1.á iarraidh ar an gCoimisiún agus ar an gComhairle a áirithiú go mbainfear úsáid éifeachtach as na huirlisí dlíthiúla agus bainistithe uile atá ar fáil cheana, lena n-áirítear bearta spriocdhírithe, trí úsáid a bhaint as cur chuige eolaíochtbhunaithe chomh maith le comhairliúchán éifeachtach le geallsealbhóirí, chun aon laghdú breise ar stoic éisc Mhuir Bhailt a chosc;

2.á iarraidh ar an gCoimisiún, in éineacht leis na Ballstáit, measúnú a dhéanamh ar an gcaoi a bhfuil forbairt tagtha ar dháileadh cuótaí i measc ranna cabhlaigh i Muir Bhailt agus cinneadh a dhéanamh an ann do nasc cúisíoch idir an brú ar na hacmhainní agus beartas dáileacháin náisiúnta na ndeiseanna iascaireachta;

3.ag tathant ar an gCoimisiún agus ar na Ballstáit, agus an Rialachán maidir leis an bplean ilbhliantúil do Mhuir Bhailt á chur chun feidhme acu, bogadh i dtreo céim téarnaimh agus atógála do stoic éisc, bearta agus gníomhaíochtaí a dhéanamh bunaithe ar an gcomhairle eolaíoch is fearr atá ar fáil, chomh maith le gníomhaíochtaí idirnasctha eile a d’fhéadfadh a bheith ann a bhaineann le reachtaíocht eile de chuid an Aontais nó le reachtaíocht náisiúnta eile chun aghaidh a thabhairt ar na strusairí uile maidir le stoic éisc; á iarraidh ar an gCoimisiún agus ar na Ballstáit, agus an chéim téarnaimh agus atógála thuasluaite á cur chun feidhme acu, machnamh a dhéanamh ar bhearta feabhais bunaithe ar an eolaíocht is fearr atá ar fáil amhail iascach spriocdhírithe a chur ar fionraí do stoic áirithe i Muir Bhailt dá bhforáiltear sa phlean ilbhliantúil, agus bearta a sheachaint a d’fhéadfadh an bonn a bhaint de chobhsaíocht shocheacnamaíoch na bpobal cósta chun a áirithiú go leanfaidh gníomhaíochtaí iascaireachta lena gcaitheamh ag an duine de bheith inbhuanaithe;

4.á iarraidh go ndéanfaí tacaíocht shóisialta agus airgeadais a shlógadh, lena n-áirítear tacaíocht do na pobail a ndéantar difear dóibh, infheistíocht áitiúil, cúiteamh sealadach agus cabhair idirlinne d’iascairí i gcomhréir le rialacha an Aontais chun cruatan míchuí a chosc agus an oidhreacht chultúrtha a chaomhnú; ag tabhairt dá haire, cé go dtugtar aghaidh le bearta sealadacha ar ábhair imní éiceolaíocha láithreacha, go bhfuil uirlisí maidir le scor buan ceaptha chun an acmhainneacht iascaireachta a choigeartú le deiseanna iascaireachta san fhadtéarma; á iarraidh, dá bhrí sin, go mbeadh deighilt shoiléir idir scor sealadach agus scor buan i scéimeanna tacaíochta; á aithint nach bhfuair fiontair iascaireachta bheaga agus mheánmhéide Mhuir Bhailt aon chúiteamh eacnamaíoch leormhaith as na caillteanais a tabhaíodh ó dúnadh iascaigh spriocdhírithe trosc in 2019; á iarraidh ar an gCoimisiún ciste tiomnaithe aisghabhála agus aistrithe iascaigh Mhuir Bhailt a bhunú chun tacú le hathstruchtúrú cabhlaigh, nuachóiriú teicneolaíochta, cúiteamh as caillteanais de bharr toirmisc iascaireachta speicis-shonracha, agus caomhnú pobal iascaireachta cósta agus a n-oidhreacht chultúrtha;

5.á chur i bhfáth nach mór dálaí uathúla hidreolaíocha agus ceimiceacha a bhaineann go sonrach le himchuach sa Mhuir Bhailt a chur san áireamh in aon bhearta maidir le hathbhunú stoic, mar fharraige goirt leathiata arb é is príomhthréith di malartú teoranta uisce, criosanna anocsacha agus éilliú marthanach dríodair a bhaineann go sonrach leis an imchuach sin agus nach bhfuil inchomparáide le dálaí imchuacha farraige eile an Aontais;

6.á iarraidh ar an gComhairle GIInna a ghlacadh atá ailínithe go hiomlán leis an gcur chuige réamhchúraim, agus leochaileacht éiceachóras Mhuir Bhailt, tosca socheacnamaíocha, agus rátaí malla téarnaimh na stoc chomh maith le héiginnteacht eolaíoch na comhairle á gcur san áireamh; á iarraidh ar an gCoimisiún gnéithe socheacnamaíocha a mheas go cúramach agus meastóireacht á déanamh ar an bplean ilbhliantúil reatha; á chur i bhfios go láidir go bhfuil gá le cur chuige cothrom idir tosca comhshaoil agus socheacnamaíocha, mar a leagtar amach in Airteagal 2 de Rialachán CBI;

7.á chur i bhfáth, trí chuótaí ilbhliantúla a shocrú bunaithe ar an eolaíocht is fearr atá ar fáil, go bhféadfaí am a thabhairt d’éiceachórais mhuirí i Muir Bhailt téarnamh agus an chobhsaíocht a theastaíonn uathu a sholáthar do ghnólachtaí chun infheistíochtaí a phleanáil, fostaíocht a choinneáil agus bonneagar calafoirt a choinneáil ar bun; agus tacú le hathnuachan ó ghlúin go glúin in earnáil an iascaigh; á chur i bhfios go láidir go mbíonn dí-infheistíocht, caillteanas acmhainneachta táirgeachta agus imeacht fiontar iascaireachta teaghlaigh mar thoradh ar éagobhsaíocht rialála fhada, ar caillteanas socheacnamaíoch do-aisiompaithe é do phobail chósta Mhuir Bhailt; á chur i bhfáth gur cheart comhairliúchán éifeachtach, tráthúil agus córasach le geallsealbhóirí a áireamh i bhforbairt na mbeart bainistíochta sin;

8.á iarraidh ar na Ballstáit agus ar an gCoimisiún, agus easnaimh an Rialacháin maidir leis an bplean ilbhliantúil do Mhuir Bhailt á gcur san áireamh ó thaobh a chuspóirí éiceolaíocha agus socheacnamaíocha a bhaint amach, machnamh a dhéanamh ar bhearta a sheoladh i gcomhréir le hAirteagail 12 agus 13 de CBI aon uair a léiríonn an chomhairle eolaíoch is fearr atá ar fáil go bhfuil gá le bearta den sórt sin, agus gníomhaíocht a ullmhú trí anailís a dhéanamh ar na costais agus ar na tairbhí a bhaineann le hiascaigh ábhartha a dhúnadh, lena n-áirítear d’iascaigh áineasa, agus aird á tabhairt ar ioncam caillte, slite beatha, slándáil bia agus costas na neamhghníomhaíochta amach anseo;

9.á iarraidh go gcuirfí cosc ar dhamáiste éiceolaíoch do-aisiompaithe do phobail scadán agus salán i Muir Bhailt chun inmharthanacht fhadtéarmach na n-iascach cósta agus mionscála atá dírithe ar na speicis sin a áirithiú agus chun bia-eangacha muirí a chosaint; á chreidiúint, bunaithe ar chomhairle eolaíoch, nach mór sosanna téarnaimh do na stoic faoi seach a mheas go práinneach, go dtí go léireofar téarnamh soiléir agus marthanach na stoc le fianaise eolaíoch;

10.á thabhairt chun suntais, i ndáil leis sin, chun go mbeidh bearta feabhais chomh héifeachtach agus is féidir, go bhfuil gá le rannpháirtíocht iomchuí na ngeallsealbhóirí agus nach mór iad a bheith bunaithe ar an eolaíocht is fearr atá ar fáil chun a gcuspóirí a bhaint amach; á thabhairt chun suntais, thairis sin, go bhfuil rogha ann limistéir aisghabhála stoc éisc atá bunaithe ar an eolaíocht agus tréimhsí coiscthe sealadacha iascaireachta a chruthú i Muir Bhailt, ag díriú ar limistéir chomhiomlánaithe gheimhridh agus réamhsceite d’fhonn earcaíocht chobhsaí agus struchtúr aoise sláintiúil a choinneáil, chomh maith le bearta athchóirithe éighníomhacha agus gníomhacha lena n-áirítear i limistéir sceite éisc agus iasclainne, atá ailínithe le forálacha i reachtaíocht chomhshaoil ábhartha an Aontais; á thabhairt chun suntais a thábhachtaí atá sé cúiteamh iomchuí agus tráthúil a bheith ag gabháil leis na bearta sin i gcomhréir le forálacha ábhartha an Aontais;

11.ag meabhrú ghealltanais agus spriocanna an Aontais maidir le cumhdach limistéir agus éifeachtacht MPAnna; á mholadh go ndéanfaí bearta bainistíochta éifeachtacha a chur chun feidhme go cuí sna MPAnna atá ann faoi láthair i Muir Bhailt, chomh maith le MPAnna breise a ainmniú i gcomhréir le gealltanais an Aontais; á thabhairt chun suntais gur cheart an t-ainmniú sin a bheith bunaithe ar mheasúnuithe eolaíocha ina léirítear gnáthóga criticiúla nó láithreacha sceite; á chur i bhfios go bhfuil gá le bearta bainistíochta éifeachtacha mar aon le treoirthionscadail le haghaidh trealamh iascaireachta roghnaitheach agus ísealtionchair arna spreagadh ag tionscnaimh rathúla sa Mhuir Thuaidh agus in Skagerrak;

12.á thabhairt chun suntais a thábhachtaí atá sé iascaigh inmharthana ar mhionscála a choinneáil le gabhálacha teoranta sa réigiún, rud a chuirfidh ar a gcumas oibriú le linn céimeanna atógála; ag meabhrú fhorálacha ábhartha an Rialacháin athbhreithnithe maidir le Rialú ar Iascach agus a gcur chun feidhme iomlán agus éifeachtach; á chur i bhfáth go bhfuil an t-iascach sin ríthábhachtach do shlite beatha, d’athléimneacht slabhraí soláthair traidisiúnta agus do phoist a chaomhnú i bpobail iascaireachta cósta agus go bhfuil luach sóisialta agus cultúrtha ar leith acu; á chur i bhfios gur féidir breisluach níos mó a bhaint amach do gheilleagair áitiúla trí na hiascaigh sin a neartú; á thabhairt chun suntais a thábhachtaí atá 3 cholún na forbartha inbhuanaithe i gcomhréir le hAirteagal 2 de CBI;

13.á iarraidh ar an gCoimisiún agus ar na Ballstáit tosaíocht a thabhairt d’fheabhas a chur ar staid shocheacnamaíoch iascairí cósta ar mhionscála; á thabhairt chun suntais a thábhachtaí atá deiseanna iascaireachta agus limistéir iascaireachta i limistéir chósta d’oibreoirí beaga; á thabhairt chun suntais gur féidir leis na Ballstáit na feabhsuithe sin a bhaint amach trína leithdháiltí cuótaí náisiúnta i gcomhréir le hAirteagal 17 CBI, agus trí infheistíochtaí i dtrealamh roghnaitheach agus i dtrealamh ísealtionchair; á iarraidh, thairis sin, ar an gCoimisiún agus ar na Ballstáit measúnú a dhéanamh ar rialacha difreáilte rochtana d’iascaigh Mhuir Bhailt agus, i gcás inarb iomchuí, iad a chur chun feidhme bunaithe ar fhad soithí agus ar chineál trealaimh, go háirithe d’fhonn teorainn a chur leis an mbrú iomaíoch a chuireann soithí tionsclaíocha ar mhórscála ar fhiontair teaghlaigh bheaga agus mheánmhéide agus ar phobail chósta;

14.á iarraidh ar na Ballstáit agus ar an gCoimisiún go neartófaí tuilleadh cur chun feidhme na hoibleagáide gabhálacha a thabhairt i dtír chun dul i ngleic le haischur neamhdhleathach i Muir Bhailt, agus aitheantas á thabhairt don ghá atá le bearta inoibrithe, chun tacú le roghnaíocht agus chun gabhálacha de thaisme a laghdú, agus chun na forálacha ábhartha maidir leis an ábhar sin a chur chun feidhme i gcomhréir le CBI agus leis an Rialachán maidir le Rialú ar Iascach;

15.á thabhairt chun suntais go bhfuil ról ag an gComhshocrú Eorpach um an Aigéan maidir le cur chuige iomlánaíoch agus geilleagar gorm athghiniúnach agus inbhuanaithe a chothú i Muir Bhailt, le gníomhaíochtaí spriocdhírithe chun stoic éisc a athbhunú agus brúnna comhshaoil a laghdú; ag tabhairt dá haire go bhfuil gá le tacaíocht airgeadais leormhaith chun cuspóirí an Chomhshocraithe um an Aigéan agus an Chompáis Iomaíochais a chur chun feidhme chun geilleagar muirí athléimneach a fhorbairt a bheidh inmharthana san fhadtéarma, agus chun nuálaíocht, nuachóiriú, dícharbónú agus digitiú a chothú;

16.á iarraidh ar an gCoimisiún agus ar na Ballstáit an t-ualach riaracháin a laghdú agus comhordú níos fearr a áirithiú ar fud na mbeartas chun athléimneacht, iomaíochas agus inbhuanaitheacht fhadtéarmach réigiún Mhuir Bhailt a neartú i bhfianaise dúshláin éiceolaíocha agus mhargaidh;

17.á iarraidh ar an gCoimisiún, mar chaomhnóir na gConarthaí, gníomhú i gcomhréir leis na Conarthaí i gcásanna ina bhfuil rialacha an Aontais amhail rialacha maidir leis an bplean ilbhliantúil do Mhuir Bhailt á sárú ag an gComhairle agus ag na Ballstáit;

18.á iarraidh ar na Ballstáit a áirithiú go ndéanfar Rialachán an Aontais maidir le Rialú ar Iascach a chur chun feidhme go hiomlán agus go héifeachtach, lena n-áirítear forálacha lena dtugtar aghaidh ar mhíthuairisciú gabhálacha agus lena neartaítear cruinneas agus iontaofacht an tuairiscithe gabhála sa réigiún;

19.á chur i bhfios go láidir a thábhachtaí atá sé bainistiú iascaigh a bhunú ar an gcomhairle eolaíoch is fearr atá ar fáil agus ar an ról lárnach atá ag ICES maidir le comhleanúnachas eolaíoch a áirithiú, chomh maith leis an tábhacht a bhaineann le heolas na n-iascairí; ag tabhairt chun suntais a thábhachtaí atá neamhspleáchas ICES; á iarraidh ar na Ballstáit agus ar an gCoimisiún a áirithiú go mbeidh sonraí eolaíocha iascaireachta nuashonraithe agus riachtanacha ar fáil do ICES chun leanúint d’fheabhas a chur ar a chomhairle agus chun a áirithiú go mbeidh measúnuithe eolaíocha ardcháilíochta ar fáil go tráthúil; á iarraidh ar an gCoimisiún a iarrataí uile ar chomhairle eolaíoch ó ICES a chur ar fáil go poiblí chun idirphlé oscailte a cheadú freisin;

20.ag tathant ar an gCoimisiún a iarraidh láithreach ar ICES, ina phléití maidir leis an meabhrán tuisceana, comhairle ilspeiceas atá bunaithe ar éiceachórais a fhorbairt tuilleadh chomh maith le comhairle maidir le hathshlánú stoc, rud lena n-aithnítear inathraitheacht chomhshaoil agus idirghníomhaíochtaí bia-eangacha, féachaint an bhféadfaí úsáid a bhaint as pointí tagartha atá bunaithe ar éiceachórais agus as sonraí básmhaireachta iascaireachta arna gcoigeartú ag éiceachórais agus atá saincheaptha d’idirghníomhaíochtaí speiceas Mhuir Bhailt agus d’idirghníomhaíochtaí speiceas sonrach, agus táscairí comhlántacha a áireamh freisin bunaithe ar rialacha ábhartha eile de chuid an Aontais amhail an Treoir Réime um Straitéis Mhuirí, mar shampla chun táscairí móra éisc chomh maith le táscairí dáilte aoise agus méide a áireamh; á thabhairt chun suntais gur cheart go leanfadh aon chomhairle den sórt sin de bheith trédhearcach agus intuartha don earnáil agus go seachnófaí rómheastachán as a dtiocfadh teorainneacha gabhála míchuí agus éiginnteacht ghnó ina dhiaidh sin;

21.á iarraidh ar an gCoimisiún, i gcás Mhuir Bhailt, comhairle a iarraidh ó ICES maidir le maoláin réamhchúraim a bhaineann le héiginnteacht na comhairle eolaíche, chomh maith le héiginnteacht na hearcaíochta agus na conaire bithmhaise, chomh maith le comhairle maidir leis na héifeachtaí a bheadh ann mura n-úsáidfí raonta os cionn UTI agus na hiarmhairtí ábhartha uile, agus laghduithe dochta nó uathoibríocha lena dtugtar neamhaird ar réaltachtaí socheacnamaíocha á seachaint; á chur i bhfáth gur huirlis thábhachtach i gcónaí í UTI le haghaidh bainistiú oiriúnaitheach agus freagrach; á iarraidh, thairis sin, ar an gCoimisiún anailísí socheacnamaíocha ábhartha do Mhuir Bhailt a iarraidh ar CETEI;

22.á iarraidh ar an gCoimisiún na measúnuithe stoic uile a úsáidtear chun dlí AE a chur chun feidhme a bhunú ar phointí tagartha bithmhaise BUTI, mar a léirítear i gcuspóirí Airteagal 3(1) den Rialacháin maidir leis an bplean ilbhliantúil do Mhuir Bhailt agus Airteagal 2(2) de CBI;

23.á iarraidh ar an gCoimisiún agus ar na Ballstáit a áirithiú go n-áireofar i mbainistiú stoic éisc Mhuir Bhailt spriocanna chun méid nádúrtha agus dáileadh aoise laistigh de phobail a athbhunú i gcomhréir le hAirteagal 2(5)(j) de CBI ina dtagraítear d’Airteagal 1(1) den Treoir Réime um Straitéis Mhuirí, agus á aithint go gcuireann struchtúir shláintiúla daonra le hacmhainneacht atáirgthe, le hathléimneacht stoic agus le cobhsaíocht éiceachórais; á mholadh go bhforbrófaí táscairí faireacháin agus cleachtais iascaireachta níos roghnaithí arna bhforbairt i gcomhar leis an earnáil lenar féidir baint chórasach éisc níos mó agus níos sine a laghdú agus acmhainneacht earcaíochta an stoic a chosaint ar bhealach níos fearr;

24.á iarraidh ar an gCoimisiún, chun dlí an Aontais a chur chun feidhme, lena n-áirítear an Rialachán maidir leis an bplean ilbhliantúil do Mhuir Bhailt, comhairle eolaíoch a iarraidh ó ICES lena gcuirtear san áireamh strusairí ábhartha comhshaoil agus éiceachórais i Muir Bhailt; á mheas gur cheart don chomhairle sin aird a tharraingt go soiléir ar na rioscaí a bhaineann le staid reatha an chomhshaoil, idirghníomhaíocht talún-farraige, an éiginnteacht mhéadaithe mar gheall ar an athrú aeráide agus tionchar idirghníomhaíochtaí speiceas, lena n-áirítear pobail chreachadóirí ábhartha, agus na rioscaí sin a léiriú, i measc tosca eile; ag cur béim ar an bhfíoras gur cheart an leibhéal éiginnteachta faoi seach a chur in iúl go soiléir in aon chomhairle;

25.á iarraidh ar an gCoimisiún dul i gcomhairle le ICES faoi chuimsiú an mheabhráin tuisceana atá ann cheana chun nuashonrú rialta ar a dtreoirlínte teicniúla maidir le rialacha rialaithe gabhála a spreagadh agus chun modhanna measúnaithe stoic a mhionchoigeartú tuilleadh bunaithe ar chritéir eolaíocha neamhspleácha; ag tabhairt dá haire go bhfuil sé tábhachtach go n-úsáidfidh ICES – agus comhairle á tabhairt aige don Choimisiún nó do na Ballstáit – na cineálacha cur chuige is cothroime le dáta do Mhuir Bhailt, agus go leanfaidh siad de bheith fónta ó thaobh na heolaíochta de agus de bheith comhsheasmhach le creat dlíthiúil iascaigh an Aontais; á aithint gur próiseas inmheánach ICES é sin;

26.á iarraidh ar an gCoimisiún agus ar na Ballstáit mapáil chuimsitheach ar phobail ghéiniteacha a thionscnamh i Muir Bhailt ar speicis áirithe a ndéantar saothrú tráchtála orthu, lena n-áirítear scadáin agus saláin, chomh maith le speicis eile a ndéantar saothrú tráchtála orthu, bunaithe ar an eolas eolaíoch is fearr atá ar fáil, agus comhairle fhianaise-bhunaithe a fhorlíonadh le haghaidh cinntí níos eolaí maidir le deiseanna iascaireachta agus maidir le bearta teicniúla; á chur i bhfáth nach mór do ICES na sonraí géiniteacha sin a bhailíochtú go hiomlán agus a chomhtháthú i samhlacha measúnaithe fadtéarmacha stoic sula n-úsáidfear iad chun críoch bainistíochta;

27.á iarraidh ar an gCoimisiún agus ar na Ballstáit feabhas a chur ar infhaighteacht agus ar cháilíocht sonraí maidir le critéir aoise agus mhéide do na stoic lena mbaineann agus cinntí bainistithe iascaigh á n-ullmhú don réigiún; á thabhairt chun suntais gur cheart go dtacódh bailiú feabhsaithe sonraí maidir leis na paraiméadair sin le Tuairisceoir 3, Critéar 3 (D3C3) na Treorach Réime um Straitéis Mhuirí a chomhtháthú mar a cheanglaítear le hAirteagal 3(3) den phlean ilbhliantúil do Mhuir Bhailt;

28.á iarraidh ar an gCoimisiún a iarraidh ar ICES anailís eolaíoch mhionsonraithe a dhéanamh ar chur chuige reatha an Aontais maidir le leas a bhaint as comhairle eolaíoch do Mhuir Bhailt; á iarraidh ar an gCoimisiún, thairis sin, a áirithiú go léireofar go hiomlán sa chomhairle a iarrtar maidir le leibhéil ghabhála na ceanglais dhlíthiúla agus na cuspóirí beartais ábhartha uile lena n-áirítear cuspóirí CBI mar a leagtar amach in Airteagal 2; á chur i bhfios a thábhachtaí atá sé don Choimisiún aghaidh a thabhairt ar easnaimh a d’fhéadfadh a bheith ann agus gníomhaíochtaí nithiúla a leagan amach maidir leis an gcaoi ar féidir an chomhairle atá ar fáil faoi láthair maidir le deiseanna iascaireachta a úsáid ar bhealach atá réamhchúramach go leor chun na ceanglais agus na cuspóirí dlíthiúla ábhartha uile a chomhlíonadh;

29.á mholadh don Choimisiún agus don Chomhairle a áirithiú go mbeidh socrú GII trédhearcach agus bunaithe ar an gcomhairle eolaíoch agus ar an eolas eolaíoch is fearr atá ar fáil de réir chuspóirí an Rialacháin maidir leis an bplean ilbhliantúil do Mhuir Bhailt agus CBI, agus de réir comhairle ilspeiceas atá bunaithe ar éiceachórais, agus go gcuirfear san áireamh ann idirghníomhaíochtaí idir an t-iascach agus cobhsaíocht shocheacnamaíoch fhadtéarmach na bpobal cósta;

30.á iarraidh ar an gCoimisiún agus ar na Ballstáit obair agus sainmhínithe idirnáisiúnta ábhartha a chur san áireamh, lena n-áirítear obair agus sainmhínithe Chlár Comhshaoil na Náisiún Aontaithe, agus an tuiscint ar bhainistiú bunaithe ar éiceachórais á forbairt a thuilleadh laistigh de chreat dlíthiúil an Aontais atá ann cheana amhail maidir le héiceachórais fheidhmiúla mar a tugadh faoi deara in Airteagal 5(5)(a) den Treoir Réime um Straitéis Mhuirí;

31.á iarraidh ar an gCoimisiún plean eolaíochtbhunaithe, comhordaithe agus trasearnála a fhorbairt lena dtabharfar aghaidh ar phríomhstrusairí a dhéanann difear do Mhuir Bhailt agus rialachas cuimsitheach agus pleanáil spásúil mhuirí á n-áirithiú ag an am céanna, agus chun dul i dteagmháil leis na geallsealbhóirí ábhartha uile agus comhoibriú leo;

32.á iarraidh ar an gCoimisiún leas a bhaint as an deis chun tacú le comhordú beartais feabhsaithe agus le cur chun feidhme comhleanúnach na mbeartas muirí agus na mbeartas a bhaineann le huisce tríd an togra reachtach atá ar na bacáin le haghaidh Gníomh um an Aigéan;

33.á iarraidh go mbeadh bearta éifeachtacha ann maidir le maolú ar an athrú aeráide agus oiriúnú don athrú sin chun aghaidh a thabhairt ar rioscaí a bhaineann leis an aeráid go tráthúil agus chun méadú ar na rioscaí agus ar na costais a bhaineann le gníomhaíocht mhoillithe sa réigiún a sheachaint;

34.á iarraidh go ndéanfaí reachtaíocht chomhshaoil an Aontais a chur chun feidhme go leanúnach agus go héifeachtach agus aitheantas á thabhairt ag an am céanna don ghá atá le réitigh chothroma agus inoibrithe do na hearnálacha uile a ndéantar difear dóibh chun aghaidh a thabhairt ar bhrúnna comhshaoil i Muir Bhailt agus in uiscí eile an Aontais, lena n-áirítear truailliú cothaitheach ó fhoinsí iomadúla;

35.á iarraidh go dtiocfadh méadú suntasach ar infheistíocht i ngléasraí cóireála séarachais nua-aimseartha agus i gcórais coinneála agus scagacháin truaillithe, i dtíortha Mhuir Bhailt agus i ngach abhantrach a sceitheann uisce isteach i Muir Bhailt araon; á chur i bhfáth, gan nuachóiriú cuimsitheach a dhéanamh ar bhonneagar uisce agus séarachais, nach mbeidh sna hiarrachtaí uile chun cáilíocht uiscí Mhuir Bhailt a fheabhsú ach iarrachtaí dearbhaitheacha agus neamhéifeachtacha;

36.á iarraidh ar na Ballstáit agus ar an gCoimisiún aon chur chuige i leith creachóireacht nádúrtha a bhunú ar chomhairliúcháin eolaíochta agus geallsealbhóirí, lena n-áirítear bearta bainistíochta coisctheacha, atá fréamhaithe go háitiúil agus spriocdhírithe le haghaidh broighill mhóra agus rónta liatha, rud lena n-áiritheofar go mbeidh aon bhearta a ghlacfar éifeachtach, go gcomhlíonfaidh siad na hoibleagáidí dlíthiúla uile, agus go n-áireofar leo faireachán leormhaith, cistiú tiomnaithe agus leormhaith agus comhar neartaithe le geallsealbhóirí, chun éifeachtacht na mbeart a chuirfear chun feidhme a áirithiú, lena n-áirítear cleachtais mhaolaithe amhail díspreagthacha nó eisiamh fisiciúil;

37.á chur i bhfáth gur gá don Choimisiún gníomhaíocht phráinneach agus éifeachtach a dhéanamh mar fhreagairt ar an mbrú a chuireann pobail mhóra broighill ar stoic éisc Mhuir Bhailt, lena n-áiritheofar go mbeidh bearta comhréireach, oiriúnaithe go réigiúnach agus curtha chun feidhme trí idirghabhálacha bainistithe éifeachtacha, spriocdhírithe agus saincheaptha go háitiúil bunaithe ar na sonraí eolaíocha is fearr atá ar fáil, agus ag an am céanna a chur ar chumas na mBallstát bearta maolaithe praiticiúla agus cás-shonracha a chur i bhfeidhm i gcás inar gá chun aghaidh a thabhairt go héifeachtach ar thionchair áitiúla, agus ar an gcaoi sin tacú le hinbhuanaitheacht fhadtéarmach na n-iascach i limistéir chósta atá buailte

38.á iarraidh ar an gCoimisiún agus ar na Ballstáit dlúthfhaireachán a dhéanamh féachaint an bhfuil bearta á gcur chun feidhme go héifeachtach chun muc mhara Mhuir Bhailt atá i mbaol criticiúil a athshlánú agus, i gcás inar gá, bearta breise a dhéanamh chun na príomhbhagairtí ar a marthanas a sheachaint;

39.á mheabhrú gur cuireadh pobail rónta Mhuir Bhailt i mbaol a ndíothaithe sna 1970idí;

40.ag athdhearbhú a hiarrata ar an gCoimisiún plean Eorpach um bainistiú broigheall a mholadh d’iascach agus do dhobharshaothrú i Muir Bhailt, bunaithe ar an gcomhairle eolaíoch is fearr atá ar fáil agus ar chleachtais na mBallstát, agus an plean a mhol an Coimisiún Comhairleach Eorpach um Iascaigh Intíre agus Dobharshaothrú (EIFAAC) https://www.fao.org/fishery/services/storage/fs/fishery/documents/EIFAAC/cormorantsplan/EuropeanManagementPlanforCormorants-April2025.pdf. de chuid na hEagraíochta Bia agus Talmhaíochta le déanaí á chur san áireamh chomh maith le tionscadail taighde arna gcistiú ag an Aontas roimhe seo amhail ‘INTERCAFE’ https://www.ceh.ac.uk/our-science/projects/intercafe.; á chur i bhfáth go bhfuil gá le bearta coisctheacha, cúiteamh as caillteanais, agus cistiú ó fhoinsí an Aontais agus náisiúnta;

41.á athdhearbhú go mbaineann rioscaí tromchúiseacha comhshaoil agus sábháilteachta le hordanás neamhphléasctha (UXO) a dhumpáiltear i Muir Bhailt; ag meabhrú rún uaithi an 27 Aibreán 2021 maidir le hiarmhair cheimiceacha i Muir Bhailt agus tionscadail rathúla CHEMSEA, DAIMON agus DAIMON 3; ag tathant ar an gCoimisiún agus ar na Ballstáit bearta comhordaithe agus praiticiúla breise a dhéanamh chun na hábhair ghuaiseacha sin a aimsiú, a mheasúnú agus faireachán a dhéanamh orthu go córasach chun tosaíocht a thabhairt do réimsí le haghaidh feabhsúcháin;

42.á iarraidh go ndéanfadh na Ballstáit agus an Coimisiún iarrachtaí comhpháirteacha chun tacú le taighde eolaíoch a fhorbairt agus dea-chleachtais a mhalartú maidir le bealaí sábháilte agus costéifeachtacha chun muinisin agus ordanás neamhphléasctha (UXO) a shainaithint agus a bhaint ó ghrinneall na farraige d’fhonn gníomhaíochtaí comhordaithe feabhsúcháin ar mhórscála a chumasú;

43.á iarraidh ar an gCoimisiún agus ar na Ballstáit clár comhordaithe, fadtéarmach agus leormhaoinithe de chuid an Aontais a sheoladh a bheidh dírithe ar UXO Mhuir Bhailt a shainaithint, a neodrú agus a bhaint;

44.ag cáineadh shaothrú mífhreagrach, neamh-inbhuanaithe agus neamheolaíoch na Rúise ar stoic éisc Mhuir Bhailt;

45.á iarraidh ar an gComhairle agus ar an gCoimisiún gníomhaíochtaí aontaobhacha na Rúise a mheas agus cuótaí á socrú acu do Mhuir Bhailt; á iarraidh ar an gCoimisiún, thairis sin, machnamh a dhéanamh ar ghníomhaíochtaí atá dírithe ar bhrú a chur ar an Rúis cuótaí a thabhairt i gcomhréir leis an gcomhairle eolaíoch;

46.ag cáineadh go láidir láithreacht mhéadaitheach scáthchabhlach na Rúise i Muir Bhailt, le hoibríochtaí a sheachnaíonn príomhchaighdeáin rialála, rud a mhéadaíonn an baol go dtarlóidh doirteadh ola agus guaiseacha comhshaoil eile; á chur i bhfáth go bhféadfaí dochar a dhéanamh d’éiceachórais mhuirí, d’iascaigh áitiúla agus do shláinte an duine; ag tabhairt dá haire, thairis sin, gur cúis bhuartha di go leanann táirgí iascaigh na Rúise de mhargadh an Aontais a bhaint amach trí bhealaí trádála atá ann cheana, agus béim á leagan ar an ngá atá lena áirithiú go ndúnfar go héifeachtach aon lúb ar lár a d’fhéadfadh an bonn a bhaint de chuspóirí bhearta sriantacha an Aontais; á iarraidh ar an gCoimisiún féachaint ar bhearta breise chun scáthchabhlach na Rúise a chomhrac, go háirithe i réigiún Mhuir Bhailt; á iarraidh go mbeadh comhar réigiúnach feabhsaithe agus forfheidhmiú níos déine ann chun na rioscaí sin a mhaolú agus chun acmhainní muirí Mhuir Bhailt a chosaint; á thabhairt chun suntais a thábhachtaí atá sé forfheidhmiú iomlán na smachtbhannaí i gcoinne na Rúise a áirithiú;

47.á thabhairt chun suntais go bhfuil géarghá le níos mó a dhéanamh maidir le comhordú iomlánaíoch beartais, chomh maith le dul chun cinn leanúnach agus brostaithe i gcur chun feidhme reachtaíochta réimsí beartais eile chun nach mbeifear ag brath ar bhearta iascaigh amháin agus chun cosc a chur ar mheath socheacnamaíoch breise na bpobal cósta; ag cur sonrú sna hiarrachtaí a rinneadh i gcomhthéacs na gcomhdhálacha ‘Muir Bhailt atá againn’; ag spreagadh tuilleadh dul chun cinn i dtreo torthaí nithiúla;

48.ag tathant ar an gCoimisiún meastóireacht agus athbhreithniú féideartha a thionscnamh ar an Rialachán maidir leis an bplean ilbhliantúil do Mhuir Bhailt d’fhonn feabhas a chur ar a shoiléireacht, ar a chomhleanúnachas agus ar a chur i bhfeidhm praiticiúil, agus measúnú á dhéanamh ar a fheidhmíocht maidir le gnéithe comhshaoil agus socheacnamaíocha; á chur i bhfáth, thairis sin, a thábhachtaí atá sé a áirithiú go leanfaidh aon choigeartú a d’fhéadfaí a dhéanamh ar an gcreat amach anseo de bheith simplí, eolaíochtbhunaithe agus inoibrithe don earnáil;

49.á iarraidh ar an gCoimisiún, laistigh d’athbhreithniú a d’fhéadfaí a dhéanamh ar an Rialachán maidir leis an bplean ilbhliantúil do Mhuir Bhailt, measúnú a dhéanamh agus, i gcás inar gá, a mholadh go n-áireofaí stoic bradán agus breac mar stoic shonracha atá le cumhdach faoi raon feidhme an rialacháin maidir le foghabháil;

50.á chur in iúl gur cúis bhuartha di go raibh an breisluach íseal ó thaobh comhar réigiúnach i Muir Bhailt de, ós rud é gur comhdhlúthaíodh, den chuid is mó, bealaí comhair atá ann cheana leis an bplean ilbhliantúil nó gur tionscnaíodh bealaí comhair cheana leis; ag tabhairt dá haire, mar gheall ar phróisis mhalla agus maorlathas méadaithe a ghabhann leis na tionscnaimh sin, gur tionscnaíodh líon measartha beag moltaí comhpháirteacha ó na Ballstáit, rud a fhágann gur cúis imní é nach bhfuil forálacha réigiúnaithe rialacha iascaigh an Aontais á n-úsáid chun bearta bainistíochta a oiriúnú do shainiúlachtaí Mhuir Bhailt; á thabhairt chun suntais go bhfuil gá le comhar réigiúnach idir na tíortha Baltacha, lena n-áirítear na geallsealbhóirí uile;

51.á chur i bhfáth nach mór bainistiú éifeachtach Mhuir Bhailt a bheith bunaithe ar mhuinín, ar idirphlé agus ar chomhar réigiúnach idir na Ballstáit, na geallsealbhóirí uile, comhlachtaí réigiúnacha amhail HELCOM, agus pobail chósta chun réitigh phraiticiúla agus malartú eolais a chur chun cinn;

52.á iarraidh go mbeadh cur chuige nua, oiriúnaithe go réigiúnach ann maidir le bainistiú riosca;

53.á iarraidh go ndéanfaí na rialacha sa phlean ilbhliantúil a shoiléiriú chun toirmeasc a chur ar sholúbthacht ó bhliain go bliain i gcás stoic atá faoi bhun phointe tagartha caomhnaithe Btrigger atá ann faoi láthair i bplean ilbhliantúil Mhuir Bhailt mar a chomhaontaigh an Chomhairle faoi láthair;

54.á iarraidh ar an gCoimisiún bearta bainistíochta eolaíochtbhunaithe agus comhréireacha do bhradáin i Muir Bhailt a neartú, rud lena n-áiritheofar go dtuigfear i gceart tionchair éiceachórais na n-iascach scadán, salán agus trosc ar bhradáin agus go dtabharfar aghaidh orthu; ag tathant go ndéanfaí faireachán agus taighde feabhsaithe chun tacú le bainistiú inbhuanaithe bradán;

55.ag cur béim ar an bhfíoras gur cheart bainistiú iascaigh san Aontas a bheith bunaithe ar thaithí Eorpach, ar eolaíocht agus ar réaltachtaí réigiúnacha; á iarraidh ar an gCoimisiún rialacha arna n-oiriúnú go réigiúnach do Mhuir Bhailt a mholadh chun gníomhaíochtaí atá le déanamh go huathoibríoch nuair a thiteann stoic faoi bhun spreag-luachanna a shocraítear i gcomhréir leis an gcur chuige réamhchúraim, agus á athdhearbhú gur cheart bainistiú UTI a chomhlánú i gcás inarb infheidhme le bearta chun gabhálacha a dhifreáil de réir méide agus aoise ar an gcéad dul síos; á mheas go bhféadfaí inspioráid a fháil ó chleachtais bhainistíochta i réigiúin eile amhail an Astráil, an Nua-Shéalainn, Ceanada agus na Stáit Aontaithe, agus comhsheasmhacht le creat dlíthiúil an Aontais á háirithiú ag an am céanna;

56.á iarraidh ar an gCoimisiún agus ar na Ballstáit an comhar réigiúnach a neartú i gcomhréir le hAirteagal 18 de CBI;

57.á iarraidh go mbeadh bearta nithiúla agus éifeachtacha ann lena n-áiritheofar go mbeidh éisc a ghabhtar i Muir Bhailt dírithe níos mó agus níos mó ar thomhaltas díreach an duine, chun slabhraí soláthair bia áitiúla a chur chun cinn agus a dhreasú;

58.ag tabhairt dá haire go bhfuil bearta náisiúnta tugtha isteach ag roinnt Ballstát i réigiún Mhuir Bhailt amhail an Ghearmáin agus an tSualainn chun trálaeireacht ghrinnill a shrianadh nó a thoirmeasc i limistéir mhuirí áirithe;

59.á iarraidh ar an gCoimisiún agus ar na Ballstáit go molfadh réigiún Mhuir Bhailt stop a chur le trálaeireacht mine éisc agus ola éisc le linn céim atógála, agus gníomhaíochtaí eastóscacha in MPAnna a theorannú; á aithint go bhfuil éagsúlacht sna cineálacha cur chuige ar fud an Aontais i bhfianaise comhthéacsanna sonracha éiceolaíocha, dlíthiúla agus socheacnamaíocha;‑ ag spreagadh na mBallstát leanúint le réitigh chomhréireacha eolaíochtbhunaithe a fhorbairt i gcomhar le geallsealbhóirí, go háirithe earnáil na hiascaireachta agus pobail chósta, chun cosaint mhuirí a fheabhsú agus inmharthanacht earnáil iascaigh an Aontais á háirithiú ag an am céanna trí aistriú cóir;‑

60.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.