A.de bhrí, an 24 Samhain 2025, gur chuir an Príomh-Ionchúisitheoir Eorpach iarraidh isteach ar dhíolúine Ilhan Kyuchyuk, Feisire de Pharlaimint na hEorpa a toghadh sa Bhulgáir, a tharscaoileadh, i ndáil le himscrúdú leanúnach ar roinnt cionta coiriúla líomhnaithe a bhaineann le mí-úsáid chistí an Aontais;

B.de bhrí, de réir na hiarrata, gur líomhnaíodh in imscrúdú a rinne an tIonchúisitheoir Tarmligthe Eorpach sa Bhulgáir gur oibrigh cúntóirí áitiúla uile Ilhan Kyuchyuk in oifigí a bhí á mbainistiú ag páirtí polaitiúil náisiúnta, agus gur chlúdaigh an páirtí sin formhór na gcostas a bhain leis an obair agus gur líomhnaíodh nár íoc Ilhan Kyuchyuk ach a dtuarastail; de bhrí go líomhnaítear chomh maith go raibh róil phoiblí ag go leor cúntóirí áitiúla laistigh den pháirtí sin, a bhfuair siad luach saothair ar leithligh ina leith; de bhrí go mbaineann an t-imscrúdú le tréimhse breis is 10 mbliana;

C.de bhrí, de réir na hiarrata, go bhféadfadh na fíorais líomhnaithe a bheith ina gcionta coiriúla de chalaois neamhsholáthair – ráitis/doiciméid bhréagacha/neamhchearta/neamhiomlána – chomh maith le míleithreasú chistí an Aontais agus éilliú, cionta atá inphionóis faoi Airteagal 248a de Chód Coiriúil na Bulgáire; de bhrí go dtagraíonn an iarraidh chomh maith do ‘rannpháirtíocht i ngníomhartha i gcoinne cheannasacht agus shlándáil an Aontais Eorpaigh’;

D.de bhrí gur toghadh Ilhan Kyuchyuk chun Parlaimint na hEorpa sna toghcháin Eorpacha i mBealtaine 2014 agus gur atoghadh é i mBealtaine 2019 agus arís i Meitheamh 2024 agus, mar sin, go raibh sé ina Fheisire de Pharlaimint na hEorpa tráth an chiona líomhnaithe;

E.de bhrí go bhforáiltear in Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh nach bhfuil Feisirí Pharlaimint na hEorpa inchurtha faoi aon saghas fiosrúcháin, coinneála ná imeachtaí dlíthiúla i leith tuairimí a nocht siad nó vótaí a chaith siad ag comhlíonadh a ndualgas dóibh;

F.de bhrí nach ionann na cionta líomhnaithe, agus nach bhfuil baint ag an iarraidh ina dhiaidh sin ar dhíolúine Ilhan Kyuchyuk a tharscaoileadh, le tuairim a thug sé ná le vóta a chaith sé i gcomhlíonadh a dhualgas de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;

G.de bhrí go bhforáiltear le hAirteagal 9, an chéad mhír, pointe (a), de Phrótacal Uimh. 7 ar Phribhléidí agus Díolúintí an Aontais Eorpaigh, le linn sheisiúin Pharlaimint na hEorpa, go dteachtfaidh a Feisirí, i gcríoch a mBallstáit féin, na díolúintí a thugtar do chomhaltaí pharlaimint a mBallstáit féin;

H.de bhrí go bhforáiltear le hAirteagal 70(1) de Bhunreacht Phoblacht na Bulgáire go mbeidh ‘comhalta den Tionól Náisiúnta díolmhaithe ó choimeád nó ó ionchúiseamh coiriúil ach amháin i gcás cion coiriúil a dhéanamh, agus sa chás sin beidh gá le cead ón Tionól Náisiúnta nó, idir a sheisiún, ó Chathaoirleach an Tionóil Náisiúnta.’;

I.de bhrí gurb é is cuspóir don díolúine dá bhforáiltear i bPrótacal Uimh. 7 ar Phribhléidí agus Díolúintí an Aontais Eorpaigh an Pharlaimint agus a Feisirí a chosaint ar imeachtaí dlíthiúla i ndáil le gníomhaíochtaí a dhéantar i gcomhlíonadh dualgas parlaiminteach agus nach féidir a scaradh ó na dualgais sin;

J.de bhrí, i gcomhréir le Riail 5(2) dá Rialacha Nós Imeachta, nach pribhléid phearsanta í díolúine pharlaiminteach d’fheisire, ach gur ráthaíocht í ar neamhspleáchas na Parlaiminte ina hiomláine agus a Feisirí;

K.de bhrí nach féidir le Parlaimint na hEorpa ról cúirte a ghlacadh uirthi féin, agus nach féidir, i nós imeachta um dhíolúine a tharscaoileadh, Feisire a mheas mar chosantóir Breithiúnas ón gCúirt Ghinearálta an 30 Aibreán 2019, Briois v Parlaimint, T-214/18, ECLI:EU:T:2019:266;;

L.de bhrí go bhfuil an Príomh-Ionchúisitheoir Eorpach tar éis an iarraidh ar tharscaoileadh díolúine a chur isteach tar éis don Ionchúisitheoir Tarmligthe Eorpach imscrúdú a dhéanamh sa Bhulgáir; de bhrí gurb eol don phobal gur cuireadh Ionchúisitheoir Eorpach na Bulgáire ar fionraí go sealadach i Márta 2025, go dtí go ndéanfar imscrúdú ar mhí-iompar féideartha, agus de bhrí, i bhFeabhra 2026 gur chinn Coláiste Oifig an Ionchúisitheora Phoiblí Eorpaigh go raibh Ionchúisitheoir Eorpach na Bulgáire ciontach i mí-iompar tromchúiseach; de bhrí, mar atá tugtha faoi deara san iarraidh ar dhíolúine a tharscaoileadh, go bhfuil Ilhan Kyuchyuk ina chomhalta de Ghluaiseacht an pháirtí pholaitiúil Bhulgáraigh um Chearta agus Saoirsí; de bhrí go ndealraíonn sé gur tháinig Ilhan Kyuchyuk faoi ionsaí sa Bhulgáir ag freasúra polaitiúil laistigh den pháirtí sin i ndáil le staid sa pháirtí sin, rud a cháin Ilhan Kyuchyuk go poiblí chomh maith; de bhrí gur cosúil go ndearnadh líomhaintí agus ionsaithe gan bhunús ar Ilhan Kyuchyuk sa Bhulgáir tráth a moladh é chun bheith ina Chathaoirleach ar Choiste um Ghnóthaí Dlíthiúla Pharlaimint na hEorpa; de bhrí gur cosúil gur nochtadh é do sheiceálacha frith-éillithe a bhí thar a bheith díréireach sa Bhulgáir ach nár aimsíodh aon éagóir riamh;

M.de bhrí go gcruthaíonn an t-amhras tromaí a bhaineann leis an iarraidh ar dhíolúine a tharscaoileadh a cuireadh in iúl tar éis an chinnidh go raibh mí-iompar tromaí ann ó Ionchúisitheoir Eorpach na Bulgáire – ar faoina mhaoirseacht a rinneadh an t-imscrúdú ba chúis leis an iarraidh ar tharscaoileadh díolúine – mar aon leis an gcomhthéacs ina ndearnadh í, easpa shuntasach bheachtais na bhfíoras atá faoi imscrúdú agus na cionta coiriúla líomhnaithe mar a chuirtear i láthair san iarraidh iad, a bhfuil tionchar díréireach ar chlú ag gabháil leo, sraith tásc tromaí agus oibiachtúil go bhféadfadh sé gur tionscnaíodh an t-imscrúdú leis an spreagadh chun Ilhan Kyuchyuk a chur i mbaol d’aon ghnó;

N.de bhrí go ndealraíonn sé, mar sin, sa chás seo, gur féidir glacadh leis go bhfuil fumus persecutionis ann, i.e. gurb é an rún is bun leis na himeachtaí dlíthiúla dochar a dhéanamh do ghníomhaíocht pholaitiúil Ilhan Kyuchyuk ina cháil mar Fheisire de Pharlaimint na hEorpa agus, mar sin, do neamhspleáchas na Parlaiminte;