1.Jilqa’ l-proposta leġiżlattiva tal-Kummissjoni dwar it-28 reġim (“EU Inc.”) għall-kumpaniji; jirrikonoxxi l-impatt sistemiku potenzjali tiegħu fuq il-funzjonament tas-Suq Uniku u l-kompetittività ġenerali tal-ekonomija tal-UE; Jissottolinja, madankollu, li l-proposta dwar it-28 reġim ma tridx tikkostitwixxi sostituzzjoni għal aktar sforzi leġiżlattivi biex jitnaqqsu l-frammentazzjoni u d-disparitajiet bejn l-oqfsa regolatorji tal-Istati Membri;

2.Jenfasizza li adotta riżoluzzjoni b’rakkomandazzjonijiet lill-Kummissjoni dwar it-28 reġim: qafas ġuridiku ġdid għall-kumpaniji innovattivi;

3.Jilqa’ l-adozzjoni tal-aġenda “Ewropa Waħda, Suq Wieħed” biex jiġi sfruttat il-potenzjal tas-suq uniku; jieħu nota tat-talba tal-Kunsill Ewropew għall-adozzjoni tat-28 reġim għad-dritt tal-kumpaniji; jinnota n-nuqqas ta’ referenzi tal-Kunsill Ewropew għal armonizzazzjoni mmirata tal-politika tat-tassazzjoni fl-ambitu ta’ din l-aġenda, b’mod partikolari minħabba li l-SMEs għażlu l-frammentazzjoni tat-taxxa u tal-VAT bħala l-aktar ostaklu prevalenti biex jespandu;

4.Jisħaq fuq il-fatt li t-tassazzjoni f’ħafna każijiet hija kompetenza esklużiva tal-Istati Membri, iżda hemm – b’mod partikolari f’termini ta’ proċeduri – lok għal aktar simplifikazzjoni jew armonizzazzjoni mmirata li tindirizza reġimi ta’ konformità differenti, trattament tat-taxxa korporattiva kumpless u frammentat, obbligi ta’ rapportar u ostakli amministrattivi fit-trattament tal-investiment transfruntier; jenfasizza l-kontribut pożittiv tal-inizjattivi leġiżlattivi preċedenti tal-UE dwar it-tassazzjoni, b’mod partikolari fl-indirizzar tal-evażjoni, l-evitar u l-frodi tat-taxxa, li huma komplementari għall-oqfsa ġuridiċi nazzjonali;

5.Jitlob li l-inizjattiva tat-28 reġim tkun ambizzjuża fis-sustanza tagħha, anke fir-rigward tal-aspetti tat-tassazzjoni, filwaqt li tirrispetta bis-sħiħ it-Trattati, biex l-SMEs, il-kumpaniji żgħar b’kapitalizzazzjoni medja u l-kumpaniji innovattivi jkunu jistgħu jespandu u joperaw mingħajr ostakli transfruntiera fis-suq uniku tal-UE;

6.Jissottolinja li t-28 reġim ma għandu, taħt l-ebda ċirkostanza, jippermetti ċ-ċirkomvenzjoni tal-protezzjoni domestika obbligatorja għall-ħaddiema, ir-rappreżentanti tagħhom u t-trade unions, u lanqas isir mezz biex jimmina, inaqqas jew idgħajjef il-livelli eżistenti ta’ protezzjoni fil-livell tal-UE jew nazzjonali; jenfasizza li t-28 reġim għandu jappoġġja l-innovazzjoni, it-trasparenza tal-politiki tal-kumpaniji u t-tkabbir dimensjonali u l-iskalabbiltà tal-kumpaniji billi jħeġġeġ it-tneħħija tal-ostakli ġuridiċi u tat-taxxa li jillimitaw l-iżvilupp u l-espansjoni transfruntiera kif ukoll il-ġustizzja fiskali, filwaqt li jipprevjeni b’mod effettiv id-disparitajiet fiskali, soċjali u regolatorji;

7.Jisħaq li l-benefiċċji tad-diġitalizzazzjoni u s-simplifikazzjoni tar-rekwiżiti ta’ konformità li se jiġu introdotti taħt il-modulu tat-taxxa tat-28 reġim (minn hawn’ il quddiem il-“modulu tat-taxxa”) għandhom ikunu disponibbli għall-kumpaniji kollha taħt “EU Inc.”;

8.Iqis li t-28 reġim huwa pass strateġiku lejn l-approfondiment ulterjuri tas-suq uniku, u b’hekk javvanza l-integrazzjoni Ewropea u jtejjeb il-funzjonament tas-suq uniku u l-kompetittività tiegħu;

9.Jisħaq li t-28 reġim għandu jiġi stabbilit permezz ta’ approċċ modulari; jifhem li r-regolament propost li jistabbilixxi qafas legali korporattiv (“EU Inc.”) huwa l-ewwel pass li miegħu jistgħu jiżdiedu moduli oħra, inkluż dwar it-tassazzjoni (modulu tat-taxxa); iqis li dawn il-moduli futuri għandhom ikopru aspetti rilevanti taċ-ċiklu tal-ħajja kollu tal-kumpaniji, u jiġu evalwati kontinwament skont parametri ta’ riferiment internazzjonali;

10.Iqis li l-modulu tat-taxxa jista’ jiżdied mal-proposta leġiżlattiva għal regolament li jistabbilixxi qafas legali korporattiv (“EU Inc.”), li għandu jiġi estiż għall-qasam tat-tassazzjoni, b’mod immirat, ambizzjuż u proporzjonat; iqis li l-benefiċċji potenzjali tal-modulu tat-taxxa jinkludu anqas kostijiet tal-konformità, proċeduri regolatorji simplifikati, ċertezza ġuridika msaħħa, prevedibbiltà u aċċess aktar faċli għas-swieq transfruntiera, u b’hekk jittejjeb u jiġi approfondit is-suq uniku Ewropew;

11.Jinnota li biex modulu tat-taxxa jkun jista’ jinkiseb skont il-qafas eżistenti tat-Trattat, u fejn il-proċedura leġiżlattiva applikabbli ma tagħtix riżultati, għandha tiġi kkunsidrata struttura ta’ inklużjoni fakultattiva tal-leġiżlazzjoni rilevanti, jew kooperazzjoni msaħħa bħala l-aħħar alternattiva, sabiex jiġu indirizzati n-nuqqasijiet tal-politika tat-taxxa; jinnota li l-politika tat-tassazzjoni għadha soġġetta għall-unanimità fil-Kunsill tal-UE; huwa tal-fehma li t-tranżizzjoni għall-użu tal-votazzjoni b’maġġoranza kwalifikata hija meħtieġa f’ċerti aspetti tal-politika tat-tassazzjoni bħal fl-implimentazzjoni ta’ ftehimiet internazzjonali ffirmati mill-Istati Membri kollha, ċerti proċeduri amministrattivi jew definizzjonijiet ġuridiċi, sabiex jiġi evitat li l-unanimità tillimita l-armonizzazzjoni regolatorja u twaqqaf liċ-ċittadini u lin-negozji milli jibbenefikaw bis-sħiħ mis-suq uniku; jinnota li tali modulu għandu jitfassal bħala sistema fakultattiva, ċara u legalment sigura, miftuħa għall-adeżjoni ta’ Stati Membri oħra fi kwalunkwe ħin, filwaqt li tiġi evitata aktar frammentazzjoni u tiġi ggarantita l-koerenza tas-suq uniku;

12.Jinsisti fuq il-fatt li t-28 reġim irid inaqqas effettivament il-kumplessità tal-konformità għall-kumpaniji parteċipanti u ma jridx joħloq ġabra tar-regoli parallela li tikkoinċidi mas-sistemi ġuridiċi nazzjonali, li twassal għal żieda fid-distorsjonijiet ġuridiċi, it-trikkib jew l-inkonsistenzi, jew piż amministrattiv addizzjonali; ifakkar li l-objettiv ewlieni tar-reġim il-ġdid huwa s-simplifikazzjoni u l-kompetittività u li dawn iridu jiġu żgurati f’kull ħin filwaqt li jsir sforz għal konverġenza soċjali’ l fuq;

13.Jenfasizza li l-objettiv kemm tat-28 reġim kif ukoll tal-modulu tat-taxxa tiegħu mhuwiex li jinħoloq vantaġġ tat-taxxa inġust għall-kumpaniji jew l-impjegati tagħhom, iżda li jitnaqqsu b’mod sostanzjali l-kumplessità u l-piż amministrattiv li jirriżultaw minn obbligi differenti, filwaqt li jiġu rispettati l-karatteristiċi speċifiċi ta’ tali kumpaniji;

14.Jenfasizza li sabiex tiġi evitata aktar kumplessità, id-dispożizzjonijiet tat-28 reġim għandhom ikunu konformi ma’ kwalunkwe proposta ewlenija oħra tal-Kummissjoni u mal-linji gwida rilevanti tal-Organizzazzjoni għall-Kooperazzjoni u l-Iżvilupp Ekonomiċi (OECD) rigward integrazzjoni akbar fis-suq uniku, jiġifieri fil-qasam tat-tassazzjoni u l-leġiżlazzjoni tat-taxxa applikabbli, b’mod partikolari fl-oqfsa tal-UE kontra l-evitar u l-evażjoni tat-taxxa, inkluża d-Direttiva kontra l-Evitar tat-Taxxa Id-Direttiva tal-Kunsill (UE) 2016/1164 tat-12 ta’ Lulju 2016 li tistabbilixxi regoli kontra l-prattiki ta’ evitar tat-taxxa li jaffettwaw direttament il-funzjonament tas-suq intern, (ĠU L 193, 19.7.2016, p. 1, ELI: http://data.europa.eu/eli/dir/2016/1164/oj). (ATAD);

15.Jappella għal approċċ modulari u bbażat fuq il-proġetti pilota għat-28 reġim, li fih id-dritt tal-kumpaniji ikun element ewlieni; jisħaq li dawk il-moduli jridu jnaqqsu b’mod effettiv il-kumplessità tal-konformità għall-kumpaniji parteċipanti, iżda jinsisti fuq l-adozzjoni ta’ pjan direzzjonali, rigward dak li għandu jiżdied u meta, li għandu jkun magħruf mill-bidu u aġġustat kontinwament taħt proċess ta’ rieżami demokratiku perjodiku;

16.Jenfasizza f’dan il-kuntest li, bl-għan li tiġi żgurata l-fattibbiltà (politika) u sabiex jiġi ppreservat il-kontroll tal-Istati Membri fuq parti sostanzjali tal-politika tat-tassazzjoni tagħhom kif previst fl-oqfsa ġuridiċi attwali, il-kamp ta’ applikazzjoni tal-modulu tat-taxxa għandu jkun limitat, bħala punt tat-tluq, għal subsett ta’ kumpaniji, bħal start-ups u scale-ups transfruntiera orjentati lejn it-tkabbir, li tipikament jiġġeneraw biss dħul limitat mit-taxxa korporattiva fuq l-introjtu għall-Istati Membri; jieħu nota tar-rakkomandazzjoni tal-Kummissjoni tat-18 ta’ Marzu 2026 li tistabbilixxi definizzjoni ta’ tali kumpaniji bl-użu ta’ kriterji bħan-nefqa u d-daqs tar-riċerka u l-iżvilupp (R&Ż) tagħhom, li akkumpanjat il-proposta dwar l-“EU Inc.”;

17.Jissottolinja li l-inċentivi fiskali kollha fi ħdan il-qafas tat-28 reġim iridu jkunu kompletament kompatibbli mar-regoli dwar l-għajnuna mill-Istat u mfassla b’mod li tiġi evitata kompetizzjoni tat-taxxa dannuża, filwaqt li jiġu żgurati kundizzjonijiet ekwi fis-suq uniku;

18.Itenni li l-kumpaniji li jagħżlu b’mod volontarju li jipparteċipaw fit-28 reġim għandhom jintrabtu bir-regoli tiegħu u li l-għażla tagħhom li jipparteċipaw fih trid tiġi rikonoxxuta awtomatikament mill-oqfsa ġuridiċi tal-Istati Membri kollha biex joperaw bħal kwalunkwe kumpanija oħra reġistrata nazzjonalment fi kwalunkwe Stat Membru; ifakkar li d-dħul fit-28 reġim għandu jkun fakultattiv, iżda l-ħruġ minnu għandu jkun obbligatorju malli jintlaħqu kriterji definiti b’mod ċar, inkluża offerta pubblika inizjali; jenfasizza f’dan il-kuntest li għandu jiġi applikat il-prinċipju tan-nondiskriminazzjoni fil-konfront tal-forom ġuridiċi nazzjonali tal-kumpaniji;

19.Jinnota li jridu jiġu stabbiliti kundizzjonijiet ta’ ħruġ għall-kumpaniji li jiddeċiedu li jirtiraw fuq inizjattiva tagħhom stess, inklużi rekwiżiti ta’ avviż, perjodi minimi possibbli ta’ parteċipazzjoni, u d-dħul fis-seħħ tal-irtirar u li, ladarba jiġu ssodisfati l-kriterji rilevanti għall-ħruġ, irid jiġi pprovdut biżżejjed żmien biex jippermetti t-trasformazzjoni meħtieġa tal-kumpaniji, filwaqt li tiġi żgurata tranżizzjoni prevedibbli u gradwali filwaqt li jiġu minimizzati l-opportunitajiet għal arbitraġġ regolatorju;

20.Jirrikonoxxi li n-newtralità tal-forma ġuridika u n-nondiskriminazzjoni fiskali huma essenzjali biex tiġi żgurata domanda suffiċjenti għar-reġim; jistieden lill-Kummissjoni, jekk ikun meħtieġ, temenda l-acquis tal-UE relatat mat-tassazzjoni, kemm direttament kif ukoll indirettament, sabiex tiżgura li l-kumpaniji li joperaw taħt it-28 reġim ikunu jistgħu jaqgħu fil-kamp ta’ applikazzjoni tagħhom stess, u tissimplifika u tarmonizza aktar il-proċeduri għall-aċċess għall-benefiċċji ta’ dawk id-direttivi;

21.Huwa tal-fehma li fl-ewwel fażijiet taċ-ċiklu tal-ħajja ta’ kumpanija, il-veloċità u s-sempliċità, mingħajr il-bżonn li jiġu stabbiliti forom ġuridiċi separati f’kull wieħed mill-iStati Membri, huma kruċjali biex kunċett innovattiv jiġi ttrasformat f’entità vijabbli; jisħaq fuq il-fatt li, għat-28 reġim, irid ikun hemm b’mod prestabbilit reġistrazzjoni unika totalment diġitali fil-punt uniku ta’ servizz, flimkien mal-għoti ta’ numru ta’ identifikazzjoni tat-taxxa uniku, inklużi dokumentazzjoni, mudelli u interfaċċja unika għall-mili tal-formoli tat-taxxa totalment standardizzati, u li jiġi rrispettat il-prinċipju skont liema l-Ingliż jiġi fl-ewwel post għall-komunikazzjoni, mingħajr ma jiġu kompromessi l-lingwi uffiċjali l-oħra tal-UE; ifakkar li t-28 reġim għandu jikkombina arkitettura ġuridika ċara, benefiċċji kwantifikabbli sinifikattivi u ex ante għall-kumpaniji, u appoġġ istituzzjonali robust; jenfasizza s-sinerġiji mal-proposta dwar l-istabbiliment ta’ Kartieri Ewropej tan-Negozju (COM(2025)0838), imfassla biex tistabbilixxi ambjent bla xkiel u sigur għall-interazzjoni diġitali bejn l-operaturi ekonomiċi u l-korpi tas-settur pubbliku;

22.Jinnota li l-Punt Uniku ta’ Servizz, jew alternattivament ċentru ċentrali differenti, għandu jiffunzjona wkoll bħala pjattaforma diġitali li tappoġġja lill-kumpaniji matul iċ-ċiklu tal-ħajja tagħhom fi ħdan it-28 reġim u l-moduli varji tiegħu; jenfasizza li dan għandu jipprovdi aċċess simplifikat għall-informazzjoni regolatorja, fiskali u amministrattiva rilevanti fl-Istati Membri kollha, filwaqt li jiżgura t-trasparenza u ċ-ċertezza tad-dritt, kif ukoll jinkludi l-possibbiltà li jiġu inkorporati, ġestiti u xolti l-attivitajiet;

23.Jenfasizza, mingħajr preġudizzju għal kwalunkwe miżura protettiva ulterjuri, li l-miżuri kontra l-evitar tat-taxxa stabbiliti mid-dritt attwali tal-UE jridu jiġu applikati bir-reqqa; jisħaq li huma biss il-kumpaniji b’attivitajiet ekonomiċi reali fl-UE li għandu jkollhom aċċess għall-modulu tat-taxxa u li dan il-modulu ma għandux iwassal għall-ħolqien ta’ kumpaniji fittizji jew fantażma, peress li tali prattiki jimminaw l-integrità regolatorja, ifixklu l-kompetizzjoni ġusta u jnaqqsu l-attività ekonomika ġenwina fl-UE; jissottolinja li l-modulu tat-taxxa ma għandux isir għodda għal “tax shopping” u, fl-ebda ċirkostanza, ma jrid isir mezz biex jitnaqqsu jew jiġu evitati bla bżonn il-livelli attwali ta’ tassazzjoni fil-livell tal-UE jew nazzjonali;

24.Iqis li kumpanija li għaliha jkun ġie stabbilit uffiċjalment ksur ta’ regoli vinkolanti rigward il-frodi, it-taxxa, l-evażjoni tas-sigurtà soċjali jew il-parteċipazzjoni tal-impjegati, ma għandhiex tkun eleġibbli biex tipparteċipa fil-modulu tat-taxxa;

25.Jenfasizza li qafas ta’ rapportar finanzjarju trasparenti, responsabbli u effiċjenti huwa neċessità, u li l-Istandards Kontabilistiċi Uniċi għandhom jiġu applikati awtomatikament għall-kumpaniji kollha li joperaw taħt it-28 reġim fl-Istati Membri parteċipanti kollha, filwaqt li jibnu fuq standards rikonoxxuti internazzjonalment bħall-Istandards Internazzjonali tar-Rapportar Finanzjarju fejn xieraq;

26.Huwa tal-opinjoni li n-nuqqas ta’ armonizzazzjoni tal-politika tat-tassazzjoni korporattiva jirrappreżenta ostaklu sinifikanti għall-attività ekonomika transfruntiera fl-UE, filwaqt li jżid ukoll ir-riskji ta’ ppjanar aggressiv tat-taxxa; jipproponi, għalhekk, biex jiġi pprovdut reġim tat-taxxa ċar, effettiv u trasparenti, il-modulu tat-taxxa futur għandu jimmira għal bażi unika konsolidata għat-taxxa korporattiva għall-kumpaniji parteċipanti fl-UE kollha; ifakkar fl-inizjattivi preċedenti, pereżempju l-Bażi Komuni għat-Taxxa Korporattiva, il-BKKTK, il-BEFIT u l-mudell tas-sistema ta’ Taxxa tal-Uffiċċju Reġistrat għall-SMEs, u jipproponi li l-modulu tat-taxxa għandu joffri metodu uniformi biex jiġi ddeterminat l-introjtu taxxabbli f’konformità mal-linji gwida tal-OECD, b’hekk tiġi eliminata l-frammentazzjoni fil-kalkoli tal-bażi tat-taxxa u tonqos l-inċertezza transfruntiera; jisħaq li l-modulu tat-taxxa ma jridx jillimita aktar id-diskrezzjoni tal-Istati Membri li jistabbilixxu rati tat-taxxa korporattiva; jisħaq li t-28 reġim għandu jagħti prijorità lill-konsolidazzjoni ġenwina sabiex jiġi żgurat il-kumpens transfruntier effettiv għat-telf, u b’hekk jiġi inċentivat l-investiment transfruntier;

27.Jinnota li, fir-rigward tal-proposta għal remissjoni li tnaqqas il-predispożizzjoni favur id-dejn, il-modulu għandu jippromwovi n-newtralità bejn il-finanzjament tad-dejn u tal-ekwità, sabiex jitneħħew il-preġudizzji fiskali strutturali u jissaħħaħ l-investiment ibbażat fuq l-ekwità, li huwa partikolarment importanti għall-istart-ups u l-iscale-ups li jiddependu primarjament fuq il-finanzjament tal-ekwità fl-istadji bikrin tal-iżvilupp tagħhom;

28.Jipproponi li t-28 reġim għandu jfittex li jissimplifika l-amministrazzjoni tat-taxxa u jnaqqas l-inċertezza transfruntiera, inkluż, fejn possibbli, billi jistandardizza d-dikjarazzjonijiet tat-taxxa, jevita dikjarazzjonijiet duplikati, u jtejjeb il-komunikazzjoni fost l-awtoritajiet tat-taxxa, u l-applikazzjoni tal-prinċipju “diġitali l-ewwel”;

29.Jipproponi li l-bażi konsolidata għat-taxxa tkun mqassma fost l-Istati Membri li jużaw formula maqbula minn qabel li tirrifletti l-attività ekonomika reali, bħall-bejgħ, ix-xogħol, l-assi tanġibbli u l-preżenza diġitali, li tieħu post tilwim kumpless bejn il-gruppi fil-qasam tal-ipprezzar ta’ trasferiment fi ħdan ir-reġim b’metodu ta’ allokazzjoni trasparenti, f’konformità mal-linji gwida tal-OECD; jisħaq li dan ikun kemm għodda ta’ simplifikazzjoni kif ukoll għodda kontra l-evitar tat-taxxa;

30.Ifakkar li r-rati tat-taxxa jridu jibqgħu fil-kompetenza tal-Istati Membri; jinnota, madankollu, li dawn jistgħu jiġu ppreżentati permezz ta’ interfaċċja unika għall-mili tal-formoli;

31.Jisħaq fuq il-fatt li t-tassazzjoni doppja trid tiġi evitata b’mod effettiv permezz, ngħidu aħna, id-definizzjoni u l-klassifikazzjoni uniformi tal-gwadanji kapitali, tal-pagamenti intrareġim, jew ir-rikonoxximent reċiproku awtomatiku tal-istatus tat-taxxa;

32.Jipproponi li l-Istati Membri jikkunsidraw l-introduzzjoni ta’ bordijiet speċjali fi ħdan il-qrati nazzjonali tagħhom iddedikati għal tilwim dwar il-modulu tat-taxxa, u li dawn il-bordijiet ikunu jistgħu jwettqu s-soluzzjoni tat-tilwim bl-Ingliż;

33.Jenfasizza li l-espansjoni transfruntiera tista’ tinvolvi avvenimenti u riorganizzazzjonijiet frekwenti tal-mobbiltà korporattiva, u li, bl-intenzjoni li jittieħed benefiċċju mill-qafas attwali għal operazzjonijiet newtrali għat-taxxa, il-modulu tat-taxxa għandu jinvolvi l-estensjoni tad-dritt attwali tal-UE u għandu jindirizza frizzjonijiet tat-taxxa relatati mal-mobbiltà permezz ta’ koordinazzjoni amministrattiva msaħħa u ċertezza sostantiva akbar filwaqt li jiżgura li kwalunkwe miżura ta’ simplifikazzjoni tibqa’ soġġetta għal salvagwardji xierqa kontra l-abbuż Il-Parlament Ewropew, id-Dipartiment Tematiku għall-Ekonomija u t-Tkabbir; L-istudju ta’ Filip Debelva, Joris Luts, Anne Mieke Vandekerkhove, Niels Bammens bit-titolu “Feasibility of a 28th Tax Regime and Its Potential to Support EU Competitiveness” (Il-fattibbiltà tat-28 Reġim tat-Taxxa u l-Potenzjal Tiegħu li Jappoġġja l-Kompetittività tal-UE), 2026;

34.Jenfasizza li, biex jonqsu l-piżijiet marbutin mal-konformità, il-parteċipanti fir-reġim jeħtiġilhom joperaw f’qafas tal-VAT ċentralizzat, li fih numru uniku tal-VAT tal-UE u punt uniku diġitali ta’ servizz Il-pakkett “Il-VAT fl-Era Diġitali” (ViDA). fil-livell tal-UE jridu jkopru d-dikjarazzjonijiet u r-rifużjonijiet fl-Istati Membri kollha, inkluż permezz ta’ proċeduri ta’ rifużjoni fil-ħin u effiċjenti u ħtieġa mnaqqsa ta’ reġistrazzjonijiet multipli; jenfasizza l-importanza li jiġi promoss l-użu ta’ soluzzjonijiet diġitali interoperabbli, inkluża l-fatturazzjoni elettronika, biex tiġi ssimplifikata l-konformità, tissaħħaħ it-trasparenza u jitnaqqsu l-ispejjeż amministrattivi; ifakkar li l-objettiv taħt il-modulu tat-taxxa għandu jkun is-simplifikazzjoni proċedurali pjuttost milli l-armonizzazzjoni tar-rati tal-VAT, biex b’hekk il-kumpaniji jkunu jistgħu jespandu mingħajr ma jiġu mmultiplikati l-interfaċċji amministrattivi;

35.Jenfasizza li l-flussi transfruntiera tal-kapital fi ħdan il-modulu tat-taxxa għandhom jibbenefikaw minn trattament aktar ikkoordinat u effiċjenti, li abbażi tiegħu d-dividendi, l-imgħax u r-royalties bejn l-entitajiet parteċipanti u l-veikoli ta’ investiment assoċjati tagħhom għandhom jibbenefikaw u jkunu soġġetti għal proċedura komuni simplifikata tat-taxxa f’ras il-għajn u tassazzjoni minima effettiva; jipproponi li r-rikonoxximent immedjat tar-residenza għal finijiet ta’ taxxa jrid jinkiseb permezz ta’ reġistru diġitali ċentralizzat tal-UE, li jippermetti proċeduri ta’ awtorizzazzjoni diġitali simplifikati u jelimina d-dewmien minħabba rifużjonijiet manwali identifikat bħala ostaklu ewlieni għall-espansjoni fl-UE Id-Direttiva tal-Kunsill 2025/50/UE tal-10 ta’ Diċembru 2024 dwar ħelsien aktar rapidu u aktar sikur mit-taxxi f’ras l-għajn eċċessivi, (ĠU L, 2025/50, 10.1.2025, ELI: http://data.europa.eu/eli/dir/2025/50/oj).;

36.Jitlob li tiġi żviluppata definizzjoni ċara u trasparenti tas-sjieda benefiċjarja għal finijiet ta’ taxxa li tidentifika s-sidien reali tad-ditti, jew tal-anqas sett ta’ kriterji komprensibbli u aċċettat b’mod wiesa’ li fuqu għandu jiġi offrut il-ħelsien mit-taxxa f’ras l-għajn, u għandhom jiġu evitati proċeduri twal ta’ rifużjoni, iżda dawn għandhom jinżammu f’sitwazzjonijiet fejn l-ebda wieħed mill-kriterji ma jiġi ssodisfat;

37.Jilqa’ l-proposta tal-Kummissjoni għall-użu fakultattiv tal-opzjonijiet ta’ stokk għall-impjegati tal-UE fi ħdan il-proposta usa’ “EU Inc.” u b’mod partikolari l-prinċipju ta’ tassazzjoni li sseħħ maċ-ċessjoni u tibbenefika mill-istess trattament tat-taxxa kif applikabbli għal opzjonijiet oħra ta’ stokks għall-impjegati jew strumenti simili skont id-dritt nazzjonali; jemmen, madankollu, li l-implimentazzjoni ta’ skema ta’ opzjonijiet ta’ stokk għall-impjegati tal-UE għandha tkun obbligatorja taħt il-modulu tat-taxxa; jinnota li l-gwadanji għandhom jiġu ttrattati bħala introjtu minn kapital u mhux introjtu mill-impjieg, biex b’hekk l-inċentivi għall-impjegati jkunu allinjati mat-tkabbir fit-tul tal-kumpaniji u jitneħħa l-effett distorsiv tat-tassazzjoni antiċipata; jappoġġja l-indirizzar tal-kwistjoni tal-konvertibbiltà ma’ skemi ta’ opzjonijiet ta’ stokk madwar l-Ewropa biex tiġi ffaċilitata l-konverżjoni ta’ kumpaniji eżistenti għat-28 reġim;

38.Jisħaq fuq ir-rwol tal-iskemi ta’ ishma għall-impjegati u mekkaniżmi simili fil-ħolqien ta’ inċentivi biex jattiraw it-talent u l-persunal ewlieni lejn dawn il-kumpaniji; jenfasizza li persunal ewlieni, inkluż fundaturi u impjegati essenzjali oħra li l-ħiliet u l-għarfien espert tagħhom huma kritiċi għall-iżvilupp tal-kumpanija; jenfasizza li reġim tat-taxxa trasparenti, ekonomikament sod u prevedibbli għal tali strumenti huwa essenzjali biex dawn il-kumpaniji jinżammu fl-UE u biex jiġi attirat u jinżamm it-talent fuq termini komparabbli ma’ dawk disponibbli f’ġuriżdizzjonijiet kompetituri oħra;

39.Jitlob li jkun hemm metodu ta’ valwazzjoni standardizzat tal-UE li joffri regoli ta’ “port sikur” biex jiġi ddeterminat il-valur tal-opzjoni fuq l-ishma u ta’ stokk fil-kumpaniji mhux ikkwotati, jipprevjeni r-rivalutazzjonijiet retroattivi u jnaqqas l-inċertezza tad-dritt; iqis li tali valutazzjonijiet għandhom jiġu rikonoxxuti mill-amministrazzjonijiet tat-taxxa parteċipanti sakemm ma jintweriex li hemm abbuż, frodi jew żball evidenti;

40.Ifakkar li l-kontribuzzjonijiet tas-sigurtà soċjali u t-taxxi fuq l-introjtu tal-pensjoni applikabbli għall-ħaddiema li jwettqu l-attivitajiet tagħhom f’aktar minn Stat Membru wieħed huma stabbiliti mill-qafas tal-ħaddiem multistatali skont l-Artikolu 13 tar-Regolament (KE) Nru 883/2004 Ir-Regolament (KE) Nru 883/2004 tal-Parlament Ewropew u tal-Kunsill tad-29 ta’ April 2004 dwar il-koordinazzjoni ta’ sistemi ta’ sigurtà soċjali (ĠU L 166, 30.4.2004, p. 1, ELI: http://data.europa.eu/eli/reg/2004/883/oj)., fejn il-leġiżlazzjoni applikabbli tiġi ddeterminata f’konformità ma’ għadd ta’ fatturi, u b’hekk tissaħħaħ iċ-ċertezza ġuridika u jitnaqqsu l-piżijiet amministrattivi transfruntiera;

41.Jappella għal regoli mmirati li jiżguraw iċ-ċertezza tat-taxxa għall-impjegati li jiċċaqilqu bejn l-Istati Membri, matul il-perjodu bejn l-għoti ta’ ekwità tal-impjegati u l-bejgħ tal-ishma sottostanti, inkluż permezz ta’ rapportar diġitali simplifikat uniku tal-impjegaturi kif ukoll l-evitar ta’ tassazzjoni doppja jew multipla fil-punt tal-bejgħ tal-ekwità tal-impjegati; jisħaq li kwalunkwe allokazzjoni tad-drittijiet ta’ tassazzjoni għandha tibqa’ proporzjonata, sempliċi u prevedibbli;

42.Jesprimi dispjaċir għall-fatt li għalkemm l-Istati Membri kollha għandhom leġiżlazzjoni nazzjonali f’konformità mal-linji gwida tal-OECD dwar l-ipprezzar tat-trasferimenti, l-applikazzjoni ta’ dawk il-linji gwida tibqa’ diverġenti minħabba n-nuqqas ta’ direttiva tal-UE dwar l-ipprezzar tat-trasferimenti; jisħaq li sabiex jiġi evitat li l-kostijiet ta’ konformità jsiru ostaklu strutturali għall-espansjoni, il-kumplessità tal-ipprezzar ta’ trasferiment għandha tonqos konsiderevolment; iqis li hemm bżonn li jintużaw elementi tal-BKKTK biex tiġi pprovduta bażi koerenti għal qafas fiskali Ewropew unifikat; jipproponi, fi ħdan il-modulu tat-taxxa, li l-Kummissjoni għandha tispeċifika b’mod ċar ir-regoli tal-ipprezzar ta’ trasferiment applikabbli għall-kumpaniji li jagħżlu t-28 reġim, u tinkludi “portijiet sikuri” kkoordinati li għandhom japplikaw għas-servizzi intragrupp ta’ rutina u għat-tranżazzjonijiet b’riskju baxx, u approċċi armonizzati li għandhom japplikaw għall-ħruġ ta’ liċenzji għall-proprjetà intellettwali u l-allokazzjoni tal-kostijiet biex jiġi limitat it-tilwim, filwaqt li r-rekwiżiti tad-dokumentazzjoni għandhom ikunu proporzjonati għad-daqs tal-kumpanija u l-istadju tat-tkabbir;

43.Jitlob li jiġu armonizzati d-definizzjonijiet u t-trattament għall-gwadanji kapitali, kif ukoll mekkaniżmi effiċjenti għall-prevenzjoni ta’ taxxa doppja u biex tonqos l-inċertezza transfruntiera; jissuġġerixxi valutazzjoni tal-possibbiltà li jiġi stabbilit status uniku vverifikat diġitalment tal-investituri abbażi ta’ sett ta’ standards komuni, biex jiġi żgurat li l-eliġibbiltà tagħhom tiġi rikonoxxuta awtomatikament fl-Istati Membri kollha sabiex jiġu ffaċilitati l-investimenti transfruntiera; huwa tal-fehma li l-istrumenti ta’ investiment standardizzati, fosthom mudelli ta’ finanzjament armonizzati u konvertibbli u mudelli ta’ ftehimiet tal-azzjonisti, għandhom jiddaħħlu biex jonqsu l-kostijiet ta’ tranżazzjon u l-inċertezza ġuridika, filwaqt li jissaħħu l-protezzjoni tal-investitur u t-trasparenza tas-suq;

44.Jisħaq li wieħed mill-għanijiet tar-reġim il-ġdid huwa li jikkontribwixxi għall-iżvilupp ta’ suq kapitali ġenwin tal-UE, li jippermetti lid-ditti fil-kamp ta’ applikazzjoni tiegħu jiksbu l-finanzjament meħtieġ filwaqt li jżommu l-preżenza tagħhom fl-UE; jissottolinja, għalhekk, il-ħtieġa li jiġi mmobbilizzat il-volum għoli ta’ tfaddil eżistenti fl-UE lejn l-investiment imsemmi, b’mod partikolari permezz tal-iżvilupp ta’ prodotti ta’ investiment attraenti u aċċessibbli għall-investituri bl-imnut, filwaqt li jiġi evitat ir-riskju li tali tfaddil jiġi dirett lejn ġuriżdizzjonijiet mhux tal-UE; jisħaq li l-modulu tat-taxxa jrid jiffaċilita l-għeluq tad-diskrepanza attwali fil-finanzjament fl-UE;

45.Jenfasizza li t-28 reġim għandu jindirizza direttament l-ostakli strutturali li jillimitaw il-mobilizzazzjoni tal-kapital fl-Ewropa; ifakkar li minn perspettiva ta’ investitur, irid jiġi żgurat allinjament regolatorju u prudenzjali; iqis li t-28 reġim għandu jkun fih regoli armonizzati dwar strumenti ta’ dejn simili għal ekwità, inklużi regoli tal-insolvenza marbuta ma’ dawk l-istrumenti, li jippermettu lill-investituri jinvestu f’kumpanija mingħajr ma jiksbu drittijiet ta’ kontroll fuq dik il-kumpanija;

46.Jisħaq li l-modulu tat-taxxa għandu jintroduċi inċentivi tat-taxxa xierqa, ikkoordinati u kundizzjonati b’mod strett iċċentrati fuq ir-riċerka, l-iżvilupp u r-reinvestiment; josserva li xenarju bażi armonizzat għall-inċentivi fil-qasam R&Ż għandu jistabbilixxi definizzjonijiet komuni tal-eleġibbiltà u standards minimi fl-Istati Membri kollha, inklużi iżda mhux limitati għall-kundizzjonalità soċjali, għodod regolari ta’ monitoraġġ u evalwazzjoni tan-nefqa tat-taxxa biex jiġi żgurat li: (i) huma adattati għall-iskop tagħhom; (ii) huma mod kosteffettiv biex titrawwem l-innovazzjoni; u (iii) ma jkollhom l-ebda implikazzjoni mhux mistennija jew negattiva; jenfasizza li d-ditti li jagħżlu l-modulu tat-taxxa m’għandhomx ikunu żvantaġġati biex jaċċessaw il-programmi jew l-inċentivi tal-Istati Membri abbażi tal-forma ġuridika tagħhom;

47.Jisħaq ukoll li t-tfassil tal-inċentivi fil-qasam R&Ż fl-ambitu tal-modulu tat-taxxa jrid jiġi kkalibrat b’mod espliċitu biex ikun allinjat mal-qafas globali tat-taxxa minima tat-Tieni Pilastru tal-OECD, u b’mod partikolari li trid tiġi indirizzata l-interazzjoni mar-regoli dwar il-Kreditu ta’ Taxxa Rimborżabbli Kwalifikat biex jiġi żgurat li ditti li jaqgħu fl-ambitu tal-modulu tat-taxxa – li jista’ ma jkollhom l-ebda profitt attwali – ikunu jistgħu madankollu jibbenefikaw bis-sħiħ mill-inċentivi mingħajr piż amministrattiv sproporzjonat;

48.Ifakkar fil-ħtieġa ta’ stimulazzjoni qawwija tal-attivitajiet ta’ espansjoni; jemmen li meta l-profitti investiti mill-ġdid jintużaw għal R&Ż, id-diġitalizzazzjoni jew l-innovazzjoni ekoloġika għandhom ikunu eliġibbli li jirċievu tnaqqis addizzjonali temporanju jew differimenti tat-taxxa, u b’hekk jinċentivaw ir-ridirezzjonar tal-qligħ imfaddal lejn investiment li jsaħħaħ il-produttività aktar milli distribuzzjoni fuq terminu qasir, sabiex tingħata spinta lill-kapaċità teknoloġika u l-kompetittività; jenfasizza li l-inċentivi kollha jridu jitfasslu biex jibqgħu trasparenti, sempliċi, u konformi mar-regoli dwar l-għajnuna mill-Istat;

49.Jistieden lill-Kummissjoni tiżgura rieżami komprensiv u, meta jkun neċessarju, reviżjonijiet tal-aspetti relatati mat-taxxa tat-28 reġim f’intervalli regolari, inkluż il-potenzjal tiżdied leġiżlazzjoni ġdida dwar il-moduli ġodda mar-reġim, valutazzjoni tar-rati ta’ adozzjoni tiegħu fost il-kumpaniji, b’mod partikolari l-SMEs, l-istart-ups u l-iscale-ups, u tal-iżvilupp u t-tkabbir ekonomiku tagħhom, l-allinjament tiegħu mal-ħtiġijiet tan-negozju u tas-soċjetà li qed jevolvu, l-idoneità ġenerali tiegħu għall-iskop u l-effett tiegħu fuq il-kompetittività tal-UE (valutazzjoni komparattiva internazzjonali); iqis li ċ-ċiklu ta’ rieżami għandu jseħħ kull erba’ snin biex tiġi żgurata l-adattabbiltà għal sfidi ġodda;

50.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.