1.Jesprimi l-akbar solidarjetà tiegħu mal-vittmi kollha, mal-familji tagħhom u mal-individwi kollha milquta mill-għargħar fir-Rumanija lejn l-aħħar ta’ Mejju u l-bidu ta’ Ġunju 2025, kif ukoll min-nirien fis-selvaġġ f’Ċipru f’Lulju 2025 u fi Spanja f’Awwissu 2025, u mal-awtoritajiet nazzjonali, reġjonali u lokali involuti fl-isforzi ta’ għajnuna;

2.Jilqa’ d-deċiżjoni bħala forma tanġibbli u viżibbli tas-solidarjetà tal-Unjoni maċ-ċittadini u r-reġjuni affettwati mill-għargħar u n-nirien fis-selvaġġ fir-Rumanija, f’Ċipru u fi Spanja;

3.Itenni l-importanza li l-benefiċċji tanġibbli li jseħħu permezz tal-Fond ta’ Solidarjetà tal-Unjoni Ewropea (FSUE) jiġu kkomunikati lill-pubbliku, anke sabiex is-sensibilizzazzjoni taċ-ċittadini dwar l-għodod u l-programmi tal-Unjoni tkompli tikber fi żminijiet ta’ kriżi, speċjalment fiż-żoni affetwati;

4.ifakkar li l-FSUE għandu baġit limitat u ma jistax jitqies bħala l-uniku strument biex jiġu indirizzati diżastri naturali kbar; jitlob għalhekk li ssir valutazzjoni tal-kapaċità finanzjarja tal-baġit tal-Unjoni; jisħaq fuq il-ħtieġa li jiġu aċċellerati u ssimplifikati l-proċeduri kollha tagħha biex jiġi żgurat li l-għajnuna tasal fiż-żoni affettwati malajr kemm jista’ jkun;

5.Jenfasizza l-għadd dejjem akbar ta’ diżastri naturali kbar, qerrieda u fatali fl-Ewropa u jistieden lill-Istati Membri u lill-Kummissjoni jinvestu f’miżuri ta’ mitigazzjoni tat-tibdil fil-klima u l-adattament għalih biex jiġi evitat li jintilfu ħajjiet u li jkun hemm telf ekonomiku; jistieden lill-Istati Membri jqisu li r-riskji klimatiċi jaffettwaw b’mod sproporzjonat lill-popolazzjonijiet vulnerabbli minħabba fatturi soċjoekonomiċi; jinnota li l-Istati Membri għandhom jagħtu prijorità lill-miżuri ta’ rkupru biex jappoġġjaw lill-popolazzjonijiet affettwati, primarjament il-komunitajiet vulnerabbli, biex jiżguraw aċċess għal akkomodazzjoni adegwata u servizzi essenzjali matul l-irkupru; jitlob li jsir sforz biex jiġi żgurat li l-għajnuna mill-FSUE tasal għand ir-riċevituri finali tagħha minnufih, inklużi n-negozji, l-SMEs, il-familji, u ċ-ċittadini affettwati, kif ukoll ir-rikostruzzjoni tal-infrastruttura u t-tiswija tal-ħsara materjali, kollha bil-valutazzjoni tal-impatt korrispondenti u l-mekkaniżmi ta’ kontroll xierqa; jenfasizza l-importanza li tiġi restawrata u msaħħa l-infrastruttura kritika, inklużi n-networks tat-trasport, tal-enerġija, tal-ġestjoni tal-ilma, tas-saħħa u tal-komunikazzjoni, sabiex tissaħħaħ ir-reżiljenza tar-reġjuni affettwati u titnaqqas il-vulnerabbiltà għal diżastri futuri;

6.Jisħaq li l-FSUE huwa biss strument kurattiv u li l-Unjoni għandha wkoll tkompli tindirizza l-adattament għat-tibdil fil-klima u l-mitigazzjoni tiegħu billi tappoġġja l-politiki Ewropej u dawk nazzjonali għall-prevenzjoni tad-diżastri naturali; jissottolinja li r-Rapport tal-EEA Nru 1/2024 “European Climate Risk Assessment” (Valutazzjoni tar-Riskju Klimatiku fl-Ewropa) jisħaq li hija meħtieġa azzjoni biex jiġu identifikati r-riskji li hemm fir-rapport; jistieden lill-Istati Membri u lill-Kummissjoni jkomplu bl-isforzi biex isaħħu r-reżiljenza, itejbu t-tħejjija u jikkontribwixxu għall-implimentazzjoni tal-impenji skont il-Ftehim ta’ Pariġi, filwaqt li jiżguraw il-prevenzjoni tad-diżastri, il-ġestjoni tar-riskju u kapaċitajiet tal-protezzjoni ċivili effettivi madwar l-Unjoni; jisħaq ukoll li huma meħtieġa miżuri preventivi, mhux biss biex tiġi mmitigata l-ħsara fil-futur iżda anke biex jiġi pprevenut li l-kundizzjonijiet ta’ riskju jiggravaw wara eventi katastrofiċi, bħal għargħar, nirien fis-selvaġġ, uqigħ tal-art jew l-inxif ta’ lagi u xmajjar; jissottolinja l-importanza ta’ flessibbiltà adegwata bejn il-programmi differenti; jissottolinja li kwalunkwe flessibbiltà bejn il-programmi ta’ finanzjament differenti trid tkun akkumpanjata minn kontroll baġitarju strett biex jiġu evitati d-duplikazzjoni jew il-ħela ta’ finanzjament, u trid tirrispetta bis-sħiħ il-prinċipji tal-effiċjenza baġitarja u l-indikaturi tal-prestazzjoni mmirati;

7.Ifakkar li RESTORE ĠU L, 2024/3236, 23.12.2024, ELI: http://data.europa.eu/eli/reg/2024/3236/oj. u l-miżuri speċifiċi fl-ambitu tal-Fond Agrikolu Ewropew għall-Iżvilupp Rurali (FAEŻR) ĠU L, 2024/3242, 23.12.2024, ELI: http://data.europa.eu/eli/reg/2024/3242/oj. jipprovdu assistenza addizzjonali lill-Istati Membri affettwati minn diżastri naturali permezz ta’ flessibbiltà akbar fl-użu tal-fondi; jisħaq li l-Istati Membri għandhom jagħmlu użu minn dawn l-opportunitajiet;

8.Ifakkar li huma meħtieġa sinerġiji effettivi ma’ politiki u programmi oħra tal-Unjoni u jissottolinja li l-Istati Membri għandhom jagħmlu l-aħjar użu mill-opportunitajiet ta’ finanzjament, b’mod partikolari l-Fond Ewropew għall-Iżvilupp Reġjonali, il-Fond Soċjali Ewropew Plus u l-programmi għall-iżvilupp rurali; jistieden lill-Kummissjoni tivvaluta b’urġenza dovuta kwalunkwe talba motivata mill-Istati Membri biex talloka mill-ġdid fondi għall-assistenza f’każ ta’ diżastri naturali fil-Pjanijiet Nazzjonali għall-Irkupru u r-Reżiljenza, f’konformità mar-regoli stabbiliti fir-Regolament (UE) 2021/241 tal-Parlament Ewropew u tal-Kunsill Ir-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza (ĠU L 57, 18.2.2021, p. 17, ELI: http://data.europa.eu/eli/reg/2021/241/oj).; iħeġġeġ lill-awtoritajiet rilevanti jiżguraw il-koordinazzjoni xierqa u meħtieġa bejn il-livelli nazzjonali, reġjonali u lokali biex jiggarantixxu li l-fondi jitqassmu b’mod trasparenti, ekwu u mingħajr ebda arbitrarjetà fil-lokalitajiet affettwati kollha;

9.Jissottolinja li l-assistenza mogħtija fl-ambitu tal-FSUE ma għandhiex tkun għad-detriment tal-finanzjament tal-Unjoni li rċevew l-Istati Membri fl-ambitu ta’ politiki jew programmi oħra tal-Unjoni; ifakkar li l-Istati Membri jistgħu jagħtu għajnuna mill-Istat, f’konformità mar-regoli applikabbli tal-Unjoni, b’mod partikolari lin-negozji agrikoli li jkunu ġarrbu ħsarat minħabba diżastri naturali;

10.Ifakkar fl-importanza ta’ valutazzjoni rapida u solida tal-ħsara li tqis kif xieraq ir-riperkussjonijiet ekonomiċi u jitlob li jsiru aktar sforzi operazzjonali sabiex jitnaqqas iż-żmien medju għar-rilaxx ta’ pagamenti antiċipati, filwaqt li jiġi żgurat li l-baġit tal-Unjoni jkun protett; jisħaq, f’dan ir-rigward, fuq il-ħtieġa ta’ trasparenza sħiħa, monitoraġġ effettiv u kontroll ex post tal-użu tar-riżorsi tal-FSUE, sabiex jiġi żgurat li l-fondi tal-Unjoni jilħqu r-reġjuni u l-popolazzjonijiet affettwati; iħeġġeġ ukoll lill-Kummissjoni tesplora l-mezzi kollha possibbli biex taċċellera l-mobilizzazzjoni tal-FSUE;

11.Jisħaq fuq il-ħtieġa urġenti li tiġi rilaxxata assistenza finanzjarja immedjata permezz tal-FSUE liċ-ċittadini, familji, negozji u komunitajiet lokali affetwati malajr kemm jista’ jkun biex jiġi żgurat li l-appoġġ ikun jista’ jilħaq lir-Rumanija, lil Ċipru u lil Spanja fi żmien xieraq; iħeġġeġ ukoll lill-Kummissjoni tesplora l-mezzi kollha possibbli biex taċċellera l-mobilizzazzjoni tal-FSUE, b’mod partikolari billi temenda r-regoli attwali u l-tagħti pagamenti antiċipati ogħla lill-pajjiżi applikanti; jisħaq fuq l-importanza li jitnaqqas iż-żmien bejn il-preżentazzjoni ta’ applikazzjoni għal assistenza mill-FSUE u d-deċiżjoni ta’ finanzjament; jissottolinja l-ħtieġa li jiġu ssimplifikati u aċċellerati l-proċeduri interni mingħajr ma jiġi mminat il-bilanċ istituzzjonali, b’mod partikolari d-drittijiet tal-Parlament Ewropew bħala fergħa waħda tal-awtorità baġitarja;

12.Jistieden lill-Kummissjoni taħdem mill-qrib mal-awtoritajiet Rumeni biex tappoġġja r-rikostruzzjoni rapida tal-Minjiera tal-Melħ ta’ Praid u tal-komunitajiet tal-madwar affettwati, filwaqt li tirrikonoxxi l-importanza strateġika unika tagħha għar-reżiljenza ekonomika reġjonali, l-impjiegi, it-turiżmu, is-saħħa pubblika, l-infrastruttura kritika u l-infrastruttura tal-ġestjoni tal-ilma; jappella, f’dan ir-rigward, għall-mobilizzazzjoni sħiħa tal-istrumenti ta’ finanzjament rilevanti kollha tal-Unjoni u għall-użu tal-flessibbiltà massima disponibbli skont ir-regoli eżistenti tal-Unjoni, sabiex jiġi aċċellerat l-irkupru, jiġu restawrati s-servizzi essenzjali, tiġi appoġġjata l-ekonomija lokali u tissaħħaħ ir-reżiljenza fit-tul tar-reġjun kontra riskji futuri relatati mal-għargħar; jistieden lill-Kummissjoni, minħabba l-iskala tal-isfidi u tal-impatt soċjali u ekonomiku tagħhom, tidentifika strumenti finanzjarji u mekkaniżmi ta’ solidarjetà addizzjonali biex tappoġġja lill-ħaddiema u lir-reġjuni affettwati, inkluża flessibbiltà akbar fl-użu tal-fondi tal-Politika ta’ Koeżjoni, il-mobilizzazzjoni tal-Fond Soċjali Ewropew Plus (FSE+), il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG), u kwalunkwe strument finanzjarju rilevanti ieħor tal-Unjoni;

13.Japprova d-deċiżjoni annessa ma’ din ir-riżoluzzjoni;

14.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

15.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.