1.Jaqbel mal-Kummissjoni li l-kundizzjonijiet stabbiliti fir-Regolament dwar il-FEG u b’mod partikolari fl-Artikolu 4(2), il-punt (a), tiegħu huma ssodisfati u li l-Belġju huwa intitolat għal kontribuzzjoni finanzjarja ta’ EUR 2 132 535 skont dak ir-Regolament, li tirrappreżenta 85 % tal-kost totali ta’ EUR 2 508 865, liema kost jinkludi n-nefqa ta’ EUR 2 412 465 għal servizzi personalizzati u n-nefqa ta’ EUR 96 400 għall-attivitajiet ta’ tħejjija, ġestjoni, informazzjoni u pubbliċità, kontroll u rapportar;

2.Jinnota li l-awtoritajiet Belġjani ressqu l-applikazzjoni fit-22 ta’ Diċembru 2025, u li, wara li rċeviet informazzjoni addizzjonali mill-Belġju, il-Kummissjoni ffinalizzat il-valutazzjoni tagħha fit-30 ta’ April 2026, kważi xahar qabel l-iskadenza, u nnotifikat lill-Parlament dwar dan fl-istess jum; jisħaq fuq l-importanza li jitqassar iż-żmien bejn it-tressiq ta’ applikazzjoni għal assistenza mill-FEG u d-deċiżjoni ta’ finanzjament, filwaqt li jiġu ssalvagwardjati bis-sħiħ id-drittijiet tal-Parlament Ewropew bħala waħda mill-fergħat tal-awtorità baġitarja;

3.Jinnota li l-applikazzjoni hija relatata ma’ 803 benefiċjarji fil-mira, li ngħataw is-sensja fil-kumpanija Soliver;

4.Jieħu nota li Soliver, kumpanija li tipproduċi prodotti tal-ħġieġ għall-kostruzzjoni u s-settur awtomobilistiku, bdiet tiffoka fuq ħġieġ tal-karozzi esklussivament ta’ teknoloġija avvanzata wara li ġiet akkwistata minn American Glass Products Holding (AGP) fl-2018; jinnota li l-kumpanija bdiet tesperjenza diffikultajiet prinċipalment marbuta ma’ tnaqqis fir-ritmu ekonomiku fis-settur awtomobilistiku, li rriżulta minn dewmien fil-produzzjoni tal-mudelli tal-karozzi li l-prodotti tagħha kienu maħsuba għalihom, u li fl-aħħar mill-aħħar irriżulta fi tnaqqis serju fil-profittabbiltà u liema tnaqqis wassal għall-falliment;

5.Jinnota li l-industrija tal-ħġieġ hija settur intensiv fl-enerġija u ġiet affettwata b’mod sever minn prezzijiet tal-enerġija persistentement għoljin, li dgħajfu b’mod sinifikanti l-kompetittività tagħha; jisħaq li l-kisba ta’ prezzijiet tal-enerġija kompetittivi fit-tul teħtieġ żieda sostanzjali fil-provvista tal-enerġija affidabbli u affordabbli, inkluż permezz tad-diversifikazzjoni tas-sorsi tal-enerġija u r-rotot tal-provvista, l-iżvilupp tal-produzzjoni tal-enerġija domestika, u t-tlestija sħiħa tal-Unjoni tal-Enerġija;

6.Jinnota li, filwaqt li l-ħaddiema b’ħiliet tekniċi, jew dawk li lesti li jitħarrġu mill-ġdid, għandhom l-aktar opportunitajiet ta’ impjieg favorevoli, minħabba n-nuqqas ta’ professjonisti tekniċi, li jirriżulta mill-fatt li hemm anqas żgħażagħ li qegħdin jidħlu għat-taħriġ vokazzjonali u li l-forza tax-xogħol qed tixjieħ. jenfasizza li r-riintegrazzjoni tal-ħaddiema ssensjati u l-iżgurar tal-aċċess ugwali għal opportunitajiet ta’ taħriġ ta’ kwalità għolja huma kruċjali għal ekonomija Ewropea valida għall-futur b’bażi industrijali b’saħħitha; jissottolinja l-importanza li tissaħħaħ il-kompetittività industrijali tal-Unjoni f’dan il-kuntest;

7.Jiddispjaċih li ż-żieda fil-fallimenti matul dawn l-aħħar ftit snin kellha impatt negattiv fuq ir-rata ta’ impjieg f’xi reġjuni fil-Belġju, b’mod partikolari fir-reġjun ta’ Flanders; jenfasizza li, fi Flanders, il-ħaddiema akbar fl-età li jingħataw is-sensja jiffaċċjaw ostakli akbar biex jerġgħu jidħlu fis-suq tax-xogħol; jistieden lill-awtoritajiet Belġjani jipprovdu appoġġ speċifiku mfassal apposta biex jgħin lill-ħaddiema jkomplu jiżviluppaw il-ħiliet meħtieġa biex isibu impjiegi ta’ kwalità ġodda, filwaqt li jieħdu miżuri biex inaqqsu l-fallimenti u jindirizzaw id-disparitajiet soċjali li jwasslu għall-esklużjoni tal-forza tax-xogħol;

8.Ifakkar li, bi qbil mal-esperti u mas-sħab soċjali, is-servizzi personalizzati li se jiġu pprovduti lill-ħaddiema jikkonsistu fil-miżuri li ġejjin: task force ta’ konsulenti b’esperjenza u maniġers tal-kontijiet, li tipprovdi servizzi ta’ konsulenza personalizzati; servizzi ta’ rikollokament li jipprovdu gwida individwali; għajnuna biex jinstab impjieg: assistenza rinforzata għat-tiftix ta’ impjieg: taħriġ u taħriġ mill-ġdid, inkluż taħriġ fuq il-post tax-xogħol; parteċipazzjoni f’fieri tal-impjiegi; jenfasizza l-importanza li jitrawmu impjiegi ta’ kwalità għolja u orjentati lejn il-futur biex tissaħħaħ il-kompetittività u tiġi appoġġjata t-trasformazzjoni diġitali;

9.Ifakkar li l-FEG huwa strument ta’ solidarjetà u tranżizzjoni ġusta u, filwaqt li jipprovdi appoġġ wara t-telf ta’ impjiegi, ma jistax jissostitwixxi politika industrijali proattiva; iqis li l-mobilizzazzjoni tal-FEG jeħtieġ li tiġi inkorporata f’rispons ta’ politika akbar fil-livelli politiċi kollha biex jiġi żgurat li l-ħaddiema affettwati jsibu opportunitajiet adegwati f’konformità mal-kwalifiki u l-ħiliet tagħhom; jisħaq li l-kompitu primarju tal-Unjoni jrid ikun li l-ewwel nett tipprevjeni tali għeluq, billi toħloq il-kundizzjonijiet biex il-produzzjoni industrijali tinżamm kompetittiva u s-sistemi tas-sigurtà soċjali jkunu finanzjarjament sostenibbli, waqt li fl-istess ħin tinvesti fil-ħiliet kemm għall-ħaddiema bi kwalifiki għoljin kif ukoll għall-ħaddiema industrijali; jissottolinja l-ħtieġa li jingħata appoġġ speċifiku mfassal apposta għall-profili tal-ħaddiema, filwaqt li jittieħdu miżuri biex jitnaqqsu l-fallimenti u jiġu indirizzati d-disparitajiet soċjali li jwasslu għall-esklużjoni mill-forza tax-xogħol; jissottolinja li t-tnaqqis ta’ piżijiet regolatorji u amministrattivi mhux meħtieġa huwa essenzjali biex tiġi appoġġjata l-kompetittività industrijali, jiġi attirat l-investiment u jiġu ppreservati impjiegi ta’ kwalità fl-Unjoni;

10.Jisħaq li l-awtoritajiet Belġjani għandhom jiżguraw il-viżibbiltà tal-finanzjament tal-Unjoni u jenfasizzaw il-valur miżjud tiegħu billi jipprovdu informazzjoni effettiva u mmirata lill-benefiċjarji, lill-awtoritajiet reġjonali u lokali, lis-sħab soċjali, u lill-pubbliku ġenerali;

11.Jistieden lill-Kummissjoni tiżgura viżibbiltà ugwali tal-istrument madwar l-Istati Membri u tippromwovi l-valur miżjud tiegħu billi xxerred informazzjoni mmirata lill-awtoritajiet nazzjonali, li għandhom ikomplu jgħaddu tali informazzjoni lill-kumpaniji affettwati mis-sensji, lill-awtoritajiet reġjonali u lokali, lis-sħab soċjali, u lill-pubbliku ġenerali;

12.Jitlob li jsiru evalwazzjonijiet finali bir-reqqa, flimkien mas-sħab soċjali, tal-miżuri implimentati, inkluża informazzjoni ċara u trasparenti dwar il-mod kif intużaw il-fondi, ir-riintegrazzjoni tal-ħaddiema fis-suq tax-xogħol u jekk intlaħqux l-objettivi tal-FEG; jenfasizza, f’dan il-kuntest, l-importanza ta’ monitoraġġ regolari tal-miżuri ffinanzjati mill-FEG sabiex tiġi vvalutata l-effettività tagħhom;

13.Jinnota li l-Belġju beda jipprovdi servizzi personalizzati lill-benefiċjarji fil-mira kif ukoll beda jġarrab nefqa amministrattiva biex jimplimenta l-FEG fil-11 ta’ Ġunju 2025, u li l-perjodu ta’ eliġibbiltà għal kontribuzzjoni finanzjarja mill-FEG se jkun għalhekk minn dik id-data sa, rispettivament, 24 xahar u 31 xahar wara d-data tad-dħul fis-seħħ tad-deċiżjoni ta’ finanzjament;

14.Jinnota li l-awtoritajiet Belġjani pprovdew aċċertament li l-prinċipji ta’ trattament ugwali u ta’ nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

15.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-awtoritajiet pubbliċi jew tal-kumpaniji fl-ambitu tal-liġi nazzjonali jew ta’ ftehimiet kollettivi; ifakkar li l-FEG huwa mekkaniżmu limitat, immirat u komplementari;

16.Japprova d-deċiżjoni annessa ma’ din ir-riżoluzzjoni;

17.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

18.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.