–wara li kkunsidra t-talba għat-tneħħija tal-immunità ta’ Salvatore De Meo, imressqa permezz ta’ ittra bid-data tas-6 ta’ Mejju 2025 mis-Servizz Pubbliku Federali Belġjan għall-Affarijiet Barranin, il-Kummerċ Barrani u l-Kooperazzjoni għall-Iżvilupp, li tittrażmetti talba, bid-data tas-16 ta’ April 2025, mill-Uffiċċju tal-Prosekutur Federali Belġjan b’rabta mal-proċedimenti kriminali li se jitressqu kontra Salvatore De Meo, u mħabbra fil-Parlament fil-21 ta’ Mejju 2025,
–wara li kkunsidra l-informazzjoni addizzjonali pprovduta mill-Prosekutur Federali u mill-Maġistrat Istruttur matul skambju ta’ fehmiet fil-15 ta’ Lulju 2025, u t-tweġiba pprovduta fit-18 ta’ Settembru 2025 mill-Prosekutur Federali wara talba oħra bil-miktub għal informazzjoni; wara li kkunsidra l-fatt li talba għat-tneħħija tal-immunità ta’ Membru trid tissodisfa ċerti standards, b’mod partikolari, trid tiġi fformulata b’mod ċar, inkluż fir-rigward tal-qafas legali li fuqu hija bbażata t-talba, u trid tipprovdi elementi u informazzjoni ċari u suffiċjenti biex il-Parlament ikun f’pożizzjoni li jeżamina t-talba sabiex jasal għal konklużjoni u jikkonkludi dak l-eżami malajr kemm jista’ jkun, filwaqt li titqies ukoll il-kumplessità relattiva tal-każ,
–wara li sema’ lil Salvatore De Meo fit-3 ta’ Diċembru 2025, skont l-Artikolu 9(6) tar-Regoli ta’ Proċedura tiegħu,
–wara li kkunsidra l-Artikoli 8 u 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea kif ukoll l-Artikolu 6(2) tal-Att tal-20 ta’ Settembru 1976 dwar l-elezzjoni tal-Membri tal-Parlament Ewropew b’vot dirett universali,
–wara li kkunsidra s-sentenzi mogħtija mill-Qorti tal-Ġustizzja tal-Unjoni Ewropea fil-21 ta’ Ottubru 2008, fid-19 ta’ Marzu 2010, fis-6 ta’ Settembru 2011, fis-17 ta’ Jannar 2013 u fid-19 ta’ Diċembru 2019 Is-sentenza tal-Qorti tal-Ġustizzja tal-21 ta’ Ottubru 2008, Marra vs De Gregorio u Clemente, C-200/07 u C-201/07, ECLI:EU:C:2008:579; is-sentenza tal-Qorti Ġenerali tad-19 ta’ Marzu 2010, Gollnisch vs Il-Parlament, T-42/06, ECLI:EU:T:2010:102; is-sentenza tal-Qorti tal-Ġustizzja tas-6 ta’ Settembru 2011, Patriciello, C-163/10, ECLI: EU:C:2011:543; is-sentenza tal-Qorti Ġenerali tas-17 ta’ Jannar 2013, Gollnisch vs Il-Parlament, T-346/11 u T-347/11, ECLI:EU:T:2013:23; is-sentenza tal-Qorti tal-Ġustizzja tad-19 ta’ Diċembru 2019, Junqueras Vies, C-502/19, ECLI:EU:C:2019:1115.,
–wara li kkunsidra l-Artikolu 5(2), l-Artikolu 6(1) u l-Artikolu 9 tar-Regoli ta’ Proċedura tiegħu,
–wara li kkunsidra r-rapport tal-Kumitat għall-Affarijiet Legali (A10-0153/2026),
A.billi fis-6 ta’ Mejju 2025, is-Servizz Pubbliku Federali għall-Affarijiet Barranin, il-Kummerċ Barrani u l-Kooperazzjoni għall-Iżvilupp bagħat talba mill-Prosekutur Federali, datata s-16 ta’ April 2025, għat-tneħħija tal-immunità ta’ Salvatore De Meo, Membru tal-Parlament Ewropew elett fl-Italja, b’rabta mal-proċedimenti kriminali li se jitressqu kontrih;
B.billi investigazzjoni wiesgħa li tikkonċerna l-kumpanija Huawei allegatament issarrfet f’evidenza serja tal-eżistenza ta’ organizzazzjoni kriminali li l-għan tagħha allegatament kien li tinfluwenza d-deċiżjonijiet tal-istituzzjonijiet tal-Unjoni billi tinvolvi ruħha fil-korruzzjoni tal-Membri tal-Parlament Ewropew; billi jidher li dik l-investigazzjoni kixfet diversi atti ta’ allegata korruzzjoni li huwa preżunt li twettqu fuq bażi regolari mill-2021 sal-2024; billi l-iskema ta’ korruzzjoni allegatament ħadet forom varji, fosthom li Membri tal-Parlament Ewropew ġew mistiedna għal avvenimenti appoġġjati minn Huawei, allegatament bi skambju għat-teħid ta’ pożizzjonijiet politiċi favur dik il-kumpanija, u rigali eċċessivi bħal spejjeż tal-ivvjaġġar u ikel jew stediniet regolari għal logħbiet tal-futbol barra mill-qafas tal-Parlament Ewropew;
C.billi, skont it-talba għat-tneħħija tal-immunità, Salvatore De Meo ġie mistieden għal ikla ta’ filgħaxija li saret fil-25 ta’ Ġunju 2024 f’ristorant fi Brussell u li allegatament ġiet organizzata minn rappreżentant ta’ Huawei u mħallsa minn dik il-kumpanija, u Salvatore De Meo attenda l-ikla ta’ filgħaxija flimkien ma’ seba’ persuni oħra; billi jidher li allegatament waqt l-ikla ta’ filgħaxija ġew diskussi proġetti varji b’rabta mal-Viżjoni Saħħa Waħda u Huawei; billi l-aċċettazzjoni tal-ħlas tal-ispejjeż tal-ikla ta’ filgħaxija – li l-ammont eżatt tagħhom ma kienx magħruf mill-awtorità li qed titlob it-tneħħija tal-immunità – ma jidhirx li ġiet iddikjarata minn Salvatore De Meo lill-Parlament Ewropew; billi, skont l-informazzjoni addizzjonali pprovduta mill-Prosekutur Federali, Salvatore De Meo allegatament irċieva wkoll rigal waqt dik l-ikla ta’ filgħaxija; billi, skont l-istess informazzjoni addizzjonali, Huawei allegatament investiet fondi fil-kostitwenza ta’ Salvatore De Meo bi skambju talli huwa pubblikament ħa pożizzjonijiet pożittivi favur is-soluzzjonijiet teknoloġiċi mibjugħa minn Huawei; billi, anke skont l-informazzjoni addizzjonali pprovduta mill-Prosekutur Federali, Salvatore De Meo jidher f’filmat promozzjonali għal Huawei, ifaħħar il-merti tas-soluzzjonijiet mibjugħa minn dik il-kumpanija bħala parti mill-proġett Ewropew “SMART VILLAGES”;
D.billi kien biss wara li -Prosekutur Federali pprovda informazzjoni addizjonali bi tweġiba għat-talba bil-miktub għal aktar informazzjoni li ġie indikat li l-allegati azzjonijiet ta’ Salvatore De Meo setgħu jammontaw għal tixħim pubbliku passiv, reat kriminali skont l-Artikolu 246(1) tal-Kodiċi Kriminali Belġjan;
E.billi Salvatore De Meo ġie elett mill-ġdid fil-Parlament Ewropew fl-elezzjonijiet Ewropej ta’ Ġunju 2024, u għalhekk, kien Membru tal-Parlament Ewropew meta twettaq l-allegat reat;
F.billi, minn naħa, il-Parlament ma jistax jitqies bħala qorti u, il-Membru ma jistax, fil-kuntest ta’ proċedura għat-tneħħija tal-immunità, jitqies bħala “akkużat” Is-sentenza tal-Qorti Ġenerali tat-30 ta’ April 2019, Briois vs Il-Parlament, T-214/18, ECLI:EU:T:2019:266.;
G.billi l-għan tal-immunità parlamentari prevista fil-Protokoll Nru 7 dwar il-Privileġġi u l-Immunitajiet tal-Unjoni Ewropea huwa li tipproteġi lill-Parlament u lill-Membri tiegħu minn proċeduri legali fir-rigward ta’ attivitajiet imwettqa fil-qadi tad-dmirijiet parlamentari u li huma inseparabbli minn dawk id-dmirijiet;
H.billi, f’konformità mal-Artikolu 5(2) tar-Regoli ta’ Proċedura tiegħu, l-immunità parlamentari mhijiex privileġġ personali tal-Membru iżda garanzija tal-indipendenza tal-Parlament Ewropew kollu kemm hu u tal-Membri tiegħu;
I.billi l-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea jipprevedi li l-Membri tal-Parlament Ewropew m’għandhom ikunu soġġetti għal ebda forma ta’ investigazzjoni, detenzjoni jew proċeduri legali, fir-rigward ta’ opinjonijiet espressi jew voti mogħtija minnhom fil-qadi ta’ dmirijiethom; billi l-allegat reat ma jikkonċernax opinjoni espressa jew vot mogħti minn Salvatore De Meo fil-qadi ta’ dmirijietu skont it-tifsira tal-Artikolu 8 ta’ dak il-Protokoll;
J.billi l-Artikolu 9, l-ewwel paragrafu, il-punt (b), tal-Protokoll Nru 7 dwar il-Privileġġi u l-Immunitajiet tal-Unjoni Ewropea jipprevedi li, waqt is-sessjonijiet tal-Parlament Ewropew il-Membri tiegħu għandhom igawdu, fit-territorju ta’ kull Stat Membru ieħor barra dak tagħhom stess, l-immunità minn kull tip ta’ detenzjoni u minn proċeduri legali;
K.billi kwalunkwe konklużjoni rigward l-immunità ta’ Salvatore De Meo jeħtieġ li tintlaħaq abbażi tat-talba għat-tneħħija tal-immunità u abbażi tal-informazzjoni u l-ispjegazzjonijiet ipprovduti f’dan il-każ, inklużi t-tweġibiet mogħtija mill-Prosekutur Federali, kemm matul l-iskambju ta’ fehmiet kif ukoll fl-informazzjoni addizzjonali pprovduta bil-miktub; billi hemm skarsezza flagranti ta’ elementi konkreti fit-talba għat-tneħħija tal-immunità; billi l-iskambji orali u bil-miktub sussegwenti mal-Prosekutur Federali, minkejja li pprovdew informazzjoni dwar xi każijiet addizzjonali ta’ suspett ta’ allegat għemil ħażin, xorta ma kinux biżżejjed biex ixerrdu l-inċertezza konsiderevoli dwar it-talba għat-tneħħija tal-immunità ta’ Salvatore De Meo;
L.billi, abbażi ta’ dak li ntqal hawn fuq, il-ġabra ta’ informazzjoni ppreżentata ma ppermettietx lill-Parlament jasal b’mod kunfidenti għal deċiżjoni infurmata biżżejjed biex ineħħi l-immunità ta’ Salvatore De Meo; billi l-inċertezza konsiderevoli dwar l-elementi varji ta’ dan il-każ, barra minn hekk, normalment tindika l-eżistenza ta’ fumus persecutionis;