1.á chur i bhfios go láidir gur cheart go mbeadh sé d’aidhm ag cur chuige réamhbhreathnaitheach maidir leis an litearthacht sna meáin agus leis an bhfoghlaim dhigiteach daoine de gach aois a chumhachtú le bunscileanna lena gcuirfí ar a gcumas tairbhe iomlán a bhaint as an timpeallacht dhigiteach, borradh a chur faoina scileanna cruthaitheacha, tairbhe a bhaint as nochtadh d’fhoinsí éagsúla agus rioscaí a bhaineann le húsáid agus dearadh ardán ar líne a sheachaint;

2.á thabhairt chun suntais go bhfuil ról ag litearthacht sna meáin maidir le scileanna smaointeoireachta criticiúla a thabhairt do dhaoine aonair lena rannchuidítear le cinnteoireacht fheasach agus uathrialach i bpróisis dhaonlathacha agus lena bhfeabhsaítear freagracht shibhialta chun cur i gcoinne na bréagaisnéise, an pholaraithe agus ionramháil agus cur isteach eachtrach ar fhaisnéis, go háirithe i gcomhthéacsanna toghcháin;

3.á chur i bhfáth gur cheart an litearthacht sna meáin agus an fhoghlaim dhigiteach a léiriú laistigh de thionscnaimh níos leithne de chuid an Aontais atá dírithe ar phróisis dhaonlathacha a chosaint, lena n-áirítear i gcomhthéacs Sciath Daonlathais an Aontais;

4.á aithint nach mór cineálacha cur chuige maidir leis an litearthacht sna meáin agus leis an bhfoghlaim dhigiteach a theagasc a bheith nuálach, dírithe ar gach grúpa daonra agus curtha in oiriúint do riachtanais foghlaimeoirí, go háirithe úsáideoirí leochaileacha a bhfuil míbhuntáistí acu mar gheall ar thosca geografacha, sóisialta, cultúrtha agus eacnamaíocha;

5.ag aithint luach an oideachais idir piaraí arna chur chun feidhme ag Ionaid d’Idirlíon Níos Sábháilte agus ag eagraíochtaí na sochaí sibhialta mar uirlis éifeachtach chun teagmháil a dhéanamh le leanaí agus le déagóirí le teachtaireachtaí maidir le húsáid shábháilte an idirlín, lena gcomhlánaítear an t-oideachas foirmiúil;

6.á chur i bhfáth na príomhróil atá ag an litearthacht sna meáin agus ag an bhfoghlaim dhigiteach maidir le húsáideoirí a chumhachtú chun nascleanúint a dhéanamh go sábháilte ar an timpeallacht dhigiteach, lena n-áirítear maidir leis an gcibearbhulaíocht agus cineálacha eile díobhála ar líne a chomhrac; á thabhairt chun suntais, go háirithe, go bhfuil sé ríthábhachtach scileanna litearthachta sna meáin agus scileanna foghlama digití a sholáthar ar fud chonair iomlán an oideachais agus laistigh de ghníomhaíochtaí foghlama ar feadh an tsaoil chun smaointeoireacht chriticiúil, féinfheasacht agus iompraíocht fhreagrach ar líne a fhorbairt agus a neartú;

7.á chur i bhfáth gur cheart do bheartais litearthachta sna meáin feasacht a mhúscailt maidir leis an tionchar a bhíonn ag timpeallachtaí digiteacha agus dearadh ardáin ar an gcaoi a bhfaightear rochtain ar fhaisnéis, lena n-áirítear an cumas feidhmiú algartam a thuiscint agus dearadh andúile agus ábhar ionramhála mothúchánach a aithint;

8.á chur i bhfáth go bhfuil tionchar méadaitheach ag timpeallachtaí digiteacha ar mheabhairshláinte agus ar fholláine úsáideoirí; á iarraidh ar an gCoimisiún agus ar na Ballstáit forbairt ionbhá dhigitigh, iompar freagrach ar líne agus tuiscint ar thionchar na timpeallachta digití ar an meabhairshláinte agus ar an bhfolláine a áireamh i gcláir litearthachta sna meáin agus i gcláir foghlama digití, mar ghnéithe tábhachtacha chun an chibearbhulaíocht a chosc agus chun an fholláine dhigiteach a chur chun cinn;

9.á chur i bhfios go láidir a thábhachtaí atá sé úsáid a bhaint as na hionstraimí rialála ábhartha uile atá ar fáil agus comhar a chothú idir na gníomhaithe ábhartha uile, de réir mar is gá, chun cur chuige AE a bhaint amach maidir leis an litearthacht sna meáin agus leis an bhfoghlaim dhigiteach;

10.á thabhairt chun suntais a thábhachtaí atá sé an comhar idir geallsealbhóirí poiblí agus príobháideacha a neartú chun litearthacht sna meáin a chur chun cinn ar fud an Aontais; ag cur béim ar an ról tábhachtach atá ag eagraíochtaí na sochaí sibhialta, ag tionscnaimh phobail, ag saorálaithe agus ag gníomhaithe cultúrtha maidir le muinín a chothú, agus ar an gcaoi sin idirphlé a chothú sa díospóireacht phoiblí;

11.á chur in iúl gur geal léi obair an tSainghrúpa um Litearthacht sna Meáin agus na Faireachlainne Eorpaí um na Meáin Dhigiteacha (EDMO), agus an ról tábhachtach atá acu maidir le lucht ceaptha beartas, taighdeoirí agus cleachtóirí a thabhairt le chéile chun pobal ildisciplíneach saineolaithe a thógáil, dea-chleachtais a roinnt agus feasacht a fheabhsú; á iarraidh go neartófaí a ngníomhaíochtaí maidir leis an litearthacht sna meáin chun tacú leis an gcomhar i measc na mBallstát;

12.á chur i bhfios go láidir a thábhachtaí atá sé an litearthacht sna meáin agus an fhoghlaim dhigiteach a thabhairt isteach i gcuraclaim scoile le linn phróiseas iomlán an oideachais fhoirmiúil agus gur gá cur chuige fianaise-bhunaithe agus iomlánaíoch a fhorbairt maidir le húsáid teicneolaíochtaí digiteacha i scoileanna;

13.á thabhairt chun suntais a thábhachtaí atá sé an litearthacht sna meáin agus an fhoghlaim dhigiteach a chur chun cinn lasmuigh den oideachas foirmiúil agus san ionad oibre, lena n-áiritheofar foghlaim ar feadh an tsaoil agus cur chuige uile-shochaí ina mbeidh rialtais, institiúidí oideachais, an tsochaí shibhialta, eagraíochtaí meán, ardáin teicneolaíochta agus teaghlaigh rannpháirteach;

14.á iarraidh ar an gCoimisiún, i gcomhar leis na Ballstáit, creat struchtúrtha faireacháin agus meastóireachta a bhunú do ghníomhaíochtaí náisiúnta litearthachta sna meáin, lena n-áirítear táscairí intomhaiste lena ndéantar measúnú ar eolas, ar thorthaí iompraíochta, ar fhorbairt na smaointeoireachta criticiúla, agus ar athléimneacht i gcoinne na bréagaisnéise, lena n-áirítear trí staidéir chomhréireacha agus trí mheastóireacht a dhéanamh ar chuir chuige atá oiriúnach ó thaobh aoise de agus ar chláir tacaíochta do thuismitheoirí;

15.á iarraidh ar institiúidí AE agus ar na Ballstáit comhoibriú chun cur chuige comhordaithe AE a bhunú maidir leis an litearthacht sna meáin agus an fhoghlaim dhigiteach;

16.á iarraidh ar an gCoimisiún measúnú a dhéanamh agus, i gcás inarb iomchuí, cur chuige coiteann soiléir de chuid an Aontais a mholadh maidir le rochtain atá oiriúnach ó thaobh aoise de ar ardáin ar líne, go háirithe ardáin na meán sóisialta, agus cur chuige á leanúint atá bunaithe ar dhea-bhail leanaí a chosaint, ar riachtanais forbartha cognaíche agus mothúchánaí mionaoiseach a aithint, agus ar an ngá atá le timpeallacht dhigiteach atá sábháilte agus oiriúnach ó thaobh aoise de a áirithiú, agus cearta bunúsacha agus difríochtaí i gcur chuige náisiúnta á n-urramú go hiomlán ag an am céanna;

17.á iarraidh ar an gCoimisiún meastóireacht a dhéanamh ar fhorálacha ábhartha AVMSD, a fhorfheidhmiú a áirithiú agus leasuithe spriocdhírithe a mholadh chun leibhéil chosanta a mhéadú tuilleadh d’úsáideoirí ar ardáin comhroinnte físeán, go háirithe mionaoisigh, rialacha maidir le hábhar na meán a leathnú chuig tionchairí agus cruthaitheoirí inneachair, agus lipéadú éifeachtach ar inneachar arna ghiniúint ag IS, arna ionramháil ag IS agus arna urrú ar bhonn tráchtála a áirithiú, gan bheith ag brath go hiomlán ar lipéid ná ar tháscairí uathoibrithe;

18.á iarraidh go ndéanfaí cóid iompair agus treoirlínte soiléire a fhorbairt agus a chur chun cinn do thionchairí agus do chruthaitheoirí ábhair maidir le prionsabail litearthachta sna meáin agus na foghlama digití a chomhtháthú ina n-ábhar, i bhfianaise an róil shuntasaigh atá acu maidir le patrúin tomhaltais faisnéise a mhúnlú, go háirithe i measc daoine óga; ag spreagadh ardáin ar líne chun infheictheacht níos fearr a thabhairt, lena n-áirítear trí chórais mholta, d’ábhar a chuireann litearthacht sna meáin, smaointeoireacht chriticiúil agus sábháilteacht ar líne chun cinn go gníomhach;

19.á iarraidh ar na Ballstáit maoirseacht éifeachtach a chur ar fáil agus a áirithiú go gcomhlíonfaidh na hardáin comhroinnte físeán a n-oibleagáid bearta agus uirlisí éifeachtacha litearthachta sna meáin a chur ar fáil agus feasacht úsáideoirí a mhúscailt maidir leis na bearta agus na huirlisí sin, mar a shonraítear faoi Airteagal 28(b)(3) AVMSD; á iarraidh ar údaráis agus comhlachtaí rialála náisiúnta úsáid a bhaint as an sásra comhair a bunaíodh faoi Airteagal 15 den Ghníomh Eorpach um Shaoirse na Meán chun a áirithiú go ndéanfar an oibleagáid sin a fhorfheidhmiú go héifeachtach ar fud AE;

20.á mheabhrú go bhfuil sé d’oibleagáid ar na Ballstáit, faoi Airteagal 33(a) AVMSD, bearta a chur chun cinn agus a dhéanamh chun scileanna litearthachta sna meáin a fhorbairt agus tuairisciú don Choimisiún maidir le cur chun feidhme na mbeart sin; ag spreagadh rialtóirí náisiúnta na meán dul i gcomhairle le hionadaithe ó gach grúpa den daonra agus na bearta sin á bhforbairt acu, agus cur chuige saincheaptha a ghlacadh, lena dtabharfar aghaidh ar riachtanais de gach aois, agus na bearta sin á gcur i bhfeidhm acu; á iarraidh ar na Ballstáit a áirithiú go mbeidh cistiú cobhsaí agus tiomnaithe ag na húdaráis sin chun bearta litearthachta sna meáin a chur chun cinn agus a chur chun feidhme;

21.ag tathant ar na hardáin an-mhór ar líne bearta maolaithe réasúnta, comhréireacha agus éifeachtacha a chur i bhfeidhm chun aghaidh a thabhairt ar rioscaí sistéamacha a eascraíonn as dúshaothrú scileanna neamhleora litearthachta sna meáin agus foghlama digití úsáideoirí, go háirithe mionaoisigh, mar a cheanglaítear leis an nGníomh um Sheirbhísí Digiteacha (DSA); á iarraidh ar na hardáin an-mhór ar líne measúnuithe tionchair ar an litearthacht sna meáin agus ar an bhfoghlaim dhigiteach a dhéanamh chun a shainaithint go réamhghníomhach conas a d’fhéadfadh dearadh a seirbhísí difear a dhéanamh d’acmhainneacht úsáideoirí ábhar a rochtain, a chruthú agus dul i ngleic leis;

22.á chur i bhfáth gur cheart go gcuirfí i gcuntas sna measúnuithe tionchair sin freisin na héifeachtaí ar fholláine agus ar fhorbairt chognaíoch agus shochmhothúchánach agus ar mheabhairshláinte na n-úsáideoirí, chomh maith leis na rioscaí a bhaineann le gnéithe deartha atá dírithe ar rannpháirtíocht nó a d’fhéadfadh a bheith andúileach; á iarraidh go ndéanfaí na measúnuithe sin trédhearcach, neamhspleách agus ar fáil go poiblí;

23.á iarraidh ar an gCoimisiún a áirithiú go ndéanfar gealltanais maidir leis an litearthacht sna meáin a chur chun feidhme go héifeachtach faoi Chód Iompair DSA maidir leis an mbréagaisnéis;

24.á iarraidh ar an gCoimisiún an litearthacht sna meáin agus an fhoghlaim dhigiteach a chumhdach ina athbhreithniú ar threoirlínte DSA maidir le bearta chun ardleibhéal príobháideachais, sábháilteachta agus slándála a áirithiú do mhionaoisigh ar líne, go háirithe maidir leis an litearthacht sna meáin agus bearta foghlama digití a d’fhéadfadh ardáin ar líne a dhéanamh chun eispéireas atá oiriúnach ó thaobh aoise de a áirithiú do mhionaoisigh ar líne;

25.á iarraidh ar an mBord Eorpach um Sheirbhísí na Meán úsáid a bhaint as an idirphlé struchtúrtha faoi Airteagal 19 de EMFA chun faireachán a dhéanamh ar ghníomhaíochtaí arna ndéanamh ag ardáin an-mhór ar líne maidir leis an litearthacht sna meáin agus chun an t-idirphlé idir soláthraithe seirbhíse meán a neartú maidir leis an litearthacht sna meáin agus leis an bhfoghlaim dhigiteach agus infheictheacht na meán creidiúnach ar líne a chur chun cinn;

26.á chur i bhfáth nach mór do bheartais litearthachta sna meáin an tsaoirse chun tuairimí a nochtadh agus iolrachas na meán a urramú go hiomlán agus gur cheart dóibh úsáideoirí a chumhachtú gan srian a chur ar rochtain ar fhoinsí éagsúla faisnéise;

27.á chur i bhfáth go mbraitheann an litearthacht sna meáin ní hamháin ar chumas úsáideoirí measúnú criticiúil a dhéanamh ar fhaisnéis, ach freisin ar iriseoireacht láidir, neamhspleách agus ardcháilíochta a bheith ann lena soláthraítear faisnéis iontaofa, fhíoraithe agus iolraíoch; á iarraidh ar an gCoimisiún tacaíocht do na meáin thraidisiúnta a neartú ar an leibhéal Eorpach, náisiúnta, réigiúnach agus áitiúil, i bhfianaise an róil ríthábhachtaigh atá acu maidir le saoránaigh a chur ar an eolas, lena n-áirítear trí luach saothair cothrom as ábhar iriseoireachta a chur chun cinn agus trí chistiú inbhuanaithe a áirithiú, go háirithe trí chláir amhail an clár AgoraEU a bheidh ann amach anseo;

28.á iarraidh ar an gCoimisiún tosaíocht a thabhairt do ghníomhaíochtaí litearthachta sna meáin laistigh den chlár athléimneachta meán agus a áirithiú go sroichfidh na gníomhaíochtaí sin gach catagóir aoise (daoine óga, daoine fásta agus seanóirí) i gceantair thuaithe, iargúlta agus uirbeacha;

29.á iarraidh ar na Ballstáit a áirithiú go n-áireofar i mbearta náisiúnta litearthachta sna meáin straitéisí for-rochtana sonracha do ghrúpaí atá faoi mhíbhuntáiste socheacnamaíoch, do dhaoine faoi mhíchumas, do dhaoine atá ina gcónaí i gceantair iargúlta, agus dóibh siúd a bhfuil leibhéil scileanna digiteacha níos ísle acu, chun cosc a chur ar litearthacht sna meáin agus ar bhearnaí foghlama digití neamhionannais níos leithne a threisiú;

30.á chur i bhfáth gur gá cistiú cobhsaí agus fadtéarmach AE a áirithiú do litearthacht sna meáin agus don fhoghlaim dhigiteach; á iarraidh ar an gCoimisiún tús áite a thabhairt do thionscnaimh litearthachta sna meáin faoi chláir ábhartha AE, lena n-áirítear an clár AgoraEU a bheidh ann amach anseo, agus béim á leagan ar an smaointeoireacht chriticiúil, ar an athléimneacht in aghaidh na bréagaisnéise agus ar iolrachas na meán;

31.á iarraidh ar Ghrúpa Saineolaithe an Choimisiúin um Litearthacht sna Meáin, ar an mBord Eorpach um Sheirbhísí Meán agus ar an mBord Eorpach um Sheirbhísí Digiteacha comhoibriú go dlúth maidir le hábhair a bhaineann leis an litearthacht sna meáin agus leis an bhfoghlaim dhigiteach, agus treoir bhreise a sholáthar maidir le gníomhaíochtaí praiticiúla a d’fhéadfaí a dhéanamh ar an leibhéal náisiúnta;

32.á iarraidh ar an gCoimisiún cur leis an tSeachtain Eorpach um Litearthacht sna Meáin mar imeacht suaitheanta bliantúil chun samplaí den dea-chleachtas a thaispeáint agus fóram cuimsitheach a sholáthar le haghaidh plé agus fothú acmhainneachta, agus raon leathan geallsealbhóirí agus institiúidí a spreagadh, lena n-áirítear oifigí idirchaidrimh Pharlaimint na hEorpa (EPLOnna) sna Ballstáit agus in eagraíochtaí idirnáisiúnta, chun páirt ghníomhach a ghlacadh i gcur chun cinn na litearthachta sna meáin agus na foghlama digití, lena n-áiritheofar go mbeidh na himeachtaí sin ina n-iolrachas tuairimí;

33.á iarraidh ar an gCoimisiún litearthacht sna meáin agus oideachas digiteach a aithint mar bhunscileanna do gach saoránach; á iarraidh ar na Ballstáit an litearthacht sna meáin agus an fhoghlaim dhigiteach a ionchorprú ina gcuraclaim oideachais ar bhealach atá oiriúnach ó thaobh aoise de; á chur i bhfáth gur féidir uirlisí analógacha a úsáid chun litearthacht sna meáin a chothú;

34.á iarraidh ar an gCoimisiún aird ar leith a thabhairt ar litearthacht sna meáin i dtreochlár 2030 maidir le todhchaí an oideachais dhigitigh agus scileanna digiteacha, agus ar inniúlachtaí digiteacha a neartú, cibearbhulaíocht a chosc agus dea-bhail dhigiteach a chur chun cinn;

35.á iarraidh ar an gCoimisiún, i gcomhar leis na Ballstáit, treoir Eorpach agus ábhair oideachais eile a sholáthar maidir leis an litearthacht sna meáin atá saincheaptha do gach aoisghrúpa agus do gach leibhéal oideachais, agus ceardlanna rialta a eagrú, ina dírítear ar an smaointeoireacht chriticiúil, ar fhíorú foinsí faisnéise, ar an iolrachas sna meáin, ar an rannpháirtíocht fhreagrach sna meáin, agus ar ról na n-eagraíochtaí seiceála fíricí, na gcomhlachtaí féinrialála iriseoireachta agus na meán pobail, chomh maith le treoir a thabhairt do thuismitheoirí agus do chúramóirí maidir le húsáid na meán atá oiriúnach ó thaobh aoise de, rioscaí ar líne agus uirlisí IS;

36.ag spreagadh na mBallstát dul i gcomhairle agus comhoibriú le hoideoirí, taighdeoirí, lucht acadúil, eagraíochtaí na sochaí sibhialta, tuismitheoirí, cúramóirí agus eagraíochtaí óige agus tionscnaimh litearthachta sna meáin agus foghlama digití á bhforbairt agus á measúnú acu, chun a áirithiú go bhfreagróidh siad do riachtanais foghlaimeoirí agus oideoirí;

37.á iarraidh ar na Ballstáit agus ar an gCoimisiún a áirithiú go mbeidh úsáid uirlisí foghlama digití san oideachas saor ó thionchar tráchtála míchuí; ag cur béim ar an bhfíoras gur cheart go mbeadh an comhar le gníomhaithe san earnáil phríobháideach trédhearcach, dírithe ar an oideachas agus ar mhaithe le leas an phobail;

38.á iarraidh ar na Ballstáit litearthacht sna meáin agus cláir foghlama digití a neartú chun cur ar chumas úsáideoirí idirdhealú a dhéanamh idir ábhar eagarthóireachta, tráchtála agus sintéiseach agus teicnící áititheacha a shainaithint; á chur i bhfáth gur gá litearthacht IS a chomhtháthú sna cláir sin chun go bhféadfar ábhar arna ghiniúint ag IS agus rioscaí gaolmhara cúblála agus mífhaisnéise a aithint;

39.á iarraidh ar an gCoimisiún, i ndlúthchomhar leis na Ballstáit, measúnú práinneach agus cuimsitheach a dhéanamh ar thionchar gléasanna agus seirbhísí digiteacha, lena n-áirítear uirlisí IS, i suíomhanna oideachais ar thorthaí foghlama, ar fhorbairt chognaíoch, ar fholláine, ar mheabhairshláinte agus ar réimsí airde, chun tacú lena n-úsáid fhreagrach i scoileanna; ag tathant ar an gCoimisiún bearta beartais a mholadh, i gcás inar gá, lena bhféadfaí srianta nó toirmisc spriocdhírithe a bheartú, go háirithe in oideachas na luath-óige, chun a áirithiú go mbeidh bonn cirt docht le húsáid teicneolaíochtaí digiteacha san oideachas ó thaobh na hoideolaíochta de, oiriúnach ó thaobh aoise de, comhréireach agus bunaithe ar fhianaise eolaíoch neamhspleách, ionas go dtacóidh na huirlisí sin le próisis foghlama seachas iad a ionadú;

40.ag spreagadh na mBallstát oiliúint leanúnach a áirithiú d’oideoirí – bídís san oideachas foirmiúil, seachfhoirmiúil nó neamhfhoirmiúil – agus do leabharlannaithe sna meáin agus san oideachas digiteach araon, le tacaíocht ó chistiú leormhaith; á iarraidh ar an gCoimisiún oiliúint litearthachta sna meáin a neartú trí Ionaid d’Idirlíon Níos Sábháilte, tríd an ardán um Idirlíon Níos Fearr do Leanaí agus trí ardáin ábhartha AE;

41.á iarraidh ar an gCoimisiún agus ar na húdaráis nó na comhlachtaí rialála náisiúnta ábhartha feachtais oideachais agus feasachta poiblí a reáchtáil maidir leis an litearthacht sna meáin agus leis an bhfoghlaim dhigiteach chun feasacht a mhéadú maidir leis an gcaoi a múnlaíonn timpeallachtaí digiteacha iompraíocht ar líne, agus maidir leis na bearta rialaithe tuismitheora atá ar fáil, na hoibleagáidí dlíthiúla atá ar ardáin ar líne cheana, agus na sásraí tacaíochta atá ar fáil, lena n-áirítear eagraíochtaí a sholáthraíonn tacaíocht mheabhairshláinte inrochtana;

42.á iarraidh ar an gCoimisiún agus ar na Ballstáit an litearthacht sna meáin agus an fhoghlaim dhigiteach ar feadh an tsaoil a chur chun cinn do gach saoránach, ag díriú ar dhaoine fásta, ar dhaoine scothaosta agus ar phobail leochaileacha;

43.ag aithint ról na leabharlann poiblí, na n-ionad pobail agus eagraíochtaí na sochaí sibhialta mar mhoil iontaofa, inrochtana agus chuimsitheacha don litearthacht sna meáin agus don fhoghlaim dhigiteach lena rannchuidítear leis an gcuimsiú sóisialta, leis an rannpháirtíocht dhaonlathach agus le rochtain chomhionann ar eolas, ar chultúr agus ar fhaisnéis; á iarraidh ar na Ballstáit comhpháirtíochtaí agus infheistíocht sna príomhbhonneagair áitiúla sin a neartú trí chistiú leormhaith, oiliúint foirne agus rochtain ar uirlisí agus acmhainní digiteacha atá cothrom le dáta;

44.á iarraidh ar an gCoimisiún agus ar na Ballstáit tacú, i gcomhar le gníomhaithe leasa phoiblí agus le geallsealbhóirí ábhartha, le héiceachórais dhigiteacha athléimneacha agus iontaofa a fhorbairt lena neartófar athléimneacht dhigiteach na hEorpa, iolrachas na meán agus rochtain na saoránach ar fhaisnéis chruinn agus iontaofa;

45.á iarraidh ar na Ballstáit agus ar a n-údaráis réigiúnacha agus áitiúla litearthacht sna meáin agus oideachas digiteach a chur chun cinn ar bhealach nuálach agus cruthaitheach ar fud timpeallachtaí uirbeacha, idir fhisiciúil agus dhigiteach, chun rannpháirtíocht dhaonlathach agus rannpháirtíocht shibhialta a chothú; ag cur béim ar an bhfíoras go bhfuil ról ríthábhachtach ag cathracha maidir le sábháilteacht agus slándáil spásanna poiblí a áirithiú, ar spásanna iad a ndéanann timpeallacht na faisnéise difear dóibh níos mó agus níos mó;

46.á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.