1.ag tabhairt dá haire Dréachtbhuiséad Leasaitheach Uimh. 1/2026 mar a thíolaic an Coimisiún é, atá chun an barrachas ó 2025 a bhuiséadú, le haghaidh mhéid EUR 2 095 mhilliún, i gcomhréir le hAirteagal 18(3) den Rialachán Airgeadais;

2.á chur in iúl gur geal léi gurb é méadú ar an éagsúlacht i dteidil 1 (Acmhainní Dílse, go háirithe dleachtanna custaim) agus 4 (Ioncam airgeadais, ús mainneachtana agus fíneálacha) is cúis go príomha le barrachas 2025, agus go bhfuil an barrachas caiteachais fós an-bheag ag EUR 101 mhilliún;

3.á chur in iúl gur oth léi go laghdaíonn buiséadú an bharrachais ranníocaíocht iomlán acmhainní dílse OIN-bhunaithe na mBallstát le maoiniú bhuiséad 2026 faoi mhéid comhréireach; á chur i bhfios go láidir, tráth a bhfuil riachtanais mhaoinithe fós ard, go háirithe i gcás chostais fiach-sheirbhíse EURI, agus go bhfuil an tsolúbthacht laistigh de bhuiséad an Aontais fós thar a bheith teoranta, gur cheart go gcoinneodh an buiséad leibhéal leordhóthanach solúbthachta sna blianta deireanacha den CAI reatha chun cur ar chumas an Aontais déileáil le himeachtaí gan choinne; á chur i bhfios go láidir go bhfuil solúbthacht bhuiséad an Aontais ar cheann de na príomh-shaincheisteanna a dtabharfar aghaidh orthu sa chaibidlíocht don chreat airgeadais ilbhliantúil 2028-2034;

4.ag meabhrú a seasaimh sheanbhunaithe gur cheart gnóthachain amhantair a eascraíonn as fíneálacha agus táillí, nó méideanna coibhéiseacha díobh, a úsáid mar ioncam forlíontach do bhuiséad an Aontais agus nár cheart laghdú comhfhreagrach ar ranníocaíochtaí OIN-bhunaithe a bheith mar thoradh orthu;

5.ag tabhairt dá haire gur ríomhadh na laghduithe bliantúla coigeartaithe ar chnapshuim OIN do na cúig Bhallstát is tairbhithe, arb ionann iad agus thart ar EUR 5,8 billiún glan; á thabhairt chun suntais go bhfuil na lacáistí sin nasctha le boilsciú agus, dá bhrí sin, go bhfuil méadú tagtha orthu ag ráta níos airde ná uasteorainneacha CAI, a dhéantar a choigeartú go bliantúil ar bhonn an díbhoilsceora 2 %; á chur i bhfáth go méadaíonn an aimhrialtacht sin an t-ualach ar na Ballstáit eile;

6.ag tabhairt dá haire an mhír ioncaim dhiúltaigh faoi Airteagal 425, arb ionann í agus EUR 54 mhilliún agus á chur in iúl gur geal léi an modh sin chun costais a ionchorprú don bhuiséad a eascraíonn as íocaíochtaí a dhéantar faoi chomhaontú socraíochta lena mbaineann ús cúiteach agus cúiteamh ar ús mainneachtana a bhaineann le haisíoc fíneálacha iomaíochta a neamhníodh nó a laghdaíodh i gcomhréir le breithiúnais ábhartha na Cúirte Breithiúnais; á mheabhrú gur áitigh an Pharlaimint, agus athmhúnlú 2024 ar an Rialachán Airgeadais á chaibidliú aici, go gcuirfí an cur chuige sin i bhfeidhm ionas nach nginfí leithreasuithe breise caiteachais i gCeannteideal 7 atá faoi bhrú cheana féin; á mheabhrú go dtiocfaidh deireadh leis an réiteach sin an 31 Nollaig 2027; á iarraidh ar an gCoimisiún réiteach cinntitheach a mholadh le haghaidh an chéad CAI eile lena mbaintear amach an cuspóir céanna, mar atá, aon tionchar ar thaobh caiteachais an bhuiséid a sheachaint;

7.ag athdhearbhú a hiarrata seanbhunaithe ar ioncam inbhuanaithe, intuartha agus athléimneach do bhuiséad an Aontais de bhun Airteagal 310 CFAE ar cheart dó a bheith ag teacht le taobh an chaiteachais agus le tosaíochtaí straitéiseacha agus le riachtanais mhaoiniúcháin shainaitheanta an Aontais; ag athdhearbhú a ghealltanas láidir i leith acmhainní dílse nua a thabhairt isteach, ní hamháin le haghaidh aisíocaíocht fiachais NGEU ach freisin chun uaillmhianta beartais feabhsaithe an Aontais a mhaoiniú; á mheabhrú, gan fíoracmhainní dílse nua, gur cinnte go dtitfidh an t-ualach airgeadais ar na Ballstáit trí ranníocaíochtaí méadaithe OIN-bhunaithe; á mheas, dá bhrí sin, gur coinníoll bunriachtanach é fíorshruthanna nua ioncaim de EUR 60 billiún ar a laghad a thabhairt isteach in aghaidh na bliana le haghaidh Creat Airgeadais Ilbhliantúil uaillmhianach do na blianta 2028 go 2034;

8.ag formheas an tseasaimh ón gComhairle ar Dhréachtbhuiséad Leasaitheach Uimh. 1/2026;

9.á threorú dá hUachtarán a dhearbhú go bhfuil Buiséad Leasaitheach Uimh. 1/2026 glactha go cinntitheach agus a shocrú go ndéanfar é a fhoilsiú in Iris Oifigiúil an Aontais Eorpaigh;

10.á threorú dá hUachtarán an rún seo a chur ar aghaidh chuig an gComhairle, chuig an gCoimisiún, chuig na hinstitiúidí agus na comhlachtaí eile lena mbaineann agus chuig na parlaimintí náisiúnta.