1.ag aontú leis an gCoimisiún go bhfuil na coinníollacha a leagtar amach i Rialachán CED agus go háirithe in Airteagal 4(2), pointe (a) de, comhlíonta agus go bhfuil an Bheilg i dteideal ranníocaíocht airgeadais EUR 2 132 535 a fháil faoin Rialachán sin, arb ionann í agus 85 % den chostas iomlán EUR 2 508 865, a chuimsíonn EUR 2 412 465 de chaiteachas ar sheirbhísí pearsantaithe agus EUR 96 400 de chaiteachas ar ghníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe;

2.ag tabhairt dá haire gur thíolaic údaráis na Beilge an t-iarratas an 22 Nollaig 2025 agus, tar éis don Bheilg faisnéis bhreise a fháil, gur chuir an Coimisiún bailchríoch ar a mheasúnú, beagnach mí amháin roimh an spriocdháta, an 30 Aibreán 2026, agus gur thug sé fógra do Pharlaimint na hEorpa faoi an lá céanna; á chur i bhfáth a thábhachtaí atá sé an t-am a ghiorrú idir iarratas ar chúnamh CED a thíolacadh agus an cinneadh maoiniúcháin, agus cearta Pharlaimint na hEorpa mar bhrainse amháin den údarás buiséadach á gcosaint go hiomlán ag an am céanna;

3.ag tabhairt dá haire go mbaineann an t-iarratas le 803 thairbhí spriocdhírithe, a cuireadh ar iomarcaíocht sa chuideachta Soliver;

4.ag tabhairt dá haire gur aistrigh Soliver, monaróir táirgí gloine don tógáil agus don earnáil mótarfheithiclí, a fhócas chuig gloine mótarfheithiclí ardteicneolaíochta go heisiach tar éis do American Glass Products Holding (AGP) é a fháil in 2018; ag tabhairt dá haire gur thosaigh deacrachtaí ag an gcuideachta a bhain go príomha le cor chun donais san earnáil mótarfheithiclí, a d’eascair as táirgeadh moillithe samhlacha gluaisteán a raibh a cuid táirgí beartaithe dóibh, agus a raibh laghdú mór ar bhrabúsacht agus féimheacht mar thoradh air ar deireadh;

5.ag tabhairt dá haire gur earnáil dianfhuinnimh é tionscal na gloine agus go ndearna praghsanna fuinnimh atá ard i gcónaí difear mór dó, rud a bhain an bonn go mór dá iomaíochas; á chur i bhfáth go bhfuil gá le méadú suntasach ar sholáthar fuinnimh iontaofa agus inacmhainne chun praghsanna iomaíocha fuinnimh a bhaint amach san fhadtéarma, lena n-áirítear trí fhoinsí fuinnimh agus bealaí soláthair a éagsúlú, trí tháirgeadh fuinnimh intíre a fhorbairt, agus tríd an Aontas Fuinnimh a thabhairt chun críche go hiomlán;

6.ag tabhairt dá haire, cé go bhfuil na hionchais fostaíochta is fabhraí ag oibrithe a bhfuil scileanna teicniúla acu, nó iad siúd atá toilteanach athsciliú, gurb é is cúis leis sin ganntanas gairmithe teicniúla, arb é rannpháirtíocht íseal na hóige sa ghairmoiliúint agus lucht saothair atá ag dul in aois is cúis leis; ag cur béim ar an bhfíoras go bhfuil sé ríthábhachtach na hoibrithe a leagadh as a bpost a ath-imeascadh agus rochtain chomhionann ar dheiseanna oiliúna ardcháilíochta a áirithiú chun go mbeidh geilleagar Eorpach ann a bheidh slán i bhfad na haimsire agus a mbeidh bonn láidir tionsclaíoch aige; á chur i bhfios go láidir a thábhachtaí atá sé iomaíochas tionsclaíoch an Aontais a neartú sa chomhthéacs sin;

7.á chur in iúl gur oth léi go raibh tionchar diúltach ag an méadú ar fhéimheachtaí le cúpla bliain anuas ar an ráta fostaíochta i roinnt réigiún sa Bheilg, go háirithe i réigiún Fhlóndras; ag cur béim ar an bhfíoras go bhfuil bacainní níos mó roimh na hoibrithe scothaosta a chuirtear ar iomarcaíocht i bhFlóndras maidir le dul isteach arís sa mhargadh saothair; á iarraidh ar údaráis na Beilge tacaíocht shonrach a sholáthar atá saincheaptha chun cabhrú le hoibrithe na scileanna is gá a fhorbairt tuilleadh chun poist nua ardcháilíochta a aimsiú, agus bearta á ndéanamh ag an am céanna chun féimheachtaí a laghdú agus aghaidh a thabhairt ar dhifríochtaí sóisialta as a dtagann eisiamh ón lucht saothair;

8.á mheabhrú, i gcomhaontú leis na saineolaithe agus na comhpháirtithe sóisialta, gurb iad na bearta seo a leanas atá sna seirbhísí pearsantaithe atá le soláthar do na hoibrithe: tascfhórsa sainchomhairleoirí agus bainisteoirí cuntais a bhfuil taithí acu, a sholáthraíonn seirbhísí comhairleacha pearsantaithe; seirbhísí socrúcháin sheachtraigh lena soláthraítear treoraíocht ar bhonn aonair; cúnamh chun post a fháil: cúnamh treisithe cuardaigh poist: oiliúint agus athoiliúint, lena n-áirítear oiliúint san ionad oibre; rannpháirtíocht ag aonaigh fostaíochta; ag cur béim ar a thábhachtaí atá sé poist ardcháilíochta atá dírithe ar an todhchaí a chothú lena neartaítear an t-iomaíochas agus lena dtacaítear leis an gclaochlú digiteach;

9.á mheabhrú gur ionstraim dlúthpháirtíochta agus aistrithe chóir é CED agus cé go gcuireann sé tacaíocht ar fáil tar éis caillteanais post, nach féidir leis teacht in ionad beartas tionsclaíoch réamhghníomhach; á mheas gur gá slógadh CED a leabú i bhfreagairt bheartais níos mó ar gach leibhéal polaitiúil chun a áirithiú go bhfaighidh na hoibrithe a ndéantar difear dóibh deiseanna leormhaithe i gcomhréir lena gcáilíochtaí agus lena scileanna; á chur i bhfáth nach mór é a bheith ina phríomhchúram ag an Aontas cosc a chur ar dhúnadh den sórt sin ar an gcéad dul síos, trí na dálaí a chruthú chun táirgeadh tionsclaíoch a choinneáil iomaíoch agus córais slándála sóisialta a choinneáil inbhuanaithe ó thaobh airgeadais de, agus ag an am céanna infheistíocht a dhéanamh i scileanna d’oibrithe ardcháilithe agus tionsclaíocha araon; á chur i bhfios go láidir gur gá tacaíocht shonrach a sholáthar atá saincheaptha do phróifílí oibrithe, agus bearta á nglacadh ag an am céanna chun féimheachtaí a laghdú agus aghaidh a thabhairt ar dhifríochtaí sóisialta as a dtagann eisiamh ón lucht saothair; á chur i bhfios go láidir go bhfuil sé ríthábhachtach ualaí rialála agus riaracháin nach bhfuil gá leo a laghdú chun tacú le hiomaíochas tionsclaíoch, chun infheistíocht a mhealladh agus chun poist ardcháilíochta a chaomhnú san Aontas;

10.á chur i bhfáth go n-áiritheoidh údaráis na Beilge infheictheacht an chistithe ón Aontas agus go leagfaidh siad béim ar a bhreisluach trí fhaisnéis éifeachtach agus spriocdhírithe a chur ar fáil do thairbhithe, d’údaráis réigiúnacha agus áitiúla, do chomhpháirtithe sóisialta agus don phobal i gcoitinne;

11.á iarraidh ar an gCoimisiún infheictheacht chomhionann na hionstraime a áirithiú ar fud na mBallstát agus a breisluach a chur chun cinn trí fhaisnéis spriocdhírithe a scaipeadh ar údaráis náisiúnta, ar cheart dóibh an fhaisnéis sin a chur ar aghaidh tuilleadh chuig cuideachtaí a ndéanann iomarcaíochtaí difear dóibh, chuig údaráis réigiúnacha agus áitiúla, chuig comhpháirtithe sóisialta, agus chuig an bpobal i gcoitinne;

12.á iarraidh go ndéanfaí meastóireachtaí deiridh críochnúla in éineacht leis na comhpháirtithe sóisialta ar na bearta a cuireadh chun feidhme, lena n-áirítear faisnéis shoiléir agus thrédhearcach faoin gcaoi ar úsáideadh cistí, ath-imeascadh oibrithe sa mhargadh saothair, agus cé acu ar baineadh amach nó nár baineadh amach cuspóirí CED; á thabhairt chun suntais, sa chomhthéacs sin, a thábhachtaí atá sé faireachán rialta a dhéanamh ar na bearta arna maoiniú ag CED chun measúnú a dhéanamh ar a n-éifeachtacht;

13.ag tabhairt dá haire gur thosaigh an Bheilg ar sheirbhísí pearsantaithe a sholáthar do na tairbhithe spriocdhírithe agus caiteachas riaracháin a thabhú chun CED a chur chun feidhme araon an 11 Meitheamh 2025 agus, dá bhrí sin, gur ón dáta sin go dtí 24 mhí agus go dtí 31 mhí tar éis dháta theacht i bhfeidhm an chinnidh maoiniúcháin a bheidh tréimhse na hincháilitheachta le haghaidh ranníocaíocht airgeadais ó CED;

14.ag tabhairt dá haire gur thug údaráis na Beilge dearbhú go n-urramófar prionsabail na córa comhionainne agus an neamh-idirdhealaithe sa rochtain ar na gníomhaíochtaí atá beartaithe agus ina gcur chun feidhme, agus go gcoiscfear aon mhaoiniú dúbailte;

15.á athdhearbhú nach ceadmhach cúnamh ó CED a chur in ionad gníomhaíochtaí atá mar fhreagracht ar údaráis phoiblí nó chuideachtaí faoin dlí náisiúnta nó faoi chomhaontuithe comhchoiteanna; á mheabhrú gur sásra teoranta, spriocdhírithe agus comhlántach é CED;

16.ag formheas an chinnidh a ghabhann leis an rún seo;

17.ag treorú dá hUachtarán an cinneadh a shíniú le hUachtarán na Comhairle agus socrú a dhéanamh dá fhoilsiú in Iris Oifigiúil an Aontais Eorpaigh;

18.ag treorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.