1.ag tabhairt dá haire, tar éis na géarchéime móire airgeadais, go bhfuil 91 cháin earnáilsonracha tugtha isteach ag na Ballstáit chun cáin a ghearradh ar an earnáil airgeadais, rud a fhágann go bhfuil tírdhreach cánach an-ilroinnte ann; ag tabhairt dá haire go ngintear, leis an tírdhreach cánach ilroinnte sin, costais bhreise oibríochtúla agus riaracháin agus go méadaítear bacainní struchtúracha ar leathnú trasteorann soláthraithe seirbhísí airgeadais, rud lena lagaítear earnáil airgeadais an Aontais agus a cumas infheistíochta agus lena mbaintear an bonn ó chuspóirí SIU agus an Aontais Baincéireachta;

2.ag tabhairt dá haire go léirítear, le difríochtaí i gcórais chánach náisiúnta, roghanna beartais intíre; ag tabhairt dá haire go bhfuil obair á déanamh go leanúnach ar an leibhéal idirnáisiúnta maidir le haistriú brabúis; á iarraidh go ndéanfaí comhordú neartaithe ar leibhéal AE, lena n-áirítear i gcur chun feidhme Threoir Cholún 2, rialacha láidre frithsheachanta agus ceanglais trédhearcachta, go háirithe i réimse an tuairiscithe phoiblí de réir tíre;

3.ag tabhairt dá haire go méadaítear, le hilroinnt na gcóras cánach náisiúnta, an riosca a bhaineann le cánachas dúbailte trasteorann agus, arna spreagadh ag castacht riaracháin agus dhlíthiúil, gur féidir bac a chur ar fhás earnáil airgeadais AE agus gur bac é ar chomhtháthú níos doimhne mhargaí airgeadais AE; ag cur béim ar an bhfíoras gur cheart go mbeadh sé ríthábhachtach i gcónaí cánachas dúbailte a sheachaint agus ualaí riaracháin a laghdú; á chur i bhfáth, áfach, nár cheart dírialáil ná sodar go grinneall i gcaighdeáin chánach a bheith mar thoradh ar iarrachtaí simpliúcháin;

4.á chur i bhfáth go gcruthaítear, le difríochtaí i nósanna imeachta náisiúnta maidir le cáin shiarchoinneálach, ualaí riaracháin agus bacainní ar infheistíocht trasteorann, mar a aithnítear i straitéis ACI an Choimisiúin; á chur in iúl gur geal léi gur glacadh Treoir FASTER; á iarraidh go ndéanfaí tuilleadh dul chun cinn i dtreo creat níos comhordaithe agus níos uaillmhianaí;

5.á iarraidh ar an gComhairle cinneadh a dhéanamh maidir leis an togra ón gCoimisiún le haghaidh Treoir ón gComhairle lena mbunaítear córas Cánach Ceannoifige do mhicrifhiontair, d’fhiontair bheaga agus d’fhiontair mheánmhéide, agus lena leasaítear Treoir 2011/16/AE, agus rún reachtach na Parlaiminte an 10 Aibreán 2024 á chur i gcuntas go cuí;

6.ag tabhairt faoi deara, thairis sin, nár coinníodh na rialacha cánach atá ann cheana suas go hiomlán le teacht chun cinn táirgí airgeadais nua agus bonneagar margaidh nua; á chur i bhfios go láidir gur cúis mhór imní í an ilroinnt de bharr rath na nuabhanc, mar shampla, bainc dhigiteacha amháin, bainc is dúshlánaí nó bainc teicneolaíochta airgeadais; á thabhairt le fios go bhfuil méadú suntasach tagtha ar sciar na dtaiscí trasteorann atá i seilbh na mbanc sin le sé bliana anuas; á chur i bhfios go láidir gur féidir, le difríochtaí i rialacha cánach idir bainc agus eintitis neamhbhainc, saobhadh a chruthú;

7.ag cur béim ar an bhfíoras go ndéantar, leis na sonraí neamhleora maidir leis an ualach cánach éifeachtach ar fud earnáil airgeadais AE, bac a chur ar cheapadh beartas fianaisebhunaithe agus ar mheasúnú ar thionchair bheartais ar iompraíocht an mhargaidh, ar iomaíocht agus ar chobhsaíocht airgeadais; á chur i bhfios go láidir go bhfuil gá le trédhearcacht agus le húsáid níos fearr a bhaint as na sonraí atá ann cheana mar réamhriachtanas chun athchóiriú comhleanúnach a dhéanamh ar chánachas na hearnála airgeadais;

8.á chur i bhfáth, dá mbainfí bacainní cánach ar infheistíocht trasteorann trí rialacha comhleanúnacha ar leibhéal an Aontais, go laghdófaí costais chomhlíonta, go bhfeabhsófaí éifeachtúlacht an mhargaidh, go méadófaí soiléireacht dhlíthiúil do shreafaí caipitil trasteorann agus go neartófaí iomaíochas sheirbhísí airgeadais an Aontais, agus srian á chur ag an am céanna le himghabháil cánach agus le pleanáil ionsaitheach cánach; á chur i bhfáth go bhfuil gá le sraith chomhleanúnach rialacha d’earnáil airgeadais AE, agus ceannasacht chánach na mBallstát agus prionsabal na coimhdeachta á n-urramú ag an am céanna; á chur i bhfáth gur cheart go gcabhródh cánachas ar sheirbhísí airgeadais le hiomaíochas na hearnála airgeadais a chothú;

9.ag tabhairt dá haire, de réir Thuarascáil Mhaicreacnamaíoch Eorpach 2026 ón gCoimisiún An Coimisiún Eorpach, ‘Tuarascáil mhaicreacnamaíoch Eorpach 2026’, Samhain 2025., go bhfuil ráta coigiltis teaghlaigh an Aontais fós i bhfad os cionn mheán thíortha na hEagraíochta um Chomhar agus Forbairt Eacnamaíochta; á chur in iúl gur oth léi go ndéantar thart ar aon trian de na coigiltis sin a infheistiú lasmuigh de AE, rud lena léirítear easnaimh chreat airgeadais AE maidir le hinfheistíocht a choinneáil; á iarraidh ar an gCoimisiún measúnú a dhéanamh ar an gcaoi ar féidir le bearta cánach infheistíocht a spreagadh chun sreabhadh i dtreo AE; á chur i bhfios go láidir a thábhachtaí atá sé eis-sreafaí airgeadais i dtreo tíortha atá ar liosta an Aontais de dhlínsí neamh-chomhoibríocha a dhíspreagadh;

10.á chur i bhfios go láidir a thábhachtaí atá sé ACI a chur chun cinn chun coigilteas a shlógadh le haghaidh infheistíochtaí táirgiúla; á mheas go bhfuil sé ríthábhachtach ilroinnt chánach a laghdú agus bealaí infheistíochta trasteorann a fheabhsú chun coigilteas Eorpach a shlógadh le haghaidh infheistíochta laistigh den Aontas;

11.á chur i bhfáth gur cheart creat cánach do sheirbhísí airgeadais a dhearadh in éineacht le cuspóirí ACI, ag díriú ar éifeachtúlacht a mhéadú, aghaidh a thabhairt ar shaobhadh margaidh, agus infheistíocht agus fás fadtéarmach a chothú, agus cur chuige cothrom á áirithiú ag an am céanna lena léirítear breithnithe eacnamaíocha agus sóisialta níos leithne freisin;

12.ag tabhairt dá haire gur cheart cánachas na hearnála airgeadais a rialú le prionsabail na simplíochta, na neodrachta, na cothroime, na hinbhuanaitheachta eacnamaíche, comhshaoil agus sóisialta, agus na deimhneachta dlíthiúla; ag tabhairt dá haire gur cheart go léireofaí leis freisin dinimic thimthriallach bhrabúsacht na mbanc atá nasctha le beartas airgeadaíochta agus le dálaí eacnamaíocha;

13.á iarraidh ar an gCoimisiún leanúint dá ghealltanas réitigh nuálacha a mholadh chun cáin a ghearradh ar an earnáil lena laghdaítear ilroinnt, lena dtacaítear le tuilleadh comhtháthaithe ar leibhéal an Aontais agus lena gcuidítear le ACI a chur i gcrích;

14.ag tabhairt dá haire go dtéann an díolúine ó CBL le haghaidh seirbhísí airgeadais siar go 1977, agus tá sé ann chun deacrachtaí teicniúla a sheachaint maidir le CBL a chur i bhfeidhm maidir le seirbhísí airgeadais casta, rud a measadh a bheith neamh-inoibrithe ó thaobh riaracháin de; á aithint go bhféadfaí aghaidh a thabhairt anois ar an mbonn cirt teicniúil bunaidh atá leis an díolúine ó CBL le réaltachtaí an dul chun cinn theicneolaíoch agus an digitithe;

15.ag tabhairt faoi deara nach gá go mbeadh an díolúine ina buntáiste d’institiúidí airgeadais, toisc go gcoisctear orthu léi CBL a aisghabháil; á chur in iúl go bhfuil sí den tuairim go mbuanaítear saobhadh margaidh leis an status quo, gur féidir easpa trédhearcachta a chruthú agus costais ar thomhaltóirí a mhéadú, go dtreisítear an chlaontacht féinsoláthair san earnáil airgeadais agus go gcruthaítear míbhuntáistí iomaíocha i gcomparáid le hinstitiúidí ó thíortha nach bhfuil san Aontas;

16.á chur i bhfáth gur minic a dheonaítear díolúintí CBL do ghníomhaíochtaí leasa ghinearálta mar aitheantas ar a bhfeidhm shóisialta bhunriachtanach; á chur i bhfios go láidir gur féidir le croísheirbhísí airgeadais áirithe – go háirithe seirbhísí íocaíochta, glacadh taiscí agus soláthar bunúsach creidmheasa – feidhm chuasa-phoiblí inchomparáide a chomhlíonadh trí choigilteas a choimirciú, trí mhalartú eacnamaíoch a chumasú agus trína áirithiú gur féidir le daoine agus gnólachtaí páirt shábháilte a ghlacadh sa gheilleagar;

17.ag tabhairt dá haire nach raibh athchóiriú ar an díolúine ó CBL don earnáil airgeadais mar thoradh ar thionscnaimh a rinne an Coimisiún arís agus arís eile, lena n-áirítear a thograí ó 2007 agus measúnú ar thionchar tionscanta 2020, toisc gur theip ar na Ballstáit teacht ar chomhaontú d’aon toil; ag tabhairt dá haire go raibh sé beartaithe ag an gCoimisiún le déanaí leasuithe ar Threoir maidir le CBL Treoir 2006/112/CE ón gComhairle an 28 Samhain 2006 maidir leis an gcomhchóras cánach breisluacha (IO L 347, 11.12.2006, lch. 1, ELI: http://data.europa.eu/eli/dir/2006/112/oj). a fhoilsiú go luath in 2023; á thabhairt faoi deara gur cuireadh moill ar na pleananna sin, rud a d’fhág go raibh an t-athchóiriú bunriachtanach sin fós ar feitheamh;

18.ag tabhairt dá haire, faoi Airteagal 11 den Treoir maidir le CBL, go bhfuil grúpáil CBL fós roghnach do na Ballstáit agus go bhfuil sí teoranta ag srianta críochacha, rud lena gcruthaítear bacainní dlíthiúla agus praiticiúla do ghrúpaí trasteorann atá gníomhach i seirbhísí airgeadais;

19.ag cur béim ar an bhfíoras, in ainneoin úsáid a bhaint as grúpáil CBL agus socruithe roinnte costas i roinnt Ballstát, go gcruthaíonn an díolúine ó CBL, in éineacht le rialacha cánach náisiúnta cúiteacha éagsúla, amhail cánacha préimheanna árachais, tírdhreach cánach casta agus ilroinnte, rud a fhágann go bhfuil comhlíonadh cánach trasteorann costasach agus a mhéadaíonn costais oibriúcháin gnólachtaí; á chur i bhfáth go bhfuil gá le sainmhínithe CBL níos soiléire agus rialacha simplithe chun na hualaí sin a laghdú, chun cur i bhfeidhm comhsheasmhach rialacha ar fud an Aontais a áirithiú, chun gníomhaíocht trasteorann a éascú agus chun tacú leis an nuálaíocht;

20.ag tabhairt dá haire go ndéantar grúpáil CBL, lenar féidir ualaí riaracháin ar institiúidí airgeadais a laghdú agus éifeachtúlacht na n-institiúidí sin a fheabhsú, a chur i bhfeidhm go míchothrom faoi láthair ar fud na mBallstát agus go bhfuil sí teoranta go ginearálta d’eintitis atá bunaithe laistigh d’aon Bhallstát amháin; á thabhairt chun suntais go bhféadfadh cóineasú níos fearr i gcur i bhfeidhm grúpála CBL ilroinnt agus éiginnteacht dhlíthiúil sa mhargadh inmheánach a laghdú agus gníomhaíocht seirbhísí airgeadais trasteorann a éascú;

21.á iarraidh ar an gCoimisiún na Ballstáit a spreagadh chun grúpáil CBL a chur chun feidhme ar bhealach comhsheasmhach agus féachaint ar roghanna le haghaidh creat dlíthiúil níos soiléire, lena n-áirítear an fhéidearthacht grúpáil CBL trasteorann a dhéanamh; á chur i bhfáth nach mór úsáid níos leithne a bhaint as grúpáil CBL le haghaidh seirbhísí airgeadais agus árachais a bheith i gcomhréir le rialacha cánach corparáide, go háirithe na rialacha sin maidir le praghsáil aistrithe, agus nach mór coimircí ceangailteacha frith-mhí-úsáide a bheith ag gabháil léi chun calaois agus seachaint cánach, sceitheadh CBL inghrúpa agus mí-úsáid comhroinnte costas a chosc;

22.ag tabhairt dá haire nach bhfuil forálacha sonracha sa Treoir maidir le CBL le haghaidh ionstraimí airgeadais atá ag teacht chun cinn, lena n-áirítear criptea-shócmhainní, airgeadas díláraithe agus teicneolaíocht airgeadais; á thabhairt chun suntais, ina theannta sin, nach dtugtar aghaidh sa Treoir ar láimhseáil CBL i gcás díorthach agus go bhfuil láimhseáil i gcás cistí infheistíochta fós éagsúil ar fud na mBallstát; ag tabhairt dá haire go bhfuil léirmhínithe náisiúnta éagsúla ar rialacha CBL, éiginnteacht dhlíthiúil do sholáthraithe seirbhíse agus cóir mhíchothrom idir seirbhísí airgeadais traidisiúnta agus seirbhísí airgeadais nua mar thoradh air sin agus go bhfuil an baol ann go gcuirfí bac ar an nuálaíocht agus ar an iomaíochas;

23.ag cur béim ar an bhfíoras gur cheart do chreat cánach nua-aimseartha tacú leis an nuálaíocht sa teicneolaíocht airgeadais agus san airgeadas digiteach agus gan dídhreasachtaí rialála a chruthú d’iontrálaithe nua sa mhargadh; á iarraidh ar an gCoimisiún soiléiriú a dhéanamh ar an gcaoi a gcaitear le CBL ar sheirbhísí airgeadais atá ag teacht chun cinn chun neodracht theicneolaíoch agus machaire comhréidh a áirithiú ar fud AE;

24.á mheas go n-ardaítear, le díolúine CBL leathan agus neamhdhifreáilte don earnáil airgeadais ina hiomláine, ceisteanna maidir le comhsheasmhacht agus cothromaíocht fhoriomlán an chórais cánach; á chur i bhfios go láidir go bhféadfadh athchóiriú ar an díolúine ó CBL saobhadh agus leibhéal CBL neamh-inghnóthaithe a laghdú gan castacht riaracháin dhíréireach a chruthú; ag tabhairt dá haire go bhféadfadh roghanna chun deireadh a chur leis an díolúine ó CBL an CBL neamh-inghnóthaithe a bhaint go héifeachtach trí chead a thabhairt do chorparáidí airgeadais an CBL a íocann siad as earraí agus as seirbhísí a úsáidtear ina n-oibríochtaí a aiséileamh go hiomlán; á chur i bhfios go láidir go gcuirfí leis sin, deireadh leis an gclaontacht atá ann faoi láthair maidir le seirbhísí a thabhairt isteach go hinmheánach seachas iad a sheachfhoinsiú, rud lena bhféadfaí teorainn a chur le cumas cuideachta speisialtóireacht a dhéanamh, rochtain a fháil ar shaineolas seachtrach, agus nuálaíocht a dhéanamh; ag aithint go bhféadfaí, leis an athchóiriú sin, machaire comhréidh a thabhairt do dhlínsí eile agus iomaíochas idirnáisiúnta institiúidí airgeadais an Aontais a neartú;

25.á mheabhrú gur creat cánach comhchuibhithe é CBL ar leibhéal AE, cé go gcoinníonn na Ballstáit roinnt scóipe chun é a chur chun feidhme; á aithint, dá bhrí sin, gur cheart aghaidh a thabhairt ar athchóiriú ar an gcóras CBL do sheirbhísí airgeadais ar leibhéal an Aontais;

26.á iarraidh ar an gCoimisiún athbhreithniú a dhéanamh ar thionchair an chórais CBL atá ann faoi láthair ar an earnáil airgeadais agus an anailís sin a chomhroinnt go poiblí; á iarraidh ar an gCoimisiún roghanna beartais a mheas chun aghaidh a thabhairt ar thionchair shaobhacha shainaitheanta; ag cur béim ar an bhfíoras gur cheart, le haon athchóiriú mar sin, CBL neamh-inghnóthaithe agus cur i bhfeidhm ilroinnte rialacha a laghdú, deimhneacht dhlíthiúil agus cothroime chánach a fheabhsú, agus iomaíochas mhargaí airgeadais AE a neartú, agus cobhsaíocht airgeadais á cosaint agus arbatráiste rialála idir na Ballstáit á íoslaghdú ag an am céanna; ag cur béim ar an bhfíoras nach mór, le haon athchóiriú mar sin, tomhaltóirí a chosaint freisin agus leanúint dá áirithiú go rannchuideoidh an earnáil airgeadais go cothrom le hioncam poiblí;

27.ag tabhairt dá haire gur cheart aon togra chun athbhreithniú a dhéanamh ar an gcreat CBL a bheith bunaithe ar ghrinnanailís ar an leibhéal maicreacnamaíoch agus ar mhapáil chuimsitheach ar cháin bhainc náisiúnta agus ar thobhaigh bhainc náisiúnta; ag cur béim ar an bhfíoras gur cheart go gcuirfí i gcuntas san anailís sin na himpleachtaí riaracháin do sheirbhísí airgeadais, an idirghníomhaíocht idir cánacha bainc náisiúnta atá ann cheana, tobhaigh na hearnála airgeadais agus an córas CBL, agus an tionchar ar an margadh aonair;

28.á chur i bhfios go láidir nach mór le haon athruithe ar chóireáil CBL seirbhísí airgeadais measúnú cúramach a dhéanamh ar an tionchar ar sheirbhísí a sholáthraítear do thomhaltóirí miondíola, go háirithe teaghlaigh ar ioncam íseal agus ar mheánioncam, agus aon chostais fhoriomlána bhreise a sheachaint;

29.á iarraidh ar an gCoimisiún, mar chuid d’athchóiriú a d’fhéadfaí a dhéanamh ar an díolúine ó CBL, measúnú a dhéanamh ar a indéanta atá sé cánacha préimheanna árachais náisiúnta a ionadú trí sheirbhísí árachais a chomhtháthú go hiomlán sa chóras CBL;

30.á mheabhrú go bhfuil bearna shuntasach infheistíochta idir EUR 750 agus 800 billiún in aghaidh na bliana os comhair AE maidir lena chuspóirí aeráide, digiteacha agus neamhspleáchais straitéisigh a bhaint amach; ag meabhrú thiomantas na mBallstát agus an Aontais infheistíocht chosanta na hEorpa a mhéadú go suntasach; ag cur béim ar an bhfíoras, chun freagairt do na dúshláin sin, go bhféadfadh cánachas cothrom agus níos comhleanúnaí ar an earnáil airgeadais, a bheith ina rannchuidiú le caipiteal príobháideach a shlógadh, agus ar an gcaoi sin infheistíocht mhiondíola a spreagadh, agus margaí caipitil na hEorpa a neartú, agus ioncam a chruinniú le haghaidh infheistíocht phoiblí le haghaidh tosaíochtaí straitéiseacha, agus ár riachtanais shóisialta, aeráide agus infheistíochta, agus ar an gcaoi sin iomaíochas an Aontais a neartú;

31.á mheabhrú, ina leith sin, comhaontú 2020 idir an Pharlaimint, an Chomhairle agus an Coimisiún maidir le treochlár chun acmhainní dílse nua a thabhairt isteach, lena n-áirítear FTT bunaithe ar thorthaí measúnaithe tionchair;

32.ag aithint na heaspa dul chun cinn a rinneadh maidir leis an togra FTT sa Chomhairle, in ainneoin díospóireacht fhorleathan, faoi aontoilíocht agus faoi chomhar feabhsaithe araon, agus ag tabhairt dá haire an fógra ón gCoimisiún maidir le tarraingt siar an togra FTT ina chlár oibre 2026;

33.á chur in iúl go bhfuil sí den tuairim go bhfuil measúnuithe rialta ar na tionchair eacnamaíocha agus ar ábharthacht leanúnach an bheartais cánach san earnáil airgeadais ríthábhachtach, chun saobhadh neamhbheartaithe nó marthanach ar mhargaí airgeadais a sheachaint; á chur in iúl gur geal léi go bhfuil anailís chuimsitheach á déanamh ag an gCoimisiún ar an tionchar a d’fhéadfadh a bheith ag cánachas foriomlán na hearnála airgeadais ar fheidhmiú an mhargaidh, ar infheistíocht trasteorann, agus ar iomaíochas mhargaí airgeadais AE;

34.ag cur béim ar an bhfíoras gur cheart rialacha cánach don earnáil airgeadais a shimpliú agus a áirithiú go ndéanfaidh an earnáil ranníocaíocht airgeadais chothrom agus fhónta, agus gur cheart dóibh a bheith soiléir, trédhearcach agus intuartha chun ilroinnt a laghdú, infheistíocht agus gníomhaíocht trasteorann a chumasú agus ardleibhéal cosanta do thomhaltóirí á ráthú ag an am céanna; á chur i bhfáth gur cheart go bhfeabhsódh na rialacha sin éifeachtúlacht agus leithdháileadh caipitil, go gcosnófaí cobhsaíocht agus iomaíochas an mhargaidh, agus go maolófaí costais chomhlíonta, go háirithe do thomhaltóirí miondíola agus d’fhiontair bheaga agus mheánmhéide;

35.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.