1.Iqis li r-repressjoni tranżnazzjonali tikkostitwixxi theddida serja u dejjem tikber għad-demokrazija, ksur tad-drittijiet tal-bniedem, u forma ta’ ndħil barrani, li jimminaw il-governanza demokratika, l-istat tad-dritt, id-drittijiet fundamentali u s-sovranità u s-sigurtà tal-Istati ospitanti u l-kapaċità tagħhom li jiżguraw il-protezzjoni tal-persuni li jirrisjedu fit-territorju tagħhom; jissottolinja li dawn ix-xejriet aktarx li jintensifikaw minħabba l-erożjoni tan-normi internazzjonali u l-bidla teknoloġika rapida, li qed tnaqqas ukoll l-ispiża tat-twettiq ta’ tali azzjonijiet;

2.Jikkundanna l-atti tar-repressjoni tranżnazzjonali u l-indħil barrani, inklużi dawk imwettqa fl-Istati Membri tal-UE, bl-aktar mod qawwi possibbli; jistieden lill-Kummissjoni u lill-Istati Membri jirrikonoxxu li r-repressjoni tranżnazzjonali tikkostitwixxi prattika inaċċettabbli u illegali, primarjament eżerċitata minn reġimi awtoritarji, u jimpenjaw ruħhom għal approċċ ta’ tolleranza żero, li jirrikjedi azzjoni deċiżiva, koordinata u komprensiva lejn kwalunkwe forma ta’ repressjoni tranżnazzjonali li sseħħ fit-territorju tal-UE;

3.Iqis li n-nuqqas ta’ definizzjoni ċara tar-repressjoni tranżnazzjonali jikkontribwixxi għas-sottorappurtar, jillimita r-reazzjonijiet ta’ politika effettivi u jxekkel l-użu ta’ għodod ta’ obbligu ta’ rendikont, inklużi mekkaniżmi ta’ sanzjonijiet; jistieden għalhekk lill-Kummissjoni, lill-Kunsill u lill-Istati Membri jadottaw definizzjoni komuni tal-UE tar-repressjoni tranżnazzjonali bbażata fuq id-definizzjoni stabbilita f’dan ir-rapport u f’rapporti preċedenti tal-Parlament u jintegraw din id-definizzjoni b’mod sistematiku fil-politiki u l-istrumenti kollha tal-UE, inkluż fl-azzjoni esterna, il-ġustizzja u l-affarijiet interni, il-politika diġitali, ir-regolamentazzjoni finanzjarja u l-oqfsa ta’ sanzjonijiet, sabiex jiġi evitat li l-oqfsa legali u amministrattivi tal-UE jintużaw ħażin għal skopijiet repressivi; iħeġġeġ lill-Istati Membri jikkodifikaw ir-repressjoni tranżnazzjonali fil-leġiżlazzjoni nazzjonali;

4.Jiddefinixxi r-repressjoni tranżnazzjonali bħala atti intenzjonati jew theddid imwettaq mill-Istati, inklużi reġimi repressivi jew awtoritarji, entitajiet affiljati mal-Istat jew entitajiet soġġetti għall-influwenza ta’ Stat jew tal-intermedjarji tiegħu jew pressjoni mill-Istat jew mill-intermedjarji tiegħu, bil-għan li jiddefendu u javvanzaw l-interessi tagħhom billi jaslu lil hinn mill-fruntieri biex jintimidaw, jheddu, isikktu, jisfurzaw, jikkontrollaw jew jagħmlu ħsara bi kwalunkwe mod ieħor lil individwi jew gruppi li jgħixu barra mill-pajjiż, jew lin-networks ta’ appoġġ u lill-membri tal-familja tagħhom;

5.Jinnota bi tħassib li l-miri tar-repressjoni tranżnazzjonali jinkludu firxa wiesgħa ta’ individwi u gruppi, li jinkludu, fost l-oħrajn, dissidenti, ġurnalisti, attivisti, akkademiċi u membri tad-dijaspora u l-familji tagħhom; jirrikonoxxi li r-repressjoni tranżnazzjonali testendi lil hinn mid-dijaspori u hija mmirata wkoll lejn organizzazzjonijiet u persuni li jiddefendu jew jassistu lill-vittmi, inklużi dawk mingħajr ebda konnessjoni nazzjonali mal-Istat awtur tar-reat; jesprimi tħassib serju dwar it-tiċkin tal-ispazju ċiviku u t-trażżin tal-komunitajiet eżiljati, li l-ilħna tagħhom huma strumentali biex jiġu dokumentati s-sitwazzjonijiet dwar id-drittijiet tal-bniedem u l-abbuż tagħhom;

6.Jissottolinja li r-repressjoni tranżnazzjonali tinkludi firxa wiesgħa ta’ prattiki koerċittivi li qed jespandu b’mod kostanti, inkluż iżda mhux limitat għal:(a)repressjoni tranżnazzjonali fiżika, bħal qtil immirat, ħtif, vjolenza, ritorni furzati, għajbien furzat, deportazzjonijiet, u attakki fuq proprjetà;(b)abbuż legali u amministrattiv — inkluż l-użu ħażin ta’ servizzi konsulari, estradizzjoni u proċeduri ta’ assistenza legali reċiproka — prosekuzzjonijiet in absentia, abbuż ta’ sistemi ta’ avviżi internazzjonali, iffriżar tal-assi u restrizzjoni tal-aċċess għal servizzi bankarji u finanzjarji, akkużi kriminali mingħajr bażi, prosekuzzjoni selettiva, ċaħda ta’ permessi, liċenzji, jew approvazzjonijiet mingħajr raġuni valida, jew multi jew penali arbitrarji;(c)metodi koerċittivi mhux fiżiċi, bħas-sorveljanza diġitali, it-theddid, l-intimidazzjoni, il-fastidju diġitali, l-użu ħażin ta’ teknoloġiji ta’ software ta’ spjunaġġ, il-hacking, ir-rikatt, l-akkużi ta’ terroriżmu jew l-imminar tas-sigurtà tal-Istat, il-fastidju ta’ qraba u l-koerċizzjoni bi prokura — inkluż permezz ta’ missjonijiet diplomatiċi jew konsulari, networks tal-kriminalità organizzata, atturi privati, jew entitajiet allinjati mal-Istat u affiljati mal-Istat li joperaw barra mill-pajjiż;

7.Jisħaq li l-Istati Membri bħalissa huma affettwati mir-repressjoni tranżnazzjonali fi gradi differenti u juru livelli differenti ta’ għarfien, ta’ tħejjija istituzzjonali u ta’ mekkaniżmi ta’ protezzjoni; jisħaq, madankollu, li peress li l-awturi joperaw bejn il-fruntieri u jisfruttaw id-diverġenzi bejn is-sistemi nazzjonali, ir-repressjoni tranżnazzjonali ma tistax tiġi indirizzata b’mod effettiv permezz ta’ risponsi nazzjonali iżolati, u għalhekk tirrikjedi l-involviment u t-tħejjija tal-Istati Membri kollha, fi ħdan qafas koordinat tal-UE;

8.Jisħaq li r-repressjoni tranżnazzjonali hija sottorappurtata b’mod sinifikanti, minkejja li l-ġbir ta’ data affidabbli huwa essenzjali biex wieħed jifhem l-iskala tagħha; jinnota li l-persuni fil-mira tar-repressjoni tranżnazzjonali jistgħu joqogħdu lura milli jirrappurtaw inċidenti minħabba li jkunu jibżgħu minn ritaljazzjoni kontra membri tal-familja tagħhom, ma jkunux jafdaw lill-awtoritajiet minħabba esperjenzi f’pajjiżi awtoritarji jew ikunu jiffaċċjaw ostakli lingwistiċi;

9.Jistieden lill-Kummissjoni u lis-Servizz Ewropew għall-Azzjoni Esterna (SEAE), f’kooperazzjoni mal-korpi rilevanti tal-UE inkluża l-Europol, jistabbilixxu mekkaniżmu tal-UE għall-ġbir, il-monitoraġġ u r-rappurtar tad-data dwar ir-repressjoni tranżnazzjonali, li jkopri inċidenti fl-UE u globalment, li jippermetti lill-awtoritajiet pubbliċi u lill-partijiet ikkonċernati jagħtu kontribut, u li l-Kummissjoni u l-Istati Membri jkunu jistgħu jużaw biex jiżviluppaw, jirfinaw u jevalwaw il-politiki tagħhom dwar il-ġlieda kontra r-repressjoni tranżnazzjonali; jisħaq fuq il-ħtieġa li jkun hemm metodoloġiji kondiviżi u li tiġi żgurata l-kooperazzjoni f’dan il-qasam ma’ sħab tal-istess fehma; jisħaq li l-kanali ta’ rappurtar għandhom ikunu multilingwi u infurmati dwar it-trawma, filwaqt li jiżguraw protezzjoni u kunfidenzjalità robusti tad-data;

10.Jistieden lill-Istati Membri jiżguraw li l-atti kriminali u mhux kriminali li għandhom komponent ta’ repressjoni tranżnazzjonali jiġu rreġistrati b’mod konsistenti bħala tali madwar l-UE, u li l-awtoritajiet rilevanti jkunu attrezzati biex jidentifikaw id-dimensjoni tar-repressjoni tranżnazzjonali;

11.Jenfasizza l-ħtieġa ta’ kriptaġġ b’saħħtu u salvagwardji stretti biex jiġi żgurat li l-informazzjoni kondiviża permezz ta’ dawn il-kanali ma tkunx tista’ tiġi interċettata, użata ħażin jew aċċessata minn atturi mhux awtorizzati, u li l-vittmi ma jkunux esposti għal aktar ħsara;

12.Jisħaq li r-rapporti li jaslu permezz ta’ dawn il-kanali għandhom jiġu vvalutati malajr u, fejn xieraq, segwiti minn azzjoni konkreta mill-awtoritajiet kompetenti, inklużi investigazzjonijiet u sforzi biex jiġu identifikati rabtiet possibbli ma’ atturi tal-intelligence barranin;

13.Jirrikonoxxi r-rwol essenzjali tal-organizzazzjonijiet tas-soċjetà ċivili fid-dokumentazzjoni tal-aktar forom moħbija ta’ repressjoni tranżnazzjonali – inklużi s-sorveljanza diġitali, ir-repressjoni finanzjarja, il-fastidju amministrattiv, u l-koerċizzjoni bi prokura; jenfasizza li l-ġbir tad-data attwali dwar ir-repressjoni tranżnazzjonali għadu primarjament ibbażat fuq sorsi mhux governattivi, li ħafna minnhom jiffaċċjaw restrizzjonijiet severi ta’ finanzjament, u dan iżid l-urġenza għall-mekkaniżmi ta’ monitoraġġ fil-livell tal-Istati Membri u tal-UE; itenni l-ħtieġa li jiġu appoġġjati s-soċjetà ċivili, il-ġurnalisti, l-informaturi u oħrajn li jikxfu mekkaniżmi u każijiet ta’ repressjoni tranżnazzjonali, li spiss jesponuhom għal riskji personali għoljin;

14.Jistieden lill-Istati Membri jżommu kuntatt mill-qrib mad-dijaspori l-aktar suxxettibbli għar-repressjoni tranżnazzjonali; jistieden lill-Kummissjoni tipprovdi gwida u rakkomandazzjonijiet lill-Istati Membri dwar kif jipproteġu l-gruppi f’riskju fl-eżilju;

15.Jistieden lill-Istati Membri jipprovdu taħriġ speċjalizzat għall-awtoritajiet tal-infurzar tal-liġi, ġudizzjarji, finanzjarji, taċ-ċibersigurtà, tal-immigrazzjoni u tal-ażil dwar l-identifikazzjoni tar-repressjoni tranżnazzjonali u r-rispons għal tali repressjoni; jistieden lill-Istati Membri jinkludu l-komunitajiet affettwati fit-tfassil u l-implimentazzjoni ta’ dan it-taħriġ;

16.Iħeġġeġ l-istabbiliment ta’ qafas komprensiv biex tiġi indirizzata l-frammentazzjoni tar-risponsi nazzjonali u jiġu żgurati l-koordinazzjoni u l-kondiviżjoni tal-informazzjoni fost l-istituzzjonijiet u l-aġenziji tal-UE, l-Istati Membri, l-istituzzjonijiet nazzjonali tad-drittijiet tal-bniedem, u l-partijiet ikkonċernati rilevanti; jisħaq fuq il-ħtieġa ta’ kooperazzjoni msaħħa bejn is-servizzi u djalogu politiku strutturat sabiex jiġi żgurat rispons konsistenti u effettiv tal-UE;

17.Jistieden lill-Istati Membri jaħtru punti ta’ kuntatt nazzjonali dwar ir-repressjoni tranżnazzjonali bil-kompitu li jikkoordinaw bejn l-awtoritajiet rilevanti fil-livelli kollha;

18.Jistieden lill-Kummissjoni u lill-Istati Membri jiffaċilitaw skambju regolari bejn l-Istati Membri permezz ta’ network ta’ dawk il-punti ta’ kuntatt nazzjonali dwar ir-repressjoni tranżnazzjonali, li jippermettilhom jikkondividu l-esperjenzi, ix-xejriet, il-prattiki tajbin u t-tagħlimiet meħuda; jitlob li l-punti ta’ kuntatt nazzjonali jiġu mistiedna regolarment għal-laqgħat taċ-Ċentru Ewropew għar-Reżiljenza Demokratika; jistieden lill-Istati Membri jiżguraw rappurtar sistematiku dwar l-iżviluppi fil-livell nazzjonali lill-Kummissjoni u jsaħħu l-koordinazzjoni tal-miżuri nazzjonali bil-ħsieb li d-dimensjoni transfruntiera tar-repressjoni tranżnazzjonali tiġi indirizzata b’mod aktar effettiv;

19.Jistieden lill-Kummissjoni u lis-SEAE jippubblikaw rapport pubbliku annwali dwar ir-repressjoni tranżnazzjonali li jaffettwa lill-UE, li jivvaluta x-xejriet, it-tendenzi u r-riskji emerġenti, inklużi l-forom sottorappurtati bħas-sorveljanza diġitali, ir-repressjoni finanzjarja, il-fastidju amministrattiv, u l-koerċizzjoni bi prokura;

20.Jistieden lill-Kummissjoni tagħmel proposta biex taġġorna l-mandati tal-Europol u tal-Eurojust bil-għan li jkunu jistgħu jiġġieldu r-repressjoni tranżnazzjonali b’mod aktar effettiv; jistieden lill-Europol u lill-Eurojust jipprijoritizzaw il-kooperazzjoni mill-qrib u l-iskambju ta’ informazzjoni fost l-Istati Membri tal-UE biex jindirizzaw ir-repressjoni tranżnazzjonali u jiżguraw kondiviżjoni aħjar tal-informazzjoni, inkluż permezz ta’ taħriġ speċifiku, kif ukoll valutazzjonijiet immirati tat-theddid tar-repressjoni tranżnazzjonali;

21.Jistieden lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u lis-SEAE jsaħħu l-koordinazzjoni fi ħdan l-istrumenti eżistenti tal-politika barranija tal-UE sabiex jiġġieldu r-repressjoni tranżnazzjonali b’mod aktar effettiv, inkluż billi jirrinfurzaw il-preżenza tal-UE fil-pajjiżi mhux tal-UE u billi jsaħħu l-punti fokali fid-delegazzjonijiet tal-UE biex iqajmu l-każijiet ta’ repressjoni tranżnazzjonali fil-pajjiżi mhux tal-UE;

22.Jistieden lill-Kunsill jaħtar koordinatur għall-ġlieda kontra r-repressjoni tranżnazzjonali, li jkun jista’ jservi bħala punt ta’ kuntatt ċentrali u jikkontribwixxi għall-iżvilupp ta’ strateġija globali tal-UE dwar ir-repressjoni tranżnazzjonali; iqis li dan il-koordinatur għandu jkun involut fil-ħidma taċ-Ċentru Ewropew għar-Reżiljenza Demokratika u jikkomplementaha;

23.Jenfasizza li l-miżuri kollha ta’ ġbir tad-data, ta’ appoġġ għall-vittmi u ta’ protezzjoni u l-mekkaniżmi l-oħra kollha maħsuba biex jindirizzaw ir-repressjoni tranżnazzjonali għandhom iqisu r-riskji speċifiċi li jiffaċċjaw il-minoranzi razzjali, etniċi u reliġjużi, u l-persuni LGBTIQ+, u għandhom ikunu kulturalment kompetenti u jikkunsidraw b’mod sistematiku l-impatti skont il-ġeneru u l-vulnerabbiltajiet intersezzjonali;

24.Jappella għal approċċ komprensiv, iċċentrat fuq il-vittmi u intersezzjonali lejn il-protezzjoni u l-appoġġ għall-persuni fil-mira tar-repressjoni tranżnazzjonali, li jikkombina miżuri ta’ protezzjoni immedjati u fit-tul, u appoġġ imfassal apposta għall-persuni f’riskju ogħla; jistieden, f’dan il-kuntest, lill-Kummissjoni u lill-Istati Membri jadottaw miżuri ta’ protezzjoni sensittivi għall-ġeneru għan-nisa u għall-komunitajiet LGBTIQ+ affettwati mir-repressjoni tranżnazzjonali;

25.Jenfasizza l-ħtiġijiet ta’ prevenzjoni, protezzjoni, stabbilizzazzjoni, obbligu ta’ rendikont u deterrenza, u l-ħtieġa li jiġu indirizzati l-lakuni eżistenti fil-protezzjoni, inkluż l-aċċess għall-assistenza legali u amministrattiva, u l-appoġġ psikosoċjali; jisħaq ukoll fuq il-ħtieġa li jiġu żviluppati kapaċitajiet ta’ rispons rapidu fi ħdan l-awtoritajiet kompetenti;

26.Jenfasizza l-konsegwenzi psikoloġiċi, soċjali u ta’ sigurtà serji tar-repressjoni tranżnazzjonali għall-vittmi u l-familji tagħhom; jistieden lill-Istati Membri jirrikonoxxu l-ħsara psikosoċjali bħala karatteristika integrali tar-repressjoni tranżnazzjonali u jiżguraw aċċess għal appoġġ ta’ saħħa mentali multilingwi u infurmat dwar it-trawma; ifakkar, f’dak ir-rigward, fil-konsegwenzi u l-piż psikoloġiku kkaġunati minn kawżi strateġiċi kontra l-parteċipazzjoni pubblika (SLAPPs) fuq il-ġurnalisti jew il-pressjoni legali fuq l-akkademiċi;

27.Jistieden lill-Istati Membri jirrikonoxxu l-abbuż tas-sistemi legali bħala forma ta’ repressjoni tranżnazzjonali u jiżguraw li l-vittmi tar-repressjoni tranżnazzjonali jkollhom aċċess għal assistenza legali speċjalizzata, kif ukoll għal rimedji u riparazzjonijiet effettivi, proporzjonati u infurzabbli, inkluż li l-awturi jikkumpensaw u jirrimborżaw l-ispejjeż legali li jirriżultaw minn proċedimenti abbużivi jew vessatorji;

28.Jistieden lill-Istati Membri jipprovdu appoġġ immirat li jippermetti lill-persuni fil-mira tar-repressjoni tranżnazzjonali jkomplu għaddejjin bl-attivitajiet professjonali u ċiviċi tagħhom, u jiżguraw protezzjoni effettiva u f’waqtha għal dawk li jagħżlu li jiddokumentaw jew jirrappurtaw l-abbużi pubblikament; jilqa’, f’dan ir-rigward, id-Direttiva tal-UE kontra s-SLAPPs Id-Direttiva (UE) 2024/1069 tal-Parlament Ewropew u tal-Kunsill tal-11 ta’ April 2024 dwar il-protezzjoni ta’ persuni li jinvolvu ruħhom f’parteċipazzjoni pubblika minn talbiet manifestament infondati jew proċedimenti tal-qorti abbużivi (“Kawżi strateġiċi kontra l-parteċipazzjoni pubblika”) (ĠU L, 2024/1069, 16.4.2024, ELI: http://data.europa.eu/eli/dir/2024/1069/oj).; huwa tal-fehma li għandhom jittieħdu miżuri simili biex il-libertà akkademika tiġi protetta minn pressjoni esterna;

29.Jistieden lill-awtoritajiet tal-infurzar tal-liġi u tas-sigurtà jistabbilixxu kuntatti sostnuti u kanali ta’ komunikazzjoni fdati mal-komunitajiet affettwati mir-repressjoni tranżnazzjonali u l-istrutturi ta’ kollegament komunitarji, sabiex titqajjem kuxjenza, jiġi ffaċilitat ir-rappurtar sikur u jittejjeb il-fehim tax-xejriet jevolvu tar-repressjoni tranżnazzjonali, inkluża mġiba li tibqa’ taħt il-limiti kriminali;

30.Jistieden lill-UE u lill-Istati Membri tagħha jirrikonoxxu u jappoġġjaw lill-individwi u lill-komunitajiet affettwati bħala fornituri ewlenin tal-ewwel rispons; jirrikonoxxi r-rwol tal-ġurnalisti eżiljati bħala alleati ewlenin fil-ġlieda kontra l-propaganda awtoritarja u kontra l-manipulazzjoni tal-informazzjoni u l-indħil minn barranin; jistieden lill-Kummissjoni toperazzjonalizza l-Istrateġija tal-UE għas-Soċjetà Ċivili, u jinkoraġġixxi kooperazzjoni u kondiviżjoni ta’ informazzjoni aħjar bejn is-soċjetà ċivili u l-istituzzjonijiet tal-UE u l-Istati Membri;

31.Jistieden lis-SEAE jaġġorna l-pjan ta’ azzjoni tal-UE dwar id-drittijiet tal-bniedem u d-demokrazija u l-Linji Gwida tal-UE dwar id-Difensuri tad-Drittijiet tal-Bniedem biex jindirizzaw ir-repressjoni tranżnazzjonali b’mod espliċitu, inklużi l-protezzjoni u l-appoġġ għad-difensuri tad-drittijiet tal-bniedem fl-eżilju u l-komunitajiet tad-dijaspora;

32.Jistieden lill-Kummissjoni u lill-Istati Membri jiżguraw finanzjament prevedibbli għal tali appoġġ għall-vittmi, inkluż fl-ambitu tal-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali – Ewropa Globali (NDICI), il-Programm dwar iċ-Ċittadini, l-Ugwaljanza, id-Drittijiet u l-Valuri (CERV) u Orizzont Ewropa;

33.Jistieden lill-Istati Membri u lill-Kummissjoni jiżviluppaw mekkaniżmi ġodda jew jadattaw dawk eżistenti biex jindirizzaw in-natura transfruntiera tar-repressjoni tranżnazzjonali fiżika, inklużi s-sorveljanza, il-koerċizzjoni, l-attakki, u t-tentattivi ta’ ħtif, biex jiżguraw li tali atti jiġu identifikati, investigati u ttrattati b’mod sistematiku bħala repressjoni marbuta mal-Istat aktar milli bħala reati kriminali iżolati;

34.Jistieden lill-UE u lill-Istati Membri tagħha jirrikonoxxu, jipprevjenu u jiġġieldu l-forom diġitali tar-repressjoni tranżnazzjonali bħaċ-ċensura, id-diżinformazzjoni, il-kampanji ta’ malafama, u l-fastidju u l-intimidazzjoni online, aġevolati minn mekkaniżmi ffaċilitati mill-pjattaformi online, fosthom sistemi ta’ rakkomandazzjoni bbażati fuq l-involviment, kontijiet foloz u networks tal-bots; jisħaq fuq il-ħtieġa li tiġi rikonoxxuta l-isfida speċifika tar-repressjoni tranżnazzjonali diġitali abbażi tal-ġeneru u l-konsegwenzi partikolari ta’ repressjoni ta’ dan it-tip għan-nisa fil-mira tar-repressjoni tranżnazzjonali; jistieden lill-Kummissjoni u lill-Istati Membri jqisu r-repressjoni tranżnazzjonali fl-infurzar tal-qafas eżistenti tal-leġiżlazzjoni rilevanti tal-UE, inkluż l-Att dwar is-Servizzi Diġitali, l-Att dwar l-IA Ir-Regolament (UE) 2024/1689 tal-Parlament Ewropew u tal-Kunsill tat-13 ta’ Ġunju 2024 li jistabbilixxi regoli armonizzati dwar l-intelliġenza artifiċjali u li jemenda r-Regolamenti (KE) Nru 300/2008, (UE) Nru 167/2013, (UE) Nru 168/2013, (UE) 2018/858, (UE) 2018/1139 u (UE) 2019/2144 u d-Direttivi 2014/90/UE, (UE) 2016/797 u (UE) 2020/1828 (l-Att dwar l-Intelliġenza Artifiċjali) (ĠU L, 2024/1689, 12.7.2024, ELI: http://data.europa.eu/eli/reg/2024/1689/oj)., u r-Regolament dwar l-Użu Doppju Ir-Regolament (UE) 2021/821 tal-Parlament Ewropew u tal-Kunsill tal-20 ta’ Mejju 2021 li jistabbilixxi reġim tal-Unjoni għall-kontroll tal-esportazzjonijiet, is-senserija, l-assistenza teknika, it-transitu u t-trasferiment ta’ oġġetti b’użu doppju (ĠU L 206, 11.6.2021, p. 1, ELI: http://data.europa.eu/eli/reg/2021/821/oj)., biex jiżguraw infurzar robust, kontrolli stretti tal-esportazzjoni, u mekkaniżmi ta’ obbligu ta’ rendikont;

35.Iħeġġeġ lill-pjattaformi diġitali jieħdu azzjoni effettiva biex jimmitigaw u jindirizzaw it-theddid tar-repressjoni tranżnazzjonali diġitali; jistieden lill-Kummissjoni tivvaluta jekk ir-repressjoni tranżnazzjonali diġitali tissodisfax il-kriterji biex tiġi inkluża fl-attivitajiet li għandhom effetti negattivi fuq id-“drittijiet fundamentali” kif definiti mill-Att dwar is-Servizzi Diġitali; jistieden lill-Kummissjoni tagħti attenzjoni partikolari lill-impatt tar-repressjoni tranżnazzjonali fir-reviżjonijiet li ġejjin tal-linji gwida relatati mal-miżuri ta’ valutazzjoni tar-riskju u ta’ mitigazzjoni applikabbli għall-pjattaformi online kbar ħafna, inkluż billi tinvestiga r-riskji sistemiċi maħluqa minn pjattaformi bħal WeChat u TikTok;

36.Jesprimi tħassib serju dwar l-użu tal-IA minn pajjiżi mhux tal-UE u mill-intermedjarji tagħhom bħala għodda tar-repressjoni tranżnazzjonali, inkluż permezz ta’ sorveljanza diġitali ffaċilitata mill-IA, l-użu ta’ software ta’ spjunaġġ, attakki ta’ phishing u hacking, doxxing, fastidju online awtomatizzat u kampanji kkoordinati ta’ diżinformazzjoni fuq il-media soċjali; jistieden lill-Uffiċċju għall-IA tal-Kummissjoni jkompli jivvaluta l-impatt tal-IA fuq ir-repressjoni tranżnazzjonali u jipproponi salvagwardji konkreti biex jipprevjeni l-użu ħażin tas-sistemi tal-IA b’modi li jippermettu s-sorveljanza, il-koerċizzjoni jew ir-repressjoni bejn il-fruntieri;

37.Jenfasizza li d-dritt għal komunikazzjoni sigura u privata huwa fundamentali; jikkundanna bil-qawwa l-użu ta’ software ta’ spjunaġġ u ta’ teknoloġiji ta’ sorveljanza minn pajjiżi mhux tal-UE u l-intermedjarji tagħhom kontra individwi fl-UE; jinnota bi tħassib każijiet dokumentati li jinvolvu kumpaniji privati li jiżviluppaw u jesportaw software ta’ spjunaġġ avvanzat u għodod ta’ sorveljanza diġitali użati biex titwettaq ir-repressjoni tranżnazzjonali;

38.Ifakkar fir-rapport tal-Kumitat PEGA tiegħu (Kumitat ta’ Inkjesta biex Jinvestiga l-Użu tal-Pegasus u ta’ Software ta’ Spjunaġġ għas-Sorveljanza Ekwivalenti), li kien fih rakkomandazzjonijiet dwar il-ġlieda kontra l-użu illegali ta’ software ta’ spjunaġġ, b’mod partikolari software ta’ spjunaġġ intrużiv; jiddeplora li l-Kummissjoni, sal-ġurnata tal-lum, għadha ma ħaditx ir-rakkomandazzjonijiet inkonsiderazzjoni, minkejja li l-problemi jippersistu; jistieden, f’dak il-kuntest, lill-Istati Membri u lill-Kummissjoni jimplimentaw ir-rakkomandazzjonijiet tal-Kumitat PEGA tal-Parlament, u jsaħħu s-salvagwardji kontra l-proliferazzjoni u l-abbuż ta’ software ta’ spjunaġġ, u jiġġieldu n-nuqqasijiet fil-leġiżlazzjoni nazzjonali permezz ta’ infurzar aħjar tal-leġiżlazzjoni tal-UE bħad-Direttiva dwar il-Ġlieda Kontra l-Ħasil tal-Flus Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE (ĠU L 141, 5.6.2015, p. 73, ELI: http://data.europa.eu/eli/dir/2015/849/oj)., ir-regoli dwar l-akkwist, u r-Regolament dwar l-Użu Doppju; jistieden lill-UE u lill-Istati Membri jiżguraw sorveljanza stretta tas-swieq tas-software ta’ spjunaġġ u mekkaniżmi effettivi ta’ obbligu ta’ rendikont u l-kriminalizzazzjoni tal-ġbir illegali ta’ data mwettaq f’isem Stati barranin bi ksur tad-dritt tal-UE;

39.Jitlob li l-kumpaniji tat-teknoloġija u atturi privati oħra jinżammu responsabbli meta jiffaċilitaw ir-repressjoni tranżnazzjonali, inkluż billi jonqsu milli jimmitigaw ir-riskji għad-drittijiet fundamentali tal-individwi li jirrisjedu fl-UE, b’mod partikolari fir-rigward tal-użu ta’ dawn l-apps għal sorveljanza sponsorjata mill-Istat, iċ-ċensura tad-diskors politiku, u l-faċilitazzjoni tar-repressjoni tranżnazzjonali kontra l-komunitajiet tad-dijaspora; jistieden lill-Kummissjoni u lill-Istati Membri jiżguraw li l-pjattaformi online kbar ħafna u l-magni tat-tiftix japplikaw moderazzjoni tal-kontenut ibbażata fuq id-drittijiet tal-bniedem; jistieden lil dawn il-pjattaformi jistabbilixxu mekkaniżmi ta’ rispons rapidu għall-individwi f’riskju, inklużi kanali ta’ rappurtar prijoritarji, rieżami mill-bniedem f’waqtu, salvagwardji kontra t-tneħħija arbitrarja tal-kontenut, u risponsi effettivi għad-doxxing, ħtif ta’ kontijiet u fastidju online kkoordinat;

40.Jirrikonoxxi r-rappreżalji kontra l-membri tal-familja ta’ individwi eżiljati, kemm jekk iseħħu fl-UE kif ukoll f’pajjiżi mhux tal-UE, bħala forma distinta u serja ta’ repressjoni tranżnazzjonali; jitlob li l-intimidazzjoni mmirata lejn il-familja, id-detenzjoni, il-konfiska tal-proprjetà, il-projbizzjonijiet fuq l-ivvjaġġar u prattiki simili jiġu indirizzati b’mod sistematiku fi ħdan l-oqfsa ta’ monitoraġġ, sanzjonijiet u rispons diplomatiku tal-UE;

41.Jisħaq li r-riunifikazzjoni tal-familja u perkorsi protettivi oħra jnaqqsu l-esponiment għall-koerċizzjoni bi prokura;

42.Jistieden lill-Kummissjoni u lill-Istati Membri jidentifikaw, jivvalutaw u jimmitigaw il-vulnerabbiltajiet strutturali fis-sistemi amministrattivi, legali u finanzjarji nazzjonali u tal-UE li jistgħu jiġu sfruttati għar-repressjoni tranżnazzjonali, inkluż fis-servizzi konsulari;

43.Jinkoraġġixxi lill-istituzzjonijiet tal-UE u lill-Istati Membri jieħdu miżuri biex jevitaw ir-riskju li l-istrutturi tagħhom jiġu abbużati mill-awturi tar-repressjoni tranżnazzjonali, li jistgħu jinkludu l-introduzzjoni ta’ salvagwardji konxji mir-riskju, proċeduri alternattivi fejn meħtieġ, u sorveljanza msaħħa tal-infrastruttura legali, amministrattiva u finanzjarja, inklużi valutazzjonijiet tal-impatt fuq id-drittijiet fundamentali, skemi ta’ residenza b’investiment u oqfsa kontra l-ħasil tal-flus, sabiex jiġi evitat l-użu ħażin mill-awturi u jiġi żgurat l-obbligu ta’ rendikont;

44.Iħeġġeġ lill-Istati Membri jivverifikaw b’mod rigoruż – u fejn xieraq jirrevokaw – permessi ta’ residenza marbuta mal-investiment u arranġamenti simili ta’ “viżi tad-deheb” għal persuni marbuta b’mod kredibbli ma’ reġimi jew networks magħrufa li jinvolvu ruħhom fir-repressjoni tranżnazzjonali, sabiex jimpedixxu lill-awturi u lill-faċilitaturi milli jiksbu drittijiet ta’ residenza tal-UE li jaġevolaw l-attività illeċita;

45.Jistieden lill-Istati Membri jibqgħu viġilanti u jiċħdu, jiddokumentaw u jirrappurtaw talbiet informali, koerċittivi jew ekstralegali minn awtoritajiet barranin biex jissorveljaw, jarrestaw, jirrestrinġu, jintimidaw jew jestradixxu lil persuni eżiljati jew lil membri tal-komunitajiet tad-dijaspora, inkluż meta tali talbiet jintbagħtu permezz ta’ mezzi diplomatiċi; jappella, f’dan il-kuntest, għal skrutinju msaħħaħ– li jinvolvi persuni f’riskju ta’ repressjoni tranżnazzjonali; jistieden ukoll lill-Istati Membri jżommu lura milli jestradixxu lill-vittmi jew lill-vittmi potenzjali tar-repressjoni tranżnazzjonali u jiżguraw il-protezzjoni tagħhom fl-UE;

46.Jistieden lill-Istati Membri jiżguraw li l-awtoritajiet tal-infurzar tal-liġi, l-awtoritajiet ġudizzjarji u awtoritajiet rilevanti oħra li jirċievu d-data tal-Interpol u li jimplimentaw ftehimiet ta’ kooperazzjoni bilaterali ma’ pajjiżi suspettati b’repressjoni tranżnazzjonali jkunu mħarrġa kif xieraq biex jidentifikaw u jivvalutaw ir-riskji ta’ abbuż;

47.Jisħaq li, biex jiġi indirizzat ir-rikors abbużiv għall-Interpol, jeħtieġ li jiġi affermat fil-liġi nazzjonali u fil-gwida operazzjonali li l-avviżi u d-diffużjonijiet tal-Interpol mhumiex soġġetti għall-istess skrutinju bħall-mandati ta’ arrest qabel ma jinħarġu u ma għandhomx jiġu ttrattati bħala ekwivalenti għall-mandati ta’ arrest; jisħaq li l-kundizzjonijiet u l-valutazzjonijiet għall-miżuri korrettivi tal-Interpol għandhom jiġu rieżaminati fil-kuntest tal-ġlieda kontra r-repressjoni tranżnazzjonali;

48.Jistieden lill-Kummissjoni tistabbilixxi mekkaniżmu ta’ appell fil-livell tal-UE għall-avviżi ħomor abbużivi tal-Interpol, tikkunsidra li tissospendi l-kooperazzjoni f’każijiet fejn jeżisti tħassib dwar proċess dovut jew jintużaw verdetti in absentia, u żżomm ir-rikonoxximent jew l-assistenza għal talbiet li joriġinaw minn Stati awturi sakemm terġa’ tiġi stabbilita l-indipendenza ġudizzjarja;

49.Jistieden lill-Istati Membri jinsistu fi ħdan l-Interpol biex, kull sena, tiġi ppubblikata statistika dettaljata għal kull tip ta’ avviż u diffużjoni, imqassma skont l-Istat emittenti u li tindika l-għadd u r-raġunijiet għall-approvazzjonijiet, iċ-ċaħdiet u s-soppressjonijiet;

50.Jitlob li jiġu stabbiliti riformi u riżorsi adegwati biex jiġu pprovduti soluzzjonijiet fit-tul li jipprevjenu avviżi ħomor u ordnijiet ta’ diffużjoni għall-arrest li jkunu politikament motivati, inkluż l-iffissar ta’ parametri referenzjarji li jipprevjenu l-użu ħażin tas-sistema tal-avviżi tal-Interpol u skrutinju msaħħaħ tal-gvernijiet b’rekord batut f’termini ta’ drittijiet tal-bniedem jew ta’ repressjoni tranżnazzjonali;

51.Jistieden lir-regolaturi finanzjarji tal-UE u lill-awtoritajiet superviżorji rilevanti jirrikonoxxu li l-konformità mal-oqfsa tal-AML/CFT u taċ-ċibersigurtà tal-FATF tista’ tintuża ħażin bħala għodda għar-repressjoni tranżnazzjonali biex jitqiegħdu fil-mira s-soċjetà ċivili u d-donaturi tagħhom, il-ġurnalisti u l-komunitajiet tad-dijaspora, in-nies tan-negozju u l-entitajiet u s-soċji tagħhom, kif ukoll individwi partikolari; jistieden lill-awtoritajiet tal-infurzar tal-liġi u lill-ġudikaturi tal-Istati Membri jikkooperaw mar-regolaturi finanzjarji biex jgħinu ħalli jipprevjenu u jindirizzaw l-abbużi tas-sistemi finanzjarji u tal-bażijiet tad-data tal-ivvjaġġar użati biex jiffaċilitaw ir-repressjoni tranżnazzjonali;

52.Jistieden lir-regolaturi finanzjarji tal-UE, inkluża l-AMLA, jiżviluppaw salvagwardji biex jipprevjenu tali manipulazzjoni, inklużi verifiki ta’ ffriżar minn qabel, u miżuri xierqa ta’ skrinjar u ta’ protezzjoni tad-data;

53.Jistieden lir-regolaturi finanzjarji tal-UE jiżviluppaw mekkaniżmi ta’ dritt għall-kumpens iċċentrati fuq il-vittmi biex jirrimedjaw il-manipulazzjoni finanzjarja u l-ħsara fit-tul, inklużi mekkaniżmi ta’ korrezzjoni pubblika; jappella għal aktar koordinazzjoni bejn ir-regolaturi finanzjarji, l-entitajiet u l-awtoritajiet superviżorji rilevanti mal-korpi rilevanti tal-UE li jindirizzaw ir-repressjoni tranżnazzjonali;

54.Jistieden lill-Kummissjoni u lill-Istati Membri jistabbilixxu mekkaniżmi li jiżguraw li l-individwi li jinsabu f’riskju kredibbli ta’ repressjoni tranżnazzjonali jkollhom aċċess garantit għal servizzi bankarji bażiċi, kif ukoll mekkaniżmi ta’ likwidità jew ta’ kontinwità finanzjarja ta’ emerġenza f’każ li r-repressjoni tirriżulta fl-iffriżar f’daqqa tal-assi;

55.Jistieden lill-Unitajiet tal-Intelligence Finanzjarja jidentifikaw u janalizzaw b’mod sistematiku x-xejriet finanzjarji marbuta mar-repressjoni tranżnazzjonali u jirrappurtaw is-sejbiet rilevanti liċ-ċentri ta’ koordinazzjoni tar-repressjoni tranżnazzjonali fil-livell nazzjonali u tal-UE;

56.Jistieden lill-Istati Membri jiżguraw taħriġ speċjalizzat għall-awtoritajiet tal-infurzar tal-liġi, ġudizzjarji, finanzjarji u taċ-ċibersigurtà dwar l-identifikazzjoni ta’ xejriet finanzjarji marbuta mar-repressjoni tranżnazzjonali, inkluż l-użu ħażin tal-istrumenti tal-FATF u tal-Interpol u tal-għodod tal-bażi tad-data tal-ivvjaġġar;

57.Jistieden lill-Istati Membri jipprovdu gwida lill-istituzzjonijiet finanzjarji, jiżguraw li r-regolaturi finanzjarji nazzjonali tagħhom ikollhom il-mandat li jikkondividu d-data disponibbli għalihom mal-awtoritajiet tal-infurzar tal-liġi u mal-ġudikaturi, u jistabbilixxu mekkaniżmu nazzjonali effettiv għall-ilmenti u r-rieżami;

58.Jenfasizza ċ-ċaħda tas-servizzi konsulari bħala forma ta’ repressjoni tranżnazzjonali li tista’ tkun marbuta mal-intimidazzjoni, mas-sorveljanza jew mal-koerċizzjoni; jikkundanna l-użu tal-kontrolli tal-mobbiltà mill-Istati awturi, inklużi r-revoka tal-passaporti, iċ-ċaħda tas-servizzi konsulari u restrizzjonijiet oħra fuq il-moviment;

59.Jistieden lill-Kummissjoni toħroġ linji gwida uffiċjali dwar il-ġlieda kontra l-koerċizzjoni konsulari, li jiżguraw li l-persuni fil-mira tar-repressjoni tranżnazzjonali ma jkollhomx bżonn iżuru l-ambaxxati jew il-konsulati nazzjonali tagħhom barra mill-pajjiż;

60.Jistieden lill-Istati Membri jiżguraw li ċ-ċirkostanzi individwali tal-applikanti li huma vittmi tar-repressjoni tranżnazzjonali jiġu indirizzati kif xieraq; jistieden lill-Istati Membri u lill-pajjiżi l-oħra taż-żona Schengen jużaw il-Kodiċi u l-Manwal tal-UE dwar il-Viżi b’mod konsistenti u flessibbli biex jindirizzaw il-ħtiġijiet ta’ protezzjoni għall-persuni fil-mira tar-repressjoni tranżnazzjonali;

61.Jisħaq fuq il-ħtieġa li tiżdied l-ispiża tar-repressjoni tranżnazzjonali u li tissaħħaħ id-deterrenza, inkluż permezz ta’ investigazzjoni u prosekuzzjoni effettivi tal-awturi u l-tal-faċilitaturi; jistieden lill-Istati Membri jistabbilixxu responsabbiltà legali ċara għall-individwi u l-entitajiet li konxjament jiffaċilitaw atti ta’ repressjoni tranżnazzjonali jew japprofittaw minn tali atti f’isem Stati barranin; jappella, barra minn hekk, għall-implimentazzjoni effettiva tal-obbligi ta’ diliġenza dovuta korporattiva fil-qasam tad-drittijiet tal-bniedem, inkluż skont id-Direttiva dwar id-diliġenza dovuta tas-sostenibbiltà korporattiva; jemmen li miżura adegwata għall-ġlieda kontra l-fenomenu dejjem jikber tar-repressjoni tranżnazzjonali mwettqa minn reġimi awtoritarji fil-konfront ta’ individwi li jirrisjedu fl-UE hija billi jintwera li l-UE tista’ tkun forza deterrenti; iħeġġeġ, għalhekk, lill-UE tkompli żżid il-kapaċitajiet ta’ difiża tagħha stess u tnaqqas id-dipendenzi;

62.Jistieden lill-Istati Membri jsaħħu l-miżuri preventivi u ta’ obbligu ta’ rendikont, inkluż billi jivverrifikaw lid-diplomatiċi, lill-persunal uffiċjali tal-pajjiżi involuti, lill-interpreti, lir-rappreżentanti tal-lobbisti u lil atturi rilevanti oħra għall-involviment fir-repressjoni tranżnazzjonali qabel jakkreditawhom, u jimponu miżuri xierqa – inklużi t-tkeċċijiet, il-projbizzjonijiet fuq id-dħul jew is-sospensjoni tal-akkreditazzjoni – kontra individwi responsabbli għal tali atti; jistieden ukoll lill-Istati Membri jikkondividu informazzjoni rilevanti mal-pajjiżi sħab biex jipprevjenu l-akkreditazzjoni mill-ġdid jew l-abbuż kontinwu; jesprimi l-ħtieġa li jiġu rikonoxxuti r-riskji maħluqa mill-infiltrazzjoni tar-repressjoni tranżnazzjonali fost il-gruppi tal-oppożizzjoni demokratika barra mill-pajjiż u li jittieħdu miżuri kollettivi koordinati għall-prevenzjoni ta’ tali attivitajiet u għall-ġlieda kontrihom;

63.Jistieden lill-UE u lill-Istati Membri tagħha jimmonitorjaw l-użu abbużiv ta’ mekkaniżmi ġudizzjarji jew tal-infurzar tal-liġi mill-Istat awtur jew minn atturi marbuta miegħu; jistieden lill-UE u lill-Istati Membri tagħha biex, fuq evidenza suffiċjenti, jikkunsidraw li jimponu miżuri kawtelatorji fuq tali Stati;

64.Jistieden lill-Istati Membri jiżguraw li l-oqfsa legali tagħhom jipprojbixxu l-indħil fid-drittijiet protetti skont il-Konvenzjoni Ewropea dwar id-Drittijiet tal-Bniedem, inkluż meta tali azzjonijiet jitwettqu f’isem setgħa barranija, u li dan l-involviment jitqies bħala fattur aggravanti fl-għoti ta’ sentenzi għal reati relatati;

65.Jistieden lill-Kunsill jeżamina l-possibbiltà li r-repressjoni tranżnazzjonali tiġi identifikata fil-qasam tal-kriminalità gravi ta’ dimensjoni transfruntiera f’konformità mal-Artikolu 83 tat-Trattat dwar il-Funzjonament tal-Unjoni Ewropea, bil-ħsieb li jiġu stabbiliti regoli komuni tal-UE dwar id-definizzjonijiet u s-sanzjonijiet fejn xieraq; jistieden lill-Kummissjoni tibda leġiżlazzjoni biex tarmonizza l-projbizzjoni ta’ attivitajiet ta’ sorveljanza barranija fl-UE, b’mod partikolari dawk l-attivitajiet li jaqgħu taħt ir-repressjoni tranżnazzjonali;

66.Jistieden lill-awtoritajiet tal-infurzar tal-liġi u lill-ġudikaturi jwettqu investigazzjoni u prosekuzzjoni fir-rigward ta’ atti ta’ repressjoni tranżnazzjonali li jammontaw għal delitti kontra l-umanità skont l-Istatut ta’ Ruma;

67.Jistieden lill-Istati Membri, f’kooperazzjoni mal-Kummissjoni u s-SEAE, jintegraw ir-riskji tar-repressjoni tranżnazzjonali fl-informazzjoni dwar l-ivvjaġġar u l-gwida konsulari tal-UE, inkluż permezz ta’ konsulenti tal-ivvjaġġar immirati għal pajjiżi fejn evidenza kredibbli tindika li l-awtoritajiet tal-Istat jew intermedjarji tiegħu huma involuti fir-repressjoni tranżnazzjonali;

68.Jistieden lill-Kummissjoni u lis-SEAE jiżguraw li l-individwi u l-entitajiet involuti fir-repressjoni tranżnazzjonali jiġu kkunsidrati b’mod sistematiku għall-elenkar fl-ambitu tar-reġim globali ta’ sanzjonijiet tal-UE b’rabta mad-drittijiet tal-bniedem (l-Att Magnitsky tal-UE), u jinkludu b’mod espliċitu r-repressjoni tranżnazzjonali bħala bażi għad-deżinjazzjoni fl-ambitu tar-reġim ta’ sanzjonijiet tal-UE li jmiss dwar il-kriminalità organizzata tranżnazzjonali;

69.Jistieden lill-Kummissjoni u lill-Istati Membri jżidu l-investiment f’investigazzjonijiet forensiċi, finanzjarji u diġitali relatati mar-repressjoni tranżnazzjonali biex jidentifikaw, jattribwixxu u jiddokumentaw ir-repressjoni tranżnazzjonali, u jappoġġjaw il-proċedimenti legali mressqa mill-vittmi;

70.Jistieden lill-Istati Membri jagħtu prijorità lill-investigazzjoni u liż-żarmar tan-networks tar-repressjoni tranżnazzjonali, inklużi l-atturi intermedjarji u r-rabtiet mal-kriminalità organizzata, permezz ta’ koordinazzjoni msaħħa bejn l-awtoritajiet tas-sigurtà u dawk ġudizzjarji u finanzjarji;

71.Jistieden lill-Kummissjoni u lis-SEAE jintegraw b’mod sistematiku l-ġlieda kontra r-repressjoni tranżnazzjonali fl-azzjoni esterna tal-UE, inklużi d-djalogi politiċi u d-djalogi dwar id-drittijiet tal-bniedem, l-involviment mal-pajjiżi mhux tal-UE u mal-pajjiżi kandidati, u d-diplomazija pubblika, u jqajmu tħassib pubblikament; jistieden lill-Kummissjoni u lis-SEAE biex, fil-ftehimiet internazzjonali u fl-oqfsa ta’ kooperazzjoni, jinkludu kundizzjonijiet li jipprevjenu l-abbuż ta’ ftehimiet ta’ kooperazzjoni multilaterali u bilaterali f’materji kriminali għal finijiet ta’ repressjoni tranżnazzjonali, inkluża l-possibbiltà ta’ sospensjoni;

72.Jistieden lill-UE u lill-Istati Membri tagħha jqajmu każijiet ta’ repressjoni tranżnazzjonali, inkluża l-koerċizzjoni bi prokura u r-repressjoni bbażata fuq il-familja, fir-relazzjonijiet bilaterali mal-Istati awturi u jitolbu l-waqfien ta’ tali prattiki;

73.Jistieden lill-Kummissjoni u lis-SEAE jsaħħu l-komunikazzjoni strateġika dwar ir-repressjoni tranżnazzjonali, filwaqt li jirrikonoxxuha b’mod espliċitu bħala theddida globali, jikkundannaw lill-awturi bil-qawwa u jindikaw l-appoġġ tal-UE għall-individwi fil-mira;

74.Jistieden lis-SEAE jinkludi r-repressjoni tranżnazzjonali b’mod espliċitu fil-mandat tar-Rappreżentant Speċjali tal-UE għad-Drittijiet tal-Bniedem u jiżgura li din tiġi indirizzata fir-rappurtar tal-UE dwar id-drittijiet tal-bniedem;

75.Jistieden lill-Kummissjoni u lis-SEAE jikkunsidraw b’mod sistematiku r-riskji tar-repressjoni tranżnazzjonali huma u jħejju ftehimiet ta’ finanzjament, kooperazzjoni u sħubija ma’ pajjiżi mhux tal-UE;

76.Jistieden lill-Kummissjoni tinkludi r-repressjoni tranżnazzjonali bħala kategorija fir-rapporti tagħha dwar l-istat tad-dritt u dwar it-tkabbir;

77.Jistieden lill-Kummissjoni tagħmel ir-repressjoni tranżnazzjonali prijorità fl-implimentazzjoni tat-Tarka Ewropea għad-Demokrazija, speċjalment għaċ-Ċentru Ewropew għar-Reżiljenza Demokratika;

78.Jistieden lill-Presidenzi futuri tal-Kunsill jagħtu prijorità lir-repressjoni tranżnazzjonali fuq l-aġenda tal-UE, jiffaċilitaw l-iskambji tal-aħjar prattika fost l-Istati Membri u jaħdmu favur komunikazzjoni tal-Kunsill li tistabbilixxi approċċ koerenti tal-UE għall-ġlieda kontra r-repressjoni tranżnazzjonali;

79.Jilqa’ d-Dikjarazzjoni tal-Mexxejja tal-G7 dwar ir-repressjoni tranżnazzjonali u jistieden lill-Kunsill u lill-Kummissjoni jkomplu jsaħħu l-koordinazzjoni fil-livell tal-G7, tal-Kunsill tal-Ewropa, tal-Organizzazzjoni għas-Sigurtà u l-Kooperazzjoni fl-Ewropa u tan-Nazzjonijiet Uniti, inkluż permezz ta’ impenn sostnut fil-Kunsill tad-Drittijiet tal-Bniedem tan-Nazzjonijiet Uniti, u appoġġ għall-ħidma tal-Uffiċċju tal-Kummissarju Għoli tan-Nazzjonijiet Uniti għad-Drittijiet tal-Bniedem; jitlob, barra minn hekk, li l-prattiki sistematiċi ta’ repressjoni tranżnazzjonali minn Stati awturi jittieħdu inkunsiderazzjoni meta jiġu evalwati l-involviment ta’ dawn il-pajjiżi fil-korpi intergovernattivi u l-inizjattivi ta’ dawn il-pajjiżi fi ħdan tali korpi;

80.Jistieden lill-Istati Membri jippromwovu konvenzjoni tal-Kunsill tal-Ewropa dwar ir-repressjoni tranżnazzjonali;

81.Jemmen bis-sħiħ li l-UE għandha tikkoordina mill-qrib ma’ sħab tal-istess fehma, inkluż permezz ta’ skambji tal-aħjar prattika dwar il-leġiżlazzjoni, il-protezzjoni tal-vittmi, l-attribuzzjoni u s-sanzjonijiet kontra networks ta’ intermedjarji;

82.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà, u lill-gvernijiet u lill-parlamenti tal-Istati Membri.