1.Jirrikonoxxi li l-IA tista’ taċċellera l-esportazzjonijiet u l-importazzjonijiet tal-UE, speċjalment għall-SMEs, billi tnaqqas l-ostakli għad-dħul fis-suq u l-kostijiet tal-konformità, u b’hekk tippermetti lill-kumpaniji jilħqu swieq li qabel ma kinux aċċessibbli għalihom, dment li l-SMEs ikollhom aċċess ġust għall-inftrastuttura tal-IA; jistieden lill-Kummissjoni tintegra servizzi ta’ konsulenza affidabbli dwar l-IA fil-portal Access2Markets u fil-Punt Uniku ta’ Servizz biex tinnaviga t-tariffi, ir-regoli tal-oriġini u r-rekwiżiti regolatorji; jistieden lill-Kummissjoni tagħti prijorità lill-għodod tal-IA favur l-SMEs u tiżgura li s-soluzzjonijiet ta’ konformità diġitali jibqgħu sempliċi, affordabbli u aċċessibbli;

2.Jinnota li l-IA tista’ tgħin biex jitnaqqsu d-dewmien u l-kostijiet fil-ktajjen tal-provvista tal-UE billi ttejjeb l-ippjanar u l-koordinazzjoni; jistieden lill-Kummissjoni tinnormalizza l-kummerċ mingħajr karti u tippromwovi l-kondiviżjoni ta’ informazzjoni affidabbli bejn l-operaturi u l-awtoritajiet; jappella għal investiment fil-loġistika abilitata bl-IA li tiffaċilita l-konġestjonijiet fil-portijiet u fil-kurituri, u għal appoġġ għal loġistika aktar ekoloġika permezz ta’ rotot u ta’ manutenzjoni aktar intelliġenti; jistieden lill-Kummissjoni tinċentiva soluzzjonijiet tal-IA b’sors miftuħ li jikkontribwixxu għal żieda fil-kompetizzjoni u jnaqqsu d-dipendenza fuq fornituri mhux tal-UE; jenfasizza li d-diġitalizzazzjoni u l-loġistika abilitata bl-IA għandhom iwasslu għal produttività, effiċjenza u ġestjoni tal-katina tal-provvista akbar, kostijiet kummerċjali aktar baxxi u piżijiet amministrattivi mnaqqsa;

3.Jinnota r-rwol potenzjali tal-IA fit-tisħiħ tal-kontrolli doganali fost il-kapaċità żejda tas-suq u l-limitazzjonijiet tal-ispezzjonijiet tal-bniedem fid-dawl tal-isfidi ppreżentati mill-influss ta’ oġġetti, b’mod partikolari pakketti żgħar li ġejjin miċ-Ċina; jistieden lill-Kummissjoni tipprovdi riżorsi u ħiliet lill-awtoritajiet tas-sorveljanza tas-suq u doganali, anke permezz tal-kooperazzjoni msaħħa fost l-Istati Membri fil-Pjattaforma tad-Data Doganali tal-UE, biex tiżgura li l-użu tal-IA jsaħħaħ il-kapaċità tal-infurzar u l-kondiviżjoni tad-data fost l-awtoritajiet; jistieden lill-Kummissjoni tinvestiga l-potenzjal tal-IA li żżomm il-konformità tal-oġġetti importati mad-dritt tal-UE, ittejjeb it-traċċabbiltà f’ħin reali u l-kontroll doganali tal-prodotti importati u s-sorveljanza tas-suq, tuża għodod tal-IA siguri u ddedikati biex tanalizza b’mod sistematiku d-data minn pakketti żgħar jew tiżgura t-traċċabbiltà tal-prodotti tul il-katina tal-provvista sabiex tiġġieled l-oġġetti kontrafatti, il-frodi doganali, il-prattiki kummerċjali inġusti u ċ-ċirkomvenzjoni tas-sanzjonijiet imposti mill-UE; jenfasizza li tali sistemi tal-IA jikkostitwixxu infrastruttura kritika u għalhekk għandhom jibqgħu indipendenti u sovrani; jistieden lill-Kummissjoni tiżgura li dawn l-għodod jikkonformaw strettament mal-leġiżlazzjoni rilevanti tal-UE;

4.Jinnota li l-IA tista’ tkun għodda utli għall-kumpaniji, għall-awtoritajiet doganali u għall-awtoritajiet tas-sorveljanza tas-suq biex jiddefendu l-protezzjoni tad-drittijiet tal-bniedem billi jiffaċilitaw l-implimentazzjoni effettiva u l-konformità mar-regoli tal-UE bħad-Direttiva dwar id-Diliġenza Dovuta tas-Sostenibbiltà Korporattiva10 Id-Direttiva (UE) 2024/1760 tal-Parlament Ewropew u tal-Kunsill tat-13 ta’ Ġunju 2024 dwar id-diliġenza dovuta korporattiva dwar is-sostenibbiltà u li temenda d-Direttiva (UE) 2019/1937 u r-Regolament (UE) 2023/2859, (ĠU L, 2024/1760, 5.7.2024, ELI: http://data.europa.eu/eli/dir/2024/1760/oj)., ir-Regolament dwar id-Deforestazzjoni11 Ir-Regolament (UE) 2023/1115 tal-Parlament Ewropew u tal-Kunsill tal-31 ta’ Mejju 2023 dwar it-tqegħid fis-suq tal-Unjoni u l-esportazzjoni mill-Unjoni ta’ ċerti komoditajiet u prodotti assoċjati mad-deforestazzjoni u d-degradazzjoni tal-foresti u li jħassar ir-Regolament (UE) Nru 995/2010 (ĠU L 150, 9.6.2023, p. 206, ELI: http://data.europa.eu/eli/reg/2023/1115/oj)., jew ir-Regolament tal-UE dwar ix-Xogħol Furzat12 Ir-Regolament (UE) 2024/3015 tal-Parlament Ewropew u tal-Kunsill tas-27 ta’ Novembru 2024 dwar il-projbizzjoni ta’ prodotti magħmulin b’xogħol furzat fis-suq tal-Unjoni u li jemenda d-Direttiva (UE) 2019/1937 (ĠU L, 2024/3015, 12.12.2024, ELI: http://data.europa.eu/eli/reg/2024/3015/oj)., u jiddefendu l-protezzjoni tal-konsumatur billi jiffaċilitaw l-implimentazzjoni effettiva u l-konformità mar-regoli tal-UE bħar-reġistrazzjoni, l-evalwazzjoni, l-awtorizzazzjoni u r-restrizzjoni tas-sustanzi kimiċi (REACH), il-markatura CE, u r-Regolament dwar is-Sigurtà Ġenerali tal-Prodotti13 Ir-Regolament (UE) 2023/988 tal-Parlament Ewropew u tal-Kunsill tal-10 ta’ Mejju 2023 dwar is-sikurezza ġenerali tal-prodotti, li jemenda r-Regolament (UE) Nru 1025/2012 tal-Parlament Ewropew u tal-Kunsill u d-Direttiva (UE) 2020/1828 tal-Parlament Ewropew u tal-Kunsill, u li jħassar id-Direttiva 2001/95/KE tal-Parlament Ewropew u tal-Kunsill u d-Direttiva tal-Kunsill 87/357/KEE (ĠU L 135, 23.5.2023, p. 1, ELI: http://data.europa.eu/eli/reg/2023/988/oj).;

5.Jirrikonoxxi li l-kompetittività tal-Ewropa fil-kummerċ tal-oġġetti se tiddependi dejjem aktar fuq il-produttività abilitata bl-IA u fuq il-kisbiet fil-kwalità fil-ktajjen tal-valur industrijali strateġiċi, inklużi t-teknoloġiji tal-manifattura, tal-karozzi, tal-farmaċewtika u tal-enerġija; jistieden lill-Kummissjoni tirrifletti dawn l-interessi b’mod sistematiku fin-negozjati tal-kummerċ billi tiżgura aċċess effettiv għas-suq, dixxiplini robusti dwar l-ostakli mhux tariffarji, u dispożizzjonijiet infurzabbli li jżommu kundizzjonijiet ekwi billi jipprevjenu l-kompetizzjoni inġusta u d-distorsjonijiet relatati mat-teknoloġija, filwaqt li jirrikonoxxi d-dritt tal-UE li tirregola;

6.Jirrikonoxxi li l-IA qed issawwar mill-ġdid il-kummerċ f’servizzi mwassla b’mod diġitali billi tikkommodifika l-għarfien espert billi tirrikjedi sforzi addizjonali biex tippreserva l-vantaġġ komparattiv storiku tal-Ewropa f’servizzi professjonali, tekniċi u kummerċjali ta’ valur għoli; jissottolinja li r-reazzjoni għall-kompetizzjoni globali intensifikata fil-kummerċ tas-servizzi tirrikjedi l-mobilizzazzjoni tal-investiment u t-titjib tal-aċċess għall-finanzi kif previst fir-rapporti ta’ Draghi u ta’ Letta; iħeġġeġ lill-Kummissjoni timmobilizza sħubijiet ta’ kummerċ u ta’ investiment biex tattira l-kapital u t-talent u tespandi l-kumpaniji Ewropej;

7.Jirrikonoxxi l-potenzjal tal-IA li ssawwar mill-ġdid ix-xogħol u s-swieq tax-xogħol globalment; iwissi dwar ir-riskji ta’ spostament mill-awtomatizzazzjoni, il-kummerċ tas-servizzi abilitat bl-IA, u t-twessigħ tal-lakuni fil-ħiliet fil-forza tax-xogħol tal-UE; jenfasizza għalhekk il-ħtieġa li jiġu adottati strateġiji sabiex jiġu antiċipati dawn il-bidliet u l-forza tax-xogħol tiġi adattata kif xieraq; jinnota li l-iżvilupp u l-użu ta’ mudelli u sistemi tal-IA għandhom konsegwenzi ambjentali negattivi, inklużi żieda fid-domanda għall-elettriku u fil-konsum tal-ilma; jistieden lill-Kummissjoni tanalizza, fil-valutazzjonijiet tal-impatt tal-ftehimiet ta’ kummerċ ħieles, liema setturi x’aktarx jiġu affettwati mill-IA u tivvaluta l-impatt tal-użu tal-IA fuq id-drittijiet tal-ħaddiema u fuq l-ambjent;

8.Iwissi li d-distakk diġitali jirriskja li jeskludi lis-sħab fin-Nofsinhar Globali minn opportunitajiet ta’ tkabbir xprunati bl-IA, filwaqt li jżid id-dipendenza fuq mudelli importati; jisħaq li l-kooperazzjoni li tappoġġja l-użu tal-għodda tal-IA fil-pajjiżi li qed jiżviluppaw għandha ssaħħaħ is-sistema kummerċjali multilaterali u tiġi promossa permezz tal-qafas tad-WTO; jistieden lill-Kummissjoni tagħmel użu mid-dispożizzjonijiet dwar l-inklużjoni diġitali fil-kapitoli dwar il-kummerċ u l-iżvilupp sostenibbli u fil-ftehimiet kummerċjali diġitali biex tappoġġja l-adozzjoni tal-IA u ż-żidiet fil-produttività kif ukoll trawwem IA inklużiva u affidabbli permezz ta’ programmi ta’ kooperazzjoni internazzjonali ddedikati u inizjattivi ta’ bini tal-kapaċità fl-ambitu tal-istrumenti esterni eżistenti tal-UE, inklużi programmi ta’ taħriġ u aċċess għall-infrastruttura diġitali u tal-IA; jistieden lill-Kummissjoni tiffoka l-bini tal-kapaċità tal-Global Gateway fuq ekosistemi tal-IA b’sors miftuħ u etiċi u kapaċitajiet lokali, filwaqt li trawwem relazzjonijiet kummerċjali u ta’ investiment reżiljenti u ta’ benefiċċju reċiproku;

9.Jinnota li s-soluzzjonijiet tal-IA b’sors miftuħ, billi jippermettu użu mill-ġdid trasparenti u ttestjar indipendenti, joffru vantaġġi sinifikanti, inklużi spejjeż imnaqqsa u privatezza tad-data mtejba permezz tal-użu lokali, jikkontribwixxu għal żieda fil-kompetizzjoni b’saħħitha fl-IA u dipendenza mnaqqsa fuq fornituri mhux tal-UE, filwaqt li jappoġġjaw soluzzjonijiet tal-IA verifikabbli u adattati lokalment żviluppati b’mod konġunt mas-sħab fin-Nofsinhar Globali; jisħaq li l-inkorporazzjoni ta’ tali kooperazzjoni fil-politika kummerċjali tal-UE u fis-Sħubijiet Diġitali tista’ tiddiversifika s-sħubijiet, tnaqqas id-dipendenza fuq ftit ekosistemi proprjetarji, u ssaħħaħ ir-rabtiet ġeopolitiċi fit-tul; jistieden lill-Kummissjoni tinċentiva soluzzjonijiet tal-IA b’sors miftuħ, li jikkontribwixxu għat-tnaqqis tad-dipendenza minn fornituri mhux tal-UE; jissottolinja li l-kollaborazzjoni b’sors miftuħ għandha tinkludi proġetti relatati mal-IA għall-ġid pubbliku, bħall-indirizzar tat-tibdil fil-klima, l-appoġġ għat-tranżizzjoni lejn enerġija nadifa, u t-titjib tal-kura tas-saħħa u s-sigurtà tal-ikel;

10.Jenfasizza r-rwol strateġiku tas-sħubijiet diġitali u tal-Kunsilli tal-Kummerċ u t-Teknoloġija ma’ sħab tal-istess fehma, li jikkondividu valuri demokratiċi, standards għolja ta’ governanza u impenn għal kummerċ miftuħ u bbażat fuq ir-regoli biex jipproġettaw l-approċċ tal-UE għal IA mmexxi mill-valuri, iffukat fuq il-bniedem u bbażat fuq ir-riskju; jitlob l-inklużjoni msaħħa tal-Parlament fil-Kunsilli tal-Kummerċ u t-Teknoloġija; jistieden lill-Kummissjoni timplimenta l-Istrateġija Diġitali Internazzjonali permezz ta’ pożizzjonijiet koordinati fil-G7, fil-G20, fl-Organizzazzjoni għall-Kooperazzjoni u l-Iżvilupp Ekonomiċi (OECD), u fin-Nazzjonijiet Uniti, u timplimenta kooperazzjoni strutturata bejn ir-regolaturi biex tixpruna l-konverġenza globali dwar standards għoljin ta’ sikurezza tal-IA u protezzjoni tad-drittijiet fundamentali;

11.Jisħaq fuq il-ħtieġa li jiġi difiż u promoss, b’mod partikolari f’fora multilaterali, il-mudell tal-IA tal-UE ċċentrat fuq il-bniedem bħala standard internazzjonali u l-Att dwar l-Intelliġenza Artifiċjali bħala parametru referenzjarju li jista’ jgħin biex jiġu allinjati l-istandards tat-trasparenza u tas-sikurezza filwaqt li l-kummerċ jinżamm miftuħ u prevedibbli; jistieden lill-Kummissjoni ssaħħaħ il-kooperazzjoni dwar l-istandards tal-IA, l-innovazzjoni teknoloġika u l-ktajjen tal-provvista siguri ma’ sħab fdati u pajjiżi tal-istess fehma, inkluż permezz ta’ sħubijiet bilaterali u fora multilaterali, filwaqt li tagħti prijorità lis-sħab li jirrispettaw il-valuri demokratiċi u l-ordni internazzjonali bbażat fuq ir-regoli; jinnota li s-sistemi avvanzati tal-IA joħolqu sfidi transfruntiera, u jistieden lill-Kummissjoni taħdem lejn livell minimu globali ta’ protezzjonijiet kontra l-aktar riskji serji bħala bażi għal governanza interoperabbli u affidabbli, b’mod partikolari permezz ta’ inizjattivi internazzjonali bħas-Sħubija Globali dwar l-IA, il-prinċipji tal-IA tal-OECD, u l-qafas tal-etika tal-IA tal-UNESCO;

12.Jissottolinja li, lil hinn minn livell minimu globali ta’ protezzjonijiet, hija meħtieġa koalizzjoni ta’ sħab tal-istess fehma li jikkondividu l-approċċ tal-UE ċċentrat fuq il-bniedem biex nimxu aktar malajr fl-implimentazzjoni ta’ standards għoljin ta’ sikurezza, trasparenza, obbligu ta’ rendikont u drittijiet fundamentali tal-IA, b’mod partikolari permezz ta’ djalogu regolatorju strutturat biex jiġi indirizzat it-tilwim, jiġu skambjati l-aħjar prattiki u jiġu adattati l-impenji fid-dawl tal-iżviluppi teknoloġiċi; jistieden ukoll lill-Kummissjoni tgħaqqad il-konverġenza regolatorja dwar standards għoljin ta’ sikurezza u drittijiet fundamentali ma’ bini tal-kapaċità konkret, inkluż investiment konġunt f’kapaċitajiet siguri u affordabbli ta’ computing u ttestjar, sħubijiet ta’ talent u ħiliet biex titnaqqas id-dipendenza strateġika u jinħolqu mudelli ta’ implimentazzjoni kredibbli li l-pajjiżi sħab jistgħu jallinjaw magħhom, filwaqt li jsaħħu IA affidabbli bħala pedament għal kummerċ diġitali miftuħ u reżiljenti;

13.Jissottolinja li flussi tad-data legali u siguri huma essenzjali għall-kummerċ abilitat bl-IA; ifakkar fil-ħtieġa li l-ftehimiet kummerċjali diġitali tal-UE jikkonformaw mad-dispożizzjonijiet orizzontali tal-Kummissjoni dwar il-flussi transfruntiera tad-data u l-protezzjoni tad-data personali u l-privatezza fit-Titolu dwar il-Kummerċ Diġitali tal-ftehimiet kummerċjali tal-UE, li jippermettu lill-Unjoni tinkludi miżuri li jiffaċilitaw il-flussi transfruntiera tad-data fil-ftehimiet kummerċjali filwaqt li tippreserva d-drittijiet fundamentali tal-individwi għall-protezzjoni tad-data u l-privatezza, filwaqt li jenfasizza li dawn għandhom jinkludu dispożizzjonijiet iddedikati dwar il-kooperazzjoni regolatorja dwar l-IA, jiffaċilitaw il-fehim reċiproku tal-approċċi regolatorji u jistieden lill-Kummissjoni tinkludi tali dispożizzjonijiet fil-kapitoli u l-ftehimiet futuri kollha dwar il-kummerċ diġitali; jafferma mill-ġdid li s-salvagwardji li jissodisfaw il-GDPR jew standards ekwivalenti huma rekwiżiti minimi għat-trasferimenti tad-data personali tal-UE; jitlob li l-ftehimiet kummerċjali diġitali jipproteġu l-awtonomija regolatorja u jippreservaw l-aċċess tekniku meħtieġ mir-regolaturi biex jinfurzaw l-Att dwar l-IA u jiżguraw it-trasparenza, l-awditjar, il-ġustizzja, is-sikurezza u l-obbligu ta’ rendikont tas-sistemi tal-IA, filwaqt li jiżguraw li s-soċjetà ċivili u r-riċerkaturi indipendenti jkollhom aċċess għall-kodiċi tas-sors u l-algoritmi tas-sistemi;

14.Ifakkar fl-impenn tal-UE għal sistema kummerċjali multilaterali bbażata fuq ir-regoli; jissottolinja li d-WTO għandha tikkontribwixxi b’mod sinifikanti biex jiġi żviluppat qafas ta’ governanza robust, sikur, inklużiv u affidabbli tal-IA għall-kummerċ, inkluż billi jiġi stabbilit Grupp ta’ Ħidma ddedikat tad-WTO dwar l-Intelliġenza Artifiċjali biex jiffaċilita d-djalogu, il-kondiviżjoni tal-għarfien u l-kooperazzjoni fost il-membri dwar ir-regolamenti u l-politiki tal-IA; jisħaq li regoli bbilanċjati dwar il-kummerċ elettroniku huma vitali biex jiġi sfruttat il-kummerċ abilitat bl-IA; jistieden lill-Kummissjoni tiżgura li kwalunkwe test tad-WTO dwar il-kummerċ elettroniku jiżgura spazju ta’ politika għal governanza demokratika tal-IA, inklużi salvagwardji infurzabbli għall-ħaddiema u l-konsumaturi; jistieden lill-Kummissjoni tmexxi ‘l quddiem id-diskussjonijiet dwar l-IA u l-kummerċ fil-qafas tad-WTO u tippromwovi l-kooperazzjoni globali li tiffaċilita l-flussi tad-data affidabbli u l-kummerċ diġitali, kif ukoll l-aċċess għal servizzi u għodod abilitati bl-IA, b’mod partikolari fil-pajjiżi li qed jiżviluppaw;

15.Iwissi li reġimi diverġenti ta’ konformità tal-IA jirriskjaw li jifframmentaw is-swieq u jżidu l-kostijiet tal-kummerċ; jisħaq fuq ir-rwol tal-kooperazzjoni internazzjonali fil-prevenzjoni tal-frammentazzjoni regolatorja; jistieden lill-Kummissjoni tuża l-istandards internazzjonali u l-ostakli tekniċi għall-kummerċ (TBT) u għad-dixxiplini tat-trasparenza tad-WTO bħala għodod biex tipprevjeni li d-diverġenza regolatorja ssir ostaklu inġust għall-kummerċ, filwaqt li tippreserva u tuża b’mod strateġiku l-qafas ta’ governanza tal-IA tal-UE biex tiffaċilita l-kummerċ diġitali affidabbli u trawwem kundizzjonijiet ekwivalenti ta’ kompetizzjoni globali għal IA affidabbli;

16.Jisħaq li l-aċċess sigur għal semikondutturi avvanzati u qawwa komputazzjonali affordabbli huwa fundamentali għas-sovranità teknoloġika u għall-kompetittività tal-UE; jinnota li l-Att dwar iċ-Ċipep u l-aġenda dwar il-fabbriki tal-IA jirriskjaw li ma jkunux biżżejjed minħabba twettiq frammentat u skala limitata; jistieden lill-Kummissjoni taċċellera l-implimentazzjoni tagħhom, issegwi d-diplomazija tagħha dwar il-materja prima u tingrana l-ftehimiet kummerċjali, il-ftehimiet qafas u ta’ sħubija ma’ sħab fdati biex tiddiversifika l-ktajjen tal-provvista u tnaqqas id-dipendenzi strateġiċi; jirrikonoxxi, f’dan il-kuntest, ir-rwol kritiku tal-ekosistemi avvanzati tal-manifattura taċ-ċipep f’ekonomiji sħab tal-istess fehma biex jirfdu l-kapaċità globali tal-computing tal-IA, u jħeġġeġ l-approfondiment tal-kooperazzjoni ma’ tali sħab dwar ir-reżiljenza tal-katina tal-provvista tas-semikondutturi; jenfasizza, barra minn hekk, l-urġenza li tissaħħaħ il-produzzjoni Ewropea ta’ semikondutturi avvanzati, b’mod partikolari billi jiġu appoġġjati inizjattivi Ewropej bħar-reviżjoni proposta tal-Att dwar iċ-Ċipep (l-Att dwar iċ-Ċipep 2.0); jistieden lill-Kummissjoni jkollha strateġija aktar ċara dwar kif l-UE tista’ tiżviluppa bħala attur ewlieni fl-ekosistema tal-IA u tintegra dispożizzjonijiet b’saħħithom fil-ftehimiet kummerċjali biex tiżgura aċċess ġust għat-teknoloġiji kritiċi u l-materja prima;

17.Iqis is-sħubijiet strateġiċi dwar ir-reżiljenza tal-katina tal-provvista tal-minerali kritiċi bħala strumenti potenzjalment sinifikanti għal aktar koordinazzjoni mal-alleati dwar l-aċċess għal inputs kritiċi tal-IA, inklużi elementi tal-materjali tal-art rari u materjali avvanzati tas-semikondutturi; jinsisti li l-impenn tal-UE jrid ikun kundizzjonali fuq il-koerenza mal-parametri referenzjarji tal-Att dwar il-Materja Prima Kritika u mal-objettivi ta’ awtonomija strateġika miftuħa tal-UE, filwaqt li jitnaqqsu l-vulnerabbiltajiet aktar milli jinbidlu d-dipendenzi; jistieden lill-Kummissjoni tiżgura li kwalunkwe strument kummerċjali plurilaterali li jirriżulta minn sħubijiet bħal dawn, inklużi prezzijiet minimi jew mekkaniżmi ta’ offtake, ikun kompatibbli mal-impenji tad-WTO u jservi l-interessi tal-UE; jappella għal djalogu u kooperazzjoni msaħħa fost is-sħab fdati biex jiġu ssalvagwardjati l-flussi kummerċjali internazzjonali u jissaħħu l-integrità u r-reżiljenza tal-ekosistemi industrijali relatati mal-IA;

18.Iwissi li l-konċentrazzjoni tal-infrastruttura tal-cloud f’pajjiżi mhux tal-UE tesponi lill-UE għal vulnerabbiltajiet ġuriżdizzjonali esterni; jistieden lill-Kummissjoni, permezz tal-Att propost dwar l-Iżvilupp tal-Cloud u tal-IA u l-Att dwar l-Aċċelleratur Industrijali (COM(2026)0100), tistabbilixxi oqfsa ta’ sovranità gradwati li jagħtu prijorità lill-fornituri għal servizzi kritiċi li huma bbażati fl-UE permezz tal-akkwist pubbliku, filwaqt li tiżgura awtonomija strateġika miftuħa billi żżomm aċċess mhux diskriminatorju għal fornituri tal-istess fehma li jissodisfaw ir-rekwiżiti ta’ ċertifikazzjoni u ta’ interoperabbiltà tal-UE;

19.Jistieden lill-Kummissjoni tiżgura li l-prinċipju tas-sigurtà ekonomika tagħha jikkoordina l-iskrinjar tal-investiment dirett barrani, b’attenzjoni speċifika għas-setturi diġitali strateġiċi bħall-pjattaformi tal-IA, is-servizzi tal-cloud, u ċ-ċentri data, il-kontrolli tal-esportazzjoni, l-Istrument Kontra l-Koerċizzjoni u d-difiża tal-kummerċ bħala sistema koerenti li tipprevjeni li d-dipendenzi fil-qasam tal-IA jintużaw bħala arma; iwissi li r-restrizzjonijiet fuq l-esportazzjoni tal-materja prima kritika u l-volatilità ġeopolitika li qed tikber jirrikjedu koordinazzjoni u infurzar imsaħħa bil-għan li tiġi protetta l-ekosistema tal-IA tal-Ewropa; jistieden lill-Kummissjoni tipproponi reviżjoni mmirata tar-Regolament dwar l-Użu Doppju biex tindirizza b’mod aktar komprensiv l-intelliġenza artifiċjali avvanzata fid-dawl tal-użu potenzjali tagħha minn pajjiżi terzi f’applikazzjonijiet ta’ sigurtà, sorveljanza jew difiża;

20.Jesprimi tħassib dwar ir-restrizzjonijiet ripetittivi taċ-Ċina fuq l-esportazzjoni ta’ elementi tal-materjali tal-art rari (REEs), li jfixklu b’mod sinifikanti l-ktajjen tal-provvista vitali għall-kumpaniji tas-semikondutturi kif ukoll il-katina tal-valur usa’ tal-IA; iqis li l-azzjoni taċ-Ċina mhijiex ġustifikata u jistieden lill-Kummissjoni timmonitorja mill-qrib is-sitwazzjoni u tirrispondi b’mod xieraq sabiex tiżgura li l-ekonomija globali u r-reżiljenza tal-kummerċ internazzjonali ma jiġux affettwati;

21.Jissottolinja l-ħtieġa li l-UE taċċellera l-implimentazzjoni tal-Att dwar il-Materja Prima Kritika u tiddiversifika l-ktajjen tal-provvista biex issaħħaħ ir-reżiljenza ekonomika; jisħaq fuq il-ħtieġa urġenti li jiġu żgurati investimenti fil-proġetti strateġiċi approvati fl-ambitu tal-Att dwar il-Materja Prima Kritika u fi proġetti oħra biex tingħata spinta lill-estrazzjoni, ir-raffinar, l-ipproċessar u r-riċiklaġġ li jikkontribwixxu għat-tneħħija tar-riskji miċ-Ċina;

22.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.