1.Ifakkar fil-qafas b’saħħtu tal-kompetizzjoni tal-UE u fl-infurzar xieraq tiegħu bħala għodda biex tiżdied il-kompetittività fl-industriji kollha; jissottolinja li l-politiki tal-UE ma għandhomx jiġu segwiti b’mod iżolat u li t-tħassib dwar il-kompetittività ma jistax jiġi interpretat bħala nuqqasijiet fil-politika tal-kompetizzjoni; ifakkar li r-regoli tal-kompetizzjoni tal-UE jridu jkunu konsistenti mal-prinċipji minquxa fit-Trattati u għandhom jappoġġjaw l-implimentazzjoni tal-politiki tal-UE, inklużi dawk li jkopru l-industrija, il-kummerċ, il-konsumaturi, is-servizzi finanzjarji u d-difiża, filwaqt li jiżguraw qafas stabbli li jrawwem l-investimenti, it-tkabbir u l-kapaċità għall-espansjoni f’kundizzjonijiet ġusti; jissottolinja li l-politika tal-kompetizzjoni għandha tikkontribwixxi għall-integrazzjoni u għall-approfondiment tas-swieq kapitali Ewropej u tappoġġja l-objettivi tal-unjoni tat-tfaddil u tal-investimenti;

2.Jenfasizza li kompetizzjoni li tiffunzjona sew hija xprunatur ewlieni għat-tkabbir tal-produttività u għall-kompetittività fit-tul fl-UE; jinnota li l-infurzar aktar b’saħħtu tal-politika tal-kompetizzjoni huwa assoċjat ma’ produttività totali ogħla tal-fatturi u allokazzjoni aktar effiċjenti tal-ħaddiema u tal-kapital; jisħaq għalhekk li politika tal-kompetizzjoni effettiva u l-infurzar jikkontribwixxu għal kundizzjonijiet ta’ impjieg ġusti;

3.Jemmen bis-sħiħ li r-rapport Draghi u r-rapport Letta għandhom jikkontribwixxu għat-tfassil ta’ prijoritajiet fil-qasam tal-kompetizzjoni, u jitlob li dawn ir-rapporti jingħataw segwitu bħala kwistjoni ta’ urġenza; jieħu nota tal-istima ta’ Mario Draghi li huma meħtieġa EUR 800 biljun addizzjonali fis-sena sabiex tiġi protetta l-kompetittività tal-UE tagħna; jenfasizza li l-interessi tal-konsumatur għandhom jibqgħu ċentrali, filwaqt li titqies il-ħtieġa li l-politika tal-kompetizzjoni tikkontribwixxi għal objettivi ewlenin, bħall-kompetittività, ir-reżiljenza, is-sigurtà, l-awtonomija strateġika u s-sostenibbiltà; jilqa’ l-proposta tar-rapport Draghi għal għodda flessibbli li tinvestiga s-suq (l-“għodda ġdida tal-kompetizzjoni”) biex jiġu indirizzati fallimenti tas-suq li ma jistgħux jiġu indirizzati b’mod effettiv skont l-Artikoli 101 u 102 attwali tat-TFUE; jinnota li għodod simili diġà ġew implimentati b’suċċess fil-livell tal-Istati Membri u jissuġġerixxi li l-għodda ġdida tal-kompetizzjoni fil-livell tal-UE tista’ tgħin biex jiġu indirizzati kwistjonijiet ta’ kompetizzjoni strutturali fl-UE; jistieden lill-Kummissjoni tintroduċi għodda bħal din biex tikkomplementa l-qafas eżistenti;

4.Jagħraf il-ħtieġa li tissaħħaħ il-bażi industrijali tad-difiża Ewropea; jisħaq li l-politika tal-kompetizzjoni trid tiżgura aċċess ġust għall-SMEs u tipprevjeni konċentrazzjoni eċċessiva fil-ktajjen ta’ provvista għad-difiża li jistgħu jnaqqsu r-reżiljenza u jżidu d-dipendenza;

5.Itenni r-rwol fundamentali tal-SMEs fit-tisħiħ tal-kompetittività Ewropea, il-promozzjoni tal-innovazzjoni u l-ħolqien tal-impjiegi; jistieden lill-Kummissjoni tiżgura li l-infurzar tar-regoli tal-kompetizzjoni u tal-politiki diġitali tqis l-impatt tagħhom fuq l-SMEs;

6.Jissottolinja l-importanza li jitnaqqsu l-kostijiet tal-enerġija biex tiġi ssalvagwardjata l-kompetittività tal-UE, jiġu promossi sorsi ta’ enerġija b’emissjonijiet żero netti f’konformità mal-Att Delegat dwar it-Tassonomija fir-rigward tal-Klima12 Ir-Regolament Delegat tal-Kummissjoni (UE) 2021/2139 tal-4 ta’ Ġunju 2021 li jissupplimenta r-Regolament (UE) 2020/852 tal-Parlament Ewropew u tal-Kunsill billi jistabbilixxi l-kriterji tekniċi ta’ skrinjar sabiex jiġu ddeterminati l-kundizzjonijiet li fihom attività ekonomika tikkwalifika bħala attività li tikkontribwixxi sostanzjalment għall-mitigazzjoni tat-tibdil fil-klima jew għall-adattament għat-tibdil fil-klima u sabiex jiġi ddeterminat jekk dik l-attività ekonomika tikkawżax ħsara sinifikanti lil xi wieħed mill-objettivi ambjentali l-oħra (ĠU L 442, 9.12.2021, p. 1, ELI: http://data.europa.eu/eli/reg_del/2021/2139/oj). u l-Att Delegat Komplementari dwar il-Klima13 Ir-Regolament Delegat tal-Kummissjoni (UE) 2022/1214 tad-9 ta’ Marzu 2022 li jemenda r-Regolament Delegat (UE) 2021/2139 fir-rigward tal-attivitajiet ekonomiċi f’ċerti setturi tal-enerġija u r-Regolament Delegat (UE) 2021/2178 fir-rigward ta’ divulgazzjonijiet pubbliċi speċifiċi għal dawn l-attivitajiet ekonomiċi (ĠU L 188, 15.7.2022, p. 1, ELI: http://data.europa.eu/eli/reg_del/2022/1214/oj)., filwaqt li jiġi żgurat li suq uniku miftuħ, kompetittiv u sostenibbli jkun ibbilanċjat b’sigurtà tal-provvista u b’awtonomija akbar tal-enerġija tal-UE; jisħaq li swieq tal-elettriku ġusti, li jiffunzjonaw sew, kompetittivi, integrati u interkonnessi huma essenzjali biex tissaħħaħ il-kompetittività industrijali tal-UE u jiġu appoġġjati prezzijiet tal-enerġija aktar stabbli u affordabbli; jissottolinja l-importanza tal-infurzar effettiv tar-regoli tal-kompetizzjoni fl-infrastruttura tal-enerġija u fl-aċċess għan-network sabiex jiġi ssalvagwardjat il-funzjonament xieraq tas-suq uniku u jiġi żgurat ipprezzar ġust u jiġu protetti aħjar il-konsumaturi;

7.Jinnota r-rwol strateġiku tal-materja prima kritika għat-tranżizzjoni tal-enerġija u għall-objettivi tal-Att dwar il-Materja Prima Kritika fit-tnaqqis tad-dipendenzi ġeopolitiċi u fit-tisħiħ tar-reżiljenza tal-katina tal-provvista, u jappella għal politika tal-kompetizzjoni biex tappoġġja s-swieq kompetittivi tul il-katina tal-valur u fl-investimenti pan-Ewropej;14 Ir-Regolament (UE) 2024/1252 tal-Parlament Ewropew u tal-Kunsill tal-11 ta’ April 2024 li jistabbilixxi qafas li jiżgura provvista sigura u sostenibbli tal-materja prima kritika u li jemenda r-Regolamenti (UE) Nru 168/2013, (UE) 2018/858, (UE) 2018/1724 u (UE) 2019/1020 (ĠU L, 2024/1252, 3.5.2024, ELI: http://data.europa.eu/eli/reg/2024/1252/oj).

8.Jenfasizza r-rwol ewlieni li għandha l-kompetizzjoni fil-ħolqien ta’ alternattivi tas-suq diġitali u fit-tnaqqis tad-dipendenza fuq fornituri mhux tal-UE u tad-dominanza tagħhom; iħeġġeġ li tinbena infrastruttura ewlenija biex tingħata spinta lill-awtonomija u l-innovazzjoni tal-Ewropa, inklużi s-servizzi tal-cloud, l-infrastruttura tal-IA (ċentri tad-data u konnettività), l-infrastruttura tas-suq finanzjarju u sistemi ta’ pagament Ewropej reżiljenti, interoperabbli u kompetittivi, sabiex jiġu żgurati swieq miftuħa u kontestabbli u jitnaqqsu d-dipendenzi strateġiċi; josserva l-prattiki kummerċjali u l-istrutturi tas-suq li qed jevolvu, u forom ġodda potenzjali ta’ mġiba dannuża bħall-kollużjoni taċita u l-kollużjoni algoritmika fuq il-prezzijiet, u jenfasizza l-ħtieġa li l-prijoritajiet ta’ infurzar jiġu allinjati ma’ dan ix-xenarju li qed jevolvi, appoġġjati minn analiżi u evidenza mmexxija mid-data;

9.Jappella għal kundizzjonijiet ekwi f’setturi strateġiċi u lill-UE biex tuża l-għodod kollha disponibbli, inklużi r-Regolament dwar is-Sussidji Barranin, ir-regoli dwar l-akkwist pubbliku u qafas robust għar-rieżami tal-fużjonijiet, ħalli tiżgura li l-kumpaniji tal-UE jkunu jistgħu jikkompetu fuq il-mertu u li l-parteċipanti fis-suq minn pajjiżi mhux tal-UE ma jkunux vantaġġjati b’sussidji ta’ stati barranin; jisħaq fuq l-importanza li jissaħħu r-reżiljenza, id-diversifikazzjoni u s-sigurtà tal-ktajjen ta’ provvista Ewropej f’setturi strateġiċi li jippromwovu kapaċitajiet potenzjali u soluzzjonijiet Ewropej, meta jkun xieraq, mingħajr ma jiġu kompromessi s-swieq miftuħa;

10.Jissottolinja li l-awtoritajiet tal-kompetizzjoni jeħtieġu aċċessibbiltà mtejba tad-data biex jiżguraw infurzar effettiv tal-kompetizzjoni; jisħaq fuq l-importanza li jittejjeb il-ġbir tad-data, jiġi ffaċilitat l-aċċess għad-data dwar l-akkwist għall-awtoritajiet nazzjonali tal-kompetizzjoni, u jissaħħu l-mekkaniżmi ta’ detezzjoni tal-frodi fl-infurzar tagħhom tal-politika tal-kompetizzjoni; jistieden, barra minn hekk, lill-awtoritajiet tal-kompetizzjoni jippromwovu proċeduri simplifikati, itejbu t-trasparenza u jtejbu l-aċċess għas-suq għall-SMEs emerġenti;

11.Jissottolinja l-importanza ta’ proġetti importanti ta’ interess Ewropew komuni (IPCEIs) għall-finanzjament ta’ proġetti strateġiċi kbar tal-UE; jistieden lill-Kummissjoni ttejjeb u tissimplifika l-proċeduri tan-notifiki tal-IPCEI peress li huma ta’ piż, b’mod partikolari għall-SMEs, u tiżgura proporzjonalità, tipprovdi kriterji ċari u prevedibbli għall-ammissibbiltà, u ttejjeb it-trasparenza u ċ-ċertezza tad-dritt tul il-proċess ta’ valutazzjoni;

12.Jilqa’ l-infurzar tar-Regolament dwar is-Sussidji Barranin bħala għodda meħtieġa biex jinħolqu kundizzjonijiet ekwi u jiġu indirizzati d-distorsjonijiet tas-suq ikkawżati minn sussidji barranin; jilqa’ l-linji gwida tar-Regolament dwar is-Sussidji Barranin; isostni li l-għajnuna mill-Istat li mhijiex permessa skont it-Trattati tal-UE lanqas ma għandha tkun permessa minn pajjiżi mhux tal-UE; jitlob il-valutazzjoni rigoruża tad-distorsjonijiet tal-kompetizzjoni permezz tar-Regolament dwar is-Sussidji Barranin u l-iskrinjar xieraq tal-investiment dirett barrani flimkien mal-istrumenti tradizzjonali għad-difiża tal-kummerċ; jistieden lill-Kummissjoni ssaħħaħ l-infurzar tar-Regolament dwar is-Sussidji Barranin fir-rigward tal-pjattaformi u s-swieq online stabbiliti f’pajjiżi mhux tal-UE; jistieden lill-Kummissjoni tiżgura li l-SMEs u t-tranżazzjonijiet iżgħar ma jkollhomx piż sproporzjonat minħabba l-obbligi ta’ konformità tar-Regolament dwar is-Sussidji Barranin;

13.Jissottolinja li, skont l-aktar Ewrobarometru reċenti u l-istħarriġ postelettorali tal-Ewrobarometru tal-2024, ir-rispondenti jistennew li l-UE tagħti prijorità biex tindirizza l-inflazzjoni, iż-żieda fil-prezzijiet u l-għoli tal-ħajja; jisħaq li l-iżgurar ta’ kompetizzjoni ġusta u effettiva huwa element importanti biex jiġu indirizzati dawn l-isfidi u għalhekk għandu jibqa’ prijorità fil-politika tal-kompetizzjoni;

14.Jissottolinja li infurzar strett u konsistenti tal-politika tal-kompetizzjoni jikkontribwixxi għat-tisħiħ tal-koeżjoni ekonomika, soċjali u territorjali madwar l-UE u r-reġjuni ultraperiferiċi tagħha; jinnota li hemm lakuni ekonomiċi u infrastrutturali persistenti bejn ir-reġjuni interni, rurali, periferiċi, ultraperiferiċi u insulari, u jistieden lill-Kummissjoni tqis l-impatt territorjali tad-deċiżjonijiet dwar il-kompetizzjoni, sabiex tippromwovi politiki xierqa tal-koeżjoni li jakkumpanjaw l-iżvilupp tas-suq uniku, filwaqt li tiżgura l-applikazzjoni uniformi tar-regoli ta’ kompetizzjoni;

15.Jilqa’ l-iffirmar tal-Ftehim ta’ Kooperazzjoni dwar il-Kompetizzjoni bejn l-UE u r-Renju Unit15 Id-Deċiżjoni tal-Kunsill (UE) 2025/2376 tal-4 ta’ Novembru 2025 dwar l-iffirmar, f’isem l-Unjoni Ewropea, ta’ Ftehim bejn l-Unjoni Ewropea u r-Renju Unit tal-Gran Brittanja u l-Irlanda ta’ Fuq rigward il-kooperazzjoni fl-applikazzjoni tal-liġijiet tal-kompetizzjoni rispettivi tagħhom (ĠU L, 2025/2376, 24.11.2025, ELI: http://data.europa.eu/eli/dec/2025/2376/oj)., pass ewlieni fit-tisħiħ tal-koordinazzjoni bejn l-awtoritajiet tal-kompetizzjoni rispettivi;

16.Jistieden lill-Kummissjoni tesplora modi biex issaħħaħ l-indipendenza tal-infurzar tal-kompetizzjoni tal-UE;

17.Jenfasizza li t-tisħiħ tal-kapaċità ta’ infurzar eżistenti huwa essenzjali fuq perjodu ta’ żmien qasir; jistieden lill-Kummissjoni tiżgura bħala kwistjoni ta’ urġenza li d-Direttorat Ġenerali għall-Kompetizzjoni jkollu biżżejjed ħaddiema bir-riżorsi u bl-għarfien espert tekniku meħtieġa biex jinfurzaw b’mod effettiv il-liġi antitrust, l-Att dwar is-Swieq Diġitali u r-regoli dwar il-fużjonijiet;

18.Jissottolinja l-importanza li l-infurzar tal-kompetizzjoni jsir b’mod imparzjali u politikament indipendenti; jistieden lill-Kummissjoni tippreżenta valutazzjoni tal-impatt dwar il-merti li tiġi stabbilita awtorità dedikata Ewropea tal-kompetizzjoni, li teżamina s-sussidjarjetà, id-delineazzjoni xierqa bejn il-kompetizzjoni u l-funzjonijiet regolatorji, ir-responsabbiltà demokratika fil-konfront tal-Parlament, u l-implikazzjonijiet potenzjali għan-Network Ewropew għall-Kompetizzjoni (NEK); jisħaq fuq il-ħtieġa ta’ persunal, għarfien espert u setgħat adegwati;

19.Iħeġġeġ lill-Kummissjoni tinforza bis-sħiħ il-ġabra ta’ regoli tal-UE dwar il-kompetizzjoni, inkluż l-Att dwar is-Swieq Diġitali, b’mod konsistenti, imparzjali u legalment robust, biex tissalvagwardja l-awtonomija regolatorja tal-Ewropa kontra pressjonijiet politiċi; jinnota bi tħassib il-pressjoni esterna madwar l-Att dwar is-Swieq Diġitali u jwissi kontra l-indħil barrani;

20.Jissottolinja li infurzar effettiv jista’ jinkiseb biss jekk ir-regoli biex jiġi indirizzat l-abbuż tad-dominanza (l-Artikolu 102 tat-TFUE) u l-Att dwar is-Swieq Diġitali jaħdmu flimkien, filwaqt li jikkombinaw approċċi ex ante u ex post; jistieden lill-Kummissjoni ttejjeb u tartikola aħjar il-ġabra ta’ regoli tal-kompetizzjoni u diġitali;

21.Jilqa’ l-pubblikazzjoni tar-rapport tal-Kummissjoni fit-28 ta’ April 2026 dwar ir-rieżami tal-Att dwar is-Swieq Diġitali; jinnota l-konklużjoni tal-Kummissjoni, f’dan l-ewwel rieżami tal-Att dwar is-Swieq Diġitali, li l-Att dwar is-Swieq Diġitali huwa adattat għall-iskop tiegħu u ma għandux għalfejn jiġi emendat f’dan l-istadju, għalkemm jidentifika oqsma partikolari ta’ fokus fil-futur, jiġifieri s-servizzi tal-IA u tal-cloud computing, filwaqt li jenfasizza li l-Att dwar is-Swieq Diġitali ma għandux jitqies b’mod iżolat fir-rigward tal-għodod regolatorji li għandhom l-għan li jaqbdu l-IA jew il-katina tal-valur tal-cloud;

22.Jitlob li l-proċess tar-rieżami tal-Att dwar is-Swieq Diġitali, li huwa mistenni li jsir kull tliet snin, ikun trasparenti, ibbażat fuq l-evidenza, proporzjonat, immirat u ambizzjuż, filwaqt li jiżgura l-istabbiltà regolatorja u jevita l-espansjoni bla bżonn tal-obbligi għall-parteċipanti fis-suq; jinsisti li, kull tliet snin, ir-rieżami perjodiku tal-Att dwar is-Swieq Diġitali jivvaluta b’mod sistematiku l-effettività u l-impatt prattiku tal-obbligi eżistenti, iċ-ċertezza tad-dritt għall-parteċipanti fis-suq, l-interazzjoni tal-Att dwar is-Swieq Diġitali ma’ regolamenti speċifiċi għas-settur, u l-ħtieġa ta’ kwalunkwe aġġustament fil-livelli limitu għad-deżinjazzjoni tal-gwardjani fid-dawl tal-iżviluppi tas-suq; jistieden lill-Kummissjoni tinkludi b’mod sistematiku lill-SMEs fil-konsultazzjonijiet ta’ rieżami tal-Att dwar is-Swieq Diġitali;

23.Jisħaq li ż-żieda tal-konċentrazzjoni fis-servizzi tal-cloud tista’ timmina l-kompetizzjoni, l-innovazzjoni u l-awtonomija strateġika tal-UE; jenfasizza li prattiki bħall-iggruppar, il-postijiet tas-suq fuq il-cloud u l-mekkaniżmi kuntrattwali, fosthom il-krediti u l-impenji ta’ nfiq, jistgħu jsaħħu l-intrappolament tal-klijentela u jillimitaw il-qlib tal-klijenti jew l-istrateġiji multi-cloud; jisħaq li l-obbligi tal-cloud iridu jiġu aġġornati; jinnota li, wara l-investigazzjonijiet tas-suq dwar is-servizzi tal-cloud computing li nbdew f’Novembru 2025, il-Kummissjoni ppubblikat il-pożizzjoni preliminari tagħha fil-25 ta’ Ġunju 2026, fejn iddikjarat li Microsoft Azure u Amazon Web Services għandhom jiġu ddeżinjati bħala gwardjani għas-servizzi tal-cloud computing https://digital-strategy.ec.europa.eu/mt/node/16993., filwaqt li l-investigazzjoni tagħha dwar jekk l-Att dwar is-Swieq Diġitali jistax jindirizza b’mod effettiv prattiki li jistgħu jillimitaw il-kompetittività u l-ġustizzja fis-servizzi tal-cloud computing għadha għaddejja16 Il-Kummissjoni Ewropea, “Commission launches market investigations on cloud computing services under the Digital Markets Act” (Il-Kummissjoni tniedi investigazzjonijiet tas-suq dwar is-servizzi tal-cloud computing skont l-Att dwar is-Swieq Diġitali), is-sit web tal-Kummissjoni Ewropea, it-18 ta’ Novembru 2025.; jistieden lill-Kummissjoni tuża l-investigazzjoni tas-suq dwar is-servizzi tal-cloud biex taġġusta l-obbligi tal-Att dwar is-Swieq Diġitali u tiżgura li dawn jindirizzaw b’mod effettiv l-ostakli li jipprevjenu lill-utenti milli jibdlu l-fornituri;

24.Ifakkar li l-infurzar tal-Att dwar is-Swieq Diġitali għadu subottimali; jappoġġja infurzar aktar b’saħħtu tal-Att dwar is-Swieq Diġitali fir-rigward tal-parteċipanti kollha fis-suq li jaqgħu fil-kamp ta’ applikazzjoni tar-regolament tiegħu irrispettivament min-nazzjonalità u jħeġġeġ lill-Kummissjoni tikkonkludi investigazzjonijiet miftuħa fl-iskedi ta’ żmien previsti fl-Att dwar is-Swieq Diġitali; jinnota li l-infurzar effettiv tal-Att dwar is-Swieq Diġitali jirrikjedi riżorsi adegwati u sostenibbli; jistieden lill-Kummissjoni u lill-awtoritajiet baġitarji jiżguraw li jiġu allokati riżorsi adegwati u stabbli għall-infurzar tal-Att dwar is-Swieq Diġitali permezz tal-baġit tal-UE; jitlob għalhekk li jiġu esplorati soluzzjonijiet ta’ finanzjament sostenibbli, filwaqt li jiġi rrispettat il-bilanċ istituzzjonali, b’mod partikolari għall-introduzzjoni ta’ “tariffa tal-Att dwar is-Swieq Diġitali”, simili għat-tariffa skont l-Att dwar is-Servizzi Diġitali, li għandha tiġi esplorata;

25.Jistieden lill-Kummissjoni tagħmel użu sħiħ u proattiv tal-istrumenti kollha ta’ infurzar previsti skont l-Att dwar is-Swieq Diġitali, inklużi investigazzjonijiet tas-suq ulterjuri, proċedimenti ta’ nonkonformità, spezzjonijiet, miżuri interim, multi u pagamenti perjodiċi ta’ penali, sabiex tiġi pprevenuta ċ-ċirkomvenzjoni u tiġi żgurata konformità effettiva;

26.Jirrikonoxxi l-eżistenza ta’ bażi legali għal rimedji strutturali kontra l-abbuż ta’ pożizzjoni dominanti fis-suq; huwa konxju li r-regoli tal-kompetizzjoni tal-UE jistipulaw li r-rimedji strutturali għandhom jintużaw biss bħala l-aħħar alternattiva jekk ir-rimedji komportamentali ma jkunux effettivi, iżda madankollu jiddispjaċih dwar in-nuqqas ta’ rieda tal-Kummissjoni li tindirizza il-pożizzjoni dominanti fis-suq permezz ta’ rimedji strutturali;

27.Jilqa’ r-rikonoxximent tal-Kummissjoni, fl-ewwel rieżami tagħha tal-Att dwar is-Swieq Diġitali, li l-għodod li jibqgħu validi fil-futur inkorporati mill-koleġiżlaturi huma kruċjali biex il-qafas ikun jista’ jirrispondi għall-iżviluppi fis-swieq u t-teknoloġiji; jistieden għalhekk lill-Kummissjoni tinforza l-Att dwar is-Swieq Diġitali, b’mod konsistenti u li jibqa’ validu fil-futur, fir-rigward tal-iżviluppi teknoloġiċi, billi tindirizza fi żmien xieraq is-servizzi xprunati mill-IA u l-infrastrutturi fuq il-cloud, sabiex tipprevjeni forom ġodda ta’ prattiki ta’ intrappolament, esklużjoni jew gwardja, fosthom meta l-gwardjani jisfruttaw il-kontroll fuq id-data, ir-riżorsi tal-computing jew is-servizzi integrati għad-detriment tal-iżviluppaturi emerġenti tal-IA u tal-parteċipanti ġodda u innovattivi fis-suq;

28.Jilqa’ l-fatt li l-Kummissjoni diġà qed timmonitorja l-użu tal-għodod tal-IA fi ħdan is-servizzi ewlenin tal-pjattaforma ddeżinjati fl-ambitu tal-Att dwar is-Swieq Diġitali; jinnota li, fl-ewwel rieżami tagħha tal-Att dwar is-Swieq Diġitali, il-Kummissjoni tirrapporta li, fir-rigward tas-servizzi tal-IA, bdiet tindirizza diversi kwistjonijiet ta’ ġustizzja u kontestabbiltà li dehru b’mod prominenti fil-konsultazzjoni pubblika, pereżempju, permezz tad-djalogu regolatorju tagħha mal-gwardjani dwar l-iżgurar li s-settings prestabbiliti jkunu jistgħu jinbidlu faċilment u li s-servizzi tal-IA jkollhom aċċess ugwali għas-sistemi operattivi; jinnota li f’Jannar 2026 infetħu żewġ proċedimenti ta’ speċifikazzjoni fir-rigward tal-Alphabet li għandhom ukoll dimensjoni tal-IA relatata mal-interoperabbiltà u l-aċċess għad-data tat-tiftix; jistieden lill-Kummissjoni tiżviluppa u tapplika teoriji ġodda ta’ ħsara biex tindirizza t-tisħiħ ulterjuri tal-operaturi stabbiliti u tivvaluta, fir-rieżami li jmiss tal-Att dwar is-Swieq Diġitali, jekk il-lista attwali ta’ servizzi ewlenin tal-pjattaforma tirriflettix b’mod adegwat ir-realtajiet tas-suq, inkluż f’oqsma bħall-mudelli tal-IA, iċ-chatbots tal-IA u s-servizzi tal-cloud, is-servizzi ewlenin ta’ assistenti virtwali u s-sistemi operattivi tat-TV konnessi; jistieden lill-Kummissjoni tinkludi lill-SMEs, lin-negozji ġodda, lill-assoċjazzjonijiet tal-industrija, lill-esperti akkademiċi u lill-organizzazzjonijiet tal-konsumaturi fl-Istati Membri kollha fil-konsultazzjonijiet ta’ rieżami tal-Att dwar is-Swieq Diġitali;

29.Jisħaq li l-infurzar tal-Att dwar is-Swieq Diġitali japplika għall-gwardjani kollha deżinjati irrispettivament min-nazzjonalità jew mill-oriġini, u jistieden lill-Kummissjoni tapplika l-obbligi tal-Att dwar is-Swieq Diġitali b’mod konsistenti; jilqa’ l-koordinazzjoni bejn il-Kummissjoni u l-awtoritajiet nazzjonali tal-kompetizzjoni dwar il-kondotta relatata mal-Att dwar is-Swieq Diġitali; iħeġġeġ lill-Kummissjoni tieħu azzjoni deċiżiva kif xieraq;

30.Jistieden lill-Kummissjoni teżamina, fil-kuntest tal-implimentazzjoni tad-Direttiva dwar is-Suq Uniku Diġitali17 Id-Direttiva (UE) 2019/790 tal-Parlament Ewropew u tal-Kunsill tas-17 ta’ April 2019 dwar id-drittijiet tal-awtur u drittijiet relatati fis-Suq Uniku Diġitali u li temenda d-Direttivi 96/9/KE u 2001/29/KE (ĠU L 130, 17.5.2019, p. 92, ELI: http://data.europa.eu/eli/dir/2019/790/oj)., l-abbużi potenzjali mill-gwardjani skont l-Att dwar is-Swieq Diġitali fin-negozjati tagħhom mal-edituri tal-istampa, u b’mod partikolari biex teżamina jekk negozjati bħal dawn jikkonformawx mal-obbligi FRAND (ġusti, raġonevoli, u mhux diskriminatorji), filwaqt li jiżguraw remunerazzjoni ekwa, termini trasparenti u aċċess mhux diskriminatorju għal udjenzi online;

31.Jistieden lill-Kummissjoni tagħmel użu sħiħ mill-Artikolu 13 biex tiġi indirizzata kwalunkwe ċirkomvenzjoni mill-gwardjani tal-obbligi tagħhom skont l-Artikoli 5 u 6 tal-Att dwar is-Swieq Diġitali;

32.Iħeġġeġ lill-Kummissjoni tagħmel użu xieraq mill-miżuri interim biex twaqqaf kwalunkwe prattika li tagħmel ħsara lill-kompetizzjoni, speċjalment fi swieq diġitali li qed jevolvu malajr; Jistieden lill-Kummissjoni timmodernizza r-Regolament (KE) 1/200318 Ir-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (ĠU L 1, 4.1.2003, p. 1, ELI: http://data.europa.eu/eli/reg/2003/1/oj). u r-Regolament ta’ Implimentazzjoni (KE)u 773/200419 Ir-Regolament tal-Kummissjoni (KE) Nru 773/2004 tas-7 ta’ April 2004 dwar it-tmexxija ta’ proċeduri mill-Kummissjoni skont l-Artikolu 81 u 82 tat-Trattat tal-KE (ĠU L 123, 27.4.2004, p. 18, ELI: http://data.europa.eu/eli/reg/2004/773/oj). biex jittejbu l-effiċjenza, iċ-ċertezza tad-dritt u l-proporzjonalità tal-infurzar antitrust tal-UE; jappoġġja qafas iċċarat għal miżuri interim f’każijiet ta’ ħsara serja jew irreparabbli lill-kompetizzjoni, b’salvagwardji xierqa għall-proċess dovut;

33.Jistieden lill-Kummissjoni tindirizza investigazzjonijiet antitrust eċċessivament twal; jitlob limiti ta’ żmien proċedurali vinkolanti fuq l-investigazzjonijiet antitrust biex jiġi pprevenut dewmien żejjed li jagħmel ħsara liċ-ċertezza tad-dritt u lid-drittijiet tad-difiża;

34.Iħeġġeġ lill-Kummissjoni twettaq studju komprensiv dwar l-effett deterrenti tal-multi tagħha; jinsisti li s-sanzjonijiet iridu jkunu għoljin biżżejjed biex jaqbżu l-benefiċċju ekonomiku illeċitu li jirriżulta mill-ksur;

35.Jisħaq fuq l-importanza ta’ azzjonijiet effettivi għad-danni biex jikkomplementaw l-infurzar tal-antitrust pubbliku, filwaqt li jiġi żgurat li l-vittmi li sofrew il-ksur tal-Artikoli 101 u 102 tat-TFUE jkunu jistgħu jingħataw kumpens sħiħ; jistieden lill-Kummissjoni u lill-Istati Membri jiżguraw l-implimentazzjoni effettiva tad-Direttiva dwar id-Danni Antitrust20 Id-Direttiva 2014/104/UE tal-Parlament Ewropew u tal-Kunsill tas-26 ta' Novembru 2014 dwar ċerti regoli li jirregolaw l-azzjoni għad-danni skont il-liġi nazzjonali għall-ksur tad-dispożizzjonijiet tal-liġi dwar il-kompetizzjoni tal-Istati Membri u tal-Unjoni Ewropea (ĠU L 349, 5.12.2014, p. 1, ELI: http://data.europa.eu/eli/dir/2014/104/oj). u jneħħu l-ostakli li jifdal għall-infurzar privat;

36.Jafferma mill-ġdid il-ħtieġa ta’ kooperazzjoni b’saħħitha u effettiva bejn il-Kummissjoni u l-awtoritajiet nazzjonali kompetenti fi ħdan in-NEK kif ukoll mal-partijiet ikkonċernati privati u pubbliċi rilevanti u l-organizzazzjonijiet tal-konsumatur; jissottolinja li l-awtoritajiet nazzjonali kompetenti jeħtiġilhom jibqgħu politikament indipendenti u b’biżżejjed riżorsi, u li d-Direttiva NEK+21 Id-Direttiva (UE) 2019/1 tal-Parlament Ewropew u tal-Kunsill tal-11 ta’ Diċembru 2018 sabiex l-awtoritajiet tal-kompetizzjoni tal-Istati Membri jingħataw setgħat biex ikunu inforzaturi aktar effettivi, u biex jiġi żgurat il-funzjonament tajjeb tas-suq intern (ĠU L 11, 14.1.2019, p. 3, ELI: http://data.europa.eu/eli/dir/2019/1/oj). għandha tiġi trasposta u implimentata bis-sħiħ u b’mod konsistenti fl-Istati Membri kollha; jitlob konverġenza mtejba tal-istandards tal-infurzar, kondiviżjoni f’waqtha tal-informazzjoni, u allokazzjoni ċara tal-kompetenzi biex jiġu evitati proċedimenti duplikati; jisħaq li n-NEK jeħtieġ li jimxi lejn forma integrata bis-sħiħ tal-kooperazzjoni, bil-ħsieb li tissaħħaħ il-kosteffiċjenza u tittejjeb il-ġestjoni tal-aspetti transfruntiera, fosthom billi jiġu permessi investigazzjonijiet konġunti u teħid ta’ deċiżjonijiet konġunt; jistieden lin-NEK ikompli jiggwida lill-kumpaniji, speċjalment lill-SMEs, fl-applikazzjoni tal-ġabra ta’ regoli tal-kompetizzjoni;

37.Jistieden lill-Kummissjoni u lill-awtoritajiet nazzjonali tal-kompetizzjoni jistabbilixxu mekkaniżmi tal-ilmenti li jkunu faċilment aċċessibbli u faċli biex jintużaw mill-SMEs għall-prattiki antikompetittivi, filwaqt li tiġi żgurata l-ġestjoni rapida u effettiva tal-każijiet;

38.Jinnota l-investigazzjonijiet attwali ta’ kumpaniji mhux tal-UE, inkluża l-investigazzjoni preliminari tal-Kummissjoni dwar it-tariffi tal-Visa u tal-Mastercard; jistieden lill-Kummissjoni tiżgura li s-suq tal-pagamenti jibqa’ kompetittiv, trasparenti u aċċessibbli għall-konsumaturi u għan-negozji; jenfasizza l-ħtieġa li jiġi rieżaminat ir-Regolament dwar it-Tariffi tal-Interkambju22 Ir-Regolament (UE) 2015/751 tal-Parlament Ewropew u tal-Kunsill tad-29 ta’ April 2015 dwar it-tariffi tal-interkambju għat-tranżazzjonijiet ta’ pagament permezz ta’ kard (ĠU L 123, 19.5.2022, p. 1, ELI: http://data.europa.eu/eli/reg/2015/751/oj). biex tiġi vvalutata l-effettività tiegħu fl-indirizzar taż-żieda fit-tariffi; jistieden lill-Kummissjoni tikkonkludi l-investigazzjonijiet li għaddejjin bħalissa fis-settur tal-pagamenti mingħajr dewmien żejjed; jenfasizza li l-euro diġitali huwa opportunità kruċjali biex titnaqqas id-dipendenza żejda fuq skemi ta’ kards mhux tal-UE, u biex jissaħħu l-kompetizzjoni u l-awtonomija strateġika tal-UE fis-settur tal-pagamenti, inkluż billi jgħin biex jiġu żgurati kundizzjonijiet ta’ pprezzar aktar kompetittivi għan-negozji, b’mod partikolari l-SMEs;

39.Jissottolinja l-importanza tal-kompetizzjoni fis-settur bankarju u t-tlestija tal-unjoni bankarja; jistieden lill-Kummissjoni tuża l-istrumenti kollha disponibbli biex tiżgura kompetizzjoni ġusta u timmonitorja x-xejriet fis-settur bankarju matul perjodi ta’ inflazzjoni għolja; jenfasizza l-importanza u l-urġenza tar-rapport li jmiss tal-Kummissjoni dwar il-kompetittività tas-settur bankarju tal-UE u jistenna li l-Kummissjoni tadotta r-rapport sa Lulju 2026; jilqa’, barra minn hekk, il-valutazzjoni li jmiss tal-funzjonament tad-Direttiva 2002/87/KE23 Id-Direttiva 2002/87/KE tal-Parlament Ewropew u tal-Kunsill tas-16 ta’ Diċembru 2002 dwar is-superviżjoni supplementari ta’ istituzzjonijiet ta’ kreditu dwar impriżi ta’ assigurazzjoni u ditti tal-investiment f’konglomerat finanzjarju u li temenda d-Direttivi tal-Kunsill 73/239/KEE, 79/267/KEE, 92/49/KEE, 92/96/KEE, 93/6/KEE u 93/22/KEE, u d-Direttivi 98/78/KE u 2000/12/KE tal-Parlament Ewropew u tal-Kunsill (ĠU L 35, 11.2.2003, p. 1, ELI: http://data.europa.eu/eli/dir/2002/87/oj). u d-Direttiva Solvibbiltà II24 Id-Direttiva 2009/138/KE tal-Parlament Ewropew u tal-Kunsill tal-25 ta’ Novembru 2009 dwar il-bidu u l-eżerċizzju tan-negozju tal-Assigurazzjoni u tar-Riassigurazzjoni (Solvibbiltà II) (ĠU L 335, 17.12.2009, p. 1, ELI: http://data.europa.eu/eli/dir/2009/138/oj). dwar aspetti relatati mal-kundizzjonijiet ekwi fost il-parteċipanti fis-suq tal-assigurazzjoni u dak bankarju;

40.Jinnota l-eżistenza ta’ oligopolji fil-forniment ta’ ċerti servizzi li huma kritiċi għall-parteċipanti fis-suq finanzjarju tal-UE, bħall-aggregaturi tas-suq u l-fornituri tal-konnettività li huma kkaratterizzati minn għadd limitat ta’ fornituri, diffikultà sinifikanti biex wieħed jaqleb minn fornitur għal ieħor, jew setgħa asimetrika fl-iffissar tal-prezzijiet għall-benefiċċju tal-fornitur, li fl-aħħar mill-aħħar tgħolli l-kostijiet għall-investituri; jinnota wkoll li l-akbar tliet aġenziji ta’ klassifikazzjoni tal-kreditu u l-akbar erba’ kumpaniji fis-suq tal-awditjar għad għandhom ishma mis-suq ta’ aktar minn 90 %; iħeġġeġ lill-Kummissjoni tinvestiga l-oligopolji eżistenti u tieħu l-miżuri xierqa għall-benefiċċju tal-kompetizzjoni tal-UE;

41.Ifakkar li l-Bank Ċentrali Ewropew innota li l-prezzijiet tal-ikel għadhom għoljin, u jaffettwaw b’mod partikolari lill-konsumaturi vulnerabbli; jesprimi tħassib dwar il-konċentrazzjoni għolja tas-suq f’ċerti livelli tal-katina tal-provvista agrikola u tal-ikel; iħeġġeġ lill-Kummissjoni tivvaluta l-iskala u l-impatt tax-xiri ta’ alleanzi, u tkompli tanalizza l-effetti tagħhom mhux biss fuq il-prezzijiet iżda wkoll fuq il-kapaċità tal-bdiewa u tal-produtturi agroalimentari li jipprovdu prodotti tajbin għas-saħħa, sikuri u sostenibbli lill-konsumaturi; jistieden lill-Kummissjoni tivvaluta jekk humiex meħtieġa linji gwida addizzjonali dwar l-applikazzjoni tal-Artikolu 102 tat-TFUE dwar l-abbużi ta’ sfruttament, inklużi l-prezzijiet eċċessivi jew inġusti, sabiex tiġi promossa ċ-ċertezza tad-dritt u l-infurzar isir aktar effettiv fi swieq tal-konsumatur ikkonċentrati ħafna;

42.Jisħaq li l-Ewropa ma għandhiex kumpaniji fuq skala kbira li kapaċi jikkompetu globalment f’diversi oqsma strateġiċi ewlenin; iqis l-espansjoni fis-suq uniku bħala imperattiv strateġiku tal-UE biex timmobilizza l-investimenti, tixpruna l-kompetittività, tinvesti fl-innovazzjoni u tippermetti lill-kumpaniji tal-UE jikkompetu b’mod effettiv fis-swieq globali, kif enfasizzat mir-rapport ta’ Letta; jisħaq li t-tlestija tas-suq uniku u t-tneħħija tal-ostakli interni jibqgħu prijoritajiet ewlenin f’dan ir-rigward; jinnota li l-ostakli strutturali għall-espansjoni fl-UE jistgħu jirriżultaw f’xiri ta’ kumpaniji innovattivi tal-UE minn atturi mhux tal-UE, b’effetti negattivi potenzjali fuq il-kompetizzjoni fit-tul u l-kapaċità tal-innovazzjoni fl-UE; iqis għalhekk li l-kontroll tal-fużjonijiet għandu jqis bis-sħiħ il-kapaċità tal-kumpaniji tal-UE li jinvestu fl-innovazzjoni;

43.Iqis li l-politika tal-kompetizzjoni m’għandhiex toħloq ostakli bla bżonn għall-kumpaniji li jeħtieġ li jespandu sabiex jikkompetu globalment, filwaqt li jinnota li mhux il-kumpaniji kollha tal-UE għandhom bżonn jespandu; jissottolinja li l-UE tiffjorixxi fuq ir-rabta vitali bejn l-intrapriżi kbar u żgħar; iqis li l-iskala kompetittiva għandha tirriżulta primarjament mill-kompetizzjoni ġusta, mill-infurzar robust tal-antitrust u mill-approfondiment tas-suq uniku, li huma l-pedament tal-ekonomija soċjali tas-suq tal-UE u jibqgħu l-ixprunatur reali għall-innovazzjoni;

44.Jistieden lill-Kummissjoni tapplika l-politika dwar il-fużjonijiet b’mod dinamiku, abbażi ta’ valutazzjoni ekonomika u legali, filwaqt li tanalizza bis-sħiħ il-kunċett tal-benesseri tal-konsumatur fil-valutazzjoni tal-kompetizzjoni, u tqis l-effetti ekonomiċi usa’ tal-fużjonijiet, tadatta l-politika għal realtajiet ġodda tas-suq inklużi l-ekosistemi diġitali, l-IA, l-enerġija u d-difiża, u tanalizza l-effetti tal-konċentrazzjonijiet fit-tul, filwaqt li tieħu approċċ li jħares ’il quddiem; iħeġġeġ lill-Kummissjoni tkompli timmonitorja l-evoluzzjoni tas-saħħa fis-suq fl-Ewropa, inkluż l-impatt tal-fużjonijiet fuq is-sostenibbiltà, l-innovazzjoni u r-reżiljenza fit-tul;

45.Jappella għal reviżjoni ambizzjuża u bbażata fuq l-evidenza tal-linji gwida tal-UE dwar il-fużjonijiet sabiex ikunu allinjati aħjar mar-realtajiet il-ġodda tas-suq u mal-prioritajiet tal-UE għat-trawwim ta’ Ewropa aktar reżiljenti u kompetittiva filwaqt li jkomplu jissalvagwardjaw livell għoli ta’ benesseri tal-konsumatur; jinsisti li, filwaqt li jibqa’ bbażat fuq l-analiżi tal-kompetizzjoni u jissalvagwardja l-kompetizzjoni effettiva fis-swieq nazzjonali u fi ħdan is-suq uniku, il-kontroll tal-fużjonijiet għandu jivvaluta l-fużjonijiet pan-Ewropej b’mod li jħares’ il quddiem u jiżgura li kwalunkwe konsolidazzjoni li toħloq “promoturi tal-UE” ssaħħaħ il-benesseri tal-konsumatur, il-kontestabbiltà tas-suq u r-reżiljenza fit-tul, b’mod partikolari f’setturi ewlenin bħat-telekomunikazzjoni, il-banek, il-pagamenti, id-difiża u l-enerġija; jitlob linji gwida ġodda dwar il-kontroll tal-fużjonijiet biex tiġi żgurata ċ-ċertezza tad-dritt għan-negozji fil-ħolqien ta’ atturi pan-Ewropej li jrawmu l-espansjoni favur il-kompetittività, filwaqt li jiżguraw li s-setgħat ta’ intervent nazzjonali, inklużi s-setgħat ta’ veto, jintużaw biss f’każijiet debitament ġustifikati u proporzjonati;

46.Jistieden lill-Kummissjoni tadotta approċċ dinamiku u li jħares ’il quddiem għall-fużjonijiet, filwaqt li tqis il-kisbiet fl-effiċjenza, inklużi, pereżempju, l-ekonomiji ta’ skala u l-kisbiet fis-sostenibbiltà, kmieni kemm jista’ jkun fil-proċedura, filwaqt li tiżgura t-trasparenza u l-prevedibbiltà u tippermetti lill-kumpaniji jiffurmaw alleanzi meta jikkontribwixxu għall-innovazzjoni, ir-reżiljenza għat-tibdil fil-klima u s-sigurtà, u tirrifletti approċċ għall-valutazzjoni tas-saħħa tas-suq u r-realtajiet speċifiċi għas-settur li jestendi lil hinn mill-prezzijiet u l-ishma mis-suq u jinkludi wkoll effetti fuq il-pagi u l-kundizzjonijiet tal-impjieg;

47.Ifakkar li l-kompetizzjoni tissalvagwardja l-għażla tal-konsumatur, id-diversità tas-suq u l-prezzijiet affordabbli; jinnota d-deċiżjoni mill-azzjonisti tal-Warner Bros. Discovery fit-23 ta’ April 2026 li tapprova l-ftehim ta’ fużjoni ma’ Paramount Skydance. jistieden lill-Kummissjoni tapplika kontroll rigoruż tal-fużjonijiet fis-settur awdjoviżiv u tal-media, timmonitorja l-impatt tal-konsolidazzjoni tas-suq fis-suq uniku u tippermetti lill-atturi tal-UE jespandu;

48.Jinnota li l-pjattaformi online taħt il-kamp ta’ applikazzjoni tal-Att dwar is-Swieq Diġitali akkwistaw madwar 700 kumpanija iżgħar mis-sena 2000, filwaqt li l-Kummissjoni ġiet innotifikata biss bi 19 minn dawn it-tranżazzjonijiet, peress li l-biċċa l-kbira minnhom kienu jaqgħu taħt il-livelli limitu ta’ notifika bbażati fuq il-fatturat; jistieden lill-Kummissjoni tidentifika “akkwiżizzjonijiet predatorji” (jiġifieri meta kumpanija takkwista l-kontroll ta’ kumpanija innovattiva biex teliminahom bħala sors possibbli ta’ kompetizzjoni futura) u tadatta r-regolamentazzjoni b’tali mod li tipprevjeni tali akkwiżizzjonijiet, partikolarment fl-IA, fil-farmaċewtika u f’setturi strateġiċi oħra; isostni li għandha tiżdied bażi legali għas-suq uniku fir-Regolament tal-KE dwar il-Fużjonijiet jekk jiġi rieżaminat, sabiex il-koleġiżlaturi jiġu involuti bis-sħiħ, b’mod simili għal dak tal-Att dwar is-Swieq Diġitali; iħeġġeġ lill-Istati Membri jagħtu lill-awtoritajiet nazzjonali tal-kompetizzjoni setgħat ta’ intervent sabiex ikunu jistgħu jirrieżaminaw il-fużjonijiet u l-akkwiżizzjonijiet, jekk dan għadu mhux il-każ, filwaqt li jiżguraw iċ-ċertezza tad-dritt u jevitaw il-piż bla bżonn fuq l-SMEs u l-istart-ups;

49.Jagħraf ix-xejra dejjem akbar tal-investiment barrani u s-sjieda ta’ klabbs multipli fl-isport Ewropew, kif ukoll iż-żieda tal-ipprezzar dinamiku tal-biljetti, u jistieden lill-Kummissjoni tqis l-implikazzjonijiet ta’ dan l-iżvilupp meta tappoġġja sforzi biex tissalvagwardja l-integrità finanzjarja u l-bilanċ kompetittiv tal-isport Ewropew; jappella lill-Kummissjoni u lill-Istati Membri jqisu l-għażliet kollha regolatorji possibbli, inkluża l-projbizzjoni tal-ipprezzar dinamiku fl-avvenimenti sportivi u kulturali live fl-Att dwar l-Ekwità Diġitali, bil-għan li jiġu protetti l-konsumaturi u jinżamm il-valur soċjali u pubbliku tal-isport u tal-kultura;

50.Jissottolinja l-ħtieġa ta’ analiżi bir-reqqa tar-regoli dwar l-għajnuna mill-Istat, b’mod partikolari għall-kumpaniji li joperaw f’setturi strateġiċi bħall-enerġija, it-teknoloġija u l-innovazzjoni; jisħaq fuq l-importanza li tiġi żgurata l-effettività tal-għajnuna mill-Istat fl-agrikoltura, fil-loġistika u fit-trasport; jinnota l-kapaċitajiet fiskali diverġenti tal-Istati Membri, iwissi li għajnuna frammentata mill-Istat toħloq kundizzjonijiet mhux ekwi u jappella lill-Kummissjoni timmonitorja dawn l-effetti; iqis li kwalunkwe għajnuna mill-Istat mogħtija għandha tkun konsistenti mad-dritt u l-prinċipji tal-UE, inklużi l-objettivi tal-politika ambjentali u soċjali tal-UE;

51.Jilqa’ l-Qafas għall-Għajnuna mill-Istat tal-Patt għal Industrija Nadifa; jitlob li l-Qafas għall-Għajnuna mill-Istat tal-Patt għal Industrija Nadifa jiġi implimentat b’mod immirat u proporzjonat, jiżgura piż minimu fuq l-Istati Membri, jipprevjeni t-tlielaq għas-sussidji u jippreżerva l-integrità tas-suq intern, filwaqt li jinkludi salvagwardji b’saħħithom għat-trasparenza, il-proporzjonalità u l-effettività ambjentali;

52.Ifakkar li għajnuna mill-Istat temporanja u mmirata tista’ tkun xierqa fi żminijiet ta’ kriżi; itenni l-importanza tal-Qafas għall-Għajnuna mill-Istat tal-Patt għal Industrija Nadifa fl-appoġġ ta’ setturi vulnerabbli, fil-kuntest tal-prezzijiet tal-fjuwil li qed jiżdiedu b’mod rapidu minħabba s-sitwazzjoni ġeopolitika attwali; jinnota madankollu s-sejbiet tal-Qorti Ewropea tal-Awdituri (Rapport Speċjali 21/2024) li jidentifikaw nuqqasijiet fil-monitoraġġ mill-Kummissjoni tal-għajnuna mill-Istat fi żminijiet ta’ kriżi u jitlob monitoraġġ aktar strett tan-notifika tal-għajnuna mill-Istat mill-Kummissjoni u rappurtar u trasparenza msaħħa dwar l-għajnuna mill-Istat f’konformità mar-rakkomandazzjonijiet tal-Qorti Ewropea tal-Awdituri;

53.Jinnota li aktar minn tliet kwarti tal-għajnuna mill-Istat hija kkonċentrata f’żewġ Stati Membri biss, li jenfasizza r-riskji ta’ frammentazzjoni u ta’ kundizzjonijiet ekwi żbilanċjati fis-suq intern;

54.Jenfasizza r-rwol tal-għajnuna mill-Istat bħala għodda biex tnaqqas id-disparitajiet ekonomiċi bejn ir-reġjuni u l-gżejjer l-aktar żviluppati tal-UE, iż-żoni interni, ir-reġjuni ultraperiferiċi, iż-żoni ekonomikament żvantaġġjati, u l-partijiet kollha tal-UE affettwati minn restrizzjonijiet naturali; jitlob flessibbiltà akbar u anqas restrizzjonijiet fuq l-għajnuna mill-Istat għall-gżejjer u r-reġjuni l-aktar vulnerabbli tal-UE;

55.Jistenna li r-rieżami tar-Regolament Ġenerali ta’ Eżenzjoni ta’ Kategorija25 Ir-Regolament tal-Kummissjoni (UE) Nru 651/2014 tas-17 ta’ Ġunju 2014 li jiddikjara li ċerti kategoriji ta’ għajnuna huma kompatibbli mas-suq intern skont l-Artikoli 107 u 108 tat-Trattat (ĠU L 187, 26.6.2014, p. 1, ELI: http://data.europa.eu/eli/reg/2014/651/oj). jsolvi l-kwistjonijiet attwali rigward id-definizzjoni ta’ “impriża f’diffikultà” u jimmodernizza u jissimplifika r-regoli dwar l-għajnuna mill-Istat sabiex titnaqqas il-burokrazija u tingħata spinta lill-kompetittività tal-UE; jilqa’ l-ftuħ tal-konsultazzjoni pubblika biex jinġabar l-input dwar l-ambitu u l-kontenut tar-rieżami;

56.Jilqa’ l-adozzjoni ta’ Deċiżjoni SGEI riveduta, biex l-Istati Membri jkunu jistgħu jappoġġjaw il-provvista ta’ proġetti ta’ akkomodazzjoni deċenti, sostenibbli, effiċjenti fl-użu tal-enerġija, soċjalment inklużivi u affordabbli, anke għall-unitajiet domestiċi b’introjtu medju; jistieden lill-Kummissjoni timmonitorja l-implimentazzjoni tad-Deċiżjoni SGEI riveduta u tivvaluta jekk il-livelli limitu u l-kundizzjonijiet humiex biżżejjed flessibbli biex jissodisfaw il-ħtiġijiet tal-Istati Membri; jitlob proċeduri simplifikati ta’ notifika għall-miżura ta’ għajnuna mill-Istat relatati mal-SGEI li ma jippreżentawx riskji sinifikanti għall-kompetizzjoni;

57.Jistieden lill-Kummissjoni tivvaluta l-impatt tal-konċentrazzjonijiet tas-suq fis-settur tal-proprjetà immobbli u fis-swieq relatati, bħall-kostruzzjoni u l-amministrazzjoni tal-proprjetà, biex jiġi żgurat li l-kompetizzjoni effettiva tgħin tikkontrolla l-prezzijiet u ttejjeb l-aċċess għall-akkomodazzjoni;

58.Jinnota l-effetti distorsivi tal-ippjanar aggressiv tat-taxxa u tas-sistemi tat-taxxa, inklużi ftehimiet dwar it-taxxa preferenzjali, fuq il-kompetizzjoni ġusta, peress li jistgħu joħonqu l-innovazzjoni u jipperikolaw il-kontestabbiltà tas-swieq, speċjalment għall-SMEs; jilqa’ r-rakkomandazzjoni tal-Kummissjoni tal-14 ta’ Lulju 202026 Ir-Rakkomandazzjoni tal-Kummissjoni (UE) 2020/1039 tal-14 ta’ Lulju 2020 dwar l-għoti ta’ appoġġ finanzjarju mill-Istat lil impriżi fl-Unjoni bil-kundizzjoni li ma jkunx hemm rabtiet ma’ ġuriżdizzjonijiet li ma jikkooperawx (ĠU L 227, 16.7.2020, p. 76, ELI: http://data.europa.eu/eli/reco/2020/1039/oj). biex ma jingħatax appoġġ finanzjarju lill-kumpaniji b’rabtiet ma’ rifuġji fiskali, filwaqt li jiġu protetti l-kontribwenti onesti; jitlob li l-kumpaniji stabbiliti f’pajjiżi elenkati fil-lista tal-UE ta’ ġuriżdizzjonijiet li ma jikkooperawx għal finijiet ta’ taxxa, kif adottata mill-Kunsill, jiġu esklużi milli jirċievu għajnuna mill-Istat u jistieden lill-Kummissjoni tivvaluta jekk il-qafas attwali jikkontribwixxix għal sforzi usa’ biex jiġu miġġielda l-ippjanar aggressiv tat-taxxa u l-prattiki ta’ rifuġju fiskali;

59.Jiddeplora n-nuqqas ta’ informazzjoni li jirċievi dwar ir-reviżjoni u l-implimentazzjoni tar-regoli tal-kompetizzjoni u jisħaq li l-Parlament għandu jkun involut biżżejjed fit-tfassil tal-politika tal-kompetizzjoni; jenfasizza wkoll il-ħtieġa li jkun hemm trasparenza mal-Parlament fid-diskussjonijiet kollha ma’ pajjiżi mhux tal-UE li jistgħu jaffettwaw l-infurzar tal-Att dwar is-Swieq Diġitali;

60.Jitlob, f’dak il-kuntest, djalogu strutturat u regolari bejn il-Kummissjoni u l-Parlament dwar il-politika tal-kompetizzjoni, fosthom dwar ir-rieżami u l-implimentazzjoni tar-regoli tal-kompetizzjoni; jistieden lill-Kummissjoni tipprovdi lill-kumitat kompetenti tal-Parlament informazzjoni komprensiva u fi żmien xieraq rigward deċiżjonijiet sinifikanti dwar l-infurzar, proposti leġiżlattivi u strumenti legali nonvinkolanti ewlenin sinifikanti; jitlob il-konklużjoni ta’ arranġament interistituzzjonali biex jiġi fformalizzat ir-rwol tal-Parlament fis-sorveljanza tal-politika tal-kompetizzjoni, inkluża l-konsultazzjoni dwar l-istabbiliment tal-prijoritajiet għal-linji gwida u għall-oqfsa;

61.Iwissi kontra d-dipendenza żejda fuq strumenti ta’ liġi mhux vinkolanti bħal gwida u oqfsa temporanji li fihom l-involviment tal-Parlament huwa limitat; jistieden lill-Kunsill Ewropew jadotta deċiżjoni skont l-Artikolu 48(7)(2) tat-Trattat dwar l-Unjoni Ewropea li tipprevedi l-adozzjoni ta’ atti leġiżlattivi fil-qasam tal-politika tal-kompetizzjoni f’konformità mal-proċedura leġiżlattiva ordinarja;

62.Jippromwovi l-iskambju tal-aħjar prattika f’fora internazzjonali, bħan-Network Internazzjonali dwar il-Kompetizzjoni u l-Kumitat tal-Kompetizzjoni tal-Organizzazzjoni għall-Kooperazzjoni u l-Iżvilupp Ekonomiċi; jistieden lill-Kummissjoni tistinka għal djalogu u kooperazzjoni kontinwi fil-livell internazzjonali, inkluż permezz ta’ ftehimiet ta’ kooperazzjoni tat-tieni ġenerazzjoni li jippermettu skambju ta’ informazzjoni aktar effettiv bejn l-awtoritajiet tal-kompetizzjoni, filwaqt li jiddispjaċih li dan ma ġiex segwit biżżejjed fil-passat; jistieden lill-Kummissjoni tiżviluppa strateġija għall-UE biex tieħu rwol ewlieni fil-livell internazzjonali fil-promozzjoni ta’ kompetizzjoni effettiva;

63.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.