A.de bhrí an 6 Bealtaine 2025 gur tharchuir Seirbhís Phoiblí Fheidearálach na Beilge um Ghnóthaí Eachracha, Trádáil Eachtrach agus Comhar Forbartha iarraidh ón Ionchúisitheoir Feidearálach, dar dáta an 16 Aibreán 2025, go ndéanfaí díolúine Fulvio Martusciello, Feisire de Pharlaimint na hEorpa a toghadh san Iodáil, a tharscaoileadh i ndáil le himeachtaí coiriúla atá le tionscnamh ina choinne maidir le héilliú líomhnaithe;

B.de bhrí go líomhnaítear gur thug imscrúdú leathan maidir le cuideachta Huawei fianaise thromchúiseach go raibh eagraíocht choiriúil ann a líomhnaítear go raibh sé mar chuspóir aici tionchar a imirt ar chinntí institiúidí an Aontais trí dhul i mbun éilliú Feisirí de Pharlaimint na hEorpa; de bhrí gur cosúil gur tugadh chun solais leis an imscrúdú sin roinnt gníomhartha éillitheachta líomhnaithe a thoimhdítear a rinneadh ar bhonn rialta ó 2021 go 2024; de bhrí go líomhnaítear gurbh ann don scéim éillithe i bhfoirmeacha éagsúla, lena n-áirítear cuireadh a thabhairt d’Fheisirí de Pharlaimint na hEorpa chuig imeachtaí a dtacaíonn Huawei leo, mar mhalairt ar phoist pholaitiúla a ghlacadh i bhfabhar na cuideachta sin mar dhea, agus bronntanais iomarcacha amhail speansais bhia agus taistil nó cuirí rialta chuig cluichí sacair lasmuigh de chreat Pharlaimint na hEorpa;

C.de bhrí, de réir na hiarrata ar dhíolúine a tharscaoileadh, i mí Feabhra 2021, gur sheol roinnt Feisirí de Pharlaimint na hEorpa litir chuig triúr Coimisinéirí d’fhonn tionchar a imirt ar bheartas an Aontais maidir le leathadh amach 5G san Eoraip, go háirithe i ndáil le tacaíocht do chuideachtaí nach de chuid an Aontais iad amhail Huawei; de bhrí gur cosúil go raibh an t-imscrúdú in ann bealach soiléir a bhunú ó chruthú na litreach go dtí a scaipeadh, a tionchar agus a sonrascadh, lenar deimhníodh de réir dealraimh go raibh an litir mar chuid de chiorcad a chuaigh níos faide ná tionchar nó brústocaireacht a imirt agus ina ionad sin a líomhnaítear a bhí mar chuid de shocrú éillitheach; de bhrí go líomhnaítear gurbh é Fulvio Martusciello an príomhthacadóir a thacaigh le dréachtú na litreach, arb é céad sínitheoir na litreach é agus a líomhnaítear gur íocadh é, trí scagchuarda casta airgeadais lenar féachadh leis an socrú líomhnaithe a cheilt, chun dul i mbun éilliú i bhfeidhmiú a thionchair pholaitiúil;

D.de bhrí go líomhnaítear freisin go raibh Fulvio Martusciello rannpháirteach go gníomhach i leasanna Huawei a chur chun cinn, b’fhéidir mar chuid den socrú éillitheach líomhnaithe, trí leasuithe a chur síos ar dhréachtrún maidir le beartas iomaíochta an Aontais ar cosúil gur ceapadh iad ar mhaithe le Huawei agus a dréachtaíodh idir mí Eanáir 2021 agus mí an Mhárta 2021 – is é sin le rá, sa tréimhse ama chéanna le cruthú agus scaipeadh na litreach dá dtagraítear in Aithris C – agus trí rannpháirtíocht mac léinn óna thoghcheantar in Acadamh Huawei a éascú chun vótaí a fháil chun go bhféadfaí é a atoghadh chun na Parlaiminte;

E.de bhrí gur atoghadh Fulvio Martusciello chuig Parlaimint na hEorpa sna toghcháin Eorpacha i Meitheamh 2024 agus dá bhrí sin, go raibh sé ina Fheisire de Pharlaimint na hEorpa tráth an chion líomhnaithe;

F.de bhrí nach féidir le Parlaimint na hEorpa ról cúirte a ghlacadh uirthi féin, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir Breithiúnas ón gCúirt Ghinearálta an 30 Aibreán 2019, Briois v Parlaimint na hEorpa, T-214/18, ECLI:EU:T:2019:266;;

G.de bhrí gurb é is cuspóir don díolúine pharlaiminteach dá bhforáiltear i bPrótacal Uimh. 7 ar Phribhléidí agus Díolúintí an Aontais Eorpaigh ná an Pharlaimint agus a cuid Feisirí a chosaint ar imeachtaí dlíthiúla i ndáil le gníomhaíochtaí a dhéantar i gcomhlíonadh dualgas parlaiminteach agus nach féidir a scaradh ó na dualgais sin;

H.de bhrí, i gcomhréir le Riail 5(2) dá Rialacha Nós Imeachta, nach pribhléid phearsanta don Fheisire í an díolúine pharlaiminteach, ach gur ráthaíocht í ar neamhspleáchas Pharlaimint na hEorpa ina hiomláine agus a cuid Feisirí;

I.de bhrí go bhforáiltear in Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh nach bhfuil Feisirí Pharlaimint na hEorpa inchurtha faoi aon saghas fiosrúcháin, coinneála ná imeachtaí dlíthiúla i leith tuairimí a nocht siad nó vótaí a chaith siad ag comhlíonadh a ndualgas dóibh; de bhrí nach mbaineann an cion líomhnaithe le tuairim a nocht Fulvio Martusciello ná le vóta a chaith sé i gcomhlíonadh a dhualgas dó de réir bhrí Airteagal 8 den Phrótacal sin;

J.de bhrí go bhforáiltear le hAirteagal 9, an chéad mhír, pointe (b), de Phrótacal Uimh. 7 ar Phribhléidí agus Díolúintí an Aontais Eorpaigh le linn sheisiúin Pharlaimint na hEorpa, go bhfuil díolúine ó aon bheart coinneála agus ó imeachtaí dlíthiúla ag Feisirí Pharlaimint na hEorpa, i gcríoch aon Bhallstáit nach é a mBallstát féin é;

K.de bhrí gur bhain an t-imscrúdú le mórán daoine aonair, agus ní hamháin le Fulvio Martusciello; de bhrí gur cosúil go n-eascraíonn an iarraidh ar dhíolúine Fulvio Martusciello a tharscaoileadh as imscrúdú níos leithne ar chleachtais éillitheacha líomhnaithe agus nach ndealraíonn sé go bhfuil sí dírithe ar a ghníomhaíocht pholaitiúil; de bhrí nár aimsigh an Pharlaimint aon fhianaise gurbh ann do fumus persecutionis, is é sin le rá nach ndealraíonn sé gurb é an rún atá laistiar de na himeachtaí anseo dochar a dhéanamh do ghníomhaíocht pholaitiúil Fulvio Martusciello mar Fheisire de Pharlaimint na hEorpa agus do neamhspleáchas na Parlaiminte;