Airteagal 1Leasuithe ar Rialachán (AE) 2021/2115Leasaítear Rialachán (AE) 2021/2115 mar a leanas:(1)in Airteagal 69, cuirtear an pointe seo a leanas leis:

‘(j) tacaíocht d’fheirmeoirí atá thíos leis an méadú mór ar phraghsanna leasacháin mar gheall ar an ngéarchéim sa Mheánoirthear’;

(2)i dTeideal III, Caibidil IV, Roinn 1, cuirtear an tAirteagal seo a leanas leis:

‘Airteagal 78b

Tacaíocht d’fheirmeoirí atá thíos leis an méadú mór ar phraghsanna leasacháin mar gheall ar an ngéarchéim sa Mheánoirthear

1.Féadfaidh na Ballstáit tacaíocht eisceachtúil shealadach a chur ar fáil d’fheirmeoirí gníomhacha a ndéanann an méadú mór ar phraghsanna leasacháin difear dóibh. Beidh aon tacaíocht den sórt sin a sholáthraítear faoi réir na gcoinníollacha a leagtar amach san Airteagal seo agus a shonraíonn na Ballstáit a thuilleadh ina bPleananna Straitéiseacha CBT.

2.Áiritheoidh na Ballstáit go ndíreofar an tacaíocht faoin Airteagal seo ar na feirmeoirí sin is mó atá thíos leis an méadú mór ar phraghsanna leasacháin. Déanfaidh siad amhlaidh trí choinníollacha incháilitheachta a chinneadh ar bhonn na fianaise atá ar fáil.

3.Leis an tacaíocht faoin Airteagal seo, cumhdófar cuid de na costais bhreise a bhaineann le leasacháin arb iad forbairtí sa mhargadh a d’eascair as an ngéarchéim sa Mheánoirthear sa tréimhse dar tús an 1 Márta 2026 is cúis leo. Ríomhfar na costais bhreise mar an difríocht idir praghas ionadaíoch ar leasacháin agus praghas tagarmhairc ar leasacháin. Ar bhonn toimhdí réasúnta, saineoidh na Ballstáit an praghas tagarmhairc bunaithe ar an meánphraghas ar leasacháin thar 3 mhí as a chéile ar a laghad sa tréimhse idir an 1 Eanáir 2025 agus an 28 Feabhra 2026, agus an praghas ionadaíoch bunaithe ar an bpraghas ar leasacháin le linn tréimhse arna cinneadh ag an mBallstát, nach dtosóidh roimh an 1 Márta 2026. Beidh an tacaíocht faoin Airteagal seo i bhfoirm costas aonaid in aghaidh an heicteáir arna ríomh ar bhonn meántomhaltas bliantúil leasachán in aghaidh an limistéir, arna ndifreáil de réir earnálacha nó córas táirgthe. De rogha air sin, féadfaidh na Ballstáit an tacaíocht faoin Airteagal seo a bhunú ar na costais iarbhír a thabhaíonn gach tairbhí, agus úsáid á baint as an bpraghas tagarmhairc céanna a dtugtar tuairisc air sa mhír seo.

4.Bunóidh na Ballstáit na rátaí tacaíochta is infheidhme chun suas le 50 % de na costais bhreise ar leasacháin a chumhdach. Féadfar na rátaí sin a mhéadú suas le huasmhéid 80 % i gcás feirmeoirí atá faoi réir na ngealltanas dá dtagraítear in Airteagail 31 agus 70, nó ceanglais dá dtagraítear in Airteagal 72, chun úsáid leasachán a laghdú. Maidir le hionstraimí airgeadais i bhfoirm caipitil oibre neamhspleách, beidh feidhm ag Airteagal 80(4).

5.Socróidh na Ballstáit uasmhéid tacaíochta in aghaidh an tairbhí nó uaslíon heicteár ar féidir tacaíocht in aghaidh an tairbhí a fháil ina leith.

6.Íocfar an tacaíocht faoin Airteagal seo leis an bhfeirmeoir faoin 30 Meitheamh 2027.

7.Áiritheoidh na Ballstáit go mbeidh rochtain ag feirmeoirí a fhaigheann tacaíocht faoin Airteagal seo ar an eolas agus ar an bhfaisnéis ábhartha chun go mbeidh siad in ann úsáid inbhuanaithe leasachán a bharrfheabhsú.

8.Agus tacaíocht á deonú faoin Airteagal seo, áiritheoidh na Ballstáit go seachnófar róchúiteamh mar thoradh ar an meascán idirghabhála faoin Airteagal seo agus ionstraimí tacaíochta náisiúnta eile nó ionstraimí tacaíochta eile de chuid an Aontais.’;

(3)leasaítear Airteagal 80 mar a leanas:(a)cuirtear an méid seo a leanas in ionad mhír 1:

‘1. Féadfar tacaíocht i bhfoirm ionstraimí airgeadais dá dtagraítear in Airteagal 58 de Rialachán (AE) 2021/1060 a dheonú faoi na cineálacha idirghabhála dá dtagraítear in Airteagail 73 go 78 agus 78b den Rialachán seo.’;

(b)i mír 3, cuirtear an méid seo a leanas in ionad na chéad fhomhíre:

‘3. I gcomhréir le hAirteagal 58(2) de Rialachán (AE) 2021/1060, féadfaidh caipiteal oibre, lena n‑áirítear caipiteal oibre neamhspleách, a bheith ina chaiteachas incháilithe faoi Airteagail 73, 74, 76, 77, 78 agus 78b den Rialachán seo, má rannchuidíonn sé le cuspóir sonrach amháin ar a laghad is ábhartha don idirghabháil a ghnóthú. Féadfar tacaíocht do mhaoiniú caipitil oibre neamhspleách faoi aon cheann de na hAirteagail sin a sholáthar gan a bheith faoi réir an cheanglais go bhfaighidh an faighteoir deiridh tacaíocht do chaiteachas eile faoin Airteagal céanna.’;

(c)cuirtear an méid seo a leanas in ionad mhír 4:

‘4. De mhaolú ar Airteagail 73, 74, 76, 77, 78 agus 78b, ní bheidh feidhm ag na rátaí tacaíochta a leagtar síos sna hAirteagail sin maidir le maoiniú caipitil oibre neamhspleách.’;

(4)in Airteagal 86(3), cuirtear an fhomhír seo a leanas leis:

‘De mhaolú ar an gcéad fhomhír den mhír seo, i gcásanna de chineál idirghabhála de bhun Airteagal 78b, féadfar a fhoráil sa Phlean Straitéiseach CBT go bhféadfar incháilitheacht an chaiteachais arna mhaoiniú ag CETFT a bhaineann le leasuithe ar an bPlean Straitéiseach CBT a thosú roimh an dáta a chuirfear an iarraidh ar leasú faoi bhráid an Choimisiúin ach ní roimh an … [dáta theacht i bhfeidhm an Rialacháin leasaithigh seo].’;

(5)in Airteagal 87(2), cuirtear an méid seo a leanas in ionad na chéad fhomhíre:

‘2 Tugtar de chumhacht don Choimisiún gníomhartha tarmligthe a ghlacadh i gcomhréir le hAirteagal 152 lena leasaítear leithdháiltí na mBallstát arna leagan amach in Iarscríbhinní V agus IX chun na forbairtí a bhaineann le huasmhéid iomlán na n‑íocaíochtaí díreacha a d’fhéadfaí a dheonú a chur san áireamh, lena n‑áirítear na haistrithe dá dtagraítear in Airteagal 17 agus Airteagal 103, coigeartú na leithdháiltí íocaíochtaí díreacha dá dtagraítear in Airteagal 103a, aistrithe na leithdháiltí dá dtagraítear in Airteagal 88(5) agus aon asbhaint atá ag teastáil chun cineálacha idirghabhála a mhaoiniú in earnálacha eile dá dtagraítear in Airteagal 88(6).’;

(6)in Airteagal 91(3), cuirtear an méid seo a leanas in ionad phointe (a):

‘(a) 65 % den chaiteachas poiblí incháilithe le haghaidh íocaíochtaí i leith srianta nádúrtha nó srianta eile a bhaineann go sonrach le limistéar faoi Airteagal 71 agus le haghaidh tacaíocht faoi Airteagal 78b’;

(7)cuirtear an méid seo a leanas in ionad Airteagal 96a:

‘Airteagal 96a

Leithdháiltí airgeadais uasta le haghaidh íocaíochtaí géarchéime le feirmeoirí dá dtagraítear in Airteagal 78a agus tacaíocht d’fheirmeoirí dá dtagraítear in Airteagal 78b

1.An t‑uasmhéid i gcás gach Ballstáit a fhéadfar a fhorchoimeád le haghaidh na n‑íocaíochtaí géarchéime le feirmeoirí tar éis tubaistí nádúrtha, teagmhais dhíobhálacha aeráide nó teagmhais thurraingeacha dá dtagraítear in Airteagal 78a agus le haghaidh tacaíocht d’fheirmeoirí atá thíos leis an méadú mór ar phraghsanna leasacháin mar gheall ar an ngéarchéim sa Mheánoirthear dá dtagraítear in Airteagal 78b, beidh sé teoranta do na méideanna bliantúla a leagtar amach in Iarscríbhinn XV.

2.Féadfar uasmhéid 25 % de na méideanna bliantúla a leagtar amach in Iarscríbhinn XV a fhorchoimeád chun an tacaíocht d’fheirmeoirí dá dtagraítear in Airteagal 78b a mhaoiniú.

3.An caiteachas CETFT iomlán ar na híocaíochtaí géarchéime dá dtagraítear in Airteagal 78a agus ar an tacaíocht dá dtagraítear in Airteagal 78b, ní sháróidh sé suim na leithdháiltí táscacha airgeadais le haghaidh na gcineálacha sin idirghabhála le haghaidh na mblianta airgeadais 2026 agus 2027, mar atá leagtha amach ag na Ballstáit ina bpleananna airgeadais i gcomhréir le hAirteagal 112(2), pointe (a), agus mar atá formheasta ag an gCoimisiún i gcomhréir le hAirteagal 119. Uasteorainn airgeadais arna socrú le dlí an Aontais a bheidh san uasteorainn airgeadais sin.’;

(8)i dTeideal IV, cuirtear an tAirteagal seo a leanas leis:

‘Airteagal 103

Leithdháiltí íocaíochtaí díreacha le haghaidh na bliana féilire 2027

Faoin 31 Lúnasa 2026, féadfaidh na Ballstáit a chinneadh a leithdháiltí le haghaidh íocaíochtaí díreacha a leagtar amach in Iarscríbhinní V agus IX le haghaidh na bliana féilire 2027 a mhéadú nó a laghdú faoi mhéid nach mó ná an t-uasmhéadú nó an t-uaslaghdú a leagtar amach in Iarscríbhinn XVI in aghaidh an Bhallstáit, mar chuid d’iarraidh ar leasú straitéiseach ar a bPleananna Straitéiseacha CBT faoi seach dá dtagraítear in Airteagal 119.’;

(9)in Airteagal 111, cuirtear an méid seo a leanas in ionad an dara mír:

‘Ní bheidh feidhm ag pointe (e) den chéad mhír maidir leis an gcineál idirghabhála in earnáil na beachadóireachta dá dtagraítear in Airteagal 55(1), pointe (a) agus pointí (c) go (g), idirghabhálacha faoin gcineál idirghabhála in earnáil an fhíona dá dtagraítear in Airteagal 58(1), pointí (h) go (k), na gníomhaíochtaí faisnéise agus cur chun cinn le haghaidh scéimeanna cáilíochta faoin gcineál idirghabhála le haghaidh comhair dá dtagraítear in Airteagal 77, idirghabhálacha faoin gcineál idirghabhála le haghaidh íocaíochtaí géarchéime le feirmeoirí tar éis tubaistí nádúrtha, teagmhais dhíobhálacha aeráide nó teagmhais thurraingeacha dá dtagraítear in Airteagal 78a agus idirghabhálacha faoin gcineál idirghabhála le haghaidh tacaíocht d’fheirmeoirí a ndéanann an méadú mór ar phraghsanna leasacháin difear dóibh dá dtagraítear in Airteagal 78b.’;

(10)in Airteagal 112(2), cuirtear an méid seo a leanas in ionad phointe (b):

‘(b) aistrithe na méideanna dá dtagraítear i bpointe (a) idir cineálacha idirghabhála i bhfoirm íocaíochtaí díreacha agus cineálacha idirghabhála le haghaidh forbairt tuaithe i gcomhréir le hAirteagal 103 agus aon asbhaint ó leithdháiltí an Bhallstáit i leith na gcineálacha idirghabhála i bhfoirm íocaíochtaí díreacha chun méideanna a chur ar fáil le haghaidh cineálacha idirghabhála in earnálacha eile dá dtagraítear i dTeideal III, Caibidil III, Roinn 7, i gcomhréir le hAirteagal 88(6), agus aon choigeartuithe ar leithdháiltí íocaíochtaí díreacha i gcomhréir le hAirteagal 103a;’;

(11)leasaítear Airteagal 119 mar a leanas:(a)i mír 2, an chéad fhomhír, cuirtear an méid seo a leanas in ionad phointe (c):

‘(c) leasuithe a bhaineann le hAirteagal 17(5), Airteagal 88(7), Airteagail 92 go 98, Airteagal 103(1), (5) agus (6) nó Airteagal 103a;’;

(b)i mír 7, cuirtear an méid seo a leanas in ionad an dara fomhír:

‘Ní chuirfear iarraidh ar leasú straitéiseach a bhaineann le hAirteagal 17(5), Airteagal 78b, Airteagal 88(7), Airteagal 103(5) nó (6) nó Airteagal 103a san áireamh i leith na teorann a leagtar síos sa chéad fhomhír den mhír seo.’;

(12)in Airteagal 121, an dara fomhír, cuirtear an méid seo a leanas in ionad phointe (b):

‘(b) maidir le leasuithe a bhaineann le hAirteagal 17(5), le hAirteagal 88(7), le hAirteagal 103(5) agus le hAirteagal 103a, an tréimhse chun an gníomh tarmligthe a ghlacadh chun na leithdháiltí a leasú i gcomhréir le hAirteagal 87(2).’;

(13)in Airteagal 146 cuirtear an fhomhír seo a leanas leis:

‘Féadfaidh na Ballstáit maoiniú náisiúnta breise suas le 200 % de mhaoiniú CETFT a leithdháiltear sa Phlean Straitéiseach CBT a sholáthar le haghaidh tacaíochta faoi Airteagal 78b.’;

(14)leasaítear Iarscríbhinní I agus XV i gcomhréir le hIarscríbhinn I a ghabhann leis an Rialachán seo;(15)cuirtear an téacs a leagtar amach in Iarscríbhinn II a ghabhann leis an Rialachán seo leis mar Iarscríbhinn XVI.

Airteagal 2Leasuithe ar Rialachán (AE) 2021/2116Leasaítear Rialachán (AE) 2021/2116 mar a leanas:(1)in Airteagal 21(2), cuirtear an méid seo a leanas in ionad na chéad fhomhíre:

‘2. Déanfar íocaíochtaí míosúla le gach Ballstát ar an tríú lá oibre den dara mí tar éis na míosa ina ndéantar an caiteachas, nó roimhe sin, agus na laghduithe nó fionraíochtaí ag a bhfuil feidhm faoi Airteagail 39 go 42 nó aon cheartúchán eile á gcur san áireamh. Caiteachas arna dhéanamh ag na Ballstáit idir an 1 agus an 15 Deireadh Fómhair, measfar gur i mí Dheireadh Fómhair a rinneadh é. Caiteachas arna dhéanamh idir an 16 agus an 31 Deireadh Fómhair, measfar gur i mí na Samhna a rinneadh é. Caiteachas arna dhéanamh ag na Ballstáit chun réamhíocaíochtaí a íoc roimh an 16 Deireadh Fómhair sa bhliain féilire 2026 de bhun Airteagal 44(2), an dara fomhír, pointe (a), measfar gur i mí na Samhna a rinneadh é agus dearbhófar é sa dearbhú a bhaineann leis an mí sin.’;

(2)cuirtear an méid seo a leanas in ionad Airteagal 35:

‘Airteagal 35

An bhliain airgeadais talmhaíochta

Gan dochar do na forálacha speisialta maidir le dearbhuithe caiteachais agus ioncaim a bhaineann le hidirghabháil phoiblí arna leagan síos ag an gCoimisiún de bhun Airteagal 47(2), an chéad fhomhír, pointe (a), agus maidir le dearbhuithe caiteachais a bhaineann le réamhíocaíochtaí arna n‑íoc roimh an 16 Deireadh Fómhair sa bhliain féilire 2026 de bhun Airteagal 44(2), an dara fomhír, pointe (a), cumhdófar leis an mbliain airgeadais caiteachas arna íoc agus ioncam arna fháil agus arna iontráil ag na gníomhaireachtaí íocaíochta i gcuntais CERT agus CETFT i leith na bliana airgeadais N dar tús an 16 Deireadh Fómhair den bhliain N‑1 agus dar críoch an 15 Deireadh Fómhair den bhliain N.’;

(3)in Airteagal 44(2), an dara fomhír, cuirtear an méid seo a leanas in ionad phointe (a):

‘(a) roimh an 1 Nollaig, ach ní roimh an 16 Deireadh Fómhair, réamhíocaíochtaí suas le 70 % a dhéanamh i leith idirghabhálacha i bhfoirm íocaíochtaí díreacha agus le haghaidh cabhrach i bhfoirm íocaíochtaí díreacha faoi na bearta dá dtagraítear i gCaibidil IV de Rialachán (AE) Uimh. 228/2013 agus i gCaibidil IV de Rialachán (AE) Uimh. 229/2013 agus, i ndáil leis an mbliain éilimh 2026, réamhíocaíochtaí suas le 75 % a dhéanamh i leith na n‑idirghabhálacha agus na cabhrach dá dtagraítear sa phointe seo, lena n-áirítear roimh an 16 Deireadh Fómhair 2026.’.

Airteagal 3Teacht i bhfeidhmTiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.