1.Jinnota li wara l-kriżi finanzjarja l-kbira, l-Istati Membri introduċew 91 taxxa speċifika għas-settur biex jintaxxaw is-settur finanzjarju, b’riżultat ta’ xenarju tat-taxxa frammentat ħafna; jinnota li dan ix-xenarju tat-taxxa frammentat jiġġenera kostijiet operazzjonali u amministrattivi addizzjonali u jżid l-ostakli strutturali għall-espansjoni transfruntiera tal-fornituri tas-servizzi finanzjarji, u b’hekk idgħajjef is-settur finanzjarju tal-UE u l-kapaċità ta’ investiment tiegħu u jimmina l-objettivi tal-SIU u tal-Unjoni Bankarja;

2.Jinnota li d-differenzi fir-reġimi tat-taxxa nazzjonali jirriflettu l-għażliet ta’ politika nazzjonali; jinnota l-ħidma li għaddejja fil-livell internazzjonali fir-rigward tat-trasferiment tal-profitti; jappella għal koordinazzjoni msaħħa fil-livell tal-UE, inkluż fl-implimentazzjoni tad-Direttiva dwar il-Pilastru 2, regoli robusti kontra l-evitar tat-taxxa kif ukoll rekwiżiti ta’ trasparenza, b’mod partikolari fil-qasam tar-rapportar pubbliku għal kull pajjiż;

3.Jinnota li l-frammentazzjoni tar-reġimi tat-taxxa nazzjonali żżid ir-riskju ta’ tassazzjoni doppja transfruntiera u, xprunata minn kumplessità amministrattiva u legali, tista’ xxekkel it-tkabbir tas-settur finanzjarju tal-UE u toħloq ostaklu għall-integrazzjoni aktar profonda tas-swieq finanzjarji tal-UE; jenfasizza li l-evitar tat-tassazzjoni doppja u t-tnaqqis tal-piżijiet amministrattivi għandhom jibqgħu kruċjali; jisħaq, madankollu, li l-isforzi ta’ simplifikazzjoni ma jridux jirriżultaw fid-deregolamentazzjoni jew f’tellieqa għall-qiegħ fl-istandards tat-taxxa;

4.Jisħaq li d-differenzi fil-proċeduri nazzjonali għat-taxxa f’ras il-għajn joħolqu piżijiet u ostakli amministrattivi għall-investiment transfruntier, kif ġie rikonoxxut fl-Istrateġija SIU tal-Kummissjoni; jilqa’ l-adozzjoni tad-Direttiva FASTER; jappella għal aktar progress lejn qafas aktar koordinat u ambizzjuż;

5.Jistieden lill-Kunsill jiddeċiedi dwar il-proposta tal-Kummissjoni għal direttiva tal-Kunsill li tistabbilixxi sistema ta’ Taxxa tal-Uffiċċju Reġistrat għall-intrapriżi mikro, żgħar u ta’ daqs medju, u li temenda d-Direttiva 2011/16/UE, filwaqt li jqis ir-riżoluzzjoni leġiżlattiva tal-Parlament tal-10 ta’ April 2024;

6.Josserva, barra minn hekk, li r-regoli tat-taxxa eżistenti ma żammewx il-pass għalkollox mal-emerġenza ta’ prodotti finanzjarji ġodda u infrastrutturi ġodda tas-swieq; jissottolinja li l-frammentazzjoni qed issir aktar inkwetanti b’rata mgħaġġla bis-suċċess ta’ neobanek, pereżempju, banek esklużivament diġitali, banek challenger u banek fintech; jirrimarka ż-żieda sinifikanti fis-sehem ta’ depożiti transfruntiera miżmuma minn dawn il-banek f’dawn l-aħħar sitt snin; jissottolinja li d-differenzi fir-regoli tat-taxxa bejn il-banek u l-entitajiet mhux bankarji jistgħu joħolqu distorsjonijiet;

7.Jenfasizza li d-data insuffiċjenti dwar il-piż tat-taxxa effettiv madwar is-settur finanzjarju tal-UE jostakola t-tfassil tal-politika bbażata fuq l-evidenza u l-valutazzjoni tal-impatti tal-politika fuq l-imġiba tas-swieq, il-kompetizzjoni u l-istabbiltà finanzjarja; jissottolinja l-ħtieġa ta’ trasparenza mtejba u ta’ użu aħjar tad-data mtejba bħala prerekwiżit għal riforma koerenti tat-tassazzjoni tas-settur finanzjarju;

8.Jisħaq li t-tneħħija tal-ostakli tat-taxxa għall-investiment transfruntier permezz ta’ regoli koerenti fil-livell tal-UE tnaqqas il-kostijiet tal-konformità, ittejjeb l-effiċjenza tas-suq, ittejjeb iċ-ċarezza legali għall-flussi kapitali transfruntiera u ssaħħaħ il-kompetittività tas-servizzi finanzjarji tal-UE, filwaqt li fl-istess ħin trażżan l-evażjoni tat-taxxa u l-pjanifikazzjoni fiskali aggressiva; jisħaq fuq il-ħtieġa ta’ sett koerenti ta’ regoli għas-settur finanzjarju tal-UE, filwaqt li jiġu rispettati s-sovranità fiskali tal-Istati Membri u l-prinċipju tas-sussidjarjetà; jisħaq li t-tassazzjoni tas-servizzi finanzjarji għandha tgħin biex issostni l-kompetittività tas-settur finanzjarju;

9.Jinnota li, skont ir-Rapport Makroekonomiku Ewropew tal-2026 tal-Kummissjoni Il-Kummissjoni Ewropea, “2026 European Macroeconomic Report” (Ir-rapport makroekonomiku Ewropew tal-2026), Novembru 2025., ir-rata tat-tfaddil tal-unitajiet domestiċi tal-UE għadha ferm ogħla mill-medja tal-pajjiżi tal-Organizzazzjoni għall-Kooperazzjoni u l-Iżvilupp Ekonomiċi; jesprimi dispjaċir għall-fatt li madwar terz ta’ dan it-tfaddil jiġi investit barra mill-UE, li juri n-nuqqasijiet tal-qafas finanzjarju tal-UE fiż-żamma tal-investiment; jistieden lill-Kummissjoni tivvaluta kif miżuri tat-taxxa jistgħu jinkoraġġixxu l-fluss tal-investiment lejn l-UE; jissottolinja l-importanza li jiġu skoraġġuti flussi finanzjarji ’l barra lejn il-pajjiżi li jinsabu fil-lista tal-UE ta’ ġuriżdizzjonijiet li ma jikkooperawx;

10.Jissottolinja l-importanza li l-SIU tavvanza biex timmobilizza t-tfaddil għal investimenti produttivi; iqis t-tnaqqis tal-frammentazzjoni tat-taxxa u t-titjib tal-mezzi ta’ investiment transfruntier bħala fundamentali biex it-tfaddil Ewropew jiġi mobilizzat għall-investiment fi ħdan l-UE;

11.Jisħaq li għandu jitfassal qafas tat-taxxa għas-servizzi finanzjarji flimkien mal-objettivi tal-SIU, li jiffoka fuq iż-żieda fl-effiċjenza, l-indirizzar tad-distorsjonijiet tas-suq, u t-trawwim tal-investiment u t-tkabbir fit-tul, filwaqt li jiġi żgurat approċċ ibbilanċjat li jirrifletti wkoll kunsiderazzjonijiet ekonomiċi u soċjali usa’;

12.Jinnota li t-tassazzjoni tas-settur finanzjarju għandha tkun irregolata mill-prinċipji tas-sempliċità, in-newtralità, il-ġustizzja, is-sostenibbiltà ekonomika, ambjentali u soċjali, u ċ-ċertezza legali; jinnota li għandha tirrifletti wkoll id-dinamika ċiklika tal-profittabbiltà tal-banek marbuta mal-politika monetarja u l-kundizzjonijiet ekonomiċi;

13.Jistieden lill-Kummissjoni ssegwi l-impenn tagħha li tipproponi soluzzjonijiet innovattivi għat-tassazzjoni tas-settur li jnaqqsu l-frammentazzjoni, jappoġġjaw aktar integrazzjoni fil-livell tal-UE u jgħinu għat-tlestija tal-SIU;

14.Jinnota li l-eżenzjoni mill-VAT għas-servizzi finanzjarji tmur lura għall-1977, filwaqt li sservi biex jiġu evitati diffikultajiet tekniċi fl-applikazzjoni tal-VAT għas-servizzi finanzjarji kumplessi, u kienet meqjusa li ma tistax titħaddem amministrattivament; jirrikonoxxi li l-ġustifikazzjoni teknika oriġinali għall-eżenzjoni mill-VAT issa tista’ tiġi indirizzata mir-realtajiet tal-progress teknoloġiku u d-diġitalizzazzjoni;

15.Josserva li l-eżenzjoni mhux neċessarjament tikkostitwixxi vantaġġ għall-istituzzjonijiet finanzjarji, peress li tipprevjenihom milli jirkupraw il-VAT; huwa tal-fehma li l-istatus quo jipperpetwa d-distorsjonijiet tas-suq, jista’ joħloq nuqqas ta’ trasparenza u jżid il-kostijiet għall-konsumaturi, isaħħaħ il-preġudizzju tal-valur meqjus ipprovdut fis-settur finanzjarju u joħloq żvantaġġi kompetittivi meta mqabbel ma’ istituzzjonijiet minn pajjiżi mhux tal-UE;

16.Jenfasizza li l-eżenzjonijiet mill-VAT spiss jingħataw lil attivitajiet ta’ interess ġenerali b’rikonoxximent tal-funzjoni soċjali essenzjali tagħhom; jissottolinja li ċerti servizzi finanzjarji ewlenin – b’mod partikolari s-servizzi ta’ pagament, it-teħid ta’ depożiti u l-forniment ta’ kreditu bażiku – jistgħu jwettqu funzjoni ta’ utilità kważi pubblika billi jissalvagwardjaw it-tfaddil, jiffaċilitaw l-iskambju ekonomiku u jiżguraw li l-persuni u n-negozji jkunu jistgħu jipparteċipaw fl-ekonomija b’mod sikur;

17.Jinnota li inizjattivi ripetuti tal-Kummissjoni, inklużi l-proposti tagħha tal-2007 u l-valutazzjoni tal-impatt tal-bidu tal-2020, ma rriżultawx f’riforma tal-eżenzjoni mill-VAT għas-settur finanzjarju minħabba li l-Istati Membri naqsu milli jilħqu ftehim unanimu; jinnota li dan l-aħħar il-Kummissjoni kellha l-ħsieb li tippubblika emendi għad-Direttiva tal-VAT Id-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU L 347, 11.12.2006, p. 1, ELI: http://data.europa.eu/eli/dir/2006/112/oj). fil-bidu tal-2023; josserva li dawn il-pjanijiet waqfu, u b’hekk din ir-riforma essenzjali għadha pendenti;

18.Jinnota li, skont l-Artikolu 11 tad-Direttiva tal-VAT, ir-raggruppament tal-VAT jibqa’ fakultattiv għall-Istati Membri u huwa limitat bil-limitazzjonijiet territorjali, u b’hekk joħloq ostakli legali u prattiċi għall-gruppi transfruntiera attivi fis-servizzi finanzjarji;

19.Jenfasizza li, minkejja l-użu ta’ arranġamenti ta’ raggruppament tal-VAT u ta’ kondiviżjoni tal-kostijiet f’xi Stati Membri, l-eżenzjoni mill-VAT, flimkien ma’ regoli tat-taxxa nazzjonali kumpensatorji differenti, bħal taxxi fuq il-primjums tal-assigurazzjoni, toħloq xenarju tat-taxxa kumpless u frammentat, li jagħmel il-konformità mar-regoli tat-taxxa transfruntiera għalja u jżid l-ispejjeż operatorji tad-ditti; jisħaq li huma meħtieġa definizzjonijiet aktar ċari tal-VAT u regoli simplifikati biex jitnaqqsu dawn il-piżijiet, tiġi żgurata applikazzjoni konsistenti tar-regoli madwar l-UE, tiġi ffaċilitata l-attività transfruntiera u tiġi appoġġjata l-innovazzjoni;

20.jinnota li r-raggruppament tal-VAT, li jista’ jnaqqas il-piżijiet amministrattivi għall-istituzzjonijiet finanzjarji u jtejjeb l-effiċjenza tagħhom, bħalissa qed jiġi applikat b’mod mhux uniformi madwar l-Istati Membri u huwa ġeneralment limitat għall-entitajiet stabbiliti fi ħdan Stat Membru wieħed; jenfasizza li konverġenza akbar fl-applikazzjoni tar-raggruppament tal-VAT tista’ tnaqqas il-frammentazzjoni u l-inċertezza legali fis-suq intern u tiffaċilita l-attività tas-servizzi finanzjarji transfruntiera;

21.Jistieden lill-Kummissjoni tħeġġeġ lill-Istati Membri jimplimentaw ir-raggruppament tal-VAT b’mod konsistenti u jesploraw għażliet għal qafas legali aktar ċar, inkluża l-possibbiltà ta’ raggruppament transfruntier tal-VAT; jisħaq li użu usa’ tar-raggruppament tal-VAT għas-servizzi finanzjarji u tal-assigurazzjoni jrid ikun konformi mar-regoli tat-taxxa korporattiva, b’mod partikolari dawk dwar l-ipprezzar ta’ trasferiment, u jrid ikun akkumpanjat minn salvagwardji vinkolanti kontra l-abbuż biex jiġu evitati l-frodi u l-evitar tat-taxxa, it-telf ta’ VAT intragrupp u l-abbuż mill-kondiviżjoni tal-kostijiet;

22.Jinnota li d-Direttiva tal-VAT ma għandhiex dispożizzjonijiet speċifiċi għal strumenti finanzjarji emerġenti, inklużi l-kriptoassi, il-finanzi deċentralizzati u t-teknoloġija finanzjarja; jenfasizza li, barra minn hekk, id-Direttiva ma tindirizzax it-trattament tal-VAT tad-derivattivi u li t-trattament tal-fondi ta’ investiment għadu diverġenti madwar l-Istati Membri; jinnota li dan wassal għal interpretazzjonijiet nazzjonali diverġenti tar-regoli tal-VAT, inċertezza legali għall-fornituri tas-servizzi u trattament mhux uniformi bejn is-servizzi finanzjarji tradizzjonali u dawk ġodda u jirriskja li jxekkel l-innovazzjoni u l-kompetittività;

23.jenfasizza li qafas tat-taxxa modern għandu jappoġġja l-innovazzjoni fit-teknoloġija finanzjarja u fil-finanzi diġitali u jevita li joħloq diżinċentivi regolatorji għall-parteċipanti ġodda fis-suq; jistieden lill-Kummissjoni tiċċara t-trattament tal-VAT tas-servizzi finanzjarji emerġenti sabiex tiġi żgurata n-newtralità teknoloġika u kundizzjonijiet ekwi madwar l-UE;

24.Iqis li eżenzjoni wiesgħa u mhux differenzjata mill-VAT għas-settur finanzjarju kollu tqajjem mistoqsijiet dwar il-konsistenza u l-bilanċ ġenerali tas-sistema tat-taxxa; jissottolinja li riforma tal-eżenzjoni mill-VAT tista’ tnaqqas id-distorsjonijiet u l-livell ta’ VAT irrekuperabbli mingħajr ma toħloq kumplessità amministrattiva sproporzjonata; jinnota li l-għażliet għat-tneħħija tal-eżenzjoni mill-VAT jistgħu effettivament jeliminaw il-VAT irrekuperabbli billi jippermettu lill-korporazzjonijiet finanzjarji jitolbu lura bis-sħiħ il-VAT li jħallsu fuq oġġetti u servizzi użati fl-operazzjonijiet tagħhom; jissottolinja li dan jelimina l-preġudizzju attwali lejn l-internalizzazzjoni tas-servizzi aktar milli l-esternalizzazzjoni tagħhom, li jista’ jillimita l-kapaċità ta’ kumpanija li tispeċjalizza, taċċessa għarfien espert estern, u tkun innovattiva; jirrikonoxxi li din ir-riforma tista’ wkoll toħloq kundizzjonijiet ekwi fir-rigward ta’ ġuriżdizzjonijiet oħra u ssaħħaħ il-kompetittività internazzjonali tal-istituzzjonijiet finanzjarji tal-UE;

25.Ifakkar li l-VAT hija qafas tat-taxxa armonizzat fil-livell tal-UE, għalkemm l-Istati Membri għad għandhom ċertu marġini fl-implimentazzjoni tagħha; jirrikonoxxi, għalhekk, li riforma tas-sistema tal-VAT għas-servizzi finanzjarji għandha tiġi indirizzata fil-livell tal-UE;

26.Jistieden lill-Kummissjoni tirrieżamina l-impatti tar-reġim attwali tal-VAT fuq is-settur finanzjarju u tikkondividi din l-analiżi pubblikament; jistieden lill-Kummissjoni tikkunsidra għażliet ta’ politika biex tindirizza l-impatti distorsivi identifikati; jenfasizza li kwalunkwe riforma bħal din għandha tnaqqas il-VAT irrekuperabbli u l-applikazzjoni frammentata tar-regoli, ittejjeb iċ-ċertezza legali u l-ġustizzja fiskali, u ssaħħaħ il-kompetittività tas-swieq finanzjarji tal-UE, filwaqt li tissalvagwardja l-istabbiltà finanzjarja u timminimizza l-arbitraġġ regolatorju bejn l-Istati Membri; jenfasizza li kwalunkwe riforma bħal din trid tissalvagwardja wkoll lill-konsumaturi u tkompli tiżgura li s-settur finanzjarju jagħti kontribut ġust għad-dħul pubbliku;

27.Jinnota li kwalunkwe proposta għar-reviżjoni tal-qafas tal-VAT għandha tkun ibbażata fuq analiżi fil-fond fil-livell makroekonomiku u mmappjar komprensiv tat-taxxa u l-imposti bankarji nazzjonali; jenfasizza li tali analiżi għandha tqis l-implikazzjonijiet amministrattivi għas-servizzi finanzjarji, l-interazzjoni bejn it-taxxi bankarji nazzjonali eżistenti, l-imposti tas-settur finanzjarju u s-sistema tal-VAT, u l-impatt fuq is-suq uniku;

28.Jissottolinja li kwalunkwe bidla fit-trattament tal-VAT tas-servizzi finanzjarji trid tivvaluta bir-reqqa l-impatt fuq is-servizzi pprovduti lill-konsumaturi bl-imnut, b’mod partikolari l-unitajiet domestiċi b’introjtu baxx u medju, u tevita kwalunkwe kost ġenerali żejjed;

29.Jistieden lill-Kummissjoni, bħala parti minn riforma possibbli tal-eżenzjoni tal-VAT, tivvaluta l-fattibbiltà li t-taxxi nazzjonali fuq il-primjums tal-assigurazzjoni jiġu sostitwiti bl-integrazzjoni sħiħa tas-servizzi tal-assigurazzjoni fis-sistema tal-VAT;

30.Ifakkar li l-UE qed tiffaċċja diskrepanza sinifikanti fl-investiment ta’ EUR 750 sa 800 biljun fis-sena fir-rigward tal-ilħuq tal-objettivi klimatiċi, diġitali u ta’ awtonomija strateġika tagħha; ifakkar fl-impenn tal-Istati Membri u tal-UE li jżidu b’mod sostanzjali l-investiment Ewropew fid-difiża; jenfasizza li sabiex tirreaġixxi għal dawn l-isfidi, tassazzjoni ġusta u aktar koerenti tas-settur finanzjarjutista’ tikkontribwixxi għall-mobilizzazzjoni tal-kapital privat, u b’hekk tistimula l-investiment bl-imnut, u ssaħħaħ is-swieq kapitali Ewropej, filwaqt li żżid id-dħul għall-investiment pubbliku għal prijoritajiet strateġiċi, u għall-ħtiġijiet soċjali, klimatiċi u ta’ investiment tagħna, u b’hekk issaħħaħ il-kompetittività tal-UE;

31.Ifakkar, f’dan ir-rigward, fil-ftehim tal-2020 bejn il-Parlament, il-Kunsill u l-Kummissjoni dwar pjan direzzjonali għall-introduzzjoni ta’ riżorsi proprji ġodda, inkluża TTF ibbażata fuq ir-riżultati ta’ valutazzjoni tal-impatt;

32.Jirrikonoxxi n-nuqqas ta’ progress li sar dwar il-proposta TTF fil-Kunsill, minkejja dibattitu estensiv, kemm b’unanimità kif ukoll b’kooperazzjoni msaħħa, u jieħu nota tat-tħabbira tal-Kummissjoni dwar l-irtirar tal-proposta TTF fil-programm ta’ ħidma tagħha għall-2026;

33.Huwa tal-fehma li valutazzjonijiet regolari tal-impatti ekonomiċi u r-rilevanza kontinwa tal-politika tat-tassazzjoni fis-settur finanzjarju huma kruċjali, sabiex jiġu evitati distorsjonijiet mhux intenzjonati jew dejjiema għas-swieq finanzjarji; jilqa’ l-fatt li l-Kummissjoni qed twettaq analiżi komprensiva tal-impatt potenzjali tat-tassazzjoni ġenerali tas-settur finanzjarju fuq il-funzjonament tas-suq, l-investiment transfruntier, u l-kompetittività tas-swieq finanzjarji tal-UE;

34.Jenfasizza li r-regoli tat-taxxa għas-settur finanzjarju għandhom jiġu ssimplifikati u jiżguraw li s-settur jagħti kontribut finanzjarju ġust u sod, u għandhom ikunu ċari, trasparenti u prevedibbli sabiex titnaqqas il-frammentazzjoni, jiffaċilitaw l-investiment u l-attività transfruntiera filwaqt li jiggarantixxu livell għoli ta’ protezzjoni tal-konsumatur; jisħaq li dawn ir-regoli għandhom itejbu l-effiċjenza u l-allokazzjoni tal-kapital, jissalvagwardjaw l-istabbiltà u l-kompetittività tas-suq, u jimmitigaw il-kostijiet tal-konformità, b’mod partikolari għall-konsumaturi bl-imnut u l-intrapriżi żgħar u ta’ daqs medju;

35.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.