1.Jistieden lill-Kummissjoni u lill-Kunsill jiżguraw l-użu effettiv tal-għodod legali u ta’ ġestjoni eżistenti kollha disponibbli, inklużi miżuri mmirati, bl-użu ta’ approċċ ibbażat fuq ix-xjenza kif ukoll konsultazzjoni effettiva mal-partijiet ikkonċernati, biex jiġi evitat kwalunkwe tnaqqis ulterjuri fl-istokkijiet tal-ħut tal-Baħar Baltiku;

2.Jistieden lill-Kummissjoni flimkien mal-Istati Membri jivvalutaw kif evolviet id-distribuzzjoni tal-kwoti fost is-segmenti tal-flotot fil-Baħar Baltiku u jiddeterminaw jekk teżistix rabta kawżali bejn il-pressjoni fuq ir-riżorsi u l-politika nazzjonali ta’ distribuzzjoni tal-opportunitajiet tas-sajd;

3.Iħeġġeġ lill-Kummissjoni u lill-Istati Membri biex meta jimplimentaw ir-Regolament dwar il-pjan ta’ ġestjoni pluriennali tal-Baltiku jimxu lejn fażi ta’ rkupru u bini mill-ġdid għall-istokkijiet tal-ħut, jieħdu miżuri u azzjonijiet ibbażati fuq l-aqwa parir xjentifiku disponibbli, kif ukoll jieħdu azzjonijiet interkonnessi potenzjali oħra relatati ma’ leġiżlazzjoni oħra tal-UE jew nazzjonali biex jindirizzaw il-fatturi ta’ stress kollha fuq l-istokkijiet tal-ħut; jistieden lill-Kummissjoni u lill-Istati Membri, meta jimplimentaw il-fażi ta’ rkupru u ta’ bini mill-ġdid imsemmija hawn fuq, jikkunsidraw miżuri ta’ rimedju bbażati fuq l-aqwa xjenza disponibbli bħas-sospensjoni tas-sajd immirat għal xi stokkijiet fil-Baħar Baltiku kif previst fil-pjan ta’ ġestjoni pluriennali, filwaqt li jevitaw miżuri li jistgħu jimminaw l-istabbiltà soċjoekonomika tal-komunitajiet kostali sabiex jiżguraw li l-attivitajiet tas-sajd għall-konsum mill-bniedem jibqgħu sostenibbli;

4.Jitlob il-mobilizzazzjoni tal-appoġġ soċjali u finanzjarju, inkluż l-appoġġ għall-komunitajiet affettwati, investiment lokali, kumpens temporanju u għajnuna tranżitorja għas-sajjieda f’konformità mar-regoli tal-UE biex tiġi evitata tbatija bla bżonn u jiġi ppreservat il-wirt kulturali; jinnota li filwaqt li l-miżuri temporanji jindirizzaw it-tħassib ekoloġiku immedjat, l-għodod ta’ waqfien permanenti huma mfassla biex jaġġustaw il-kapaċità tas-sajd skont l-opportunitajiet tas-sajd fit-tul; jappella għalhekk għal separazzjoni ċara bejn il-waqfien temporanju u dak permanenti fl-iskemi ta’ appoġġ; jirrikonoxxi li l-intrapriżi tas-sajd fuq skala żgħira u medja tal-Baltiku ma rċevew l-ebda kumpens ekonomiku adegwat għat-telf imġarrab sa mill-għeluq tas-sajd immirat għall-bakkaljaw fl-2019; jistieden lill-Kummissjoni tistabbilixxi fond iddedikat għall-irkupru u t-tranżizzjoni tas-sajd tal-Baltiku biex tappoġġja r-ristrutturar tal-flotta, il-modernizzazzjoni tat-teknoloġija, il-kumpens għat-telf ikkawżat minn projbizzjonijiet tas-sajd speċifiċi għall-ispeċijiet, u l-preservazzjoni tal-komunitajiet tas-sajd kostali u l-wirt kulturali tagħhom;

5.Jisħaq li kwalunkwe miżura li tikkonċerna l-irkupru tal-istokkijiet trid tqis il-kundizzjonijiet idroloġiċi u kimiċi uniċi u speċifiċi għall-baċir tal-Baħar Baltiku, bħala baħar salmastru nofsu magħluq ikkaratterizzat minn skambju limitat tal-ilma, żoni anossiċi u kontaminazzjoni persistenti tas-sediment li huma speċifiċi għal dan il-baċir u mhux komparabbli ma’ dawk ta’ baċiri tal-baħar oħra tal-UE;

6.Jistieden lill-Kunsill jadotta qabdiet totali permissibbli li jkunu allinjati bis-sħiħ mal-approċċ ta’ prekawzjoni, filwaqt li jqis il-vulnerabbiltà tal-ekosistemi tal-Baħar Baltiku, il-fatturi soċjoekonomiċi, u r-rati ta’ rkupru bil-mod tal-istokkijiet kif ukoll l-inċertezza xjentifika tal-pariri; jistieden lill-Kummissjoni tikkunsidra bir-reqqa l-aspetti soċjoekonomiċi meta tivvaluta l-pjan ta’ ġestjoni pluriennali attwali; jissottolinja l-ħtieġa ta’ approċċ ibbilanċjat bejn il-fatturi ambjentali u soċjoekonomiċi, kif stabbilit fl-Artikolu 2 tar-Regolament PKS;

7.Jisħaq li l-istabbiliment ta’ kwoti pluriennali bbażati fuq l-aqwa xjenza disponibbli jistgħu jagħtu lill-ekosistemi marini fil-Baħar Baltiku żmien biex jirkupraw u jipprovdu lin-negozji bl-istabbiltà li jeħtieġu biex jippjanaw l-investimenti, iżommu l-impjiegi u jżommu l-infrastruttura tal-portijiet, u jappoġġjaw it-tiġdid ġenerazzjonali fis-settur tas-sajd; jissottolinja li instabbiltà regolatorja fit-tul twassal għal diżinvestiment, telf ta’ kapaċità tal-produzzjoni u l-għajbien ta’ intrapriżi tas-sajd tal-familja, li jikkostitwixxu telf soċjoekonomiku irriversibbli għall-komunitajiet kostali tal-Baltiku; jisħaq li l-iżvilupp ta’ tali miżuri ta’ ġestjoni għandu jinkludi konsultazzjoni effettiva, f’waqtha u sistematika mal-partijiet ikkonċernati;

8.Jistieden lill-Istati Membri u lill-Kummissjoni, filwaqt li jqisu n-nuqqasijiet tar-Regolament dwar il-pjan ta’ ġestjoni pluriennali tal-Baltiku f’termini tal-ilħuq tal-objettivi ekoloġiċi u soċjoekonomiċi tiegħu, jikkunsidraw li jniedu miżuri f’konformità mal-Artikoli 12 u 13 tal-PKS kull meta l-aqwa parir xjentifiku disponibbli jindika l-ħtieġa għal tali miżuri, u jħejju azzjoni billi janalizzaw il-kostijiet u l-benefiċċji tal-għeluq tas-sajd rilevanti, inkluż għas-sajd rikreattiv, filwaqt li jinnotaw id-dħul mitluf, l-għajxien, is-sigurtà tal-ikel u l-kost għall-ġejjieni minħabba nuqqas ta’ azzjoni;

9.Jappella għall-prevenzjoni ta’ ħsara ekoloġika irriversibbli għall-popolazzjonijiet tal-aringi u tal-laċċ ikħal fil-Baħar Baltiku sabiex tiġi żgurata l-vijabbiltà fit-tul tas-sajd kostali u fuq skala żgħira mmirat lejn dawk l-ispeċijiet u jiġu ssalvagwardjati x-xbieki alimentari tal-baħar; jemmen li, abbażi ta’ parir xjentifiku, il-pawżi ta’ rkupru għall-istokkijiet rispettivi jridu jiġu kkunsidrati b’mod urġenti, sa ma l-evidenza xjentifika turi rkupru ċar u sostnut tal-istokkijiet;

10.Jenfasizza f’dan ir-rigward li biex ikunu effettivi kemm jista’ jkun, il-miżuri ta’ rimedju jirrikjedu involviment xieraq tal-partijiet ikkonċernati u jridu jkunu bbażati fuq l-aqwa xjenza disponibbli sabiex jintlaħqu l-objettivi tagħhom; jenfasizza, barra minn hekk, l-għażla li jinħolqu żoni ta’ rkupru tal-istokkijiet tal-ħut ibbażati fuq ix-xjenza u għeluq temporanju ta’ żoni tas-sajd fil-Baħar Baltiku, b’enfasi fuq żoni ta’ aggregazzjoni tax-xitwa u ta’ qabel ir-riproduzzjoni bil-ħsieb li jinżamm reklutaġġ stabbli u struttura ta’ età b’saħħitha, kif ukoll miżuri ta’ restawr passivi u attivi inkluż f’żoni ta’ riproduzzjoni u ta’ tkabbir, allinjati mad-dispożizzjonijiet fil-leġiżlazzjoni ambjentali rilevanti tal-UE; jenfasizza l-importanza li tali miżuri jiġu akkumpanjati b’kumpens xieraq u f’waqtu f’konformità mad-dispożizzjonijiet rilevanti tal-UE;

11.Ifakkar fl-impenji u fil-miri tal-UE f’termini ta’ kopertura taż-żoni u ta’ effettività taż-żoni marini protetti; iħeġġeġ l-implimentazzjoni xierqa ta’ miżuri ta’ ġestjoni effettivi fiż-żoni marini protetti bħalissa fil-Baħar Baltiku, kif ukoll id-deżinjazzjoni ta’ żoni marini protetti addizzjonali f’konformità mal-impenji tal-UE; jenfasizza li din id-deżinjazzjoni għandha tkun ibbażata fuq valutazzjonijiet xjentifiċi li juru ħabitats kritiċi jew żoni ta’ riproduzzjoni; jindika l-ħtieġa ta’ miżuri ta’ ġestjoni effettivi flimkien ma’ proġetti pilota għal irkaptu tas-sajd selettiv u b’impatt baxx ispirat minn inizjattivi ta’ suċċess fil-Baħar tat-Tramuntana u fi Skagerrak;

12.Jenfasizza l-importanza li jinżamm sajd fuq skala żgħira vijabbli b’ħatt l-art limitat fir-reġjun, li jippermetti lil tali sajd jopera matul il-fażijiet tal-bini mill-ġdid; ifakkar fid-dispożizzjonijiet rilevanti tar-Regolament rivedut dwar il-Kontroll tas-Sajd u l-implimentazzjoni sħiħa u effettiva tagħhom; jisħaq li dan is-sajd huwa kruċjali għall-għajxien, għar-reżiljenza tal-ktajjen tal-provvista tradizzjonali u għall-preservazzjoni tal-impjiegi fil-komunitajiet tas-sajd kostali u li għandu valur soċjali u kulturali partikolari; jirrimarka li t-tisħiħ ta’ dan is-sajd jista’ jġib miegħu valur miżjud akbar għall-ekonomiji lokali; jenfasizza l-importanza tat-tliet pilastri tal-iżvilupp sostenibbli f’konformità mal-Artikolu 2 tal-PKS;

13.Jistieden lill-Kummissjoni u lill-Istati Membri jagħtu prijorità lit-titjib tas-sitwazzjoni soċjoekonomika tas-sajjieda kostali fuq skala żgħira; jenfasizza l-importanza tal-opportunitajiet tas-sajd u taż-żoni tas-sajd fiż-żoni kostali għall-operaturi ż-żgħar; jenfasizza li l-Istati Membri jistgħu jiksbu dan it-titjib permezz tal-allokazzjonijiet tal-kwoti nazzjonali tagħhom f’konformità mal-Artikolu 17 tal-PKS, kif ukoll permezz ta’ investimenti f’irkaptu selettiv u b’impatt baxx; jistieden, barra minn hekk, lill-Kummissjoni u lill-Istati Membri jivvalutaw u, fejn xieraq, jimplimentaw regoli ta’ aċċess differenzjati għas-sajd fil-Baħar Baltiku bbażati fuq it-tul tal-bastiment u t-tip ta’ rkaptu, speċifikament bil-ħsieb li tiġi limitata l-pressjoni kompetittiva li l-bastimenti industrijali fuq skala kbira jeżerċitaw fuq intrapriżi tal-familja fuq skala żgħira u medja u komunitajiet kostali;

14.Jistieden lill-Istati Membri u lill-Kummissjoni jkomplu jsaħħu l-implimentazzjoni tal-obbligu ta’ ħatt l-art biex jindirizzaw l-iskartar illegali fil-Baħar Baltiku, filwaqt li jirrikonoxxu l-ħtieġa ta’ miżuri fattibbli, biex jappoġġjaw is-selettività u jnaqqsu l-qabdiet mhux mixtieqa, u jimplimentaw id-dispożizzjonijiet rilevanti dwar din il-kwistjoni f’konformità mal-PKS u mar-Regolament dwar il-Kontroll tas-Sajd;

15.Jenfasizza r-rwol tal-Patt Ewropew għall-Oċeani biex jitrawmu approċċ olistiku u ekonomija blu riġenerattiva u sostenibbli fil-Baħar Baltiku, b’azzjonijiet immirati biex jiġu restawrati l-istokkijiet tal-ħut u jitnaqqsu l-pressjonijiet ambjentali; jinnota li l-implimentazzjoni tal-objettivi tal-Patt għall-Oċeani u l-Boxxla għall-Kompetittività tirrikjedi appoġġ finanzjarju adegwat għall-iżvilupp ta’ ekonomija marittima reżiljenti li tkun vijabbli fit-tul, kif ukoll biex jitrawmu l-innovazzjoni, il-modernizzazzjoni, id-dekarbonizzazzjoni u d-diġitalizzazzjoni;

16.Jistieden lill-Kummissjoni u lill-Istati Membri jnaqqsu l-piż amministrattiv u jiżguraw koordinazzjoni aħjar fil-politiki kollha biex jissaħħu r-reżiljenza, il-kompetittività u s-sostenibbiltà fit-tul tar-reġjun tal-Baħar Baltiku fid-dawl tal-isfidi ekoloġiċi u tas-suq;

17.Jistieden lill-Kummissjoni, bħala l-gwardjan tat-Trattati, taġixxi f’konformità mat-Trattati f’każijiet fejn il-Kunsill u l-Istati Membri jkunu qed jiksru r-regoli tal-UE bħal pereżempju r-regoli tal-pjan ta’ ġestjoni pluriennali tal-Baltiku;

18.Jistieden lill-Istati Membri jiżguraw l-implimentazzjoni sħiħa u effettiva tar-Regolament tal-UE dwar il-Kontroll tas-Sajd, inkluż b’dispożizzjonijiet li jindirizzaw ir-rapportar ħażin tal-qabdiet u jsaħħu l-preċiżjoni u l-affidabbiltà tar-rapportar fir-reġjun;

19.Jissottolinja l-importanza li l-ġestjoni tas-sajd tkun ibbażata fuq l-aqwa parir xjentifiku disponibbli u r-rwol kruċjali tal-ICES fl-iżgurar tal-koerenza xjentifika, kif ukoll l-importanza tal-għarfien tas-sajjieda; jenfasizza l-importanza tal-indipendenza tal-ICES; jistieden lill-Istati Membri u lill-Kummissjoni jiżguraw li data xjentifika aġġornata u neċessarja dwar is-sajd tkun disponibbli għall-ICES sabiex ikompli jtejjeb il-parir tiegħu u jiżgura d-disponibbiltà f’waqtha ta’ valutazzjonijiet xjentifiċi ta’ kwalità għolja; jistieden lill-Kummissjoni tagħmel it-talbiet kollha tagħha għal parir xjentifiku mingħand l-ICES disponibbli għall-pubbliku biex tippermetti wkoll djalogu miftuħ;

20.Iħeġġeġ lill-Kummissjoni titlob minnufih li l-ICES, fid-deliberazzjonijiet tiegħu dwar il-memorandum ta’ qbil, ikompli jiżviluppa pariri bbażati fuq l-ekosistema u dwar diversi speċijiet kif ukoll pariri dwar l-irkupru tal-istokkijiet, filwaqt li jirrikonoxxi l-varjabbiltà ambjentali u l-interazzjonijiet tax-xibka alimentari, jesplora l-użu ta’ punti ta’ referenza bbażati fuq l-ekosistema u data dwar il-mortalità mis-sajd aġġustata għall-ekosistema mfassla għall-interazzjonijiet bejn il-Baltiku u speċijiet speċifiċi, u jinkludi wkoll indikaturi komplementari bbażati fuq regoli rilevanti oħra tal-UE bħad-Direttiva Kwadru dwar l-Istrateġija Marina, pereżempju biex jiġu inklużi indikaturi ta’ ħut kbir kif ukoll indikaturi tad-distribuzzjoni tal-età u tad-daqs; jenfasizza li kwalunkwe parir tali għandu jibqa’ trasparenti u prevedibbli għas-settur u jevita stima eċċessiva li sussegwentement twassal għal limiti ta’ qbid mhux dovuti u inċertezza għan-negozji;

21.Jistieden lill-Kummissjoni, fil-każ tal-Baħar Baltiku, titlob parir mingħand l-ICES għal riżervi ta’ prekawzjoni relatati mal-inċertezza tal-parir xjentifiku, kif ukoll l-inċertezza tar-reklutaġġ u t-trajettorja tal-bijomassa, kif ukoll parir dwar l-effetti tan-nuqqas ta’ użu ta’ meded ogħla mir-rendiment massimu sostenibbli (MSY) u l-konsegwenzi rilevanti kollha, filwaqt li jiġi evitat tnaqqis riġidu jew awtomatiku li jinjora r-realtajiet soċjoekonomiċi; jisħaq li r-rendiment massimu sostenibbli jibqa’ għodda essenzjali għal ġestjoni adattiva u responsabbli; jistieden, barra minn hekk, lill-Kummissjoni titlob mingħand l-STECF analiżijiet soċjoekonomiċi rilevanti għall-Baħar Baltiku;

22.Jistieden lill-Kummissjoni tibbaża l-valutazzjonijiet tal-istokkijiet kollha li jintużaw għall-implimentazzjoni tal-liġi tal-UE dwar il-punti ta’ referenza tal-bijomassa BMSY, kif rifless fl-objettivi tal-Artikolu 3(1) tar-Regolament dwar il-pjan ta’ ġestjoni pluriennali tal-Baltiku u l-Artikolu 2(2) tal-PKS;

23.Jistieden lill-Kummissjoni u lill-Istati Membri jiżguraw li l-ġestjoni tal-istokkijiet tal-ħut tal-Baħar Baltiku tinkludi miri għar-restawr tad-distribuzzjonijiet naturali tad-daqs u tal-età fil-popolazzjonijiet skont l-Artikolu 2(5)(j) tal-PKS li jirreferi għall-Artikolu 1(1) tad-Direttiva Kwadru dwar l-Istrateġija Marina, filwaqt li jirrikonoxxu li strutturi ta’ popolazzjonijiet b’saħħithom jikkontribwixxu għall-kapaċità riproduttiva, għar-reżiljenza tal-istokk u għall-istabbiltà tal-ekosistema; iħeġġeġ l-iżvilupp ta’ indikaturi ta’ monitoraġġ u prattiki tas-sajd aktar selettivi żviluppati f’kooperazzjoni mas-settur li jistgħu jnaqqsu t-tneħħija sistematika ta’ ħut ta’ daqs akbar u akbar fl-età u jipproteġu aħjar il-potenzjal ta’ reklutaġġ tal-istokk;

24.Jistieden lill-Kummissjoni, għall-fini tal-implimentazzjoni tad-dritt tal-UE inkluż ir-Regolament dwar il-pjan ta’ ġestjoni pluriennali tal-Baltiku, titlob parir xjentifiku mingħand l-ICES li jqis il-fatturi ta’ stress ambjentali u tal-ekosistema rilevanti fil-Baħar Baltiku; iqis li dan il-parir għandu jenfasizza u jirrifletti b’mod ċar, fost fatturi oħra, ir-riskji relatati mal-istat attwali tal-ambjent, l-interazzjoni bejn l-art u l-baħar, iż-żieda fl-inċertezza minħabba t-tibdil fil-klima u l-impatt tal-interazzjonijiet bejn l-ispeċijiet inklużi l-popolazzjonijiet rilevanti tal-predaturi; jenfasizza li kwalunkwe parir għandu jikkomunika wkoll b’mod ċar il-livell rispettiv ta’ inċertezza;

25.Jistieden lill-Kummissjoni tikkonsulta lill-ICES fil-qafas tal-memorandum ta’ qbil eżistenti biex tinkoraġġixxi l-aġġornament regolari tal-linji gwida tekniċi tagħhom għar-regoli dwar il-kontroll tal-ħsad u l-irfinar ulterjuri tal-metodi ta’ valutazzjoni tal-istokkijiet abbażi ta’ kriterji xjentifiċi indipendenti; jinnota li huwa importanti li l-ICES – meta jagħti pariri lill-Kummissjoni jew lill-Istati Membri – juża l-aktar approċċi aġġornati għall-Baħar Baltiku, u li dawn jibqgħu xjentifikament sodi u konsistenti mal-qafas legali tas-sajd tal-UE; jirrikonoxxi li dan huwa proċess intern tal-ICES;

26.Jistieden lill-Kummissjoni u lill-Istati Membri jagħtu bidu għal immappjar komprensiv tal-popolazzjoni ġenetika fil-Baħar Baltiku ta’ ċerti speċijiet sfruttati kummerċjalment, inklużi l-aringi u l-laċċ ikħal, kif ukoll speċijiet oħra sfruttati kummerċjalment, abbażi tal-aqwa għarfien xjentifiku disponibbli, u jissupplimentaw pariri bbażati fuq l-evidenza għal deċiżjonijiet infurmati aħjar dwar l-opportunitajiet tas-sajd u dwar miżuri tekniċi; jisħaq li tali data ġenetika trid tiġi vvalidata bis-sħiħ mill-ICES u integrata f’mudelli ta’ valutazzjoni fit-tul tal-istokkijiet qabel ma tintuża għal finijiet ta’ ġestjoni;

27.Jistieden lill-Kummissjoni u lill-Istati Membri jtejbu d-disponibbiltà u l-kwalità tad-data rigward il-kriterji tal-età u tad-daqs għall-istokkijiet ikkonċernati meta jitħejjew id-deċiżjonijiet dwar il-ġestjoni tas-sajd għar-reġjun; jenfasizza li l-ġbir imtejjeb tad-data dwar dawn il-parametri għandu jappoġġja l-integrazzjoni tal-Kriterju 3 tad-Deskrittur 3 (D3C3) tad-Direttiva Kwadru dwar l-Istrateġija Marina kif meħtieġ mill-Artikolu 3(3) tal-pjan ta’ ġestjoni pluriennali tal-Baltiku;

28.Jistieden lill-Kummissjoni titlob li l-ICES jipproduċi analiżi xjentifika dettaljata tal-approċċ attwali tal-UE għall-użu tal-parir xjentifiku għall-Baħar Baltiku; jistieden, barra minn hekk, lill-Kummissjoni tiżgura li l-parir mitlub dwar il-livelli tal-qbid jirrifletti bis-sħiħ ir-rekwiżiti legali u l-objettivi ta’ politika rilevanti kollha inklużi l-objettivi tal-PKS kif stabbiliti fl-Artikolu 2; jirrimarka dwar l-importanza li l-Kummissjoni tindirizza n-nuqqasijiet possibbli u tiddeskrivi azzjonijiet konkreti dwar kif il-parir disponibbli bħalissa dwar l-opportunitajiet tas-sajd jista’ jintuża b’mod ta’ prekawzjoni suffiċjenti biex jiġu ssodisfati r-rekwiżiti u l-objettivi legali rilevanti kollha;

29.Iħeġġeġ lill-Kummissjoni u lill-Kunsill jiżguraw li l-iffissar tat-TAC ikun trasparenti u bbażat fuq l-aqwa parir u għarfien xjentifiku disponibbli skont l-objettivi tar-Regolament dwar il-pjan ta’ ġestjoni pluriennali tal-Baltiku u l-PKS, u skont il-parir dwar diversi speċijiet ibbażat fuq l-ekosistema, u jqis l-interazzjonijiet bejn is-sajd u l-istabbiltà soċjoekonomika fit-tul tal-komunitajiet kostali;

30.Jistieden lill-Kummissjoni u lill-Istati Membri jqisu l-ħidma u d-definizzjonijiet internazzjonali rilevanti, inklużi dawk tal-UNEP, meta jiżviluppaw aktar il-fehim tal-ġestjoni bbażata fuq l-ekosistema fi ħdan il-qafas legali eżistenti tal-UE bħal pereżempju dwar ekosistemi li jiffunzjonaw kif innotat fl-Artikolu 5(5)(a) tad-Direttiva Kwadru dwar l-Istrateġija Marina;

31.Jitlob li l-Kummissjoni tiżviluppa pjan ibbażat fuq ix-xjenza, ikkoordinat u transsettorjali li jindirizza l-fatturi ta’ stress ewlenin li jaffettwaw il-Baħar Baltiku filwaqt li tiżgura governanza u ppjanar tal-ispazju marittimu inklużivi, kif ukoll tinvolvi ruħha u tikkoopera mal-partijiet ikkonċernati rilevanti kollha;

32.Jistieden lill-Kummissjoni tuża l-opportunità biex tappoġġja koordinazzjoni mtejba tal-politika u implimentazzjoni koerenti tal-politiki marini u dawk relatati mal-ilma permezz tal-proposta leġiżlattiva li jmiss għal Att dwar l-Oċeani;

33.Jappella għal miżuri effettivi ta’ mitigazzjoni tat-tibdil fil-klima u adattament għalih biex ir-riskji relatati mal-klima jiġu indirizzati f’waqthom u jiġu evitati r-riskji u l-kostijiet dejjem jogħlew ta’ azzjoni mdewma fir-reġjun;

34.Jappella għall-implimentazzjoni kontinwa u effettiva tal-leġiżlazzjoni ambjentali tal-UE filwaqt li jirrikonoxxi l-ħtieġa ta’ soluzzjonijiet ibbilanċjati u fattibbli għas-setturi kollha affettwati biex jiġu indirizzati l-pressjonijiet ambjentali fil-Baħar Baltiku u f’ilmijiet oħra tal-UE, inkluż it-tniġġis minn nutrijenti minn sorsi multipli;

35.Jappella għal żieda sinifikanti fl-investiment f’impjanti tat-trattament tad-dranaġġ u sistemi tar-ritenzjoni u tal-filtrazzjoni tat-tniġġis moderni, kemm fil-pajjiżi tal-Baħar Baltiku kif ukoll fil-baċiri tax-xmajjar kollha li jiskarikaw l-ilma fil-Baħar Baltiku; jisħaq li mingħajr il-modernizzazzjoni komprensiva tal-infrastruttura tal-ilma u tad-dranaġġ, l-isforzi kollha biex tittejjeb il-kwalità tal-ilmijiet tal-Baħar Baltiku se jibqgħu sempliċiment dikjarattivi u ineffettivi;

36.Jistieden lill-Istati Membri u lill-Kummissjoni jibbażaw kwalunkwe approċċ għall-predazzjoni naturali fuq ix-xjenza u l-konsultazzjonijiet mal-partijiet ikkonċernati, inklużi miżuri ta’ ġestjoni preventivi, ankrati lokalment u mmirati għall-marguni u għall-foki griżi, filwaqt li jiżguraw li kwalunkwe miżura adottata tkun effettiva, tissodisfa l-obbligi legali kollha, u tinkludi monitoraġġ adegwat, finanzjament iddedikat u adegwat u kooperazzjoni msaħħa mal-partijiet ikkonċernati, biex tiġi żgurata l-effettività tal-miżuri implimentati, inklużi prattiki ta’ mitigazzjoni bħal deterrenti jew esklużjoni fiżika;

37.Jisħaq fuq il-ħtieġa li l-Kummissjoni tieħu azzjoni urġenti u effettiva bħala rispons għall-pressjonijiet eżerċitati mill-popolazzjonijiet tal-marguni fuq l-istokkijiet tal-ħut tal-Baħar Baltiku, li tiżgura li l-miżuri jkunu proporzjonati, adattati għar-reġjun, u implimentati permezz ta’ interventi effettivi, immirati, u mfassla apposta għal-livell lokali abbażi tal-aqwa data xjentifika disponibbli, filwaqt li tippermetti lill-Istat Membri japplikaw miżuri ta’ mitigazzjoni speċifiċi għas-sitwazzjoni meta meħtieġ sabiex l-impatti lokali jiġu indirizzati b’mod effettiv, u b’hekk is-sostenibbiltà fit-tul tas-sajd lokali tkun appoġġjata fiż-żoni kostali affettwati;

38.Jistieden lill-Kummissjoni u lill-Istati Membri jimmonitorjaw mill-qrib jekk il-miżuri għall-irkupru tad-denfil iswed tal-Baltiku f’periklu kritiku humiex qed jiġu implimentati b’mod effettiv u fejn meħtieġ jieħdu miżuri addizzjonali biex jevitaw it-theddid ewlieni għas-sopravivenza tagħhom;

39.Ifakkar li l-popolazzjonijiet tal-foki Baltiċi nġiebu fix-xifer tal-estinzjoni fis-snin sebgħin;

40.Itenni t-talba tiegħu lill-Kummissjoni biex tipproponi pjan tal-UE għall-ġestjoni tal-marguni għas-sajd u l-akkwakultura tal-Baħar Baltiku, ibbażat fuq l-aqwa parir xjentifiku disponibbli u l-prattiki tal-Istati Membri, filwaqt li jitqies il-pjan propost reċentement mill-Kummissjoni Konsultattiva Ewropea għas-Sajd Intern u l-Akkwakultura (EIFAAC) https://www.fao.org/fishery/services/storage/fs/fishery/documents/EIFAAC/cormorantsplan/EuropeanManagementPlanforCormorants-April2025.pdf. tal-Organizzazzjoni tal-Ikel u l-Agrikoltura kif ukoll proġetti ta’ riċerka preċedenti ffinanzjati mill-UE bħall-“INTERCAFE” https://www.ceh.ac.uk/our-science/projects/intercafe.; jisħaq fuq il-ħtieġa ta’ miżuri preventivi, kumpens għat-telf, u finanzjament minn sorsi tal-UE u nazzjonali;

41.Itenni r-riskji ambjentali u tas-sikurezza serji minħabba ordinanza mhux sploduta (UXO) li ntremiet fil-Baħar Baltiku; ifakkar fir-riżoluzzjoni tiegħu tas-27 ta’ April 2021 dwar ir-residwi kimiċi fil-Baħar Baltiku u l-proġetti ta’ suċċess CHEMSEA, DAIMON u DAIMON 3; iħeġġeġ lill-Kummissjoni u lill-Istati Membri jieħdu miżuri koordinati u prattiċi ulterjuri biex sistematikament jillokalizzaw, jivvalutaw u jimmonitorjaw dawn il-materjali perikolużi sabiex tingħata prijorità liż-żoni fejn hija meħtieġa rimedjazzjoni;

42.Jitlob sforzi konġunti mill-Istati Membri u mill-Kummissjoni biex jappoġġjaw l-iżvilupp tar-riċerka xjentifika u jiskambjaw l-aħjar prattiki dwar modi sikuri u kosteffettivi biex jiġu identifikati u jitneħħew munizzjon u ordinanza mhux sploduta (UXO) minn qiegħ il-baħar bl-għan li jkunu possibbli azzjonijiet ta’ rimedjazzjoni fuq skala kbira;

43.Jistieden lill-Kummissjoni u lill-Istati Membri jniedu programm tal-UE kkoordinat, fit-tul u ffinanzjat b’mod adegwat immirat lejn l-identifikazzjoni, in-newtralizzazzjoni u t-tneħħija ta’ UXO mill-Baħar Baltiku;

44.Jikkundanna l-isfruttament irresponsabbli, mhux sostenibbli u mhux xjentifiku tal-istokkijiet tal-ħut tal-Baħar Baltiku mir-Russja;

45.Jistieden lill-Kunsill u lill-Kummissjoni jikkunsidraw l-azzjonijiet unilaterali tar-Russja meta jistabbilixxu l-kwoti għall-Baħar Baltiku; jistieden ukoll lill-Kummissjoni tikkunsidra azzjonijiet immirati biex jagħmlu pressjoni fuq ir-Russja biex tallinja l-kwoti mal-parir xjentifiku;

46.Jikkundanna bil-qawwa l-preżenza dejjem akbar tal-flotta mistura tar-Russja fil-Baħar Baltiku, b’operazzjonijiet li jevitaw standards regolatorji ewlenin, filwaqt li jżidu r-riskju ta’ tixrid taż-żejt u ta’ perikli ambjentali oħra; jisħaq fuq il-ħsara potenzjali għall-ekosistemi marini, għas-sajd lokali u għas-saħħa tal-bniedem; jinnota wkoll it-tħassib dwar il-fatt li l-prodotti tas-sajd Russi qed ikomplu jilħqu s-suq tal-UE permezz ta’ kanali kummerċjali eżistenti, filwaqt li jenfasizza l-ħtieġa li jiġi żgurat l-għeluq effettiv ta’ kwalunkwe lakuna li tista’ timmina l-objettivi tal-miżuri restrittivi tal-UE; jistieden lill-Kummissjoni tesplora aktar miżuri għall-ġlieda kontra l-flotta mistura tar-Russja, speċjalment fir-reġjun tal-Baħar Baltiku; jappella għal kooperazzjoni reġjonali mtejba u infurzar aktar strett biex jiġu mmitigati dawn ir-riskji u jiġu protetti r-riżorsi marini tal-Baltiku; jenfasizza l-importanza li jiġi żgurat l-infurzar sħiħ tas-sanzjonijiet kontra r-Russja;

47.Jenfasizza l-ħtieġa urġenti li jsir aktar f’termini ta’ koordinazzjoni olistika tal-politika kif ukoll progress kontinwu u aċċellerat fl-implimentazzjoni tal-leġiżlazzjoni ta’ oqsma oħra ta’ politika sabiex tiġi evitata dipendenza fuq miżuri tas-sajd biss u jiġi evitat tnaqqis soċjoekonomiku ulterjuri fil-komunitajiet kostali; jinnota l-isforzi li saru fil-kuntest tal-konferenzi “Il-Baltiku Tagħna”; jinkoraġġixxi aktar progress lejn riżultati konkreti;

48.Iħeġġeġ lill-Kummissjoni tagħti bidu għal evalwazzjoni u reviżjoni possibbli tar-Regolament dwar il-pjan ta’ ġestjoni pluriennali tal-Baltiku bl-għan li jittejbu ċ-ċarezza, il-koerenza u l-applikazzjoni prattika tiegħu, filwaqt li tiġi vvalutata l-prestazzjoni tiegħu fir-rigward tal-aspetti ambjentali u soċjoekonomiċi; jisħaq ulterjorment fuq l-importanza li jiġi żgurat li kwalunkwe aġġustament futur possibbli tal-qafas jibqa’ sempliċi, ibbażat fuq ix-xjenza u fattibbli għas-settur;

49.Jistieden lill-Kummissjoni, fil-kuntest ta’ reviżjoni possibbli tar-Regolament dwar il-pjan ta’ ġestjoni pluriennali tal-Baltiku, tivvaluta u, meta meħtieġ, tipproponi l-inklużjoni ta’ stokkijiet tas-salamun u tat-trota bħala stokkijiet speċifiċi li jridu jiġu koperti mill-kamp ta’ applikazzjoni tar-Regolament fir-rigward tal-qabdiet aċċessorji;

50.Jesprimi tħassib dwar il-fatt li l-valur miżjud f’termini ta’ kooperazzjoni reġjonali fil-Baħar Baltiku kien baxx, meta jitqies li l-pjan ta’ ġestjoni pluriennali fil-biċċa l-kbira kkonsolida perkorsi għall-kooperazzjoni preeżistenti jew diġà mibdija; jinnota li minħabba proċessi bil-mod u żieda fil-burokrazija li takkumpanja tali inizjattivi, inbdew relattivament ftit rakkomandazzjonijiet konġunti mill-Istati Membri, u dan jindika sinjal inkwetanti, li d-dispożizzjonijiet dwar ir-reġjonalizzazzjoni tar-regoli tas-sajd tal-UE mhumiex qed jintużaw sabiex il-miżuri ta’ ġestjoni jiġu adattati għall-ispeċifiċitajiet tal-Baħar Baltiku; jenfasizza l-ħtieġa ta’ kooperazzjoni reġjonali bejn il-pajjiżi Baltiċi, inklużi l-partijiet ikkonċernati kollha;

51.Jisħaq li l-ġestjoni effettiva tal-Baħar Baltiku trid tinbena fuq il-fiduċja, id-djalogu u l-kooperazzjoni reġjonali bejn l-Istati Membri, il-partijiet ikkonċernati kollha, il-korpi reġjonali bħall-HELCOM, u l-komunitajiet kostali biex jiġu promossi soluzzjonijiet prattiċi u skambju tal-għarfien;

52.Jappella għal approċċ ġdid għall-ġestjoni tar-riskju liema approċċ ikun adattat għar-reġjuni;

53.Jitlob li r-regoli fil-pjan ta’ ġestjoni pluriennali jiġu ċċarati biex il-flessibbiltà minn sena għal sena tiġi pprojbita għall-istokkijiet taħt il-punt ta’ referenza ta’ konservazzjoni attwali Btrigger tal-pjan ta’ ġestjoni pluriennali tal-Baħar Baltiku kif maqbul bħalissa mal-Kunsill;

54.Jistieden lill-Kummissjoni ssaħħaħ il-miżuri ta’ ġestjoni bbażati fuq ix-xjenza u proporzjonati għas-salamun fil-Baħar Baltiku, filwaqt li tiżgura li jiġu indirizzati u mifhuma kif xieraq l-impatti ekosistemiċi tas-sajd tal-aringi, tal-laċċ ikħal u tal-bakkaljaw fuq is-salamun; iħeġġeġ titjib fil-monitoraġġ u fir-riċerka biex tiġi appoġġjata l-ġestjoni sostenibbli tas-salamun;

55.Jenfasizza li l-ġestjoni tas-sajd fl-UE għandha tkun ibbażata fuq l-esperjenza, ix-xjenza u r-realtajiet reġjonali Ewropej; jistieden lill-Kummissjoni tipproponi regoli għall-Baħar Baltiku adattati għar-reġjuni sabiex awtomatikament jittieħdu azzjonijiet meta l-istokkijiet jaqgħu taħt il-valuri ta’ skattar stabbiliti f’konformità mal-approċċ ta’ prekawzjoni, u jtenni li l-ġestjoni tar-rendiment massimu sostenibbli għandha tkun ikkomplementata, meta applikabbli, b’miżuri li qabelxejn jiddiferenzjaw il-qabdiet skont id-daqs u l-età; iqis li tista’ tittieħed ispirazzjoni mill-prattiki ta’ ġestjoni f’reġjuni oħra bħal dawk tal-Awstralja, ta’ New Zealand, tal-Kanada u tal-Istati Uniti, filwaqt li tiġi żgurata l-konsistenza mal-qafas legali tal-UE;

56.Jistieden lill-Kummissjoni u lill-Istati Membri jsaħħu l-kooperazzjoni reġjonali f’konformità mal-Artikolu 18 tal-PKS;

57.Jappella għal miżuri konkreti u effettivi li jiżguraw li l-ħut li jinqabad fil-Baħar Baltiku jiġi dejjem aktar dirett lejn il-konsum dirett mill-bniedem, biex jiġu promossi u inċentivati l-ktajjen tal-provvista alimentari lokali;

58.Jinnota li xi Stati Membri fir-reġjun tal-Baħar Baltiku bħall-Ġermanja u l-Iżvezja introduċew miżuri nazzjonali biex jirrestrinġu jew jipprojbixxu t-tkarkir tal-qiegħ f’ċerti żoni marini;

59.Jistieden lill-Kummissjoni u lill-Istati Membri jipproponu li, għall-Baħar Baltiku, jitwaqqaf it-tkarkir għall-frakass tal-fdal tal-ħut u għaż-żejt tal-ħut matul fażi ta’ bini mill-ġdid, u jiġu limitati l-attivitajiet estrattivi fiż-żoni marini protetti; jirrikonoxxi li l-approċċi jvarjaw madwar l-Unjoni fid-dawl ta’ kuntesti ekoloġiċi, legali u soċjoekonomiċi speċifiċi; iħeġġeġ lill-Istati Membri jkomplu jiżviluppaw soluzzjonijiet proporzjonati u bbażati fuq ix-xjenza f’kooperazzjoni mal-partijiet ikkonċernati, b’mod partikolari s-settur tas-sajd u l-komunitajiet kostali, biex itejbu l-protezzjoni marina filwaqt li jiżguraw il-vijabbiltà tas-settur tas-sajd tal-UE permezz ta’ tranżizzjoni ġusta;

60.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.