jmur kontra l-Artikolu 29(2) tad-Deċiżjoni tal-Bureau tal-11 ta’ Settembru 2023 dwar il-Miżuri ta’ Implimentazzjoni tal-Istatut tal-Membri tal-Parlament Ewropew Id-Deċiżjoni tal-Bureau tal-11 ta’ Settembru 2023 dwar il-Miżuri ta’ Implimentazzjoni għall-Istatut għall-Membri tal-Parlament Ewropew u li tħassar id-Deċiżjoni tal-Bureau tad-19 ta’ Mejju u d-9 ta’ Lulju 2008 (ĠU C, C/2024/2814, 26.4.2024, ELI: http://data.europa.eu/eli/C/2024/2814/oj).; billi, għalhekk, l-allegati azzjonijiet jistgħu jikkostitwixxu reat kriminali ta’ frodi skont it-Taqsima 263(1) u (3) tal-Kodiċi Kriminali Ġermaniż;

C.billi Angelika Niebler ġiet eletta fil-Parlament Ewropew fl-elezzjonijiet Ewropej ta’ Mejju 2014 u giet elleta mill-ġdid f’Mejju 2019 u f’Ġunju 2024 u kienet, għaldaqstant, Membru tal-Parlament Ewropew fiż-żmien tal-allegati reati;

D.billi l-allegati reati ma jikkostitwux opinjoni espressa jew vot mogħti minn Angelika Niebler fil-qadi ta’ dmirijietha skont it-tifsira tal-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea, u lanqas it-talba sussegwenti għat-tneħħija tal-immunità tagħha ma hija għalhekk relatata ma’ tali opinjoni jew vot;

E.billi l-Artikolu 9, l-ewwel paragrafu, il-punt (a), tal-Protokoll Nru 7 dwar il-Privileġġi u l-Immunitajiet tal-Unjoni Ewropea jipprevedi li, waqt is-sessjonijiet tal-Parlament Ewropew, il-Membri tal-Parlament Ewropew għandhom igawdu, fit-territorju tal-Istat Membru tagħhom stess, l-immunitajiet mogħtija lill-membri tal-parlament tal-Istat Membru tagħhom;

F.billi l-Artikolu 46(2), (3) u (4) tal-Liġi Fundamentali tar-Repubblika Federali tal-Ġermanja jipprevedi dan li ġej:

“(2) Membru ma jistax jinżamm responsabbli jew inkella jiġi arrestat għal reat kastigabbli mingħajr l-awtorizzazzjoni tal-Bundestag, sakemm ma jinqabadx in flagrante delicto jew inkella l-għada tat-twettiq tar-reat.

(3) L-awtorizzazzjoni tal-Bundestag hija barra minn hekk meħtieġa wkoll għal kwalunkwe restrizzjoni oħra tal-libertà tal-persuna ta’ Membru Parlamentari jew biex jinbdew proċedimenti kontra Membru Parlamentari fis-sens tal-Artikolu 18.

(4) Kwalunkwe proċediment kriminali jew proċediment fis-sens tal-Artikolu 18 kontra Membru Parlamentari, kwalunkwe detenzjoni u kwalunkwe restrizzjoni oħra tal-libertà tal-persuna tiegħu għandhom jiġu sospiżi fuq talba tal-Bundestag.”;

G.billi l-għan tal-immunità prevista fil-Protokoll Nru 7 dwar il-Privileġġi u l-Immunitajiet tal-Unjoni Ewropea huwa li tipproteġi lill-Parlament u lill-Membri tiegħu minn proċedimenti ġudizzjarji fir-rigward ta’ attivitajiet imwettqa fil-qadi tad-dmirijiet parlamentari u li huma inseparabbli minn dawk id-dmirijiet;

H.billi, skont l-Artikolu 5(2) tar-Regoli ta’ Proċedura tiegħu, l-immunità parlamentari mhix privileġġ personali tal-Membru iżda garanzija tal-indipendenza tal-Parlament kollu kemm hu u tal-Membri tiegħu;

I.billi hemm bżonn li kwalunkwe konklużjoni tinsilet abbażi tal-informazzjoni u l-ispjegazzjonijiet ipprovduti fil-każ inkwistjoni; billi hemm inċertezzi serji dwar l-elementi u r-raġunijiet sottostanti għall-ilment li wasslu għat-talba għat-tneħħija tal-immunità, inkluża n-natura anonima tiegħu, li tipprekludi valutazzjoni sinifikanti tal-ilment u tagħmel impossibbli li tiġi eskluża l-possibbiltà li l-ilment seta’ nbeda minn individwu privat b’motivazzjoni politika diretta biex tikkomprometti lil Angelika Niebler; billi, barra minn hekk, l-għażla taż-żmien u n-natura selettiva tal-ilment isaħħu dak it-tħassib, b’mod partikolari fid-dawl tar-rwol politiku prominenti ta’ Angelika Niebler; billi l-inkonsistenzi fit-talba, inkluż nuqqas evidenti ta’ preċiżjoni fir-rigward tas-somom finanzjarji eżatti inkwistjoni, kif ukoll iċ-ċirkostanzi speċifiċi tal-imġiba ħażina allegata, iqajmu tħassib li l-intenzjoni wara l-proċedimenti tista’ tkun li ssir ħsara lir-reputazzjoni ta’ Angelika Niebler;

J.billi għalhekk jidher li, f’dan il-każ, wieħed jista’ jassumi l-eżistenza ta’ każ ta’ fumus persecutionis, jiġifieri hemm “evidenza konkreta” Is-sentenza tal-Qorti tal-Ġustizzja tas-17 ta’ Settembru 2020, Troszczynski vs Il-Parliament, C-12/19, ECLI:EU:C:2020:725, paragrafu 26. li l-proċedimenti legali hija li ssir ħsara lill-attività politika ta' Angelika Niebler fil-kapaċità tagħha bħala Membru tal-Parlament Ewropew u b'hekk lill-indipendenza tal-Parlament;

K.billi l-Parlament ma jistax jitqies bħala qorti u, billi, il-Membru ma jistax, fi proċedura għat-tneħħija tal-immunità, jitqies bħala “akkużat” Is-sentenza tal-Qorti Ġenerali tat-30 ta’ April 2019, Briois vs Il-Parlament, T-214/18, ECLI:EU:T:2019:266.;