1.Jirrakkomanda lill-Kunsill, lill-Kummissjoni u lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà:(a)jintensifikaw l-enfasi strateġika, il-preżenza, il-viżibbiltà tal-UE fl-Asja tal-Lvant, kif ukoll id-djalogu u l-kooperazzjoni magħha, anki permezz ta’ impenn diplomatiku, kooperazzjoni fil-qasam tas-sigurtà, kuntatti interpersonali u sħubijiet ekonomiċi, bil-għan li jevitaw dinamika ta’ konfront ibbażata fuq il-blokok u jikkontribwixxu għall-paċi, għall-istabbiltà reġjonali, għas-sigurtà, għall-prosperità, għall-iżvilupp sostenibbli, mirfuda bil-promozzjoni tad-demokrazija, tal-multilateraliżmu, tal-istat tad-dritt, tad-drittijiet tal-bniedem, ta’ sistema kummerċjali bbażata fuq ir-regoli, tal-integrità territorjali u tad-dritt internazzjonali; jikkooperaw, f’dan il-kuntest, mal-Ġappun rigward il-kunċett aġġornat tiegħu ta’ reġjun Indo-Paċifiku miftuħ; isaħħu l-kooperazzjoni, il-koordinament u d-djalogu mas-sħab tal-Asja tal-Lvant tal-istess fehma, billi jiġu sfruttati bis-sħiħ l-għarfien u l-esperjenza reġjonali tagħhom bil-għan li jiġi żgurat approċċ aktar effikaċi, koerenti u sensittiv għall-kuntest fil-qasam tal-paċi, tas-sigurtà u tal-istabbiltà fl-Asja tal-Lvant;(b)isaħħu l-prospettiva strateġika u l-ippjanar ta’ kontinġenza bejn l-UE u s-sħab tagħha tal-Asja tal-Lvant bil-għan li jiżviluppaw valutazzjoni kondiviża tar-riskji għas-sigurtà reġjonali u jikkoordinaw il-miżuri ta’ deterrenza biex jissalvagwardjaw il-paċi u l-istabbiltà fir-reġjun u jikkontribwixxu għalihom, u jiskoraġġixxu b’mod proattiv it-tentattivi biex jinbidel l-istatus quo reġjonali bl-użu tal-forza jew tal-koerċizzjoni;(c)jilqgħu l-progress diplomatiku sinifikanti li għamlu l-Gvernijiet tal-Ġappun u tar-Repubblika tal-Korea fil-ħolqien ta’ sħubija reżiljenti u b’viżjoni fil-bogħod, peress li tali kooperazzjoni msaħħa bejn il-Ġappun u r-Repubblika tal-Korea hija fundamentali biex jinżamm ordni internazzjonali bbażat fuq ir-regoli u tiġi żgurata l-istabbiltà fir-reġjun Indo-Paċifiku kollu;(d)isaħħu l-awtonomija strateġika u s-sigurtà ekonomika tal-UE permezz tad-diversifikazzjoni tal-kummerċ u tal-investiment, ta’ ktajjen tal-provvista siguri u prevedibbli, tal-ftuħ tas-swieq u tal-flussi kummerċjali kif ukoll ta’ kooperazzjoni aktar mill-qrib mas-sħab tal-istess fehma fl-Asja tal-Lvant, filwaqt li jiġu żgurati vantaġġi reċiproċi u l-ħolqien ta’ valur fil-livell lokali u jiġi sostnut l-impenn tal-UE favur kummerċ ġust u sostenibbli;(e)japprofondixxu l-kooperazzjoni ma’ sħab tal-istess fehma fir-reġjun, b’mod partikolari l-Ġappun, ir-Repubblika tal-Korea u t-Tajwan, kif ukoll mal-pajjiżi tal-ASEAN, biex jindirizzaw sfidi komuni f’oqsma bħall-koerċizzjoni ekonomika, il-miżuri arbitrarji b’rabta mal-kontroll fuq l-esportazzjonijiet, inklużi r-restrizzjonijiet fuq l-esportazzjonijiet ta’ oġġetti b’użu doppju lejn il-Ġappun, il-politiki u l-prattiki mhux tas-suq, ir-reżiljenza demokratika, it-tranżizzjoni ekoloġika, iċ-ċibersigurtà, it-theddid ibridu inklużi l-manipulazzjoni tal-informazzjoni u l-indħil minn barranin, il-protezzjoni tal-infrastrutturi kritiċi, inklużi l-kejbils sottomarini u ċ-ċentri portwarji u loġistiċi, is-sigurtà marittima u spazjali, in-nonproliferazzjoni u t-teknoloġiji emerġenti tad-difiża, inkluża t-teknoloġija avvanzata tad-droni, filwaqt li jsaħħu s-sinerġiji ma’ sħab ewlenin u organizzazzjonijiet reġjonali fir-rispett sħiħ tal-Karta tan-Nazzjonijiet Uniti; jeżaminaw u jimplimentaw inizjattivi konġunti biex jissaħħu l-awtonomiji strateġiċi rispettivi tal-partijiet u tonqos id-dipendenza miċ-Ċina; jisħqu fuq l-importanza tal-istituzzjonijiet sodi u tad-dinamiżmu demokratiku tal-Ġappun, tar-Repubblika tal-Korea u tat-Tajwan fil-kuntest reġjonali usa’, li jagħmluha ta’ kontrobilanċ kruċjali fir-reġjun;(f)iżommu, f’koordinament mas-sħab tal-istess fehma, kanali miftuħin ta’ djalogu u impenn ta’ prinċipju mal-atturi globali l-oħrajn tal-Asja tal-Lvant, bil-għan li jiġu indirizzati l-isfidi globali kondiviżi;(g)jerġgħu jaffermaw l-importanza li jiġi sostnut id-dritt internazzjonali għall-promozzjoni tal-paċi u tal-prosperità fir-reġjun Indo-Paċifiku liberu u miftuħ; jippromwovu b’mod attiv ir-rispett u l-applikazzjoni universali tal-UNCLOS bħala qafas ġuridiku universali li jirregola l-attivitajiet marittimi, inkluża d-deċiżjoni tal-arbitraġġ tal-2016 rigward il-Baħar taċ-Ċina tan-Nofsinhar u jopponu azzjonijiet unilaterali jew rivendikazzjonijiet mhux konformi mad-dritt internazzjonali;(h)jiffaċilitaw kooperazzjoni militari-industrijali strutturata ma’ sħab tal-istess fehma u jistabbilixxu sħubijiet għas-sigurtà rispettivi ċċentrati fuq l-interoperabbiltà, l-iżvilupp u l-akkwist konġunti ta’ teknoloġiji tad-difiża, is-sigurtà tal-ktajjen tal-provvista u r-R&Ż kondiviża fl-avjazzjoni u fid-droni, anki fir-rigward tal-kontribut tas-sistemi bbażati fuq l-IA;(i)ikomplu jiddjalogaw pragmatikament maċ-Ċina dwar l-isfidi globali, filwaqt li jsaħħu l-koordinament mas-sħab tal-istess fehma dwar il-kwistjonijiet ta’ sigurtà fid-dawl tar-rwol dejjem aktar kritiku taċ-Ċina fil-paċi u fl-istabbiltà globali, b’mod partikolari fil-kuntest tal-gwerra ta’ aggressjoni tar-Russja kontra l-Ukrajna u tal-instabbiltà li għaddejja fil-Lvant Nofsani;(j)jintensifikaw il-kooperazzjoni fil-qasam tal-ktajjen tal-provvista siguri, sostenibbli u diversifikati għas-semikondutturi, il-batteriji u l-materja prima kritika, anki permezz tat-traċċabbiltà, tar-riċiklaġġ, taċ-ċirkolarità u tal-istandards għoljin f’termini ta’ ambjent u xogħol, u f’koordinament mas-sħab tal-istess fehma fl-inizjattivi multilaterali rilevanti;(k)jippromwovu l-Ftehim ta’ Sħubija Strateġika UE-Ġappun u s-Sħubija għas-Sigurtà u d-Difiża bejn il-partijiet; jinkoraġġixxu kollaborazzjoni aktar profonda dwar il-kwistjonijiet marbuta mal-industrija tad-difiża, inklużi l-involviment reċiproku fl-inizjattivi ta’ difiża, il-progress fi ftehim dwar is-sigurtà tal-informazzjoni u l-iżvilupp ulterjuri tad-Djalogu UE-Ġappun dwar l-Industrija tad-Difiża biex jissaħħu r-reżiljenza, l-interoperabbiltà u l-innovazzjoni tal-katina tal-provvista; jintensifikaw l-attivitajiet konġunti konkreti fl-ambitu tal-Alleanza għall-Kompetittività, tal-Alleanza Ekoloġika, tas-Sħubija Diġitali u tad-djalogi dwar l-enerġija u jkomplu jwessgħu d-djalogu ekonomiku ta’ livell għoli bejn l-UE u l-Ġappun u jsaħħu l-kooperazzjoni ekonomika strateġika bejn iż-żewġ partijiet; iħaffu l-implimentazzjoni tal-Alleanza għall-Kompetittività bejn l-UE u l-Ġappun;(l)jenfasizzaw li s-sħubija UE-Ġappun hija waħda bejn sħab li l-aktar li jikkondividu l-istess fehma, u tissejjes fuq valuri kondiviżi, demokrazija, kummerċ ħieles u interessi reċiprokament kompatibbli; jisħqu fuq l-importanza li din is-sħubija tiġi approfondita u mwessgħa ulterjorment kemm fil-livell bilaterali kif ukoll f’kuntesti multilaterali; jiġbdu l-attenzjoni għall-fatt li, flimkien, l-UE u l-Ġappun jirrappreżentaw kważi 25 % tal-prodott domestiku globali (PDG) dinji, u li din is-sħubija tista’ u jmissha tiżvolġi rwol fundamentali biex jissawwar ordni internazzjonali paċifiku, ibbażat fuq ir-regoli, inklużiv, ġust, sostenibbli u prosperu; jilqgħu l-assistenza finanzjarja, teknika, umanitarja u ta’ sigurtà li ta l-Ġappun lill-Ukrajna minn mindu bdiet l-invażjoni fuq skala kbira min-naħa tar-Russja fl-2022;(m)imexxu ’l quddiem l-implimentazzjoni tas-Sħubija għas-Sigurtà u d-Difiża bejn l-UE u r-Repubblika tal-Korea, irawmu kooperazzjoni prattika fis-sigurtà marittima, fin-nonproliferazzjoni, fiċ-ċibersigurtà, fil-ġlieda kontra t-terroriżmu u fil-ġestjoni tal-kriżijiet, abbażi tal-operazzjonijiet konġunti eżistenti u jeżaminaw il-possibbiltà ta’ aktar kollaborazzjoni fl-ambitu tal-istrument ta’ Preżenzi Marittimi Koordinati tal-UE; ivaraw djalogu konġunt bejn l-UE u r-Repubblika tal-Korea dwar l-industrija tad-difiża, u jsaħħu il-koordinament fil-fora multilaterali biex isostnu l-paċi, jiskoraġġixxu l-provokazzjonijiet u jippromwovu d-denuklearizzazzjoni; jiżviluppaw aktar il-kooperazzjoni ta’ suċċess u reċiprokament vantaġġuża fil-qasam tal-prodotti tad-difiża bejn ir-Repubblika tal-Korea u diversi Stati Membri tal-UE; jintensifikaw il-kooperazzjoni bejn l-UE u r-Repubblika tal-Korea biex isaħħu l-appoġġ militari u finanzjarju lill-Ukrajna;(n)jilqgħu l-kooperazzjoni tar-Repubblika tal-Korea mal-UE dwar it-tħassib kondiviż rigward is-sigurtà ekonomika; jisħqu li r-Repubblika tal-Korea tibqa’ sieħba fundamentali fi kwalunkwe sforz ta’ tnaqqis tar-riskji u ta’ friendshoring, b’mod partikolari fl-ambitu kummerċjali; iħeġġu lill-kumitat speċjalizzat dwar kwistjonijiet kummerċjali u ekonomiċi emerġenti, li għadu kemm inħoloq fl-ambitu tal-Ftehim ta’ Kummerċ Ħieles bejn l-UE u r-Repubblika tal-Korea, iħaffef il-kooperazzjoni, b’mod partikolari dwar is-suġġetti ta’ importanza għas-sigurtà ekonomika, bħall-ktajjen tal-provvista kritiċi u l-kapaċità żejda;(o)imexxu ’l quddiem l-isforzi konġunti ma’ sħab tal-istess fehma fl-Asja tal-Lvant biex jindirizzaw l-involviment dejjem jikber tar-Russja mar-RDPK, inkluż l-appoġġ tagħha biex jissaħħu l-kapaċitajiet nukleari u ballistiċi tar-RDPK u l-indisponibbiltà taċ-Ċina li tipprevjeni dan, kif ukoll tiġi indirizzata r-rabta bejn il-programmi nukleari tar-RDPK u tal-Iran, filwaqt li jissottolinjaw li dan l-involviment jiggrava l-kuntest ġeopolitiku mimli tensjoni fil-Peniżola Koreana; imexxu ’l quddiem il-kooperazzjoni mar-Repubblika tal-Korea fl-indirizzar tal-kampanji ta’ diżinformazzjoni fil-proċessi elettorali u fis-salvagwardja tal-infrastruttura elettorali mill-attakki ċibernetiċi;(p)ifaħħar l-isforzi tar-Repubblika tal-Korea biex tissokta d-djalogu mar-RDPK permezz ta’ tnaqqis tat-tensjonijiet u miżuri li jibnu l-fiduċja; jistiednu lir-RDPK twaqqaf minnufih l-azzjonijiet u l-provokazzjonijiet militari kollha u l-iżvilupp tagħha ta’ kapaċitajiet nukleari u missilistiċi ballistiċi; jikkundannaw bil-qawwa l-attivitajiet ċibernetiċi malizzjużi tar-RDPK, inkluż is-serq ta’ kriptovaluti u forom oħra ta’ kriminalità ċibernetika; iħeġġu lir-RDPK tippermetti l-aċċess għall-organizzazzjonijiet umanitarji, tirrispetta d-drittijiet tal-bniedem u, b’mod partikolari, issolvi immedjatament il-kwistjoni tas-serq ta’ persuni; iħeġġu lir-Russja u lir-RDPK jirrispettaw bis-sħiħ il-Karta tan-Nazzjonijiet Uniti u r-riżoluzzjonijiet tal-Kunsill tas-Sigurtà tan-Nazzjonijiet Uniti, anki fir-rigward tad-denuklearizzazzjoni totali tar-RDPK; jikkundannaw il-kontribut tar-RDPK għall-aggressjoni tar-Russja kontra l-Ukrajna, inkluż l-involviment tagħha billi bagħtet tagħmir u persunal militari; jiżviluppaw il-politika tal-UE dwar ir-RDPK billi jqisu l-għarfien espert, il-bżonnijiet fil-qasam tas-sigurtà u t-tħassib leġittimu tas-sħab tar-reġjun li għandhom l-istess fehma, b’mod partikolari dawk li jinsabu fil-viċinanzi ġeografiċi immedjati tar-RDPK, jiġifieri r-Repubblika tal-Korea u l-Ġappun;(q)jistabbilixxu qafas ta’ kooperazzjoni bejn l-UE u t-Tajwan strutturat u komprensiv, abbażi tal-mekkaniżmi eżistenti bħad-Djalogu dwar il-Kummerċ u l-Investiment, mgħammar b’komponent ekonomiku u kummerċjali b’saħħtu, iffukat fuq it-teknoloġiji kritiċi bħas-semikondutturi u l-intelliġenza artifiċjali, ir-reżiljenza tal-katina tal-provvista, iċ-ċibersigurtà, il-kontromiżuri tad-diżinformazzjoni, is-sigurtà marittima, is-saħħa pubblika, il-protezzjoni ċivili u l-konnettività sigura kif ukoll ir-reżiljenza demokratika, soċjali u enerġetika u l-preparatezza għad-diżastri; ikomplu jappoġġjaw il-parteċipazzjoni sinifikattiva tat-Tajwan fil-korpi internazzjonali u fil-fora tekniċi rilevanti, bħad-WHO, l-Organizzazzjoni tal-Avjazzjoni Ċivili Internazzjonali u l-Konvenzjoni Qafas tan-Nazzjonijiet Uniti dwar it-Tibdil fil-Klima; jintensifikaw l-iskambji regolari bejn l-UE u l-kontropartijiet Tajwaniżi tagħha dwar il-kwistjonijiet ta’ sigurtà rilevanti, is-sigurtà ekonomika, l-aġilità tal-katina tal-provvista, l-integrità demokratika u elettorali, il-protezzjoni tal-infrastruttura kritika u l-kooperazzjoni fil-qasam tat-teknoloġiji nodfa; iħeġġu lill-awtoritajiet Ċiniżi jikkoordinaw mill-qrib mal-atturi reġjonali l-oħra, fosthom it-Tajwan, quddiem l-isfidi sanitarji globali ewlenin; jenfasizzaw li kwalunkwe tentattiv min-naħa ta’ reġimi awtoritarji li jinfluwenzaw ir-relazzjonijiet UE-Tajwan mhuwiex aċċettabbli;(r)jissottolinjaw li t-Tajwan huwa sieħeb demokratiku ewlieni għall-UE fir-reġjun Indo-Paċifiku; japprofondixxu aktar id-Djalogu UE-Tajwan dwar il-Kummerċ u l-Investiment bil-għan li jiġu indirizzati l-ostakli għall-aċċess għas-suq u tissaħħaħ iċ-ċertezza tad-dritt għall-investituri tal-UE; jeżaminaw il-varar ta’ negozjati dwar ftehim bilaterali ta’ investiment bejn l-UE u t-Tajwan jew dwar oqfsa oħra relatati mal-kummerċ; jirrikonoxxu l-importanza tat-Tajwan biex jiġu żgurati ktajjen tal-provvista globali, speċjalment fis-settur tat-teknoloġija avvanzata, u jħeġġu lill-UE u lill-Istati Membri tagħha jidħlu f’kooperazzjoni aktar stretta mat-Tajwan sabiex jissaħħu aktar ir-rabtiet ekonomiċi, kummerċjali u ta’ investiment; jirrikonoxxu l-esperjenza tat-Tajwan fil-ġestjoni tal-esponiment ekonomiku għaċ-Ċina u l-punti li fihom huwa b’saħħtu fil-qasam tal-governanza demokratika, tal-istandards regolatorji trasparenti u tal-ekosistemi diġitali u teknoloġiċi reżiljenti;(s)jaffermaw mill-ġdid l-importanza tal-paċi u tal-istabbiltà fl-Istrett tat-Tajwan billi jirrifjutaw kwalunkwe bidla unilaterali koerċittiva tal-istatus quo; jiżguraw, permezz ta’ messaġġi ċari u koordinati mal-Istati Membri u mas-sħab tal-istess fehma, li tali azzjonijiet jinvolvu kostijiet politiċi u ekonomiċi sinifikanti; jenfasizzaw li kwalunkwe diverġenza trid tiġi solvuta paċifikament permezz tad-djalogu, f’konformità mad-dritt internazzjonali u fir-rispett tar-rieda tal-poplu Tajwaniż; ifakkru b’konvinzjoni li l-libertà ta’ navigazzjoni u ta’ titjir minn fuq l-ispazju tal-ajru, kif garantita mid-dritt internazzjonali, trid tiġi rispettata fir-reġjun Indo-Paċifiku, anki fil-Baħar taċ-Ċina tan-Nofsinhar u fl-Istrett tat-Tajwan; jimpenjaw ruħhom b’mod attiv fl-isforzi diplomatiċi biex jipprevjenu eskalazzjoni ulterjuri fl-Istrett tat-Tajwan, fil-Baħar taċ-Ċina tal-Lvant u fil-Baħar taċ-Ċina tan-Nofsinhar; jiżviluppaw b’urġenza miżuri ta’ ppjanar ta’ kontinġenza u ta’ mitigazzjoni bbażati fuq xenarji plawżibbli ta’ eskalazzjoni, inkluż imblokk navali tat-Tajwan min-naħa tar-Repubblika tal-Poplu taċ-Ċina;(t)jisħqu fuq l-importanza tal-istrumenti ta’ sigurtà ekonomika tal-UE biex jiġu indirizzati l-prattiki ekonomiċi koerċittivi u tiġi ssalvagwardjata l-kompetizzjoni ġusta, fosthom l-istrument kontra l-koerċizzjoni, mekkaniżmi effikaċi tal-iskrinjar tal-investiment dirett barrani u reġimi ta’ kontroll tal-esportazzjonijiet, fejn jixraq u bi qbil mad-dritt tal-UE; jgħaqqdu l-forzi tal-UE fil-qasam ġeoekonomiku, anki permezz ta’ kontrolli koordinati tal-esportazzjonijiet, valutazzjonijiet konġunti tar-riskji u risposti kollettivi għall-koerċizzjoni ekonomika, u b’dan il-mod id-dipendenzi bilaterali jiġu ttrasformati f’deterrent effikaċi u tissaħħaħ kemm is-sigurtà ekonomika tal-UE kif ukoll dik ta’ sħabha;(u)iħaffu l-kooperazzjoni billi jinnegozjaw ftehimiet u inizjattivi trilaterali jew kwadrilaterali dwar kwistjonijiet ta’ interess komun u li jikkontribwixxu biex isostnu l-ordni internazzjonali bbażat fuq ir-regoli; imexxu ’l quddiem is-Sħubijiet Diġitali eżistenti bejn l-UE u l-Ġappun u bejn l-UE u r-Repubblika tal-Korea b’impenji kondiviżi dwar l-intelliġenza artifiċjali, is-semikondutturi, il-konnettività tal-ġenerazzjoni li jmiss, il-computing kwantistiku, il-governanza tad-data, iċ-ċibersigurtà, it-teknoloġija tal-batteriji, il-kejbils sottomarini, l-identità diġitali u r-reżiljenza tal-katina tal-provvista; itejbu l-oqfsa ta’ kooperazzjoni għall-iżvilupp tat-teknoloġija tad-difiża,(v)jimplimentaw il-ftehimiet kummerċjali mal-Ġappun u mar-Repubblika tal-Korea b’mod sħiħ u effikaċi, inkluż fl-oqsma tal-aċċess għas-suq, l-ostakli mhux tariffarji, l-iżvilupp sostenibbli kif ukoll il-kooperazzjoni regolatorja u, fir-rigward tar-Repubblika tal-Korea, jiżguraw l-implimentazzjoni tal-konvenzjonijiet fundamentali tal-ILO; irawmu kooperazzjoni aktar mill-qrib bejn l-intrapriżi żgħar u ta’ daqs medju (SMEs) fl-UE u dawk fil-pajjiżi sħab tagħha li jinsabu fl-Asja tal-Lvant, bil-għan li jiġu promossi opportunitajiet kummerċjali reċiproċi, jitjieb l-aċċess għas-suq u jissaħħu n-networks ta’ innovazzjoni;(w)jiżguraw li kwalunkwe ftehim ekonomiku jew settorjali futur mas-sħab tal-istess fehma fir-reġjun ikun sħubija reċiprokament vantaġġuża li tmur lil hinn mill-objettivi ekonomiċi u ta’ sigurtà u tinkludi wkoll impenji qawwijin fil-qasam tad-drittijiet tal-ħaddiema, tal-ħarsien tal-ambjent u tal-iżvilupp ta’ ktajjen tal-valur nodfa u sostenibbli, bi qbil mal-qafas tal-UE għall-kummerċ u l-iżvilupp sostenibbli; jippromwovu kampanja ta’ informazzjoni komprensiva fil-Lvant Nofsani dwar il-politiki tal-Unjoni Ewropea rigward is-settur tal-azzar u l-Att għall-Aċċellerazzjoni Industrijali COM(2026)0100., bil-għan li jiżdiedu t-trasparenza u l-fehim tal-għanijiet tal-UE fost is-sħab internazzjonali; jisħqu fuq l-importanza li jimpenjaw ruħhom b’mod proattiv mas-sħab tal-Asja tal-Lvant biex jindirizzaw dak li jħassibhom, irawmu d-djalogu u jipprevjenu każijiet ta’ nuqqas ta’ qbil potenzjali fir-relazzjonijiet kummerċjali u industrijali;(x)jagħtu segwitu lir-rapporti ta’ ċirkomvenzjoni tas-sanzjonijiet min-naħa tar-Russja permezz ta’ ġuriżdizzjonijiet tal-Asja tal-Lvant, inkluża d-devjazzjoni tar-rotot kummerċjali għax-xiri ta’ oġġetti b’użu doppju, mikroċipep u makkinarji industrijali suġġetti għal sanzjonijiet, permezz ta’ intermedjarji fir-reġjun;(y)iżidu l-impenn politiku, ekonomiku u fil-qasam tas-sigurtà tal-UE fir-reġjun Indo-Paċifiku kollu kemm hu, permezz ta’ sħubijiet imsaħħa mal-atturi kollha tal-istess fehma u ta’ inizjattivi bħall-istrateġija “Global Gateway”, il-promozzjoni tad-djalogi dwar id-drittijiet tal-bniedem, l-iżvilupp sostenibbli u l-konnettività, l-ugwaljanza u standards għoljin fil-qasam tax-xogħol; jirrikonoxxu l-konverġenza dejjem akbar tal-interessi strateġiċi bejn ir-reġjuni Ewro-Atlantika u Indo-Paċifika, bil-Ġappun u r-Repubblika tal-Korea li huma sħab tan-NATO fil-qafas tal-IP4, kif muri anki mill-istabbiliment ta’ dan l-aħħar tal-missjoni tal-Ġappun għan-NATO; jaffermaw li din il-kooperazzjoni ttejjeb l-għarfien tas-sitwazzjoni reċiproku tal-iżviluppi fil-qasam tas-sigurtà fiż-żewġ reġjuni; isostnu l-qafas IP4 tan-NATO, bħala kontribut essenzjali biex tissaħħaħ is-sigurtà Ewropea u tiġi approfondita l-kollaborazzjoni interreġjonali b’mod komplementari u li jsaħħaħ lil xulxin; isaħħu l-impenn u l-koordinament tal-UE mal-inizjattivi reġjonali ewlenin fil-qasam tas-sigurtà fir-reġjun Indo-Paċifiku, inkluż id-Djalogu Kwadrilaterali ta’ Sigurtà bejn l-Istati Uniti, l-Awstralja, l-Indja u l-Ġappun; ifasslu strateġija Indo-Paċifika komprensiva, koerenti u flessibbli ġdida, ankrata b’mod sod fil-valuri u fl-interessi Ewropej kif ukoll fir-realtajiet, fil-bżonnijiet u fil-prijoritajiet tar-reġjun;(z)jiżviluppaw il-pożizzjoni strateġika tal-PTEE fir-reġjun Indo-Paċifiku, ħalli jkunu jistgħu jagħmluha ta’ pjattaformi għall-kooperazzjoni mas-sħab reġjonali, anki fl-oqsma tal-kummerċ, tal-konnettività diġitali, tal-infrastruttura kritika u tal-attivitajiet spazjali;(aa)jenfasizzaw ir-rwol konsegwenti tal-ASEAN biex tiġi garantita l-istabbiltà u titrawwem l-integrazzjoni soċjali u ekonomika; jilqgħu l-impenn dejjem jikber tal-Ġappun u tar-Repubblika tal-Korea fil-konfront tal-ASEAN, anki permezz ta’ summits bilaterali u multilaterali regolari; jissottolinjaw l-importanza kruċjali tal-ASEAN biex tiżgura reġjun Indo-Paċifiku fejn isaltnu l-paċi u l-prosperità; jintensifikaw l-impenn strutturat mal-pajjiżi tal-ASEAN biex jibnu arkitetturi ta’ sigurtà reġjonali inklużivi, jikkoordinaw ir-risposti politiċi multilaterali u jankraw aktar il-preżenza tal-UE fir-reġjun billi tiġi approfondita l-kooperazzjoni mal-ASEAN u mal-Istati Membri tagħha, anki permezz ta’ djalogi msaħħa fil-qasam tas-sigurtà u d-difiża mal-Vjetnam u mal-Filippini; jinkoraġġixxu t-tisħiħ tar-rwol u tal-viżibbiltà tal-Unjoni fil-kuntesti reġjonali, b’mod partikolari fl-oqfsa ta’ kooperazzjoni mal-ASEAN filwaqt li jiġu identifikati s-sikurezza u s-sigurtà marittimi, iċ-ċibersigurtà u l-ġestjoni tal-kriżijiet bħala setturi prijoritarji għal kooperazzjoni estiża, abbażi ta’ inizjattivi bħal ESIWA+, CRIMARIO II u l-proġetti relatati mas-sikurezza globali tal-portijiet;(ab)iwessgħu l-azzjoni komuni fil-qasam tas-sigurtà mhux tradizzjonali bħat-tiftix u s-salvataġġ, ir-reazzjoni għad-diżastri u l-emerġenzi ambjentali; ivaraw inizjattiva strutturata biex isaħħu l-protezzjoni u r-reżiljenza tal-infrastruttura marittima kritika, inklużi l-kejbils sottomarini, il-pipelines u l-portijiet; isaħħu l-għarfien tas-settur marittimu permezz tal-iżvilupp immirat tal-kapaċitajiet, it-taħriġ, is-sensuri u l-kondiviżjoni tad-data f’kooperazzjoni mal-gwardji tal-kosta tal-ASEAN u maċ-ċentri għall-fużjoni reġjonali;(ac)isostnu t-tisħiħ tar-rabtiet interpersonali permezz ta’ programmi mmirati ta’ mobbiltà għal riċerkaturi, inġiniera u professjonisti taċ-ċibersigurtà, kif ukoll permezz ta’ inizjattivi ta’ ġemellaġġ strutturat bejn ċentri ta’ innovazzjoni tal-Ewropa u tal-Asja tal-Lvant; itejbu l-fehim reċiproku tal-valuri kondiviżi bejn l-istudenti taż-żewġ reġjuni billi jiġu approfonditi, mwessgħa u msaħħa l-programmi ta’ edukazzjoni, bħal Erasmus+, ma’ sħab tar-reġjun tal-istess fehma; isaħħu l-iskambji fost il-parlamenti, l-impjegati pubbliċi, l-awtoritajiet lokali u s-soċjetà ċivili; iżidu l-appoġġ għat-tagħlim tal-lingwi, għall-iskambji kulturali u għall-inizjattivi mmexxija miż-żgħażagħ biex jinbnew ir-reżiljenza u l-fiduċja fit-tul tas-soċjetà bejn iż-żewġ reġjuni;(ad)iwessgħu l-kooperazzjoni fil-qafas ta’ Orizzont Ewropa biex isaħħu l-kooperazzjoni reċiprokament vantaġġuża fil-qasam tax-xjenza u t-teknoloġija, filwaqt li jieħdu nota b’sodisfazzjon tal-fatt li r-Repubblika tal-Korea saret l-ewwel pajjiż Asjatiku li assoċja ruħu mal-Pilastru II ta’ Orizzont Ewropa f’Lulju 2025 u li l-UE kkonkludiet b’suċċess in-negozjati mal-Ġappun dwar l-assoċjazzjoni tiegħu ma’ Orizzont Ewropa f’Diċembru 2025; jikkunsidraw li jibdew in-negozjati fil-qafas ta’ Orizzont Ewropa mat-Tajwan; isostnu l-viżibbiltà tal-UE fir-reġjun kollu permezz ta’ sforzi sinifikattivi ta’ diplomazija kulturali u pubblika;

2.Jistenna b’interess li japprofondixxi d-diplomazija parlamentari u l-iskambju interparlamentari dwar kwistjonijiet ta’ interess reċiproku mad-Dieta tal-Ġappun, mal-Assemblea Nazzjonali tar-Repubblika tal-Korea u mal-membri tal-Yuan Leġiżlattiv tat-Tajwan; jemmen b’konvinzjoni li t-tisħiħ tas-sħubijiet strateġiċi kemm mal-Ġappun kif ukoll mar-Repubblika tal-Korea f’dawn l-aħħar snin jenħtieġ li jikkorrispondi mat-tisħiħ tar-rabtiet f’livell interparlamentari; iqis li l-aġenda komprensiva ta’ kooperazzjoni maż-żewġ pajjiżi tkun tislet vantaġġ minn skambji regolari u strutturati bejn il-parlamentari; jemmen, barra minn hekk, li jenħtieġ li jiġi eżaminat l-istabbiliment ta’ kumitat parlamentari konġunt UE-Ġappun u ta’ kumitat parlamentari konġunt UE-Repubblika tal-Korea;

3.Jagħti istruzzjonijiet lill-President tiegħu biex tgħaddi din ir-rakkomandazzjoni lill-Kunsill, lill-Kummissjoni, lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-gvernijiet u lill-parlamenti tal-Istati Membri, lill-gvernijiet u lill-parlamenti tal-Ġappun, tal-Repubblika tal-Korea u tat-Tajwan, u lis-segretarjat u lill-Istati Membri tal-Assoċjazzjoni tan-Nazzjonijiet tax-Xlokk tal-Asja.