1.á mholadh go ndéanfadh an Chomhairle, an Coimisiún agus Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála an méid seo a leanas:(a)béim straitéiseach, láithreacht agus infheictheacht an Aontais Eorpaigh san Áise Thoir agus an t-idirphlé agus an comhar léi a threisiú, lena n-áirítear trí rannpháirtíocht taidhleoireachta, comhar slándála, teagmháil idir dhaoine agus comhpháirtíochtaí eacnamaíocha, agus é mar aidhm leis sin dinimic coimhlinte blocbhunaithe a sheachaint agus rannchuidiú leis an tsíocháin, leis an gcobhsaíocht réigiúnach, leis an tslándáil, leis an rathúnas agus leis an bhforbairt inbhuanaithe, agus cur chun cinn an daonlathais, an iltaobhachais, an smachta reachta, chearta an duine, córais trádála riailbhunaithe, na hiomláine críochaí agus an dlí idirnáisiúnta mar bhonn taca leis sin; sa chomhthéacs sin, oibriú i gcomhar leis an tSeapáin ar a coincheap nuashonraithe maidir le réigiún Ind-Chiúin-Aigéanach atá Saor agus Oscailte; feabhas a chur ar an gcomhar, ar an gcomhordú agus ar an idirphlé le comhpháirtithe san Áise Thoir atá ar aon intinn leo, agus leas iomlán á bhaint as an eolas agus as an taithí atá acu ar an leibhéal réigiúnach chun cur chuige níos éifeachtaí, níos comhleanúnaí agus níos íogaire ó thaobh an chomhthéacs de a áirithiú i leith na síochána, na slándála agus na cobhsaíochta san Áise Thoir;(b)fadbhreathnaitheacht straitéiseach agus pleanáil theagmhasach a neartú idir an tAontas agus a chomhpháirtithe san Áise Thoir chun measúnú comhroinnte ar rioscaí slándála réigiúnacha a fhorbairt agus chun bearta díspreagtha a chomhordú chun an tsíocháin agus an chobhsaíocht sa réigiún a chosaint agus chun cur leo agus chun iarrachtaí aontaobhacha chun an status quo réigiúnach a athrú le forneart nó le comhéigean a dhíspreagadh go réamhghníomhach;(c)go mbeadh sé ina dhíol sásaimh dóibh an dul chun cinn suntasach taidhleoireachta atá déanta ag Rialtas na Seapáine agus Phoblacht na Cóiré maidir le comhpháirtíocht réamhbhreathnaitheach athléimneach a chruthú toisc go bhfuil comhar feabhsaithe den sórt sin idir an tSeapáin agus Poblacht na Cóiré ríthábhachtach chun ord idirnáisiúnta riailbhunaithe a choinneáil agus chun cobhsaíocht a áirithiú ar fud an réigiúin Ind-Chiúin-Aigéanaigh;(d)uathriail straitéiseach agus slándáil eacnamaíoch an Aontais Eorpaigh a neartú trí éagsúlú trádála agus infheistíochta, slabhraí soláthair slána agus intuartha, margaí oscailte agus sreafaí trádála, agus comhar níos dlúithe le comhpháirtithe atá ar aon intinn san Áise Thoir, agus tairbhí frithpháirteacha agus cruthú luacha áitiúil á n-áirithiú ag an am céanna, agus tiomantas an Aontais Eorpaigh do thrádáil chóir agus inbhuanaithe á chaomhnú;(e)an comhar a dhoimhniú le comhpháirtithe atá ar aon intinn sa réigiún, go háirithe an tSeapáin, Poblacht na Cóiré agus an Téaváin, chomh maith le tíortha ASEAN, chun aghaidh a thabhairt ar dhúshláin choiteanna i réimsí amhail comhéigean eacnamaíoch, bearta rialaithe treallacha ar onnmhairiú, lena n-áirítear srianta onnmhairiúcháin ar ítimí dé-úsáide lena ndírítear ar an tSeapáin, beartais agus cleachtais neamh-mhargaidh, athléimneacht dhaonlathach, aistriú éiceolaíoch, an chibearshlándáil, bagairtí hibrideacha lena n-áirítear ionramháil agus cur isteach eachtrach ar fhaisnéis, cosaint an bhonneagair chriticiúil, lena n-áirítear cáblaí fomhuirí agus moil chalafoirt agus lóistíochta, slándáil mhuirí agus spáis, neamhleathadh, agus teicneolaíochtaí cosanta atá ag teacht chun cinn, lena n-áirítear ardteicneolaíocht drón, agus sineirgí le príomh-chomhpháirtithe agus le heagraíochtaí réigiúnacha á neartú ag an am céanna agus lánurraim á tabhairt do Chairt na Náisiún Aontaithe; tionscnaimh chomhpháirteacha a fhiosrú agus a chur chun feidhme chun uathriail straitéiseach na bpáirtithe faoi seach a neartú agus chun spleáchas ar an tSín a laghdú; béim a leagan ar a thábhachtaí atá institiúidí láidre agus daonlathais bhríomhara na Seapáine, Phoblacht na Cóiré agus na Téaváine sa chomhthéacs réigiúnach níos leithne, lena gcuirtear frithchothromú ríthábhachtach ar fáil sa réigiún;(f)bealaí oscailte idirphlé agus rannpháirtíochta ar bhonn prionsabail le gníomhaithe domhanda eile san Áise Thoir a choinneáil, i gcomhar le comhpháirtithe atá ar aon intinn leo, chun aghaidh a thabhairt ar dhúshláin dhomhanda chomhroinnte;(g)a athdhearbhú a thábhachtaí atá sé seasamh leis an dlí idirnáisiúnta chun an tsíocháin agus an rathúnas a chur chun cinn sa réigiún Ind-Chiúin-Aigéanach atá saor agus oscailte; urramú agus cur i bhfeidhm uilíoch UNCLOS a chur chun cinn go gníomhach mar an creat dlíthiúil uilíoch lena rialaítear gníomhaíochtaí muirí, lena n-áirítear Rialú Eadrána Mhuir na Síne Theas 2016, agus agóid a dhéanamh i gcoinne gníomhaíochtaí nó éilimh aontaobhacha nach gcomhlíonann an dlí idirnáisiúnta;(h)comhar struchtúrtha míleata-tionsclaíoch a éascú le comhpháirtithe atá ar aon intinn leo agus comhpháirtíochtaí slándála faoi seach a bhunú lena ndíreofar ar idir-inoibritheacht, ar fhorbairt agus soláthar comhpháirteach na teicneolaíochta cosanta, ar shlándáil na slabhraí soláthair, agus ar T&F comhroinnte san eitlíocht agus i ndróin, maidir le rannchuidiú na gcóras atá faoi thiomáint IS freisin;(i)leanúint de bheith i dteagmháil go pragmatach leis an tSín maidir le dúshláin dhomhanda agus feabhas á chur ag an am céanna ar an gcomhordú le comhpháirtithe atá ar aon intinn leo maidir le saincheisteanna slándála i bhfianaise ról na Síne atá ag éirí níos criticiúla sa tsíocháin agus sa chobhsaíocht dhomhanda, go háirithe i gcomhthéacs chogadh foghach na Rúise i gcoinne na hÚcráine agus na héagobhsaíochta leanúnaí sa Mheánoirthear;(j)dlús a chur leis an gcomhar maidir le slabhraí soláthair slána, inbhuanaithe agus éagsúlaithe le haghaidh leathsheoltóirí, ceallraí agus amhábhair chriticiúla, lena n-áirítear trí inrianaitheacht, athchúrsáil, ciorclaíocht agus ardchaighdeáin chomhshaoil agus saothair, agus i gcomhar le comhpháirtithe atá ar aon intinn leo i dtionscnaimh iltaobhacha ábhartha;(k)an Comhaontú Comhpháirtíochta Straitéisí (SPA) idir an tAontas agus an tSeapáin agus Comhpháirtíocht Slándála agus Chosanta na bpáirtithe a chur chun cinn; comhar níos doimhne a spreagadh maidir le cúrsaí cosanta agus tionsclaíocha, lena n-áirítear rannpháirtíocht fhrithpháirteach i dtionscnaimh chosanta, dul chun cinn maidir le comhaontú maidir le slándáil faisnéise, agus tuilleadh forbartha a dhéanamh ar an Idirphlé idir an tAontas agus an tSeapáin maidir leis an Tionscal Cosanta chun athléimneacht, idir-inoibritheacht agus nuálaíocht an tslabhra soláthair a threisiú; gníomhaíochtaí comhpháirteacha nithiúla a threisiú faoin gComhghuaillíocht Iomaíochais, faoin gComhghuaillíocht Ghlas, faoin gComhpháirtíocht Dhigiteach agus faoin Idirphlé Fuinnimh agus leanúint den Idirphlé Eacnamaíoch Ardleibhéil idir an tAontas agus an tSeapáin a leathnú agus comhar eacnamaíoch straitéiseach idir an dá pháirtí a neartú, dlús a chur le cur chun feidhme na Comhghuaillíochta Iomaíochais idir an tAontas agus an tSeapáin;(l)a thabhairt chun suntais gur comhpháirtíocht í an chomhpháirtíocht idir an tAontas agus an tSeapáin ina bhfuil na compháirtithe go mór ar aon intinn lena chéile, atá bunaithe ar luachanna comhroinnte, ar an daonlathas, ar an tsaorthrádáil agus ar leasanna atá comhoiriúnach dá chéile; béim a chur ar a thábhachtaí atá sé an chomhpháirtíocht sin a dhoimhniú agus a leathnú a thuilleadh go déthaobhach agus i gcomhthéacsanna iltaobhacha araon; a chur i bhfios gurb ionann an tAontas Eorpach agus an tSeapáin le chéile agus beagnach 25 % d’olltáirgeacht intíre (OTI) domhanda, agus gur féidir leis an gcomhpháirtíocht ról lárnach a bheith aici, agus gur cheart go mbeadh ról lárnach aici, chun ord idirnáisiúnta síochánta, riailbhunaithe, cuimsitheach, cóir, inbhuanaithe agus rathúil a mhúnlú; go mbeadh sé ina dhíol sásaimh dóibh cúnamh airgeadais, teicniúil, daonnúil agus slándála na Seapáine don Úcráin ó thús ionradh iomlán na Rúise in 2022;(m)cur chun feidhme na Comhpháirtíochta Slándála agus Cosanta idir an tAontas agus Poblacht na Cóiré a chur chun cinn, comhar praiticiúil a chothú sa tslándáil mhuirí, sa neamhleathadh, sa chibearshlándáil, sa fhrithsceimhlitheoireacht agus sa bhainistiú géarchéime, ag tógáil ar na hoibríochtaí comhpháirteacha atá ann cheana agus ag féachaint ar rannpháirtíocht bhreise faoi uirlis an Aontais maidir le Láithreachtaí Muirí Comhordaithe; idirphlé comhpháirteach idir an tAontas agus Poblacht na Cóiré maidir le tionscal cosanta a sheoladh, agus comhordú i bhfóraim iltaobhacha a neartú chun an tsíocháin a chaomhnú, briogadh a dhíspreagadh agus dí-armáil núicléach a chur chun cinn; tuilleadh forbartha a dhéanamh ar an gcomhar rathúil comhthairbheach idir Poblacht na Cóiré agus roinnt Ballstát de chuid an Aontais maidir le táirgí cosanta; an comhar idir an tAontas agus Poblacht na Cóiré a threisiú chun tacaíocht mhíleata agus airgeadais don Úcráin a threisiú;(n)go mbeadh sé ina dhíol sásaimh dóibh comhar Phoblacht na Cóiré leis an Aontas maidir le hábhair imní chomhroinnte a bhaineann leis an tslándáil eacnamaíoch; a chur i bhfáth go bhfuil Poblacht na Cóiré fós ina príomh-chomhpháirtí in aon iarrachtaí dí-rioscaithe agus comharbhunaithe, go háirithe laistigh den réimse trádála; tathant ar an gCoiste Speisialaithe um Shaincheisteanna Trádála agus Eacnamaíocha atá ag Teacht Chun Cinn, a cruthaíodh le déanaí faoin gComhaontú Saorthrádála idir an tAontas agus Poblacht na Cóiré, dlús a chur leis an gcomhar, go háirithe maidir le hábhair atá ábhartha i ndáil leis an tslándáil eacnamaíoch, amhail slabhraí soláthair criticiúla agus ró-acmhainneacht;(o)na hiarrachtaí comhpháirteacha a chur chun cinn le comhpháirtithe atá ar aon intinn leo san Áise Thoir chun aghaidh a thabhairt ar rannpháirtíocht mhéadaitheach na Rúise le DPDC, lena n-áirítear a tacaíocht chun feabhas a chur ar chumais núicléacha agus bhalaistíocha DPDC agus ar neamhthoil na Síne é a chosc, chomh maith le haghaidh a thabhairt ar an nasc idir cláir núicléacha DPDC agus na hIaráine, agus é á chur i bhfios go láidir go gcuireann an rannpháirtíocht sin leis an timpeallacht gheopholaitiúil theannasach ar Leithinis na Cóiré; comhar le ROK a chur chun cinn maidir le haghaidh a thabhairt ar fheachtais bhréagaisnéise i bpróisis toghcháin agus maidir le bonneagar toghcháin a chosaint ar chibirionsaithe;(p)moladh a thabhairt d’iarrachtaí ROK tús a chur an athuair leis an idirphlé le DPDC trí bhearta réamhghníomhacha chun an lasóg a bhaint den bharrach agus chun muinín a chothú; a iarraidh ar DPDC deireadh a chur láithreach lena gníomhaíochtaí míleata agus lena briogadh míleata uile, agus lena forbairt ar chumais diúracán núicléach agus balaistíoch; cibirghníomhaíochtaí mailíseacha DPDC a cháineadh go láidir agus aghaidh a thabhairt orthu go héifeachtach, lena n-áirítear goid criptea-airgeadra agus cineálacha eile cibearchoireachta; ag tathant ar DPDC rochtain ar eagraíochtaí cabhrach daonnúla a cheadú, cearta an duine a urramú agus go háirithe saincheist na bhfuaduithe a réiteach láithreach; ag tathant ar an Rúis agus ar DPDC Cairt na Náisiún Aontaithe agus na rúin ó Chomhairle Slándála na Náisiún Aontaithe a chomhlíonadh go hiomlán, lena n-áirítear maidir le dí-armáil núicléach iomlán DPDC; ag cáineadh rannchuidiú DPDC le hionsaí na Rúise i gcoinne na hÚcráine, lena n-áirítear a rannpháirtíocht trí phearsanra agus trealamh míleata a sheoladh; beartas an Aontais maidir leis an gCóiré Thuaidh a fhorbairt agus aird chuí á tabhairt ar shaineolas, riachtanais slándála agus ábhair imní dhlisteanacha na gcomhpháirtithe atá ar aon intinn sa réigiún, go háirithe iad siúd atá i ndlúthghaireacht gheografach do DPDC, go háirithe ROK agus an tSeapáin;(q)creat comhair struchtúrtha agus cuimsitheach idir an tAontas agus an Téaváin a bhunú, lena gcuirfear leis na sásraí atá ann cheana amhail an tIdirphlé Trádála agus Infheistíochta, ina mbeidh comhpháirt láidir eacnamaíoch agus trádála, a bheidh dírithe ar theicneolaíochtaí criticiúla amhail leathsheoltóirí agus an intleacht shaorga, athléimneacht sa slabhra soláthair, cibearshlándáil, frithbhearta bréagaisnéise, slándáil mhuirí, sláinte phoiblí, cosaint shibhialta agus nascacht shlán, chomh maith le hathléimneacht dhaonlathach, shóisialta agus fuinnimh agus ullmhacht i gcomhair tubaistí; leanúint de thacaíocht a thabhairt do rannpháirtíocht fhóinteach na Téaváine i gcomhlachtaí idirnáisiúnta agus i bhfóraim theicniúla ábhartha, amhail EDS, an Eagraíocht Eitlíochta Sibhialta Idirnáisiúnta agus Creat-Choinbhinsiún na Náisiún Aontaithe ar an Athrú Aeráide; malartuithe rialta idir an tAontas agus a chontrapháirtithe sa Téaváin a threisiú maidir le saincheisteanna slándála ábhartha, slándáil eacnamaíoch, lúfaireacht sa slabhra soláthair, sláine dhaonlathach agus toghcháin, cosaint bonneagair chriticiúil agus comhar maidir le teicneolaíochtaí glana; ag tathant ar údaráis na Síne dlúthchomhordú a dhéanamh le gníomhaithe réigiúnacha eile, lena n-áirítear an Téaváin, agus aghaidh á tabhairt acu ar mhórdhúshláin dhomhanda sláinte; a chur i bhfios go láidir nach bhfuil aon iarracht ó réimis fhorlámhacha chun tionchar a imirt ar an gcaidreamh idir an tAontas agus an Téaváin inghlactha;(r)á chur i bhfios go láidir gur príomh-chomhpháirtí daonlathach í an Téaváin don Aontas sa réigiún Ind-Chiúin-Aigéanach; an tIdirphlé Trádála agus Infheistíochta idir an tAontas agus an Téaváin a dhoimhniú a thuilleadh d’fhonn aghaidh a thabhairt ar bhacainní ar rochtain ar an margadh agus d’fhonn deimhneacht dhlíthiúil a fheabhsú d’infheisteoirí an Aontais; féachaint an bhféadfaí tús a chur leis an gcaibidlíocht maidir le comhaontú déthaobhach infheistíochta idir an tAontas agus an Téaváin nó maidir le creataí eile a bhaineann le trádáil; á aithint a thábhachtaí atá an Téaváin maidir le slabhraí soláthair domhanda a áirithiú, go háirithe san earnáil ardteicneolaíochta, agus ag tathant ar an Aontas agus ar a Bhallstáit páirt a ghlacadh i gcomhar níos dlúithe leis an Téaváin chun dlús a chur le naisc eacnamaíocha, trádála agus infheistíochta; aitheantas a thabhairt do thaithí na Téaváine maidir le neamhchosaint eacnamaíoch ar an tSín agus a láidreachtaí sa rialachas daonlathach, i gcaighdeáin rialála thrédhearcacha agus in éiceachórais dhigiteacha agus theicneolaíocha athléimneacha a bhainistiú;(s)a athdhearbhú a thábhachtaí atá an tsíocháin agus an chobhsaíocht ar fud Chaolas na Téaváine trí dhiúltú d’aon athrú aontaobhach comhéigneach ar an status quo; a áirithiú, trí theachtaireachtaí soiléire comhordaithe in éineacht leis na Ballstáit agus le comhpháirtithe atá ar aon intinn leo, go dtabhódh gníomhaíochtaí den sórt sin costais shuntasacha pholaitiúla agus eacnamaíocha; a chur i bhfios go láidir nach mór aon difríochtaí a réiteach go síochánta trí idirphlé, i gcomhréir leis an dlí idirnáisiúnta agus toil mhuintir na Téaváine á hurramú; á mheabhrú go láidir nach mór saoirse loingseoireachta agus traseitilte, mar a ráthaítear leis an dlí idirnáisiúnta, a urramú sa réigiún Ind-Chiúin-Aigéanach, lena n-áirítear i Muir na Síne Theas agus i gCaolas na Téaváine; páirt ghníomhach a ghlacadh in iarrachtaí taidhleoireachta chun géarú breise i gCaolas na Téaváine agus i Muir na Síne Thoir agus Theas a chosc; pleanáil theagmhasach agus bearta maolaithe a fhorbairt, mar ábhar práinne, bunaithe ar chásanna géaraithe inchreidte, lena n-áirítear imshuí cabhlaigh na Téaváine ag Daon-Phoblacht na Síne;(t)béim a leagan ar a thábhachtaí atá ionstraimí slándála eacnamaíche an Aontais Eorpaigh chun aghaidh a thabhairt ar chleachtais eacnamaíocha chomhéigneacha agus chun iomaíocht chóir a choimirciú, lena n-áirítear an Ionstraim Frith-Chomhéigin, sásraí éifeachtacha le haghaidh scagadh ar infheistíocht dhíreach choigríche, agus córais rialaithe onnmhairí, i gcás inarb iomchuí agus i gcomhréir le dlí an Aontais Eorpaigh; giaráil gheoeacnamaíoch an Aontais Eorpaigh a chomhthiomsú, lena n-áirítear trí rialuithe onnmhairiúcháin comhordaithe, measúnuithe riosca comhpháirteacha agus freagairtí comhchoiteanna ar an gcomhéigean eacnamaíoch, agus ar an gcaoi sin spleáchais dhéthaobhacha a chlaochlú ina ndíspreagadh éifeachtach agus slándáil eacnamaíoch an Aontais Eorpaigh agus slándáil eacnamaíoch a chomhpháirtithe araon a neartú;(u)dlús a chur leis an gcomhar trí chomhaontuithe agus tionscnaimh thríthaobhacha nó cheathairthaobhacha a chaibidliú maidir le saincheisteanna leasa choitinn agus a rannchuidíonn le seasamh leis an ord idirnáisiúnta iltaobhach riailbhunaithe; comhpháirtíochtaí digiteacha idir an tAontas agus an tSeapáin agus idir an tAontas agus Poblacht na Cóiré atá ann cheana a chur chun cinn le gealltanais chomhroinnte maidir leis an intleacht shaorga, leathsheoltóirí, nascacht den chéad ghlúin eile, ríomhaireacht chandamach, rialachas sonraí, cibearshlándáil, teicneolaíochtaí ceallraí, cáblaí fomhuirí, céannacht dhigiteach agus athléimneacht an tslabhra soláthair; feabhas a chur ar chreataí comhair chun teicneolaíocht cosanta a fhorbairt;(v)na comhaontuithe trádála leis an tSeapáin agus le Poblacht na Cóiré a chur chun feidhme go hiomlán agus go héifeachtach, lena n-áirítear i réimsí na rochtana ar an margadh, bacainní neamhtharaife, na forbartha inbhuanaithe agus an chomhair rialála, agus, maidir le Poblacht na Cóiré, cur chun feidhme choinbhinsiúin bhunúsacha EIS a áirithiú; comhar níos dlúithe a chothú idir fiontair bheaga agus mheánmhéide (FBManna) san Aontas agus iad siúd ina thíortha comhpháirtíochta san Áise Thoir, chun deiseanna frithpháirteacha gnó a chur chun cinn, rochtain ar an margadh a fheabhsú agus líonraí nuálaíochta a neartú;(w)a áirithiú gur comhpháirtíochtaí comhthairbheacha a bheidh in aon chomhaontú eacnamaíoch nó earnáilsonrach a dhéanfar amach anseo le comhpháirtithe atá ar aon intinn sa réigiún a théann níos faide ná cuspóirí eacnamaíocha agus slándála, agus go n-áireofar iontu freisin gealltanais láidre maidir le cearta saothair, cosaint an chomhshaoil agus forbairt slabhraí luacha glana agus inbhuanaithe, i gcomhréir le creat Trádála agus Forbartha Inbhuanaithe an Aontais; feachtas cuimsitheach faisnéise a chur chun cinn san Áise Thoir maidir le beartais an Aontais Eorpaigh i ndáil leis an earnáil cruach agus an gníomh luasaire tionsclaíoch atá beartaithe COM(2026)0100., d’fhonn trédhearcacht agus tuiscint ar spriocanna an Aontais i measc comhpháirtithe idirnáisiúnta a fheabhsú; béim a leagan ar a thábhachtaí atá sé dul i dteagmháil go réamhghníomhach le comhpháirtithe na hÁise Thoir chun aghaidh a thabhairt ar na hábhair imní atá acu, chun idirphlé a chothú, agus chun míthuiscintí a d’fhéadfadh a bheith ann sa chaidreamh trádála agus tionsclaíoch a chosc;(x)obair leantach a dhéanamh ar an imchéimniú smachtbhannaí a thuairiscigh an Rúis trí dhlínsí san Áise Thoir, lena n-áirítear trádáil athródaithe chun earraí dé-úsáide, micrishliseanna agus innealra tionsclaíoch atá faoi smachtbhannaí a fháil, trí idirghabhálaithe sa réigiún;(y)rannpháirtíocht pholaitiúil, eacnamaíoch agus slándála an Aontais sa réigiún Ind-Chiúin-Aigéanach ina iomláine a mhéadú, trí chomhpháirtíochtaí feabhsaithe leis na gníomhaithe uile atá ar aon intinn leo agus trí thionscnaimh amhail an straitéis Global Gateway, idirphlé maidir le cearta an duine, forbairt agus nascacht inbhuanaithe, comhionannas agus ardchaighdeáin saothair a chur chun cinn; aitheantas a thabhairt do chóineasú méadaitheach na leasanna straitéiseacha idir na réigiúin Eora-Atlantacha agus Ind-Chiúin-Aigéanacha, agus an tSeapáin agus ROK ag feidhmiú mar chomhpháirtithe ECAT faoi chreat IP4, rud a léirítear freisin le bunú Mhisean na Seapáine chuig ECAT le déanaí; a dhearbhú go gcuireann an comhar sin feabhas ar fheasacht staide fhrithpháirteach maidir le forbairtí slándála ar fud an dá réigiún; tacú le creat IP4 ECAT mar rannchuidiú bunriachtanach chun slándáil na hEorpa a neartú agus chun an comhar idir-réigiúnach a dhoimhniú ar bhealach comhlántach a threisíonn a chéile; rannpháirtíocht agus comhordú an Aontais le príomhthionscnaimh slándála réigiúnacha ar fud an réigiúin Ind-Chiúin-Aigéanaigh a neartú, lena n-áirítear an tIdirphlé Slándála Ceathairshleasach idir na Stáit Aontaithe, an Astráil, an India agus an tSeapáin; straitéis nua chuimsitheach, chomhleanúnach agus sholúbtha a cheapadh don réigiún Ind-Chiúin-Aigéanach a bheidh fréamhaithe go daingean i luachanna agus leasanna na hEorpa agus i réaltachtaí, riachtanais agus tosaíochtaí an réigiúin;(z)cur le seasamh straitéiseach TCTLanna sa réigiún Ind-Chiúin-Aigéanach, ionas gur féidir leo a bheith ina n-ardardardáin le haghaidh comhar le comhpháirtithe réigiúnacha, lena n-áirítear i réimsí na trádála, na nascachta digití, an bhonneagair chriticiúil agus na ngníomhaíochtaí spáis;(aa)béim a leagan ar ról iarmhartach ASEAN maidir le cobhsaíocht a ráthú agus comhtháthú sochaíoch agus eacnamaíoch a chothú; á chur in iúl gur geal léi rannpháirtíocht mhéadaitheach na Seapáine agus ROK le ASEAN, lena n-áirítear trí chruinnithe mullaigh déthaobhacha agus iltaobhacha rialta; béim a leagan ar a ríthábhachtaí atá ASEAN chun réigiún Ind-Chiúin-Aigéanach síochánta rathúil a áirithiú; dlús a chur leis an rannpháirtíocht struchtúrtha le ASEAN chun ailtireachtaí cuimsitheacha réigiúnacha slándála a thógáil, freagairtí iltaobhacha beartais a chomhordú, agus láithreacht an Aontais sa réigiún a dhaingniú a thuilleadh tríd an gcomhar le ASEAN agus lena Bhallstáit a dhoimhniú, lena n-áirítear trí idirphlé neartaithe slándála agus cosanta le Vítneam agus leis na hOileáin Fhilipíneacha; neartú ról agus infheictheacht an Aontais i bhformáidí réigiúnacha a spreagadh, go háirithe i gcreataí comhair le ASEAN agus sábháilteacht agus slándáil mhuirí, cibearshlándáil agus bainistiú géarchéime á sainaithint mar réimsí tosaíochta le haghaidh comhar leathnaithe, agus leas á bhaint as tionscnaimh amhail ESIWA+, CRIMARIO II agus tionscadail Sábháilteachta na gCalafort Domhanda;(ab)gníomhaíocht chomhpháirteach a leathnú maidir le slándáil neamhthraidisiúnta amhail cuardach agus tarrtháil, freagairt do thubaistí agus teagmhais chomhshaoil; tionscnamh struchtúrtha a sheoladh chun cosaint agus athléimneacht an bhonneagair mhuirí chriticiúil a neartú, lena n-áirítear cáblaí faoin bhfarraige, píblínte agus calafoirt; feasacht ar an réimse muirí a fheabhsú trí fhothú acmhainneachta spriocdhírithe, oiliúint, braiteoirí agus comhroinnt sonraí i gcomhar le gardaí cósta ASEAN agus le lárionaid réigiúnacha um chomhleá;(ac)tacú le naisc duine le duine a neartú trí scéimeanna soghluaisteachta spriocdhírithe do thaighdeoirí, d’innealtóirí agus do ghairmithe cibearshlándála, agus trí thionscnaimh nasctha struchtúrtha idir moil nuálaíochta na hEorpa agus na hÁise Thoir; feabhas a chur ar an tuiscint fhrithpháirteach ar luachanna comhroinnte i measc mac léinn ón dá réigiún trí chláir oideachais, amhail Erasmus+, a dhoimhniú, a leathnú agus a threisiú le comhpháirtithe atá ar aon intinn leo sa réigiún; malartuithe idir parlaimintí, státseirbhísigh, údaráis áitiúla agus an tsochaí shibhialta a neartú; tacaíocht a mhéadú d’fhoghlaim teangacha, do mhalartuithe cultúrtha agus do thionscnaimh faoi stiúir na hóige chun athléimneacht agus muinín shochaíoch fhadtéarmach a chothú idir an dá réigiún;(ad)comhar a leathnú faoi chuimsiú Fís Eorpach chun feabhas a chur ar an gcomhar comhthairbheach san eolaíocht agus sa teicneolaíocht, agus aird dhearfach á tabhairt ar na fíorais gurb í ROK an chéad tír san Áise a chomhlachaigh le Colún II d’Fhís Eorpach i mí Iúil 2025 agus gur thug an tAontas an chaibidlíocht leis an tSeapáin i gcrích go rathúil maidir lena chomhlachas le Fís Eorpach i mí na Nollag 2025; féachaint an bhféadfaí tús a chur leis an gcaibidlíocht leis an Téaváin faoi chuimsiú Fís Eorpach; tacú le hinfheictheacht an Aontais ar fud an réigiúin trí iarrachtaí fiúntacha taidhleoireachta cultúrtha agus poiblí;

2.á chur in iúl go bhfuil sí ag tnúth le taidhleoireacht pharlaiminteach níos doimhne agus leis an malartú idirpharlaiminteach maidir le míreanna leasa choitinn le Diat na Seapáine, Tionól Náisiúnta ROK, agus comhaltaí Yuan Reachtach na Téaváine; á chreidiúint go láidir gur cheart neartú na gcomhpháirtíochtaí straitéiseacha leis an tSeapáin agus le ROK araon le blianta beaga anuas a léiriú trí naisc a threisiú ar leibhéal idirpharlaiminteach; á mheas go mbainfeadh clár oibre cuimsitheach an chomhair leis an dá thír tairbhe as malartuithe rialta agus struchtúrtha idir parlaiminteoirí; á chreidiúint, thairis sin, gur cheart féachaint ar chomhchoiste parlaiminteach AE-na Seapáine agus ar chomhchoiste parlaiminteach AE-ROK a bhunú;

3.á threorú dá hUachtarán an moladh seo a chur ar aghaidh chuig an gComhairle, chuig an gCoimisiún, chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála, chuig rialtais agus parlaimintí na mBallstát, chuig rialtais agus parlaimintí na Seapáine, Phoblacht na Cóiré agus na Téaváine, agus chuig rúnaíocht agus Ballstáit Chomhlachas Náisiúin na hÁise Thoir Theas.