Artikolu 1Emendi tar-Regolament (UE) 2021/2115Ir-Regolament (UE) 2021/2115 huwa emendat kif ġej:(1)fl-Artikolu 69, jiżdied il-punt li ġej:

“(j) appoġġ lill-bdiewa affettwati miż-żieda qawwija fil-prezzijiet tal-fertilizzanti minħabba l-kriżi tal-Lvant Nofsani.’’;

(2)fit-Titolu III, fil-Kapitolu IV, it-Taqsima 1, jiżdied l-Artikolu li ġej:

“Artikolu 78b

Appoġġ lill-bdiewa affettwati miż-żieda qawwija fil-prezzijiet tal-fertilizzanti minħabba l-kriżi tal-Lvant Nofsani

1.L-Istati Membri jistgħu jipprovdu appoġġ temporanju eċċezzjonali lill-bdiewa attivi li huma affettwati miż-żieda qawwija fil-prezzijiet tal-fertilizzanti. Kwalunkwe appoġġ ipprovdut għandu jkun soġġett għall-kundizzjonijiet stabbiliti f’dan l-Artikolu u speċifikati aktar mill-Istati Membri fil-Pjanijiet Strateġiċi tal-PAK tagħhom.

2.L-Istati Membri għandhom jiżguraw li l-appoġġ skont dan l-Artikolu jkun immirat lejn dawk il-bdiewa li huma l-aktar affettwati miż-żieda qawwija fil-prezzijiet tal-fertilizzanti. Huma għandhom jagħmlu dan billi jiddeterminaw il-kundizzjonijiet tal-eliġibbiltà abbażi tal-evidenza disponibbli.

3.L-appoġġ skont dan l-Artikolu għandu jkopri parti mill-kostijiet addizzjonali tal-fertilizzanti kkawżati mill-iżviluppi tas-suq li jirriżultaw mill-kriżi tal-Lvant Nofsani fil-perjodu li jibda fl-1 ta’ Marzu 2026. Il-kostijiet addizzjonali għandhom jiġu kkalkulati bħala d-differenza bejn prezz rappreżentattiv għall-fertilizzanti u prezz referenzjarju għall-fertilizzanti. L-istati Membri għandhom, abbażi ta’ suppożizzjonijiet raġonevoli, jiddefinixxu l-prezz referenzjarju abbażi tal-prezz medju għall-fertilizzanti matul mill-inqas 3 xhur konsekuttivi fil-perjodu bejn l-1 ta’ Jannar 2025 u t-28 ta’ Frar 2026, u l-prezz rappreżentattiv abbażi tal-prezz għall-fertilizzanti matul perjodu determinat mill-Istat Membru, li ma għandux jibda qabel l-1 ta’ Marzu 2026.L-appoġġ skont dan l-Artikolu għandu jieħu l-forma ta’ kost ta’ unità għal kull ettaru kkalkulat abbażi tal-konsum annwali medju ta’ fertilizzanti għal kull żona, differenzjat skont is-setturi jew is-sistemi ta’ produzzjoni. Inkella, l-Istati Membri jistgħu jibbażaw l-appoġġ skont dan l-Artikolu fuq il-kostijiet reali mġarrba minn kull benefiċjarju billi jużaw l-istess prezz referenzjarju kif deskritt f’dan il-paragrafu.

4.L-Istati Membri għandhom jistabbilixxu r-rati ta’ appoġġ applikabbli li jkopru sa 50 % tal-kostijiet addizzjonali għall-fertilizzanti. Dawk ir-rati jistgħu jiżdiedu sa massimu ta’ 80 % għall-bdiewa li huma soġġetti għall-impenji msemmija fl-Artikoli 31 u 70, jew ir-rekwiżiti msemmija fl-Artikolu 72, biex inaqqsu l-użu ta’ fertilizzanti. Għal strumenti finanzjarji fil-forma ta’ kapital operatorju awtonomu, għandu japplika l-Artikolu 80(4).

5.L-Istati Membri għandhom jistabbilixxu ammont massimu ta’ appoġġ għal kull benefiċjarju jew numru massimu ta’ ettari li għalihom kull benefiċjarju jista’ jirċievi appoġġ.

6.L-appoġġ skont dan l-Artikolu għandu jitħallas lill-bidwi sat-30 ta’ Ġunju 2027.

7.L-Istati Membri għandhom jiżguraw li l-bdiewa li jirċievu appoġġ skont dan l-Artikolu jkollhom aċċess għall-għarfien u għall-informazzjoni rilevanti biex ikunu jistgħu jottimizzaw l-użu sostenibbli tal-fertilizzanti.

8.Meta jagħtu appoġġ skont dan l-Artikolu, l-Istati Membri għandhom jiżguraw li jiġi evitat kumpens żejjed bħala riżultat tal-kombinazzjoni tal-intervent skont dan l-Artikolu ma’ strumenti oħra ta’ appoġġ nazzjonali jew tal-Unjoni.”;

(3)L-Artikolu 80 huwa emendat kif ġej:(a)il-paragrafu 1 huwa sostitwit b’dan li ġej:

“1. L-appoġġ fil-forma ta’ strumenti finanzjarji msemmi fl-Artikolu 58 tar-Regolament (UE) 2021/1060 jista’ jingħata skont it-tipi ta’ intervent imsemmija fl-Artikoli minn 73 sa 78 u 78b ta’ dan ir-Regolament.”;

(b)fil-paragrafu 3, l-ewwel subparagrafu huwa sostitwit b’dan li ġej:

“3. F’konformità mal-Artikolu 58(2) tar-Regolament (UE) 2021/1060, il-kapital operatorju, inkluż il-kapital operatorju awtonomu, jista’ jkun nefqa eliġibbli skont l-Artikoli 73, 74, 76, 77, 78 u 78b ta’ dan ir-Regolament, jekk ikun jikkontribwixxi għall-kisba ta’ mill-inqas objettiv speċifiku wieħed rilevanti għall-intervent ikkonċernat. L-appoġġ għall-finanzjament tal-kapital operatorju awtonomu skont kwalunkwe wieħed minn dawk l-Artikoli jista’ jiġi pprovdut mingħajr ma jkun soġġett għar-rekwiżit li r-riċevitur finali jirċievi appoġġ għal nefqa oħra skont l-istess Artikolu.”;

(c)il-paragrafu 4 huwa sostitwit b’dan li ġej:

“4. B’deroga mill-Artikoli 73, 74, 76, 77, 78 u 78b, ir-rati ta’ appoġġ stabbiliti f’dawk l-Artikoli ma għandhomx japplikaw għall-finanzjament tal-kapital operatorju awtonomu.”;

(4)fl-Artikolu 86(3), jiżdied is-subparagrafu li ġej:

“B’deroga mill-ewwel subparagrafu ta’ dan il-paragrafu, il-Pjan Strateġiku tal-PAK jista’ jipprevedi li, fil-każ ta’ tip ta’ intervent skont l-Artikolu 78b, l-eliġibbiltà tan-nefqa ffinanzjata mill-FAEŻR relatata mal-emendi tal-Pjan Strateġiku tal-PAK tista’ tibda qabel id-data tal-preżentazzjoni lill-Kummissjoni tat-talba għal emenda iżda mhux qabel… [id-data tad-dħul fis-seħħ ta’ dan ir-Regolament emendatorju].”;

(5)fl-Artikolu 87(2), l-ewwel subparagrafu huwa sostitwit b’dan li ġej:

“2. Il-Kummissjoni għandha s-setgħa li tadotta atti delegati f’konformità mal-Artikolu 152 li jemendaw l-allokazzjonijiet tal-Istati Membri stabbiliti fl-Annessi V u IX biex jitqiesu l-iżviluppi relatati mal-ammont massimu totali tal-pagamenti diretti li jistgħu jingħataw, inkluż it-trasferimenti msemmija fl-Artikoli 17 u 103, l-aġġustament tal-allokazzjonijiet tal-pagamenti diretti msemmi fl-Artikolu 103a, it-trasferimenti tal-allokazzjonijiet finanzjarji msemmija fl-Artikolu 88(5) u kwalunkwe tnaqqis meħtieġ biex jiġu ffinanzjati t-tipi ta’ intervent f’setturi oħra msemmija fl-Artikolu 88(6).”;

(6)fl-Artikolu 91(3), il-punt (a) huwa sostitwit b’dan li ġej:

“(a) 65 % tan-nefqa pubblika eliġibbli għal pagamenti għal restrizzjonijiet naturali jew restrizzjonijiet oħra speċifiċi għaż-żona skont l-Artikolu 71 u għall-appoġġ skont l-Artikolu 78b”;

(7)l-Artikolu 96a huwa sostitwit b’dan li ġej:

“Artikolu 96a

Allokazzjonijiet finanzjarji massimi għall-pagamenti f’każ ta’ kriżi lill-bdiewa msemmija fl-Artikolu 78a u appoġġ lill-bdiewa msemmi fl-Artikolu 78b

1.L-ammont massimu għal kull Stat Membru li jista’ jiġi riżervat għall-pagamenti f’każ ta’ kriżi lill-bdiewa wara diżastri naturali, eventi klimatiċi avversi jew eventi katastrofiċi msemmija fl-Artikolu 78a u għall-appoġġ lill-bdiewa affettwati miż-żieda qawwija fil-prezzijiet tal-fertilizzanti minħabba l-kriżi tal-Lvant Nofsani msemmi fl-Artikolu 78b għandu jkun limitat għall-ammonti annwali stabbiliti fl-Anness XV.

2.Massimu ta’ 25 % tal-ammonti annwali stabbiliti fl-Anness XV jista’ jiġi riżervat għall-finanzjament tal-appoġġ lill-bdiewa msemmi fl-Artikolu 78b.

3.In-nefqa totali tal-FAEŻR għall-pagamenti f’każ ta’ kriżi msemmija fl-Artikolu 78a u l-appoġġ imsemmi fl-Artikolu 78b ma għandhiex taqbeż is-somma tal-allokazzjonijiet finanzjarji indikattivi għal dawn it-tipi ta’ intervent għas-snin finanzjarji 2026 u 2027, kif stabbilit mill-Istati Membri fil-pjanijiet finanzjarji tagħhom f’konformità mal-Artikolu 112(2), il-punt (a), u kif approvat mill-Kummissjoni f’konformità mal-Artikolu 119. Dak il-limitu massimu finanzjarju għandu jikkostitwixxi limitu massimu finanzjarju stabbilit mid-dritt tal-Unjoni.”;

(8)fit-Titolu IV, jiżdied l-Artikolu li ġej:

“Artikolu 103a

Allokazzjonijiet ta’ pagamenti diretti għas-sena kalendarja 2027

Sal-31 ta’ Awwissu 2026, l-Istati Membri jistgħu jiddeċiedu li jżidu jew inaqqsu l-allokazzjonijiet tagħhom għall-pagamenti diretti stabbiliti fl-Annessi V u IX għas-sena kalendarja 2027 b’ammont li ma jaqbiżx iż-żieda massima jew t-tnaqqis massimu stabbiliti fl-Anness XVI għal kull Stat Membru, bħala parti minn talba għal emenda strateġika tal-Pjanijiet Strateġiċi tal-PAK rispettivi tagħhom imsemmija fl-Artikolu 119.”;

(9)fl-Artikolu 111, it-tieni paragrafu huwa sostitwit b’dan li ġej:

“Il-punt (e) tal-ewwel paragrafu ma għandux japplika għat-tip ta’ intervent fis-settur tal-apikultura msemmi fl-Artikolu 55(1), il-punt (a) u l-punti (c) sa (g), l-interventi skont it-tip ta’ intervent fis-settur tal-inbid imsemmi fl-Artikolu 58(1), il-punti minn (h) sa (k), l-azzjonijiet ta’ informazzjoni u ta’ promozzjoni għal skemi tal-kwalità skont it-tip ta’ intervent għall-kooperazzjoni msemmi fl-Artikolu 77, l-interventi skont it-tip ta’ intervent għall-pagamenti f’każ ta’ kriżi lill-bdiewa wara diżastri naturali, avvenimenti klimatiċi avversi jew avvenimenti katastrofiċi msemmija fl-Artikolu 78a, u l-interventi skont it-tip ta’ intervent għall-appoġġ lill-bdiewa affettwati miż-żieda qawwija fil-prezzijiet tal-fertilizzanti msemmija fl-Artikolu 78b.”;

(10)fl-Artikolu 112(2), il-punt (b) huwa sostitwit b’dan li ġej:

“(b) it-trasferimenti tal-ammonti msemmija fil-punt (a) bejn it-tipi ta’ intervent fil-forma ta’ pagamenti diretti u t-tipi ta’ intervent għall-iżvilupp rurali f’konformità mal-Artikolu 103, kwalunkwe tnaqqis tal-allokazzjonijiet tal-Istat Membru għat-tipi ta’ intervent fil-forma ta’ pagamenti diretti biex jitqiegħdu għad-dispożizzjoni ammonti għat-tipi ta’ intervent f’setturi oħra msemmija fit-Titolu III, il-Kapitolu III, it-Taqsima 7, f’konformità mal-Artikolu 88(6), u kwalunkwe aġġustament tal-allokazzjonijiet tal-pagamenti diretti f’konformità mal-Artikolu 103a;”;

(11)L-Artikolu 119 huwa emendat kif ġej:(a)fil-paragrafu 2, l-ewwel subparagrafu, il-punt (c) huwa sostitwit b’dan li ġej:

“(c) emendi relatati mal-Artikolu 17(5), l-Artikolu 88(7), l-Artikoli minn 92 sa 98, l-Artikolu 103(1), (5) u (6) jew l-Artikolu 103a;”;

(b)fil-paragrafu 7, it-tieni subparagrafu huwa sostitwit b’dan li ġej:

“Talba għal emenda strateġika relatata mal-Artikolu 17(5), l-Artikolu 78b, l-Artikolu 88(7), l-Artikolu 103(5) jew (6) jew l-Artikolu 103a ma għandhiex titqies bħala parti mil-limitu stabbilit fl-ewwel subparagrafu ta’ dan il-paragrafu.”;

(12)fl-Artikolu 121, it-tieni subparagrafu, il-punt (b) huwa sostitwit b’dan li ġej:

“(b) għall-emendi relatati mal-Artikolu 17(5), l-Artikolu 88(7), l-Artikolu 103(5) u l-Artikolu 103a, il-perijodu għall-adozzjoni tal-att delegat għall-emendar tal-allokazzjonijiet f’konformità mal-Artikolu 87(2).”;

(13)fl-Artikolu 146, jiżdied is-subparagrafu li ġej:

“L-Istati Membri jistgħu jipprovdu finanzjament nazzjonali addizzjonali sa 200 % tal-finanzjament tal-FAEŻR allokat fil-Pjan Strateġiku tal-PAK għall-appoġġ skont l-Artikolu 78b.”;

(14)l-Annessi I u XV huma emendati f’konformità mal-Anness I ta’ dan ir-Regolament;(15)it-test stabbilit fl-Anness II ta’ dan ir-Regolament jiżdied bħala l-Anness XVI.

Artikolu 2Emendi tar-Regolament (UE) 2021/2116Ir-Regolament (UE) 2021/2116 huwa emendat kif ġej:(1)fl-Artikolu 21(2), l-ewwel subparagrafu huwa sostitwit b'dan li ġej:

“2. Il-pagamenti ta’ kull xahar għandhom isiru lil kull Stat Membru fit-tielet jum tax-xogħol tat-tieni xahar wara dak li fih issir in-nefqa jew qabel dak il-jum, filwaqt li jitqiesu t-tnaqqis jew is-sospensjonijiet li jsiru skont l-Artikoli 39 sa 42 u kull korrezzjoni oħra. In-nefqa li tkun saret mill-Istati Membri bejn l-1 u l-15 ta’ Ottubru għandha titqies bħala nefqa li tkun saret fix-xahar ta’ Ottubru. In-nefqa li tkun saret bejn is-16 u l-31 ta’ Ottubru għandha titqies bħala nefqa li tkun saret fix-xahar ta’ Novembru. In-nefqa li tkun saret mill-Istati Membri biex iħallsu pagamenti bil-quddiem qabel is-16 ta’ Ottubru fis-sena kalendarja 2026 skont l-Artikolu 44(2), it-tieni subparagrafu, il-punt (a), għandha titqies bħala nefqa li tkun saret fix-xahar ta’ Novembru u għandha tiġi ddikjarata fid-dikjarazzjoni relatata ma’ dak ix-xahar.”;

(2)L-Artikolu 35 huwa sostitwit b'dan li ġej:

“Artikolu 35

Sena finanzjarja agrikola

Mingħajr preġudizzju għad-dispożizzjonijiet speċjali dwar id-dikjarazzjonijiet tan-nefqa u tad-dħul relatati mal-intervent pubbliku stabbiliti mill-Kummissjoni skont l-Artikolu 47(2), l-ewwel subparagrafu, il-punt (a), u dwar id-dikjarazzjonijiet tan-nefqa relatati mal-pagamenti mħallsa bil-quddiem qabel is-16 ta’ Ottubru fis-sena kalendarja 2026 skont l-Artikolu 44(2), it-tieni subparagrafu, il-punt (a), is-sena finanzjarja għandha tkopri n-nefqa mħallsa u d-dħul riċevut u mdaħħal fil-kontijiet tal-FAEG u tal-FAEŻR mill-aġenziji tal-pagamenti fir-rigward tas-sena finanzjarja N li tibda fis-16 ta’ Ottubru tas-sena N – 1 u li tintemm fil-15 ta’ Ottubru tas-sena N.”;

(3)fl-Artikolu 44(2), it-tieni subparagrafu, il-punt (a) huwa sostitwit b’dan li ġej:

“(a) qabel l-1 ta’ Diċembru, iżda mhux qabel is-16 ta’ Ottubru, jagħmlu pagamenti bil-quddiem sa 70 % għal interventi fil-forma ta’ pagamenti diretti u għall-għajnuna li tikkostitwixxi pagamenti diretti skont il-miżuri msemmija fil-Kapitolu IV tar-Regolament (UE) Nru 228/2013 u fil-Kapitolu IV tar-Regolament (UE) Nru 229/2013, u, fir-rigward tas-sena tat-talba 2026, iħallsu bil-quddiem sa 75 % għal l-interventi u l-għajnuna msemmija f’dan il-punt, inkluż qabel is-16 ta’ Ottubru 2026;”.

Artikolu 3Dħul fis-seħħDan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.Dan ir-Regolament għandu jorbot fl-intier tiegħu u japplika direttament fl-Istati Membri kollha.