1.Jaqbel mal-mobilizzazzjoni ta’ EUR 210 000 u mal-miżuri proposti mill-Kummissjoni li jridu jiġu ffinanzjati bħala assistenza teknika f’konformità mal-Artikolu 11(1) u (4) kif ukoll mal-Artikolu 12(2), (3) u (4) tar-Regolament dwar il-FEG;  jisħaq li n-nefqa fuq l-assistenza teknika għandha tibqa’ proporzjonata, effiċjenti u ffukata fuq attivitajiet li jtejbu b’mod ċar l-aċċess għall-appoġġ għall-ħaddiema ssensjati u l-effettività ġenerali tal-FEG;

2.Jieħu nota li l-Kummissjoni se tuża l-baġit disponibbli fl-ambitu tal-appoġġ amministrattiv għall-organizzazzjoni ta’ laqgħat tal-Grupp ta’ Esperti tal-Persuni ta’ Kuntatt tal-FEG (żewġ membri minn kull Stat Membru) u ta’ seminar wieħed bil-parteċipazzjoni tal-korpi ta’ implimentazzjoni tal-FEG u s-sħab soċjali sabiex jiġi promoss in-networking fost l-Istati Membri; jistieden lill-Kummissjoni tkompli tistieden b’mod sistematiku lill-Parlament għal dawn il-laqgħat u s-seminars, f’konformità mad-dispożizzjonijiet rilevanti tal-Ftehim Qafas dwar ir-relazzjonijiet bejn il-Parlament u l-Kummissjoni;

3.Jissottolinja l-ħtieġa li s-sensibilizzazzjoni ġenerali u l-viżibbiltà tal-FEG ikomplu jissaħħu; jindika l-fatt li tali għan jista’ jintlaħaq billi l-FEG jidher f’diversi pubblikazzjonijiet u attivitajiet awdjoviżivi tal-Kummissjoni kif previst fl-Artikolu 11(1) tar-Regolament dwar il-FEG u billi tixxerred informazzjoni mmirata lill-awtoritajiet nazzjonali, reġjonali u lokali, lis-sħab soċjali u lill-pubbliku ġenerali; jilqa’ f’dan il-kuntest iż-żamma tas-sit web iddedikat għall-FEG u jistieden lill-Kummissjoni taġġornah u tespandih regolarment; jistieden lill-Kummissjoni tagħti attenzjoni partikolari fl-attivitajiet tagħha ta’ sensibilizzazzjoni u komunikazzjoni lill-Istati Membri li għadhom ma għamlux użu mill-FEG jew li għamlu biss użu limitat minnu, inklużi dawk li qed jiffaċċjaw proċessi ta’ ristrutturar u sensji sinifikanti, sabiex itejbu l-għarfien tal-FEG u jiffaċilitaw l-aċċess għall-appoġġ tal-FEG;

4.Jissottolinja l-ħtieġa li tiġi ssimplifikata aktar il-proċedura ta’ applikazzjoni tal-FEG; jilqa’, f’dan ir-rigward, iż-żamma ta’ sistema ta’ skambju elettroniku ta’ data u l-ħidma fuq proċeduri standardizzati għall-applikazzjonijiet tal-FEG imwettqa mill-Kummissjoni;  jistieden lill-Kummissjoni tkompli tnaqqas il-piżijiet amministrattivi u tqassar iż-żmien bejn l-applikazzjoni u l-għoti ta’ appoġġ lill-benefiċjarji filwaqt li tiżgura trasparenza sħiħa u skrutinju baġitarju tal-Parlament Ewropew bħala fergħa waħda tal-awtorità baġitarja;

5.Jisħaq fuq l-importanza li jiġi żgurat li l-ħaddiema affettwati minn sensji tal-massa, għeluq u rilokazzjonijiet ikunu jistgħu jsibu impjieg u opportunitajiet ġodda; jenfasizza, għalhekk, li l-FEG għandu jkompli jagħti prijorità lill-miżuri ta’ taħriġ u taħriġ mill-ġdid għall-ħaddiema ssensjati, filwaqt li joffri perkorsi ta’ taħriġ u kwalifiki li jiffaċilitaw ir-riintegrazzjoni tagħhom fis-suq tax-xogħol; jissottolinja li l-evalwazzjonijiet tal-impatt tal-FEG għandhom jiffukaw fuq il-kejl tar-riintegrazzjoni tal-benefiċjarji fl-impjieg u l-effettività tat-taħriġ ipprovdut sabiex jittejbu u jiġu adattati kontinwament il-perkorsi ta’ taħriġ u l-miżuri ta’ appoġġ maż-żmien;

6.Jilqa’ l-attivitajiet li jqajmu kuxjenza vis-à-vis l-Istati Membri, is-sħab soċjali u l-intrapriżi dwar il-bidliet fir-Regolament dwar il-FEG li jinkludu l-possibbiltà li jingħata wkoll appoġġ lill-ħaddiema affettwati minn sensji imminenti f’kumpanija li tkun għaddejja minn ristrutturar;

7.Jenfasizza li n-nefqa ffinanzjata skont l-assistenza teknika għandha tkun soġġetta għal monitoraġġ rigoruż u evalwazzjoni regolari sabiex jiġu żgurati ġestjoni finanzjarja tajba, kosteffettività u valur miżjud tanġibbli għall-Istati Membri u l-benefiċjarji; jistieden lill-Kummissjoni tipprovdi informazzjoni dettaljata dwar l-użu ta’ riżorsi ta’ assistenza teknika u dwar l-eżiti konkreti miksuba permezz tal-attivitajiet iffinanzjati;

8.Japprova d-deċiżjoni annessa ma’ din ir-riżoluzzjoni;

9.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

10.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.