1.Jieħu nota tal-abbozz ta’ baġit emendatorju Nru 1/2026 kif tressaq mill-Kummissjoni, li huwa mfassal biex jibbaġitja s-surplus tal-2025, għal ammont ta’ EUR 2 095 miljun, f’konformità mal-Artikolu 18(3) tar-Regolament Finanzjarju;

2.Jilqa’ l-fatt li s-surplus tal-2025 huwa xprunat primarjament minn żieda fil-varjazzjoni fit-titolu 1 (Riżorsi Proprji, b’mod partikolari dazji doganali) u t-titolu 4 (Dħul finanzjarju, imgħax ta’ inadempjenza u multi), filwaqt li s-surplus tan-nefqa għadu modest ħafna fil-livell ta’ EUR 101 miljun;

3.Jiddispjaċih li l-ibbaġitjar tas-surplus inaqqas il-kontribuzzjoni għar-riżorsi proprji bbażati fuq l-ING tal-Istati Membri għall-finanzjament tal-baġit 2026 b’ammont proporzjonat; jissottolinja li, fi żmien meta l-ħtiġijiet ta’ finanzjament għadhom għoljin, b’mod partikolari għall-kostijiet tas-servizzi tad-dejn tal-EURI, u l-ispazju għal ċaqliq fil-baġit tal-Unjoni għadu estremament limitat, il-baġit għandu jżomm livell suffiċjenti ta’ flessibbiltà fl-aħħar snin tal-QFP attwali biex jippermetti lill-Unjoni tlaħħaq ma’ avvenimenti mhux previsti; jissottolinja li l-flessibbiltà tal-baġit tal-Unjoni hija waħda mill-kwistjonijiet ewlenin li għandhom jiġu indirizzati fin-negozjati għall-qafas finanzjarju pluriennali 2028–2034;

4.Ifakkar fil-pożizzjoni li ilu jħaddan li d-dħul imprevist li jirriżulta minn multi u tariffi, jew ammonti ekwivalenti tagħhom, għandu jintuża bħala dħul supplimentari għall-baġit tal-Unjoni u ma għandux iwassal għal tnaqqis korrispondenti fil-kontribuzzjonijiet ibbażati fuq l-ING;

5.Jieħu nota tal-kalkolu tat-tnaqqis annwali aġġustat ta’ somma f’daqqa tal-ING għall-ħames Stati Membri benefiċjarji, li jammonta għal madwar EUR 5,8 biljun netti; jenfasizza l-fatt li dawn ir-ribassi huma marbuta mal-inflazzjoni u għalhekk żdiedu b’rata ogħla mil-limiti massimi tal-QFP, li jiġu aġġustati kull sena abbażi tad-deflatur ta’ 2 %; jisħaq li din l-anomalija żżid il-piż fuq l-Istati Membri l-oħra;

6.Jieħu nota tal-partita tal-introjtu negattiv skont l-Artikolu 425, li tammonta għal EUR 54 miljun u jilqa’ dan il-metodu li jinkorpora l-kostijiet għall-baġit li jirriżultaw minn pagament li jkun sar skont ftehim ta’ saldu li jinvolvi imgħax kumpensatorju u kumpens tal-imgħax ta’ inadempjenza relatati mal-pagament lura ta’ multi tal-kompetizzjoni annullati jew imnaqqsa f’konformità mas-sentenzi pertinenti tal-Qorti tal-Ġustizzja; ifakkar li l-Parlament, meta nnegozja r-riformulazzjoni tal-2024 tar-Regolament Finanzjarju, kien insista fuq l-applikazzjoni ta’ dan l-approċċ biex jevita li jiġu ġġenerati approprjazzjonijiet tan-nefqa addizzjonali fl-Intestatura 7 li diġà hija mġebbda żżejjed; ifakkar li din is-soluzzjoni tintemm fil-31 ta’ Diċembru 2027; jistieden lill-Kummissjoni tipproponi soluzzjoni definittiva għall-QFP li jmiss li tilħaq l-istess objettiv li jiġi evitat kwalunkwe impatt fuq in-naħa tan-nefqa tal-baġit;

7.Itenni t-talba tiegħu li ilha teżisti għal dħul sostenibbli, prevedibbli u reżiljenti għall-baġit tal-Unjoni skont l-Artikolu 310 tat-TFUE li għandu jaqbel man-naħa tan-nefqa u l-prijoritajiet strateġiċi u l-ħtiġijiet ta’ finanzjament identifikati tal-Unjoni; jafferma mill-ġdid l-impenn qawwi tiegħu għall-introduzzjoni ta’ riżorsi proprji ġodda, mhux biss għall-ħlas lura tad-dejn tan-Next Generation EU iżda wkoll biex jiffinanzja l-ambizzjonijiet tal-politika mtejba tal-Unjoni; ifakkar li, mingħajr riżorsi proprji ġenwini ġodda, il-piż finanzjarju inevitabbilment se jaqa’ fuq l-Istati Membri fil-forma ta’ żieda fil-kontribuzzjonijiet ibbażati fuq l-ING; iqis, għalhekk, li l-introduzzjoni ta’ flussi ta’ dħul ġenwini ġodda ta’ mill-anqas EUR 60 biljun fis-sena hija kundizzjoni essenzjali għal Qafas Finanzjarju Pluriennali ambizzjuż għas-snin mill-2028 sal-2034;

8.Japprova l-pożizzjoni tal-Kunsill dwar l-abbozz ta’ baġit emendatorju Nru 1/2026;

9.Jagħti istruzzjonijiet lill-President tiegħu biex tiddikjara li l-baġit emendatorju Nru 1/2026 ġie adottat b’mod definittiv u biex tiżgura li jiġi ppubblikat f’Il-Ġurnal Uffiċjali tal-Unjoni Ewropea;

10.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-istituzzjonijiet l-oħra u lill-entitajiet ikkonċernati, kif ukoll lill-parlamenti nazzjonali.