1.Jilqa’ d-dikjarazzjoni tal-Kummissjoni dwar l-SMRs tal-UE 2030, li tenfasizza r-rwol ta’ riċerka, innovazzjoni, edukazzjoni u taħriġ fis-sikurezza tal-SMRs fl-UE u l-ħtieġa li s-setturi kollha jikkontribwixxu għat-trasformazzjoni tal-ekonomija tal-UE biex jinkisbu n-newtralità klimatika, is-sigurtà tal-enerġija u l-awtonomija strateġika;

2.Jirrikonoxxi li l-kriżi klimatika jeħtieġ li tiġi solvuta; jemmen li l-UE għandha tiffoka fuq il-firxa sħiħa ta’ soluzzjonijiet ta’ emissjonijiet żero netti sabiex tamplifika l-possibbiltajiet tagħha li tilħaq in-newtralità klimatika sal-2050, kif ukoll tiddiversifika l-kapaċità tal-produzzjoni tal-enerġija tagħha biex issaħħaħ is-sigurtà tal-provvista;

3.Jissottolinja l-ħtieġa li jiġi esplorat il-potenzjal tal-SMRs li jipprovdu lill-UE bi provvista tal-elettriku affidabbli, affordabbli u disponibbli għad-domanda, bil-kapaċità potenzjali li jipprovdu karga bażika soda ta’ elettriku nadif, sħana u fwar għall-industrija u għall-unitajiet domestiċi, bl-inklużjoni possibbli ta’ modifika retroattiva ta’ impjanti ta’ produzzjoni tal-enerġija bil-faħam; jenfasizza l-ħtieġa għal riċerka u żvilupp kontinwi b’rabta mal-SMRs biex jiġu żgurati s-sikurezza, l-effiċjenza u l-kosteffettività ta’ dawn it-teknoloġiji;

4.Jappella għall-iżvilupp ta’ strateġija komprensiva għall-użu tal-SMRs fl-UE, filwaqt li jitqiesu l-ħtiġijiet u ċ-ċirkostanzi speċifiċi tar-reġjuni differenti, inklużi żoni remoti u skarsament popolati u setturi ekonomiċi differenti; jemmen li strateġija bħal din għandha twitti t-triq għall-istabbiliment ta’ linji gwida ċari għall-ippjanar, l-għoti ta’ permessi u l-iskedi ta’ żmien, ir-regolamentazzjoni u s-sikurezza;

5.Jirrikonoxxi l-impatti soċjoekonomiċi li jokkorru mill-użu tal-SMRs f’termini ta’ impjiegi bi kwalifiki għoljin u kumpaniji b’valur miżjud għoli maħluqa fl-UE;

6.Iħeġġeġ lill-Kummissjoni u lill-Istati Membri joħolqu kuxjenza pubblika kif ukoll fehim pubbliku tal-benefiċċji potenzjali tal-SMRs u jiżguraw proċessi ta’ teħid ta’ deċiżjonijiet trasparenti u inklużivi f’dan il-qasam;

7.Jirrikonoxxi l-katina tal-provvista tal-fjuwil nukleari Ewropea bħala assi strateġiku u jirrikonoxxi r-rwol importanti li se taqdi biex tappoġġja l-evoluzzjoni tat-teknoloġija tar-reatturi tal-ġenerazzjoni li jmiss;

8.Iħeġġeġ l-esplorazzjoni tal-użu potenzjali tal-SMRs għall-produzzjoni ta’ idroġenu b’livell baxx ta’ emissjonijiet tal-karbonju, kemm għall-użu dirett tiegħu fl-industrija, kif ukoll għall-produzzjoni ta’ fjuwils sintetiċi sostenibbli; ifakkar li ammonti kbar ta’ kapaċità ġdida tal-elettriku huma meħtieġa biex tiġi żgurata l-iskala mistennija ta’ produzzjoni tal-idroġenu meħtieġa għad-dekarbonizzazzjoni tal-industrija Ewropea, meta titqies l-espansjoni globali prevista tad-domanda għall-idroġenu;

9.Jirrikonoxxi r-rwol potenzjali tal-SMRs għall-produzzjoni tas-sħana u tal-fwar għall-proċessi industrijali, b’mod partikolari għal industriji fejn it-tnaqqis tal-emissjonijiet huwa diffiċli;

10.Iħeġġeġ l-esplorazzjoni tal-potenzjal tal-SMRs għat-tisħin u t-tkessiħ distrettwali fejn sorsi oħra ta’ enerġija nadifa mhumiex disponibbli; ifakkar li t-tisħin u t-tkessiħ jikkostitwixxu bejn wieħed u ieħor nofs il-konsum kollu tal-enerġija tal-UE, u l-maġġoranza ta’ dan il-konsum għadha koperta mill-fjuwils fossili; jirrikonoxxi li l-SMRs jistgħu jipprovdu sħana b’emissjonijiet żero u b’temperatura baxxa lis-sistemi tat-tisħin distrettwali; jinnota li l-SMRs jistgħu jitfasslu biex jipproduċu biss sħana u għalhekk jistgħu jitħaddmu f’temperaturi u pressjonijiet aktar baxxi;

11.Jirrikonoxxi l-użu potenzjali tal-SMRs għal desalinazzjoni tal-ilma kompetittiva u sostenibbli;

12.Jirrikonoxxi l-valur potenzjali tal-SMRs għaż-żieda fil-produzzjoni elettrika u għat-titjib tal-istabbiltà tal-grilja;

13.Jenfasizza li, sa issa, l-SMRs huma operazzjonali biss fir-Russja u fiċ-Ċina, iżda li aktar minn 80 disinn ta’ SMRs bħalissa jinsabu fi stadji differenti ta’ żvilupp u użu fi 18-il pajjiż; jisħaq li l-UE għalhekk għandha żżomm ir-rwol tagħha ta’ mexxejja fil-qasam tat-teknoloġija fis-suq futur tal-SMRs; jissottolinja li l-kompetizzjoni għal dak li għandu x’jaqsam mal-SMRs hija intensa u diġà ġew imnedija ħafna inizjattivi;

14.Jenfasizza li l-enerġija nukleari, f’dawk il-pajjiżi li jużawha, għandha rwol x’taqdi fl-ibbilanċjar tas-sistema ġenerali tal-enerġija, billi tillimita d-dipendenzi fuq pajjiżi mhux tal-UE u tikseb sigurtà tal-enerġija u prezzijiet tal-enerġija stabbli;

15.Jirrikonoxxi li l-UE diġà għandha livell għoli ta’ għarfien espert u esperjenza fit-teknoloġiji nukleari li jistgħu jiġu applikati għall-iżvilupp u l-użu tal-SMRs; jinnota li ċ-ċiklu tal-fjuwil se jirrikjedi adattament ulterjuri, bl-għan aħħari li tiġi żviluppata katina tal-provvista għall-produzzjoni tal-SMRs li tista’ tiġġenera l-biċċa l-kbira tal-valur miżjud fl-Ewropa;

16.Isostni li l-SMRs jistgħu joħolqu opportunitajiet industrijali addizzjonali lil hinn mis-settur nukleari tradizzjonali u jistgħu jiftħu perspettivi għal atturi ġodda biex jidħlu fil-katina tal-provvista nukleari u b’hekk isaħħu l-kompetittività tal-UE f’firxa ta’ setturi ekonomiċi;

17.Jirrikonoxxi li l-livell tal-kontribut tal-SMRs għall-indipendenza enerġetika Ewropea jiddependi ħafna fuq il-lokalizzazzjoni tal-katina tal-valur tagħhom fit-territorju Ewropew; jissottolinja li katina tal-valur ibbażata fl-UE se ssaħħaħ ukoll il-ħiliet u l-għarfien prattiku għal dak li għandu x’jaqsam ma’ din it-teknoloġija; jappella għalhekk għal preferenza Ewropea fl-akkwisti pubbliċi futuri relatati mal-SMRs;

18.Jirrikonoxxi li għadd dejjem jikber ta’ Stati Membri qed jikkunsidraw in-nuklear għat-taħlita tal-enerġija tagħhom, u għalhekk hemm il-ħtieġa li l-isforzi jiġu kkoordinati, u jinnota l-opportunità għal dawn l-Istati Membri biex jiżviluppaw b’mod konġunt SMR Ewropew;

19.Jilqa’ l-ħolqien tal-hekk imsejħa Sħubija Ewropea għall-SMRs fil-forma ta’ skema ta’ kollaborazzjoni li tinvolvi l-partijiet ikkonċernati industrijali, l-organizzazzjonijiet tar-riċerka u tat-teknoloġija, il-klijenti interessati, ir-regolaturi Ewropej u l-Kummissjoni;

20.Jinnota li l-Alleanza Nukleari talbet lill-Kummissjoni tappoġġja b’mod attiv is-sħubija preliminari għall-SMRs u tittrasformaha fi sħubija sħiħa;

21.Jirrikonoxxi li kundizzjoni bażika biex l-SMRs jiżviluppaw fl-UE hija li jiġi żgurat li jiġu stabbiliti politika favorevoli u newtrali mil-lat tat-teknoloġija, kif ukoll qafas regolatorju stabbli fit-tul, li jqisu teknoloġiji differenti tal-enerġija nadifa u jindirizzaw kwistjonijiet ta’ sikurezza nukleari; jenfasizza l-ħtieġa ta’ qafas legali prevedibbli li jipprovdi ċertezza għall-investituri għat-tul tal-ħajja tal-SMRs;

22.Jinnota li bħalissa ma hemm l-ebda suq unifikat għall-SMRs, minħabba s-sensittivitajiet nazzjonali rigward it-teknoloġija tal-enerġija nukleari u r-rieda ta’ ħafna pajjiżi li jippromwovu l-industriji tagħhom stess; jirrikonoxxi li biex l-SMRs jibbenefikaw minn ekonomiji ta’ skala possibbli, jeħtieġ li jiġi stabbilit qafas standardizzat għall-għoti tal-liċenzji;

23.Jirrikonoxxi li l-implimentazzjoni ta’ mekkaniżmi kuntrattwali u finanzjarji xierqa, bħall-kuntratti bilaterali fit-tul u l-kuntratti għad-differenza, hija meħtieġa biex tipprovdi prevedibbiltà fit-tul tas-swieq tal-enerġija u trawwem investimenti futuri fl-SMRs;

24.Jistieden lill-Kummissjoni tniedi strateġija industrijali tal-UE speċifika għall-SMRs, li tinkludi enfasi fuq proċeduri effiċjenti għall-għoti tal-permessi u aċċess għall-finanzi u ktajjen tal-provvista stabbli, bl-għan li jkun jista’ jseħħ l-użu ta’ teknoloġiji tal-SMRs fil-livell nazzjonali u tinħoloq kuxjenza dwar l-SMRs;

25.Jirrikonoxxi l-ħtieġa li tiġi protetta l-vulnerabbiltà tas-sistemi tat-teknoloġija tal-informazzjoni meħtieġa biex l-SMRs jiffunzjonaw, minħabba r-riskju ta’ attakki ċibernetiċi; jenfasizza li ċ-ċibersigurtà jeħtieġ li titqies bħala parti fundamentali tas-sigurtà nukleari ġenerali;

26.Jenfasizza l-importanza ta’ antiċipazzjoni, innovazzjoni u adattament proattivi biex jintlaħqu b’mod effettiv l-aspettattivi tad-disinjaturi tal-SMRs f’termini ta’ mmaniġġjar taċ-ċiklu tal-fjuwil u tal-iskart, inkluża ħidma preparatorja biex tiġi żgurata t-tħejjija operattiva ta’ rekwiżiti speċifiċi taċ-ċiklu tal-fjuwil front-end qabel l-użu tal-SMRs;

27.Jenfasizza li d-deċiżjonijiet dwar kwistjonijiet front-end kif ukoll back-end għandhom jittieħdu kmieni fil-fażi tal-iżvilupp, bl-involviment attiv tal-industrija taċ-ċiklu tal-fjuwil sabiex jiġu ottimizzati u vvalidati kunċetti ġodda, b’enfasi fuq il-kostijiet operattivi taċ-ċiklu tal-ħajja u s-sigurtà tal-provvista fit-tul, kif ukoll il-programmi għall-immaniġġjar tal-fjuwil użat u tal-iskart radjuattiv; jinnota li dan l-involviment bikri tal-atturi involuti fiċ-ċiklu tal-fjuwil huwa essenzjali biex ikun jista’ jseħħ użu kummerċjali aktar faċli u aktar rapidu tal-SMRs;

28.Jenfasizza li appoġġ ċar mill-awtoritajiet pubbliċi biex tiġi ggarantita l-kompetittività tal-katina tal-provvista tal-SMRs se jkun essenzjali biex ikun possibbli li l-fornituri tas-servizzi jkollhom perspettiva fit-tul u jaċċelleraw il-proġetti tagħhom biex jissodisfaw it-tieqa ta’ opportunità tas-suq; jenfasizza l-ħtieġa ta’ proċeduri rapidi għall-għoti tal-permessi meta l-SMRs ikunu lesti għas-suq; iħeġġeġ lill-Kummissjoni tikkunsidra modi kif tħaffef il-proċessi tal-għoti tal-permessi għall-introduzzjoni tal-SMRs;

29.Jenfasizza li l-fattur ewlieni ta’ suċċess tal-SMRs huwa l-produzzjoni serjali, li tippermetti lill-manifatturi jtejbu l-proċessi tagħhom u jnaqqsu l-kostijiet u l-ħin tal-produzzjoni;

30.Jappella għall-aċċellerazzjoni tal-kooperazzjoni tar-regolaturi nazzjonali tas-sikurezza nukleari sabiex jiġi armonizzat proċess ta’ qabel l-għoti tal-liċenzji u standardizzazzjoni tad-disinji tal-SMRs abbażi ta’ valutazzjonijiet dwar is-sikurezza aċċettati b’mod komuni; jirrikonoxxi li d-disinji standard tal-mudelli tal-SMRs huma prerekwiżit għall-użu b’suċċess tagħhom fuq skala kummerċjali u jridu jegħlbu l-eżistenza ta’ approċċi regolatorji differenti madwar l-Istati Membri tal-UE;

31.Jilqa’ l-inizjattivi internazzjonali biex jiġu żviluppati disinji speċifiċi ta’ SMRs; isostni li r-rieżamijiet konġunti tad-disinji tal-SMRs jistgħu jaċċelleraw il-proċess tal-għoti tal-liċenzji mingħajr ma jikkompromettu s-sikurezza u s-sigurtà nukleari;

32.Jistieden lill-Kummissjoni tieħu rwol proattiv fl-istabbiliment u fl-appoġġ ta’ “alleanzi regolatorji” fost l-Istati Membri, meta meħtieġ f’kooperazzjoni ma’ organizzazzjonijiet internazzjonali; iqis li wieħed mill-objettivi jkun li jiġi żgurat livell ogħla ta’ ekwivalenza fil-proċeduri tal-għoti tal-liċenzji tal-SMRs;

33.Iħeġġeġ lill-korpi regolatorji u lill-awtoritajiet nazzjonali jkomplu joħolqu l-kundizzjonijiet biex jissimplifikaw u jarmonizzaw il-proċess tal-għoti tal-liċenzji tal-SMRs madwar l-Unjoni; jemmen li huwa fl-interess strateġiku tal-UE li tħeġġeġ lir-regolaturi nazzjonali jadottaw proċessi ta’ għoti tal-liċenzji, u li dawn il-proċessi jkunu inklużivi mil-lat tat-teknoloġija, ibbażati fuq il-prestazzjoni u bbażati fuq ir-riskju u jkunu jistgħu jissimplifikaw il-valutazzjonijiet tas-sikurezza, inaqqsu l-piżijiet regolatorji, isaħħu s-sikurezza, inaqqsu l-kostijiet u jiffaċilitaw l-innovazzjoni;

34.Jirrikonoxxi l-ħtieġa li jiġu esplorati u identifikati biżżejjed l-għażliet kollha possibbli għall-finanzjament tal-produzzjoni Ewropea tal-SMRs u li tiżdied u tiġi appoġġjata l-katina tal-provvista relatata; jistieden lill-Kummissjoni u lill-Istati Membri jivvalutaw is-sorsi ta’ finanzjament disponibbli għall-użu tal-SMRs u, jekk jitqies xieraq, ifasslu pjan biex jiġu indirizzati n-nuqqasijiet fil-finanzjament;

35.Jenfasizza li l-produzzjoni tal-SMRs fil-livell nazzjonali tinvolvi kostijiet kapitali għoljin li jistgħu jiġu ffaċilitati minn bosta lievi bħal investimenti privati, sussidji nazzjonali, fondi Ewropej, u self mill-Bank Ewropew tal-Investiment (BEI); jinnota li dan ikun jirrikjedi li l-BEI jallinja l-politika tiegħu dwar is-self għall-enerġija mat-tassonomija tal-UE sabiex jappoġġja bis-sħiħ l-investiment fil-produzzjoni tal-SMRs;

36.Jistieden lill-Kummissjoni tesplora l-possibbiltà għall-Istati Membri li jużaw kwalunkwe fond eliġibbli jew il-Fond għal Tranżizzjoni Ġusta biex jiffinanzjaw ir-riċerka u l-iżvilupp tal-SMRs;

37.Jirrikonoxxi l-ħtieġa tal-inklużjoni tat-teknoloġiji tal-enerġija mill-fissjoni u mill-fużjoni nukleari, inklużi t-teknoloġiji taċ-ċiklu tal-fjuwil nukleari, fil-lista ta’ teknoloġiji b’emissjonijiet żero netti fl-ambitu tal-Att dwar l-Industrija b’Emissjonijiet Żero Netti, bħala eliġibbli attwalment għal appoġġ fl-ambitu tal-Pjattaforma tat-Teknoloġiji Strateġiċi għall-Ewropa (STEP) u potenzjalment eliġibbli fl-ambitu ta’ strumenti simili fil-futur;

38.Jilqa’ l-fatt li l-programm ta’ riċerka u taħriġ tal-Euratom diġà jiffinanzja proġetti tar-riċerka relatati mas-sikurezza u l-għoti tal-liċenzji ta’ teknoloġiji tal-SMRs u tal-AMRs; jenfasizza li finanzjament aktar ikkoordinat u ffukat huwa meħtieġ b’mod urġenti jekk l-UE trid tibqa’ kompetittiva fl-iżvilupp tal-industrija tal-SMRs, inkluż titjib fl-immaniġġjar tal-iskart u fil-kapaċitajiet tar-riċiklaġġ tal-fjuwil;

39.Jirrakkomanda li jiġi kkunsidrat l-aċċess inklużiv tal-SMRs għal finanzjament tal-UE lil hinn mill-iskemi ta’ finanzjament tal-Euratom;

40.Jappella għall-istabbiliment ta’ struttura Ewropea apposta għall-SMRs, bħal pereżempju impriża konġunta ġdida jew alleanza industrijali għall-SMRs, jew il-ħolqien ta’ Proġett Importanti ta’ Interess Ewropew Komuni speċifikament għall-SMRs, li jista’ jkollu l-għan li jiżviluppa programm avvanzat ta’ dimostrazzjoni tar-reatturi;

41.Iqis li huwa meħtieġ appoġġ finanzjarju Ewropew biex jitnedew studji ta’ fattibbiltà għall-SMRs; jemmen li l-iżvilupp ta’ industrija emerġenti tal-SMRs fl-UE jista’ jkun ta’ benefiċċju għall-objettivi tagħha b’rabta mal-impjiegi billi potenzjalment irawwem il-ħolqien ta’ impjiegi u ta’ traineeships ta’ kwalità għolja u jiffaċilita t-taħriġ mill-ġdid jew it-titjib tal-ħiliet tal-ħaddiema;

42.Jesprimi tħassib dwar il-baġit ġenerali għall-SMRs meta mqabbel mas-sussidji ġenerużi mogħtija minn sħab u kompetituri ekonomiċi, b’mod partikolari ċ-Ċina, ir-Russja u l-Istati Uniti tal-Amerka;

43.Jenfasizza li katina tal-provvista robusta, kapaċi u affidabbli bbażata fl-UE hija kritika għas-suċċess fil-produzzjoni tal-SMRs; ifakkar li l-UE għadha dipendenti fuq l-uranju importat, u dan joħloq riskji inerenti għas-sovranità strateġika u s-sigurtà tal-provvista tagħha;

44.Jistieden lill-Kummissjoni twettaq valutazzjoni biex tiżgura li l-iżvilupp tal-SMRs ma jkunx imxekkel minn nuqqasijiet potenzjali fil-katina tal-provvista, u tadatta kif xieraq;

45.Jirrikonoxxi l-importanza li jiġu identifikati l-isfidi ewlenin fl-adattament tal-katina tal-valur għall-karatteristiċi speċifiċi tal-SMRs meta mqabbla mar-reatturi l-kbar u l-ħtieġa ta’ konsultazzjonijiet mal-atturi ewlenin pubbliċi u privati fis-suq tal-enerġija;

46.Jirrikonoxxi kemm l-adattamenti meħtieġa fiċ-ċiklu tal-fjuwil għall-provvista tal-SMRs kif ukoll il-ħtiġijiet ta’ investiment għal faċilitajiet addizzjonali;

47.Iħeġġeġ l-isforzi tal-industrija Ewropea biex tiżgura l-provvista tat-tipi ġodda ta’ fjuwils li jaf isiru meħtieġa għal xi SMRs;

48.Jenfasizza li l-opportunità li jiġu inklużi tagħmir standardizzat u komponenti industrijali ta’ grad kummerċjali ta’ kwalità għolja fid-disinji tal-SMRs tista’ tikkontribwixxi ħafna għall-ottimizzazzjoni tal-katina tal-provvista, u b’hekk it-tul taż-żmien għall-approvazzjoni jiġi aċċellerat;

49.Jirrikonoxxi l-ħtieġa li jiġi definit pjan direzzjonali komprensiv għar-riċerka u l-iżvilupp (R&Ż) li jissodisfa kemm l-aspettattivi tas-suq kif ukoll ir-rekwiżiti tas-sikurezza, u barra minn hekk, li jidentifika l-infrastruttura esperimentali meħtieġa għall-implimentazzjoni ta’ dan il-pjan direzzjonali, flimkien mal-programmi ta’ taħriġ u edukazzjoni meħtieġa;

50.Jilqa’ l-fatt li, f’kollaborazzjoni maċ-Ċentru Konġunt tar-Riċerka (JRC), il-komunità Euratom qed tiftaħ l-infrastrutturi tar-riċerka tal-UE u tappoġġja l-aċċess għal infrastrutturi uniċi tar-riċerka nukleari fl-Ewropa;

51.Jargumenta li biex jinżammu l-ogħla standards ta’ sikurezza u protezzjoni mir-radjazzjoni, huwa kruċjali li tinżamm il-ħtieġa ta’ esperimentazzjoni, ittestjar u kwalifikazzjoni ta’ fjuwils, materjali u teknoloġiji ġodda għaċ-ċiklu tal-ħajja kollu tal-SMRs avvanzati, taħriġ u bini tal-kapaċità tal-bniedem, tixrid tal-għarfien u tnaqqis tad-distakk bejn ir-riċerka u l-industrija;

52.Jilqa’ l-inizjattivi tal-Programmi Orizzont Ewropa u Ewropa Diġitali li jġibu benefiċċji ġodda fil-manifattura addittiva, fit-teknoloġiji diġitali, fir-robotika u fl-intelliġenza artifiċjali u jenfasizza li tali sinerġiji bejn il-Programm Euratom u Programmi oħra tal-UE għandhom jitwettqu bis-sħiħ;

53.Jissottolinja li r-R&Ż ma għandhomx jiffukaw biss fuq il-ħtiġijiet tal-ewwel ġenerazzjoni ta’ SMRs tal-ilma ħafif, li mistenni li jitqabbdu mal-grilja elettrika għall-bidu tas-snin 2030, iżda għandhom ikomplu jappoġġjaw ukoll it-tipi ta’ reatturi tar-raba’ ġenerazzjoni, magħrufa bħala AMRs;

54.Jisħaq li huma meħtieġa aktar riżorsi tal-UE għar-R&Ż fl-SMRs, li jistgħu jwasslu għal impatti soċjoekonomiċi pożittivi għall-UE;

55.Jirrikonoxxi l-ħtieġa li jiġi rfinat it-taħriġ eżistenti fil-ħiliet ewlenin tal-kostruzzjoni nukleari tul il-katina tal-valur kollha u li dawn jitqabblu mar-rekwiżiti partikolari tal-SMRs, filwaqt li tiġi żgurata l-prevenzjoni tan-nuqqas ta’ ħiliet fl-industrija nukleari usa’, b’mod partikolari fil-ħiliet li għalihom teżisti domanda għolja;

56.Jissottolinja l-importanza tal-ippjanar strateġiku tal-forza tax-xogħol, li għandu jħares ’il quddiem u jkun adattabbli, filwaqt li jqis il-bidliet potenzjali fir-rekwiżiti tal-ħiliet għall-użu tal-SMRs fil-katina tal-provvista usa’;

57.Jirrikonoxxi r-regoli diġà stabbiliti sew rigward ir-responsabbiltà tas-sidien u tad-detenturi tal-liċenzji tal-impjanti tal-enerġija nukleari għall-maniġġ, il-ħżin u r-rimi sikuri tal-iskart radjuattiv, kif ukoll għall-immaniġġjar ta’ fjuwil nukleari użat;

58.Jilqa’ l-potenzjal għall-minimizzazzjoni tal-iskart f’teknoloġiji ġodda tal-SMRs, b’mod partikolari permezz tat-tnaqqis kemm fil-volum kif ukoll fir-radjutossiċità tal-iskart; jappoġġja l-aħħar sforzi tar-R&Ż fl-immaniġġjar, ir-riċiklaġġ u l-użu mill-ġdid tal-iskart nukleari; jissottolinja l-importanza kbira tal-użu mill-ġdid għall-istabbiltà tal-provvista;

59.Jitlob li tiġi stabbilita strateġija speċifika dwar l-għeluq taċ-ċiklu tal-fjuwil nukleari bbażata fuq appoġġ għall-iżviluppaturi tat-teknoloġiji innovattivi;

60.Jinnota li skont il-JRC, għall-iskart radjuattiv ta’ livell għoli u għall-fjuwil użat, hemm kunsens wiesa’ fost il-komunitajiet xjentifiċi, teknoloġiċi u regolatorji li r-rimi finali f’repożitorji ġeoloġiċi profondi huwa l-aktar soluzzjoni fattibbli effettiva u sikura, li tista’ tiżgura li ma tiġi kkawżata l-ebda ħsara sinifikanti lill-ħajja tal-bniedem u lill-ambjent għall-perjodu ta’ żmien meħtieġ; jirrikonoxxi li xi Stati Membri jinsabu fi stadju avvanzat ta’ implimentazzjoni tal-faċilitajiet nazzjonali tar-rimi ġeoloġiku profond tagħhom, li mistennija jibdew joperaw f’dan id-deċennju;

61.Jisħaq fuq il-ħtieġa ta’ rapport annwali mill-Kummissjoni li jivvaluta l-progress li jkun sar fl-iżvilupp tal-SMRs; jitlob li dan ir-rapport jevalwa t-tqassim ġeografiku tal-finanzjament, l-għadd ta’ impjiegi maħluqa u l-bidliet fil-provvista u fid-domanda, u jivvaluta l-kostijiet dejjem jinbidlu tal-użu tal-SMRs, l-iżvilupp ta’ infrastrutturi apposta għall-SMRs, kif ukoll il-kollaborazzjoni transnazzjonali f’dan il-qasam; huwa tal-fehma li r-rapport għandu jevalwa wkoll il-fattibbiltà teknika, l-għoti tal-liċenzji, l-għażla tas-siti, il-finanzjament, il-katina tal-provvista, il-miżuri tas-sikurezza, l-involviment u l-progress b’rabta mal-fjuwil ta’ SMRs differenti; jemmen li, fl-aħħar nett, ir-rapport għandu jeżamina l-ostakli regolatorji għall-adozzjoni tat-teknoloġiji SMR u jirrakkomanda miżuri biex potenzjalment jiġu mmitigati dawn l-isfidi;

62.Jistieden lill-Kummissjoni tinvolvi ruħha bil-ħerqa fl-iżvilupp ta’ proġetti tal-SMRs u b’mod partikolari tħejji qafas legali rigward din l-għażla teknoloġika, billi tirrevedi u tarmonizza l-oqfsa tal-għoti tal-liċenzji, u aspetti legali oħra;

63.Jistieden lill-Istati Membri b’interess qawwi fin-nuklear u fl-SMRs biex juru impenn finanzjarju u regolatorju sabiex jikkontribwixxu għall-iżvilupp ta’ suċċess tal-SMRs fl-UE, f’kollaborazzjoni mill-qrib mal-Kummissjoni, li għandha tfittex li tavvanza l-iżviluppi f’dan il-qasam;

64.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni kif ukoll lill-Kumitat Ekonomiku u Soċjali Ewropew, lill-Kumitat Ewropew tar-Reġjuni u lill-Istati Membri.