1.ag aontú le EUR 210 000 a shlógadh agus leis na bearta arna moladh ag an gCoimisiún le bheith maoinithe mar chúnamh teicniúil i gcomhréir le hAirteagal 11(1) agus (4) chomh maith le hAirteagal 12(2), (3) agus (4) den Rialachán maidir le CED;  á chur i bhfáth gur cheart go leanfadh caiteachas ar chúnamh teicniúil de bheith comhréireach, éifeachtúil agus dírithe ar ghníomhaíochtaí lena gcuirtear feabhas follasach ar rochtain ar thacaíocht d’oibrithe iomarcacha agus ar éifeachtacht fhoriomlán CED;

2.ag tabhairt dá haire go n-úsáidfidh an Coimisiún an buiséad atá ar fáil faoin tacaíocht riaracháin chun cruinnithe de Shainghrúpa Daoine Teagmhála CED (beirt chomhaltaí ó gach Ballstát) a thionól agus seimineár amháin le rannpháirtíocht na gcomhlachtaí cur chun feidhme CED agus na gcomhpháirtithe sóisialta chun líonrú i measc Ballstát a chur chun cinn; á iarraidh ar an gCoimisiún leanúint de chuireadh a thabhairt go córasach do Pharlaimint na hEorpa freastal ar na cruinnithe agus na seimineáir sin, i gcomhréir le forálacha ábhartha an Chreat-Chomhaontaithe maidir leis an gcaidreamh idir Parlaimint na hEorpa agus an Coimisiún;

3.á chur i bhfios gur gá feasacht ghinearálta agus infheictheacht CED a neartú tuilleadh; á chur i bhfios gur féidir an sprioc sin a shaothrú trí CED a chuimsiú i bhfoilseacháin éagsúla de chuid an Choimisiúin agus i ngníomhaíochta closamhairc dá bhforáiltear in Airteagal 11(1) den Rialachán maidir le CED agus trí fhaisnéis spriocdhírithe a scaipeadh ar údaráis náisiúnta, réigiúnacha agus áitiúla, ar chomhpháirtithe sóisialta agus ar an bpobal i gcoitinne; á chur in iúl gur geal léi, sa chomhthéacs sin, cothabháil an tsuímh gréasáin thiomnaithe do CED agus á iarraidh ar an gCoimisiún é a uasdátú agus a leathnú go rialta; á iarraidh ar an gCoimisiún aird ar leith a thabhairt ina ghníomhaíochtaí múscailte feasachta agus cumarsáide do na Ballstáit nár bhain úsáid as CED go fóill nó nár bhain ach úsáid theoranta as, lena n-áirítear iad siúd a bhfuil próisis shuntasacha athstruchtúraithe agus iomarcaíochtaí rompu, chun feabhas a chur ar an eolas ar CED agus chun rochtain ar thacaíocht CED a éascú;

4.á chur i bhfios go láidir gur gá nós imeachta iarratais CED a shimpliú níos mó; á chur in iúl gur geal léi, ina thaobh sin, cothabháil córais malartuithe sonraí leictreonaigh agus an obair ar nósanna imeachta caighdeánaithe le haghaidh iarratais CED arna ndéanamh ag an gCoimisiún;  á iarraidh ar an gCoimisiún leanúint d’ualaí riaracháin a laghdú agus an t-am idir cur i bhfeidhm agus soláthar tacaíochta do thairbhithe a ghiorrú agus trédhearcacht iomlán agus grinnscrúdú buiséadach Pharlaimint na hEorpa mar bhrainse amháin den údarás buiséadach á n-áirithiú ag an am céanna;

5.á chur i bhfáth a thábhachtaí atá sé a áirithiú go mbeidh oibrithe a ndéanann olliomarcaíochtaí, dúnadh agus athlonnuithe difear dóibh in ann fostaíocht agus deiseanna nua a aimsiú; ag cur béim ar an bhfíoras, dá bhrí sin, gur cheart do CED leanúint de thosaíocht a thabhairt do bhearta oiliúna agus athscilithe d’oibrithe iomarcacha, lena dtairgtear conairí oiliúna agus cáilíochtaí a éascaíonn a n-athimeascadh sa mhargadh saothair; á chur i bhfios go láidir gur cheart go ndíreodh meastóireachtaí tionchair CED ar athimeascadh tairbhithe san fhostaíocht agus ar éifeachtacht na hoiliúna a chuirtear ar fáil a thomhas chun conairí oiliúna agus bearta tacaíochta a fheabhsú agus a oiriúnú go leanúnach le himeacht ama;

6.á chur in iúl gur geal léi gníomhaíochtaí a mhúsclaíonn feasacht maidir leis na Ballstáit, na comhpháirtithe sóisialta agus na fiontair i ndáil leis na hathruithe ar an Rialachán maidir le CED lena n-áirítear an fhéidearthacht tacaíocht a chur ar fáil d’oibrithe atá buailte ag iomarcaíocht atá ar tí tarlú i gcuideachta a bhfuil athstruchtúrú á dhéanamh uirthi;

7.á chur i bhfáth gur cheart go mbeadh caiteachas a mhaoinítear faoi chúnamh teicniúil faoi réir dianfhaireacháin agus meastóireacht rialta chun bainistíocht fhónta airgeadais, cost-éifeachtúlacht agus breisluach inláimhsithe a áirithiú do na Ballstáit agus do na tairbhithe; á iarraidh ar an gCoimisiún faisnéis mhionsonraithe a chur ar fáil maidir le húsáid acmhainní cúnaimh theicniúil agus maidir leis na torthaí nithiúla arna mbaint amach trí na gníomhaíochtaí a mhaoinítear;

8.ag formheas an chinnidh atá i gceangal leis an rún seo;

9.á threorú dá hUachtarán an cinneadh seo a shíniú le hUachtarán na Comhairle agus a shocrú go ndéanfar é a fhoilsiú in Iris Oifigiúil an Aontais Eorpaigh;

10.ag treorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.